အစစ်အမှန် နတ်ဘုရားဆည်းဆာချိန်

လူစီဖာနှင့် နတ်ဘုရားများ အကျဉ်းထောင်မှ ထွက်ခွာပြီးနောက် ချန်လွေ့၏ မျက်လုံးထဲမှ မြင်ကွင်းများ နောက်တစ်ကြိမ် ပြောင်းလဲသွားခဲ့ပြီး ပြင်းထန်သော တိုက်ပွဲ မြင်ကွင်းတစ်ခု အဖြစ်သို့ ပြောင်းလဲသွားခဲ့သည်။

ကောင်းကင် ကြေမွသွားခဲ့ပြီး လောက တစ်ခုလုံးသည် အဆက်မပြတ် တွန့်လိမ်၊ ကျိုးပဲ့၊ တုန်ခါ၍ နေခဲ့သည်။

နောက်ဆက်တွဲ ကြောက်မက်ဖွယ် စွမ်းအင်များသည် အရပ် လေးမျက်နှာသို့ ပျံ့နှံ့သွားခဲ့သည်။ ချန်လွေ့အတွက် ထိုသို့ အရာများသည် ပုံရိပ်ယောင်များမျှသာ ဖြစ်သော်လည်း ထိုစွမ်းအင် အဆင့်၏ ကြောက်မက်ဖွယ်ကောင်းမှုကို ခံစားမိ၏။ သူ၏ စွမ်းအား အထွတ်အထိပ်တွင်ပင် နောက်ဆက်တွဲ စွမ်းအားများတွင် ပါဝင် ပတ်သက်ခဲ့ပါက သူလည်း သေချာပေါက် ရှင်းလင်းခြင်းခံရပေလိမ့်မည်။

သိပ်မကြာသေးခင်က ချန်လွေ့သည် ကြောက်မက်ဖွယ်ရာ မိုးပျံနယ်မြေတွင် ကြီးမားသော ပြင်းထန်သည့် တိုက်ပွဲ တစ်ခုကို မျက်မြင်တွေ့ခဲ့သည်။ သူ၏ ရှေ့တွင် တိုက်ခိုက်နေသူ အရေအတွက်က ထိုစစ်ပွဲတွင်ထက် နည်းပါးလှသော်လည်း စွမ်းအားနှင့် ပြင်းထန်မှုက အဆ ၁၀၀၀ ပိုများသည်။

ထိုအရာမှာ နတ်ဘုရားများ၏ တိုက်ပွဲ၊ ပို၍ တိတိကျကျပြောရလျှင် ပထမဆုံး နတ်ဘုရားများ၏ တိုက်ပွဲပင်။

နတ်ဘုရားတစ်ပါးစီက အန္တိမနတ်ဘုရားကို အလယ်ဗဟိုတွင် ဝိုင်းရံထားလျက် နားလည်ရခက်သော စွမ်းအားများ ပါဝင်သည့် ကြယ်စင်စု တစ်ခုစီ အဖြစ်သို့ ပြောင်းလဲသွားခဲ့သည်။ ထိုးနှက်မှုတိုင်းက ကြောက်မက်ဖွယ်ရာ စွမ်းအားကို ယူဆောင်လာနိုင်ပေသည်။ ၎င်းမှာ အန္တိမနတ်ဘုရား ဖြစ်လျှင်ပင် ထိုတိုက်ခိုက်မှုမျိုးအောက် ဒဏ်ရာမရဘဲ နေရန် မဖြစ်နိုင်။ ဒဏ်ရာရသွားခဲ့သော အန္တိမနတ်ဘုရားသည် ဒေါသတကြီး ဟိန်းဟောက်လိုက်သည်။ သူ၏ စိတ်ဆန္ဒ ပျံ့နှံ့သွားပြီး နေရာတိုင်း ကြယ်စင်စုများ ရှင်းလင်းခံလိုက်ရသည်။

နတ်ဘုရားများ၏ မသေနိုင်သော ခန္ဓာကိုယ်များက ကြောက်မက်ဖွယ်ရာ စွမ်းအားကြောင့် ပြာမှုန့် အဖြစ်သို့ ပြောင်းလဲသွားခဲ့သည်။ နတ်ဘုရားများစွာ တစ်ပါးပြီးတစ်ပါး ကျဆုံးခဲ့၏။

အသက် ရှင်သန်ရန် အတွက် နတ်ဘုရားများ စိတ်ထဲမှ ကြောက်ရွံ့မှုကို ဖိနှိပ်ပြီး ဆက်လက်၍ ဝန်းရံတိုက်ခိုက်ရန် မှလွဲ၍ အခြားရွေးချယ်စရာ မရှိတော့ပေ။ သို့သော် အန္တိမနတ်ဘုရား၏ စွမ်းအားက အလွန်အမင်း အားကောင်းလွန်းနေသည်။ တိုးမြင့်လာသော စွမ်းအားက စကြဝဠာ အသေးစား တစ်ခုနှင့် တူနေသည်။ ကြယ်စင်စုများနှင့် ကြယ်များ၏ တောက်ပမှု အားလုံးက သူ၏ရှေ့တွင် သေးငယ်ပြီး မှိုင်းညို့နေပုံရသည်။

နတ်ဘုရားများအတွက် အခြေအနေ အလွန်အမင်း အန္တရာယ် များနေပြီ ဖြစ်သည်။

ထိုအခိုက်အတန့်တွင် အန္တိမနတ်ဘုရား ရုတ်တရက် ထိတ်လန့်သော အမူအရာကို ပြသခဲ့သည်။ အဘယ်ကြောင့်ဆိုသော် သူ အကြောက်ဆုံး စွမ်းအား ပေါ်လာခဲ့ပြီ ဖြစ်၍ပင်။ သေခြင်းနှင့် ရှင်ခြင်း စာအုပ်။

ဒီကောင်စုတ်တွေက အကျဉ်းထောင်ထဲမှာ ငါ တိတ်တဆိတ် သိမ်းထားတဲ့ အန္တိမသော့ကို တကယ် လွှတ်ပေးလိုက်ပြီး လူစီဖာ အပေါ်မှာ ငါ ချမှတ်ထားတဲ့ ဖိနှိပ်မှု စွမ်းအား ကိုတောင် ဖွင့်ပေးလိုက်တယ်။ အခု အကြောက်ရဆုံး သေခြင်းနှင့် ရှင်ခြင်း စာအုပ် လွတ်မြောက် သွားခဲ့ပြီ...

