ရွှေဒင်္ဂါး ကုဋေ နှစ်ထောင်တည်းလား

~'ထျန်းယွဲ့' ဂိုဏ်း... ပင်မ ခန်းမဆောင်။

'ထျန်းယွဲ့' ဂိုဏ်းချုပ်ကြီး၏ မျက်နှာထားမှာ လေးနက်နေပြီး၊ ပင်မ ခန်းမဆောင်ကြီး တစ်ခုလုံးတွင် ကြောက်မက်ဖွယ် အေးစက်သော အငွေ့အသက်များ လွှမ်းခြုံနေသည်။ ဝင်ရောက်လာသူတိုင်း ရေခဲတိုက်ထဲသို့ ကျရောက်သွားသကဲ့သို့ ခံစားရစေသည်။

အကြီးအကဲ 'ရန်' ၏ ဒဏ်ရာများမှာ အလွန်တရာ ပြင်းထန်လှပြီး၊ အထူးသဖြင့် သူ၏ ဝိညာဉ် ခန္ဓာကိုယ်မှာ အကြီးအကျယ် ထိခိုက်ပျက်စီးသွားခဲ့သည်။ ဘယ်အချိန်မှ အပြည့်အဝ ပြန်လည် သက်သာလာမည် ဆိုသည်ကို အာမခံချက် မပေးနိုင်ပေ။

တစ်ချိန်တည်းမှာပင် ဖုန်းဝူချန်၏ နောက်ခံကို စုံစမ်းရန် လူလွှတ်ထားသော်လည်း၊ ဘာသတင်းမှ မရရှိခဲ့ပေ။

'ကောင်းကင်ဘုံ' နယ်မြေ တစ်ခုလုံးတွင် ဖုန်းဝူချန် မည်သူဖြစ်သည်ကို မည်သူမျှ မသိရှိကြသလို၊ အရှေ့ပိုင်းရှိ အဖွဲ့အစည်း မျိုးစုံကလည်း မသိရှိကြပေ။

“ဖုန်းဝူချန်က 'ကောင်းကင်ဘုံ' နယ်မြေက မဟုတ်တာ သေချာတယ်။ 'ကောင်းကင်ဘုံ' နယ်မြေမှာ သူ့ရဲ့ ဇာစ်မြစ်ကို စုံစမ်းဖို့ ဆိုတာ မဖြစ်နိုင်ဘူး" ဒုတိယ အကြီးအကဲက ခေါင်းခါလိုက်သည်။ သူ၏ မျက်နှာအိုကြီးမှာ လေးနက်ပြီး မည်းမှောင်နေ၏။

တတိယ အကြီးအကဲက ခန့်မှန်း ပြောဆိုသည်။ “ဒီလူက ငယ်ရွယ်ပေမယ့် ဒီလောက် နက်ရှိုင်းတဲ့ ဆေးပညာ အဆင့်ကို ပိုင်ဆိုင်ထားတယ် ဆိုတော့... တခြား နယ်မြေက အင်အားကြီး အဖွဲ့အစည်းတစ်ခုရဲ့ တပည့် ဖြစ်နိုင်တယ်"

“'ပိုင်မိ' သိလောက်တယ်။ မဟုတ်ရင် သူက ဖုန်းဝူချန်ကို 'ဆေးဧကရာဇ်' လို့ ခေါ်မှာ မဟုတ်ဘူး။ ပြီးတော့ ဖုန်းဝူချန်ရဲ့ လူတွေထဲမှာ ကျွန်တော်နဲ့ ရင်းနှီးနေတဲ့ လူတစ်ယောက် ပါနေသလို ခံစားရတယ်။ လွန်ခဲ့တဲ့ နှစ်အနည်းငယ်က 'ပိုင်မိ' ကို စိန်ခေါ်ခဲ့တဲ့ 'ပေတိုယန်' များလားလို့... တကယ်လို့ သူသာ ဆိုရင်... ဖုန်းဝူချန်တို့ အဖွဲ့က 'ကျိုကျိုး ကိုးပြည်ထောင်' က လာတာ ဖြစ်ရမယ်" 'ဖန်ရှောင်ယွင်' က မရေရာသော်လည်း ခန့်မှန်း ပြောဆိုလိုက်သည်။

