မဟာဧကရီ၏ အတိတ်

အခန်း (၄၉၀) : မဟာဧကရီ၏ အတိတ်

ရှန်ထျန်း၏ စိတ်ထဲ လေးလံလာမိသည်။ လူသားမျိုးနွယ်တွင် ထိုကဲ့သို့သော လျှို့ဝှက်ချက်များ ရှိနေလိမ့်မည်ဟု ထင်မထားပေ။

ဒီကမ္ဘာကို မရေတွက်နိုင်တဲ့ ဘိုးဘေးတွေရဲ့ အလောင်း၊ သွေးများနှင့် ဖန်တီး ကာကွယ်ထားခြင်း ဖြစ်သည်။

ယခု ပြင်ပနယ်ပယ်မှ မိစ္ဆာဝိညာဉ်များ ထပ်မံကျူးကျော်လာပြီ ဖြစ်သည့်အတွက် ကပ်ဘေးက တစ်ခါထပ်မံ ထွက်ပေါ်လာသည်။

နယ်မြေငါးခု၏ ယခုလက်ရှိ ခွန်အားကြောင့် သူတို့အတွက် ပြင်ပနယ်မြေမှ မိစ္ဆာဝိညာဉ်များ ကျူးကျော်လာခြင်းကို တောင့်ခံနိုင်ဖို့အတွက် ခက်ခဲသည်။

ဒီကမ္ဘာက ဘာလို့ အဲလိုမျိုး ဖြစ်လာရတာလဲ

ရှန်ထျန်း မျက်မှောင်ကြုတ်ကာ မေးခွန်းထုတ်နေသည်။

ရှေးပဝေဏီခေတ်၏ အဆုံးသတ်တွင် ထာဝရဘုရင် ၃၆ ယောက်က လျှို့ဝှက်ပညာရပ်များကို အသုံးပြုကာ နယ်မြေငါးခုကို ပြင်ပနယ်မြေမှ ဝေးလံသော အကန့်အသတ်မဲ့ လေဟာနယ်ထဲသို့ ပို့ဆောင်ခဲ့သည်။ ထိုအရာက နယ်မြေငါးခုကို ပြင်ပလောကနှင့် အဆက်အသွယ်ပြတ်စေပြီး နယ်မြေငါးခုကို တိုးတက်သွားစေသည်။

နည်းလမ်းတကျပြောရလျှင် နှစ်ပေါင်း သောင်းချီကြာ တိုးတက်မှုကြောင့် နယ်မြေငါးခု၏ ခွန်အားက အဆမတန် တိုးပွားနေသင့်ပြီ ဖြစ်သည်။

သူတို့၏ အကောင်းမွန်ဆုံး အခြေအနေသို့ ပြန်မရောက်နိုင်လျှင်ပင် ထိုအဆင့်သို့ ကျမသွားသင့်ပေ။ နတ်ဧကရာဇ်စွမ်းအားရှင်များက ဤနေရာတွင် အရမ်းရှားပါးသည်။

ထို့အပြင် ဤနေရာတွင် ရှိသော ကောင်းကင်တာအို စည်းမျဉ်းများက ပြီးပြည့်စုံခြင်းမရှိဘဲ အာကာပြင် အလွှာကလည်း အင်မတန် အားနည်းနေသည်ကို ရှန်ထျန်း တွေ့ရှိထားသည်။

ကြောက်စရာကောင်းသော တိုက်ပွဲက ဤနေရာနှင့် ဤကမ္ဘာလောက၏ တာအိုကို ပျက်စီးစေခဲ့သည်။

ရှန်ထျန်းက ဂူဗိမာန် စောင့်ရှောက်သူဘက်သို့ လှည့်ကာ သူ သံသယရှိသည်များကို ပြောလိုက်သည်။

ဂူဗိမာန် စောင့်ရှောက်သူက သက်ပြင်းချကာ ပြောလိုက်သည်

“ ဒါတွေအားလုံးက လွန်ခဲ့တဲ့ နှစ်ပေါင်း ၄သိန်း၉ သောင်းလောက်တုန်းက ဖြစ်ခဲ့တဲ့ ကမ္ဘာပျက်ကိန်း စစ်ပွဲကြောင့်ပဲ။

ပထမဆုံး လူသားဧကရာဇ်က ဒဏ်ရာအပြင်းအထန် ရအောင် လုပ်လိုက်တဲ့ မိစ္ဆာဝိညာဉ်တွေလည်း ပြန်ပြီးတော့ သက်သာလာပြီ။

သူတို့က ဒီစကြဝဠာထဲကို ကျူးကျော်ဖို့အတွက် ကမ္ဘာ့အလွှာကို ထပ်ပြီးတော့ ချိုးဖျက်ဖို့ ကြိုးစားကြတော့မှာပဲ။

ပြီးတော့ ဒီနယ်မြေထဲမှာလည်း မိစ္ဆာဝိညာဉ်ကျင့်ကြံသူတွေ ကျန်နေခဲ့တာ ရှိတော့ သူတို့သာ ပူးပေါင်းလိုက်မယ်ဆိုရင် ကမ္ဘာ့အလွှာကို အလွယ်တကူ ချိုးဖျက်နိုင်လောက်တယ်။

အချိန်တစ်ခုကြာတဲ့အခါ ဒီစကြဝဠာက ကပ်ဘေးထဲကို ထပ်ပြီးတော့ ကျရောက်နေမှာပဲ။

မရေတွက်နိုင်တဲ့ မိစ္ဆာဝိညာဉ်တွေက လူတွေကို အစုလိုက်အပြုံလိုက်သတ်ပြီးတော့ နာကျင်ခံစားရအောင် လုပ်မှာ။ ကြယ်တွေကိုတောင် ဖျက်စီးပစ်မှာ။

လူသားမျိုးနွယ်အတွက် အထောက်အပံ့ဖြစ်တဲ့ ပျောက်ဆုံးသွားတဲ့ မျိုးနွယ်ပေါင်းထောင်ကျော်က ပြင်ပနယ်မြေက မိစ္ဆာဝိညာဉ်တွေကို မယှဉ်နိုင်ဘူး။