သေခြင်းနှင့် ရှင်ခြင်း အငွေ့အသက် ပေါ်လာသည်နှင့် အန္တိမနတ်ဘုရား၏ စွမ်းအားက အမှန်တကယ်ပင် များစွာ ဖိနှိပ်ခံလိုက်ရသည်။ ထိုအခွင့်အရေးကို အသုံးချပြီး ဟိန့်စ်နှင့် ဆိုရန်ရတ်တို့ ဦးဆောင်သည့် ကျန်ရှိနေကြသော နတ်ဘုရားများက အသက်များ စတေးကာ အရူးအမူးဆုံး တိုက်ခိုက်တော့သည်။

အန္တိမနတ်ဘုရားက နောက်ဆုံးတွင် အားအင် ကုန်ဆုံးသွားခဲ့သည်။ ပျက်စီး သွားသော ခန္ဓာကိုယ်က သွေးနီရောင် အငွေ့အသက်ကို ထုတ်လွှတ်နေပြီး သူ၏ ခန္ဓာကိုယ် တစ်စပြီးတစ်စ ရှင်းလင်းခြင်း ခံရတော့မည် ဖြစ်သည်။

သူက မျှော်လင့်ချက် မဲ့နေသော အခြေအနေတွင် ရှိနေကြောင်း သဘော ပေါက်လိုက်ပြီး အန္တိမနတ်ဘုရားသည် ပြတ်သားသော ဆုံးဖြတ်ချက် တစ်ခုကို ချလိုက်သည်။ သူ လုံးဝ ရှင်းလင်းခြင်း ခံရမည့် အန္တရာယ်ကို ရင်ဆိုင်လျက် သေခြင်းနှင့်ရှင်ခြင်း စာအုပ် ထံသို့ အသည်းအသန် ပြေးဝင်သွားခဲ့၏။ သူက လူတိုင်းကို တုန်လှုပ်စေသော စွမ်းအား တစ်ခု ပေါက်ကွဲစေခဲ့ပြီး သေခြင်းနှင့် ရှင်ခြင်း စာအုပ်နှင့် အတင်းအကျပ် ပေါင်းစည်းလိုက်သည်။

အန္တိမ နတ်ဘုရား သေဆုံးသွားလျှင်ပင် လူတိုင်းက သူနှင့်အတူ မြှုပ်နှံခြင်းခံရမည် ဖြစ်ပေသည်။

၎င်းမှာ သေခြင်းနှင့် ရှင်ခြင်း စာအုပ် စွမ်းအား တစ်ခုတည်း မဟုတ်တော့ပေ။ လူစီဖာက အန္တိမနတ်ဘုရား၏ ဖိနှိပ်မှုကို အတင်းအကျပ် ဖြိုခွဲရန်နှင့် သေခြင်းနှင့် ရှင်ခြင်း စာအုပ်၏ ချိပ်ပိတ်မှုကို ဖွင့်ရန် နတ်ဘုရားများ၏ စွမ်းအားကို ငှားခဲ့သည်။ သူ၏ အသက်စွမ်းအား အပြင်းအထန် ဒဏ်ရာရနေပြီ ဖြစ်သည်။ သူ၏ စွမ်းအား အားလုံးဖြင့် ဖိနှိပ်ထားလျှင်ပင် သူသည် အန္တိမနတ်ဘုရား တည်ရှိရာ သေခြင်းနှင့် ရှင်ခြင်းစာအုပ်ကို တံဆိပ်ခတ်နိုင်မည် မဟုတ်ပေ။

လူစီဖာ ရှင်းလင်းခြင်း ခံရလုနီးပါး ဖြစ်နေချိန်တွင် လုံးဝ မေ့နိုင်မည် မဟုတ်သော အရာတစ်ခု ဖြစ်ပွားခဲ့သည်။ ရာဖာတီသည် သူ၏ အရှေ့တွင် ရပ်ပြီး ဖန်တီးခြင်း စာအုပ်နှင့် ပျက်စီးခြင်းစာအုပ် ကို အသက်သွင်းရန် သူ၏ ပါရမီများကို အသုံးပြုခဲ့သည်။ လူစီဖာ၏ ကိုယ်ထဲမှ ချိပ်ပိတ်စွမ်းအားကို ပေါင်းစပ်လိုက်ရာ သူက ပေါက်ကွဲတော့မည့် သေခြင်းနှင့် ရှင်ခြင်း စာအုပ်ကို အန္တိမနတ်ဘုရား၏ ကျန်ရှိနေသော ဝိညာဉ်နှင့်အတူ ကိုယ်ပိုင် ဒြပ်စင်လောကထဲ ချိပ်ပိတ်လိုက်သည်။ တန်ဖိုးမှာ သူ၏ အသက်ပင်။

ချိပ်ပိတ်ခံတော့ရမည့် နောက်ဆုံးသော အခိုက်အတန့်တွင် အန္တိမနတ်ဘုရားသည် သူ၏ ဝိညာဉ်နှင့် သေခြင်းနှင့် ရှင်ခြင်း စာအုပ်ဖြင့် ကျိန်စာတိုက်ခဲ့သည်။ သူက လူစီဖာအား အသက်ရှင်လျက် ထာဝရ ငရဲကျပြီး ဒုက္ခရောက်စေရန် ကျိန်စာတိုက် ခဲ့သည်။ နတ်ဘုရားများအား နတ်ဘုရား ဘဝ ဆုံးရှုံးစေရန်နှင့် သူတို့၏ ဝိညာဉ်များ အမှောင်ထုထဲ ထာဝရ နစ်မြုပ်သွားရန် ကျိန်စာတိုက်ခဲ့သည်။

