ထိတ်လန့်စရာကောင်းတဲ့ သတ်ဖြတ်ခြင်း အစီအရင်လား… လက်ချောင်းဖြင့် ချိုးဖျက်ခြင်း

အခန်း (၄၈၆) : ထိတ်လန့်စရာကောင်းတဲ့ သတ်ဖြတ်ခြင်း အစီအရင်လား… လက်ချောင်းဖြင့် ချိုးဖျက်ခြင်း

ကျူးကောယွမ်နှင့် စစ်မာချန်တို့က ရှေ့သို့ ကြောင်အစွာဖြင့် စိုက်ကြည့်နေကြသည်။

ထိုကျွန်းက အရမ်း ခမ်းနားကြီးကျယ်လှသည်။ ထာဝရနန်းတော်ကဲ့သို့ ကောင်းကင်အမြင့်တွင် တည်ရှိနေပြီး ခမ်းနားလှသည်။

ပတ်ဝန်းကျင်တစ်ခုလုံးတွင် အံ့ဖွယ်အလင်းဖြင့် ပြည့်နှက်နေကာ ဆန်းကြယ်သော မြင်ကွင်းတစ်ခုကို ဖန်တီးပေးနေသည်။

အဆုံးမဲ့ အံ့ဖွယ်အလင်းတန်းက ကောင်းကင်နှင့် ကမ္ဘာမြေကြီးကြားတွင် ပြန့်ကျဲသွားကာ တံလျှပ်များ တစ်ခုပြီးတစ်ခု ထွက်ပေါ်လာသည်။ ကျက်သရေရှိသော အလင်းများ ထွက်ပေါ်လာပြီး ကြီးမားသော စွမ်းအားကို ထုတ်လွှတ်နေသည်။

သို့သော် ဤကျွန်းက အရမ်းထူးဆန်းသည်။ ထိုကျွန်းက သူတို့ရှေ့မှာ မြင်နေရသော်လည်း နီးသော်လည်း ဝေးနေသည့် ခံစားချက်ကို ပေးစွမ်းသည်။

ကျွန်းဆီ ရောက်ဖို့အတွက် မလွယ်ကူလှပေ။

ကျူးကောယွမ်နှင့် စစ်မာချန်တို့၏ ခန္ဓာကိုယ်က အနည်းငယ် တုန်ရီနေရင်း ပြောလိုက်သည်

“ ဒီနေရာက သေချာပေါက် ဆန်းကြယ်အံ့ဖွယ်ကျွန်းပဲ”

ဤနေရာက ပိုင်နက်အစီအရင်များဖြင့် ပြည့်နှက်နေသည်ကို ခံစားကြည့်လို့ရပြီး တာအိုအက္ခရာများ၏ စွမ်းအားကလည်း အရမ်းပြင်းထန်နေသည်။

တစ်စုံတစ်ယောက်သာ အစီအရင်ပညာရပ်မှာ သင့်တော်သော အဆင့်တစ်ခုသို့ ရောက်ရှိမနေပါက ထိုနေရာသို့ လုံးဝချဉ်းကပ်သွားနိုင်ခြင်း ရှိမည်မဟုတ်ပေ။

ထိုအရာက အစီအရင်အကြောင်းကို နားမလည်သောသူများ မတော်တဆ ဝင်ရောက်လာခြင်း မရှိအောင် ဆန်းကြယ်အံ့ဖွယ်ကျွန်းသခင်မှ ချန်ထားခဲ့သော စစ်ဆေးမှုတစ်ခု ဖြစ်သည်။

သို့သော် အစီအရင်မျိုးနွယ်နှစ်ခုအတွက် ဤအစီအရင်များကို ချိုးဖျက်ဖို့အတွက် ခက်ခဲခြင်း မရှိပေ။ သူတို့ အချိန်အနည်းငယ်ပေးဖို့သာ လိုအပ်သည်။

“ နောက်ဆုံးတော့ ပန်းတိုင်ကို ရှာတွေ့ခဲ့ပြီ”

ကျူးကောယွမ်နှင့် စစ်မာချန်တို့က ဝမ်းသာသွားကာ ရှန်ထျန်းကို ထိတ်လန့်စွာဖြင့် စိုက်ကြည့်လိုက်သည်။

သူတို့က အချင်းချင်းစိုက်ကြည့်လိုက်သည့်အခါ အချင်းချင်း၏ အတွေးများကို မြင်နေသလို ခံစားလိုက်ရသည်။

တစ်စုံတစ်ယောက်၏ ပေါင်ကို ဖက်ရခြင်းက အရမ်းသက်တောင့်သက်သာရှိလှသည်။

ထိုအချိန်တွင် အားလုံးက ဤငြိမ်ချမ်းသော နယ်မြေသို့ အောင်မြင်စွာ ဝင်ရောက်နိုင်သွားသည်။

ဤနေရာတွင်ရှိနေသော ပင်လယ်က ကျယ်ပြန့်ပြီး ငြိမ်သက်သည်။

ကမ္ဘာလောကက မှုန်ဝါးသော အလင်းအလွှာဖြင့် လွှမ်းခြုံထားကာ ရှုပ်ထွေးပွေလီ အငွေ့အသက်များ ဝင်ရောက်ခြင်းမှ လုံးဝ ကာကွယ်ထားသည်။

သူတို့ ထိုနေရာသို့ ဝင်ရောက်လိုက်သည်နှင့်တစ်ပြိုင်နက် အားလုံး ချက်ချင်း လန်းဆန်းသွားကြသည်။ သူတို့က ရှုပ်ထွေးပွေလီ ကြယ်တာရာကျွန်း ပိုင်နက်ထဲတွင် တစ်လကြာ ခရီးနှင်ခဲ့ပြီး ရှုပ်ထွေးပွေလီ စွမ်းအင်၏ တိုက်ခိုက်မှုကို ခံခဲ့ရသည့်အတွက် အင်မတန် ပင်ပန်းနွမ်းနယ်နေကြသည်။

ယခုမှ သူတို့ အနားယူနိုင်ပြီဖြစ်သည်။

မမျှော်လင့်ထားစွာဖြင့် ကောင်းကင်က ရုတ်တရက် ပြောင်းလဲသွားသည်။

တောက်ပသော ကြယ်တာရာ မြစ်တစ်စင်း စီးဆင်းလာသကဲ့သို့ အဆုံးမဲ့ အံ့ဖွယ်အလင်းတန်းက ရစ်ပတ်နေသည်။

ထိုးဖောက်မြင်နိုင်သော ပိုင်နက်အလင်းတန်းက ရုတ်တရက် မြင့်တက်လာကာ ကောင်းကင်ကို ကာထားပြီး အားလုံး၏ တိုးတက်မှုကို ပိတ်ဆို့ထားလိုက်သည်။

