ဂိုဏ်းတူညီလေး ရှန်ထျန်း ဘာလို့ ဒီလောက်ထိ မြန်နေရတာလဲ

အခန်း (၄၅၃) : ဂိုဏ်းတူညီလေး ရှန်ထျန်း ဘာလို့ ဒီလောက်ထိ မြန်နေရတာလဲ

ဤလူများက အရမ်းယဉ်ကျေးကြသည်။ ရှန်ထျန်း သူတို့ကို ဘယ်လိုပင် ဖျောင်းဖျနေပါစေ လဲလှယ်ဖို့အတွက် ဝိဇ္ဇာအသုံးအဆောင်ပစ္စည်းများကို ပေးနေဆဲ ဖြစ်သည်။

ရှန်ထျန်းလည်း ရွေးချယ်စရာမရှိတော့ဘဲ သူတို့စိတ်ကြိုက် လုပ်ခွင့်ပေးလိုက်ရသည်။

ဉာဏ်အလင်းပွင့် အဖန်ရည် ပမာဏကို ကန့်သတ်ထားသည့်အတွက် လဲလှယ်ချင်သူက ပိုမိုများပြားလာသည်။

ဉာဏ်အလင်းပွင့် အဖန်ရည် တစ်ခွက်ကို ရရှိဖို့ပင် များပြားသော ဝိဇ္ဇာအသုံးအဆောင်ပစ္စည်းများနှင့် လဲလှယ်ဖို့ လိုအပ်သည်။

လူတန်း၏ ရှေ့ဆုံး၌ ရှိသောသူများက စိတ်လှုပ်ရှားနေကြသည်။ သူတို့က ဉာဏ်အလင်းပွင့် လက်ဖက်ရည်ကို ဈေးနည်းနည်းဖြင့် ရလိုက်သည်ဟု ခံစားရသည်။

အပြန်အလှန်အနေဖြင့် နောက်တွင်ရှိသောသူများက အားကျနေကြသည်။

ဒီလိုမျိုး အဆင့်ရှိတဲ့ ဉာဏ်အလင်းပွင့် အဖန်ရည်ကို ဘယ်သူက ငြင်းမှာလဲ

အထွတ်အထိပ် ကောင်းကင်သစ်ပင် ကမ္ဘာကနေ အကျိုးအမြတ်မရချင်တဲ့သူ ရှိလို့လား

အဲလိုလူတွေအတွက် ဝိဇ္ဇာအသုံးအဆောင်ပစ္စည်း အနည်းငယ်ကို လက်လွှဲပေးလိုက်ဖို့က ဘာမှအရေးမပါပါဘူး

ဤနေရာတွင် ရှိနေသောသူအများစုက ဂိုဏ်းချုပ်များနှင့် အကြီးအကဲချုပ်များဖြစ်သည့်အတွက် သူတို့ဆီမှာ အရင်းအမြစ် ပေါကြွယ်ဝလှသည်။ ကြောက်တတ်သော ပါရမီရှင်ငယ် တချို့မှလွဲပြီး နေရာအနှံ့မှ စွမ်းအားကြီး ကျင့်ကြံသူများက ဉာဏ်အလင်းပွင့် အဖန်ရည်နှင့် လဲလှယ်ရန် ပြိုင်ဆိုင်မှု ပြင်းထန်နေကြသည်။

ရှန်ထျန်း၏ ရှေ့တွင် ဝိဇ္ဇာအသုံးအဆောင်ပစ္စည်း အရေအတွက်က တောင်ကုန်းငယ်လေး တစ်ခုစာအထိ မြင့်တက်သွားသည်။

ရှန်ထျန်းကို ကြည့်ရတာ အင်မတန် အံ့ဩမှင်သက်နေပုံပေါ်ပြီး ရွေးချယ်စရာမရှိပဲ လက်ခံလိုက်ရသည်။

ဉာဏ်အလင်းပွင့် အဖန်ရည်ကို ကွေ့ကုန်းကုန်းဆီ ပေးပြီးနောက် ရှန်ထျန်းက အဖန်ရည် နောက်ထပ်တစ်ခွက်ကို ကိုင်ဆောင်ကာ ဘေးဖက်သို့ လမ်းလျှောက်သွားသည်။

သူက ကံကြမ္မာ၏ သမီးတော်ကိုလည်း မြှောက်ပင့်ဖို့အတွက် မမေ့ခဲ့ပေ။

သန့်စင်သော ကြာပန်းလေး တစ်ပွင့်ကဲ့သို့သော သေးသွယ်သည့်ပုံရိပ်လေးတစ်ခုက တိတ်ဆိတ်စွာ မတ်တပ်ရပ်နေသည်။

သူမက မိန်းကလေး ချင်းယွဲ့ဖြစ်သည်။

သူမက တစ်ယောက်တည်းနေရသည်ကိုသာ ကြိုက်နှစ်သက်ပြီး လူရှုပ်သည့်နေရာများကို မကြိုက်ပေ။ ရှန်ထျန်းက ဉာဏ်အလင်းပွင့် အဖန်ရည်ခွက်နှင့်အတူ သူမ၏ ဘေးတွင် မတ်တပ်ရပ်ပြီး ပြောလိုက်သည်

“ စီနီယာ အစ်မချင်းယွဲ့ ဒီ ဉာဏ်အလင်းပွင့် အဖန်ရည်က အစ်မအတွက်ပါ”

မိန်းကလေး ချင်းယွဲ့က အံ့ဩသွားကာ အရှက်သည်းရင်း ပြောလိုက်သည်

“ မဟုတ်ပါဘူး အဲဒါ မင်းဟာပါ”

ဉာဏ်အလင်းပွင့် အဖန်ရည်၏ တန်ဖိုးက အားလုံးသိမြင်နိုင်လောက်အောင် ထင်ရှားသည်။

ဂိုဏ်းချုပ်များပင် ဝေမျှယူဖို့အတွက် ရမ်းကားကြမ်းတမ်းနေကြသည်။ ထိုအဖန်ရည်ကို ရရှိဖို့အတွက် ဝိဇ္ဇာအသုံးအဆောင်ပစ္စည်းများနှင့် လဲလှယ်ဖို့ လိုအပ်သည်။

ဉာဏ်အလင်းပွင့် အဖန်ရည် ပမာဏကလည်း ကန့်သတ်ထားသည့်အတွက် လူအများကြီးက ဝေစုရဖို့ ဆုံးရှုံးသွားသည့်အတွက် အရမ်းစိတ်ဓာတ်ကျနေကြသည်။

ယခု ရှန်ထျန်းက သူ၏ ဝေစုကို ပေးနေသည့်အတွက် မိန်းကလေးချင်းယွဲ့ စိတ်လှုပ်ရှားသွားသည်။

မောင်လေး ရှန်ထျန်းက ငါ့ကို ဘာလို့ အဖန်ရည်တစ်ခွက် ပေးရတာလဲ။ သူ ငါ့ကို သဘောကျနေတာများလား

ရှန်ထျန်းက ပြုံးကာ ပြောလိုက်သည်

“ စီနီယာအစ်မ ချင်းယွဲ့ မူမနေပါနဲ့တော့။ ကျွန်တော် ပေးတာလေးကို လက်ခံပေးပါနော်”

ရှန်ထျန်းက မိန်းကလေးချင်းယွဲ့ကို ကြည့်လိုက်သည့်အခါ ပိုပြီးတော့ ပြုံးမိသွားသည်။

အတိအကျပြောရလျှင် သူက မိန်းကလေးချင်းယွဲ့၏ ခေါင်းပေါ်ရှိ ကံကြမ္မာစက်ဝန်းကို ကြည့်နေခြင်း ဖြစ်သည်။

ထိုနေရာတွင် ကံအပြောင်းအလဲ အခွင့်အရေးပုံရိပ် ရှိနေသည်။

ရှန်ထျန်းက သူမကို စိုက်ကြည့်နေသည့်အတွက် မိန်းကလေးချင်းယွဲ့၏ အရှက်သည်းမှုက ပိုမိုပြင်းထန်လာသည်။

သူမက အရှက်သည်းသည့်ပုံစံဖြင့် ခေါင်းမော့လိုက်သည့်အခါ ရှန်ထျန်းနှင့် အကြည့်ချင်းဆုံသွားသည်။