ထိုအခိုက်အတန့်အထိ လူစီဖာသည် သော့ကံကြမ္မာ အဖြစ်မှ လွတ်မြောက် ခဲ့သော်လည်း ချစ်သူကို ဆုံးရှုံးခဲ့ရသည်။ ထိုနာကျင်မှုမျိုးက မည်သည့် ကျိန်စာမှ မလိုအပ်ပေ။

ချန်လွေ့၏ မျက်လုံးထဲမှ မြင်ကွင်းက တဖြည်းဖြည်း မှုန်ဝါးလာခဲ့သည်။ သူက နောက်ဆုံးတွင် ပထမဆုံး နတ်ဘုရားများ တိုက်ပွဲ၏ ဇာတ်လမ်း အပြည့်အစုံကို နားလည်၍ သွားခဲ့ပြီး ဒြပ်စင်လောကတွင် ချိပ်ပိတ်ထားသော တည်ရှိမှုကိုလည်း နားလည်ခဲ့သည်။ ဒြပ်စင်စစ်ပွဲက ဒြပ်စင် နတ်ဘုရားမ မရှိသည့်အခါ ချိပ်ပိတ်မှုကို ထိန်းသိမ်းရန် ထုံးတမ်းစဉ်လာ ဖြစ်ရမည်။

ရာဖာတီ၏ နတ်ဘုရားဘဝ အပိုင်း အစများ စုဆောင်းမိမှသာ ဒြပ်စင်စစ်ပွဲ ပြီးဆုံးနိုင်ပေမည်။

၎င်းမှာ ပထမဆုံး နတ်ဘုရားများ၏ တိုက်ပွဲနှင့် နတ်ဘုရား၏ အခွင့်အာဏာ လှည့်ပတ်မှု ဖြစ်သည်။ နောက်ဆုံးတွင် အန္တိမနတ်ဘုရားသည် နတ်ဘုရားများ ကြောင့် ရှုံးနိမ့်ခဲ့ပြီး ဒြပ်စင်လောကတွင် ချိပ်ပိတ်ခံခဲ့ရသည်။

မျက်နှာပြင် နောက်တစ်ခါ ပြောင်းလဲ လာခဲ့သည်။ နတ်ဘုရားများနှင့် အမှောင်ထု၏ နတ်ဘုရားဖြစ်တည်မှုမှ ပြောင်းလဲထားသော အသူရာချောက်နက် စိတ်ဆန္ဒတို့အကြား တိုက်ပွဲတစ်ခု ဖြစ်ပွား ခဲ့သည်။ နတ်ဘုရားအချို့ မမျှော်လင့်ဘဲ ကျဆုံးသွားပြီးနောက် နတ်ဘုရားများက အမှောင်ထု၏ နတ်ဘုရားဘဝမှာ သူတို့၏ ကံကြမ္မာ အမွှာများနှင့် ညီမျှကြောင်း နောက်ဆုံးတွင် တွေ့ရှိလိုက်ရသည်။

အမှောင်ထု၏ နတ်ဘုရားဘဝကို ရှင်းလင်းခြင်းသည် ကိုယ့်ကိုယ်ကိုယ် သတ်သေခြင်းနှင့် တူညီနေသောကြောင့် နတ်ဘုရားများသည် သူတို့၏ မူလ ရည်ရွယ်ချက်ကို စွန့်လွှတ်လိုက်ကြပြီး အသူရာချောက်နက်စိတ်ဆန္ဒကို ချော်ရည် ကုန်းမြေတွင် ချိပ်ပိတ်လိုက်ကြသည်။ မတော်တဆမှု တစ်ခုခု ဖြစ်မည်စိုး၍ သူတို့က အဓိကကုန်းမြေ အပေါ်တွင် အခွင့်အာဏာ စွမ်းအား ချိပ်ပိတ်ကို သတ်မှတ်ခဲ့သည်။

ဘေးအန္တရာယ်ကို လုံးဝဖြေရှင်းနိုင်ပြီ ထင်သော နတ်ဘုရားများက အန္တိမ နတ်ဘုရားကို အစားထိုးကာ လောကကို ထိန်းချုပ်ပြီး လွတ်လပ်ပြီး အတားအဆီး မရှိသော အံ့သြဖွယ်ရာဘဝကို ခံစားကာ၊ သက်ရှိ အားလုံး၏ ကိုးကွယ်မှုကို လက်ခံပြီး၊ ယုံကြည်သူများ အပေါ်တွင် စွမ်းအား အမျိုးမျိုးကို ပေးသနားခဲ့သည်။ သူတို့ နတ်ဘုရားအစေခံ အများအပြားကို ရွေးချယ်ခဲ့ကြပြီး သူတို့၏ ယုံကြည်မှုနှင့် သွန်သင်ချက်များကို ဖြန့်ဝေခဲ့သည်။

ကိုင်းရှိုင်းသော ယုံကြည်သူများသည် နတ်ဘုရားတောင်ခြေရင်းတွင် ကောင်းကင်တမန်မြို့တော်ကို တည်ဆောက်ခဲ့ကြသည်။ နတ်ဘုရား အစေခံများ၏ အစီရင်ခံစာများနှင့် နတ်ဘုရား၏ သွန်သင်ချက်များကို နားထောင်ခြင်းမှတစ်ဆင့် နတ်ဘုရားများ သည် အခါအားလျော်စွာ အံ့သြဖွယ်ရာများ ပြုလုပ်ကြသည်။ ချန်လွေ့၏ အမြင်တွင် ထိုကောင်းကင်တမန်မြို့တော်သည် သိဒ္ဓိကျောင်းတော်၏ သိဒ္ဓိအလင်းမြို့တော် နှင့် အလွန်ပင် ဆင်တူသည်။ ၎င်းကို မိုက်ကယ်နှင့် အခြားသူများက မူလ ကောင်းကင်တမန်မြို့တော်ကို အခြေခံ၍ စီစဉ်ခဲ့ခြင်း ဖြစ်နိုင်သည်။

နတ်ဘုရားများအပြင် ကောင်းကင်တမန် မြို့တော်၏ ထိပ်တန်း အုပ်ချုပ်ရေးမှူးမှာ ကောင်းကင်တမန် ၇ပါး၏ ခေါင်းဆောင် ဖြစ်၏။ အကြီးအကဲ ကောင်းကင်တမန်တော် ၇ပါး အနက် လူစီဖာက ပထမအဆင့်တွင် ရှိသည်။