အားလုံး၏ မျက်နှာထားက လေးနက်လာသည်။

ဤနေရာက ဆန်းကြယ်သည့်အတွက် နေရာတိုင်းတွင် ကောင်းမွန်သော အစီအရင်များစွာ ရှိနေသည်။

ထိုအစီအရင်များအတွက် လိုအပ်သောပစ္စည်းများက စိတ်ကူးမယဉ်နိုင်လောက်အောင်အထိ အကုန်အကျများသည်။

ဆန်းကြယ်အံ့ဖွယ်ကျွန်းသခင်က အရမ်းထူးခြားတဲ့သူဖြစ်ရမယ်

“ အားလုံးပဲ စိတ်မပူပါနဲ့။ ငါ ဒီမှာရှိနေတဲ့ အစီအရင်ကို ချိုးဖျက်လိုက်မယ်”

ထို့နောက် ကျူးကောယွမ်နှင့် စစ်မာချန်တို့ ထွက်လာသည်။

သူတို့၏ မျိုးနွယ်စုဝင်များရှေ့တွင် မျက်နှာပျက်သွားသည့်အတွက် သိက္ခာပြန်လည်အဖတ်ဆယ်ဖို့အတွက် အခွင့်အရေး ရှာဖို့ လိုအပ်သည်။

ကျူးကောစစ်မာက ထိုစကားကို ကြားသည့်အခါ နောက်ကွယ်ရှိ အကြောင်းအရင်းကိုလည်း နားလည်သည့်အတွက် ပြောလိုက်သည်

“ ဒါဆိုရင်တော့ ဘိုးဘေးနှစ်ယောက်ကို ဒုက္ခပေးရပါဦးမယ်”

ကျူးကောယွမ်နှင့် စစ်မာချန်တို့က ခေါင်းအသာညိတ်လိုက်သည်။ ထို့နောက် သူတို့ ရှေ့တိုးသွားကာ အစီအရင်ကို စတင်ချိုးဖျက်တော့သည်။

မကြာခင်မှာပင် သူတို့၏ ခန္ဓာကိုယ်မှ အံ့ဖွယ်အလင်းတန်း ထွက်လာကာ ပိုင်နက်စွမ်းအားကို ထုတ်လွှတ်လိုက်သည်။

ထူးဆန်းသော သဘာဝဖြစ်စဉ်များ ကောင်းကင်တွင် ထွက်ပေါ်လာကာ အံ့ဖွယ်အကွက်များကလည်း လေထဲတွင် ကခုန်နေသည်။

ကျူးကောယွမ်နှင့် စစ်မာချန်တို့က ရှေးဟောင်း သံလိုက်အိမ်မြှောင်များကို ကိုင်ဆောင်ထားကာ တာအိုအက္ခရာစာများ ထွက်ပေါ်လာစေပြီး ကောင်းကင်နှင့် ကမ္ဘာမြေကြီးကို အံ့ဖွယ်အလင်းတန်းဖြင့် လင်းလက်သွားစေသည်။

ဘိုးဘေးနှစ်ယောက်၏ ပူးပေါင်းအားစိုက်ထုတ်မှုကြောင့် ထိုထူးခြားသော အစီအရင်များကို ဖယ်ရှားလိုက်နိုင်သည်။

ထိုအရာကို ရှန်ထျန်းမြင်သည့်အခါ အရေးတယူမလုပ်နေပေ။

ဆန်းကြယ်အံ့ဖွယ်ကျွန်းကို ရှာတွေ့နေပြီဖြစ်သည့်အတွက် သူ့အတွက် အချိန်ထပ်ပြီး အကုန်ခံစရာမလိုတော့ပေ။

ထို့အပြင် ငယ်ရွယ်သော တပည့်အုပ်စုကြီးက သူ့ကို ဝန်းရံထားပြီး သူတို့၏ မျက်နှာများတွင် လေးစားမှု၊ သိလိုစိတ်များဖြင့် ပြည့်နှက်နေသည်

“ ညီအစ်ကိုရှန်က ဘယ်လိုလုပ်ပြီးတော့ လမ်းကြောင်းအမှန်ကို ရှာတွေ့သွားတာလဲဟင်”

“ ဒီမှာ လေးနက်တဲ့ အစီအရင်တချို့ ရှိနေတာလား”

ရှန်ထျန်းက ဖော်ရွေပြီး ချဉ်းကပ်ရလွယ်ကူသည်။

ထို့အပြင် သူတို့က နှစ်တစ်ရာသာ ကွာခြားချက်ရှိသည့်အတွက် ကျင့်ကြံရေးလောကတွင် ဘာမှအရေးမပါပေ။

အချိန်ခဏတာ အတူတူကုန်ဆုံးပြီးနောက် ရှန်ထျန်းက သူတို့အတွက် အိမ်နီးချင်းအစ်ကိုကြီး တစ်ယောက်ကဲ့သို့ ဖြစ်လာသည်။ ထို့ကြောင့် သူတို့က အဖွဲ့အမြန်ဖွဲ့က ရှန်ထျန်းကို “အစ်ကိုကြီး”ဟု ခေါ်နေကြသည်။

ထိုအသံများကို ကြားသည့်အခါ ဘိုးဘေးနှစ်ယောက်၏ နှုတ်ခမ်းများ တွန့်ချိုးသွားကြသည်။

သူတို့က ရှန်ထျန်းနှင့် တာအိုကျင့်ကြံသူရောင်းရင်းများဟု သတ်မှတ်ထားပြီး တူညီသည်ဟု သတ်မှတ်ထားသည်။

အဲဒါကို အဲဒီကောင်စုတ်လေးတွေက ရှန်ထျန်းကို “အစ်ကိုကြီး” လို့ခေါ်နေတယ်ပေါ့လေ

ရာထူးတွေ ရှုပ်သွားပြီ မဟုတ်လား

ဘယ်လောက်တောင် ရိုင်းလိုက်သလဲ

ကျူးကောယွမ်နှင့် စစ်မာချန်က မကျေနပ်သော်လည်း ရှန်ထျန်း ဘာမှမဖြစ်တာကို ကြည့်ပြီး ထုတ်ပြောဖို့အတွက် ရှက်နေမိသည်။

ကျူးကောစစ်မာက လေးစားစွာဖြင့် ပြောလိုက်သည်

“ အစ်ကိုကြီးရှန်ရဲ့ တာအိုအစီအရင်အပေါ်မှာ နားလည်မှုက ဒီလောက်ထိ လေးနက်နေမယ်လို့ ထင်မထားဘူး”

ထိုအချိန်အတွင်း သူတို့က နေရာတိုင်းတွင် အတားအဆီး၊ အခက်အခဲများနှင့် ကြုံတွေ့ခဲ့ရသည်။

အဆုံးသတ်တွင် ရှန်ထျန်းက အလွယ်တကူဖြင့် သူတို့ကို ဆန်းကြယ်အံ့ဖွယ်ကျွန်းဆီသို့ ဦးဆောင်သွားခဲ့သည်။