သူတို့က ခဏခဏနောက်ပြန်ဆုတ်ရပြီးတော့ အဆုံးသတ်မှာ သေမင်းတံခါးဝမှာ ရုန်းကန်ရင်းနဲ့ နတ်ဘုရားလောကမှာ ပုန်းအောင်းနေခဲ့ရတာ။

အဲလိုဆိုရင်တောင် နတ်ဘုရားလောကမှာ သူတို့ပိုင်ဆိုင်တဲ့ နယ်ပယ်ကလည်း ဖြည်းဖြည်းချင်း လျော့နည်းလာပြီ။ သူတို့က ထည့်သွင်းခံရပြီး ဝါးမျိုခံလိုက်ရတဲ့အတွက် ပြန်လည်ခုခံလို့မရဖြစ်နေတာ”

ဂူဗိမာန် စောင့်ရှောက်သူက နှာခေါင်းရှုံ့လိုက်သည်။ သူ ထိုလူများကို မသနားပေ။

သူတို့သာ လောဘမကြီးဘဲ လူသားမျိုးနွယ်နှင့် အငြင်းမပွားခဲ့ပါက ယခုလိုမျိုး အဆုံးသတ်သွားမည် မဟုတ်ပေ။

သို့သော် ဤကမ္ဘာပေါ်တွင် ထိခိုက်ဒဏ်ရာရခဲ့သော ရိုးသားသည့်သူလည်း အများအပြား ရှိသည်။

ထို့အပြင် ဧရာမကပ်ဘေးက စကြဝဠာတစ်ခုလုံးကို ပစ်မှတ် ထားထားသည့်အတွက် ဘယ်သူမှ ကိုယ့်ကိုယ်ကို ကာကွယ်နိုင်ခြင်း မရှိပေ။

ဂူဗိမာန်စောင့်ရှောက်သူက ဆက်လက် ရှင်းပြလိုက်သည်

“ အဲဒီအချိန်တုန်းက နယ်မြေငါးခုက အကန့်အသတ်မဲ့ လေဟာနယ်ထဲကို ထာဝရဘုရင် ၃၆ ယောက်ရဲ့ ပူးပေါင်းလုပ်ဆောင်မှုကြောင့် ရောက်ရှိသွားပြီး ပြင်ပကမ္ဘာနဲ့ အဆက်အသွယ်အားလုံးကို ဖြတ်တောက်ထားလိုက်တာ။

ဒါပေမဲ့ ပြင်ပနယ်ပယ်က မိစ္ဆာဝိညာဉ်များက စွန့်ပစ်ခံမျိုးနွယ်များဆီမှ သတင်းရရှိနေတုန်းပဲ … ပထမမျိုးဆက် လူသားဧကရာဇ်က တူညီသော အစီအစဉ်ထားခဲ့မှာကို စိုးရိမ်ပြီးတော့ အနာဂတ်မှာ ဖြစ်လာမဲ့ ပြဿနာတွေကို ကာကွယ်ဖို့အတွက် လူသားမျိုးနွယ်ရဲ့ အမွေအနှစ်ကို လုံးဝဖြတ်တောက်ချင်နေတာလေ။

ပြင်ပနယ်မြေက မိစ္ဆာဝိညာဉ်တွေက နယ်မြေငါးခုကို ရှာဖို့အတွက် ကျယ်ပြန့်တဲ့ ကြယ်တာရာကောင်းကင်ကို စပြီးတော့ ရှာဖွေလေ့လာနေပြီ။

အခန့်မသင့်တော့ နယ်မြေငါးခုရဲ့ တည်နေရာကို သိသွားတယ်။ ပြင်ပနယ်မြေက မိစ္ဆာဝိညာဉ်တွေက ကျူးကျော်မှုတစ်ခုကို စပြီးတော့ နယ်မြေငါးခုကို လွှမ်းမိုးချုပ်ကိုင်နိုင်ဖို့အတွက် စစ်ပွဲကို စတင်လိုက်တယ်။

အဲဒီတုန်းက နယ်မြေငါးခုက ကြီးမားတဲ့ ဆုံးရှုံးမှုတွေနဲ့ ရင်ဆိုင်ခဲ့ရလို့ ပြန်ပြီးတော့ မသက်သာသေးဘူး။

နယ်မြေငါးခုက နောက်ထပ် ကပ်ဘေးတစ်ခုနဲ့ ကြုံတွေ့ရတော့ လူသားတွေက သူတို့ရဲ့ဘိုးဘေးတွေထားခဲ့တဲ့ အထွတ်အထိပ် ရတနာတွေနဲ့ ခုခံနေကြတယ်။

ကံကောင်းစွာနဲ့ ထာဝရဘုရင်က နယ်မြေငါးခု အလွှာကို ဖန်တီးပြီးတော့ ဒီနေရာကို ပိတ်ဆို့ထားခဲ့တာ။ အဲဒါကြောင့်ပဲ မိစ္ဆာဝိညာဉ်မျိုးနွယ်က ထာဝရအရှင်အဆင့်အထက်မှာရှိတဲ့သူ ဒီကမ္ဘာထဲကို အလွယ်တကူ ဝင်လာလို့ မရတာ။ ဒါပေမဲ့ နယ်မြေငါးခုအတွက် အခြေအနေက မကောင်းသေးဘူး။ လုံးဝ ဖျက်စီးခံရတော့မယ်”

သူ ဤနေရာထိ စကားပြောပြီးနောက် ဂူဗိမာန် စောင့်ရှောက်သူ၏ ခန္ဓာကိုယ်တုန်ရီလာကာ သူ့စကားများထဲတွင်လည်း အငြိုးအတေးများဖြင့် ပြည့်နှက်နေသည်။

ထိုကပ်ဘေးက လူသားဆန်စိတ်ကို သေတွင်းသို့ တွန်းပို့နေသည်။

လူသား ထိပ်သီးစွမ်းအားရှင်များပင် ထိုတိုက်ပွဲထဲတွင် သုတ်သင်ခံလိုက်ရပြီး အရိုးပင် မကျန်ရှိတော့ပေ။

ထို့နောက် ဂူဗိမာန် စောင့်ရှောက်သူ၏ လေသံပြောင်းလဲသွားကာ ပြောလိုက်သည်

“ နယ်မြေငါးခုက ကျဆုံးတော့မှာဆိုပေမဲ့ အခြေအနေကို ပြောင်းပြန်လှန်နိုင်မဲ့ နည်းလမ်း မရှိဘူး။

