ဝိညာဉ်စင်မြင့်အဆင့်သို့ အရှိန်မြှင့် တက်လှမ်းခြင်း

အတွေးကမ္ဘာထဲ မျောပါရင်း ဝမ်ရှိုကျဲ့သည် မျက်ရည်စက်လက်ဖြင့် ပြောလိုက်သည်

"စတုတ္ထဦးလေးက သမီးအပေါ် အရမ်းကောင်းတာပဲ"

"ဦးလေးရဲ့ လိချီလေးက လိမ်လိမ်မာမာ နေတာကိုး ကြိုးကြိုးစားစားသာ လုပ်စမ်းပါ ဦးလေးမှာ နောက်ထပ်ဆုတွေ ပေးစရာ ရှိပါသေးတယ်"

ဝမ်ရှိုကျဲ့က ပြုံးလျက် သူမ၏ ခေါင်းလေးကို ပွတ်သပ်ပေးလိုက်သည်

"ဥပမာ အရသာရှိတဲ့ ငါးခြောက်လေးတွေလိုမျိုးပေါ့"

ဟွန်း...

ငါက ကလေးမလေး ဆိုပေမယ့် သိက္ခာရှိပါတယ်နော် ငါးခြောက်လေးလောက်နဲ့ လာဝယ်လို့ ရမယ်များ ထင်နေလား...

သို့သော် ထိုစကားလုံးများသည် နှုတ်ခမ်းဖျားသို့ ရောက်သည်နှင့် အရောင်တောက်နေသော မျက်လုံးများနှင့် သွားရေကျသံအဖြစ်သို့ ပြောင်းလဲသွားတော့သည်

"စတုတ္ထဦးလေး ဘယ်လောက်များများ ဆုချမှာလဲဟင်"

"ဒီခရီးစဉ်ကနေ ပြန်သယ်လာတဲ့ မုန့်တွေအားလုံးကို သမီး စီမံခန့်ခွဲလိုက်ပါတော့"

ဝမ်ရှိုကျဲ့က ရက်ရောစွာ ပြောလိုက်သည်

"ဝူး ဝူး ဝူး... စတုတ္ထဦးလေးက သမီးအပေါ် အရမ်းကောင်းတာပဲ"

ဝမ်လိချီတစ်ယောက် စိတ်လှုပ်ရှားလွန်း၍ မျက်ရည်များပင် စီးကျလာသည် သူမသည် ဝမ်ရှိုကျဲ့ကို မျက်ရည်စက်လက်ဖြင့် မော့ကြည့်ရင်း ယခင်က စတုတ္ထဦးလေးအပေါ် သံသယဝင်ခဲ့မိသည်များကို နောင်တရနေမိသည် ဒီလောက်ကောင်းတဲ့ စတုတ္ထဦးလေးမျိုး ဘယ်မှာ သွားရှာရပါမည်နည်း

"ကဲ... စတုတ္ထဦးလေးက သမီးကို ယုံတယ်နော် အားလုံးကို မျှမျှတတ ခွဲဝေပေးတတ်မယ်လို့ ထင်ပါတယ်"

ဝမ်ရှိုကျဲ့က ဆက်ပြောသည်

"ဒီမုန့်တွေကို မိသားစုထဲက အသက် ၂၀ အောက် လူငယ်တွေအားလုံးကို မျှမျှတတ ခွဲဝေပေးရမယ်နော် သမီးက ဂဏန်းသင်္ချာနဲ့ စာရင်းကိုင်ပညာကို သင်ထားပြီးသား မဟုတ်လား စာရင်းစာအုပ်ထဲမှာ လူတိုင်းရဲ့ လက်မှတ်ထိုးခိုင်းဖို့လည်း မမေ့နဲ့ဦး"

မျှမျှတတ တဲ့လား

ခွဲဝေပေးရမယ် တဲ့လား

ပြီးတော့ အိမ်တိုင်းစေ့ ကိုယ်တိုင် သွားပို့ပေးရဦးမှာတဲ့လား ရက်စက်လိုက်တာ... ရက်စက်လွန်းအားကြီးတယ်...