ထို့ကြောင့် ကျူးကောစစ်မာ၏ ရှန်ထျန်းအပေါ် လေးစားမှုက ပိုမိုပြင်းထန်လာသည်။

ရှန်ထျန်းက ခေါင်းယမ်းပြကာ ပြောလိုက်သည်

“ ငါက အစီအရင်တွေနဲ့ ပတ်သက်ပြီးတော့ ဘာမှ သိပ်မသိပါဘူး”

ကောင်းကင်စက်ဝန်း ကြယ်တာရာ အစီအရင်မှလွဲ၍ ရှန်ထျန်းက တခြား ထူးခြားသည့်အစီအရင်များကို လက်တွေ့ သင်ယူခဲ့ရခြင်းမျိုး မရှိပေ။

သူက ကျူးကောစစ်မာ၏ ရောင်ဝါစက်ဝန်းထဲမှ မြင်ကွင်းကြောင့် ဆန်းကြယ်အံ့ဖွယ်ကျွန်း၏ တည်နေရာကို ရှာတွေ့ခဲ့ခြင်းဖြစ်သည်။

ထိုအကြောင်းကို‌တော့ ရှန်ထျန်း ထုတ်ပြောခဲ့ခြင်းမျိုး မရှိပေ။

သို့သော် ကျူးကောစစ်မာက ထိုကဲ့သို့ မတွေးဘဲ လေးစားစွာဖြင့် ပြောလိုက်သည်

“ အစ်ကိုကြီးရှန်က အရမ်းနှိမ့်ချတာပဲ။ အစီအရင်ကို ဖြတ်သန်းပြီး မြင်နိုင်တယ်ဆိုရင် အစ်ကိုကြီးက သေချာပေါက် စွမ်းအားကြီးတဲ့ အစီအရင် ကျွမ်းကျင်သူတစ်ယောက်ပဲ ဖြစ်လိမ့်မယ်။

အစ်ကိုကြီး ရှန်ထျန်းအနေနဲ့ အစီအရင်ရဲ့ လေးနက်ခြင်းတချို့ကို ကျွန်တော်တို့ကို ရှင်းပြနိုင်မလားဆိုတာ သိချင်မိပါတယ်”

သူတို့၏ ဘိုးဘေးများပင် အစီအရင်ကို ထိုးဖောက်ကာ မမြင်နိုင်ခဲ့သော်လည်း ရှန်ထျန်းက အကြည့်တစ်ချက်ဖြင့် ထိုးထွင်းမြင်နိုင်ခဲ့သည်။

ထို့ကြောင့် ရှန်ထျန်းက သူတို့၏ ဘိုးဘေးများထက် သန်မာသည်ဟု ဆိုနိုင်သည်။

သူသာ ရှန်ထျန်း၏ လမ်းပြမှုကို ရရှိနိုင်ပါက သူ၏ အစီအရင်ပညာရပ်ကလည်း သေချာပေါက် တိုးတက်လာမည်ဖြစ်သည်။

ရှန်ထျန်း ရယ်ရမလား ငိုရမလားပင် မသိတော့ပေ။

“ ငါက ကောင်းကင်စက်ဝန်း ကြယ်တာရာ အစီအရင်နဲ့ ပတ်သက်ပြီးတော့ပဲ နည်းနည်းလေး နားလည်ပါတယ်”

“ ကောင်းကင်စက်ဝန်း ကြယ်တာရာ အစီအရင်လား”

အားလုံးက သိချင်စိတ် ပြင်းပြသွားကြသည်။

ထိုအထွတ်အထိပ် အစီအရင်က အဆုံးမဲ့စွမ်းအားကို ပိုင်ဆိုင်သည်ဟု သူတို့ ကြားဖူးထားသည်။

နှစ်ပေါင်းတစ်ရာတုန်းက ရှီထျန်းကျီသည် မိစ္ဆာဝိညာဉ်မျိုးနွယ်နှင့် တိုက်ခိုက်ဖို့အတွက် ကောင်းကင်စက်ဝန်း ကြယ်တာရာ အစီအရင်ကို အသုံးပြုခဲ့ဖူးသည်။

ထိုအရာက စွမ်းအားကြီးသော အထွတ်အထိပ် အစီအရင်ဖြစ်ပြီး တစ်စုံတစ်ယောက်၏ တိုက်ခိုက်ခွန်အားကို အဆပေါင်းများစွာ မြှင့်တင်ပေးနိုင်သည်။

အံ့ဖွယ်မိုးကောင်းကင် ဂိုဏ်းချုပ်က ဤအစီအရင်တစ်ခုတွင် အထူးပြုယူထားလိမ့်မည်ဟု ထင်မထားခဲ့ကြပေ။

ထိုအချိန်တွင် အားလုံးက စိတ်အားထက်သန်စွာဖြင့် မေးလိုက်ကြသည်

“ အစ်ကိုကြီးရှန် ဒီအစီအရင်ရဲ့ လေးနက်မှုကို ရှင်းပြပေးလို့ ရနိုင်မလားဟင်”

ရှန်ထျန်းက ပြုံးကာ လုံးဝ ငြင်းဆိုခြင်းမရှိဘဲ ပြောလိုက်သည်

“ ကောင်းပြီလေ ရှင်းပြပေးမယ်”

ထိုလူများက ထူးခြားသော ကံကြမ္မာ ရှိသည့်သူများ ဖြစ်သည့်အတွက် သူတို့ကို ကောင်းကောင်း ဂရုစိုက်ဖို့ လိုအပ်သည်။ ထို့ကြောင့် သူက ကောင်းကင်စက်ဝန်း ကြယ်တာရာ အစီအရင်၏ ယေဘုယျသဘောကို ရှင်းပြလိုက်သည်။

ရှန်ထျန်း၏ မျက်နှာထားက တည်ငြိမ်နေသည်။ သူ့အသံက ကောင်းကင်တာအိုကဲ့သို့ လေးနက်နေပြီး တစ်စုံတစ်ယောက် အသိဉာဏ်ကို ပွင့်သွားစေသည်။

ထိုအချိန်တွင် အားလုံးက ကိုယ်ပိုင်အတွေးကမ္ဘာထဲမှာ နစ်မြုပ်နေသကဲ့သို့ သူတို့၏ မျက်နှာများက မိန်းမောနေပုံပေါ်သည်။

သူတို့က ကျယ်ပြန့်သော ကြယ်တာရာ မြစ်ထဲတွင် မြောနေသကဲ့သို့ ကြယ်တာရာများ၏ ဦးတည်ရာ ပြောင်းလဲမှုကို လေ့လာနေကြသည်။

စည်းမျဉ်းများက ကြယ်တာရာများကို ရစ်ပတ်နေချိန် တာအိုမြင်ကွင်းက သူတို့အပေါ် ကျရောက်လာပြီး မြင်ကွင်းကို လေးနက်စေသည်။

မကြာခင်မှာပင် အကန့်အသတ်မဲ့ စွမ်းအားက လူတစ်ယောက်၏ ခန္ဓာကိုယ်မှ ပေါက်ကွဲထွက်သွားကာ သူ့ကို ပိုပြီးတော့ စွမ်းအားကြီးအောင် လုပ်ဆောင်ပေးနေသည်။