အဲဒီ ချောမောတဲ့ ပုံပန်းသွင်ပြင်… နက်နဲတဲ့ မျက်လုံးတွေ…မြင့်မြတ်တဲ့ အပြုအမူ

ရှန်ထျန်းက ဒီကမ္ဘာက မဟုတ်ဘဲ ကောင်းကင်ဘုံကနေ ဆင်းသက်လာတဲ့ ထာဝရအရှင်တစ်ယောက်လိုပဲ

ထိုအခိုက်အတန့်တွင် မိန်းကလေးချင်းယွဲ့က တွေဝေမိန်းမောနေမိသည်။

ရှန်ထျန်းက ဘာလို့ သူမ၏ ခေါင်းပေါ်သို့ စိုက်ကြည့်နေလဲဆိုတာကို သူမ မသိသော်လည်း သူက တကယ်ကို ချောမောလှသည်။

“ စီနီယာအစ်မ ကျေးဇူးပြုပြီး လက်ခံပေးပါနော်”

ရှန်ထျန်းက လက်ဖက်ရည်ခွက်ကို မိန်းကလေးချင်းယွဲ့၏ လက်ထဲသို့ ထည့်ပေးပြီး ပြုံးပြလိုက်သည်။

မိန်းကလေးချင်းယွဲ့ အသိစိတ် ပြန်ဝင်လာကာ နူးညံ့သောအသံဖြင့် ပြောလိုက်သည်

“ ကျေးဇူးတင်ပါတယ် ဂျူနီယာ မောင်လေး”

ယခုလက်ရှိတွင် ရှန်ထျန်းကို ငြင်းဆိုဖို့က အင်မတန် ခက်ခဲလှသည်။

အကြောင်းအရင်းတချို့ကြောင့် သူမ၏ နှလုံးသားထဲတွင် ပြင်းထန်သော ခံစားချက်များ ထွက်ပေါ်လာသည်။

ထိုအချိန်တွင် လေပြေညင်းလေးတစ်ခု တိုက်ခတ်သွားသည်။

အထွတ်အထိပ် ကောင်းကင်သစ်ပင်က လှုပ်ယမ်းသွားကာ သစ်ရွက်များက ငွေခေါင်းလောင်းကဲ့သို့ တချွင်ချွင်မြည်နေသည်။

လေပြေညင်းက နှလုံးသားကို တိုက်ခတ်နေသလိုမျိုး သိမ်မွေ့သောအသံက သူတို့ကို စိတ်ကြည်လင်သွားစေသည်။

ထို့နောက် အသံက ဧရာမစစ်တပ်ကြီးတစ်ခု ချီတက်လာသကဲ့သို့ ရုတ်တရက် ကျယ်လောင်လာသည်။

သဘာဝအစီအရင်ပေါင်း သောင်းချီက ကောင်းကင်တစ်ခွင်တွင် ထွက်ပေါ်လာသည်။

မရေတွက်နိုင်သော အံ့ဖွယ်အလင်းတန်း အစီအရင်များက ကောင်းကင်တစ်ခွင် လည်ပတ်နေကာ အထွတ်အထိပ် ကောင်းကင်သစ်ပင်ကို လွှမ်းခြုံထားသည်။

ကောင်းကင်တာအို၏ အသံက အစီအရင်များကို တုန်ခါစေပြီး နယ်မြေတစ်ခုလုံးကို မှော်ဆန်သော လှိုင်းလုံးများဖြင့် ဖန်တီးထားသော ပင်လယ်ပြင်နှင့် အသွင်တူစေသည်။

မီးခိုရောင် အစီအရင်များက ကောင်းကင်မှ မြစ်တစ်စင်းကဲ့သို့ ဆင်းသက်လာကာ အထွတ်အထိပ် ကောင်းကင်သစ်ပင်ကို လုံးဝ လွှမ်းခြုံသွားသည်။

များပြားသော အစီအရင်များက လေဟာနယ်ပုံရိပ်ကို ဖန်တီးရန်အတွက် စုဝေးလာသည့်အတွက် ကောင်းကင်တာအိုကလည်း ပြင်းထန်လာသည်။

အားလုံးက ထိုမြင်ကွင်းကြောင့် စိတ်လှုပ်ရှားသွားကြသည်။ အထွတ်အထိပ် ကောင်းကင်သစ်ပင် ကမ္ဘာ ပွင့်လာလေပြီ။

အထွတ်အထိပ် ကောင်းကင်သစ်ပင်၏ အလယ်ခေါင်က လိမ်နေသည်။

အံ့ဖွယ်သက်တံအလင်းတန်းနှင့် မြူခိုးတို့ ပတ်လည်ဝန်းရံထားသည့် မှုန်ဝါးဝါး မုခ်ဝတစ်ခု ပေါ်ထွက်လာသည်။

စွမ်းအားကြီးသော တာအိုအရှိန်အဝါက ကြောက်စရာကောင်းသော လှိုင်းလုံးများသဖွယ် ကမ္ဘာကို သန့်ရှင်းပစ်ချင်သလိုမျိုး မုခ်ဝမှ အရှိန်ပြင်းစွာ ထွက်လာကြသည်။

မျက်စိတစ်မှိတ်အတွင်းမှာပင် နယ်မြေက ဉာဏ်အလင်းပွင့် နယ်မြေအဖြစ်သို့ ပြောင်းလဲသွားကာ သဘာဝအစီအရင်များကို ထိုနေရာသို့ ဆွဲဆောင်နေသည်။

နှစ်ပေါင်း ရှစ်ထောင်နေမှ တစ်ခါဖြစ်ပေါ်တတ်သည့် အထွတ်အထိပ် ကောင်းကင်သစ်ပင် ကမ္ဘာဖွင့်လှစ်ခြင်းက နောက်ဆုံးတော့ ရောက်ရှိလာခဲ့ပြီဖြစ်သည်။

ထိုမြင်ကွင်းကြောင့် အားလုံး ပျော်ရွှင်မြူးထူးသွားကြသည်။

သူတို့က အထွတ်အထိပ် ကောင်းကင်သစ်ပင်မှ အလင်းပြန်လာသော တာအိုအရှိန်အဝါကို နားလည်နိုင်ရန်အတွက် အလျင်အမြန် ထိုင်လိုက်ကြသည်။

အထွတ်အထိပ် ကောင်းကင်သစ်ပင် ကမ္ဘာထဲသို့ ဝင်ရောက်ဖို့အတွက် တာအိုအရှိန်အဝါနှင့် တစ်သားတည်းဖြစ်ဖို့ လိုအပ်သည်။

သိပ်မကြာခင်မှာပင် လူတချို့က တစ်ကိုယ်လုံး လင်းလက်တောက်ပသွားကြသည်။

ကောင်းကင်နှင့် ကမ္ဘာမြေကြီးကို တစ်သားတည်းဖြစ်အောင် ပေါင်းစပ်နေသကဲ့သို့ စွမ်းအားကြီးသော တာအိုအရှိန်အဝါနှင့် အလင်းပြန်နေသည်။

ဤလူအားလုံးက ဉာဏ်အလင်းပွင့် အဖန်ရည်ကို သောက်သုံးထားသည့်အတွက် ကမ္ဘာလောက၏ သဘာဝမှော်ပညာနှင့် နီးစပ်နေပြီး သူတို့၏ နားလည်နိုင်စွမ်းကလည်း တစ်ဟုန်ထိုးမြင့်တက်သွားသည်။

သူတို့က စွမ်းအားကြီးပြီး ဖိအားပြင်းသော တာအို အရှိန်အဝါပင်လယ်ဖြင့် ဝန်းရံခံထားရသည်။ သူတို့ ကောင်းကင်တာအိုနှင့် တစ်သားတည်းဖြစ်လာဖို့အတွက် သိပ်မကြာသင့်ပေ။

မရေတွက်နိုင်သော ပါရမီရှင်များက ဆက်လက်ပြီး နားလည်နိုင်စွမ်း တိုးပွားနေသည့်အတွက် အထွတ်အထိပ် ကောင်းကင်သစ်ပင်ရှေ့တွင် ခမ်းနားကြီးကျယ်သော မြင်ကွင်းတစ်ခု ထွက်ပေါ်လာသည်။