စတုတ္ထဦးလေး... ဦးလေးက သိပ်လွန်လွန်းတယ်... သမီး ဦးလေးနဲ့ အပြတ်ချမယ်...

ကံဆိုးစွာဖြင့် ဝမ်ရှိုကျဲ့သည် မှာစရာရှိသည်များကို မှာပြီးနောက် သူမ မြင်ကွင်းမှ ပျောက်ကွယ်သွားလေပြီဖြစ်သည်

မိန်းမငယ်လေးသည် စာအုပ်အနည်းငယ်ကို ပိုက်လျက် လေထဲတွင် တစ်ယောက်တည်း ကျန်ရစ်ခဲ့လေတော့သည်

...

ဝမ်ရှိုကျဲ့သည် သူ၏ ခြံဝင်းအတွင်းသို့ ပြန်ရောက်သည်နှင့် မည်သည့်အလုပ်မျှ မလုပ်ဘဲ အနားယူလိုက်သည် ကျွန်းတစ်ရာခရီးစဉ်သည် သူ့ကို ရုပ်ပိုင်းဆိုင်ရာရော စိတ်ပိုင်းဆိုင်ရာပါ ပင်ပန်းနွမ်းနယ်စေခဲ့သည်

ကံကောင်းထောက်မစွာဖြင့် အန္တရာယ်များ ကုန်ဆုံးသွားပြီဖြစ်သည် ဘိုးဘေးလုံယန်၏ ကျန်းမာရေးသာ ပြန်လည်ကောင်းမွန်လာပါက ဝမ်မျိုးနွယ်စုသည် ခိုင်မာစွာ ရပ်တည်နိုင်တော့မည် ဖြစ်သည်

ညတစ်ညတာ ကုန်ဆုံးသွားသည်

နောက်တစ်နေ့တွင် ဝမ်ရှိုကျဲ့သည် မိထွေးဖြစ်သူ ကုန်းစွန်းဟွေးနှင့် တွေ့ဆုံကာ စာရင်းအင်းများ စစ်ဆေးပြီး ကုန်ပစ္စည်းများကို သိုလှောင်ကြသည် မည်သို့ပင်ဆိုစေကာမူ ကြီးမားသော မျိုးနွယ်စုကြီးတစ်ခု၏ စာရင်းဇယားများသည် ရှုပ်ထွေးနေ၍ မဖြစ်ပေ သို့မဟုတ်ပါက ပြဿနာအမျိုးမျိုး ပေါ်ပေါက်လာနိုင်သည်

မမျှော်လင့်ထားသော ဖြစ်ရပ်များနှင့် အကျိုးအမြတ်များကြားတွင် ကုန်းစွန်းဟွေးလည်း အံ့သြနေရသည် ရှိုကျဲ့ ပြန်ရောက်လာတိုင်း အဘယ်ကြောင့် မမျှော်လင့်ထားသော အံ့သြဖွယ်ရာများ အမြဲပါလာတတ်သနည်း

"အမေ ကျွန်တော် ပထမဦးစားပေး အဆင့်ကို ရသင့်တယ်လို့ ထင်ပါတယ်"

ဝမ်ရှိုကျဲ့က ပြုံးရင်း ပြောလိုက်သည်

"အရင်းအမြစ်တွေနဲ့ ပတ်သက်ရင် ကျွန်တော် ကိုယ့်ကိုယ်ကိုယ် နည်းနည်းလောက် အလိုလိုက်ချင်တယ် ကျွန်တော့်ရဲ့ လစဉ် ရိက္ခာဝေစုထဲမှာ ဝိညာဉ်အစားအစာကို နှစ်ဆ တိုးပေးပါ ပြီးတော့ အသေးစား ဖေယွမ်ဆေးလုံး တစ်လုံးကနေ သုံးလုံးအထိ တိုးပေးစေချင်တယ် ပြီးတော့ ဖေယွမ်ဆေးလုံး တစ်လုံးနဲ့ ယာယီ ဝိညာဉ်ကျောက်တုံး တစ်တုံးလည်း လိုအပ်ပါတယ်"