ကျူးကောစစ်မာက ပထမဆုံးနိုးထလာပြီး စိတ်ခံစားလွယ်သော မျက်နှာထားဖြင့် ပြောလိုက်သည်

“ အစ်ကိုရှန်က ဘာလို့ တာအိုအစီအရင်တွေကို နားမလည်ဘူးလို့ ပြောရတာလဲ။ အစ်ကိုရှန်ရဲ့ အစီအရင်တွေအပေါ် နားလည်မှုက နယ်မြေငါးခုရဲ့ ထိပ်သီးအဆင့်ကို ရောက်နေပြီလေ”

ရှန်ထျန်း၏ သင်ကြားပြသမှုကို နားထောင်ပြီးနောက် ကျူးကောစစ်မာ၏ အစီအရင်ပေါ်နားလည်မှုက များစွာ တိုးတက်သွားသည်။ သူ ကျင့်ကြံဆင့်ပင် တက်သွားကာ အလယ်အလတ်အဆင့် ကောင်းကင်အသျှင်ပင် ဖြစ်သွားသည်။

ယခုလက်ရှိ ကျူးကောစစ်မာ၏ စွမ်းရည်အရ ပိုင်နက်အစီအရင်ကို အသက်သွင်းဖို့အတွက် သင့်တော်သော မြေအနေအထားရှိပါက သာမန်ဝိဇ္ဇာများကို ရင်ဆိုင်ဖို့ ယုံကြည်မှုရှိသည်။

အချိန်ခဏအတွင်းမှာပင် ကျူးကောစစ်မာ၏ တိုက်ခိုက်စွမ်းအား အဆမတန် တိုးတက်သွားသည်။

ရှန်ထျန်းက ဖျော့တော့စွာသာ ပြုံးလိုက်ပြီး ဘာမှ ထပ်မပြောပေ။

ကောင်းကင်စက်ဝန်း ကြယ်တာရာ အစီအရင်က ထာဝရဘုရင်၏ အမွေအနှစ်ဖြစ်သည့်အတွက် လေးနက်ပြီး ပြိုင်ဘက်ကင်းလှသည်။

ရှန်ထျန်း၏ ရှင်းပြချက်များက အပေါ်ယံသာ ဖြစ်သော်လည်း တပည့်များကို ကြီးမားသော အကျိုးအမြတ်များစွာ ရသွားစေသည်။

ထိုအချိန်တွင် ယာဉ်ပျံလည်း ရပ်တန့်သွားသည်။

ထိုအချိန်အတွင်းတွင် ကျူးကောယွမ်နှင့် စစ်မာချန်တို့က အစီအရင်များစွာကို အောင်မြင်စွာ ချိုးဖျက်နိုင်ခဲ့သည်။

သူတို့က ဆန်းကြယ်အံ့ဖွယ်ကျွန်းအနားသို့ ချဉ်းကပ်လာပြီး နောက်ဆုံးအစီအရင်တစ်ခုသာ ခြားနေတော့သည်။

တာအိုအက္ခရာစာများက အစီအရင်ပေါ်တွင် ထွက်ပေါ်လာကာ အစီအရင်၏ အလင်းအလွှာက ကမ္ဘာလောကကို လွှမ်းခြုံထားသည်။

ဤအစီအရင်က အလွှာကြီးတစ်ခုကဲ့သို့ ဖြစ်နေကာ ဆန်းကြယ်အံ့ဖွယ်ကျွန်းကို ပြင်ပလောကနှင့် အဆက်အသွယ်ဖြတ်ထားသည်။

ကျူးကောယွမ်က ပြောလိုက်သည်

“ ဒီအစီအရင်က ဆန်းကြယ်အံ့ဖွယ်ကျွန်းပေါ်မှာရှိတဲ့ အသန်မာဆုံး အစီအရင်ပဲ။ လူသားတစ်ယောက် ချိုးဖျက်နိုင်သောအရာ မဟုတ်ဘူး။

ကံကောင်းစွာနဲ့ ဘိုးဘေးတွေက ညွှန်ကြားချက်တွေ ချန်ထားခဲ့တယ်။ ဒီအစီအရင်ကို ဖွင့်ဖို့အတွက် ကမ္ဘာမြေကြီးရဲ့ သော့ချက်ပဲလိုတယ်”

ထို့နောက် ကျူးကောယွမ်က လေသင်္ဘောပေါ်မှ ရှေးဟောင်းသော့ကို ယူလိုက်သည်။

ထိုအချိန်တွင် အံ့ဖွယ်အလင်းတန်း ထွက်လာကာ ရှေးဟောင်း အသုံးအဆောင်ပစ္စည်းက ကျောက်စိမ်းဆွဲပြား အရွယ်အစားဖြစ်သွားကာ အစီအရင်ထဲသို့ နစ်မြုပ်သွားသည်။

စစ်မာချန်ကလည်း ကောင်းကင်သော့ချက်ကိုလည်း ထုတ်ယူလိုက်သည်။

သော့နှစ်ခု ပေါင်းစပ်သွားကာ ကောင်းကင်နှင့် ကမ္ဘာမြေကြီးတို့၏ သော့ဖြစ်သွားသည်။

အဆုံးမဲ့ အံ့ဖွယ်အလင်းတန်းက အံ့ဖွယ်မိုးကဲ့သို့ ရွာကျလာကာ အရာအားလုံးကို ဖုံးလွှမ်းသွားသည်။

ပြင်းထန်သော ဖိအားထုတ်လွှတ်နေသော အစီအရင်က ရုတ်တရက် ပွင့်ထွက်သွားကာ ကျွန်းဆီသို့ လမ်းပြနေသည့် တံခါးအလင်းပေါက် ထွက်ပေါ်လာသည်။

သူတို့ အထွတ်အထိပ် အမွေအနှစ်များ ရှာဖို့အတွက် ဆန်းကြယ်အံ့ဖွယ်ကျွန်းထဲသို့ ဝင်နိုင်တော့မည် ဖြစ်သည့်အတွက် အားလုံးက စိတ်လှုပ်ရှားနေကြသည်။

“ ငါတို့အထဲ ဝင်သွားရအောင်”

ကျူးကောယွမ်နှင့် စစ်မာချန်တို့က မျှော်လင့်ချက် အပြည့်ဖြင့် ရှေ့မှ သွားကြသည်။

တခြားသူများကလည်း သူတို့နောက်မှ လိုက်သွားကာ ဆန်းကြယ်အံ့ဖွယ်ကျွန်းထဲသို့ ဝင်သွားသည်။

ထိုနေရာသို့ ဝင်ရောက်ပြီးနောက် အားလုံးလန်းဆန်းသွားသလို ခံစားရသည်။

ပတ်ဝန်းကျင်တွင် ငှက်သံများ၊ ပန်းရနံ့များဖြင့် ပြည့်နှက်နေသည်။ မြင့်မားသော ကျောက်တောင်များက ငြိမ်သက်အေးချမ်းမှုကို ဖန်တီးပေးထားသည်။