နှစ်နာရီကြာပြီးနောက်…

မရေတွက်နိုင်သော သဘာဝအစီအရင်များက ဆင်းသက်လာကာ ရှီထျန်းကျီကို ပတ်လည်ဝန်းရံထားသည့်အတွက် ပြင်းထန်သော တာအိုအရှိန်အဝါ ထွက်ပေါ်လာသည်။

ရှီထျန်းကျီတွင် အလွန်မြင့်မားသော မွေးရာပါ အရည်အချင်း ရှိသည်။ ထို့ကြောင့် ဉာဏ်အလင်းပွင့် အဖန်ရည်ကို သောက်သုံးပြီးနောက် ကောင်းကင်တာအိုနှင့် တစ်သားတည်းဖြစ်ရန် နှစ်နာရီသာ လိုအပ်ခဲ့သည်။

သူက ကမ္ဘာလောကကို စူးစမ်းလေ့လာနေသည့် နတ်ဘုရားတစ်ပါးကဲ့သို့ ဂုဏ်ယူစွာဖြင့် မတ်တပ်ရပ်နေပြီး သူ့အရှိန်အဝါကလည်း ခမ်းနားကြီးကျယ်လှသည်။

အားလုံး ထိတ်လန့်သွားကြသည်

“ အရှင့်သား ရှီထျန်းကျီရဲ့ အရည်အချင်းတွေက တကယ်ကို ပြိုင်ဘက်ကင်းတယ်”

သမိုင်းတစ်လျှောက်တွင် အထွတ်အထိပ် ကောင်းကင်သစ်ပင် ကမ္ဘာသို့ ဝင်ရောက်ဖို့အတွက် ဉာဏ်အလင်းပွင့်မှုကို ရရှိရန် အချိန် နှစ်နာရီသာ လိုအပ်သည့်သူက လက်တစ်ဖက်စာသာ ရှိသည်။

အထွတ်အမြတ်မြေ အသီးသီး၏ ဂိုဏ်းချုပ်များပင် ထိုအဆင့်သို့ မရောက်ရှိနိုင်ပေ။

ရှီထျန်းကျီက အံ့ဖွယ်အလင်းတန်း ပတ်လည်ဝန်းရံထားရင်း မြင့်တက်လာသည်။

သူက ရှန်ထျန်းကို စိုက်ကြည့်ကာ ပြောလိုက်သည်

“ ညီအစ်ကိုရှန်ကို အထဲမှာ စောင့်နေမယ်နော်”

ထို့နောက် ရှီထျန်းကျီ အထဲဝင်ရန် လမ်းပြဖို့အတွက် အထွတ်အထိပ် ကောင်းကင်သစ်ပင်ကမ္ဘာမှ မရေတွက်နိုင်သော အံ့ဖွယ်အလင်းတန်းများ ထွက်ပေါ်လာသည်။

ရှန်ထျန်းက ပြုံးရင်း ရေရွတ်လိုက်သည်

“ စိတ်မပူပါနဲ့ ခဏနေရင် လာရှာလိုက်ပါ့မယ်”

သူက တစ်စုံတစ်ခုကို စောင့်စားနေသကဲ့သို့ ဉာဏ်အလင်းပွင့်မှုကို ရဖို့အတွက် အလျင်မလိုပေ။

မိန်းကလေးချင်းယွဲ့လည်း ဉာဏ်အလင်းပွင့် အဖန်ရည်ကို သောက်သုံးကာ သူမ၏ ကျင့်စဉ်ကို စတင်လိုက်တော့သည်။

ရုတ်တရက် တောက်ပသော အံ့ဖွယ်အလင်းက သူမ၏ ခန္ဓာကိုယ်မှ ဖြာထွက်သွားကာ သူမ၏ နောက်တွင် ငွေရောင်လများ ထွက်ပေါ်လာသည်။

မိန်းကလေးချင်းယွဲ့တွင် မဟာလမင်း ခန္ဓာတည်ဆောက်ပုံကို ပိုင်ဆိုင်ထားသည်။ ကျောက်စိမ်းရေကန် အထွတ်အမြတ်မြေတွင် သူမက အမြင့်ဆုံး မွေးရာပါ အရည်အချင်းကို ပိုင်ဆိုင်ထားသည့် သူတော်စင်မတစ်ယောက်ဖြစ်သည်။

သူမက အတိဒုက္ခဖြတ်ကျော်ခြင်းအဆင့်သို့ ရောက်ရှိခါစဖြစ်သော်လည်း လခြောက်စင်းရသည်အထိ ကျင့်ကြံနိုင်နေပြီဖြစ်သည်။

မဟာလမင်း ခန္ဓာတည်ဆောက်ပုံက ကောင်းကင်နှင့် သဘာဝတို့ဖြင့် ဆက်စပ်နေသည့်အတွက် ကောင်းကင်တာအိုကို နားလည်ဖို့အတွက် အရမ်းသင့်တော်လှသည်။

မိန်းကလေးချင်းယွဲ့၏ တာအိုအငွေ့အသက်က ပိုမိုသန်မာလာသည်။ သူမ၏ အရှိန်အဝါကလည်း အရမ်းလေးနက်ဆန်းကြယ်လာသည်။

ရှီထျန်းကျီ၏ ဉာဏ်အလင်းပွင့်မှု ပြီးနောက်တွင် မိန်းကလေးချင်းယွဲ့က ငွေရောင် လအလင်းရောင် တောက်ပကာ ကောင်းကင်တာအိုနှင့် တစ်သားတည်းဖြစ်သွားသည်။

သူမ အထွတ်အထိပ် ကောင်းကင်သစ်ပင် ကမ္ဘာထဲသို့ ဝင်သွားသည့်အချိန်တွင် တခြားကမ္ဘာမှ နတ်သမီးလေးအဖြစ် ပြောင်းလဲသွားသလို ခံစားလိုက်ရသည်။

ထိုအရာကို မြင်ပြီးနောက် ရှန်ထျန်းလည်း စတင်လှုပ်ရှားတော့သည်။

သူက ဉာဏ်အလင်းပွင့် အဖန်ရည် တစ်ခွက်ကိုသောက်ကာ သူ၏ ဉာဏ်အလင်းပွင့်မှုကို စတင်ဖို့အတွက် မွေးရာပါ ခန္ဓာတည်ဆောက်ပုံကို အသက်သွင်းလိုက်သည်။

ရှန်ထျန်းက ခဏအတွင်းမှာပင် တောက်ပသော အံ့ဖွယ်အလင်းတန်း၏ လွှမ်းခြုံမှုကို ခံလိုက်ရပြီး မရေတွက်နိုင်သော သဘာဝအစီအရင်များကို သူ့ဆီ ရောက်လာဖို့အတွက် ဆွဲဆောင်နေသည်။

ယခင်က ရှုပ်ထွေးသော ကောင်းကင်တာအိုကို ရုတ်တရက် အလွယ်တကူ နားလည်နိုင်လာသည်။

တာအိုအငွေ့အသက်က ဧရာမ လှိုင်းလုံးတစ်ခုအသွင်သို့ ပြောင်းလဲသွားကာ ရှန်ထျန်း၏ ခန္ဓာကိုယ်ထဲသို့ ထိုးဖောက်ဝင်ရောက်သွားသည်။

မွေးရာပါ ခန္ဓာတည်ဆောက်ပုံ၏ ကူညီထောက်ပံ့မှုကြောင့် နားလည်ဖို့အတွက် အရမ်းလွယ်ကူနေသည်။

ထိုအချိန်အတွင်းတွင် သူက ကမ္ဘာလောကနှင့် တစ်သားတည်းဖြစ်သွားကာ ကောင်းကင်တာအို သဘောထားကို အလွယ်တကူ ဖမ်းဆုပ်သွားနိုင်ပုံပေါ်သည်။

မိနစ်အနည်းငယ်အတွင်းမှာပင် ရှန်ထျန်းက ကောင်းကင်တာအိုနှင့် လုံးဝ တစ်သားတည်းဖြစ်သွားသည်။

ထို့နောက် ရှန်ထျန်းက အထွတ်အထိပ် ကောင်းကင်သစ်ပင် ကမ္ဘာထဲသို့ ဝင်သွားကာ အားလုံး၏ အကြည့်ထဲမှ ပျောက်ကွယ်သွားသည်။