လူစီဖာက အန္တိမ အခွင့်အာဏာ စွမ်းအား အကန့်အသတ်ကြောင့် နတ်ဘုရားအဆင့်သို့ မဖောက်ထွက် နိုင်သော်လည်း လူစီဖာသည် စွမ်းအား၊ တိုက်ခိုက်ရေးအတွေ့အကြုံနှင့် ဝါရင့်မှုတို့ မည်သို့ပင်ဖြစ်စေ နတ်ဘုရား အောက်မှ နံပါတ်တစ်ပုဂ္ဂိုလ် အဖြစ် ထိုက်တန်၏။

ဒြပ်စင်နတ်ဘုရားမ၏ ကျဆုံးခြင်းကို ကြုံတွေ့ခဲ့ရသော လူစီဖာသည် အချိန်၏ နှစ်သိမ့်မှုအောက်တွင် သူ၏နှလုံးသားထဲမှ ဒဏ်ရာများ တဖြည်းဖြည်း ကုစားခဲ့သည်။ ယခု သူ့တွင် နွေးထွေးသော အိမ်တစ်လုံး ရှိနေသည်။ သူ၏ ဇနီးကြီးမှာ ဒြပ်စင် နတ်ဘုရားမ၏ ယခင် နတ်ဘုရားအစေခံ ဖြစ်သော ဇာမဏီ ဖြစ်ပြီး သူ့တွင် ကိုယ်လုပ်တော်များစွာ ရှိသည်။ အစွမ်း အထက်ဆုံး ကောင်းကင်တမန်အနေဖြင့် သူ့တွင် ဂေဘရီရယ်နှင့် ဖိုက်သွန် ကဲ့သို့သော ထူးချွန်သည့် အမျိုးသမီးများ အပါအဝင် အားကျသူ အများဆုံး ရှိသည်။

ထိုစဉ်က အန္တိမနတ်ဘုရား၏ ပူးပေါင်း ကြံစည်မှုကို ဖော်ထုတ်ခဲ့သော နတ်ဘုရား အစေခံမှာ အနာဂတ်အမြင် စွမ်းအားကို ပိုင်ဆိုင်ထားသော နတ်သူငယ် အလူစီယာ ဖြစ်သည်။ သူ့ကို နတ်ဘုရားများက ကံကြမ္မာအစေခံအဖြစ် ခန့်အပ်ခဲ့သည်။ သူက လူစီဖာနှင့် မိတ်ဆွေများ ဖြစ်လာ ခဲ့ကြသည်။ မိုက်ကယ်၊ စေတန်နှင့် အခြားသူများလည်း လူစီဖာ၏ စွမ်းအားကို အားကျပြီး အရာရာတွင် သူ၏အမိန့်ကို လိုက်နာခဲ့ကြသည်။

မိသားစု၊ ဆွေမျိုးများနှင့် မိတ်ဆွေများ ရှိခြင်းသည် လူစီဖာအား တည်ရှိမှု၏ အဓိပ္ပာယ်ကို ပြန်လည်ရရှိစေခဲ့သည်။

သို့သော် ကောင်းသော အချိန်များက ကြာရှည် မခံခဲ့ပေ။ နတ်ဘုရားများသည် လွတ်လပ်မှုနှင့် အန္တိမ ထိန်းချုပ်မှုကို ခံစားနေစဉ် သူတို့၏ ဆန္ဒများလည်း လျင်မြန်စွာ ကျယ်ပြန့်လာခဲ့သည်။

ထိုဘုံရန်သူ ဆုံးရှုံးလိုက်ရခြင်းကြောင့် မူလ ဆန့်ကျင်ဘက် အမြင်များ စတင် ပေါ်ပေါက်လာခဲ့လေသည်။ ယုံကြည်မှု အငြင်းပွားမှုများ ပို၍ ပြင်းထန်လာခဲ့သည်။ သူတို့ နောက်ဆုံးတွင် အလင်းရောင် နှင့် အမှောင်ထုဟူ၍ နှစ်ခြမ်း ကွဲသွားခဲ့သည်။

အလင်းရောင် နတ်ဘုရား ဟိန့်စ်နှင့် အငြိုးအတေးဟောင်းကြောင့် လူစီဖာက အမှောင် နတ်ဘုရားစကားပြန် စေတန်၏ ဖိတ်ခေါ်မှုကို တွန့်ဆုတ်ခြင်း မရှိဘဲ လက်ခံခဲ့သည်။ သူက အမှောင်နတ်ဘုရား ဆိုရန်ရတ် ဦးဆောင်သော အမှောင်ထု ဘက်ခြမ်းကို ရွေးခဲ့ပြီး နတ်ဆိုးဘုံတွင် အထီးကျန်စွာ နေထိုင်ခဲ့သည်။

မိုက်ကယ်သည် မူလက ထိပ်တန်း အလင်းရောင် နတ်ဘုရားစကားပြန် သုံးဦးထဲမှ တစ်ဦး ဖြစ်သောကြောင့် သူ ဟိန့်စ်ကို သစ္စာဖောက်ရန် မဖြစ်နိုင်ပေ။ ဂေဘရီရယ်နှင့် ရာဖယ်ရယ်တို့ အတွက် လည်း ထိုနည်းလည်းကောင်းပင်။ ယခင် မိတ်ဖက်များ ရန်သူ ဖြစ်လာခဲ့သည်။ အမှောင်ထု နတ်ဘုရားစကားပြန်များကို လူသားလောက ကောင်းကင်တမန်များက သက်ကြွေသူများ အဖြစ် ရှုတ်ချခဲ့သည်။

ဖိုက်သွန်သာလျှင် လူစီဖာ နောက်သို့ အမှောင်ထုထဲ တိတ်ဆိတ်စွာ လိုက်ပါ သွားခဲ့သည်။

အလင်းရောင်က အမှောင်ထုကို ဆိုးသွမ်းမှုအဖြစ် ရှုတ်ချခဲ့ပြီး အမှောင်က အလင်းကို ဟန်ဆောင်မှုအဖြစ် ပြန်လည် ချေပခဲ့သည်။ ယုံကြည်မှုနှင့် ယုံကြည်ချက် အကြား ပဋိပက္ခအောက်တွင် နှစ်ဖက် အကြား စစ်ပွဲက ရှောင်လွှဲ၍ မရနိုင်ဘဲ ဖြစ်ပွားခဲ့သည်။