“'ကျိုကျိုး ကိုးပြည်ထောင်' က 'ပေတို' မိသားစုလား" 'ထျန်းယွဲ့' ဂိုဏ်းချုပ်ကြီး အနည်းငယ် အံ့အားသင့်သွားပြီး မေးလိုက်သည်။ “'ယွင်' လေး... မင်း သေချာလို့လား"

“ကျွန်တော်လည်း မသေချာပါဘူး။ ဒါပေမဲ့ အဲ့ဒီလူက 'ပေတိုယန်' နဲ့ တော်တော် တူတယ်။ မတွေ့တာ နှစ်အနည်းငယ် ကြာသွားလို့ ပြောင်းလဲသွားတာပဲ ရှိမယ်" 'ဖန်ရှောင်ယွင်' မတ်တပ်ရပ်လိုက်ပြီး ဆက်ပြောသည်။ “အဖေ... ကျွန်တော် 'ပိုင်' မိသားစုဆီ တစ်ခေါက်လောက် သွားလိုက်ဦးမယ်။ 'ပိုင်မိ' သိလောက်တယ်"

“အင်း... သုံးလ ကြာရင် သူ့ကို သတ်ပစ်လို့ ရပြီ" 'ထျန်းယွဲ့' ဂိုဏ်းချုပ်ကြီးက ခေါင်းညိတ်လိုက်သည်။

'ဖန်ရှောင်ယွင်' ကလည်း မထီမဲ့မြင် ပြုသော လေသံဖြင့် ကြုံးဝါးလိုက်သည်။

“သူတို့သာ 'ကျိုကျိုး ကိုးပြည်ထောင်' က လာတာ ဆိုရင်... ကျွန်တော် ဖုန်းဝူချန်ကို သေချာပေါက် သတ်ပစ်မယ်။ သူ့ဆီမှာ မဟာအကြီးအကဲ လိုချင်နေတဲ့ ရတနာတွေ ပါရင် ပါလာနိုင်တယ်"

“ဆေးပညာကျမ်းလား…”

'ထျန်းယွဲ့' ဂိုဏ်းချုပ်ကြီး၏ မျက်နှာကြွက်သားများ လှုပ်ခတ်သွားပြီး၊ သူ၏ မျက်လုံးများထဲတွင် လောဘ အရိပ်အယောင် တစ်ခု ဖြတ်သန်းသွားလေသည်။

...

'ကောင်းကင်မီး တောင်ပေါ် စံအိမ်' တွင် 'ယီယွင်' သည် ဖုန်းဝူချန်နှင့် သူ၏ အဖွဲ့သားများကို နေရာချထားပေးပြီး ဖြစ်သည်။

ဖုန်းဝူချန်က 'ယီထျန်းချင်း' ကို တစ်လ အတွင်း 'ကောင်းကင်ဘုံ လူသား' ဘုံ ဒုတိယအလွှာသို့ အဆင့်တက်အောင် ကူညီပေးမည်ဟု ကြေညာထားသဖြင့်၊ သူသည် 'ကောင်းကင်မီး တောင်ပေါ် စံအိမ်' တွင် နေထိုင်ရမည်မှာ သဘာဝပင်။

သို့သော် 'ယီယွင်' နှင့် အခြားသူများကို ရှုပ်ထွေးစေသည့် အချက်မှာ ဖုန်းဝူချန်သည် 'ယီထျန်းချင်း' ၏ ကျင့်ကြံမှုကို မြှင့်တင်ပေးရန် မည်သည့် အရိပ်အယောင်မျှ မပြသခြင်းပင် ဖြစ်သည်။ ထိုအစား သူသည် ကိုယ်တိုင် တံခါးပိတ် ကျင့်ကြံရန် ပြင်ဆင်နေလေသည်။

တံခါးပိတ် မကျင့်ကြံမီ ဖုန်းဝူချန်သည် 'ယီယွင်' နှင့် အခြားသူများကို ကောင်းကင်နှင့်မြေကြီးမှ ရတနာ အမြောက်အမြား ပြင်ဆင်ပေးရန် ညွှန်ကြားခဲ့သည်။

ထိုရတနာများသည် 'ယီထျန်းချင်း' ၏ ကျင့်ကြံမှုအတွက်လား... သို့မဟုတ် ဖုန်းဝူချန် ကိုယ်တိုင် အသုံးပြုရန်အတွက်လား...