ဤမျှလောက် ကြီးကျယ်သော အရင်းအမြစ် သုံးစွဲမှုသည် ဝမ်ရှိုကျဲ့အတွက် အလွန်ဇိမ်ကျသော အဆင့်သို့ ရောက်ရှိနေပြီဖြစ်သည်။ သူသည် လက်ရှိတွင် တစ်လလျှင် ဝိညာဉ်ဆန် ၁၅ ပိဿာ၊ ဝိညာဉ်ငါး ၁၅ ပိဿာနှင့် ဝိညာဉ်အသား ၁၅ ပိဿာခန့် စားသုံးနေပြီဖြစ်သည် ဆေးဝါးများနှင့် အခြားအရာများ အပါအဝင် ဝိညာဉ်ကျောက်တုံး မပါဘဲ တစ်နှစ်စာ ကျင့်ကြံရေး အရင်းအမြစ်အတွက် ရွှေတာရာ ရှစ်ရာ ကိုးရာခန့် ကုန်ကျမည်ဖြစ်သည်

ပုံမှန်အခြေအနေတွင် ချီသန့်စင်ခြင်း သတ္တမအဆင့်သို့ ရောက်ရှိပြီးနောက် တစ်နှစ်စာ ကျင့်ကြံရေး အရင်းအမြစ် ဘတ်ဂျက်သည် အများဆုံး ရွှေတာရာ နှစ်ရာခန့်သာ ရှိတတ်သည် ယခုမူ လေးဆခန့် တိုးသွားခြင်းဖြစ်သည် သို့သော် အရင်းအမြစ် လေးငါးဆ သုံးစွဲလိုက်ရုံဖြင့် ဝမ်ရှိုကျဲ့၏ ကျင့်ကြံခြင်း အရှိန်အဟုန်သည် လေးငါးဆ မြန်ဆန်လာမည် မဟုတ်ပေ

ဤနေရာတွင် အကျိုးအမြတ် လျော့နည်းလာခြင်း သဘောတရား ရှိနေပြီး အများဆုံး နှစ်ဆကျော်ကျော်ခန့်သာ ပိုမြန်လာမည်ဖြစ်သည်။ ဝိညာဉ်ကျောက်တုံး အကူအညီပါလျှင်ပင် အနည်းငယ်သာ ပိုမြန်လာမည်ဖြစ်ပြီး ယခင်ကထက် သုံးဆ ပိုမြန်လာမည် မဟုတ်ပေ

သာမန် ရွှမ်းဝူ မျိုးနွယ်စုများအတွက်ပင် ၎င်းတို့၏ တိုက်ရိုက်ဆင်းသက်သူများကို ပထမဦးစားပေးအနေဖြင့် ပြုစုပျိုးထောင်လျှင်သော်မှ ဝိညာဉ်စင်မြင့်အဆင့်ကို ရည်မှန်းထားလျှင်သော်မှ ဤမျှလောက် ဖြုန်းတီးမည် မဟုတ်ပေ

ဤတောင်းဆိုမှုကြောင့် ကုန်းစွန်းဟွေးပင် မျက်လုံးပြူးသွားရသည်

"ရှိုကျဲ့ မင်းရဲ့ စွမ်းဆောင်ရည်တွေနဲ့ဆိုရင် ဒီလောက်များတဲ့ ကျင့်ကြံရေး အရင်းအမြစ်တွေ တောင်းခံတာ ဘာမှ မမှားပါဘူး ဒါပေမယ့် စေ့စပ်သေချာလွန်းတဲ့ မျိုးနွယ်စု အကြီးအကဲတွေက ကန့်ကွက်ကြမှာကို စိုးရိမ်မိတယ် ဒါပေမယ့် ကိစ္စမရှိပါဘူး ဘိုးဘေးလုံယန်က မင်းဘက်ကနေ ရပ်တည်ပေးနေသရွေ့ ဘယ်သူမှ အတင်းအဖျင်း ပြောရဲကြမှာ မဟုတ်ပါဘူး"