အဲဒီနေရာမှာတင်ပဲ ဒုတိယလူသား ဧကရာဇ် မွေးဖွားလာပြီးတော့ ပြီးပြည့်စုံတဲ့ စွမ်းအားနဲ့ အလျင်အမြန် ကြီးထွားလာခဲ့တယ်။ သူ ကျင့်ကြံတဲ့ မီးစာကျမ်းက ရှုပ်ထွေးပွေလီ အရှိန်အဝါကို သန့်စင်နိုင်ပြီးတော့ သူ့ ခန္ဓာကိုယ်ထဲမှာ ကမ္ဘာတစ်ခု တည်ထောင်လို့ရတယ်။ အဲဒါကို ကျင့်ကြံလိုက်ရုံနဲ့တင် ကောင်းကင်နဲ့ ကမ္ဘာမြေကြီးတို့ရဲ့ ကျယ်ပြန့်တဲ့ စွမ်းအားကို ဖမ်းဆုပ်မိတယ်။

အဲဒီစွမ်းအားက မီးစာကျမ်း ပေးနိုင်တာထက် ကျော်လွန်နေတယ်။ အဲဒါကြောင့် ရှုပ်ထွေးပွေလီ မီးစာကျမ်းလို့ခေါ်တာ။

ဒါက ရှုပ်ထွေးပွေလီ မီးစာကျမ်းရဲ့ မူလအရင်းအမြစ်ပဲ”

ဂူဗိမာန် စောင့်ရှောက်သူက ရှန်ထျန်းကို စိုက်ကြည့်လိုက်သည့်အခါ ရှန်ထျန်း တောင့်တင်းသွားရသည်။

ဒါဆိုရင် ရှုပ်ထွေးပွေလီ မီးစာကျမ်းကို ဒုတိယမျိုးဆက် လူသားဧကရာဇ် ဖန်တီးခဲ့တာပေါ့။ စွမ်းအားကြီးတာလည်း မဆန်းပါဘူး။

ဂူဗိမာန် စောင့်ရှောက်သူက ဆက်လက် ရှင်းပြလိုက်သည်

“ ဒုတိယ လူသားဧကရာဇ် ထွက်ပေါ်လာတော့ သူ့ရဲ့ ကျင့်စဉ်က အရမ်းမမြင့်သေးဘူး။ ဒါပေမဲ့ သူ့ရဲ့တိုက်ပွဲစွမ်းရည်က အရမ်းကြောက်ဖို့ကောင်းတယ်။

သူက သုတ်သင်ဖို့အတွက် ရှုပ်ထွေးပွေလီ မီးစာကျမ်းရဲ့ ပြိုင်ဘက်ကင်း စွမ်းအားကို အသုံးပြုပြီးတော့ နယ်မြေငါးခုမှာ သွေးချောင်းစီးစေခဲ့တာ။ သူက မိစ္ဆာဝိညာဉ်အားလုံးနဲ့ ယှဉ်လို့ရလောက်တဲ့အထိ ပြိုင်ဘက်ကင်းတယ်။

သူ့ရဲ့ အတိဒုက္ခဖြတ်ကျော်ခြင်း အဆင့်ရောက်နေတဲ့အချိန်မှာတောင် ထာဝရမိစ္ဆာဝိညာဉ် တစ်ထောင်ကျော်ကို နှိမ်နင်းနိုင်ခဲ့ပြီး မိစ္ဆာဝိညာဉ်မျိုးနွယ်ရဲ့ ထိတ်လန့်စရာကောင်းတဲ့ ဖြစ်တည်မှုကို ကြောက်ရွံ့သွားအောင် လုပ်နိုင်ခဲ့တာ။

ထာဝရတစ်ပိုင်း မိစ္ဆာဝိညာဉ်တွေတောင် ဒုတိယလူသားဧကရာဇ်ကို ရှာရဲမှာ မဟုတ်ဘူး။ သူတို့ သူ့ဆီလာခဲ့ရင် ဒုတိယလူသားဧကရာဇ်အတွက်တော့ သူတို့ကို ကိုင်တွယ်ရ လွယ်ကူတာပေါ့။

ထာဝရအဆင့်အထက်ရှိ မိစ္ဆာဝိညာဉ်တွေကတော့ နယ်မြေငါးခု အလွှာကြောင့် နယ်မြေငါးခုထဲကို ဝင်မလာနိုင်ပဲနဲ့ ပြင်ပကမ္ဘာမှာပဲ ဒေါသထွက်နိုင်တယ်”

ဂူဗိမာန် စောင့်ရှောက်သူ၏ အကြည့်တို့ လင်းလက်သွားကာ လေသံကလည်း လေးစားမှုတို့ဖြင့် ပြည့်နှက်နေသည်။

ဒုတိယမျိုးဆက် လူသားဧကရာဇ်က နေမင်းလိုမျိုး နယ်မြေငါးခုအတွက် မျှော်လင့်ချက်ကို ယူဆောင်လာပေးတယ်

သူ ထွက်ပေါ်လာတာကြောင့် လူသားမျိုးနွယ်ကို ကပ်ဘေးကနေ လွတ်မြောက်စေခဲ့တာ

ဒုတိယ လူသားဧကရာဇ်က လူသားမျိုးနွယ်ရဲ့ ထိုက်တန်တဲ့ ကယ်တင်ရှင်လို့ ပြောလို့ရတယ်။ သူ့ရဲ့ ကျော်ကြားမှုက ပထမလူသားဧကရာဇ်ထက်တော့ မနိမ့်ကျဘူး။

ဘာလို့လဲဆိုတော့ ဒုတိယလူသားဧကရာဇ် ထွက်ပေါ်လာမှုက နယ်မြေငါးခုကို ပြန်လည်ရှင်သန်လာစေလို့ပဲ။

လူသားမျိုးနွယ်ရဲ့ ထိပ်တန်းပါရမီရှင်တွေက သူတို့ရဲ့ စိတ်ထဲမှာ မျှော်လင့်ချက်ကို ဆုပ်ကိုင်ထားပြီးတော့ သူတို့ရဲ့ ခွန်အားတိုးတက်လာဖို့အတွက် ကျင့်စဉ်မှာ အာရုံစိုက်ထားခဲ့တာ။