၎င်းမှာ ကာလရှည် စစ်ပွဲတစ်ခုဖြစ်ပြီး ကပ်ဘေး တစ်ခုလည်း ဖြစ်ပေသည်။ သစ္စာရှိသူများက နတ်ဘုရား စိတ်ဆန္ဒ အတွက် အရူးအမူး တိုက်ခိုက်ခဲ့ကြပြီး ရေတွက်၍ မရနိုင်သော နတ်ဘုရား စကားပြန်များ၊ နတ်ဘုရားအစေခံများနှင့် ယုံကြည်သူများ စစ်ပွဲတွင် သေဆုံးခဲ့ကြရာ ဝမ်းနည်းစရာပင် ဖြစ်သည်။ ချန်လွေ့က ကြောက်မက်ဖွယ် မိုးပျံနယ်မြေတွင် ၎င်းကို မျက်မြင်တွေ့ရှိခဲ့ပြီး ဖြစ်သည်။ ယခုအထိ သူ ကြောက်ရွံ့နေဆဲပင်။

မုန်းတီးမှု စုပုံလာခြင်းနှင့် ယုံကြည်မှု အယူသည်းခြင်းတို့က စစ်ပွဲကို ပိုမို၍ ပြင်းထန်စေခဲ့သည်။ စစ်ပွဲ အန္တရာယ်က အပြစ်မဲ့သူများသို့ ပိုမို ပျံ့နှံ့သွားခဲ့သည်။

အစွမ်းအထက်ဆုံးသော စစ်သည်တော် အနေဖြင့် လူစီဖာက ရန်သူကို ခေါင်းဖြတ် သတ်ခြင်းနှင့် စစ်မြေပြင်ကို ထိန်းချုပ်ခြင်း အတွက် သာယာသော ခံစားချက်တွင် တစ်ချိန်က နှစ်မြှုပ်ခဲ့ဖူးသည်။ တစ်နေ့ သူ အိမ်ပြန်ရောက်သောအခါ နွေးထွေးသော သူ၏ အိမ်မှာ မီးလောင်မြေ အဖြစ်သို့ ပြောင်းလဲသွားသည်ကို တွေ့လိုက်ရ၏။ အသံများနှင့် အပြုံးများ မှတ်ဉာဏ်ထဲတွင် ရှိနေသေးသည့် ချစ်ရသော သူများက အေးစက်သော အလောင်းများ ဖြစ်လာ ခဲ့ကြသည်။ ဇာမဏီမလေးနှင့် ရခဲ့သော သမီးငယ်လေး၏ ဝိညာဉ်သာလျှင် ပျောက်ကွယ် မသွားခဲ့ပေ။ ဖိုက်သွန်၏ အကူအညီဖြင့် သမီးလေး၏ ဝိညာဉ်ကို ယာယီ ချိပ်ပိတ်ထားခဲ့သည်။

ထို့နောက် ဒေါသထွက်ပြီး ဝမ်းနည်း နေသော လူစီဖာက လူသားလောကထဲသို့ တစ်ကိုယ်တည်း ဖောက်ထွင်းဝင်သွားပြီး နတ်ဆိုးဘုံကို တိုက်ခဲ့သော ကောင်းကင် တမန်တော် ဗိုလ်ခြေနှင့် ၎င်း တည်ရှိရာ မြို့ကိုပင် ချေမှုန်းလိုက်၏။ သွေးများနှင့် မီးတောက်များကြားတွင် သူ ရုတ်တရက် ထိတ်လန့်တကြားပင် နိုးထလာခဲ့သည်။ သူကိုယ်တိုင်သည် မရေတွက်နိုင်သော မိသားစုများကို ဖျက်ဆီးခဲ့ပြီး ရေတွက်၍ မရနိုင်သော ဆွေမျိုးများကို ယူဆောင် သွားသော လူသတ်သမား ဖြစ်လာ ခဲ့ကြောင်း သဘောပေါက်လိုက်သည်။

အစကတည်းက ထိုကဲ့သို့ပင်။

ထိုသို့ အခိုက်အတန့်တွင် လူစီဖာသည် ရှင်လျက်နှင့် ငရဲကျခြင်း၏ နာကျင်မှုကို ခံစားလိုက်ရ၏။

အန္တိမ ကျိန်စာက နောက်တစ်ကြိမ် ပြည့်သွားခဲ့လေပြီ။

အလူစီယာ ပေါ်လာပြီးနောက်တွင် လူစီဖာကို ပို၍ပင် တုန်လှုပ်သွားစေသော လျှို့ဝှက်ချက် တစ်ခုကို ယူလာခဲ့သည်။ ထိုအရာမှာ အလူစီယာ မကြာသေးခင်က သိရှိခဲ့သော လျှို့ဝှက်ချက်တစ်ခု ဖြစ်ပြီး နတ်ဘုရားများ၏ သဘောတူညီချက်ပင်။

အလင်း နှင့် အမှောင် စခန်းများကြား သဘောတူညီချက်မှာ နတ်ဘုရားများ ကိုယ်တိုင် စစ်ပွဲတွင် ပါဝင်မည်မဟုတ်။ နှစ်၁၀၀ အတွင်းတွင် နှစ်ဖက်လုံးမှ ယုံကြည်သူများ၏ သေဆုံးမှု အရေအတွက် အပေါ်တွင် အခြေခံ၍ ရှုံးနိမ့်သူက အနိုင်ရသူကို လေးစားရမည်။ နှစ် ၁၀၀၀၀ ကြာပြီးနောက် နှစ်ဖက်လုံး နောက်တစ်ကြိမ် တိုက်ခိုက်ကြမည်ဖြစ်ပြီး ကစားပွဲ၏ စည်းမျဉ်းများမှာ အတူတူပင် ဖြစ်နေလိမ့်မည်။

