တုန်ယန်မိသားစု၏ ကံကြမ္မာ....

Vol. 55 Ch. 802

လင်းယွမ်က လမ်းညွှန်မှုတစ်ခုမှ ရရှိခဲ့ခြင်းမရှိပေ။ သူက အရှင်ချင်းဖန်၏ တပည့်ဖြစ်လာပြီး လမ်းညွှန်မှုများကိုသာ ရရှိခဲ့လျှင် အသက်ငါးရာမပြည့်မီ သူစုစည်းမည့် လီယန်မျိုးစေ့အရေအတွက်က အဆများစွာ တိုးတက်သွားပေလိမ့်မည်။

" အဆင်သင့်ဖြစ်ပြီလား။ " အရှင်ချင်းဖန်က နူးညံ့စွာ ပြောလိုက်သည်။

အခြားသူများနှင့် ဆက်ဆံရာတွင် အရှင်ချင်းဖန်က သူ၏ တပည့်များနှင့်ပင် အလွန်တည်ကြည်ခဲ့သည်။ သို့သော် လင်းယွမ်ကို ထိုအေးစက်သော ပုံစံနှင့် ဆက်ဆံ၍မဖြစ်ပေ။

" ကျွန်တော်အဆင်သင့်ဖြစ်ပါပြီ။ " လင်းယွမ်က ခေါင်းညိမ့်လိုက်သည်။

ယုမိသားစုဝင်များကလည်း စိတ်လှုပ်ရှားနေကြသည်။

ထိုအချိန်တွင် ယုကျူးနှင့် ချင်းတမန်တော်နှစ်ယောက်တို့က လျင်မြန်စွာ ရောက်လာကြသည်။

" အရှင်..." ယုကျူးက အရှင်ချင်းဖန်ကို အရိုအသေပေးပြီး အသံတိုးတိုးဖြင့် ပြောလိုက်သည်။ " တုန်ယန်မိသားစုက ယုရန်ကို လုပ်ကြံသတ်ဖြတ်ဖို့ ကြိုးစားခဲ့တယ်လို့ ကျွန်တော်တို့ သိရပါတယ်။ "

သူ၏ စကားမဆုံးမီ ယုကျူးက သူ၏ လက်ကိုလှန်လိုက်ရာ ပုံရိပ်များစွာ ချက်ချင်း ပေါ်လာသည်။ သူတို့မှာ တုန်ယန်မိသားစု၏ ဘိုးဘေးများ၊ ခေါင်းဆောင်နှင့် အခြားအဆင့်မြင့် အဖွဲ့ဝင်များဖြစ်ကြသည်။ သူတို့ထဲတွင် ပါရမီရှင် တုန်ယန်မန်လည်း ပါဝင်နေသည်။

ထိုအချိန်တွင် တုန်ယန်မိသားစုဝင်များက မြေပြင်တွင် ဝပ်နေကြပြီး ဘာဖြစ်ခဲ့သည်ကို နားမလည်နိုင်ဘဲ လုံးဝထိတ်လန့်နေခဲ့ကြသည်။

တုန်ယန်မိသားစုဝင်များက အစက ချင်းတမန်တော်များ ပြန်ရောက်လာမည်ကို စောင့်ဆိုင်းနေခဲ့ကြသည်။ ထိုအချိန်တွင် ရုတ်တရက် အရာအားလုံး မှောင်မိုက်သွားပြီး ဤနေရာသို့ ရောက်လာခဲ့ကြခြင်းဖြစ်သည်။

တုန်ယန်မိသားစု၏ ဘိုးဘေးများက အခြေအနေကို အနည်းငယ် ခန့်မှန်းမိကြသည်။ သူတို့က ချင်းတမန်တော်သုံးယောက်နောက်သို့ လိုက်လာခဲ့ရာ ယုမိသားစုတည်ရှိရာသို့ ရောက်ရှိချိန်တွင် အရှင်ချင်းဖန်ကိုယ်တိုင်က ယုမိသားစုထံသို့ ဆင်းသက်လာသည်ကို မြင်တွေ့ခဲ့ရသည်။