ထို့ကြောင့် လျိုချင်းယန်နှင့် နန်းကုန်းကျန့်တို့သည် 'ကောင်းကင်မီး တောင်ပေါ် စံအိမ်' မှ အစောင့်အရှောက်များကို ဦးဆောင်၍ အလယ်ပိုင်း လေလံပွဲရုံသို့ ကိုယ်တိုင် သွားရောက်ကာ ကောင်းကင်နှင့်မြေကြီးမှ ရတနာ အမြောက်အမြားကို ဝယ်ယူခဲ့ကြသည်။

'ယီထျန်းချင်း' မှာ လုံးဝ ရှုပ်ထွေးနေပြီး၊ မေးရမလား၊ တိတ်တိတ်နေရမလား ဝေခွဲမရ ဖြစ်နေသည်။ ဖုန်းဝူချန်ကို ယုံကြည်ရ ခက်ခဲသည်ဟု ခံစားလာရပြီး၊ ဖုန်းဝူချန်သည် တကယ်တမ်း ဆေးဧကရာဇ် ဟုတ်မဟုတ်၊ သို့မဟုတ် 'ယီယွင်' နှင့် 'ဟွမ်ရွှမ်း' တို့ကို လှည့်စားရန် လှည့်ကွက် တစ်ခုခု သုံးနေခြင်း ဟုတ်မဟုတ်ပင် သံသယ ဝင်လာမိသည်။

သို့သော် 'ယီယွင်' နှင့် အခြားသူများ မေးမြန်းရန် မဝံ့ရဲသလို၊ 'ယီထျန်းချင်း' လည်း မမေးရဲပေ။ အရာအားလုံးကို တစ်လ ပြည့်မှသာ သိရပေလိမ့်မည်။

'ကိုးထပ် ချန်ခွင်း မျှော်စင်' ၏ သတ္တမထပ် နေရာလပ် အတွင်းတွင် ဖုန်းဝူချန်သည် 'ချီရှင်း ယွမ်ရှန်' ဆေးလုံးကို ဖော်စပ်နေသည်။

သုံးလ အကြာတွင် ဖုန်းဝူချန်နှင့် 'ဖန်ရှောင်ယွင်' တို့၏ တိုက်ပွဲကြီး ကျင်းပမည် ဖြစ်သည်။ ဖုန်းဝူချန်၏ လက်ရှိ အင်အားဖြင့် 'ဖန်ရှောင်ယွင်' ကို ယှဉ်ပြိုင်နိုင်စွမ်း မရှိပေ။

ထို့ကြောင့် ဖုန်းဝူချန်သည်လည်း အချိန်ကို အသုံးပြု၍ ပြင်းပြင်းထန်ထန် ကျင့်ကြံရမည် ဖြစ်သည်။

သူ၏ လက်ဖဝါးထဲတွင် 'ချီရှင်း ယွမ်ရှန်' ဆေးလုံး တစ်လုံး ဖော်စပ်ပြီးစီးသွားသည်။

ဖုန်းဝူချန်သည် အချိန်ကုန်သက်သာစေရန် 'စိတ်ဝိညာဉ် ခွဲဖြာခြင်း ပညာရပ်' ကို အသုံးပြု၍ ကျင့်ကြံရန် စီစဉ်ထားသည်။

“လဝက်လောက် ဆိုရင်... 'ထျန်းယွမ်' ဘုံ ဆဌမအလွှာကို ရောက်ဖို့ လုံလောက်ပြီ...”

ဖုန်းဝူချန် ရေရွတ်လိုက်ပြီး၊ သူ၏ နှုတ်ခမ်းများပေါ်တွင် အပြုံးဖျော့ဖျော့လေး တစ်ခု ပေါ်လာသည်။

“ငါ့ သွေးကြောထဲက လျှို့ဝှက်ဆန်းကြယ်တဲ့ စွမ်းအားက ငါ 'ကောင်းကင်ဘုံ လူသား' ဘုံကို ရောက်မှ တကယ် ပေါ်ထွက်လာမှာ ဖြစ်လောက်တယ်။ ကျင့်ကြံမှု မြင့်မားလာတာနဲ့အမျှ အလွှာ တစ်ခုနဲ့ တစ်ခုကြားက ကွာဟချက်က ပို ကြီးမားလာတယ်။ ငါ့ သွေးကြောထဲက လျှို့ဝှက်ဆန်းကြယ်တဲ့ စွမ်းအားကို ထိန်းချုပ်နိုင်ရင်... အဲ့ဒီအချိန်ကျရင် အလွှာ သုံးခုလောက် ကျော်ပြီး တိုက်ခိုက်နိုင်ဦးမှာပါ...”