သေဆုံးသွားခဲ့သော အသက်ပေါင်း များစွာနှင့်အတူ ကြေမွသွားသော မိသားစု များစွာ။ ၎င်းမှာ ယုံကြည်မှု သို့မဟုတ် ယုံကြည်ချက် ပဋိပက္ခ မဟုတ်ပေ။ ၎င်းမှာ နတ်ဘုရားများ ကစားနေသော အကျိုး စီးပွားနှင့် အာဏာ ကစားပွဲတစ်ခုမျှသာ ဖြစ်သည်။

နတ်ဘုရားများ၏ အသက်က ထာဝရ ဖြစ်သည်။ ထိုကစားပွဲက သူတို့ ငြီးငွေ့ပြီး အသစ် တစ်ခုသို့ မပြောင်းလဲမချင်း ဆက်လက် ရှိနေပေလိမ့်မည်။

ဒြပ်စင်ဘုရင်တိုင်းနီးပါး ထိုစကားကို အဘယ်ကြောင့် ပြောခဲ့ရကြောင်းကို ချန်လွေ့ နားလည်သွားခဲ့သည်။ သက်ရှိ အားလုံးဟာ နတ်ဘုရားတွေရဲ့ ကစား စရာတွေပဲ။

အလူစီယာ သက်ပြင်းချပြီး လူစီဖာကို သွယ်ဝိုက်ပြောလိုက်သည်။ “အစပိုင်းမှာ သူတို့တွေက လောကကြီးကို ဖျက်ဆီးပြီး သူတို့ကို ကျွန်ပြုချင်ခဲ့တဲ့ အဲဒီလူကို အနိုင်ယူဖို့ အစွမ်းကုန် ကြိုးစားခဲ့ကြတယ်။ အခု သူတို့က အဲဒီလူ ဖြစ်လာခဲ့ပြီ။”

လူစီဖာ ကောင်းကင်ကို ကြည့်လိုက် ပြီးနောက် လက်များပေါ်မှ သွေးများကို ကြည့်လိုက်သည်။ သူ စွမ်းအားအကုန်ဖြင့် ပြောလိုက်သည်။ “ဒီလောကကြီးက နတ်ဘုရားတွေ မလိုအပ်ဘူး။”

ချန်လွေ့ ရုတ်တရက် သတိရလိုက်၏။ ဒီစကားရဲ့ ခံစားချက်... ဟုတ်တယ်၊ ဒါက လူစီဖာ ဒြပ်စင်လောကမှာ ရှိနေတုန်းက ရာဖာတီရဲ့ ဝိညာဉ်ကို မဖျက်ဆီးခင်မှာ ပြောခဲ့တဲ့ စကားပဲ...

ထိုစကား အထဲတွင် အဓိပ္ပာယ်များစွာ ပါဝင်သည်။ အထူးသဖြင့် ချစ်သူဟောင်း ရာဖာတီ အတွက်... အန္တိမ၏ ကျိန်စာ ပစ်မှတ်များထဲမှ တစ်ဦးလည်း ဖြစ်သော ဒြပ်စင်နတ်ဘုရားမပင်။

ချစ်သူကို ကိုယ်တိုင် ရှင်းလင်းပစ်လိုက် သောအခါတွင် သူ၏ စိတ်အခြေအနေကို စိတ်ကူးကြည့်နိုင်၏။ ရာဖာတီကလည်း မခုခံခဲ့ပေ။

အချို့သော အရာများက သေခြင်းနှင့် ရှင်ခြင်းကို ကျော်လွန်သွားခဲ့သည်။

မြင်ကွင်း နောက်တစ်ကြိမ် ပြောင်းလဲ သွားခဲ့သည်။ လူစီဖာလည်း ကောင်းကင်မှ နတ်ဘုရားများကို ကြည့်ပြီး တူညီသော စာကြောင်းကို ပြောလိုက်၏။

ထို့နောက် သူက ဒြပ်စင်လောကတွင် ချိပ်ပိတ်ထားပြီး အန္တိမနတ်ဘုရား၏ ဝိညာဉ်နှင့် ပေါင်းစပ်ထားသော သေခြင်းနှင့်ရှင်ခြင်းစာအုပ်ကို ဆင့်ခေါ် လိုက်သည်။ နတ်ဘုရားများ အားလုံးက အန္တိမနတ်ဘုရား၏ မျက်လုံးမှ ထုတ်လွှတ် လိုက်သော သေခြင်းနှင့် ရှင်ခြင်း စွမ်းအား အောက်တွင် ကျဆုံးသွားခဲ့ကြသည်။

လောကကြီးထဲတွင် နတ်ဘုရားများ မရှိတော့။ ထိုအရာက နတ်ဘုရားများ၏ ဆည်းဆာချိန်ပင်။

နတ်ဘုရားများကို ရှင်းပစ်ပြီးနောက် လူစီဖာက အန္တိမနတ်ဘုရား၏ ဝိညာဉ်ကို သေခြင်းနှင့်ရှင်ခြင်း စာအုပ်မှ လွတ်ခွင့် မပေးခဲ့ပေ။ သူက သေခြင်းနှင့် ရှင်ခြင်း စာအုပ်ကို ထပ်မံ၍ ချိပ်ပိတ်လိုက်သည်။ ထိုစဉ်က ရာဖာတီ ကဲ့သို့ပင် သူသည် အသက်ကို စတေးခဲ့ရသည်။

ခန္ဓာကိုယ်မှ ဆင့်ကဲပြောင်းလဲသော အန္တိမသော့က အဆောင်ပစ္စည်း ၇ခု အဖြစ် ပြန့်ကျဲသွားခဲ့သည်။ သေခြင်းနှင့် ရှင်ခြင်း စာအုပ်၏ ဇစ်မြစ်စွမ်းအားကို အားကိုးပြီး သူ၏ ကျန်ရှိနေသော ဝိညာဉ် အစအန တစ်ခုကို အဆောင်ပစ္စည်း၇ခု အကြားတွင် ထိန်းသိမ်းထားခဲ့၏။

