ကောင်းကင်အဆင့်ဂိုဏ်းသို့ မြှင့်တင်ခြင်း

ရှန်းချန်ကောသည် သူ့နားရွက်ကို ပွတ်သပ်လိုက်ပြီး မျက်လုံးတစ်ဖက် လှန်ကြည့်လိုက်သည်။

ဤကောင်ကတော့ သူများတွေကို ဒူးထောက်ခိုင်းချင်နေတဲ့ မကောင်းတဲ့အကျင့်ကို မဖျောက်နိုင်သေးပါလား။

ထိုအချိန်တွင် ရှန်းချန်ကောသည် ရုပ်တုများကို တစ်ချက်ကြည့်လိုက်သည်။

ယခုအခါ နတ်ဓားဂိုဏ်း၏ဂိုဏ်းချုပ်နောက်တွင် ရှိနေသော ဂိုဏ်းသင်္ကေတရုပ်တုတစ်ခုသာ ကျန်ရှိတော့သည်။

ယခင်ရုပ်တုများအားလုံးသည် မျက်လုံးကြီးမှ ထုတ်လွှတ်လိုက်သော အမှောင်မြူခိုးများကြောင့် ပြိုကျပျက်စီးသွားခဲ့သည်။

ရှန်းချန်ကော၏မျက်နှာထား မကောင်းလှတော့ပေ။

အမှန်တကယ်တော့ ရုပ်တုများပြားလာပါက ဂိုဏ်းတွင်မည်သည့်ပြောင်းလဲမှုများ ဖြစ်ပေါ်လာမည်ကို သူ သိချင်နေခြင်း ဖြစ်သည်။

သို့သော် မထင်မှတ်ဘဲ မျက်လုံးကြီး၏ အမှောင်မြူခိုးများကြောင့် အကုန်လုံးပျက်စီးသွားပြီး တစ်ခုတည်းသာ ကျန်ရစ်တော့သည်။

ဒီကောင်...ကျောက်တုံးတွေကိုတောင် ကိုက်စားပစ်တာလား

ရှန်းချန်ကော၏မျက်ခုံးနှစ်ခုကြားတွင် ဒေါင်လိုက်မျက်လုံး ရုတ်တရက် ပွင့်လာခဲ့သည်။

ထို့နောက် သူသည် လက်ဖြင့် နှဖူးပေါ်မှ မျက်လုံးလုံးကြီးကို တိုက်ရိုက် ဆွဲထုတ်လိုက်ပြီး မြေကြီးပေါ်ပစ်ချကာ ခြေထောက်ဖြင့် တစ်ချက်ကန်လိုက်သည်။

ထို့နောက် သူ့ခေါင်းထဲသို့ ပြန်ထည့်လိုက်သည်။

လှုပ်ရှားမှုများမှာ အလွန်သွက်လက်ပြီး လျှင်မြန်စွာ ဖြစ်သွားခဲ့၏။

မျက်လုံးကြီးသည် ဒေါသထွက်ရန်ပြင်လိုက်စဉ်မှာပင်... နွေးထွေးသော စွမ်းအင်စီးကြောင်းတစ်ခု ရုတ်တရက် ဝင်ရောက်လာလေသည်။

"အား... အရမ်းကောင်းတာပဲ..."

"ဟေ့... ကျွန်၊ ငါ့ကို နည်းနည်း ထပ်ပေးစမ်း"

"အား"

မကြာခင်မှာတော့ ရှန်းချန်ကော၏ "ရိုက်ပြီးမှ ပေးကမ်းခြင်း" နည်းလမ်းကြောင့် နှစ်ဦးနှစ်ဖက် ပျော်ရွှင်သွားကြသည်။

ရှန်းချန်ကောသည် နတ်ဓားဂိုဏ်း၏ရုပ်တုပေါ်တွင် သွေးစက်ချလိုက်သည်။

ထို့နောက်...

ဘုန်း

ပတ်ဝန်းကျင်သည် ရုတ်တရက် မူးဝေလောက်အောင် လည်ပတ်သွားသည်။

တစ်ခဏချင်းတွင် နတ်ဓားဂိုဏ်း တည်ရှိရာ နေရာသည် အဆုံးမရှိသောနယ်မြေများကို ဖြတ်ကျော်သွားသကဲ့သို့ ဖြစ်သွားသည်။

ထိုအချိန်တွင်...

ကောင်းကင်ဘုံဓားဂိုဏ်း အတွင်း၌...