မျိုးနွယ်စုဆိုသည်မှာ အားလုံးပိုင်ဆိုင်သော အရာဖြစ်ပြီး ဝမ်ရှိုကျဲ့ တစ်ယောက်တည်းပိုင် မဟုတ်ပေ အခြား အကြီးအကဲများတွင်လည်း ၎င်းတို့၏ ထင်မြင်ယူဆချက်များကို ထုတ်ဖော်ပြောဆိုပိုင်ခွင့် ရှိသည်။ သို့သော် ဝမ်ရှိုကျဲ့ ဂရုမစိုက်ပေ သူ၏ စွမ်းရည်ဖြင့် ဤမျိုးနွယ်စုသည် တဖြည်းဖြည်း အသွင်ကူးပြောင်းရေး ကာလသို့ ရောက်ရှိလာတော့မည် ဖြစ်သည်

ထို့အပြင် အကျိုးပြုလုပ်ဆောင်ချက် စနစ်ကို စတင်ကျင့်သုံးပါက ဘိုးဘေးလုံယန်သည် ပထမနေရာတွင် ရှိနေမည်ဖြစ်ပြီး သူသည် ဒုတိယနေရာတွင် ရှိနေပေလိမ့်မည် အနာဂတ်တွင် သူ၏ အကျိုးပြုလုပ်ဆောင်ချက်များသည် ဘိုးဘေးလုံယန်ကိုပင် ကျော်လွန်သွားမည်ဟု သူ ယုံကြည်ထားသည်

ဤမျှလောက် များပြားသော အရင်းအမြစ်များကို ရယူခြင်းသည် သူလောဘကြီး၍ မဟုတ်ပေ အလယ်အလတ် သက်တမ်းရောက်မှ ဝိညာဉ်စင်မြင့်အဆင့်သို့ တက်လှမ်းရမည့် အခွင့်အရေးကို သူ မစောင့်ချင်သောကြောင့် ဖြစ်သည်။ အရေးအကြီးဆုံးမှာ ဤစိတ်ကူးယဉ် ကမ္ဘာကြီးသည် အလွန်အန္တရာယ် များလွန်းသည်

သူ၏ လက်ရှိ ကျင့်ကြံခြင်းအဆင့်ဖြင့် ဟိုဟိုဒီဒီ လျှောက်သွားနေပါက မကြာမီ ပြဿနာများနှင့် ကြုံတွေ့ရပေလိမ့်မည်။ ထို့ကြောင့် မျိုးနွယ်စုအတွင်း၌သာ နေထိုင်ပြီး ဝိညာဉ်စင်မြင့်အဆင့်သို့ အမြန်ဆုံး ရောက်ရှိအောင် ကြိုးစားကာ ကိုယ့်ကိုယ်ကိုယ် ကာကွယ်နိုင်စွမ်း ရှိလာစေရန် ပြင်ဆင်ခြင်းက ပို၍ စိတ်ချရသည်

ထိုကိစ္စ ပြီးသွားသောအခါ ဝမ်ရှိုကျဲ့က ထပ်မံ မေးမြန်းလိုက်သည်

"အမေ ပိုးမွှားကျတဲ့ ကိစ္စက ဘယ်လို အခြေအနေ ရှိလဲ"

သူသည် ချန်နင်နယ်မြေမှ ဆယ်ရက်ခန့် ခွဲခွာနေခဲ့ရသဖြင့် သတင်းအချက်အလက်များ နောက်ကျနေခဲ့သည်။ ကျွန်းတစ်ရာ အစောင့်တပ်စခန်း၏ အခြေအနေမှာ မတူညီပေ ထိုနေရာတွင် စိုက်ပျိုးမြေ အလွန်နည်းပါးပြီး ပထဝီအနေအထားအရ သီးခြားဖြစ်နေသောကြောင့် ပိုးမွှားအန္တရာယ် မကြုံတွေ့ခဲ့ရပေ သို့သော် အနာဂတ်တွင် စားနပ်ရိက္ခာ ရှားပါးမှုသည် မလွဲမသွေ ဖြစ်လာမည်ဖြစ်ပြီး ကျွန်းတစ်ရာ အစောင့်တပ်စခန်းလည်း ထိခိုက်မှု ရှိလာနိုင်သည်။