တွေးတောနေရင်း ဖုန်းဝူချန်သည် 'မြေကမ္ဘာ နှလုံးသား မြင့်မြတ်သော ကြာပန်း' ကို ထုတ်ယူလိုက်သည်။

'စိတ်ဝိညာဉ် ခွဲဖြာခြင်း ပညာရပ်' ကို အသက်သွင်းလိုက်ရာ၊ မူလဝိညာဉ် ကိုယ်ပွား ၁၂ ခု စုစည်း ပေါ်ထွက်လာသည်။ ဖုန်းဝူချန်သည် ကျင့်ကြံခြင်း အခြေအနေသို့ စတင် ဝင်ရောက်သွားတော့သည်။

...

'ကောင်းကင်ဘုံ' နယ်မြေ အလယ်ပိုင်း... ‘ကောင်းကင်ဘုံ’ လေလံပွဲရုံ။

‘ကောင်းကင်ဘုံ’ လေလံရုံသည် 'ဝူကျိ' နယ်မြေ လေလံပွဲရုံလောက် ခမ်းနားထည်ဝါခြင်း မရှိသော်လည်း၊ 'ကျိုကျိုး' လေလံပွဲရုံထက် များစွာ ပိုမို အထင်ကြီးစရာ ကောင်းလှသည်။

လေလံပွဲရုံများသည် အစွမ်းထက် ပုဂ္ဂိုလ်များကို အမြဲတမ်း ဆွဲဆောင်နိုင်ပြီး၊ လူများ ဝင်ထွက်သွားလာမှု များပြားလှသည်။

လျိုချင်းယန်နှင့် နန်းကုန်းကျန့်တို့ လေလံပွဲရုံ အတွင်းသို့ ဝင်ရောက်လာကြပြီး၊ 'ကောင်းကင်မီး တောင်ပေါ် စံအိမ်' မှ အစောင့် နှစ်ဦးက အနောက်မှ ကပ်လျက် လိုက်ပါလာကြသည်။

“‘ကောင်းကင်ဘုံ’ လေလံရုံက 'ကျိုကျိုး' လေလံပွဲရုံထက်တောင် ပို မိုက်သေးတယ်။ အဖိုးတန် ရတနာတွေ လုံးဝ မရှားပါးဘူး" လျိုချင်းယန်က အံ့အားသင့်စွာ အာမေဋိတ်သံ ပြုလိုက်ပြီး စူးစမ်းလိုစိတ်ဖြင့် ဘေးဘီဝဲယာ ကြည့်ရှုနေသည်။

နန်းကုန်းကျန့်က စကားမပြောဘဲ၊ ခံစားချက် ကင်းမဲ့သော မျက်နှာထားဖြင့် ပတ်ဝန်းကျင်ကို ကြည့်ရှုနေသည်။

အမျိုးသမီး ဝန်ထမ်း တစ်ဦးက သူတို့ကို လေးစားစွာ လာရောက် နှုတ်ဆက်သည်။

“သခင်လေးတို့ ဘယ်လို ရတနာမျိုး ဝယ်ယူချင်ပါသလဲရှင့်" အမျိုးသမီး ဝန်ထမ်းက လေးစားစွာ မေးမြန်းပြီး၊ လျိုချင်းယန်နှင့် နန်းကုန်းကျန့်တို့ကို ရတနာ ပြသထားသော ကောင်တာများဘက်သို့ လမ်းပြ ခေါ်ဆောင်သွားသည်။

လျိုချင်းယန်က စာရင်း တစ်ခုကို ထုတ်ယူပြီး အမျိုးသမီး ဝန်ထမ်းကို ပေးလိုက်ကာ အပြုံးဖျော့ဖျော့လေးဖြင့် ပြောလိုက်သည်။ “ဒီထဲမှာ ရေးထားတာတွေ အကုန် လိုချင်ပါတယ်။ အဓိကကတော့ 'မြေကမ္ဘာ နှလုံးသား မြင့်မြတ်သော ကြာပန်း' ပါ။ ရှိသလောက် အကုန် ယူမယ်"

