ဓားတစ်ချက်တည်းဖြင့် သတ်ဖြတ်ခြင်း

~ဖုန်းဝူချန်သည် အလွန်တရာ ကြီးမားသော 'ကျန်း' မိသားစု၏ ကျောထောက်နောက်ခံကို ရရှိထားပြီ ဖြစ်ရာ၊ 'ထျန်းယွဲ့' ဂိုဏ်းကို ချေမှုန်းပစ်ရန်မှာ မေးခွန်းထုတ်စရာပင် မလိုပေ။

သို့သော် ဖုန်းဝူချန်သည် 'ထျန်းယွဲ့' ဂိုဏ်းကို ရှင်းလင်းရန်အတွက် 'ကျန်း' မိသားစု၏ အင်အားကို မှီခိုရန် အစီအစဉ် မရှိပေ။ ထိုအစား သူသည် မိမိ၏ ကိုယ်ပိုင် အင်အားဖြင့်သာ တစ်စပြီးတစ်စ ဖြည်းဖြည်းချင်း နှိပ်စက် ညှဉ်းပန်းရန် ရည်ရွယ်ထားသည်။

“စံအိမ်သခင်... 'ထျန်းယွဲ့' ဂိုဏ်းရဲ့ လက်အောက်ခံ ဂိုဏ်းခွဲ ၈ ခုကို ရှင်းလင်းပစ်လိုက်တာက သူတို့ကို တကယ်ပဲ နာကျင်စေခဲ့တာပဲ... အခု သူတို့က ကျွန်တော်တို့ကို လိုက်လံ ဖမ်းဆီး သတ်ဖြတ်ဖို့ အရှေ့ပိုင်းက အစွမ်းထက် ပုဂ္ဂိုလ်တွေကို စေလွှတ်လိုက်ပြီ...”

'ချီဟွမ်' က အပြုံးဖျော့ဖျော့လေးဖြင့် ပြောလိုက်သည်။ အရှေ့ပိုင်းမှ အင်အားကြီးမားသော တပ်ဖွဲ့များက သူတို့ကို လိုက်လံ ဖမ်းဆီးနေကြောင်း သိနေသော်လည်း၊ သူသည် စိုးရိမ်ပူပန်မှု အလျဉ်းမရှိပေ။

“ဒါက အစ်ကိုလျိုအတွက် လက်စားချေတာပဲ...”

မြောင်ချင်းချင်းက တိုးတိုးလေး ရေရွတ်လိုက်သည်။ သူမ၏ လှပသော မျက်နှာလေးပေါ်တွင် ဝမ်းနည်းမှု အရိပ်အယောင်များ ယှက်သန်းနေ၏။

“သူတို့ အုပ်စုလိုက် လာပါစေ... အုပ်စုလိုက် သတ်ပစ်မယ်... တိုက်ပွဲက ကျွန်တော်တို့ရဲ့ အလားအလာကို လှုံ့ဆော်ပေးပြီး... ကျင့်ကြံမှုအတွက် အများကြီး အကျိုးရှိစေတယ်...”ဟု

'လိန်မူချန်' က ရက်စက် ကြမ်းကြုတ်စွာ ပြောလိုက်သည်။

'နျဲ့ကျုံး' က “ဗိမာန်သခင်... ကျွန်တော်တို့ကို လိုက်ဖမ်းနေတဲ့ သူတွေကို တောင်တန်းတွေထဲ မျှားခေါ်ပြီး... တစ်ယောက်ချင်းစီ ရှင်းလင်းပစ်ရင် မကောင်းဘူးလား...”