သစ်ပင်များကလည်း တိမ်တိုက်များထဲထိ ထိုးထွက်ကာ ကြီးထွားနေသည်။

မြင့်မားသော တောင်တန်းများက ကျွန်းတစ်ခုလုံးကို ပတ်လည်ဝန်းရံထားပြီး ခမ်းနားလှသည်။

ရှုပ်ထွေးပွေလီ ကြယ်တာရာ ပင်လယ်ရဲ့ အတွင်းပိုင်းမှာ ဒီလိုနေရာမျိုးရှိနေမယ်လို့ ဘယ်သူက ထင်ထားမှာလဲ

ဤနေရာက ဝိညာဉ်ချီများဖြင့် ပြည့်နှက်နေပြီး သိပ်သည်းလှသည့်အတွက် မြူခိုးများအဖြစ် သိပ်သည်းသွားသည်။ ပန်းပင်များ၊ အပင်ငယ်များ၊ သစ်ပင်ကြီးများတို့က တောက်ပနေကာ ဖျော့တော့သော မွှေးရနံ့ကို ထုတ်လွှတ်လိုက်သည်။ သူတို့မြင်နိုင်သမျှ တဆုံးကြည့်လိုက်လျှင် ရှားပါးသော ဆေးပင်များ ရှိနေသည်။

ထိုမြင်ကွင်းကြောင့် အားလုံးက စတင်ချီးကျူးလာကြသည်။

“ ဒီနေရာမှာ ဝိညာဉ်ချီတွေ ဒီလောက်ထိ များနေမယ်လို့ မထင်ခဲ့ဘူး”

“ ဝိညာဉ်ဆေးပင်တွေကလည်း နေရာအနှံ့မှာရှိနေတယ်။ ဒါ အရမ်းများလွန်းတာ မဟုတ်ဘူးလား”

ထိုအရာများက လမ်းဘေးတွင် ပေါက်ရောက်နေသော ပေါင်းပင်နှင့် ပန်းရိုင်းများ ဖြစ်သည်။

သို့သော် သိပ်သည်းသော ဝိညာဉ်ချီ၏ ပျိုးထောင်မှုကြောင့် ဝိညာဉ်ဆေးပင်အဆင့်သို့ ရောက်ရှိသွားသည်။

ထို့ကြောင့် ဤနေရာက ထူးခြားသည်ဟု ဆိုနိုင်သည်။

တစ်ဖက်တွင် လမ်းဘေးရှိ ဝိညာဉ်ဆေးပင်များ၏ အမြင့်ဆုံးအဆင့်က အဆင့်မြင့်အဆင့်သာ ဖြစ်သည့်အတွက် ရှန်ထျန်း အရမ်းတည်ငြိမ်နေသည်။

ရှန်ထျန်းက အထွတ်အမြတ်တိုက်ပွဲ နတ်ဧကရာဇ်၏ ဂူဗိမာန်မှ ဝိညာဉ်ဆေးပင် အများကြီး ရရှိထားခဲ့သေးသည်။

သူ၏ ခန်းမင်လက်စွပ်ထဲတွင် ဝိညာဉ်ဆေးပင်များစွာ တောင်လိုပုံနေသည်။

ထိုဝိညာဉ်ဆေးပင်များက ရှန်ထျန်း၏ စိတ်ဝင်စားမှုကို မရရှိနိုင်ပေ။

သို့သော် ရှန်ထျန်း ဂရုမစိုက်လျှင်ပင် မျိုးနွယ်နှစ်ခု၏ တပည့်များ ဂရုမစိုက်ဘဲ မနေနိုင်ပေ။

သူတို့က တစ်နှစ်ပတ်လုံး သီးသန့်ကျင့်ကြံနေလေ့ရှိပြီး ပြင်ပလောက၏ ဆန်းကြယ်နယ်ပယ်များသို့ သွားရောက်လည်ပတ်ခဲသည်။ အဆင့်မြင့် ဝိညာဉ်ဆေးပင်များပင် ငယ်ရွယ်သော တပည့်များအတွက် အရမ်းတန်ဖိုးရှိသည်။ ငယ်ရွယ်သော တပည့်များက လမ်းဘေးရှိ ဝိညာဉ်ဆေးပင်များကို ခူးယူဖို့အတွက် လမ်းကြောင်းအသီးသီး ခွဲသွားကြသည်။

ကျူးကောစစ်မာက ဝိညာဉ်ဆေးပင်များကို ခူးယူဖို့အတွက် အလျင်မလိုဘဲ လှည့်ပတ်ကြည့်ရှုနေသည်။ ဤနေရာက ဆန်းကြယ်မှုများဖြင့် ပြည့်နှက်နေသည်ကို တွေ့ရှိသွားသည်။ တောင်ထိပ်တိုင်းက သာမန်ဖြစ်နေပုံပေါ်သော်လည်း တည်ရှိနေသော ပုံစံက ထူးခြားသော အဓိပ္ပာယ်ရှိပုံပေါ်သည်။

ပတ်ဝန်းကျင်ရှိ တောင်တန်းများက ပတ်လည်ဝန်းရံနေပြီး မရေတွက်နိုင်သော အစောင့်များက ဧကရာဇ်ကို ကာကွယ်ထားသည့် ပုံစံမျိုး ဖြစ်နေသည်။

ဤတောင်တန်းများက ကောင်းကင်နှင့် ကမ္ဘာမြေကြီး၏ အဟုန်ကို စုစည်းကာ အထွတ်အထိပ် မဟာပိုင်နက်အစီအရင်ကို တည်ဆောက်ထားသည်။ ထိုအခါမှသာ ဆန်းကြယ်အံ့ဖွယ်ကျွန်းကို လေထဲမှာ မြောနေအောင် လုပ်လို့ရသွားခြင်းဖြစ်သည်။

ကျူးကောစစ်မာက ထိုအကြောင်းကို သတိထားမိသွားသည့်အတွက် မျက်မှောင်ကြုတ်လိုက်မိသည်။

ဤနေရာ ဆန်းကြယ်နယ်မြေနှင့် မတူပဲ ဘုံကျောင်းဆောင်နှင့် ပိုတူသည်။

ထိုကဲ့သို့သော ကြီးမားသည့် ဘုံကျောင်းဆောင်ကို တည်ဆောက်နိုင်ဖို့အတွက် ပိုင်ရှင်က သာမန်လူတော့ မဟုတ်နိုင်ပေ။

ကျူးကောစစ်မာက အကြည့်လွှဲကာ ရှေ့တည့်တည့်သို့ ကြည့်လိုက်သည်။ စစ်မာတပည့်တစ်ယောက်က ဆန်းကြယ်အံ့ဖွယ်ကျွန်းအတွင်းပိုင်းသို့ ဝင်ရောက်သွားသည်ကို မြင်လိုက်ရသည်။