ချန်လွေ့က နောက်ပိုင်း အဖြစ်အပျက် များကို ကိုယ်တိုင်ကိုယ်ကျ ကြုံတွေ့ ခဲ့ရသည်။ အဆောင်ပစ္စည်း ၇ခုကို ခွဲခြမ်း၍ စိတ်ဖြာပြီးနောက် လူစီဖာ၏ ဝိညာဉ်ကို ပေါင်းစပ်ကာ အချိန်မတန်ခင်နှင့် စွမ်းအား ပြန်လည်မွေးဖွားခြင်းကို ဖြစ်စေခဲ့သူမှာ သူ ဖြစ်သည်။

အဆောင်ပစ္စည်း ၇ခုက အတူတကွ ပေါင်းစပ်သွားပြီး လူစီဖာ၏ အရိပ်ကို ပြသလိုက်သည်။ သူသည် ချန်လွေ့ကို တိတ်ဆိတ်စွာ ကြည့်နေခဲ့သည်။

လူစီဖာ၏ မျက်လုံးများက သူတို့ ပထမဆုံး တွေ့ဆုံစဉ်ကလို ထူးဆန်းနေဆဲ ဖြစ်ပြီး လျစ်လျူရှုနေပုံ ရသော်လည်း ၎င်းတို့တွင် နက်ရှိုင်းသော စိတ်ခံစားမှုများ ပါဝင်နေပြီး ပထမဆုံး မြင်လိုက်ရုံဖြင့် မေ့ပျောက်၍ မရနိုင်ပေ။

အကယ်၍ တတိယလူ ရှိခဲ့ပါက သူတို့ လုံးဝ ကွဲပြားခြားနားပုံ ရသော်လည်း ဆင်တူသော စိတ်နေ သဘောထားများ ရှိကြောင်း တွေ့လိမ့်မည်။ ထိုအရာမှာ လူများစွာက ချန်လွေ့သည် လူစီဖာ ဖြစ်မည်ဟု အထင်လွဲမှား ခဲ့ရသည့် အကြောင်းရင်း ဖြစ်နိုင်ပေသည်။

ချန်လွေ့လည်း လူစီဖာကို စိုက်ကြည့် နေသည်။ ခုနက သူ၏ အသိစိတ်ထဲမှ မြင်ကွင်းများ အားလုံးကို လူစီဖာက နောက်ဆုံး ဝိညာဉ် စွမ်းအားဖြင့် သူ့ထံသို့ ပေးပို့ခဲ့ခြင်းပင်။ ၎င်းမှာ အမှန်တရားကို ပြောပြရန် သာမကဘဲ အခြားတစ်ခုခု အတွက်လည်း ဖြစ်သည်။

လူစီဖာ၏ လက်ရှိ ကျန်ရှိနေသော ဝိညာဉ်က သေခြင်းနှင့် ရှင်ခြင်း စာအုပ်ကို တစ်ကြိမ်သာ ဆင့်ခေါ်နိုင်ပြီးနောက်တွင် အန္တိမသော့ လုံးဝ ပြိုလဲသွားလိမ့်မည်။

၎င်းကို ဆင့်ခေါ်ရုံသာ ပြုလုပ်နိုင်ပြီး နောက်တစ်ကြိမ် ချိပ်ပိတ်၍ မရနိုင်ပေ။

ချန်လွေ့ ရုတ်တရက် မှန်လောကတွင် လူစီဖာနှင့် အလူစီယာတို့ အကြားမှ လောင်းကစားကို သတိရလိုက်သည်။ ရုတ်တရက် သူ တစ်ခုခုကို နားလည်သွားပုံ ရသည်။

အတိတ်က ဖြစ်ရပ်တွေကို ပြန်မရ နိုင်တော့ဘူး။ ပြီးတော့ သူတို့တွေက အခု အဓိပ္ပာယ် မရှိတော့ဘူး။ တကယ်လို့ ငါ အားလုံးကို တကယ် အဆုံးသတ်ချင်ရင် ဒါမှမဟုတ် ပြောင်းလဲချင်ရင် ကျော်လွန် မှပဲ ရမယ်။

လူစီဖာ အတိတ်ကို ကျော်လွန်နိုင်ခြင်း မရှိခဲ့၍ အလူစီယာက ဖြစ်နိုင်ချေ ပိုများသော ချန်လွေ့ကို ရွေးချယ်ခဲ့သည်။

ကျော်လွန်ခြင်း။

လူစီဖာနှင့် အခြား တည်ရှိမှုများကို ကျော်လွန်ရန်သာမက သူ့ကိုယ်သူလည်း ကျော်လွန်ရပေမည်။ အခြား သဘောအရ စူပါစနစ် စကြဝဠာမှ “အန္တိမနတ်ဘုရား” ကိုပင်....

ယခုအချိန်အထိ ချန်လွေ့သည် အလူစီယာ သူ့ကို လောကကူးပြောင်းသူ အဖြစ်နှင့် စူပါစနစ်အကြောင်း တကယ် သိမသိ မသေချာသေးပေ။ သူ သေချာ နိုင်သည်မှာ နတ်သူငယ် ရှေ့ဖြစ်‌ဟော၏ လောင်းကြေးက အမှန်တကယ် ကြီးမားခြင်းပင်။

ချန်လွေ့ တစ်စုံတစ်ရာကို သဘော ပေါက်သွားပုံ ရသည်ကို မြင်သောအခါ လူစီဖာက ပြုံးလိုက်ပြီး သူ၏မျက်နှာက တဖြည်းဖြည်း မှေးမှိန်သွားခဲ့သည်။

ချန်လွေ့၏ အမြင်အာရုံသည် မူလ ဖရိုဖရဲဘုံသို့ ပြန်လည်၍ ရောက်ရှိ သွားခဲ့သည်။

သူ၏ အသိစိတ် ခုနက အရာများစွာကို ကြုံတွေ့ခဲ့ရသော်လည်း ၎င်းမှာ အမှန် တကယ်တွင် စက္ကန့်ပိုင်းမျှသာ ဖြစ်သည်။