“'မြေကမ္ဘာ နှလုံးသား မြင့်မြတ်သော ကြာပန်း' ဟုတ်လား။ ရှိသလောက် အကုန် ယူမယ် ဟုတ်လားရှင့်" အမျိုးသမီး ဝန်ထမ်းက စာရင်းကို ယူကြည့်လိုက်ပြီး၊ ရုတ်တရက် သူမ၏ မျက်လုံးများ ဝမ်းသာအားရ တောက်ပသွားကာ လေးစားစွာ ခေါင်းညိတ်လိုက်သည်။ “ခဏလောက် စောင့်ပါ သခင်လေးတို့။ ကျွန်မ အခုချက်ချင်း ပြင်ဆင်လိုက်ပါ့မယ်"

“'မြေကမ္ဘာ နှလုံးသား မြင့်မြတ်သော ကြာပန်း' ကို ရှိသလောက် အကုန် ယူမယ် ဟုတ်လား"

“ဘယ်သူက ဒီလောက် ချမ်းသာနေတာလဲ"

“ငါ နားကြားမှားတာလား။ သူတို့က လေလံပွဲရုံမှာ ရှိသမျှ 'မြေကမ္ဘာ နှလုံးသား မြင့်မြတ်သော ကြာပန်း' အကုန်လုံးကို ယူမယ်တဲ့လား။ သူတို့က ဘယ်သူတွေလဲ"

ကျယ်ဝန်းသော လေလံပွဲ ခန်းမဆောင်ကြီး အတွင်းတွင် လျိုချင်းယန်၏ စကားများက ကျင့်ကြံသူ အများအပြားကို တုန်လှုပ်သွားစေပြီး၊ မျက်လုံးပေါင်းများစွာက သူတို့အပေါ်သို့ ကျရောက်လာသည်။

အံ့အားသင့်နေသော အကြည့်များ သူ့ထံသို့ ရောက်ရှိလာသည်ကို သတိပြုမိလိုက်သောအခါ၊ လျိုချင်းယန်၏ မျက်နှာပေါ်တွင် ဂုဏ်ယူသော အပြုံးတစ်ခု ပေါ်လာသည်။

မကြာမီမှာပင် အကြီးအကဲ တစ်ဦးသည် အနောက်ဘက် ခန်းမဆောင်ထဲမှ သွက်လက်စွာ လမ်းလျှောက် ထွက်လာပြီး လျိုချင်းယန်နှင့် နန်းကုန်းကျန့်တို့ ရှိရာသို့ ဦးတည်လာသည်။

“ကျွန်တော်က လေလံပွဲရုံရဲ့ တတိယ အကြီးအကဲပါ။ သခင်လေးတို့ နှစ်ယောက်က 'မြေကမ္ဘာ နှလုံးသား မြင့်မြတ်သော ကြာပန်း' အကုန်လုံးကို ဝယ်ချင်တယ်လို့ ကြားပါတယ်" တတိယ အကြီးအကဲက ယဉ်ကျေးစွာ မေးလိုက်သည်။ သူ၏ မျက်နှာအိုကြီးမှာ ပြုံးရွှင်နေ၏။

လျိုချင်းယန်က ယဉ်ကျေးသော အပြုံးဖြင့် ပြန်ဖြေလိုက်သည်။ “မှန်ပါတယ်"

တတိယ အကြီးအကဲက ပြုံးဖြီးဖြီးဖြင့် ဆိုသည်။ “ကောင်းပါပြီ။ လေလံပွဲရုံမှာ 'မြေကမ္ဘာ နှလုံးသား မြင့်မြတ်သော ကြာပန်း' စုစုပေါင်း (၁၃) ပွင့် ရှိပါတယ်။ တစ်ပွင့်ကို ရွှေဒင်္ဂါး ကုဋေ နှစ်ထောင် ပါ"

“ဘာ။ တစ်ပွင့်ကို ကုဋေ နှစ်ထောင် ဟုတ်လား" လျိုချင်းယန် အနည်းငယ် အံ့အားသင့်သွားသည်။

လျိုချင်းယန်၏ အမူအရာကို မြင်သောအခါ တတိယ အကြီးအကဲက အလျင်အမြန် ထပ်ဖြည့် ပြောလိုက်သည်။ “အဲ့ဒါ အသက်သာဆုံး ဈေးပါပဲ"

