ကိုယ်ပိုင်ကာကွယ်ရေးလက်နက်

ဟဲကျစ်ယန်သည် မီနီမေ့ဆေးသေနတ်၏ လုပ်ဆောင်ချက်ကို စိတ်ရှည်လက်ရှည် ရှင်းပြပေးသည်။

"အမေ၊ မရီးတို့နဲ့ အဒေါ်တို့ကို ကိုယ့်ကိုယ်ကို ကာကွယ်ဖို့ ဒီလိုလက်နက်မျိုး ပေးသင့်တယ်လို့ ရှင်ထင်လား။"

မော့ကျိုးယွီသည် မေ့ဆေသေနတ်ကို ကိုင်ကြည့်ပြီး အချိန်အတော်ကြာ ဟိုကလိဒီကလိ လုပ်ကြည့်ခဲ့ကာ ၎င်းအား အသုံးပြုပုံကို ဟဲကျစ်ယန်၏ လုပ်ဆောင်ချက်များကိုပါ အတုခိုးခဲ့သည်။

"ဒီအရာက သုံးရတာ အရမ်းအဆင်ပြေတယ်၊ သေးငယ်ပြီးတော့ ဖျောက်ထားဖို့လည်း လွယ်ကူတယ်။ ဒါပေမဲ့ သူတို့သုံးဖို့ သိပ်မသင့်တော်ဘူးလို့ ကိုယ်ထင်တယ်။"

ဟဲကျစ်ယန်က မျက်ခုံးပင့်လိုက်သည်၊ "ဘာဖြစ်လို့လဲ"

"ကိုယ်တို့ အရင်တစ်ခေါက် တွေ့ခဲ့တဲ့ လုပ်ကြံသတ်ဖြတ်သူတွေက တာဝေးလုပ်ကြံသတ်ဖြတ်ဖို့အတွက် လေးနဲ့မြှားကို အသုံးပြုကြတယ်။ သူတို့ လုပ်ကြံသတ်ဖြတ်ဖို့ မအောင်မြင်ခဲ့ရင်တော့ အနီးကပ်တိုက်ပွဲကို ရွေးချယ်ကြလိမ့်မယ်။

ကိုယ်တို့မိသားစုဝင် အမျိုးသမီးတွေက ကိုယ်ခံပညာ မတက်ကျွမ်းကြဘူး။ လုပ်ကြံသတ်ဖြတ်သူတွေက အနီးကပ် တိုက်ခိုက်မယ်ဆိုရင် သူတို့ မေ့ဆေးသေနတ်တွေကို အချိန်မီအသုံးမချနိုင်တော့ဘဲ တချက်တည်းနဲ့ အသတ်ခံလိုက်ရမှာကို ကိုယ်စိုးရိမ်တယ်။"

မော့ကျိုးယွီ၏ ရှင်းပြချက်ကို နားထောင်ပြီးနောက် ဟဲကျစ်ယန်သည်လည်း ဒီအချက်ကို နားလည်သဘောပေါက်သွားခဲ့သည်။

မေ့ဆေးသေနတ်လောက်တောင် မစွမ်းဆောင်နိုင်တဲ့ ငရုတ်ကောင်းစပရေးကို ပြန်တွေးကြည့်တော့ ဒါကို မော့ကျိုးယွီအား ထုတ်ပြဖို့ ပိုလို့တောင် မလိုအပ်ဘူးလို့ သူမ ခံစားခဲ့ရသည်။

လက်ရှိအခြေအနေအရ ညီအစ်မများ လိုအပ်နေတဲ့ ကိုယ့်ကိုယ်ကိုယ် ခုခံကာကွယ်သည့် ကိရိယာများတွင် တာဝေးပစ်တိုက်ခိုက်မှုစွမ်းရည်အချို့ရှိရမည်ဖြစ်ပြီး ပိုအားကောင်းလေလေ အကောင်းဆုံး ဖြစ်ပေသည်။

ဤရှုထောင့်မှကြည့်လျှင် အသင့်တော်ဆုံးက ပစ္စတိုတစ်လက်သာဖြစ်သည်။

သို့သော် အဆိုပါ ပစ္စတိုများကို မရီးတွေရှေ့သို့ယူဆောင်သွားလိုပါက သင့်လျော်သော အကြောင်းပြချက် ရှိရမည်။

ဟဲကျစ်ယန်သည် ခဏလောက်စဉ်းစားပြီးနောက် ရုတ်တရက် အတွေးတစ်စ ပေါ်လာခဲ့သည်။

ဟဲကျစ်ယန်သည် သူမ၏ လက်ဖဝါးထက် သေးငယ်သော ပစ္စတိုသေနတ်တစ်လက်ကို ထုတ်ယူရန် သူမ၏ စိတ်အား အသုံးချခဲ့သည်။