ကျန်းစန်းကျန့် နှင့် မိုချင်းချန် တို့သည် အလောင်းများ သယ်ယူပို့ဆောင်ရေးကို စနစ်တကျ ညွှန်ကြားနေကြသည်။

မိုချင်းချန် "ဆရာ... ဒီလို တပည့်မျိုး ရှိတာ ဆရာ ဘယ်လို ခံစားရလဲ"

ကျန်းစန်းကျန့် "ဂုဏ်ယူတာပေါ့"

ကျန်းစန်းကျန့်၏မျက်လုံးများ အနည်းငယ် တောက်ပသွားပြီး အပြုံးတစ်ခု ပေါ်လာသည်။

မိုချင်းချန် "မရှက်ဘူးလား"

ကျန်းစန်းကျန့်၏မျက်နှာထား ရုတ်တရက် မည်းမှောင်သွားခဲ့သည်။

မင်းဘယ်လို စကားပြောလိုက်တာလဲ

မိုချင်းချန် "တခြားလူတွေက အသက် ၃၀ လောက်မှ ဆရာနဲ့ တန်းတူ ဖြစ်လာကြတာ။ စီနီယာအစ်ကိုကြီးကတော့ ၁၈ နှစ်ပဲ ရှိသေးတယ်။ ဆရာ့မှာ ခြေထောက် ၈ ချောင်း ထပ်တပ်ရင်တောင် သူ့ကို လိုက်မမီတော့ဘူး"

ကျန်းစန်းကျန့် "သူ့ရဲ့ အစွမ်းအစတွေက ငါသင်ပေးထားတာလေ"

ကျန်းစန်းကျန့်က ယုံကြည်မှုအပြည့်ဖြင့် ပြောလိုက်သည်။

မိုချင်းချန်က "ဖူး" ဟူ၍ အသံပြုလိုက်သည်။

မိုချင်းချန် "ကျွန်တော်လည်း လွတ်မြောက်ခြင်းအဆင့်ကို ရောက်နေပြီ။ မကြာခင် ဆရာ့ကို လိုက်မီတော့မယ်"

မိုချင်းချန် "ကျွန်တော်က ၁၅ နှစ်ပဲ ရှိသေးတယ်"

မိုချင်းချန်သည် ဓားကိုပိုက်ကာ မျက်နှာကို တင်းထားပြီး အေးစက်သော အပြုံးတစ်ခု ပြုံးလိုက်သည်။

မသိမသာစွာဖြင့်... သူ့တပည့်လေး၏အမူအကျင့်သည် တဖြည်းဖြည်း ပြောင်းလဲလာသည်ဟု ကျန်းစန်းကျန့် ခံစားမိသည်။

ထိုလေသံထဲမှ မောက်မာခြင်း၊ မသိလိုက်ခင် တိတ်ဆိတ်ထွက်သွားခြင်းနှင့် မျက်လုံးထဲမှ တစ်ခဏတာထွက်ပေါ်လာတတ်သော စူးရှမှုများသည် တစ်စုံတစ်ယောက်သော "ချန်ကော" နှင့် အနည်းငယ် ဆင်တူနေသည်။

သို့သော် ထိုအချိန်တွင်

ဘုန်း

အပြင်ဘက်တွင် ကျယ်လောင်သော အသံကြီး ထွက်ပေါ်လာပြီး သူတို့ ခြေထောက်အောက်မှ မြေပြင်များ စတင် တုန်ခါလာသည်။

အလွန် ထူးဆန်းလေ၏။

ကျန်းစန်းကျန့် မျက်လုံးများ ကျုံ့သွားသည်။

ရှေ့တွင် အမှောင်မြူခိုးများ ဖြည်းညှင်းစွာ ပျောက်ကွယ်သွားသည်ကို တွေ့လိုက်ရသည်။

ရေမြှုပ်များ ပျော်ဝင်သွားသကဲ့သို့ပင်။

အမှောင်မြူခိုးများ ပျောက်ကွယ်သွားပြီးနောက် ကျိုးပဲ့ပျက်စီးနေသော နံရံများ၊ ပြိုကျနေသော အဆောက်အဦးများနှင့် ရှေးဟောင်းဆန်သော အငွေ့အသက်များအစားထိုးလာလေ၏။

အရာအားလုံးသည် အချိန်ကာလ၏တိုက်စားမှုကို ခံလိုက်ရသကဲ့သို့ အပေါက်အပြဲများ ဖြစ်နေပြီး အလွန် ထူးဆန်းနေသည်။