ကမ္ဘာလောကတောင် ပြောင်းလဲသွားပြီးတော့ အဆုံးမဲ့ ဝိညာဉ်ချီ ကျဆင်းလာပြီး သဘာဝစည်းမျဉ်းတွေက လူသားတွေကို ရင်းနှီးလာစေပြီး အလျင်အမြန် ကြီးထွားလာစေတာ။

အဲလို ပတ်ဝန်းကျင်ရဲ့ အထောက်အပံ့ကြောင့် ထိပ်သီးစံပြနဲ့ စွမ်းအားကြီး ပုံရိပ်တွေက မိုးရွာပြီး ဝါးပင်တွေ ကြီးလာသလိုပဲ။

ဒုတိယမျိုးဆက် လူသားဧကရာဇ်က အဲဒီအချိန်မှာ သူ့ကျင့်စဉ်ကို ပြီးပြည့်စုံအောင် လုပ်နိုင်သွားတယ်။ သူ့ရဲ့ ပြိုင်ဘက်ကင်း ကျက်သရေကြောင့် မရေတွက်နိုင်တဲ့ သူရဲကောင်းတွေ သူ့ရှေ့မှာ ဦးညွှတ်လာအောင် လုပ်နိုင်တယ်။

အဲဒီအချိန်အတွင်းတုန်းက ဒုတိယလူသားဧကရာဇ်က သူ့လုပ်ဖော်ကိုင်ဖက်တွေရဲ့ အင်အားကိုလည်း တိုးမြှင့်ပေးနိုင်ခဲ့ပြီးတော့ အဲဒီခေတ်တုန်းက အကောင်းဆုံး အရည်အချင်းတွေရှိတဲ့ အထွတ်အထိပ်ပါရမီရှင်က သူ့လက်အောက်ကို ရောက်လာခဲ့တာ။

အဲဒီထဲမှာ ရှေးပဝေဏီခေတ်က အထွတ်အထိပ် ထာဝရဘုရင် ၃၆ ယောက်ရဲ့ ခွန်အားနဲ့တူတဲ့ ပါရမီရှင် ၃၆ ယောက်ရှိတယ်။

သူတို့က ထာဝရဘုရင် ၃၆ ယောက်ရဲ့ ဝိညာဉ်အစစ်အမှန် အစိတ်အပိုင်းလို့လည်း ပြောကြတယ်။ သူတို့က အရမ်း အရည်အချင်းရှိတယ်။

ပြီးတော့ အဲဒီထူးခြားတဲ့ ပါရမီရှင်တွေက ဒုတိယလူသားဧကရာဇ်ဆီမှာ သစ္စာခံလိုက်တယ်။ ဘာလို့လဲဆိုတော့ လူသားမျိုးနွယ်ကို ပြန်လည်မြှင့်တင်ပေးပြီးတော့ နတ်ဘုရားလောကဆီ ဦးဆောင်သွားမယ်လို့ ယုံကြည်လို့ပဲ။

ဒုတိယလူသားဧကရာဇ်ရဲ့ စွမ်းအားက ဖြည်းဖြည်းချင်း များလာပြီ။ သူ့ရဲ့ နောက်လိုက်တစ်ယောက်ချင်းစီမှာ ပြိုင်ဘက်ကင်း တိုက်ခိုက်ခွန်အားရှိပြီး အင်မတန်စွမ်းအားကြီးလွန်းတယ်။

ဒုတိယလူသားဧကရာဇ်ရဲ့ ဦးဆောင်မှုအောက်မှာ သူတို့က တိုက်ခိုက်လေလေ ပိုပြီးတော့ သတ္တိရှိလာလေလေပဲ။ သူတို့က နေရာတိုင်းမှာရှိတဲ့ ပြင်ပနယ်မြေ မိစ္ဆာဝိညာဉ်တွေကို သတ်ပစ်တာ။

သူတို့ ဖြတ်သွားတဲ့နေရာတိုင်းမှာ မိစ္ဆာဝိညာဉ်တွေ ကြောက်ဒူးတုန်နေပြီးတော့ သူတို့ မျိုးနွယ်စုတစ်ခုလုံး သုတ်သင်ခံရမလိုမျိုး ဖြစ်ခဲ့တယ်။

အစတုန်းကတော့ နယ်မြေငါးခုလုံးရဲ့ ၇၀ရာခိုင်နှုန်းက ပြင်ပနယ်မြေက မိစ္ဆာဝိညာဉ်တွေ ပိုင်ဆိုင်ထားတာ။ ဒါပေမဲ့ ဒုတိယမျိုးဆက် လူသားဧကရာဇ်ရဲ့ ဦးဆောင်မှုကြောင့် သူတို့ရဲ့ ပိုင်နက်ကို ပြန်ရသွားခဲ့တယ်။

ပြင်ပနယ်ပယ်ရှိ မိစ္ဆာဝိညာဉ်တွေက နောက်ဆုတ်သွားခဲ့ရတယ်။ သူတို့တွေ ဒီနယ်မြေကနေ လုံးဝ မောင်းထုတ်ခံလိုက်ရတယ်။

ဒီတိုက်ပွဲက ဒုတိယလူသားဧကရာဇ်ရဲ့ ဂုဏ်ပုဒ်ကို လူသားမျိုးနွယ်တွေရဲ့ နှလုံးသားထဲမှာ အမြင့်ဆုံးအထိ ရောက်အောင် လုပ်ပေးလိုက်တယ်။

သူ့ကို ပြိုင်ဘက်ကင်း လူသားဧကရာဇ်ဆိုပြီးတော့ လူသိများတယ်။ သူ့ရဲ့ ဂုဏ်သိက္ခာက ပထမမျိုးဆက် လူသားဧကရာဇ်နဲ့ ယှဉ်လို့ရနိုင်တယ်။

သူ ဖန်တီးခဲ့တဲ့ အင်အားစုကို ကောင်းကင်ခုံရုံးလို့ ခေါ်တယ်။

ဒုတိယလူသားဧကရာဇ်ရဲ့ လက်အောက်မှာရှိတဲ့ ပါရမီရှင် ၁၀၈ ယောက်ကို ကောင်းကင်စစ်သူကြီး ၁၀၈ယောက်လို့ခေါ်တယ်။