ထိုသူက စစ်မာကန်ပင် ဖြစ်သည်။ သူက ဝိညာဉ်ဆေးပင်များရှာဖွေ စုဆောင်းနေသည်။

သူတို့ရှေ့တွင် တောင်ကြားတစ်ခု ရှိနေသည်။

ဝင်ပေါက်တွင် အနီရောင် အသီးများသီးနေသည့် ရှေးဟောင်း အပင်ကြီးတစ်ပင်လည်း ရှိနေသည်။

ထိုအသီးများ၏ မွှေးရနံ့က လေနှင့်အတူ ပါလာသည်။

ထိုမြင်ကွင်းကြောင့် စစ်မာကန်က ပျော်ရွှင်စွာဖြင့် ပြောလိုက်သည်

“ ဒါက ဝိဇ္ဇာဆေးပင်ဖြစ်တဲ့ မီးဓာတ်သစ်သီးပဲ”

သူတို့လိုမျိုး ကနဦးဝိညာဉ်နှင့် ကောင်းကင်အသျှင် ကျင့်ကြံသူများအတွက် ဝိဇ္ဇာဆေးပင်များက အဖိုးမဖြတ်နိုင်ပေ။

စစ်မာကန်က စိတ်လှုပ်ရှားမှုကို မထိန်းချုပ်နိုင်တော့ဘဲ ဝိဇ္ဇာဆေးပင်များကို ခူးဖို့ ရှေ့တိုးသွားသည်။

ဖျော့တော့သော အလင်းတန်းက တောင်ကြားရှေ့တွင် လင်းလက်သွားကာ လှိုင်းများ ဖြစ်တည်လာသည်။

ကျူးကောစစ်မာ၏ မျက်နှာထားက အနည်းငယ် ပြောင်းလဲသွားကာ အော်လိုက်သည်

“ စစ်မာကန် ဂရုစိုက်နော်”

သို့သော် စစ်မာကန်က ရှေ့တိုးမလို့ လုပ်နေစဉ် နွယ်ပင်က အနောက်ဖက်မှ နွယ်ပင်တစ်ပင် ထွက်ပေါ်လာကာ စစ်မာကန်ကို ရစ်ပတ်ထားပြီး အနောက်ဖက်သို့ ပြန်ဆွဲလိုက်သည်။

“ အား…အဲဒါက ငါ့ရဲ့ ဝိဇ္ဇာဆေးပင်လေ”

တစ်စုံတစ်ယောက်က သူ၏ ဝိဇ္ဇာဆေးပင်ကို ခိုးယူသွားတော့မည်ဟု ထင်သည့်အတွက် စစ်မာကန်က ချက်ချင်း အော်လိုက်သည်။

သို့သော် သိပ်မကြာခင်မှာပင် သူ့ကို တိုက်ခိုက်နေသူက ရှန်ထျန်း ဖြစ်နေကြောင်းကို သိလိုက်ရသည်။

“ အစ်ကိုရှန် ကျွန်တော်ကို ဘာလို့ တားတာလဲ”

စစ်မာကျန် နားမလည်နိုင်ဖြစ်သွားသည်။

ရှန်ထျန်းလိုမျိုး ပါရမီရှင်က ဘာလို့ ဝိဇ္ဇာဆေးပင်လေးကို ဂရုစိုက်နေမှာလဲ

ရှန်ထျန်းက ဖျော့တော့စွာ ပြုံးရင်း ပြောလိုက်သည်

“ အဲလောက်လည်း အလျင်စလို မလုပ်ပါနဲ့။ တစ်ခါတစ်လေ မင်း မြင်တာက အမှန် မဖြစ်နိုင်ဘူး”

ထို့နောက် သူက ကျောက်တုံးတစ်တုံးကို ကောက်ကာ တောင်ကြားထဲသို့ ပစ်ထည့်လိုက်သည်။

ဝုန်း…

ထိုအခိုက်အတန့်တွင် စည်းမျဉ်းများ ကမောက်ကမဖြစ်သွားကာ အာကာပြင်လည်း တစ်စစီ ဖြစ်သွားသည်။

ကျောက်တုံးလည်း ဖုန်မှုန့်အဖြစ်သို့ ပြောင်းလဲသွားကာ ပတ်ဝန်းကျင်ရှိ လေဟာနယ်ပင် ဗလာနတ္ထိအဖြစ်သို့ ပြောင်းလဲသွားသည်။

စစ်မာကန် ထိုအရာကို မြင်လိုက်သည့်အခါ တုန်လှုပ်သွားသည်။

ရှန်ထျန်း သူ့ကို တားလိုက်တာ အဆန်းမဟုတ်ပါဘူး။ အဲဒီမှာ ကြောက်ဖို့ကောင်းတဲ့ ထောင်ချောက်ရှိနေတာပဲ

“ ကျွန်တော်ကို ကယ်ပေးတဲ့အတွက် အစ်ကိုရှန်ကို ကျေးဇူးတင်ပါတယ်”

စစ်မာကန်က သူ့ကို အလျင်အမြန် ကျေးဇူးတင်လိုက်သည်။ ရှန်ထျန်းကြောင့်သာ မဟုတ်ပါက ရှေ့အနည်းငယ်တိုးလိုက်လျှင် သေသွားနိုင်သည်။

ကျူးကောစစ်မာက စိုးရိမ်သော  မျက်နှာထားဖြင့် ပြေးလာကာ ပြောလိုက်သည်

“ ဒီနေရာမှာ ပုံရိပ်ယောင်သတ်ဖြတ်ခြင်း အစီအရင် ရှိနေမယ်လို့ ထင်မထားခဲ့ဘူး”

ပုံရိပ်ယောင် သတ်ဖြတ်ခြင်း အစီအရင်က လူများကို ပုံရိပ်ယောင်များ အသုံးပြုကာ ဖြားယောင်းပြီး သတ်ဖြတ်ခြင်း အစီအရင်များထဲသို့ ခေါ်သွင်းခြင်း ဖြစ်သည်။ ပြင်းထန်သော စွမ်းအားလည်း ပါဝင်နေသည်။

အစီအရင်၏ စွမ်းအားကြောင့် ထောင်ချောက်ထဲ ကျရောက်သွားပါက ဝိဇ္ဇာတစ်ပါးပင် မြှုပ်နှံခံရနိုင်သည်။

သို့သော် ကျူးကောစစ်မာက ပိုပြီးတော့ လေးနက်လာသည်။

အစီအရင်မျိုးနွယ်၏ တပည့်တစ်ယောက်အနေဖြင့် ကမ္ဘာလောက၏ ဆန်းကြယ်မှုများနှင့် ပတ်သက်လျှင် စိတ်ဝင်စားမှုတို့ဖြင့် ပြည့်နှက်နေသည်။