ဟု အကြံပြုလိုက်သည်။

ထိုအကြံအား 'တောက်ဟွမ်' က ခေါင်းညိတ် ထောက်ခံလိုက်သည်။

“ဗိမာန်သခင်... 'နျဲ့ကျုံး' ပြောတာ မှန်တယ်... သူတို့က လူအင်အား အသာစီး ရထားတော့ ကျွန်တော်တို့အတွက် မကောင်းဘူး... ပြီးတော့ 'ဖန်ရှောင်ယွင်' ကိုယ်တိုင်ကလည်း အစွမ်းထက် ပုဂ္ဂိုလ်တွေကို လွှတ်ပြီး လိုက်ခိုင်းနေတာ... ကျွန်တော်တို့သာ ပေါ်သွားရင် အရမ်း အန္တရာယ်များတယ်...”

“အကြံကောင်းပဲ...”

ဖုန်းဝူချန်၏ နှုတ်ခမ်းများသည် အန္တရာယ်များသော အပြုံးတစ်ခု အဖြစ် ကွေးညွတ်သွားသည်။

'ရွှယ်ဖုန်း' နှင့် 'ခွမ်းကျန့်' တို့သည် သူတို့၏ ပုံရိပ်ကို ထုတ်ဖော်ပြသပြီး 'လျှပ်တပြက် နေရာရွှေ့ပြောင်းခြင်း' ကို အသုံးပြုကာ ထွက်ပြေးကြသည်။ ထိုသို့ဖြင့် လိုက်လံ ဖမ်းဆီးသူများကို တောင်တန်းများ အတွင်းသို့ တစ်သုတ်ပြီး တစ်သုတ် မျှားခေါ်သွားကြလေသည်။

တစ်ခါ ဝင်ရောက်လာသည်နှင့် တသက်လုံး ပြန်ထွက်သွားနိုင်တော့မည် မဟုတ်ပေ။

တောင်တန်းများထဲသို့ ဝင်ရောက်ခြင်းသည် သနားညှာတာမှု ကင်းမဲ့သော သတ်ဖြတ်ခြင်းကို ရင်ဆိုင်ရခြင်းပင် ဖြစ်လေ၏။

“ဗိမာန်သခင်... ဒါ . ခြောက်သုတ်မြောက် ရောက်လာတာပါပဲ...”

'လိန်မူချန်' က လှောင်ပြောင် အေးစက်စွာ ရယ်မောလိုက်သည်။

ထိုစဉ်၊ နန်းကုန်းကျန့်က အကြံပြုလိုက်သည်။

“ဆေးဧကရာဇ်... ကျွန်တော်တို့ ဒီမှာ နေနေတာ ကြာပြီ... မကြာခင် 'ဖန်ရှောင်ယွင်' ကို ဒီနေရာဆီ ဆွဲဆောင်မိလိမ့်မယ်... နေရာ ပြောင်းကြမလားဗျ...”

“နန်းကုန်းကျန့် ပြောတာ မှန်တယ်... 'ဖန်ရှောင်ယွင်' က အရမ်း သန်မာတာ... ကျွန်တော်တို့ အားလုံး ပေါင်းတိုက်ရင်တောင် သူ့ကို နိုင်ချင်မှ နိုင်မှာ... ကျွန်တော်တို့ သတိထားရမယ်...”

'ပေတိုယန်' ကလည်း သဘောတူစွာ ခေါင်းညိတ်လိုက်သည်။

ဖုန်းဝူချန်က ဂရုမစိုက်ဟန်ဖြင့် “ကျွန်တော်တို့ 'ဝိညာဉ်ပြတ် တောင်ကြား' ကို သွားကြမယ်...”

ဟု ပြောလိုက်သည်။

“'ဝိညာဉ်ပြတ် တောင်ကြား'...”

'ပေတိုယန်' နှင့် အခြားသူများ အားလုံး အံ့အားသင့်သွားကြသည်။

ဖုန်းဝူချန်က ဆက်ပြောသည်။

“'ဝိညာဉ်ပြတ် တောင်ကြား' က 'ကောင်းကင်ဘုံ' နယ်မြေရဲ့ တားမြစ်နယ်မြေ တစ်ခု ဖြစ်ပြီး... အန္တရာယ်တွေနဲ့ ပြည့်နှက်နေတယ်... ပထမ အချက် အနေနဲ့ ကျွန်တော်တို့ သူတို့ကို ရှောင်တိမ်းနိုင်မယ်... ဒုတိယ အချက်က 'ဝိညာဉ်ပြတ် တောင်ကြား' ထဲမှာ ကျင့်ကြံလို့ ရတယ်... တစ်ချက်ခုတ် နှစ်ချက်ပြတ်ပဲ...”