ကောင်းကင်ခုံရုံးက နယ်မြေငါးခုမှာ အားအကောင်းဆုံး အင်အားစုပဲ။ သူတို့အကြောင်းကို ကြားရင်း မိစ္ဆာဝိညာဉ်တွေရဲ့ မျက်နှာထားတောင် ပြောင်းလဲသွားမယ်။

ဂူဗိမာန် စောင့်ရှောက်သူ၏ လေသံက စိတ်လှုပ်ရှားမှုတို့ မြင့်တက်လာကာ အကြည့်ထဲတွင်လည်း စိတ်အားထက်သန်မှုဖြင့် လောင်ကျွမ်းနေသည်။

ထိုကိစ္စကို ထုတ်ပြောလိုက်သည့်အခါ သူ့ ခန္ဓာကိုယ်ထဲမှ တိုက်ပွဲသွေး မလှုပ်ရှားဘဲ မနေနိုင်တော့ပေ။

ရှန်ထျန်း၏ အကြည့်တို့လည်း ထက်သန်နေသည်။

ဒါဆိုရင် ရှေးဟောင်းစာအုပ်တွေထဲမှာ ဖတ်ရတဲ့ ကောင်းကင်ခုံရုံးက ဒုတိယမျိုးဆက် လူသားဧကရာဇ် ဖန်တီးခဲ့တာပေါ့

နည်းလမ်းကျကျ ပြောရမယ်ဆိုရင် ဒုတိယလူသားဧကရာဇ်လိုမျိုး ပြိုင်ဘက်ကင်း စွမ်းအားရှင်က မိစ္ဆာဝိညာဉ်မျိုးနွယ်ကို သူတို့ရဲ့ မွေးရပ်မြေထိ ရောက်သွားအောင်အထိ လုပ်ခဲ့သင့်တာ မဟုတ်လား

နယ်မြေငါးခုက ဘာလို့ ဆိုးရွားတဲ့ အခြေအနေမှာ ကျရောက်ရတာလဲ

ဂူဗိမာန်စောင့်ရှောက်သူက ခေါင်းငုံ့ကာ သက်ပြင်းချရင်း ပြောလိုက်သည်

“ ဒါပေမဲ့ မမျှော်လင့်ထားတဲ့ တစ်စုံတစ်ခု ဖြစ်သွားခဲ့တယ်။

ဒုတိယ လူသားဧကရာဇ်ရဲ့ ဦးဆောင်မှုကြောင့် ကောင်းကင်ခုံရုံးက အရမ်းစွမ်းအားကြီးခဲ့တယ်။

ပြန်လည်တိုက်ခိုက်ဖို့အတွက် ပို့ဆောင်ရေး အစီအရင်ကို အသုံးပြုပြီးတော့ အထွတ်အထိပ် ကောင်းကင်သစ်ပင်ကို နတ်ဘုရားလောကဆီ ပို့ဖို့ လုပ်ခဲ့တာ။

ဒါပေမဲ့ ပြင်ပနယ်မြေက မိစ္ဆာဝိညာဉ်တွေကလည်း အသေအကြေ တိုက်ခိုက်ကြတော့တယ်။

သူတို့က နယ်မြေငါးခုအလွှာကို ဖွင့်ဖို့အတွက် အများကြီး ပေးဆပ်ခဲ့တယ်။

မိစ္ဆာဝိညာဉ်မျိုးနွယ်က မိစ္ဆာဝိညာဉ် နတ်ဧကရာဇ်သုံးယောက်ကို လွှတ်လိုက်ပြီးတော့ အခုမှ ထာဝရတစ်ပိုင်းအဆင့်ပဲ ရှိသေးတဲ့ ဒုတိယမျိုးဆက် လူသားဧကရာဇ်ကို တိုက်ခိုက်ခိုင်းတယ်။

နှစ်ဖက်လုံးက အပြင်းအထန်ကို တိုက်ခိုက်ခဲ့ကြတယ်။

အဲဒီတိုက်ပွဲက အရမ်းထိတ်လန့်ဖို့ကောင်းလို့ ပတ်ဝန်းကျင်မှာရှိတဲ့ ကြယ်တာရာပေါင်း မြောက်မြားစွာကို ဖုန်မှုန့်အဖြစ် ပြိုကွဲသွားစေတယ်။

ကောင်းကင်တစ်ခုလုံးလည်း အပျက်အစီးတွေ ဖြစ်ကုန်ပြီ။

ဘယ်သူမှ တိုက်ပွဲအနားကပ်မသွားနိုင်တော့ တိုက်ပွဲ ဘယ်လိုဖြစ်နေလဲကို မသိခဲ့ကြဘူး။

ဒါပေမဲ့ တိုက်ပွဲပြီးတော့ ဒုတိယလူသား ဧကရာဇ်က လုံးဝ အစအနမကျန် ပျောက်ကွယ်သွားပြီးတော့ ထပ်ပြီး ပေါ်မလာတော့ဘူး။

မိစ္ဆာဝိညာဉ်နတ်ဧကရာဇ် သုံးယောက်လည်း ဘယ်တော့မှ ထပ်ပြီး ပေါ်မလာတော့ဘူး။”

ဂူဗိမာန် စောင့်ရှောက်သူ၏ လေသံက အင်မတန်လေးလံလာပြီး စိတ်မပါမှုတို့ဖြင့် ပြည့်နှက်နေသည်။

ဒုတိယမျိုးဆက် လူသားဧကရာဇ် ပျောက်ဆုံးသွားခြင်းက ဤနယ်မြေအတွက် ကြီးမားသော ဆုံးရှုံးမှုတစ်ခု ဖြစ်ပြီး သူ ခက်ခဲစွာ တည်ဆောက်ခဲ့သော တိုက်ပွဲယုံကြည်မှုကလည်း စတင်ယိမ်းယိုင်လာသည်။

“ မိစ္ဆာဝိညာဉ်တွေက ဒုတိယလူသားဧကရာဇ်က မိစ္ဆာဝိညာဉ်နတ်ဧကရာဇ် သုံးယောက်ရဲ့ လက်ထဲမှာ ကျဆုံးသွားတယ်ဆိုတဲ့ သတင်းကို ဖြန့်လိုက်တယ်။