မော့ကျိုးယွီက မျက်ခုံးပင့်လိုက်သည်၊ "မင်း သူတို့ကို ဒါပေးချင်တာလား။"

ဟဲကျစ်ယန်က ခေါင်းညိတ်သည်၊ "လက်ရှိအခြေအနေအရ ဒါက သူတို့အတွက် အသင့်တော်ဆုံးပဲ။ ဒါက သေစေနိုင်လောက်ရုံသာမက တာဝေးပစ်နိုင်တဲ့စွမ်းရည်လည်း ရှိတယ်။ ဒီအတွက် ဆင်ခြေကိုလည်း ကျွန်မ စဉ်းစားပြီးပြီ၊ ပြည်နှင်ဒဏ်အဖွဲ့နောက်ကို အမှီလိုက်လာတဲ့ လမ်းမှာ နိုင်ငံခြားကုန်သည်တစ်ဦးနဲ့ တွေ့ပြီး ဝယ်လာတာလို့ပြောလိုက်မယ်လေ။"

မော့ကျိုးယွီသည် ဆံပင်ရွှေရောင်နှင့် မျက်ဝန်းပြာရှိသည့် နိုင်ငံခြားသားများနှင့် မစိမ်းသက်ပေ။

ပင်လယ်ကမ်းစပ်ရှိ ဆိပ်ခံတံတားတစ်ခုမှ ဖြတ်သွားသောအခါတွင် ထိုကဲ့သို့သောသူများကို မြင်ဖူးခဲ့ကာ စူးစမ်းချင်စိတ်ကြောင့် အနီးကပ်ကြည့်မိသည်။

အဲဒီနိုင်ငံခြားသားတွေရဲ့ စကားကို သူ နားမလည်သည့်အပြင် သူတို့ အိတ်ကပ်ထဲမှ ထုတ်ယူလိုက်သော ပစ္စည်းများသည်လည်း သူ အရင်က တစ်ခါမှ မမြင်ဖူးသော အရာများသာ ဖြစ်သည်။

ပစ္စတိုသေနတ်ကို ထုတ်ယူရန် ဤအကြောင်းပြချက်ကို အသုံးပြုခြင်းသည် မကောင်းသော အကြံမဟုတ်ဟု ဟဲကျစ်ယန်က ထင်မြင်ခဲ့သည်။

ထို့အပြင် ပစ္စတိုသေနတ်သည် သူမ မိသားစုဝင် အမျိုးသမီးများ သူတို့ကိုယ်တိုင် ခုခံကာကွယ်ရန်အတွက် အသင့်တော်ဆုံး လက်နက်ဖြစ်သည်ဟုလည်း သူ ခံစားခဲ့ရသည်။

သူသည် ထိုလုပ်ကြံသတ်ဖြတ်သူများ၏လက်ထဲတွင် ကံအကြောင်းမလှစွာဖြင့် သေဆုံးသွားခဲ့ပါက သူ့မိသားစုသည် သူတို့၏ အသက်များကို ကယ်တင်ရန် နည်းလမ်းရှိမည်ဖြစ်ပြီး အသက်ရှင်ကျန်ရစ်ရန် မျှော်လင့်ချက်ကြီးကြီးရှိနေနိုင်မည်ဖြစ်သည်။

မော့ကျိုးယွီက ကျေးဇူးတင်တဲ့အကြည့်တွေနှင့် ပြောလိုက်သည်၊ "မင်းပြောသလို ပြောတာက အရမ်းကောင်းလိမ့်မယ်။"

လောလောဆယ်တွင် အပြင်မှာ မီနီပစ္စတို ၂ လက်သာ ရှိပါသေးသည်။ ဟဲကျစ်ယန်က ပိုလိုချင်ရင် သူမက သူတို့ကို နေရာလွတ်ထဲကနေ အကြိမ်ကြိမ် ထုတ်ယူလိုက်ရုံပါပဲ။

မော့ကျိုးယွီ၏ သဘောတူညီမှုကို ရရှိပြီးနောက် သူမသည် ချက်ချင်းသလို နေရာလွတ်ထဲမှ ထွက်လာခဲ့သည်။

ရွက်ဖျက်တဲအိမ်ထဲတွင်ထိုင်ပြီး ဟဲကျစ်ယန်သည် နေရာလွတ်ထဲကနေ မီနီပစ္စတို ၁၀ လက်ကို ထုတ်ယူလိုက်သည်။