ဖုန်းဝူချန် စကားဆုံးသည်နှင့် တပြိုင်နက်၊ အေးစက်သော အသံတစ်သံ ရုတ်တရက် ထွက်ပေါ်လာသည်။

“တကယ်ပဲ တစ်ချက်ခုတ် နှစ်ချက်ပြတ် ပါပဲ... ဒါပေမဲ့ နှမြောစရာ ကောင်းတာက... မင်းတို့မှာ အဲ့ဒီ အခွင့်အရေး ရှိတော့မှာ မဟုတ်ဘူး…”

“ဘယ်သူလဲ...”

'ပေတိုယန်' မျက်မှောင်ကြုတ်ပြီး အေးစက်စွာ အော်ဟစ်လိုက်သည်။

“'ကောင်းကင်ဘုံ လူသား' ဘုံ...”

ဖုန်းဝူချန် မျက်မှောင်ကြုတ်လိုက်ပြီး မျက်နှာထား လေးနက်သွားသည်။

“ဗိမာန်သခင်... ကျွန်တော်တို့ ဒုက္ခရောက်ပြီ...”

'ချီဟွမ်' က လေးနက်စွာ ပြောလိုက်သည်။

ဖုန်းဝူချန်နှင့် အခြားသူများ သတိမထားမိဘဲ အနားသို့ ရောက်လာနိုင်ခြင်းကပင်၊ ရောက်လာသူ၏ အင်အား မည်မျှ ကြောက်မက်ဖွယ် ကောင်းကြောင်း သက်သေပြနေသည်။

“ဝှစ် ဝှစ် ဝှစ်...”

လူရိပ် သုံးခုသည် မျက်တောင်တစ်ခတ် အတွင်း ပေါ်လာပြီး၊ ဖုန်းဝူချန်နှင့် သူ၏ အဖွဲ့ကို ဝိုင်းရံလိုက်ကြသည်။

ရောက်လာသူများမှာ 'ကောင်းကင် ဝံပုလွေ'၊ 'ကောင်းကင် ကျား' နှင့် 'ကောင်းကင် ကျားသစ်' တို့ပင် ဖြစ်ကြသည်။

“ပိုက်ဆံယူပြီး သူတစ်ပါးရဲ့ ဘေးဒုက္ခကို ရှင်းပေးတာ... ငါတို့က ဖုန်းဝူချန်ကိုပဲ သတ်မှာ... မဆိုင်တဲ့လူတွေ ထွက်သွားကြ...”

'ကောင်းကင် ဝံပုလွေ' က အေးစက်စွာ ပြောလိုက်သည်။ သူ၏ လေးလံသော သတ်ဖြတ်လိုစိတ် အရှိန်အဝါများက လေထုထဲတွင် ပျံ့နှံ့နေသည်။

“'ကောင်းကင်ဘုံ လူသား' ဘုံ ပထမအလွှာ နှစ်ယောက်... 'ထျန်းယွမ်' ဘုံ နဝမအလွှာ အထွတ်အထိပ် တစ်ယောက်...”

နန်းကုန်းကျန့်၏ အမူအရာမှာ အလွန်တရာ လေးနက်နေသည်။

“ဘယ်သူက ငှားတာလဲ... 'ဖန်ရှောင်ယွင်' လား...”