ရှန်ထျန်းက မိနစ်အနည်းငယ်အတွင်းမှာပင် ဉာဏ်အလင်းပွင့်မှုကို ရရှိသွားသည့်အတွက် အားလုံးက ကြောင်အနေကြသည်။

“ သူက လူသားနဲ့ သဘာဝ တစ်သားတည်းဖြစ်သွားစေတာမျိုးကို အောင်မြင်သွားတယ်”

“ အံ့ဖွယ်မိုးကောင်းကင် သူတော်စင်က အရမ်းကို အံ့ဩဖို့ ကောင်းတာပဲ”

“ ဒါက လူသားနဲ့ သဘာဝ တစ်သားတည်းဖြစ်သွားတာပဲ။ အဲလိုအခြေအနေမျိုးကို တစ်စုံတစ်ယောက်က ရရှိနိုင်ခဲ့တာ ဘယ်နှစ်နှစ်တောင် ရှိသွားပြီလဲ”

လူသားနှင့် သဘာဝ တစ်သားတည်းဖြစ်ခြင်းက ကောင်းကင်တာအိုအတွက် အဆင့်အမြင့်ဆုံး ဉာဏ်အလင်းပွင့်မှု ဖြစ်သည်။

သာမန် ကျင့်ကြံသူတစ်ယောက်အတွက် ဉာဏ်အလင်းပွင့်မှုက တောင်တန်းနှင့် သမုဒ္ဒရာများကို ဖြတ်ကျော်ရသကဲ့သို့ ဖြစ်နေပြီး အလွန်အမင်း ခက်ခဲလှသည်။

သို့သော် ကျင့်ကြံသူတစ်ယောက်က လူသားနှင့် သဘာဝ တစ်သားတည်း ဖြစ်လာသည့် အခြေအနေတွင် ဉာဏ်အလင်းပွင့်မှုက စားသောက်သလိုမျိုး လွယ်ကူရိုးရှင်းလာသည်။

ဤလူသားနှင့် သဘာဝ တစ်သားတည်း ဖြစ်ခြင်းကို ရရှိနိုင်သည့် တခြားသူများလည်း သမိုင်းဟောင်းထဲတွင် ရှိခဲ့သည်။

သူတို့က အလွန်အမင်း ကံကောင်းသော ကျင့်ကြံသူများဖြစ်ကြပြီး ထိုအခြေအနေကို ရရှိရန်အတွက် အချိန်အကြာကြီး ကျင့်ကြံခဲ့ကြသူများဖြစ်ကြသည်။

ဒါပေမဲ့ ရှန်ထျန်းက ကံကောင်းသွားရုံလေးတင် မဟုတ်သေးဘူး

ဘယ်သူက ဉာဏ်အလင်းပွင့်မှုကို ဒီလောက်မြန်မြန် ရသွားနိုင်မှာလဲ

မိနစ်ပိုင်းအတွင်း ကောင်းကင်တာအိုကို နားလည်ပြီးတော့ လူသားနဲ့ သဘာဝ တစ်သားတည်းဖြစ်တဲ့ အခြေအနေထဲကို ဝင်သွားတယ်တဲ့လား

တကယ်ကို အံ့ဩစရာပဲ

“ မဖြစ်နိုင်ဘူး…ဒါ ဘယ်လိုလုပ်ပြီးတော့…မဖြစ်နိုင်ဘူး”

“ ညီအစ်ကိုရှန် ဘယ်လိုလုပ်ပြီးတော့ ဒီလောက်မြန်မြန် လုပ်နိုင်ရတာလဲ”

“ ယောက်ျားတစ်ယောက် အရမ်းမြန်လွန်းတာက တကယ်ပဲ ကောင်းမွန်တဲ့အရာလား”

ဘေးနားရှိ ဝမ်ရှန်းယု၏ နှုတ်ခမ်းထောင့်တို့ တွန့်ချိုးသွားမိသည်။

ရှန်ထျန်း၏ အရည်အချင်းများက တိုင်းတာနိုင်သည်ထက် ပိုများသည်ဆိုတာကို သူ သိခဲ့သော်လည်း သူတို့က အရမ်းကြောက်မက်ဖွယ် အဆင့်သို့ ရောက်ရှိနေမည်ဟု မထင်ထားခဲ့ပေ။

ရှီထျန်းကျီတောင် အဲဒါကို ပြီးမြောက်အောင် လုပ်နိုင်ဖို့အတွက် အချိန်နှစ်နာရီ လိုအပ်ခဲ့တာလေ။ ဒါပေမဲ့ မင်းကတော့ မိနစ်ပိုင်းအတွင်း လုပ်နိုင်တယ်တဲ့လား

ငါတို့ကိုလည်း နည်းလမ်းလေး ပေးပါဦးလား

မင်းကိုယ်မင်း ညီအစ်ကိုရှန်နဲ့ နှိုင်းယှဉ်နေတာက ကိုယ့်ဒုက္ခကိုယ်ရှာနေတာပဲ

ဝမ်ရှန်းယုနှင့် ချီရှောက်ရွှမ်တို့က အကြည့်ချင်းဆုံပြီးနောက် အံကြိတ်ကာ ဆက်လက်ကျင့်ကြံတော့သည်။

ထိုမြင်ကွင်းကို မြင်သွားသည့် ချီကျန့်၏ အကြည့်ထဲတွင် ယှဉ်ပြိုင်မှုတို့ဖြင့် ပြည့်နှက်နေသည်။ သူကလည်း ဉာဏ်အလင်းပွင့်ဖို့နှင့် ရှန်ထျန်းကို မှီနိုင်သလောက် မြန်မြန်လိုက်ဖို့ အကောင်းဆုံး ကြိုးစားနေသည်။

အံ့ဩစရာ ကောင်းစွာဖြင့် စိုးရိမ်ကြောင့်ကြဆုံးဖြစ်နေကြသူများက ကျန်းယွင်ရှီး၊ ခွန်ယုနှင့် တခြားအမျိုးသမီးများဖြစ်ကြသည်။

ရှန်ထျန်း အထွတ်အထိပ် ကောင်းကင်သစ်ပင်ကမ္ဘာထဲသို့ အရမ်းမြန်မြန် ဝင်သွားနိုင်သည်ကို ကြည့်ပြီး ထိတ်လန့်တုန်လှုပ်နေကြသည်။

ရှန်ထျန်းက မိန်းကလေးချင်းယွဲ့ကို အဖန်ရည်တစ်ခွက် ပေးနေသည်ကိုလည်း သူတို့ မြင်ခဲ့ကြသည်။

ယခု ရှန်ထျန်းက မိန်းကလေးချင်းယွဲ့နောက်တွင် အထွတ်အထိပ် ကောင်းကင်သစ်ပင် ကမ္ဘာထဲသို့ ဝင်ရောက်သွားခြင်းဖြစ်သည်။

ထိုလူ၏ အပြုအမူများက မိန်းကလေးအားလုံးကို အရမ်း စိုးရိမ်ကြောင့်ကြစေသည်။

ကံမကောင်းစွာဖြင့် ဉာဏ်အလင်းပွင့်ခြင်းက ဖိအားပေးလို့ မရနိုင်သည့် သဘာဝဖြစ်စဉ်တစ်ခု ဖြစ်သည်။

ကျန်းယွင်ရှီးနှင့် ကျန်သူများက သူတို့၏ စိုးရိမ်ကြောင့်ကြမှုကြောင့် ကျင့်ကြံဖို့အတွက် စိတ်အေးအေးမထားနိုင်တော့ပေ။ သူတို့၏ စိုးရိမ်မှုကြောင့် ဉာဏ်အလင်းပွင့်မှုကို ရရှိရန် ပိုမိုခက်ခဲသွားစေသည်။

အထွတ်အထိပ် ကောင်းကင်သစ်ပင် ကမ္ဘာထဲတွင်…

မိန်းကလေးချင်းယွဲ့က ဆန်းကြယ်အာကာပြင်ထဲတွင် ထွက်ပေါ်လာသည်။

ကန့်သတ်ထားသော ဘောင်များ မရှိသကဲ့သို့ အင်မတန် ကျယ်ပြန့်လှသည်။

မှုန်မှိုင်းနေသောမြူခိုးက တစ်နေရာလုံးကို ဖုံးလွှမ်းထားပြီး မြင်နေရသည်များက မှုန်ဝါးနေသည်။