"အခြေအနေက တော်တော်ဆိုးတယ်"

ကုန်းစွန်းဟွေးက လေးနက်သော မျက်နှာထားဖြင့် ပြောလိုက်သည်။

"မျိုးနွယ်စု အနည်းငယ်ကလွဲရင် ကျန်တဲ့ မျိုးနွယ်စု အများစုကတော့ စပါးအထွက်နှုန်း လျော့ကျသွားကြတယ် ဒါပေမယ့် အထိနာဆုံးကတော့ မြို့နယ်တွေနဲ့ မျိုးနွယ်စုတွေရဲ့ နယ်မြေအတွင်းက ကိုယ်ပိုင် လယ်စိုက်တဲ့ တောင်သူတွေပဲ သူတို့က ခံနိုင်ရည်အား အရမ်းနည်းတော့ အထွက်နှုန်းက ခုနစ်ဆယ်ရာခိုင်နှုန်းလောက် ကျသွားတယ်"

ဝမ်ရှိုကျဲ့ မျက်ခုံးအနည်းငယ် တွန့်သွားသည်။

"အထွက်နှုန်း ခုနစ်ဆယ်ရာခိုင်နှုန်း ကျသွားတာက ကြီးမားတဲ့ ဆုံးရှုံးမှုဆိုပေမယ့် ကိုယ်ပိုင်လယ်စိုက်တဲ့ တောင်သူတွေအတွက် စပါးသိုလှောင်ပြီး နောက်တစ်သီး စပါးပေါ်တဲ့အထိ တောင့်ခံထားဖို့ မခက်ခဲလောက်ပါဘူး သူတို့ဘဝက သီးစားချ တောင်သူတွေလောက်တော့ မဆိုးလောက်ပါဘူးနော်"

"ရှိုကျဲ့ မင်း မသိသေးတာတွေ ရှိသေးတယ်"

ကုန်းစွန်းဟွေးက ရှင်းပြသည်

"ပထမဆုံး သီးစားချ တောင်သူတွေအကြောင်း ပြောပြမယ် သီးစားချ တောင်သူ မိသားစုတွေမှာ ပုံမှန်အားဖြင့် လူဦးရေ တစ်ယောက်ကနေ ခြောက်ယောက် ခုနစ်ယောက်လောက်အထိ ရှိတတ်တယ် ပျမ်းမျှ သုံးယောက်ရှိတဲ့ မိသားစုကို ဥပမာထားကြည့်မယ် အလုပ်လုပ်နိုင်တာက လင်မယား နှစ်ယောက်ပေါ့ သူတို့က လယ်ဧက ၂၀ လောက် လုပ်နိုင်တယ်

ပုံမှန်နှစ်တွေမှာဆိုရင် စပါးနဲ့ ဂျုံ ရိတ်သိမ်းရရှိမှု တန်ဖိုးက ကြေးပြားကြီး ၆၀၀ လောက် ရှိတယ် အဲဒီထဲကမှ ပိုးသတ်ဆေးဖိုး ကြေးပြားကြီး ၄၀၊ နွားငှားခ လယ်ယာသုံးကိရိယာနဲ့ မျိုးစပါးဖိုး ကြေးပြားကြီး ၂၀ ကုန်တယ်

ပြီးတော့ ဒေသခံ အထက်တန်းလွှာတွေ သတ်မှတ်ထားတဲ့ လယ်ခွန်စနစ်အရ မြို့နယ်၊ တပ်စခန်း၊ စီရင်စုနဲ့ နိုင်ငံတော်အတွက် တစ်မျိုးစီ ခွဲပေးရတာကြောင့် လယ်ဧက ၂၀ အတွက် အခွန် ကြေးပြားကြီး ၈၀ ပေးရတယ် ဒါဆိုရင် ကြေးပြားကြီး ၄၆၀ ကျန်မယ် အဲဒီထဲကမှ သီးစားချ တောင်သူနဲ့ မြေရှင်က ၇၀-၃၀ အချိုးနဲ့ ခွဲဝေယူကြတော့ တောင်သူက ကြေးပြားကြီး ၁၃၈ ပြား ရတယ်"