သို့သော် ၎င်းသည် လူလုပ်ထားသော အရာဖြစ်ကြောင်း သူတို့ မြင်တွေ့နိုင်သည်။

ထို့အတူ အချိန်သိပ်မကြာသေးပေ။

အဘယ်ကြောင့်ဆိုသော် မြေကြီးပေါ်တွင် စိုရွှဲနေသော သွေးများမခြောက်သေးဘဲ၊ အလောင်းများ စုပုံနေကာ အေးစက်သော အငွေ့အသက်များ ထွက်ပေါ်နေသောကြောင့် ဖြစ်သည်။

ဒါ...

ထိုအချိန်တွင် ကျိုးပဲ့နေသော ဆိုင်းဘုတ်တစ်ခု ဖြည်းညှင်းစွာ ပြုတ်ကျလာသည်။

"နတ်ဓားဂိုဏ်း"

နတ်ဓားဂိုဏ်းလား

ကျန်းစန်းကျန့် တစ်ကိုယ်လုံး တုန်လှုပ်သွားသည်။

ဒါ ဘယ်လို ဖြစ်တာလဲ

ထိုအချိန်တွင်...

သူ မြင်လိုက်ရသည်။

အဝေးမှ အဆောက်အဦးများ၏အလယ်ဗဟိုတွင် ခမ်းနားထည်ဝါသော ရုပ်တုတစ်ခု ရှိသည်။

မူလက ကောင်းကင်ကို ထိုးဖောက်နေသော ဓားရှည်ကြီး တစ်လက် ဖြစ်သော်လည်း ယခုအခါ ဖြည်းညှင်းစွာပြောင်းလဲနေပြီး ကောင်ကင်းဘုံဓားဂိုဏ်း၏ဂိုဏ်းတည်ထောင်သူ ဓားသခင်ရုပ်တုပုံစံသို့ ပြောင်းလဲတော့မည့်ဟန် ရှိသည်။

ဒါ...

တစ်ယောက်ယောက်က နတ်ဓားဂိုဏ်းကို ဖျက်ဆီးလိုက်ပြီး သွေးစက်ချလိုက်ပြီလား။

ဘယ်သူလဲ

ကျန်းစန်းကျန့် မှတ်မိသလောက်ဆိုလျှင် သွေးစက်ချခြင်းသည် ပင်မသွေးကြောဆက်ခံသူများ၏ သွေးမှသာ အကျိုးသက်ရောက်မှု ရှိသည် မဟုတ်ပါလော။

ဒါဆိုရင်...

သူတို့ အဝေးသို့ လှမ်းကြည့်လိုက်ကြသည်။

ထိုဓားရှည်ရုပ်တုအောက်တွင် ထိုင်နေတာကြာပြီဖြစ်ပုံရသည့် ပုံရိပ်တစ်ခု ရှိသည်။

ဝတ်ရုံဖြူသည် ဖုန်မှုန့်တစ်စက်မျှ မတင်ဘဲ၊ ရှုပ်ပွနေသော နတ်ဓားဂိုဏ်းနှင့် မတူဘဲ သီးခြားကမ္ဘာတစ်ခုကဲ့သို့ ရှိနေသည်။

ပြိုပျက်နေသော အပျက်အစီးများနှင့် ပြီးပြည့်စုံလုနီးပါးပေါင်းစပ်နေသော လူငယ်။

သူသည် ခြေချိတ်ထိုင်နေရင်း ငွေရောင်အလင်းတန်း အချို့ လက်သွားခဲ့သည်။

လေပြည်အေးက သူ့အဝတ်အစားများကို ဖြည်းညှင်းစွာ လှုပ်ခတ်နေလေ၏။

ထို အရှိန်အဝါသည်...

သူတို့ကို အံ့အားသင့်သွားစေသည်။

ရှန်းချန်ကော....နတ်ဓားဂိုဏ်းကို ဖျက်ဆီးလိုက်တာလား။

အကြီးအကဲများ "ဒါ... ဆိုချင်တာက နတ်ဓားဂိုဏ်းက ငါတို့ ကောင်းကင်ဘုံဓားဂိုဏ်းရဲ့ နယ်မြေ ဖြစ်သွားပြီပေါ့"

အကြီးအကဲအချို့သည် တုန်လှုပ်စွာ ပြောလိုက်ကြသည်။

ဤအရာသည် မယုံကြည်နိုင်လောက်အောင်ပင်။

အမှောင်မြူခိုးများထဲတွင် နတ်ဓားဂိုဏ်း၏ အင်အားသည် သူတို့ထက် များစွာသာလွန်ခဲ့သည်။

ယခုအခါ ရှန်းချန်ကောက တိုက်ရိုက် ဖျက်ဆီးပစ်လိုက်ပြီလော။

ထို့အတူ...