စွမ်းအားကြီးပြီး ပြင်းထန်သော အစီအရင်များက ကောင်းကင်ကို တံတားတစ်စင်းသဖွယ် ပေါင်းကူးလုပ်လိုက်သည်။ ထိုအရာများက နယ်မြေငါးခုတွင် ပိုမိုရှင်းလင်းလှသည်။

ဤနေရာတွင် ကျင့်ကြံခြင်းက ဆယ်ဆလောက်ပိုပြီး အကျိုးရှိသည်။

အထွတ်အထိပ် ကောင်းကင်သစ်ပင်က ဂိုဏ်းချုပ်များ၏ စိတ်နှလုံးသားကိုပင် မွှေနှောက်နိုင်သည့် နယ်ပယ်အဆင့်ဖြစ်ပြီး ဘယ်သူကမှ ဤကဲ့သို့ ဉာဏ်အလင်းပွင့်နယ်မြေကို မငြင်းဆန်နိုင်ပေ။

ပတ်လည်ဝန်းရံနေသော မြူခိုးနေရာကို ကြည့်ကာ မိန်းကလေးချင်းယွဲ့ ဘယ်သွားရမယ်မှန်း မသိတော့ပေ။

သူမ အထွတ်အထိပ် ကောင်းကင်သစ်ပင် ကမ္ဘာထဲသို့ ယခုက ပထမဆုံး ရောက်ဖူးခြင်းဖြစ်သည်။

သူမက အထွတ်အထိပ် ကောင်းကင်သစ်ပင် ကမ္ဘာနှင့် ပတ်သက်ပြီး ဟွမ်ရှစ်ပြောတာကို ကြားလိုက်သော်လည်း သူမ ဝင်ပြီးနောက် ဘယ်သွားရမှန်းမသိဖြစ်နေသည်။

ထိုအချိန်တွင် ရှန်ထျန်း ထွက်ပေါ်လာသည်။

“ အစ်မ ချင်းယွဲ့”

သူက မိန်းကလေးချင်းယွဲ့ တွေဝေကာ မတ်တပ်ရပ်နေသည်ကို တွေ့လိုက်ရသည့်အတွက် လမ်းလျှောက်သွားလိုက်သည်။

မိန်းကလေး ချင်းယွဲ့က အံ့ဩမှင်သက်စွာဖြင့် ပြောလိုက်သည်

“ မောင်လေး ရှန်ထျန်းက ဒီကို ဘယ်လိုလုပ်ပြီးတော့ ဒီလောက်မြန်မြန် ရောက်လာရတာလဲ”

သူမ မထိတ်လန့်ဘဲ မနေနိုင်တော့ပေ။

မိန်းကလေးချင်းယွဲ့ ဝင်မလာခင် ရှန်ထျန်း စတင်မကျင့်ကြံရသေးကြောင်း သူမ သတိထားမိသည်။

ဒါက လွန်ခဲ့တဲ့ မိနစ်ပိုင်းလေးကလေ။ ဒါပေမဲ့ အခု သူက ဒီကို ရောက်နေပြီတဲ့လား

ဒါက အရမ်းကို မြန်လွန်းတယ်

ရှန်ထျန်းကို ပြုံးကာ ပြောလိုက်သည်

“ ကျွန်တော် အစ်မနဲ့အတူ ခရီးအတူသွားနိုင်မလား သိပါရစေ”

ရှန်ထျန်း ဤအချိန်ကို ရွေးချယ်လိုက်ခြင်းက မိန်းကလေးချင်းယွဲ့နှင့်အတူ ခရီးသွားချင်သောကြောင့် ဖြစ်သည်။

ကံကြမ္မာသားတော်၊ သမီးတော်များ၏ ခေါင်းပေါ်ရှိ ကံအပြောင်းအလဲ အခွင့်အရေးများထဲတွင် မိန်းကလေးချင်းယွဲ့၏ ကံအပြောင်းအလဲ အခွင့်အရေးက အစောဆုံးဖြစ်ပေါ်လာပြီး အကျိုးအမြတ်အရှိဆုံး ဖြစ်သည်။

ထို့ကြောင့် ရှန်ထျန်းက ထုံးစံအတိုင်း ကံအပြောင်းအလဲ အခွင့်အရေးကို မျှယူချင်နေသည်။

မိန်းကလေးချင်းယွဲ့က အံ့ဩမှင်သက်သွားသည်။

သူမနှင့်အတူ ခရီးအတူသွားဖို့အတွက် ရှန်ထျန်းက အရင်ဦးဆုံး ပြောလာမည်ဟု ထင်မထားခဲ့ပေ။

ထိုအရာက သူမ၏ နှလုံးသားကို လှုပ်ခတ်သွားစေသည်။

မောင်လေးရှန်ထျန်းက ဘာလို့ ငါနဲ့အတူ ခရီးသွားချင်တယ် ပြောနေရတာလဲ

သူက ငါ့ရဲ့ လုံခြုံမှုအတွက် စိုးရိမ်လို့များလား … သူ ငါ့ကို တကယ်သဘောကျနေတာတော့ မဟုတ်လောက်ပါဘူးနော်

ဒါပေမဲ့ သူက အသက်နှစ်ဆယ်ဝန်းကျင်ပဲ ရှိသေးတာလေ

အရမ်းငယ်နေတယ်

အထွတ်အထိပ် ကောင်းကင်သစ်ပင် ကမ္ဘာက ဉာဏ်အလင်းပွင့် နယ်မြေဖြစ်သော်လည်း စိတ်ကူးထားသလိုမျိုး မလုံခြုံနိုင်ပေ။

ထိုနေရာတွင် နတ်ဆိုးတာအိုမှ ဖန်တီးထားသည့် မကောင်းဆိုးဝါးများ ရှိနေသည့်အပြင် လှုပ်ရှားနေသော လေဟာနယ်တံခါးပေါက်များစွာလည်း ရှိနေသည်။

ထိုတံခါးပေါက်များထဲတွင် ကမ္ဘာဦးခေတ်၏ စွမ်းအားကြီး ကျင့်ကြံသူများ ချန်ထားခဲ့သည့် အမွေအနှစ်များ ရှိသည်။

လေဟာနယ်တံခါးပေါက်များထဲတွင် ကံအပြောင်းအလဲ အခွင့်အရေးများ ရှိနေနိုင်သလို ကြီးမားသော အန္တရာယ်များလည်း ရှိနေနိုင်သည်။ အချင်းချင်း အပြန်အလှန် ကူညီနိုင်ရန်အတွက် အဖော်တစ်ယောက်နှင့် သွားခြင်းက မှန်ကန်သော ရွေးချယ်မှုတစ်ခု ဖြစ်သည်။

မိန်းကလေးချင်းယွဲ့က တစ်ကိုယ်တည်း သွားဖို့သာ အမြဲတမ်း ကြိုက်နှစ်သက်ခဲ့သည်။ ထိုအခိုက်အတန့်တွင် ရှန်ထျန်း၏ ဖိတ်ကြားမှုကို သူမ ဘယ်လိုတုံ့ပြန်ရမည်ဆိုတာကို မသိတော့ပေ။

ရှန်ထျန်းက ကံကြမ္မာသားတော် ဖြစ်သည်ဆိုသော သတင်းကို သူမ ပြန်လည်စဉ်းစားမိသွားသည်။ သူမသာ သူနှင့် ပူးပေါင်းလိုက်ပါက ကံအပြောင်းအလဲ အခွင့်အရေးများမှ အကျိုးအမြတ်ရနိုင်သည်။

ကံအပြောင်းအလဲ အခွင့်အရေးများပြားလှသော အထွတ်အထိပ် ကောင်းကင်သစ်ပင် ကမ္ဘာကဲ့သို့သော နေရာမျိုးတွင် ကံကြမ္မာသားတော်နှင့် ပူးပေါင်းဖို့ ကမ်းလှမ်းချက်က တပ်မက်စရာ ကောင်းလှသည်။

မိန်းကလေးချင်းယွဲ့က ခဏတာ စဉ်းစားလိုက်သည်

“ ဂျူနီယာမောင်လေးနဲ့ အတူတူ ခရီးသွားရမယ်ဆိုရင်တော့ ဂုဏ်ယူမိပါတယ်”