ဟု 'ပေတိုယန်' က အေးစက်စွာ မေးလိုက်သည်။

ထိုသုံးဦးက ပြန်မဖြေကြပေ။ အဘယ်ကြောင့်ဆိုသော် သူတို့သည် လုပ်ကြံသတ်ဖြတ်သူများ ဖြစ်ကြပြီး၊ သူတို့၏ အလုပ်ရှင်များနှင့် ပတ်သက်၍ လုံးဝ လျှို့ဝှက်ထားကြသောကြောင့် ဖြစ်သည်။

'ကောင်းကင်ဘုံ' နယ်မြေတွင် ဖုန်းဝူချန်ကို သတ်ချင်နေသူ အများအပြား ရှိသည်။ သူ မည်သူ ဖြစ်သည်ကို ခန့်မှန်း၍ မရသလို၊ ခန့်မှန်းရန်လည်း စိတ်မဝင်စားပေ။

ဖုန်းဝူချန်က တည်ငြိမ်စွာ ပြောလိုက်သည်။

“'ပေတိုယန်'... မင်းတို့ အရင် သွားနှင့်ကြ...”

'ပေတိုယန်' ခေါင်းညိတ်လိုက်သည်။ ထို့နောက် စကားပြောရန် ပြင်လိုက်သော နန်းကုန်းကျန့်ကို တားဆီးလိုက်ပြီး ..

“ငါတို့ ရှိနေတာက ဆေးဧကရာဇ်ကို အနှောင့်အယှက် ဖြစ်စေရုံပဲ ရှိမယ်... သွားကြစို့...”

“အစ်ကိုဖုန်း... ကျေးဇူးပြုပြီး သတိထားပါနော်...”

မြောင်ချင်းချင်းက စိုးရိမ်တကြီး သတိပေးလိုက်သည်။ သူမ ဆက်နေနေပါက ဖုန်းဝူချန်အတွက် ဝန်ထုပ်ဝန်ပိုး ဖြစ်စေမည်ကို သူမ သိပါ၏။

ဆက်နေနေမည့် အစား၊ ဖုန်းဝူချန် အစွမ်းကုန် တိုက်ခိုက်နိုင်ရန် ယခု ထွက်ခွာသွားခြင်းက ပိုကောင်းပေလိမ့်မည်။

“ဖုန်းဝူချန်... မင်းက တော်တော်လေး ဂုဏ်သိက္ခာ ရှိတာပဲ... ဒါပေမဲ့ ဝမ်းနည်းစရာ ကောင်းတာက မင်း ကိုယ့်ကိုယ်ကိုယ် အထင်ကြီးလွန်းနေတယ်... မင်း တစ်ယောက်တည်းနဲ့... ငါတို့ လက်ထဲက လွတ်မြောက်ဖို့ စိတ်ကူးတောင် မယဉ်နဲ့...”

'ကောင်းကင် ကျား' က အေးစက်သော အပြုံးဖျော့ဖျော့လေးဖြင့် ပြောလိုက်သည်။

'ပေတိုယန်' နှင့် အခြားသူများ ထွက်ခွာသွားသည်ကို မြင်သောအခါ၊ ဖုန်းဝူချန်လည်း သက်ပြင်းချနိုင်သွားသည်။ အကယ်၍ သူတို့ကိုပါ ခေါ်သွားရမည် ဆိုလျှင်၊ သူ အကောင်းပကတိဖြင့် ဆုတ်ခွာနိုင်မည် မဟုတ်ဟု စိုးရိမ်နေမိသည်။

“စကားများနေတာ တော်ပြီ...”

ဖုန်းဝူချန်က အေးစက်စွာ ပြောလိုက်သည်။ အေးစက်သော သတ်ဖြတ်လိုစိတ်များ သူ့ထံမှ ထွက်ပေါ်လာပြီး၊ သူ၏ နက်မှောင်သော မျက်လုံးများတွင် ရက်စက်သော အရောင်များ လင်းလက်လာသည်။