ကျူးကောစစ်မာသာ ဤပုံရိပ်ယောင် သတ်ဖြတ်ခြင်း အစီအရင်ကို ဖျက်စီးနိုင်ပါက သူ အစီအရင်အပေါ် နားလည်မှုက ပိုမိုတိုးတက်လာမည်ဖြစ်သည်။

ထိုကဲ့သို့ တွေးတောကာ သူ တွေဝေမှု လုံးဝ မရှိဘဲ ပြောလိုက်သည်

“ ကျွန်တော် ကြိုးစားကြည့်မယ်”

ထို့နောက် သူ တောင်ကြားဆီသို့ ဦးတည်သွားလိုက်သည်။

ကျူးကောစစ်မာက လက်ထဲတွင် ရှစ်မြှောင့်ထောင့် ပါကွား သံလိုက်အိမ်မြှောင်ကို ကိုင်ဆောင်ထားပြီး ကျောပေါ်တွင် ဓာတ်ငါးပါး သံလိုက်အိမ်မြှောင်ကို သယ်ဆောင်ထားသည်။ တောက်ပသော အံ့ဖွယ်အလင်းတန်းက သူ့ ခန္ဓာကိုယ်ဆီမှ ထွက်လာသည်။

ဧရာမ သံလိုက်အိမ်မြှောင်က ကောင်းကင်တစ်ခုလုံးကို ဖုံးအုပ်သွားကာ ကျယ်ပြန့်ပြီး တိုင်းတာမရနိုင်သော စွမ်းအားကို ထုတ်လွှတ်နိုင်သည်။

သူက အစီအရင်တာအို နတ်ဘုရားကဲ့သို့ လက်တစ်ချက် ဝှေ့ယမ်းလိုက်ရုံဖြင့် ပြိုင်ဘက်ကင်း အစီအရင်ကို အသက်သွင်းနိုင်သည်။

အသက်ပြင်းပြင်းရှူလိုက်ရင်း ကျူးကောစစ်မာက တောင်ကြားထဲသို့ ချဉ်းနင်းဝင်ရောက်သွားသည်။

ခဏအတွင်းမှာပင် များပြားသော အံ့ဖွယ်ဂါထာများက ကောင်းကင်သို့ ပျံ့လွင့်သွားသည်။

ကောင်းကင်တာအို အက္ခရာစာများက ချွန်ထက်သော ဓားသွားများအဖြစ်သို့ ပြောင်းလဲကာ ကျူးကောစစ်မာဆီသို့ ဦးတည်လာနေသည်။

ကျူးကောစစ်မာ၏ မျက်နှာထားက မပြောင်းလဲပေ။ သူ့လက်ထဲရှိ သံလိုက်အိမ်မြှောင်က တောက်ပစွာ လင်းလက်နေပြီး ဧရာမ ရှစ်မြှောင့်ထောင့် ပါကွား အံ့ဖွယ်စည်းတံဆိပ်တစ်ခု ထွက်ပေါ်လာသည်။

ရှစ်မြှောင့်ထောင့် ပါကွား အံ့ဖွယ်စည်းတံဆိပ်က ဖျက်စီးစွမ်းအားဖြင့် ရိုက်ခတ်လိုက်သည်။

ဝုန်း…

ကောင်းကင် ပဲ့တင်ထပ်သွားကာ ကောင်းကင်နှင့် ကမ္ဘာမြေကြီးကို တုန်လှုပ်သွားစေသည်။

မရေတွက်နိုင်သော ချွန်ထက်သည့် ဓားသွားများက ရှစ်မြှောင့်ထောင့် ပါကွား အံ့ဖွယ်စည်းတံဆိပ်၏ ရိုက်ခတ်ခြင်းကို ခံလိုက်ရသည်။

မဟာအစီအရင်မျိုးနွယ်နှစ်ခု၏ တပည့်များက အံ့ဩထိတ်လန့်သွားကြသည်။

“ အစ်ကိုကြီးကျူးကောရဲ့ ခွန်အားက ထပ်ပြီးတော့ တိုးတက်သွားပြန်ပြီ”

“ ငါတို့ရဲ့ မျိုးနွယ်ကတော့ ထင်ထားတဲ့အတိုင်းပဲ။ သူက တကယ်ကို စွမ်းအားကြီးတာပဲ”

“ အစ်ကိုကြီးကျူးကောရဲ့ လုပ်ဆောင်နိုင်စွမ်းနဲ့ဆိုရင် အနာဂတ်မှာ ပြိုင်ဘက်ကင်း အစီအရင်ကျွမ်းကျင်သူတစ်ယောက် ဖြစ်လာနိုင်တယ်”

ကျူးကောစစ်မာက မျိုးနွယ်နှစ်ခုလုံး၏ ဂုဏ်ယူစရာ ဖြစ်သည်။ သူ သန်မာလာလေလေ မျိုးနွယ်နှစ်ခု၏ တပည့်များက ပျော်ရွှင်လာလေလေဖြစ်သည်။

ရှန်ထျန်းက အနည်းငယ် အံ့အားသင့်သွားသည်။

ကျူးကောစစ်မာ၏ အရည်အချင်းက ရှီထျန်းကျီထက် အားမနည်းနိုင်ပေ။

ခရမ်းရင့်ရောင် ရောင်ဝါစက်ဝန်းရှိတဲ့ ကံကြမ္မာသားတော်ကတော့ တကယ်ကို ထူးခြားတယ်

သို့သော် ရှန်ထျန်း စိတ်ထဲ မထားပေ။

အားလုံးက သူ၏ သိုးအုပ်ဖြစ်သည့်အတွက် သူတို့ သန်မာလာလေလေ သူ့အတွက် ပိုပြီးတော့ ကောင်းလေလေဖြစ်သည်။

ကျူးကောစစ်မာက သတ်ဖြတ်ခြင်း အစီအရင်ကို တစ်ခါထဲ ဖျက်စီးချင်သကဲ့သို့ ရှေ့ထပ်တိုးသွားသည်။

သို့သော် အစီအရင်၏ အတွင်းပိုင်းတွင် ကြောက်စရာကောင်းသော သတ်ဖြတ်ခြင်း အရှိန်အဝါ ရုတ်တရက် ပေါက်ကွဲသွားသည်။

သတ်ဖြတ်လိုစိတ်က အဆုံးမဲ့ပြီး စွမ်းအားကလည်း ကြောက်ဖို့ကောင်းလှသည်။

ကြက်သွေးရောင် အံ့ဖွယ်အလင်းတန်းက လေဟာနယ်ကို ထိုးဖောက် အဆုံးမဲ့ စည်းမျဉ်းများကို တစ်စစီဖြစ်သွားစေသည်။

ကျုးကောစစ်မာ၏ မျက်နှာထားက အနည်းငယ် ပြောင်းလဲသွားကာ သူ့နောက်က အလင်းတန်းက တောက်ပလာသည်။