ဒါပေမဲ့ ကောင်းကင်ခုံရုံးက လူတွေက ဒုတိယလူသားဧကရာဇ်ရဲ့ တိုက်ပွဲစွမ်းရည်နဲ့ဆိုရင် လွယ်လွယ်မသေနိုင်ဘူးဆိုတာကို သိတယ်။

ဒါပေမဲ့ ဒုတိယလူသားဧကရာဇ်က ပေါ်မလာတော့ အားလုံးကို စိုးရိမ်စေတယ်။

မိစ္ဆာဝိညာဉ်မျိုးနွယ်တွေက အဲဒါကို အခွင့်ကောင်းယူပြီးတော့ အကြီးအကျယ် ကျူးကျော်ခဲ့တယ်။

ဒုတိယလူသားဧကရာဇ်ရဲ့ ဦးဆောင်မှု မရှိတော့ ကောင်းကင်ခုံရုံးရဲ့ အင်အားက အားမသာတဲ့ အခြေအနေကို ရောက်သွားတယ်။

ကောင်းကင်စစ်သူကြီး ၁၀၈ ယောက်က သူတို့တတ်နိုင်သလောက် ခုခံပေမဲ့ အခြေအနေကို ပြောင်းပြန်လှန်ဖို့အတွက်တော့ စွမ်းအားမဲ့နေတုန်းပဲ။

အဆုံးကျတော့ ကောင်းကင်စစ်သူကြီး တစ်ဝက်ကျော်လောက် သေသွားပြီးတော့ သူတို့ရဲ့ သွေးက ကမ္ဘာတစ်ခွင် ပျံ့နှံ့သွားတယ်။

ကောင်းကင်ခုံရုံးတောင် ဖျက်စီးခံလိုက်ရပြီး မြောက်ပင်လယ်ထဲကို နစ်မြုပ်သွားခဲ့တာ”

ထိုအချိန်တွင် ဂူဗိမာန် စောင့်ရှောက်သူက နောင်တများဖြင့် ပြည့်နှက်နေကာ သက်ပြင်းချလိုက်သည်။

ဒုတိယမျိုးဆက် လူသားဧကရာဇ်သာ အပြည့်အဝ အရွယ်ရောက်လာရင် တကယ်ကို လွန်ကဲတဲ့ တည်ရှိမှုမျိုး ဖြစ်မှာပဲ။ သူက ကောင်းကင်ခုံရုံးကို ဦးဆောင်ပြီးတော့ ပြင်ပနယ်မြေက မိစ္ဆာဝိညာဉ်တွေကို အောင်မြင်စွာ မောင်းထုတ်နိုင်လောက်တယ်

ရှန်ထျန်းလည်း စိတ်ဓာတ်ကျလာသည်။

အနိုင်ရခါနီးတိုက်ပွဲက တစ်ခါပြန်ပြီးတော့ နောက်ဆုတ်သွားပြန်ပြီ။ ဒီတစ်ခေါက် ကပ်ဘေးက အရင်ကထက် ပိုပြီးတော့ ပြင်းထန်တယ်

ရှန်ထျန်းက မေးလိုက်သည်

“ ဒုတိယမျိုးဆက် လူသားဧကရာဇ်က ဘယ်လိုသေသွားတာလဲဟင်။ သူက တကယ်ပဲ မိစ္ဆာဝိညာဉ်နတ်ဧကရာဇ်တွေရဲ့ လက်ထဲမှာ သေသွားတာလား”

ဂူဗိမာန် စောင့်ရှောက်သူက ခေါင်းယမ်းပြကာ ပြောလိုက်သည်

“ ဘယ်သူမှ မသိဘူး။ ဒါပေမဲ့ ဒုတိယလူသားဧကရာဇ်၏ တိုက်ခိုက်စွမ်းရည်နဲ့ဆိုရင် သူ သေသွားတာ မဖြစ်နိုင်ဘူး”

ဂူဗိမာန် စောင့်ရှောက်သူက အရမ်းသေချာနေသည့်အတွက် သံသယလေသံမျိုး မဟုတ်ပေ။

ဒုတိယလူသားဧကရာဇ်က ကျော်ကြားခဲ့ဖူးသည့်အတွက် သူ့ အရည်အချင်းက ယခင်ကရော ယခုပါ ပြိုင်ဘက်ကင်းပြီး ယခင်ပါရမီရှင်များထက် များစွာကျော်လွန်နေသည်။

သို့သော် သူ ဘာလို့ ရုတ်တရက်ကြီး ပျောက်ကွယ်သွားလဲဆိုတာကို ဂူဗိမာန် စောင့်ရှောက်သူ  မသိခဲ့ပေ။

ထိုအတွေးကြောင့် ဂူဗိမာန် စောင့်ရှောက်သူ ငြိမ်ကျသွားသည်။

ဆယ့်ငါးမိနစ်လောက်နေမှ အသိစိတ် ပြန်ဝင်လာကာ ပြောလိုက်သည်

“ အဲဒီတိုက်ပွဲမှာ လူသားမျိုးနွယ်တွေ အမြစ်ပြတ် သုတ်သင်ခံရမလိုမျိုး ဖြစ်ခဲ့တယ်။

ကျေးဇူးတင်ဖို့ကောင်းတာက ဒုတိယ လူသားဧကရာဇ်ရဲ့ နောက်လိုက် မိန်းကလေးက စွမ်းအားကြီးတယ်။

သူမက ကောင်းကင်ဝါးမျို ကမ္ဘာမြေပညာရပ်လို့ခေါ်တဲ့ ကောင်းကင်ဆန့်ကျင် ကျင့်စဉ်တစ်ခုကို ဖန်တီးခဲ့ပြီးတော့ သူမရဲ့ သေမျိုးခန္ဓာကို ပြီးပြည့်စုံတဲ့ ရှုပ်ထွေးပွေလီ ခန္ဓာအဖြစ် ပြောင်းလဲလိုက်တာ။