အချိန် ဘယ်လောက်မှ မကြာသေးပါဘူး။

ရှန်းချန်ကော၏ဓားချက်တစ်ချက်တည်းဖြင့် သေဆုံးသွားသော နတ်ဓားဂိုဏ်း ကျွမ်းကျင်သူများ၏အလောင်းများကို သူတို့ ရှင်းလင်း၍ပင် မပြီးသေးပေ။

ယခုအခါ ရုတ်တရက် ကျယ်ပြန့်လာသော နတ်ဓားဂိုဏ်းနယ်မြေကို ကြည့်ရင်း အိပ်မက်မက်နေသကဲ့သို့ ခံစားနေရသည်။

"ချန်ကော..."

အကြီးအကဲများ တီးတိုးရေရွတ်လိုက်ကြသည်။

လက်ရှိ ရှန်းချန်ကောသည် ရင်းနှီးသော်လည်း စိမ်းသက်နေသည်။

တစ်ချိန်က ပျင်းရိသော တပည့်၊ သူတို့မျက်လုံးထဲတွင် ဝန်ထုပ်ဝန်ပိုး ဖြစ်ခဲ့သူ။

သူတို့က ရှန်းချန်ကောကို ဂိုဏ်းမှ ထုတ်ပယ်ရန် မစဉ်းစားခဲ့ကြသော်လည်း စိတ်ထဲတွင် မကျေနပ်မှုများ ရှိခဲ့ကြသည်။

သို့သော် မထင်မှတ်ဘဲ ရှန်းချန်ကောသည် ရုတ်တရက် ပြောင်းလဲသွားပြီး ပြိုင်ဘက်ကင်း ကျွမ်းကျင်သူ ဖြစ်လာခဲ့သည်။

ယခု နတ်ဓားဂိုဏ်း၏အခြေအနေကို ကြည့်ပြီး သူတို့ တုန်လှုပ်နေခဲ့ကြသည်။

ထို အလွန်အမင်းချောမောခန့်ညားသော ဝတ်ရုံဖြူလူငယ်သည် အမှန်တကယ်ပင် အလွန်သန်မာလွန်းသည်။

မယုံကြည်နိုင်လောက်အောင် သန်မာသည်။

ထို့အပြင်...

အနည်းငယ်လည်း ကြောက်ရွံ့ဖွယ် ကောင်းသည်။

ကလစ်...

ကလစ်...

ထိုဓားရှည်သဏ္ဌာန် ရုပ်တုမှ ကျောက်စများ ကွာကျလာသည်။

ထို့နောက် ရုပ်တုသည် အလင်းရောင်များ ထုတ်လွှတ်ပြီး ကောင်းကင်ဘုံဓားဂိုဏ်း၏ ရုပ်တုနှင့် တစ်ပုံစံတည်း ဖြစ်သွားခဲ့သည်။

ဒါ...

ထိုအချိန်တိုအတွင်းတွင် ဤနေရာရှိနေသူ အားလုံးသည် ကောင်းကင်ဘုံဓားဂိုဏ်း တစ်ခုလုံး တုန်ခါသွားသည်ကိုခံစားလိုက်ရသည်။

"ဘာဖြစ်တာလဲ"

"ကောင်းကင်ဘုံဓားဂိုဏ်းက ဓားသခင်ရုပ်တု (၃) ခု ပိုင်ဆိုင်သွားပြီ။ ဒါပေမဲ့ ဘာလို့ ငါ့ခံစားချက်က... တစ်မျိုးကြီး ဖြစ်နေရတာလဲ"

လူတိုင်း၏မျက်နှာထား ပြောင်းလဲသွားပြီး မကောင်းသောနိမိတ်တစ်ခုကို ခံစားလိုက်ရသည်။

ထိုအချိန်တွင် နတ်ဓားဂိုဏ်းမှ ရုပ်တုနှင့် ကောင်းကင်ဘုံဓားဂိုဏ်း၏ မူလရုပ်တု (၂) ခုတို့သည် တောက်ပသော အလင်းတန်းတစ်ခုဖြင့် ချိတ်ဆက်သွားခဲ့ကြသည်။