ဓာတ်ငါးပါး သံလိုက်အိမ်မြှောင်က အံ့ဖွယ်အလင်းတန်းဖြင့် ပျံ့နှံ့သွားကာ အဆုံးမဲ့ တာအိုဂါထာများက ဧရာမမျောက်ဝံတစ်ကောင်အဖြစ် သိပ်သည်းသွားသည်။

ဧရာမမျောက်ဝံက ကောင်းကင်ကို မော့ကြည့်ကာ အော်ဟစ်ကြွေးကြော်လိုက်ပြီး အဆုံးမဲ့ စွမ်းအားကို ထုတ်လွှတ်နေသည်။

ထိုအရာက ကြက်သွေးရောင် အံ့ဖွယ်အလင်းတန်းကို ခုခံကာ လက်သီးကို ကျစ်ကျစ်ပါအောင် ဆုပ်ကိုင်ရင်း ရှေ့သို့တိုးသွားလိုက်သည်။

လေဟာနယ် တစ်စစီဖြစ်သွားကာ ကောင်းကင်နှင့် ကမ္ဘာမြေကြီးကို တုန်ရီသွားစေသည်။

ဧရာမ လက်သီးကြီးက တောင်တန်းနှင့် မြစ်များကို ဖြိုခွင်းနိုင်သည့် စွမ်းအားဖြင့် ဆင်းသက်လာသည်။

သို့သော် ထိုကြက်သွေးရောင် အံ့ဖွယ်အလင်းတန်းနှင့် ရင်ဆိုင်ရသည့်အခါ အင်အားနည်းသွားပုံပေါ်သည်။

ဝုန်း…

ထိုအချိန်တွင် လက်သီးအလင်းတန်းက တစ်စစီဖြစ်သွားကာ ပျောက်ကွယ်သွားသည်။

ကြက်သီးရောင် အံ့ဖွယ်အလင်းတန်းက လေဟာနယ်ကိုပင် ထိုးဖောက်နိုင်လောက်သည်အထိ စူးရှနေသည်။

ဧရာမမျောက်ဝံကြီးက ခါးမှ ပိုင်းဖြတ်ခံလိုက်ရကာ သွေးများထွက်လာသည်။

ကျူးကောစစ်မာ၏ ခန္ဓာကိုယ်က ပြင်းထန်စွာ တုန်လှုပ်သွားကာ နောက်ဆုတ်သွားသည်။

ကံကောင်းစွာဖြင့် ဧရာမမျောက်ဝံကြီးက တိုက်ခိုက်မှုကို ဟန့်တားပေးလိုက်သည့်အတွက် သူ့ကို ဘေးကင်းစွာဖြင့် နောက်ဆုတ်သွားစေသည်။

ထိုမြင်ကွင်းက အားလုံးကို ထိတ်လန့်သွားစေသည်။

ပုံရိပ်ယောင် သတ်ဖြတ်ခြင်း အစီအရင်က အရမ်းကြောက်ဖို့ကောင်းလို့ ကျူးကောစစ်မာတောင် မချိုးဖျက်နိုင်တာလား

ကျူးကောစစ်မာကလည်း ကြောက်စရာကောင်းသော မျက်နှာထားဖြင့် ပြောလိုက်သည်

“ ဒီနေရာက အရမ်းထူးခြားတော့ အလွယ်တကူ ဝင်လို့မရဘူး”

ပုံရိပ်ယောင် သတ်ဖြတ်ခြင်း အစီအရင်ထဲတွင် ထိတ်လန့်စရာကောင်းသော သတ်ဖြတ်ခြင်းအရှိန်အဝါကို ထုတ်လွှတ်နေသည့် တစ်စုံတစ်ခု ပုန်းကွယ်နေသည်ဟု ခံစားမိသည်။

ရှန်ထျန်းက ပြုံးရင်း ရှင်းပြလိုက်သည်

“ ဒါက ပုံရိပ်ယောင် သတ်ဖြတ်ခြင်း အစီအရင် မဟုတ်ဘူး။ သတ်ဖြတ်ခြင်း အစီအရင်တစ်ခုပဲ”

“ သတ်ဖြတ်ခြင်း အစီအရင်တဲ့လား”

ကျူးကောစစ်မာက စိတ်ရှုပ်ထွေးသွားသည်။

သာမန်သတ်ဖြတ်ခြင်း အစီအရင်က ဘယ်လိုလုပ်ပြီးတော့ ကြောက်စရာကောင်းတဲ့ စွမ်းအားကို ထုတ်လွှတ်နိုင်ရတာလဲ

ရှန်ထျန်းက ဘာမှမပြောဘဲ ရှေ့သို့ ထွက်သွားလိုက်သည်။ သူက လက်ကိုဆန့်ထုတ်ကာ ကျောက်စိမ်းနွယ်ပင်က ချက်ချင်း ထွက်လာသည်။

နွယ်ပင်က ကြည်လင်နေပြီး နဂါးဦးချိုကဲ့သို့ ထူနေသည်။ ခုခံနိုင်စွမ်းကင်းမဲ့သော စွမ်းအားကို သယ်ဆောင်ကာ ကောင်းကင်သို့ ပျံသန်းသွားသည်။

အချိန်ခဏအတွင်းမှာပင် မရေတွက်နိုင်သော အံ့ဖွယ်အလင်းတန်းက ပေါက်ကွဲထွက်သွားသည်။

သတ်ဖြတ်ခြင်း အစီအရင်မှ ကောင်းကင်နှင့် ကမ္ဘာမြေကြီးကို ဖျက်စီးတော့မလိုမျိုး ကြောက်စရာကောင်းသည့် အံ့ဖွယ်အလင်းတန်းကို ထုတ်လွှတ်လိုက်သည်။

သို့သော် ထိုအခိုက်အတန့်တွင် လေဟာနယ် တစ်စစီဖြစ်သွားကာ သိပ်သည်းသော အလင်းပေါက် ထွက်ပေါ်လာသည်။

အံ့ဖွယ်ရစ်ပတ်နွယ်ပင်က ချက်ချင်းနောက်ဆုတ်သွားကာ အရွက်ကိုးခုပါ ကြာနီ ထွက်ပေါ်လာသည်။

အရွက်ကိုးခုပါ ကြာနီ ထွက်ပေါ်လာသည့်အခါ သတ်ဖြတ်ခြင်း အစီအရင်က ချက်ချင်း ပျောက်ကွယ်သွားသည်။

အားလုံး ကြောင်အသွားကြသည်။

မဖြစ်နိုင်ဘူး

အံ့ဖွယ်မိုးကောင်းကင် ဂိုဏ်းချုပ်က အဲလောက်ထိ စွမ်းအားကြီးတဲ့ သတ်ဖြတ်ခြင်း အစီအရင်ကို အက်ကွဲအောင် လုပ်နိုင်တာလား

အစီအရင်မျိုးနွယ်စုရဲ့ တပည့်က ဘယ်သူလဲ

သူတို့ကြားမှာ ဘာလို့ ကွာခြားချက်က ဘာလို့ အဲလောက်ထိတောင် ကြီးမားနေရတာလဲ