ရှန်ထျန်းနဲ့ ပူးပေါင်းဖို့ သဘောတူလိုက်တာက ကံအပြောင်းအလဲ အခွင့်အရေးတွေ ရှာချင်လို့ပဲ။ ရှန်ထျန်းက ရုပ်ချောလို့ လုံးဝ မဟုတ်ဘူး။

မိန်းကလေးချင်းယွဲ့ သဘောတူလိုက်သည့်အခါ ရှန်ထျန်းက စိတ်ပါလက်ပါ ပြုံးလိုက်သည်။

“ ကောင်းပြီလေ ဒါဆိုရင်လည်း သွားလိုက်ရအောင်”

သူက သူ့ ရည်ရွယ်ချက် အောင်မြင်သွားပြီဖြစ်သည်။ ဤနေရာမှ စတင်ပြီး ဤနယ်မြေရှိ ကံအပြောင်းအလဲ အခွင့်အရေးများကို ရှာဖွေနိုင်ပြီ ဖြစ်သည်။

“ မောင်လေး ငါတို့ ဘယ်ကို သွားသင့်လဲ”

သူမက ယခု ရှန်ထျန်းနှင့် တစ်ဖွဲ့ထဲဖြစ်သွားသည့်အတွက် သူမ သိချင်သည်ကို မေးမြန်းလိုက်သည်။

သူမ ဘယ်သွားရမလဲဆိုတာကို မစဉ်းစားတတ်တော့ပေ။

အထွတ်အထိပ် ကောင်းကင်သစ်ပင်ကမ္ဘာရှိ အကောင်းဆုံးသော ကံအပြောင်းအလဲ အခွင့်အရေးများက ဉာဏ်အလင်းပွင့်မှုနှင့် အမွေအနှစ်များ ဖြစ်ကြသည်။

သို့သော် ထိုင်ပြီး ကျင့်ကြံနေရုံဖြင့် ဉာဏ်အလင်းပွင့်မှုကို မရရှိနိုင်ပေ။

တာအိုအငွေ့အသက်က ပြင်ပလောကထက် ပိုပြီးတော့ စွမ်းအားကြီးနေလျှင်ပင် မလုံလောက်သေးပေ။

အထွတ်အထိပ် ကောင်းကင်သစ်ပင် ကမ္ဘာတွင် များပြားသော ဉာဏ်အလင်းပွင့် နယ်မြေများစွာ ပါရှိသည်။

ဥပမာအားဖြင့် ဓားသန့်စင်ခြင်းရေကန်က အလွန် အလားအလာရှိသော ဓားတာအိုကို ပိုင်ဆိုင်ထားသည့်အတွက် ဓားပညာရပ် ကျင့်ကြံသူများအတွက် အရမ်း အကျိုးအမြတ်ရှိသည်။

မီးတာအို ၃ထောင် ပိုင်ဆိုင်ထားသော အဆုံးမဲ့မီးနယ်မြေက မီးဓာတ်ကျင့်ကြံသူများအတွက် သုခဘုံတစ်ခု ဖြစ်သည်။

ဤနေရာတွင် တခြားသော ဉာဏ်အလင်းပွင့် နယ်မြေများလည်း ရှိသည်။

ဤနယ်မြေများတွင် ဉာဏ်အလင်းပွင့်ခြင်းကို ရရှိနှုန်းက ပြင်ပလောကထက် အကြိမ်ပေါင်း ရာချီ၊ ထောင်ချီပြီး ပိုမိုမြန်ဆန်လှသည်။

ဤနေရာတွင် တစ်ရက်တာ ကျင့်ကြံခြင်းက ပြင်ပလောကတွင် နှစ်ပေါင်းတစ်ရာကျင့်ကြံခြင်းနှင့် ညီမျှသည်။

သို့သော် ဤနယ်မြေများက လေဟာနယ်တံခါးပေါက်များနောက်တွင် ပုန်းကွယ်နေသည့်အတွက် ရှာဖွေရန် ခက်ခဲလှသည်။

ကျင့်ကြံသူများအနေဖြင့် အကျိုးအမြတ်ရရှိဖို့အတွက် ကိုယ့်အတွက် အသင့်တော်ဆုံးဖြစ်မည့် ဉာဏ်အလင်းပွင့်နယ်မြေကို ရှာဖွေရမည်ဖြစ်သည်။ မဟုတ်ပါက အချိန်ဖြုန်းတီးရာကျလိမ့်မည်။

ရှန်ထျန်းက ပြုံးကာ ပြောလိုက်သည်

“ ကျွန်တော်တို့ အနောက်ဖက်ကို သွားရအောင်”

သူက ဦးတည်ရာကို ကျပန်းရွေးချယ်ပြီး ဦးတည်သွားလိုက်သည်။

“ အနောက်ဖက်လား”

မိန်းကလေးချင်းယွဲ့က ထိတ်လန့်သွားသည်။

ရှန်ထျန်း ရောက်မလာခင်က သူမလည်း ဦးတည်ရာကို ကျပန်းရွေးချယ်ဖို့အတွက် ပြင်ဆင်နေခဲ့သည်။

ဦးတည်ရာဖက်ကလည်း အနောက်ဖက်ကို ရွေးချယ်ဖို့အတွက် စဉ်းစားထားခဲ့သည်။

ရှန်ထျန်းက သူမနှင့် အတွေးချင်းတူနေသည့်အတွက် မိန်းကလေးချင်းယွဲ့က ပြုံးလိုက်မိသည်။

ဂျူနီယာ မောင်လေးရှန်ထျန်းနဲ့ ငါက တကယ်ကို စိတ်ချင်းဆက်နေတာပဲ

သူတို့နှစ်ယောက်က အနောက်ဖက်သို့ ဦးတည်သွားလိုက်ကြသည်။

လမ်းတစ်လျှောက်တွင် သူတို့ တာအိုနတ်ဆိုးတချို့နှင့် တွေ့ဆုံခဲ့ရသည်။

ထိုနတ်ဆိုးသတ္တဝါများက ပုံစံအမျိုးအစား စုံလင်လှသည်။ တချို့က ရက်စက်ကြမ်းကြုတ်သော သားရဲပုံစံဖြစ်ပြီး တချို့က ပုံရိပ်ယောင် မြူခိုးဖြစ်ကာ တချို့ကတော့ ရက်စက်ကြမ်းကြုတ်သည့် မကောင်းဆိုးဝါးများ ဖြစ်ကြသည်။

သူတို့က စွမ်းအားကြီးသော တာအိုအငွေ့အသက်ကို ထုတ်လွှတ်ပြီး သဘာဝအစီအရင်နှင့် တစ်သားတည်းပေါင်းစပ်သွားသည်။

ကျင့်ကြံသူများသာ သူတို့ကို သတိထားမကြည့်ပါက သူတို့၏ တည်ရှိမှုကိုပင် သတိထားမိမည်မဟုတ်ပေ။

ဤတာအိုနတ်ဆိုးများ တိုက်ခိုက်ရာတွင် ထူးခြားသည့် နည်းလမ်းများရှိသည်။ သူတို့က တိုက်ခိုက်ဖို့အတွက် ဤလောက၏ သဘာဝအစီအရင်များ၏ စွမ်းအားကို ထိန်းချုပ်နိုင်သည်။

အဆင့်တူ ကျင့်ကြံသူများပင် ထိုတာအိုနတ်ဆိုးများ၏ ယှဉ်ပြိုင်ဘက် မဖြစ်နိုင်ပေ။

ကံကောင်းစွာဖြင့် ဤလောက၏ အပြင်ဘက်ပိုင်း နယ်မြေများတွင် ကောင်းကင်အသျှင်အဆင့် တာအိုနတ်ဆိုးများသာ ရှိသည့်အတွက် ရှန်ထျန်းနှင့် မိန်းကလေးချင်းယွဲ့အတွက် မှုစရာမဟုတ်ပေ။