"သုံးယောက်ရှိတဲ့ သီးစားချ တောင်သူ မိသားစုက တစ်နှစ်ကို ကြေးပြားကြီး တစ်ထောင်ကျော်လောက် ဝင်ငွေရှိပေမယ့် နေ့စဉ် စားသောက်စရိတ်တွေ နုတ်လိုက်ရင် သိပ်အများကြီး မကျန်တော့ဘူးပဲ"

ဝမ်ရှိုကျဲ့ နှာခေါင်းကို ပွတ်သပ်ရင်း အနည်းငယ် အံ့သြသွားသည်။ သူက လယ်ယာစိုက်ပျိုးရေးက ရတဲ့ ဝင်ငွေကို တွက်ချက်ဖူးပေမယ့် သီးစားချ တောင်သူတွေရဲ့ အကျိုးအမြတ်ကို သေသေချာချာ မစဉ်းစားမိခဲ့ပေ။

"သီးစားချ တောင်သူတွေက အန္တရာယ်ကို ပိုခံနိုင်ရည်ရှိတာက သူတို့နောက်မှာ ရွှမ်းဝူ အထက်တန်းလွှာတွေ ရှိနေလို့ပဲ"

ကုန်းစွန်းဟွေးက ဆက်ပြောသည်။

"လုပ်ငန်းလည်ပတ်မှု တည်ငြိမ်စေဖို့အတွက် မြေရှင်က သူတို့ကို အကာအကွယ် ပေးထားတယ် သီးနှံပျက်စီးရင်တောင်မှ သူတို့က ကြေးပြားကြီး ၆၀ ရနေဦးမှာပဲ ဒါကြောင့် သူတို့က စိတ်အေးလက်အေး စိုက်ပျိုးနိုင်ကြတာပေါ့"

ဒါပေမယ့် ဒီအကျိုးအမြတ်တွေက ငွေသားသက်သက် မဟုတ်ဘဲ ပစ္စည်းနဲ့ ငွေသား ပေါင်းစပ်ထားတဲ့ စာရင်းပေါ်က တန်ဖိုးတွေသာ ဖြစ်သည်။

"ဒါ့အပြင် သီးစားချ တောင်သူတွေက ကြက် ဘဲ ငန်း စတာတွေကိုလည်း တစ်နိုင်တစ်ပိုင် မွေးမြူကြသလို အိမ်ဘေးနားမှာလည်း ဟင်းသီးဟင်းရွက်တွေ စိုက်ကြတယ် ဒါတွေကိုလည်း ငါတို့ အထက်တန်းလွှာတွေကိုပဲ ပြန်သွင်းကြတော့ တစ်နှစ်ကို အသားတင် အမြတ် ကြေးပြားကြီး ၂၀၊ ၃၀ လောက် ရတယ်

စိုက်ပျိုးရာသီ မဟုတ်တဲ့ အချိန်တွေမှာဆိုရင်လည်း ငါတို့က သူတို့ကို မြေယာဖော်ထုတ်တာ မြစ်ချောင်းတွေ တူးဖော်တာ အိမ်ဆောက်တာ တာတမံ ပြုပြင်တာတွေ လုပ်ခိုင်းတော့ အဲဒီကနေလည်း ကြေးပြားကြီး ၂၀ လောက် ရသေးတယ် ဒါကြောင့် ပျမ်းမျှ သီးစားချ တောင်သူ မိသားစုတစ်စုက တစ်နှစ်ကို ကြေးပြားကြီး ၁၈၀၊ ၁၉၀ လောက် ဝင်ငွေရှိတယ် ဘေးဒုက္ခကြုံတဲ့ နှစ်တွေမှာတောင်မှ ကြေးပြားကြီး ၁၀၀ ကျော်လောက် ဝင်ငွေ ရနေတုန်းပဲ"