သူ၏ စွမ်းအား အားလုံး တစ်ပြိုင်နက် ပေါက်ကွဲထွက်လာပြီး၊ 'ချီလင်' ချပ်ဝတ်ကို ဆင့်ခေါ်လိုက်ရာ၊ သူ၏ အရှိန်အဝါသည် ကြောက်မက်ဖွယ် နှုန်းဖြင့် ကောင်းကင်ယံသို့ ထိုးတက်သွားပြီး၊ ချက်ချင်းပင် 'ထျန်းယွမ်' ဘုံ နဝမအလွှာ အထွတ်အထိပ်သို့ ရောက်ရှိသွားတော့သည်။

“အိုး…တကယ်ပဲ ရိုးရှင်းတဲ့ ကိစ္စ မဟုတ်ပါလား... 'ထျန်းယွမ်' ဘုံ ဆဌမအလွှာ အင်အားနဲ့... ဒီလောက် အစွမ်းထက်တဲ့ တိုက်ခိုက်နိုင်စွမ်းကို ပိုင်ဆိုင်ထားတယ်...”

'ကောင်းကင် ဝံပုလွေ' အံ့အားသင့်စွာ အာမေဋိတ်သံ ပြုလိုက်သည်။ သို့သော် ထိုအရာက အံ့အားသင့်မှု သက်သက်သာ ဖြစ်ပြီး၊ ကြောက်ရွံ့မှု အရိပ်အယောင် တစ်စက်ကလေးမျှ မပါရှိပေ။

'ကောင်းကင်ဘုံ လူသား' ဘုံ ပထမအလွှာတွင် ရှိသော 'ကောင်းကင် ဝံပုလွေ' သည် ကြောက်မက်ဖွယ် အင်အားကို ပိုင်ဆိုင်ထားပြီး ဖုန်းဝူချန်ကို ရှုံးနိမ့်မည် မဟုတ်ဟု ယုံကြည်ထားသည်။

“ကောလာဟလ သတင်းတွေက တကယ် မှန်တာပဲ... ဒီလောက် ငယ်ရွယ်တဲ့ အရွယ်နဲ့ ဒီလောက် အင်အား ရှိနေတာ... 'ဖန်ရှောင်ယွင်' တောင် မင်းကို ယှဉ်နိုင်ချင်မှ ယှဉ်နိုင်လိမ့်မယ်... ငါတို့ အလုပ်ရှင်ကို ကတိပေးမထားဘူး ဆိုရင်... မင်းလို ပါရမီရှင်မျိုးကို ဒုက္ခပေးမှာ မဟုတ်ဘူး...”

'ကောင်းကင် ကျား' အလွန် အံ့အားသင့်စွာ ပြောလိုက်သည်။

မျက်မြင်ကိုယ်တွေ့ မမြင်ရလျှင်၊ ဖုန်းဝူချန်က သူ၏ တိုက်ခိုက်နိုင်စွမ်းကို အဆင့် သုံးဆင့်အထိ မြှင့်တင်နိုင်သည် ဆိုခြင်းကို မည်သူက ယုံကြည်ပါမည်နည်း။

'ကောင်းကင် ကျားသစ်’က

“မင်းမှာ 'ထျန်းယွမ်' ဘုံ နဝမအလွှာ အထွတ်အထိပ်ရဲ့ စွမ်းအား တကယ် ရှိမရှိ ငါ စမ်းကြည့်ရသေးတာပေါ့...”ဟု အသံနက်ကြီးဖြင့် ပြောလိုက်သည်။

သူ၏ မျက်လုံးများတွင် ရက်စက်သော အကြည့်များ ရှိနေပြီး၊ 'ထျန်းယွမ်' ဘုံ နဝမအလွှာ အထွတ်အထိပ်၏ ကြောက်မက်ဖွယ် စွမ်းအားများ အပြည့်အဝ ပေါက်ကွဲ ထွက်ပေါ်လာ၏။

တောင်တန်းများ တုန်ခါသွားပြီး၊ မြေကြီးများ ကွဲအက်သွားကာ ကြီးမားသော အက်ကွဲကြောင်းကြီးများ ပေါ်လာသည်။ ဖျက်ဆီးခြင်း စွမ်းအားမှာ အလွန်တရာ ကြောက်မက်ဖွယ် ကောင်းလှပေသည်။

“ဘယ်သူ သိမှာလဲ...”