ဖရိုဖရဲတွင် ဖော်ပြ၍ မရနိုင်အောင် အားကောင်းလှသော စွမ်းအားများသည် ချန်လွေ့၏ အာရုံများ အားလုံးကို လွှမ်းမိုး သွားခဲ့သည်။ ထိုကဲ့သို့ ကြီးမားသော အလောင်းများ တစ်ခုပြီးတစ်ခု မျက်လုံး ဖွင့်လိုက်ပြီး အကန့်အသတ် မရှိသော စွမ်းအားဖြင့် သူ့ထံ ပြေးဝင်လာခဲ့သည်။

ကောင်းကင်တွင် ဖန်တီးခြင်းနှင့် ပျက်စီးခြင်းတို့၏ ဇစ်မြစ် စွမ်းအားကို ထုတ်လွှတ်နေသော အလင်းတန်း နှစ်ခု ရှိနေသည်။

ထိုသို့ ကြောက်မက်ဖွယ် ကောင်းသော စွမ်းအားအောက်တွင် ချန်လွေ့ မလွတ်နိုင်၊ မလှုပ်ရှားနိုင်၊ မစဉ်းစားနိုင် သော်လည်း သူ၏ အကြည့်သည် တည်ငြိမ်နေခဲ့ပြီး လက်ထဲမှ ဖဲချပ်၏ အလင်းရောင်က ပို၍ပို၍ တောက်ပလာခဲ့သည်။

သွေးနီရောင် အလင်းက ဖရိုဖရဲဘုံ တစ်ခုလုံးကို လင်းထိန် စေခဲ့သည်။ ထိုအလင်းအောက် ဖန်တီးခြင်းစာအုပ်နှင့် ပျက်စီးခြင်းစာအုပ်၏ တောက်ပမှုသည် မှေးမှိန်သွားပုံရသည်။ ကြီးမားလှသော အလောင်းများထံမှ ကြောက်မက်ဖွယ်ရာ စွမ်းအားများ တစ်ခုပြီးတစ်ခု စုတ်ပြဲ သွားခဲ့သည်။ အပြင်းထန်ဆုံး နေရာလွတ် ဖြစ်သော ဖရိုဖရဲဘုံပင် ပျက်စီးသွားခဲ့၏။ လောင်ကျွမ်းနေသော သွေးမီးလျှံများက နေရာလွတ်ရှိ အက်ကွဲကြောင်းများထဲမှ မှုတ်ထုတ်လာခဲ့သည်။

အန္တိမသော့ကို ကိုင်ဆောင်ထားသူ အနေဖြင့် ချန်လွေ့သည် သွေးမီးလျှံများမှ ပျက်စီးမှုကို မခံစားခဲ့ရသော်လည်း နိုးထ လာသော မကောင်းဆိုးဝါးကြီးများ စူးရှစွာ အော်ဟစ်လိုက်ကြလေသည်။ သူတို့၏ ခန္ဓာကိုယ်များက အနီရောင်မီးလျှံများ၏ လောင်ကျွမ်းမှုအောက်တွင် လျင်မြန်စွာ လောင်ကျွမ်းသွားပြီး ကြယ်စင်စုများရှိ ကြယ်များ ပေါက်ကွဲပြီး ပြိုကျသွားခဲ့၏။

ပြိုကျသွားနေသော ကြယ်များသည် တစ်စုံတစ်ရာကြောင့် ဆွဲဆောင်ခြင်း ခံလိုက်ရသကဲ့သို့ပင် ဖဲချပ်ထံသို့ ရူးသွပ်စွာ စီးဆင်းလာခဲ့သည်။ သူတို့က ချက်ချင်း ဝါးမျိုခံလိုက်ရ၏။

အထွတ်အထိပ်အဆင့်တွင် နတ်ဘုရားများက အန္တိမနတ်ဘုရား၏ ပြိုင်ဘက် မဟုတ်ခဲ့ကြပေ။ လက်ရှိ အခြေအနေဆို ပြောစရာ မလိုပေ။။

အော်ဟစ်သံများက ခဏအကြာတွင် အားနည်းသွားပြီး မကောင်းဆိုးဝါးကြီးများ၏ ခန္ဓာကိုယ်များ အလျင်အမြန်ပင် ပြိုကွဲကာ နောက်ဆုံး ဗလာနတ္ထိအဖြစ် ပြောင်းလဲသွားခဲ့သည်။

အသူရာချောက်နက် စိတ်ဆန္ဒ အဖြစ်သို့ တန်ဖိုးအမျိုးမျိုး ပေးဆပ်ခဲ့ပြီး ပြောင်းလဲခဲ့သော ယခင်နတ်ဘုရားများက လောကကြီး တစ်ခုလုံးကို ဖျက်ဆီးရန်နှင့် သူတို့ကိုယ်ကို ပြန်လည်အသက်သွင်းရန် အစွမ်းကုန် ကြိုးစားခဲ့ကြသော်လည်း နောက်ဆုံး အချည်းနှီး ဖြစ်သွားခဲ့သည်။

၎င်းမှာ နောက်ထပ် နတ်ဘုရားများ၏ ဆည်းဆာချိန်ပင်။ စစ်မှန်သော အဆုံးသတ်လည်း ဖြစ်ပေသည်။

နတ်ဆိုးဘုံနှင့် လူသားလောက၏ ရောင်ပြန်သည် မြေပြင်နှင့် နီးကပ်လုနီးပါး ဖြစ်နေသော်လည်း ၎င်းက ရုတ်တရက် ရွေ့လျားမှု ရပ်တန့်သွားပြီး ရှင်းလင်းသော မှန်ရုပ်ပုံ တဖြည်းဖြည်း မှေးမှိန်သွားခဲ့၏။

နတ်ဘုရားများ ပျောက်ကွယ်သွားပြီး နောက်တွင် ဖရိုဖရဲဘုံ တစ်ခုလုံးက ရုတ်တရက် ဗလာ ဖြစ်သွားသော်လည်း ချန်လွေ့ မထွက်ခွာခဲ့ပေ။ အကြောင်းမှာ နောက်ဆုံးနှင့် ကြောက်မက်ဖွယ်ရာ အကောင်းဆုံးသော ရန်သူ တစ်ဦး ရှိနေသေးကြောင်း သိနေသောကြောင့်ပင်။