ပြီးတော့ သူမက ရှုပ်ထွေးပွေလီ မီးစာကျမ်းကို ကျွမ်းကျင်တဲ့အတွက် ပြင်ပနယ်မြေက မိစ္ဆာဝိညာဉ်တွေကို တိုက်ခိုက်ဖို့ လူသားတွေကို ဦးဆောင်သွားခဲ့တယ်။

သူမ ထွက်ပေါ်လာလို့သာ နယ်မြေငါးခုရဲ့ ကပ်ဘေးက လုံးဝ ဖြေရှင်းလို့ရသွားတာ။

ရှုပ်ထွေးပွေလီ မီးစာကျမ်းရဲ့ အကူအညီအရဆိုရင် သူမရဲ့ ကျင့်ကြံခြင်းက အဆမတန် တိုးတက်လာပြီးတော့ မကြာခင်မှာ နတ်ဧကရာဇ်တစ်ပါး ဖြစ်ခဲ့မှာပဲ။

သူမက ကောင်းကင်ခုံရုံးရဲ့ လူဟောင်းတွေကို နတ်ဘုရားလောကဆီ ဦးဆောင်သွားပြီးတော့ ပြင်ပနယ်မြေက မိစ္ဆာဝိညာဉ်တွေကို နှစ်ထောင်ပေါင်းများစွာ တိုက်ခိုက်ခဲ့တယ်။

အဲဒီအမျိုးသမီးက ပြိုင်ဘက်ကင်းတဲ့သူတစ်ယောက်ပဲ။ သူမကို မဟာဧကရီလို့လည်း လူသိများကြတယ်။

ရှုပ်ထွေးပွေလီ မီးစာကျမ်းက မဟာဧကရီကို ကိုယ်စားပြုတဲ့ ကျင့်စဉ်ပဲ။ အဲဒါက မရေတွက်နိုင်တဲ့ မိစ္ဆာဝိညာဉ်တွေကို ကြောက်ရွံ့စေတယ်”

ဂူဗိမာန် စောင့်ရှောက်သူ ပြောလိုက်သော မဟာဧကရီက သူ တွေ့ခဲ့ဖူးသောသူနှင့် တူကြောင်းကို ရှန်ထျန်း ချက်ချင်း သတိထားမိသွားသည်။

အဘယ်ကြောင့်ဆိုသော မဟာဧကရီက သူ့ကို ရှုပ်ထွေးပွေလီ မီးစာကျမ်း လက်ဆင့်ကမ်းပေးခဲ့သောကြောင့် ဖြစ်သည်။

သို့သော် သူက မဟာဧကရီ၏ ကျင့်စဉ်အတိုင်း မကျင့်ကြံဘဲ ချက်ချင်း ရှုပ်ထွေးပွေလီ မီးစာကျမ်းကို ကျွမ်းကျင်သွားခဲ့သည်။

ရှန်ထျန်းက မျက်မှောင်ကြုတ်ထားရင်း မေးလိုက်သည်

“ ကျွန်တော်လည်း လူသားဧကရာဇ်ခန္ဓာကို ရနိုင်တာလား”

ဂူဗိမာန် စောင့်ရှောက်သူက ခေါင်းညိတ်ပြရင်း ပြောလိုက်သည်

“ မင်းက ကောင်းကင်ဝါးမျိုပညာရပ်ကို မကျင့်ကြံပဲနဲ့ ရှုပ်ထွေးပွေလီ မီးစာကျမ်းကို ချက်ချင်းနားလည်သွားခဲ့တာ။ မင်းက နယ်မြေငါးခုမှာ လူသားဧကရာဇ်ခန္ဓာရှိတဲ့ တတိယမြောက်လူပဲ”

ထိုအချက်ကြောင့် ဂူဗိမာန် စောင့်ရှောက်သူ စိတ်လှုပ်ရှားသွားသည်။ လူသားဧကရာဇ်ခန္ဓာ ရှိသော တတိယမြောက်လူကို ဤလောကတွင် ဒီနေ့ တွေ့မြင်ရလိမ့်မည်ဟု ထင်မထားခဲ့ပေ။

လူသားမျိုးနွယ်တွေရဲ့ ဂုဏ်သိက္ခာက ဒီလူငယ်လေးရဲ့ လက်ထဲမှာ ပြန်လည် တောက်ပလာတော့မှာလား

ရှန်ထျန်း ထိတ်လန့်သွားသည်။ သူ့ခန္ဓာကို အစက မကောင်းဘူးဟု ထင်ထားခဲ့သည်။

သူ့ ခန္ဓာက အထွတ်အထိပ် လူသားဧကရာဇ်ခန္ဓာ ရှိနေလိမ့်မယ်လို့ ဘယ်သူက ထင်ထားမှာလဲ

ရှန်ထျန်းသာ လူမသိ သူမသိလေးနေပြီးတော့ ကျင့်ကြံတာမျိုး မဟုတ်ဘူးဆိုရင် သူ သေသွားတာ ကြာလောက်ပြီ

ဂူဗိမာန် စောင့်ရှောက်သူက ရှန်ထျန်းကို စိုက်ကြည့်ကာ ပြောလိုက်သည်

“ ငါတို့ ရှုပ်ထွေးပွေလီ ပင်လယ်ရဲ့ အတွင်းပိုင်းကို သွားရအောင်။ မင်း အဲဒီကို ရောက်သွားရင် လူသားဧကရာဇ်ဟောင်းရဲ့ အမွေအနှစ်တွေကို ရနိုင်တယ်။”

ရှန်ထျန်းက ပုခုံးတွန့်ပြကာ ပြောလိုက်သည်

“ ဖြစ်နိုင်…”

ဂူဗိမာန် စောင့်ရှောက်သူက ခေါင်းညိတ်ပြကာ ပြောလိုက်သည်

“ ရှေးဟောင်းကောင်းကင်ခုံရုံးရဲ့ အပျက်အစီးတွေက ရှုပ်ထွေးပွေလီ ပင်လယ်ရဲ့ အတွင်းပိုင်းမှာရှိတယ်။