ဖုန်းဝူချန်က ကစားလိုစိတ်ဖြင့် အေးစက်စွာ လှောင်ပြောင်လိုက်ပြီး၊ လေထုထဲသို့ လက်ကို ဆန့်ထုတ်လိုက်ရာ 'အထွတ်အထိပ် နဂါးနတ်ဘုရား ဓား' ပေါ်ထွက်လာ၏။

'နဂါးနတ်ဘုရား ဓား' ပေါ်ထွက်လာသည်နှင့် တပြိုင်နက် ဖုန်းဝူချန်၏ အရှိန်အဝါသည် နောက်တစ်ကြိမ် ထပ်မံ မြင့်တက်သွားပြန်၏။ ယခုအခါ 'ထျန်းယွမ်' ဘုံ နဝမအလွှာ အထွတ်အထိပ်ကို ကျော်လွန်သွားပြီ ဖြစ်သော်လည်း၊ 'ကောင်းကင်ဘုံ လူသား' ဘုံသို့ ခြေလှမ်း မဝင်သေးပေ။

“အဆင့်မြင့် ဝိညာဉ် လက်နက်... ဒုတိယအဆင့် ပုံသွင်းထားတာ...”

'ကောင်းကင် ဝံပုလွေ' ၏ မျက်နှာထား နောက်ဆုံးတွင် သိသိသာသာ ပြောင်းလဲသွားသည်။

“တကယ်ကြီး ဒုတိယအဆင့် ပုံသွင်းထားတာပဲ...”

'ကောင်းကင် ကျား' ၏ မျက်လုံးများလည်း အံ့အားသင့်မှုကြောင့် ပြူးထွက်လာသည်။

သူတို့ကို တုန်လှုပ်စေခဲ့သည်မှာ အဆင့်မြင့် ဝိညာဉ် လက်နက် မဟုတ်ဘဲ၊ 'နဂါးနတ်ဘုရား ဓား' ၏ ဒုတိယအဆင့် ပုံသွင်းထားခြင်းပင် ဖြစ်သည်။

“စိတ်ဝင်စားစရာပဲ... မင်း ငါ့ကို စိတ်ပျက်အောင် မလုပ်ဖို့ မျှော်လင့်ပါတယ်...”

'ကောင်းကင် ကျားသစ်' က ရက်စက်သော အေးစက်သည့် အပြုံးဖြင့် ပြောလိုက်သည်။ သူ၏ ပြင်းထန်သော တိုက်ခိုက်လိုစိတ်များ လှိုင်းထလာလေသည်။

'ကောင်းကင် ကျားသစ်' ကို အေးစက်စွာ ကြည့်လိုက်ပြီး ဖုန်းဝူချန်က မေးလိုက်သည်။

“မင်း ငါ့ကို တစ်ယောက်တည်း တိုက်မှာလား...”

“အဲ့ဒါ မင်းရဲ့ အရည်အချင်း အပေါ်မှာ မူတည်တယ်...”

'ကောင်းကင် ကျားသစ်' က အေးစက်သော အပြုံးဖြင့် ပြန်ဖြေလိုက်သည်။ သူ၏ ကိုယ်ပိုင် အင်အားအပေါ် အလွန် ယုံကြည်မှု ရှိနေသည်။

“အို... ဟုတ်လား... ဒါဆို မင်း နောင်တ မရပါစေနဲ့...”

ဖုန်းဝူချန်၏ မျက်နှာပေါ်တွင် တောက်ပသော အပြုံးတစ်ခု ပေါ်လာသည်။

ဖုန်းဝူချန်သည် ကိုယ်ကို ကိုင်းလိုက်ပြီး တိုက်ခိုက်ရေး အနေအထား ပြင်ဆင်လိုက်ကာ၊ အတွေးတစ်ချက်ဖြင့် 'လျှပ်တပြက် နေရာရွှေ့ပြောင်းခြင်း' ကို အသုံးပြုလိုက်သည်။

“ဝှစ်...”