ဝမ်ရှိုကျဲ့ ခေါင်းတငြိမ့်ငြိမ့် လုပ်လိုက်သည် ကြည့်ရတာ သီးစားချ တောင်သူတွေရဲ့ ဘဝက အတော်လေး တည်ငြိမ်ပုံရသည် သူတို့မှာ အားကိုးစရာ မြေရှင် ရှိနေတာကိုး ဘေးဒုက္ခကြုံတဲ့ နှစ်တွေမှာတောင် ခါးပတ် စည်းစားရင် အဆင်ပြေနိုင်သေးသည် သီးနှံ အထွက်ကောင်းရင်တော့ ငွေအတော်အတန် စုဆောင်းမိနိုင်ပေသည်။

"ဒါပေမယ့် ကိုယ်ပိုင်လယ်စိုက်တဲ့ တောင်သူတွေကျတော့ တခြားစီပဲ"

ကုန်းစွန်းဟွေးက ဆက်ပြောသည်။

"ခုနက ပြောခဲ့တဲ့ မိသားစုကိုပဲ ဥပမာထားကြည့်မယ် ကိုယ်ပိုင်လယ် ဧက ၂၀ ရှိတဲ့ တောင်သူတစ်ယောက်က ဒီရာသီမှာ အထွက်နှုန်း ၇၀ ရာခိုင်နှုန်း လျော့သွားရင် သူတို့က ကြေးပြားကြီး ၉၀ ပဲ ရတော့မယ် နွားငှားခနဲ့ မျိုးစပါးဖိုး ၁၀ ပြား၊ ပိုးသတ်ဆေးဖိုး ၂၀ ပြား နုတ်လိုက်ရင် အခွန် ၅ မျိုး ပေးရဦးမယ် မြို့နယ်၊ တပ်စခန်း၊ စီရင်စု၊ နိုင်ငံတော်နဲ့ အခု ကောက်ခံနေတဲ့ နွေရာသီ အခွန်တွေပေါ့ လယ်ဧက ၂၀ အတွက် အခွန် ၅၀ ပေးရမယ်ဆိုတော့ သူတို့လက်ထဲမှာ ဘယ်လောက် ကျန်တော့မှာလဲ"

အစောပိုင်းက ပြောခဲ့သည့်အတိုင်း ရွှမ်းဝူ အထက်တန်းလွှာများသည် ငြိမ်းချမ်းရေးကို ထိန်းသိမ်းရန်နှင့် နယ်မြေကို ကာကွယ်ရန် တာဝန်ရှိသည်။ ဓားပြများ၊ သားရဲတိရစ္ဆာန်များ သို့မဟုတ် အခြား ဆိုးရွားသော ဖြစ်ရပ်များ ပေါ်ပေါက်လာပါက အထက်တန်းလွှာများက ဝင်ရောက် နှိမ်နင်းပေးရသလို ဒေသခံ တပ်စခန်းများကို အခွန်ကောက်ခံရာတွင်လည်း ကူညီပေးရသည်။ ထို့ကြောင့် အထက်တန်းလွှာများသည် ၎င်းတို့၏ သြဇာလွှမ်းမိုးမှု နယ်မြေအတွင်းရှိ ကောင်းမွန်သော လယ်မြေများမှ အခွန်တစ်မျိုး ကောက်ခံရခြင်း ဖြစ်သည်။