ဘုန်း

အလင်းတန်းတစ်ခုသည် ကောင်းကင်ကို စုတ်ဖြဲပြီး တိမ်တိုက်များကို ခွဲထုတ်လိုက်သည်။

ကျိဘ က ဖြည်းညှင်းစွာ ပြောလိုက်သည်။

"ဂိုဏ်းသင်္ကေတ ရုပ်တု (၃) ခု... ကောင်းကင်ဘုံဓားဂိုဏ်းခွဲက ကောင်းကင်အဆင့် ဂိုဏ်းအဖြစ် အဆင့်တိုးမြှင့်ခံလိုက်ရပြီ။ နက်ရွှေရောင်အဆင့်သတ်မှတ်ချက်မှာ နာမည်စာရင်း ဝင်သွားပြီ"

မိုချင်းချန် "နက်ရွှေရောင်အဆင့်သတ်မှတ်ချက်"

မိုချင်းချန်သည် ကျိဘကို သိချင်စိတ်ဖြင့် ကြည့်လိုက်သည်။

နက်ရွှေရောင်အဆင့်သတ်မှတ်ချက် ဆိုတာ ဘာလဲ။

ကျိဘ "မြူသမုဒ္ဒရာက အရမ်း ထူးခြားတဲ့ တည်ရှိမှုတစ်ခုပဲ။ အမှောင်မြူခိုးတွေက လူတွေကို သန်မာစေနိုင်တယ်။ အမှောင်မြူခိုးတွေထဲကနေ စွမ်းအင်တွေ ရယူနိုင်တယ်။ ဒါပေမဲ့ အမှောင်မြူခိုးမှာ နောက်ထပ် ထူးဆန်းတဲ့ စွမ်းရည်တစ်ခု ရှိသေးတယ်။ အဲဒါကတော့ သတင်းအချက်အလက် တည်ဆောက်ခြင်း ပဲ"

ကျိဘ "ဥပမာ- အမှောင်နတ်ဘုရားကျောက်တိုင် ရဲ့ တည်ရှိမှု။ နယ်မြေတစ်ခုအတွင်းမှာ လွတ်မြောက်ခြင်းအဆင့် အထွတ်အထိပ်ကို ရောက်ရှိသွားသူတိုင်းကို အမှောင်နတ်ဘုရားကျောက်တိုင်က အာရုံခံမိပြီး အမှောင်နတ်ဘုရားကျောက်တိုင်ရဲ့မဟာပျက်သုဉ်းခြင်းကမ္ဘာ ကို တည်ဆောက်တယ်"

ကျိဘ "အမှောင်မြူခိုးတွေထဲမှာ ဂိုဏ်းတစ်ခုက ဂိုဏ်းသင်္ကေတ ရုပ်တု (၃) ခု ပိုင်ဆိုင်သွားရင်၊ ကောင်းကင်အဆင့် ဂိုဏ်း အဖြစ် အဆင့်တိုးမြှင့်ခံရတယ်။ အဲဒီအခါ အမှောင်နတ်ဘုရားကျောက်တိုင်နဲ့ မတူတဲ့ နောက်ထပ် ထူးခြားတဲ့ ကျောက်တိုင်တစ်ခုက မှတ်တမ်းတင်ထားလိမ့်မယ်။ အဲဒီကျောက်တိုင်ကို နက်ရွှေရောင်ဂိုဏ်းအဆင့်သတ်မှတ်ချက် လို့ ခေါ်တယ်။ အဲဒီမှာ ကောင်းကင်အဆင့် ဂိုဏ်းတွေ အားလုံးကို မှတ်တမ်းတင်ထားတယ်"

ကျန်းစန်းကျန့် "အဆင့်တိုးမြှင့်ခံရပြီးရင် အကျိုးကျေးဇူး ရှိလား"

ကျန်းစန်းကျန့်က မနေနိုင်ဘဲ မေးလိုက်သည်။

ကျိဘက သက်ပြင်းချလိုက်ပြီး "ရှိတယ် အနီးနားက ထိပ်တန်းဂိုဏ်းကြီး (၁၀) ဂိုဏ်းရဲ့ ဝိုင်းဝန်းတိုက်ခိုက်ချေမှုန်းတာကို ခံရမယ့် အကျိုးကျေးဇူးပေါ့..."

"ဘာ"