ဒါပေမဲ့ အဲဒီမှာ အန္တရာယ်တွေလည်း အများကြီးရှိတယ်။

အဲဒီတုန်းက ပြင်ပနယ်မြေက မိစ္ဆာဝိညာဉ်တွေက လူသားနတ်ဧကရာဇ်ရဲ့ ခန္ဓာကိုယ် ထပ်ပြီးတော့ ပေါ်လာမှာကို စိုးရိမ်ခဲ့ကြတယ်။ သူတို့က ရှေးဟောင်း ကောင်းကင်ခုံရုံးနဲ့ လူသားဧကရာဇ်ခန္ဓာရှိတဲ့သူတွေကို ကျိန်စာတိုက်ဖို့အတွက် မိစ္ဆာဝိညာဉ် ထာဝရဘုရင်တွေရဲ့ အဆီအနှစ်ကို အသုံးပြုဖို့အတွက် မတွေဝေခဲ့ဘူး။

အဲဒါကြောင့် နောက်မျိုးဆက်တွေ ကောင်းကင်ခုံရုံးကို ပြန်ပြီးတော့ ခေါ်ဆောင်ချင်တာတောင် အခက်အခဲတွေ အမျိုးမျိုးနဲ့ ရင်ဆိုင်ရလိမ့်မယ်”

ဂူဗိမာန်စောင့်ရှောက်သူက အရမ်းနောင်တရနေသည့်ပုံစံဖြင့် သက်ပြင်းချလိုက်သည်။

အဲလောက်ထိ စွမ်းအားကြီးတဲ့ အင်အားစုက ပင်လယ်ထဲမှာ မြှုပ်နှံခံလိုက်ရတယ်တဲ့။ ဘယ်လောက်တောင် ဆိုးရွားလိုက်သလဲ

ရှန်ထျန်းက အရိုအသေပေးကာ ပြောလိုက်သည်

“ ကျွန်တော်ကို ပြောပြတဲ့အတွက် ကျေးဇူးတင်ပါတယ်”

သူ ရှေးဟောင်း ကောင်းကင်ခုံရုံး ပျက်စီးနေတဲ့ နေရာကို သွားရမယ်။ အဲဒီမှာ သူ့ ခွန်အားကို တိုးတက်စေနိုင်တဲ့ ဒုတိယမျိုးဆက် လူသားဧကရာဇ်ရဲ့ အမွေအနှစ်တွေ ရှိနေတယ်။

တစ်ချိန်တည်းမှာပဲ ရှန်ထျန်းက အခြေအနေကို နားလည်ချင်နေသည်။

ဒုတိယ လူသားဧကရာဇ်က သူ့ရဲ့ အခြေအနေကောင်းမှာ ဘာလို့ ပျောက်ကွယ်သွားရတာလဲ

အထဲမှာ ဘယ်လိုလျှို့ဝှက်ချက်တွေများ ရှိနေတာလဲ

ကျူးကောစစ်မာ နိုးမလာသေးသည့်အတွက် ရှန်ထျန်း စောင့်မနေတော့ပေ။ ယခု အချိန်က အရေးကြီးနေသည့်အတွက် စက္ကန့်တိုင်းကို သူ့ ခွန်အားတိုးတက်ဖို့အတွက် အသုံးချရမည်။

ထို့အပြင် ကျူးကောစစ်မာက သူ ရသင့်သော အခွင့်အရေးကို ရသွားပြီဖြစ်သည့်အတွက် ရှန်ထျန်း ဆက်ပြီး စောင့်နေဖို့ မလိုတော့ပေ။

ရှန်ထျန်းက ဂူဗိမာန်စောင့်ရှောက်သူကို နှုတ်ဆက်ပြီး ထွက်ခွာသွားသည်။

ရှန်ထျန်း လေးနက်သော မျက်နှာထားဖြင့် ထွက်သွားသည်ကို ဂူဗိမာန် စောင့်ရှောက်သူက ကြည့်ကာ ပြောလိုက်သည်

“ သူသာ အရွယ်ရောက်ရင် ဒီနယ်မြေကို ဦးဆောင်ပြီးတော့ ပြင်ပနယ်မြေမှာရှိတဲ့ မိစ္ဆာဝိညာဉ်တွေကို တိုက်ခိုက်ဖို့အတွက် သူ ဦးဆောင်နိုင်လိမ့်မယ်”

ရှန်ထျန်း နဂါးချပ်ဝတ် ကောင်းကင်နန်းတော်မှ ထွက်လာပြီးနောက် အပျက်အစီးများထဲသို့ ချက်ချင်း အလျင်စလို ပြေးဝင်သွားခြင်းမရှိဘဲ သွေးနတ်ဘုရားသားတော်ကို ဖန်တီးကာ အံ့ဖွယ်မိုးကောင်းကင် အထွတ်အမြတ်မြေကို ပို့ပြီး အခြေအနေကို ထိန်းခိုင်းလိုက်သည်။

ဒါက ရှေးဟောင်း ကောင်းကင်ခုံရုံးရဲ့ အပျက်အစီးတွေဖြစ်တဲ့အတွက် ဘာတွေရှိနေမယ်ဆိုတာ မသိနိုင်ဘူး

ရှန်ထျန်း ဘာတွေကြုံတွေ့ရမည်ဆိုတာကို မသိနိုင်ပေ။

သူက ကျူးကောစစ်မာ အခွင့်အရေးရအောင် ကူညီခဲ့ပြီးပြီဖြစ်သည့်အတွက် ရှန်ထျန်းက အပြန်အလှန်အနေဖြင့် ကံကြမ္မာတချို့ လက်ခံရရှိခဲ့သည်။ ခရမ်းရောင် ရောင်ဝါစက်ဝန်းက ခရမ်းရွှေရောင်ဖြစ်သွားသည့်အတွက် အန္တရာယ်ရှိသောနေရာသို့သွားလျှင် သတိထားတာက အပို မဟုတ်ပေ။

အထွတ်အထိပ် ကောင်းကင်သစ်ပင်ကမ္ဘာထဲတွင် ဟွမ်ထျန်းစစ်တုရင်ခုံကိစ္စမှ ရှန်ထျန်း သင်ခန်းစာတစ်ခု ရခဲ့ပြီဖြစ်သည်။

နောက်ထပ် နှစ်ပေါင်းအများကြီးကြာပြီးမှ ပြန်လာတာမျိုး မဖြစ်ချင်ဘူး

အဲဒီအချိန်အတွင်း နယ်မြေငါးခု တစ်ခုခုဖြစ်ရင် သူ နောင်တရနေရလိမ့်မယ်