ကံမကောင်းစွာဖြင့် တုန်ယန်မိသားစု၏ ဘိုးဘေးများက မည်သည့်လှုပ်ရှားမှုမှ မပြုလုပ်နိုင်မီ ယုကျူး၏ ဖမ်းဆီးခြင်းကို ခံခဲ့ရသည်။

" ယုရန်ကို လုပ်ကြံသတ်ဖြတ်ဖို့ ကြိုးစားခဲ့တယ်။ " အရှင်ချင်းဖန်က မျက်မှောင်ကြုတ်သွားသည်။ အပြာရောင်မီးတောက်များက အချိန်လေဟာနယ်ကို ထိုးဖောက်သွားပြီး ထိုနေရာရှိ တုန်ယန်မိသားစုဝင်များက အရှင်လတ်လတ် ငရဲသို့ ရောက်ရှိစေခဲ့သည်။

" အရှင် ကျွန်တော်တို့မှားပါတယ်။ "

" ကျေးဇူးပြုပြီး အသက်ချမ်းသာပေးပါ။ "

တုန်ယန်မိသားစု၏ ဘိုးဘေးများက အလွန်ထိတ်လန့်သွားကြပြီး ယခုအချိန်ထိ အကြောင်းရင်းကို နားမလည်ကြသေးပေ။ သို့သော် ၎င်းက ယုရန်နှင့် ပက်သက်နေသည်မှာ သေချာသည်။ မဟုတ်လျှင် ယုကျူးက သူတို့ကို ယုရန်အား လုပ်ကြံသတ်ဖြတ်ရန် ကြိုးစားသောကြောင့် ဖမ်းဆီးခဲ့သည်ဟု ပြောမည်မဟုတ်ပေ။

" အရှင် ချမ်းသာပေးပါ။ "

" အရှင် ကျွန်တော်တို့ မှားပါတယ်။ " တုန်ယန်မိသားစုဝင်များစွာကလည်း ကြောက်လန့်စွာဖြင့် တောင်းပန်လိုက်ကြသည်။

" အရှင် ကျွန်တော်တို့ တုန်ယန်မန်က လီယန်မျိုးစေ့ ဆယ်ခုပါရမီရှင်တစ်ယောက်ဖြစ်ပြီး ချင်းတမန်တော်သုံးယောက်ကလည်း အဲ့ဒါကို အတည်ပြုပြီးပါပြီ။ တကယ်လို့ ကျွန်တော်တို့အသက်ကို ချမ်းသာပေးရင် တုန်ယန်မန်က အရှင်ကို အသက်စွန့်ပြီး သစ္စာခံပါလိမ့်မယ်။ " တုန်ယန်မိသားစု၏ ခေါင်းဆောင်ဘိုးဘေးက တုန်ယီစွာ ပြောလိုက်သည်။

တုန်ယန်မန်က အရှင်ချင်းဖန်၏ တပည့်တစ်ယောက် ဖြစ်မလာသေးသော်လည်း ချင်းတမန်တော်များက သူမကို လီယန်မျိုးစေ့ဆယ်ခုပါရမီရှင်အဖြစ် အတည်ပြုထားပြီးဖြစ်သည်။

" အရှင်ချင်းဖန်..." တုန်ယန်မန်က လူအုပ်အလယ်တွင် ဒူးထောင်နေပြီး အရှင်ချင်းဖန်ကို စိုက်ကြည့်ကာ အခြေအနေကို နားမလည်နိုင်သေးပေ။

မကြာသေးမီကပင် သူမက ပါရမီရှင်တစ်ယောက်အဖြစ် ချင်းတမန်တော် သုံးယောက်၏ ဦးစားပေးခြင်းကို ခံခဲ့ရသည်။ သို့သော် ယခုမူ သူမက ယုမိသားစုနှင့် ယုရန်၏ ရှေ့တွင် ဒူးထောက်နေရပြီဖြစ်သည်။ ထိုကဲ့သို့ ကြီးမားသော ပြောင်းလဲမှုက တုန်ယန်မန်၏ စိတ်ကို စဉ်းစားရနိုင် ဖြစ်စေခဲ့သည်။

အရှင်ချင်းဖန်က ထိတ်လန့်နေသော တုန်ယန်မိသားစုဝင်များကို လျစ်လျူရှုပြီး လင်းယွမ်ဘက်သို့ လှည့်ကာ မေးလိုက်သည်။ " ယုရန် မင်းဘယ်လိုဆက်လုပ်ချင်လဲ။ "