“တစ်ပွင့်ကို ရွှေဒင်္ဂါး ကုဋေ နှစ်ထောင် တောင်လား။ တတိယ အကြီးအကဲ... ခင်ဗျား မမှားဘူးနော်" လျိုချင်းယန်က ကြောင်တောင်တောင်ဖြင့် မေးလိုက်သည်။

လျိုချင်းယန်၏ စကားကို ကြားသောအခါ ခန်းမဆောင်ထဲရှိ လူတိုင်း ခေါင်းခါလိုက်ကြသည်။

“'မြေကမ္ဘာ နှလုံးသား မြင့်မြတ်သော ကြာပန်း' ရဲ့ ဈေးကိုတောင် မသိဘဲနဲ့ အကုန် ယူချင်တယ်လို့ ပြောရဲသေးတယ်။ ရှက်စရာ ကောင်းလိုက်တာ"

“သူ တစ်ပွင့်တောင် ဝယ်နိုင်ပါ့မလား။ ငါကတော့ သူဌေးကြီး တစ်ယောက်လို့ ထင်နေတာ"

“ဗဟုသုတ မရှိလိုက်တဲ့ လူငယ်"

ခန်းမဆောင်ထဲရှိ ကျင့်ကြံသူများ အားလုံး ခေါင်းခါလိုက်ကြပြီး လျိုချင်းယန်ကို လူပြက် တစ်ယောက် အဖြစ် သတ်မှတ်လိုက်ကြသည်။

တတိယ အကြီးအကဲ၏ မျက်နှာမှာလည်း အနည်းငယ် ပျက်ယွင်းသွားသည်။

“တတိယ အကြီးအကဲ။ 'မြေကမ္ဘာ နှလုံးသား မြင့်မြတ်သော ကြာပန်း' ရဲ့ ဈေးက သက်သာလွန်း မနေဘူးလား။ တစ်ပွင့်ကို ရွှေဒင်္ဂါး ကုဋေ နှစ်ထောင် တည်းလား" လျိုချင်းယန်က အလွန် လေးနက်စွာ မေးလိုက်သည်။

လျိုချင်းယန်၏ စကားကြောင့် ခန်းမဆောင် တစ်ခုလုံး ချက်ချင်း တောင့်ခဲသွားပြီး၊ တတိယ အကြီးအကဲမှာ အံ့အားသင့်စွာ စိုက်ကြည့်နေမိသည်။

လျိုချင်းယန်၏ “တည်းလား” ဆိုသော စကားလုံးက ခန်းမဆောင်ထဲရှိ လူတိုင်းကို လန့်ဖျပ်သွားစေသည်။

သိသာထင်ရှားစွာပင် လျိုချင်းယန်က ဈေးကြီးသည်ဟု ထင်နေခြင်း မဟုတ်ဘဲ၊ သက်သာလွန်းသည်ဟု ထင်နေခြင်း ဖြစ်သည်။

တတိယ အကြီးအကဲက တွေဝေစွာ ခေါင်းညိတ်လိုက်သည်။ “ဟုတ်ပါတယ်။ တစ်ပွင့်ကို ရွှေဒင်္ဂါး ကုဋေ နှစ်ထောင် ပါ"

“သက်သာလွန်းတယ်။ အကုန် ယူမယ်။ တခြား ရတနာတွေအတွက်လည်း... ရှိသလောက် အကုန် ယူမယ်ဗျာ။ တော်သေးတာပေါ့... ကျွန်တော် ရွှေဒင်္ဂါး ကုဋေ ငါးသောင်း ယူလာလို့။ မလောက်မှာ စိုးရိမ်နေတာ။ အခုတော့ တစ်ဝက်လောက်ပဲ ကုန်မယ့်ပုံ ရှိတယ်" လျိုချင်းယန်က စိတ်သက်သာရာရဟန်ဖြင့် သက်ပြင်းချလိုက်သည်။

ရွှေဒင်္ဂါး ကုဋေ ငါးသောင်း။

လေလံပွဲ ခန်းမဆောင်ကြီး အတွင်းတွင် ကျင့်ကြံသူ အများအပြား၏ ခန္ဓာကိုယ်များ တုန်ယင်သွားကြပြီး၊ တုန်လှုပ်ဖွယ်.. ငွေကြေးပမာဏကြောင့် အသက်ရှူပင် မဝတော့ပေ။