အိမ်ရှိ အမျိုးသမီးများအတွက် အသက်ကယ်ပစ္စည်းများစီစဉ်ပေးပြီးသည့်နောက်တွင် ဟဲကျစ်ယန်သည် မော့ကျိုးယွီအား တရားဝင် မဟုတ်သည့် သမိုင်းကြောင်းကို ဆက်ရှင်းပြပေးခဲ့သည်။

မော့ကျိုးယွီသည် နန်ချီက သူ့မွေးဇစ်မြစ်အမှန်အား သိရှိနေပြီဖြစ်ကြောင်း သိထားပြီး ဖြစ်သည်။

သို့သော် သူ့ခန္ဓာကိုယ်ပေါ်တွင် မော့အမျိုးသားများ၏ ထူးခြားသော အမှတ်အသား တစ်ခု ပါရှိသည်။

နန်ချီ၏ ခန္ဓာကိုယ်ပေါ်တွင် ထိုကဲ့သို့ အမှတ်အသားရှိပါက သူ့ခန္ဓာကိုယ်ပေါ်ရှိ အမှတ်အသားသည် အတုဖြစ်ကြောင်း သံသယဖြစ်နိုင်သည်။

သို့သော် နန်ချီ၏ ခန္ဓာကိုယ်ပေါ်တွင် ထိုကဲ့သို့သော အမှတ်အသားမျိုး မပါရှိကြောင်းကို သူ ရှင်းရှင်းလင်းလင်း သိထားပေသည်။

ဤရှုထောင့်မှကြည့်လျှင် မော့ကျိုးယွီသည် သူ့ကိုယ်ပိုင်လက္ခဏာကို အလွန်စိတ်ချယုံကြည်မှုရှိသည်။

သူသည် မော့မိသားစုဝင် ဉာဏ်ကြီးရှင် တစ်ဦးဖြစ်ကာ သူ့စတုတ္ထအစ်ကိုဖြစ်သူနှင့် ရုပ်ရည်သွင်ပြင် ၇၀ ရာခိုင်နှုန်း ၈၀ ရာခိုင်နှုန်းခန့် တူညီသောကြောင့် ကလေးအလဲခံရသည်မှာ မဖြစ်နိုင်ပေ။

ဤကိစ္စနှင့်ပတ်သက်၍ သံသယများ ပိုများလာကာ သူတို့နှစ်ယောက် ခေါင်းပူမတတ် စဉ်းစားခဲ့သော်လည်း အကြောင်းရင်းကို အဖြေရှာမရပေ။

မီးမရှိလျှင် မီးခိုးမရှိပေ။ နန်ချီသည် အကြောင်းပြချက်မရှိဘဲ တော်ဝင်သွေးသားမဟုတ်ကြောင်း သံသယရှိမည်မဟုတ်ပေ။

နန်ချီသည် မော့ကျိုးယွီကို သူ့လက်ဖြင့် မော့ကျိုးယွီကို ဖယ်ရှားပစ်လိုသော ပန်းတိုင်ကို အရောက်လှမ်းနိုင်ရန် နန်ချီ၏ နိုင်ငံရေးပြိုင်ဘက်များက တမင်သွေးထိုးလှုံ့ဆော်ခဲ့သည်မှာ မဖြစ်နိုင်တာ မဟုတ်ပေ။

သို့သော် နန်ချီအပေါ် မော့ကျိုးယွီ၏ နားလည်မှုအရ နန်ချီသည် ဦးနှောက်လုံးဝမရှိသည့် လူစားမျိုး မဟုတ်ပေ။

ဤကိစ္စတွင် နန်ချီကို ဆွဲဆောင်နေသည့် အကြောင်းပြချက်အချို့ ရှိရမည်။

ဒါမှမဟုတ် နန်ချီသည် သူဟာ တကယ်ပဲ တော်ဝင်သွေးသား မဟုတ်တာကို ကိုယ်လုပ်တော်ယွမ်ဆီကနေ အရိပ်အမြွတ်မျှ သိလာတာလည်း ဖြစ်နိုင်သည်။

ကိုယ်လုပ်တော်ယွမ်သာ ဒီလိုမျိုး တကယ်လုပ်ခဲ့မယ်ဆိုရင် သူမဟာ အဲဒီအကြောင်းကို သူမ တစ်သက်လုံး ဘယ်သူ့ကိုမှ လုံးဝ မပြောမှာ သေချာပေသည်။