ထိုစကားများ၏ အဓိပ္ပါယ်မှာ တုန်ယန်မိသားစုဝင်များ၏ ကံကြမ္မာကို လင်းယွမ်၏ လက်ထဲသို့ လွှဲပြောင်းပေးလိုက်ခြင်းဖြစ်သည်။

" ယုရန်..." တုန်ယန်မိသားစု၏ ခေါင်းဆောင်ဘိုးဘေးက လင်းယွမ်ဘက်သို့ လှည့်လိုက်ပြန်သည်။ " ငါတို့ကို ငဲ့ညှာပေးပါ။ တကယ်လို့ ငါတို့ကို ခွင့်လွှတ်ပေးမယ်ဆိုရင် တုန်ယန်မိသားစုက ယုမိသားစုကို အစေခံပါမယ်။ "

ယုမိသားစုဝင်များကလည်း တံတွေးများ မျိုချလိုက်ကြသည်။ လင်းယွမ်က အရှင်ချင်းဖန်၏ တပည့်ဖြစ်လာလျှင် အဆုံးမဲ့အလားအလာများကို ပိုင်ဆိုင်ထားပြီး တုန်ယန်မိသားစုက သူတို့နှင့် တန်းတူရပ်တည်နိုင်ရန် အခွင့်အရေး လုံးဝမရှိတော့ပေ။

လင်းယွမ်က ဘာမှမလုပ်ရသေးဘဲ ချင်းတမန်တော်သုံးယောက်က တုန်ယန်မိသားစုဝင်အားလုံးကို ဖမ်းဆီးပြီး အရှင်ချင်းဖန်ကို ထိုအကြောင်းထုတ်ပြောခဲ့သည်။

" မင်းတို့အားလုံးကို ချမ်းသာပေးရမှာလား။ " လင်းယွမ်က တုန်ယန်မိသားစုဝင်များကို တစ်ချက် ကြည့်ပြီး တုန်ယန်မန်ကို အေးစက်စွာ ကြည့်လိုက်သည်။ ဤအချိန်တွင် တုန်ယန်မန်က မျက်လုံးများနီရဲနေပြီး လင်းယွမ်ကို တောင်းပန်နေခဲ့သည်။

" နောက်ကျသွားပြီ။ " လင်းယွမ်က ခေါင်းခါလိုက်သည်။

ယုမိသားစုနှင့် တုန်ယန်မိသားစုတို့က မပြေလည်နိုင်သော ရန်ငြိုးများ ရှိနေခဲ့ပြီး တုန်ယန်မိသားစုက သူ့ကို လုပ်ကြံသတ်ဖြတ်ရန်ပင် ကြိုးစားခဲ့သည်။ ထိုသို့သော ရန်ငြိုးများနှင့် လင်းယွမ်က သူတို့ကို ချမ်းသာပေးရန် ရည်ရွယ်ချက်မရှိပေ။

အကယ်၍ သူက ယခင်ယုရန်သာဖြစ်လျှင် တုန်ယန်မန်ကို လွှတ်ပေးနိုင်ပြီး တုန်ယန်မိသားစုတစ်ခုလုံးကိုပင် ချမ်းသာပေးနိုင်သည်။ သို့သော် လင်းယွမ်က ယုရန်မဟုတ်ပေ။ အရှင်ချင်းဖန်မရှိလျှင်တောင် လင်းယွမ်က ဆယ်စုနှစ် သို့မဟုတ် ရာစုနှစ်အနည်းငယ်အတွင်း သူ၏ ခွန်အားကို ပြန်လည်ရရှိခဲ့လျှင် တုန်ယန်မိသားစုတစ်ခုလုံးကို ရှင်းလင်းပစ်မည်ဖြစ်သည်။

" အရှင်ပဲ ဆုံးဖြတ်လိုက်ပါ။ " လင်းယွမ်က ပြောလိုက်သည်။

" ကောင်းပြီ။ " အရှင်ချင်းဖန်က ခေါင်းညိမ့်လိုက်သည်။

အကယ်၍ လင်းယွမ်က တုန်ယန်မိသားစုကို ချမ်းသာပေးလိုလျှင် သူတို့ကို သနားညှာတာပေးရန် တိုက်ရိုက်ပြောမည်ဖြစ်သည်။ တုန်ယန်မိသားစုဝင်များ၏ ရှေ့တွင် ထိုသို့ပြုလုပ်ခြင်းက သူ၏ ကြီးမားသော ဂုဏ်သတင်းကို တည်ဆောက်နိုင်ပေလိမ့်မည်။