သူတို့နှစ်ယောက်က တာအိုနတ်ဆိုးများကို အလွယ်တကူ သုတ်သင်ရှင်းလင်းနိုင်သည်။

အရေးကြီးဆုံးအရာက တာအိုနတ်ဆိုးများ သေသွားသည့်အခါ သူတို့၏ အလောင်းများ ပျောက်ဆုံးသွားကာ တောက်ပသော မြူခိုးဖြင့် လွှမ်းခြုံထားသည့် တစ်စစီဖြစ်နေသော ကောင်းကင်တာအို အစိတ်အပိုင်းများသာ ကျန်ရှိခဲ့သည်။

သူတို့က တာအိုနတ်ဆိုးများ ကျန်ရှိခဲ့သော စွမ်းအားကို ပိုင်ဆိုင်ပြီး ပြန်လည်သန့်စင်နိုင်သည်။

သို့သော် သူတို့တွေက သူတို့နှစ်ယောက်အတွက် အဲလောက်ကြီး အသုံးမဝင်ပေ။ သူတို့၏ စွမ်းအားများကို ရရှိပြီး ဘာမှမလုပ်နိုင်သော်လည်း ဘာမှမရသေးတာထက်စာလျှင် ကောင်းသေးသည်။

သူတို့နှစ်ယောက် ထိုကမ္ဘာ၏ အတွင်းပိုင်းသို့ ရောက်လာလေလေ တာအိုနတ်ဆိုးများက ပိုပြီးတော့ စွမ်းအားကြီးလာလေလေဖြစ်သည်။

ဤနေရာတွင် စွမ်းအားကြီးသော ဝိဇ္ဇာအဆင့် တာအိုနတ်ဆိုးများရှိပြီး မိန်းကလေးချင်းယွဲ့က သူတို့ကို အလွယ်လေး သတ်လိုက်နိုင်ပြန်သည်။

သူမက ဝိဇ္ဇာအသစ်တစ်ယောက်ဖြစ်သော်လည်း ပြိုင်ဘက်ကင်း တိုက်ခိုက်စွမ်းရည်ရှိသည့်အတွက် သူမအဆင့်ထက် ကျော်လွန်နေသော ပြိုင်ဘက်ကိုပင် သတ်ဖြတ်နိုင်သည်။

လခြောက်စင်း ပုံရိပ်သဏ္ဌာန်၏ ကူညီထောက်ပံ့မှုပါလျှင် လေးကြိမ်မြောက် အတိဒုက္ခဖြတ်ကျော်ထားသော စစ်မှန်သည့် ဝိဇ္ဇာကိုပင် သတ်နိုင်သည်။

လမ်းတစ်လျှောက်တွင် ကြုံတွေ့ရသည့် တာအိုနတ်ဆိုးများအားလုံးကို မိန်းကလေးချင်းယွဲ့ တစ်ယောက်ထဲကပင် သတ်နိုင်သည်။

ရှန်ထျန်းကတော့ ဘေးမှာ အနားယူနေလို့ရသည်။

ထိုအခိုက်အတန့်တွင် လေဟာနယ်က ရုတ်တရက် တုန်ခါလာကာ ကြောက်စရာကောင်းသော အရှိန်အဝါက ဧရာမ ဆူနာမီလှိုင်းလုံးကြီးများကဲ့သို့ နေရာကို ကမောက်ကမ ဖြစ်သွားစေသည်။

“ အစ်မ သတိထား”

ရှန်ထျန်းက ချက်ချင်းတုံ့ပြန်ကာ မိန်းကလေး ချင်းယွဲ့ကို ဘေးဖက်သို့ ဆွဲသွားလိုက်သည်။

စက္ကန့်ပိုင်းအတွင်းမှာပင် သူတို့ စောနက ရှိနေခဲ့သော အာကာပြင်က တစ်စုံတစ်ခု၏ ဝါးမျိုခြင်းကို ခံလိုက်ရသကဲ့သို့ ဗလာနတ္ထိချောက်နက်အဖြစ်သို့ ပြောင်းလဲသွားသည်။

မိန်းကလေးချင်းယွဲ့ အလွန်ထိတ်လန့်သွားသည်။

ဒီမကောင်းဆိုးဝါးရဲ့ အရှိန်အဝါကို ထိန်းချုပ်ထားတဲ့ စွမ်းရည်က တကယ်ကို အားကောင်းတာပဲ

မိန်းကလေးချင်းယွဲ့က အန္တရာယ်ရှိသော တိုက်ခိုက်မှု ကျရောက်မည်ကို နည်းနည်းလေးမှ အရိပ်အမြွက်မသိခဲ့ပေ

ရှန်ထျန်းကြောင့်သာမဟုတ်ပါက သူမ ပြင်းထန်သောဒဏ်ရာကို ခံစားနေရလောက်ပြီဖြစ်သည်။

“ အဲဒါ ဘာလဲဟင်”

မိန်းကလေးချင်းယွဲ့က စိုးရိမ်သွားပုံပေါ်သည်။

အထွတ်အထိပ် ကောင်းကင်သစ်ပင်ကမ္ဘာက သူမ ထင်ထားသလောက် မရိုးရှင်းပေ။ ဤနေရာတွင် ထိတ်လန့်စရာကောင်းသောအရာများ ဖုံးကွယ်နေသည်။

ဝေါင်း…

ရက်စက်သော ဟိန်းဟောက်သံတစ်ခု ထွက်ပေါ်လာသည်။

ကြည့်ရတာ တာအိုနတ်ဆိုးက သူ့ပစ်မှတ်ကို တိုက်ခိုက်မှု လွဲချော်သွားသည့်အတွက် ဒေါသထွက်နေပုံပေါ်သည်။

အာကာပြင် အပိုင်းအစတွန့်လိမ်သွားကာ ဧရာမတာအိုနတ်ဆိုးတစ်ကောင် ထွက်ပေါ်လာပြီး အရှိန်အဝါက ထိတ်လန့်စရာကောင်းလှသည်။

တာအိုနတ်ဆိုးတွင် အကျည်းတန်သော ပုံသဏ္ဌာန်ရှိသည်။ ထိုအရာက သန္ဓေပြောင်း နဂါးတစ်ကောင်အသွင်ရှိပြီး ဖျော့တော့သော ခရမ်းရောင်ဖြင့် ဖုံးအုပ်ထားကာ ခိုင်မာသော ကြေးခွံများရှိသည်။

သူ၏ မျက်လုံးနှစ်လုံးကလည်း သွေးနေမင်းကဲ့သို့ တောက်ပနေပြီး ထိတ်လန့်စရာကောင်းသည့် အရှိန်အဝါကို ထုတ်လွှတ်နေသည်။ သူက ကမ္ဘာတစ်ခုလုံးကို ဝါးမျိုချင်သကဲ့သို့ ဧရာမမေးရိုးကြီးများကို ဖွင့်ဟထားသည်။

ကြောက်စရာအကောင်းဆုံးသော အပိုင်းက သူ ထုတ်လွှတ်နေသော တာအို အငွေ့အသက်ဖြစ်သည်။ တစ်ကမ္ဘာလုံးကို စုတ်ဖြဲဖျက်စီးကာ အရာအားလုံးကို သုတ်သင်ပစ်ချင်သကဲ့သို့ အင်မတန် ဖျက်စီးလိုစိတ် ပြင်းပြနေသည်။

“ ဒါ…ဒါက… ကောင်းကင်ဝါးမျိုသားရဲပဲ”

မိန်းကလေးချင်းယွဲ့ တုန်ရီကာ မျက်နှာ ဖြူဖပ်ဖြူလျော် ဖြစ်သွားသည်။ သူမက ရှေးဟောင်းစာအုပ်များကို ဖတ်ခဲ့သည့်အတွက် ဤသတ္တဝါ၏ မှတ်တမ်းများကို မြင်ခဲ့ဖူးသည်။

ရှေးပဝေဏီခေတ်အတွင်းတွင် ကမ္ဘာမြေပေါ်ရှိ သက်ရှိသတ္တဝါအားလုံးကို ဝါးမျိုနိုင်သည့် ကြောက်စရာကောင်းသော မျိုးနွယ်တစ်ခုရှိခဲ့သည်။

ထိုအရာက ကောင်းကင်ဝါးမျိုသားရဲ ဖြစ်သည်။

ဤမျိုးနွယ်က လေဟာနယ်ကို ထိန်းချုပ်ကာ လေဟာနယ်လှိုင်းကို ဖြတ်သန်းကာ သွားလာနိုင်သည်။ သူတို့ဆီမှာ လေဟာနယ်၏ စွမ်းအင်ကို ထိန်းချုပ်နိုင်စွမ်း ရှိသည်။