နန်ချီက တစ်ခုခုကို နားစွန်နားဖျား ကြားလိုက်တာ ဖြစ်နိုင်သည်။

သူတို့ ဒီအကြောင်းကို ခွဲခြမ်းစိတ်ဖြာကြည့်လေလေ ပိုရှုပ်ထွေးလေလေဖြစ်နေတာကြောင့် နှစ်ယောက်သား ဒီအကြောင်းကို ရိုးရှင်းစွာပင် ဆက်မတွေးတော့ဘဲ ရပ်တန့်လိုက်ကြသည်။

ဘာပဲဖြစ်ဖြစ် မော့ကျိုးယွီသည် မော့မိသားစုဝင်စစ်စစ်ဖြစ်သောကြောင့် နန်ချီ၏ အထောက်အထားက သူတို့နဲ့ ဘာမှ မဆိုင်ဘူး။

ထိုညက သူတို့နှစ်ယောက်သား ထမင်းစားပွဲမှ ထသောအခါတွင် နံရံပေါ်ရှိ နာရီကြီး၏ နာရီလက်တံသည် ၃ နာရီကို ညွှန်ပြနေပြီ။ အခါတိုင်း သူတို့ အိပ်ရာထချိန်မတိုင်မီ အိပ်စက်အနားယူဖို့ ၂ နာရီခန့်သာ ကျန်တော့သည်။

မော့ကျိုးယွီက သတိပေးသည်၊ “ကိုယ်တို့ မကြာခင် ခရီးထွက်ရမှာဆိုတော့ နည်းနည်းလောက်တော့ အနားယူသင့်တယ်။”

နန်ရွေ့၏ သမိုင်းမှတ်တမ်းများကို ယခု လေ့လာရှာဖွေကြည့်သောအခါတွင် သူမ ဘာမှ မခံစားရပေ။ အခု သူမ စိတ်သက်သာရာရသွားပြီးနောက် ဟဲကျစ်ယန်သည် အနည်းငယ် အိပ်ချင်လာသလို ခံစားလိုက်ရသည်။ သူမသည် ကိုယ်လက်သန့်စင်ပြီးနောက် အိပ်ရာပေါ် ပြန်လှဲကာ အနားယူလိုက်သည်။

သူတို့နှစ်ယောက်လုံး အိပ်ရာထနောက်ကျရင် ရွက်ဖျင်တဲထဲမှာ မရှိမှန်းကို လူတွေ သိမှာ စိုးရွံ့တာကြောင့် နှစ်ယောက်သား နှစ်နှစ်ခြိုက်ခြိုက် အိပ်မပျော်ရဲကြဘူး။

အိပ်မပျော်တပျော်ဖြစ်နေချိန်တွင် ဟဲကျစ်ယန်သည် သူမ နံဘေးနားမှ လူ အိပ်ရာထသွားသည်ကို ခံစားလိုက်ရသဖြင့် သူမ မျက်လုံးများကို ချက်ချင်းဖွင့်လိုက်သည်။

သူတို့နှစ်ယောက်သား တိတ်တိတ်ဆိတ်ဆိတ် အိပ်ယာမှထကာ အဝတ်အစားကို သပ်ရပ်အောင် ပြင်ဆင်ပြီးနောက် နေရာလွတ်ထဲမှ ထွက်လာခဲ့ကြသည်။

မနက်စာစားပြီးနောက် အရာရှိတွေ ရွက်ဖျင်တဲကို သိမ်းဆည်းနေစဉ် ဟဲကျစ်ယန်သည် မိသားစု၏ အမျိုးသမီးအားလုံးကို စုဝေးစေသည်။

သူမသည် ကုန်ပစ္စည်းများကို နွားလှည်းထဲထည့်ထားသလို ဟန်ဆောင်ထားသော်လည်း သူမသည် အဆိုပါ မီနီပစ္စတိုများကို ပြင်ဆင်ထားသည့် သစ်သားသေတ္တာထဲသို့ထည့်ကာ မိသားစုဝင်များထံ တတ်နိုင်သမျှ အမြန်ဆုံး လွှဲပြောင်းပေးရန် စီစဉ်ခဲ့သည်။

နန်ရွေ့က သူ့ကို ရန်ရှာလိမ့်မယ်လို့ မှန်းဆထားတာကြောင့် သူတို့မိသားစုဝင်များ၏ အသက်ကို ကယ်တင်နိုင်မယ့် ကိရိယာတွေကို စောစောစီးစီး ပေးထားတာ ပိုကောင်းလိမ့်မည်ဟု မော့ကျိုးယွီက ခံစားခဲ့ရသည်။