သို့သော် လင်းယွမ်က ထိုသို့မလုပ်ဘဲ ဆုံးဖြတ်ချက်ကို အရှင်ချင်းဖန်ထံ ပြန်လည်လွှဲပြောင်းပေးခဲ့သည်။ ၎င်းက တုန်ယန်မိသားစုတစ်ခုလုံး၏ ကံကြမ္မာကို ဆုံးဖြတ်ပေးလိုက်ခြင်းဖြစ်သည်။

" တုန်ယန်မိသားစု..." အရှင်ချင်းဖန်က တုန်ယန်မိသားစုဝင်များကို ကြည့်ပြီး အပြာရောင်မီးတောက်များက အချိန်နှင့်လေဟာနယ်ကို ထိုးဖောက်လောင်ကျွမ်းသွားခဲ့သည်။

လေထုထဲတွင် ခြောက်ချားဖွယ်ရာအော်သံများဖြင့် ပြည့်နှက်နေသည်။ တုန်ယန်မိသားစု၏ တာအိုရှာဖွေခြင်းအဆင့် ဘိုးဘေးများက အသက်ကယ်နည်းလမ်းများစွာ ရှိပြီး မူလခန္ဓာကိုယ် ဖျက်ဆီးခံရလျှင်တောင် သူတို့က ပြန်လည်ရှင်သန်နိုင်ကြသည်။

သို့သော် အရှင်ချင်းဖန်က သူတို့ကို ထိုအခွင့်အရေး မပေးပေ။ အပြာရောင်မီးတောက်များက ကြောင်းကျိုးဆက်နွယ်မှုများမှတစ်ဆင့် ပျံ့နှံ့သွားပြီး တုန်ယန်မိသားစုဝင်များနှင့် ပက်သက်သည့် မည်သည့်အရာမဆို လောင်ကျွမ်းသွားခဲ့သည်။

အသက်ရှူချိန်အနည်းငယ် ကြာသောအခါ အပြာရောင်မီးတောက်များက ငြိမ်သက်သွားခဲ့သည်။

" ချင်းဖန်နယ်မြေအတွင်းမှာ တုန်ယန်မိသားစုဆိုတာ မရှိတော့ဘူး။ " အရှင်ချင်းဖန်က ပြောလိုက်သည်။

" ကျေးဇူးတင်ပါတယ်။ " လင်းယွမ်က ပြောလိုက်သည်။

" ကိစ္စမရှိဘူး။ " အရှင်ချင်းဖန်က လက်ဝှေ့ရမ်းလိုက်သည်။ " ငါနဲ့လိုက်ခဲ့။ မင်းရဲ့ အရည်အချင်းနဲ့ ပါရမီက ဒီမှာနေဖို့ မသင့်တော်ဘူး။ "

" နားလည်ပါပြီ။ " လင်းယွမ်က ခေါင်းညိမ့်လိုက်သည်။

အရှင်ချင်းဖန်က အနည်းငယ် လှုပ်ရှားလိုက်ပြီးနောက် သူနှင့် လင်းယွမ်တို့က နေရာမှ ပျောက်ကွယ်သွားခဲ့သည်။

" အရှင်ချင်းဖန် ထွက်သွားပြီ။ " ချင်းတမန်တော်များက နေရာတွင် ရပ်ပြီး သက်ပြင်းချလိုက်ကြသည်။

" ငါတို့လည်း ပြန်ကြစို့။ " ယုကျူးက သူ့ကိုသူထိန်းချုပ်ပြီး အခြားနှစ်ယောက်ကို ပြောလိုက်သည်။ " ချင်းဖန်နယ်မြေရဲ့ အနာဂတ်ကို ငါတို့စီနီယာအကိုကြီး ဆုံးဖြတ်ရမှာ မဟုတ်လောက်တော့ဘူး။ "