သို့သော် ထိုအရာက ကြောက်စရာအကောင်းဆုံးအပိုင်း မဟုတ်သေးပေ။

ကောင်းကင်ဝါးမျိုသားရဲ၏ စွမ်းအားအကြီးဆုံးအရာက ဝါးမျိုနိုင်စွမ်း ဖြစ်သည်။

ရှေးပဝေဏီခေတ်အတွင်းတွင် ဤမျိုးနွယ်က ပြိုင်ဘက်ကင်းသွားသည်။ စွမ်းအား ပိုကြီးသောသူများက နေ၊ လနှင့် ကြယ်တာရာများကို ဝါးမျိုနိုင်သည့် စွမ်းအားကြီးသော သူများဖြစ်ကြသည်။ အနည်းငယ်သာ စွမ်းအားရှိသော သားရဲများက ကုန်းမြေနှင့် ပင်လယ်များကို ဝါးမျိုနိုင်သည်။

အားလုံးထဲမှ စွမ်းအားအကြီးဆုံးသူများက ထာဝရအရှင်အဆင့် ကျင့်ကြံသူများကိုပင် ဝါးမျိုနိုင်သည်။

ကောင်းကင်ဝါးမျိုသားရဲများ ရှိသည့်နေရာက ကျယ်ပြန့်သော ပျက်စီးမှုဖြစ်နိုင်သည့်နေရာဖြစ်သည်။

ဤနေရာတွင် ကောင်းကင်ဝါးမျိုသားရဲနှင့် ကြုံတွေ့ရလိမ့်မည်ဟု မိန်းကလေးချင်းယွဲ့ ထင်မထားခဲ့ပေ။

ဒါက ကောင်းကင်တာအိုကနေ ဖန်တီးထားတဲ့ ကောင်းကင်ဝါးမျိုသားရဲ ဖြစ်နိုင်ပေမဲ့လည်း သူ့စွမ်းအားက အဆုံးစွန်ထိကို ကြောက်ဖို့ကောင်းတယ်

ဤကောင်းကင်ဝါးမျိုသားရဲ၏ အရှိန်အဝါက ၆ကြိမ်မြောက် အတိဒုက္ခလွန် ဝိဇ္ဇာအစစ်အမှန်ကိုပင် နှိုင်းယှဉ်နိုင်သည်။

ထို့အပြင် စွမ်းရည်နှစ်မျိုးကိုလည်း ပိုင်ဆိုင်ထားသေးသည်။

လေဟာနယ် ထိန်းချုပ်ခြင်းနှင့် စွမ်းအင်ဝါးမျိုခြင်း ဖြစ်သည်။

ကောင်းကင်ဝါးမျိုသားရဲ၏ တိုက်ခိုက်စွမ်းရည်က အဆင့်တူ တာအိုနတ်ဆိုးထက် အများကြီး သာလွန်သည်။

မိန်းကလေး ချင်းယွဲ့ ဖြူဖပ်ဖြူလျော်ဖြစ်သွားကာ ပြောလိုက်သည်

“ မောင်လေး ငါတို့ ဒီကောင်းကင်ဝါးမျိုသားရဲကို လျှော့တွက်လို့မရဘူး။ ငါတို့ အခု ထွက်ပြေးရအောင်”

ကောင်းကင်ဝါးမျိုသားရဲက အရမ်းစွမ်းအားကြီးသည့်အတွက် သူတို့ ကိုင်တွယ်နိုင်သည့်အရာ မဟုတ်ပေ။

ထို့ကြောင့် မိန်းကလေးချင်းယွဲ့က ဆန့်ကျင်ဘက်အရပ်သို့ အမြန်ထွက်ပြေးသော်လည်း မီတာ တစ်ရာလောက် ရောက်အပြီးတွင် လှည့်ကြည့်လိုက်သည့်အခါ ရှန်ထျန်း ရပ်တန့်နေဆဲဖြစ်သည်ကို မြင်လိုက်ရသည်။

မိန်းကလေးချင်းယွဲ့က ထိတ်လန့်တုန်လှုပ်သွားကာ ပြောလိုက်သည်

“ မောင်လေး အခုပဲ သွားရအောင်”

ကောင်းကင်ဝါးမျိုသားရဲက အနားသို့ ရောက်လာပြီဖြစ်သည်။

ထိုအရာက အလင်း၏ အမြန်နှုန်းအတိုင်း ရွေ့လျားသွားကာ ယခု ရှန်ထျန်း၏ ရှေ့သို့ ရောက်ရှိသွားပြီဖြစ်သည်။

ကောင်းကင်ဝါးမျိုသားရဲ၏ ဘေးပတ်လည်ရှိ အာကာပြင်များက လွှမ်းမိုးခံလိုက်ရပြီး ဗလာနတ္ထိဖြစ်နေသည့် လေဟာနယ်သာလျှင် ကျန်ရှိခဲ့တော့သည်။

သူက ရှန်ထျန်းကို တစ်ချက်တည်း ဝါးမျိုချင်သကဲ့သို့ ပြိုင်ဘက်ကင်း ဝါးမျိုစွမ်းအားကို ပိုင်ဆိုင်ထားသည့် ဧရာမပါးစပ်ကြီးကို ဖွင့်ဟလိုက်သည်။

ရှန်ထျန်းက တည်ငြိမ်နေပြီး အနီရင့်ရောင် မီးတောက်များက သူ့ခန္ဓာကိုယ်ကို ရစ်ပတ်နေသည်။ သူ ကောင်းကင်ဝါးမျိုသားရဲဆီသို့ ဦးတည်သွားလိုက်သည့်အခါ သူ၏ တိုက်ခိုက်လိုစိတ်က ပိုမိုပြင်းထန်လာသည်။

လက်သီးချက် တစ်ချက်ဖြင့် အာကာပြင် အစိတ်အပိုင်းများ ကြေမွသွားသည်။

ရှန်ထျန်း၏ လက်သီးအလင်းတန်းက ပြိုင်ဘက်ကင်းလှပြီး အနီရင့်ရောင် အံ့ဖွယ်မီးတောက်ကိုပါ သယ်ဆောင်လာသည်။ အံ့ဖွယ်မျောက်ဝံက တိုက်ပွဲအငွေ့အသက်ကို ထုတ်လွှတ်သည်နှင့် တူနေသည်။

အနီရင့်ရောင် မီးတောက်လက်သီးက ကောင်းကင်ဝါးမျိုသားရဲ၏ ခေါင်းပေါ်သို့ ထိုးနှက်လိုက်သည်။

ဝုန်း…

ကြောက်လန့်စရာကောင်းသော စွမ်းအင်က ဧရာမလှိုင်းလုံးကြီးများကဲ့သို့ အလင်းပြန်ကာ ကောင်းကင်ဝါးမျိုသားရဲကို အစိတ်စိတ်အမြွာမြွာဖြစ်အောင် လုပ်ပေးလိုက်သည်။

ကောင်းကင်ဝါးမျိုသားရဲအနေဖြင့် တစ်ခါလောက် အော်ဟစ်ဖို့ပင် အချိန်မရလိုက်ပဲ ချက်ချင်း နှစ်ပိုင်း ပိုင်းသွားသည်။

ထိုမြင်ကွင်းကြောင့် မိန်းကလေးချင်းယွဲ့ လုံးဝ ကြောင်အသွားသည်။

ဒါက ဂျူနီယာမောင်လေး ရှန်ထျန်းရဲ့ စစ်မှန်တဲ့ စွမ်းအားတွေလား

ဒါက ၆ ကြိမ်မြောက် အတိဒုက္ခလွန် ဝိဇ္ဇာအစစ်အမှန်ဖြစ်တာတောင် သူက တစ်ချက်ထဲနဲ့ သတ်ပစ်လိုက်တယ်

ကျစ်…

ဒါက တကယ်ကို အံ့ဩဖို့ကောင်းတာပဲ

အရင်တုန်းကလည်း မဟာဝိဇ္ဇာကို သတ်ခဲ့တာတော့ မဟုတ်လောက်ပါဘူးနော်