သို့သော် ဝမ်မျိုးနွယ်စု၏ အာဏာစက် နယ်ပယ်မှာ လက်ရှိတွင် အလွန်သေးငယ်သေးသည်။ ၎င်းတို့၏ ကိုယ်ပိုင် လယ်ယာများတွင် သီးစားချ တောင်သူ ၆၀၀ ခန့် ရှိပြီး ၎င်းတို့၏ သြဇာလွှမ်းမိုးမှုသည် အိမ်ထောင်စု တစ်ထောင်ခန့်အပေါ်သာ သက်ရောက်မှု ရှိသည် ၎င်းတို့ စီမံခန့်ခွဲမှု အောက်ရှိ မြေဆီကောင်းသော လယ်မြေ စုစုပေါင်းမှာ ဧက ၂၀,၀၀၀ အောက်သာ ရှိပြီး နှစ်စဉ် အခွန်ငွေမှာ ရွှေတာရာ တစ်ရာကျော်သာ ရရှိသည်။ အသုံးစရိတ် အမျိုးမျိုး နုတ်လိုက်ပါက မရှိတာထက်စာရင် တော်သေးသည် ဟုသာ ပြောရမည်ဖြစ်သည်။

"ဒါဆို ဒီရာသီမှာ ကိုယ်ပိုင်လယ်စိုက်တဲ့ တောင်သူတွေက ဘာမှ ရိတ်သိမ်းစရာ မကျန်တော့ဘူးပေါ့"

ဝမ်ရှိုကျဲ့ မျက်ခုံးအနည်းငယ် တွန့်သွားပြီး မေးလိုက်သည်။

"ဒီလို အခြေအနေမျိုးမှာ အခွန် ဆက်ကောက်သင့်သေးလား"

"အခွန်ဆိုတာ နိုင်ငံတစ်နိုင်ငံရဲ့ အခြေခံအုတ်မြစ်ပဲ မြို့နယ်တွေ တပ်စခန်းတွေ စီရင်စုတွေနဲ့ နိုင်ငံတော်ကို ထောက်ပံ့ထားတာ လယ်ခွန်က အကြီးမားဆုံး အခွန်အမျိုးအစားပဲ အဲဒါမရှိရင် အဆင့်ဆင့်သော အဖွဲ့အစည်းတွေ ရပ်တည်ဖို့ ခက်ခဲလိမ့်မယ်"

ကုန်းစွန်းဟွေးက ရှင်းပြသည်။

"ဒီနွေရာသီ ရိတ်သိမ်းချိန်အတွက် လုံကျိုးစီရင်စုက နိုင်ငံတော်အခွန်ကို ကင်းလွတ်ခွင့် ပေးကောင်း ပေးနိုင်ပါတယ် ဒါပေမယ့် နောက်ဆုံးတော့ ကောင်းကောင်း စီမံခန့်ခွဲမှု မရှိတဲ့ ကိုယ်ပိုင်လယ်စိုက် တောင်သူ မိသားစုတချို့က အခက်အခဲကြီးကြီးမားမားနဲ့ ရင်ဆိုင်ရလိမ့်မယ် အဲဒီအချိန်ကျရင် တချို့ ရွှမ်းဝူ မျိုးနွယ်စုတွေက လယ်မြေတွေကို စပြီး သိမ်းပိုက်လာကြလိမ့်မယ်"

"ဥပမာ ကျောက်မျိုးနွယ်စုနဲ့ လျိုမျိုးနွယ်စုလိုပေါ့ သူတို့က ဒီတစ်ခေါက်မှာ အကြီးအကျယ် ရှုံးထားတော့ မျက်လုံးတွေ နီရဲနေပြီ ဒီလို ရှုပ်ထွေးနေတဲ့ အချိန်ကို အခွင့်ကောင်းယူပြီး လယ်မြေတချို့ကို သိမ်းပိုက်ချင်နေကြတဲ့ လက္ခဏာတွေ တွေ့နေရတယ်"

ကုန်းစွန်းဟွေးက မဲ့ပြုံး ပြုံးလိုက်သည်။

"ဝံပုလွေဆိုတာ ဝံပုလွေပါပဲ သူကောင်းမျိုးဆိုတဲ့ အရေခွံကို ဝတ်ထားရင်တောင် သူတို့ရဲ့ အငမ်းမရ လိုချင်တပ်မက်တတ်တဲ့ သဘောသဘာဝကိုတော့ ဖုံးကွယ်ထားလို့ မရပါဘူး"

…