ပင်မစကြာဝဠာ၊ ရွှမ်ဟွမ်လျို့ဝှက်နယ်မြေတွင် လင်းယွမ်က ခြေချိတ်ထိုင်နေသည်။ သူ၏ အတွင်းစကြာဝဠာက အလင်းနှစ် ၁၂သန်းသို့ ရောက်ရှိသွားသည်။

" အချိန်ကျပြီ။ " အနီရောင်ဝတ်စုံနှင့် မိန်းကလေး၏ အမူအရာက လေးနက်နေပြီး အတွင်းစကြာဝဠာကို လေ့လာနေသည်။

ထိုအတွင်းစကြာဝဠာက ပင်မစကြာဝဠာထက် အရွယ်အစားသေးငယ်သော်လည်း ၎င်း၏ အချိန်လေဟာနယ် တည်ငြိမ်မှုနှင့်နိယာမများ ချောမွေ့စွာ လည်ပတ်မှုတို့ကပင်မစကြာဝဠာကို ကျော်လွန်သွားပြီဖြစ်သည်။

လင်းယွမ်၏ ပုံရိပ်က ပေါ်လာသည်။ လွန်ခဲ့သော ခဏလေးကပင် သူက ရုန်းများကို သူ၏ အတွင်းစကြာဝဠာထဲသို့ ပြည့်စုံစွာ ပေါင်းစပ်နိုင်ခဲ့သည်။

" ငါ့ရဲ့အတွင်းစကြာဝဠာက.... " လင်းယွမ်က အတွင်းစကြာဝဠာမှ စွမ်းအားစီးဆင်းမှုများကို သတိထားပြီး အာရုံခံနေသည်။

အတွင်းစကြာဝဠာ၏ ဖန်တီးသူတစ်ယောက်အနေဖြင့် လင်းယွမ်က ၎င်း၏ ကြောက်စရာကောင်းသော စွမ်းအားကို ရှင်းလင်းစွာ ခံစားနိုင်သည်။ ထိုစွမ်းအားကို သာမန်လွှမ်းမိုးခြင်းအဆင့်တစ်ယောက်က ခုခံနိုင်စွမ်းမရှိဘဲ အနည်းငယ် တုန့်ဆိုင်းသည်နှင့် ပျက်ဆီးခြင်းသို့ ဦးတည်သွားရပေလိမ့်မည်။

" ဒါဆို ဒါက ဖရိုဖရဲအရှင်သခင်တစ်ပါးရဲ့ အတွင်းစကြာဝဠာနဲ့ နီးစပ်သွားတာလား။ " လင်းယွမ်က အလွန်ကျေနပ်နေသည်။

လမ်းစဉ်ခွဲထွက်ခြင်းအဆင့်နှင့် ထိုကဲ့သို့ အတွင်းစကြာဝဠာတစ်ခုကို ပိုင်ဆိုင်ခြင်းမှာ လင်းယွမ်က လွှမ်းမိုးခြင်းအဆင့်များကိုပင် သတ်ဖြတ်နိုင်ပေလိမ့်မည်။ ကုမင်ဖရိုဖရဲကုန်းမြေမှ ဖရိုဖရဲနဂါးသားရဲကဲ့သို့ ထူးခြားသည့် သက်ရှိအချို့မှလွဲ၍ လွှမ်းမိုးခြင်းအဆင့်တွင် လင်းယွမ်က ပြိုင်ဘက်ကင်းလေသည်။

" ငါမျှော်လင့်ထားတာထက် ပိုပြီးအားကောင်းနေတာပဲ။ " အနီရောင်ဝတ်စုံနှင့် မိန်းကလေးက စိတ်ထဲမှ တွေးလိုက်သည်။

လင်းယွမ်က ရုန်းများအတွင်းမှာ စကြာဝဠာဖွဲ့စည်းပုံများကို သူ၏ အတွင်းစကြာဝဠာနှင့် ပေါင်းစည်းခဲ့သည်။ နောက်ဆုံးတွင် လင်းယွမ်က ပြည့်စုံစွာ ပေါင်းစည်းနိုင်ခဲ့ပြီး သူမက အပြစ်တစ်ခုမှ ရှာမတွေ့နိုင်လောက်အောင် ဖြစ်ခဲ့သည်။