မော့ကျိုးယွီသည် နွားလှည်းပေါ်မှ ပစ္စည်းများကို သေသေချာချာ စီစဉ်နေသည့်ဟန်ဆောင်ပြီး ပစ္စတို ၁၀ လက် ပါရှိသော သစ်သားသေတ္တာကို ပေါ့ပေါ့ပါးပါး ထုတ်ယူလိုက်သည်။

အခြားသူများ မမြင်ရအောင် သစ်သားသေတ္တာလေးကို အနည်းငယ် ဟပြီး သူ့မိသားစုဝင်တွေကို ပြသခဲ့သည်။

မော့အမျိုးသမီးများသည် နွားလှည်းအပြင်ဖက်တွင် စုရုံးပြီး သေတ္တာထဲသို့ ချောင်းကြည့်ကြသည်။

ဒုတိယချွေးမက အသံကျယ်ကျယ်ဖြင့် မေးတော့မည်ဟန်ကိုမြင်တော့ သခင်မကြီးမော့က အေးစက်သော မျက်နှာထားဖြင့် ဆူပူကြိမ်းမောင်းလိုက်သည်၊ “ဒုတိယချွေးမ၊ ငါတို့ ဘာလုပ်နေမှန်း အခြားသူတွေ မသိမှာကို ကြောက်နေတာလား။”

ဒုတိယချွေးမသည် မျက်နှာထား တင်းမာနေသော သူမ၏ ယောက္ခမကိုကြည့်ပြီး လျှာလေးထုတ်လိုက်မိသည်။

“သမီးမှားမှန်း သိပါပြီ၊ အမေ”

ဒါကိုမြင်တော့ တခြားသူတွေက သေတ္တာထဲက ကိရိယာတွေက ဘာတွေမှန်း အရမ်းသိချင်နေကြပေမယ့် အသံကျယ်ကျယ်နဲ့ မမေးရဲကြဘူး။

မော့ကျိုးယွီသည် ဘေးပတ်လည်ကို ဟိုဟိုဒီဒီ စစ်ဆေးကြည့်ပြီး အခြားသူများ အလုပ်ရှုပ်နေကြတာကိုမြင်တော့ မော့အမျိုးသမီးများကို အသံတိုးတိုးဖြင့် ရှင်းပြလိုက်သည်၊ “သေတ္တာထဲက ကိရိယာတွေက ကျွန်တော်တို့ လမ်းမှာ နိုင်ငံခြားသားတွေဆီကနေ ဝယ်ယူလာတဲ့ လျှို့ဝှက်လက်နက်တွေပဲ။ ဒီလျှို့ဝှက်လက်နက်တွေက သတ်ဖြတ်နိုင်စွမ်း မြင့်မားပြီး သယ်ဆောင်ရ လွယ်ကူတယ်။ ကျွန်တော်တို့ ရှေ့ဆက်သွားလာရမယ့်လမ်းမှာ အန္တရာယ်တွေ ရှိနိုင်တယ်ဆိုတာကို တွေးမိပြီး ကျစ်ယန်နဲ့ ကျွန်တော်က လူတိုင်းအတွက် ကိုယ့်ကိုယ်ကိုယ် ခုခံကာကွယ်နိုင်ဖို့အတွက် လျှို့ဝှက်လက်နက် တစ်ခုစီ ပေးဖို့ ဆုံးဖြတ်ထားတယ်။”

ဒုတိယမရီးသည် အမြဲလိုလို သတိလက်လွတ်ဖြစ်နေတတ်သည်။ သူမသည် မော့ကျိုးယွီ ရှင်းပြနေသော လျှို့ဝှက်လက်နက်များကို စိတ်မဝင်စားပဲ သူ့ပါးစပ်မှ “ကျစ်ယန်” ဟူသော စကားလုံး နှစ်လုံးကသာ သူမအား အလွန်စိတ်လှုပ်ရှားစေခဲ့သည်။

သူမ၏ နဝမမတ်လေး၏ အေးစက်သော စိတ်နေစိတ်ထားအရ နဝမခယ်မလေးကို ဤသို့ ခေါ်ဝေါ်လာခြင်းသည် သူတို့၏ ဆက်ဆံရေး အရှိန်အဟုန် မြင့်တက်လာကြောင်း ပြသနေပုံရသည်။

မော့မိသားစုထဲတွင် မိသားစုဝင်အသစ်များ ထပ်တိုးလာဖို့ အချိန် သိပ်ကြာတော့မည်မဟုတ်ဟု ခန့်မှန်းရသည်။

***