ဖုန်းဝူချန်၏ ပုံရိပ်သည် မျက်တောင်တစ်ခတ် အတွင်း ပျောက်ကွယ်သွားပြီး၊ သူ ရှိခဲ့သော နေရာတွင် ပြင်းထန်သော လေပွေတစ်ခု ကျန်ရစ်ခဲ့သည်။ သူ၏ အရှိန်မှာ ကြောက်မက်ဖွယ် ကောင်းလောက်အောင် လျင်မြန်လှသည်။

“မကောင်းတော့ဘူး... 'ကျားသစ်' အန္တရာယ် ရှိနေပြီ...”

'ကောင်းကင် ဝံပုလွေ' ၏ မျက်နှာထား အကြီးအကျယ် ပြောင်းလဲသွားပြီး၊ ကြီးမားသော အန္တရာယ်ကို အာရုံခံမိလိုက်သည်။

“ဒီအရှိန်က... ငါ... ငါ မမြင်လိုက်ဘူး...”

'ကောင်းကင် ကျား' တုန်လှုပ်စွာ အော်ဟစ်လိုက်သည်။ ဖုန်းဝူချန်၏ ကြောက်မက်ဖွယ် အရှိန်ကြောင့် အလွန် အံ့အားသင့်သွားသည်။

ဖုန်းဝူချန်၏ ကြောက်မက်ဖွယ် အရှိန်ကြောင့် 'ကောင်းကင် ကျားသစ်' ၏ မျက်နှာပေါ်ရှိ အေးစက်သော အပြုံးမှာ ရုတ်တရက် တောင့်ခဲသွားသည်။

ဖုန်းဝူချန် လှုပ်ရှားလိုက်သည့် အခိုက်အတန့်တွင်၊ 'ကောင်းကင် ကျားသစ်' သည် အန္တရာယ်ကို သတိပြုမိလိုက်ပြီး၊ သူ ဖုန်းဝူချန်ကို လျှော့တွက်မိကြောင်းနှင့် မိမိကိုယ်ကို အထင်ကြီးလွန်းမိကြောင်း နားလည်လိုက်သည်။

“ရွှပ်...”

သွေးရောင် အလင်းတန်း တစ်ခု 'ကောင်းကင် ကျားသစ်' ၏ လည်ပင်းကို ခဏတာ ဖြတ်သန်းသွားသည်။ သူ၏ ခန္ဓာကိုယ် အနည်းငယ် ရပ်တန့်သွားပြီး၊ သူ၏ မျက်နှာထား နောက်တစ်ကြိမ် တောင့်ခဲသွားကာ၊ လည်ပင်းမှ သွေးများ ပန်းထွက်လာတော့သည်။

'ထျန်းယွမ်' ဘုံ နဝမအလွှာ အထွတ်အထိပ် အစွမ်းထက် ပုဂ္ဂိုလ် တစ်ဦးသည် ထိုနေရာတွင်ပင် ပွဲချင်းပြီး သေဆုံးသွားခဲ့လေပြီ။

'ကောင်းကင် ကျားသစ်' တွင် ပြန်လည် တုံ့ပြန်ရန် အခွင့်အရေးပင် မရလိုက်ပေ။

“ဘယ်လိုလုပ် ဖြစ်နိုင်မှာလဲ...”

'ကောင်းကင် ဝံပုလွေ' နှင့် 'ကောင်းကင် ကျား' တို့ အကြီးအကျယ် တုန်လှုပ်သွားကြပြီး၊ ဖြည်းညင်းစွာ လဲကျသွားသော 'ကောင်းကင် ကျားသစ်' ကို ကြောင်ငေးစွာ စိုက်ကြည့်နေမိကြသည်။

ဓားတစ်ချက်တည်းဖြင့်... 'ကောင်းကင် ကျားသစ်' အသတ်ခံလိုက်ရချေပြီ။