ညီငယ်ညီမငယ်တွေ အားလုံးက တက်ကြွနေကြတာလား

"အမကြီးရယ် မေ့ထားလိုက်ပါတော့ဟာ"

ဝမ်ရှိုယုံး၏ အသံမှာ အနည်းငယ် တုန်ယင်နေလေသည်။

"စတုတ္ထဦးလေးက အရမ်းစွမ်းအားကြီးတာ အစ်ကိုကြီးတောင် သူ့ကို နိုင်ချင်မှနိုင်မှာ"

"မေ့ထားလိုက်ရမယ် ဟုတ်လား... ဝမ်ရှိုယုံး နင် ငါ့ငါးခြောက်တွေ စားတုန်းကကျတော့ မေ့ထားလိုက်မယ်လို့ မပြောပါလား"

ဝမ်လိချီသည် လူကြီးတစ်ယောက်လို လေသံဖြင့် ပြောလိုက်လေသည်။

"နင် ငါ့ပစ္စည်းတွေ စားထားတယ်ဆိုတော့ နင်က ငါ့လူပဲ... သတိပေးလိုက်မယ်နော် နင် ငါပြောတာ နားမထောင်ရင် စတုတ္ထဦးလေးကို ငါတို့ရဲ့ မဟာမိတ်အဖွဲ့အကြောင်း သွားတိုင်လိုက်မှာ"

"ဝမ်လိချီ နင် သိပ်လွန်လွန်းတယ် နင် ငါ့ကို ငါးခြောက်ကျွေးတုန်းက စတုတ္ထဦးလေးကို လုပ်ကြံရမယ်လို့ မပြောခဲ့ပါဘူး"

နောက်ထပ် အမျိုးသားတစ်ယောက်ဖြစ်သော ဝမ်ရှိုလျန်က ငိုသံပါကြီးဖြင့် ဝင်ပြောလေသည်။

"စတုတ္ထဦးလေးက ခရမ်းရောင်နန်းတော် အကယ်ဒမီကို ဝင်ခါနီးနေပြီ ဘယ်သူက သူ့ကို နိုင်မှာလဲ"

"ငတုံးရဲ့ နင့်ကို တစ်ယောက်တည်း သွားတိုက်ခိုင်းနေတာမှ မဟုတ်တာ"

ဝမ်လိချီက အထင်အမြင်သေးစွာဖြင့် ပြောလိုက်လေသည်။

"ငါတို့က အစီအစဉ်ဆွဲပြီး မဟာမိစ္ဆာဘုရင်ကြီးကို ထောင်ချောက်ဆင်ဖမ်းမယ် ပြီးရင် အားလုံး ဝိုင်းပြီး အိတ်စွပ်ရိုက်ကြမယ် ငါ အာမခံတယ် ဘယ်သူရိုက်မှန်းတောင် သူ သိလိုက်မှာ မဟုတ်ဘူး"

ဝမ်ရှိုကျဲ့မှာ ရယ်ရခက် ငိုရခက် ဖြစ်နေတော့သည်။ ဒီကလေးတစ်သိုက်က သူ့ကို ဝိုင်းရိုက်ဖို့ ကြံစည်နေကြပါလား။

အထူးသဖြင့် ဝမ်လိချီပင် ဖြစ်သည်။ သူ့ရှေ့မှာဆိုရင်တော့ ယုန်ဖြူလေးလို ချစ်စရာကောင်းလိုက်တာများ... ကွယ်ရာကျတော့ ဒီကလေးတစ်သိုက်ကို ဦးဆောင်ပြီး သူ့ကို သတ်ဖို့ ကြံစည်နေပါရောလား။

လေသံပြောင်းတာ မြန်လွန်းလို့ လူတောင် ကြောင်သွားရသည်။ ဝမ်လိချီရဲ့ "အမကြီး" ဆိုတဲ့ ဘွဲ့က အလကားရထားတာ မဟုတ်ပါလား။

"ဝမ်လော်ကျင်း နင်က ငါတို့ကို သစ္စာဖောက်မလို့လား"

နောက်ထပ် ကောင်မလေးတစ်ယောက်၏ စွာကျယ်ကျယ် အသံ ထွက်ပေါ်လာပြန်သည်။

"အမကြီး ပြောတယ် စတုတ္ထအစ်ကိုကြီးက ငါတို့ ဖတ်ဖို့ စာအုပ်တွေ အများကြီး ပြင်ဆင်ထားတယ်တဲ့ ဖတ်လို့မကုန်ရင် မျက်နှာကြီး မည်းပြီး ဆူတော့မှာတဲ့ နင်က စာဖတ်ရတာ ကြိုက်ပေမယ့် ငါတော့ မကြိုက်ဘူးနော်"

ဒါက ဝမ်ရှိုကျဲ့၏ တတိယဦးလေးမှ မွေးသော ဝမ်လော်ချိုး၏ အသံမှန်း သူ မှတ်မိလိုက်သည်။ ဒီနှစ်မှ ၁၁ နှစ်ပဲ ရှိသေးသော်လည်း သူမသည် ချီသန့်စင်ခြင်း ဒုတိယအဆင့်သို့ ရောက်နေပြီး ပါရမီထူးခြားကြောင်း ဝမ်လော်ကျင်း ပြောပြဖူးသည်။ ဝမ်ရှိုကျဲ့ အချိန်ရလျှင် သူမကို မြှောက်ပင့်ပေးရန် စီစဉ်ထားသော်လည်း အခွင့်မသာခဲ့ပေ။

"လော်ချိုး ငါလည်း စာမဖတ်ချင်ပါဘူး ဒါပေမယ့် စတုတ္ထအစ်ကိုကြီးကို ဒီလိုလုပ်လို့ ရမယ်မထင်ဘူး"

ဝမ်လော်ကျင်းက ပြောလိုက်လေသည်။

"စတုတ္ထအစ်ကိုကြီးက နင့်ထက် အများကြီး ပိုစွမ်းအားကြီးတယ်"

"လော်ချိုး နင့်မှာ ပိုးကောင်တွေ ရှိတယ်မလား"

ဝမ်လော်ချိုးက ထပ်ပြောပြန်သည်။

"နင် ပိုးကောင်တွေ လွှတ်ပြီး သူ့ကို ကိုက်ခိုင်းလိုက်လေ"

"ဟင့်အင်း ဟင့်အင်း မလုပ်ပါဘူး"

ဝမ်လော်ကျင်းက အလျင်အမြန် ခေါင်းခါလိုက်လေသည်။

ဝမ်ရှိုကျဲ့၏ မျက်နှာ တဖြည်းဖြည်း မည်းမှောင်လာတော့သည်။ ဘယ်လို ညီမတွေ တူမတွေပါလိမ့်။ စာမဖတ်ချင်ရုံ သက်သက်နဲ့ အစ်ကိုကြီးကို လုပ်ကြံဖို့ ကြံစည်နေကြပါလား။

ကံကောင်းစွာဖြင့် ဝမ်လော်ကျင်းက အသိဉာဏ်ရှိပြီး စတုတ္ထအစ်ကိုကြီးကို လေးစားသေးသဖြင့် ဝမ်ရှိုကျဲ့ စိတ်အနည်းငယ် သက်သာရာ ရသွားလေသည်။

"စတုတ္ထအစ်ကိုကြီးကို တိုက်ခိုက်ချင်ရင် ခရမ်းရောင် သလင်းကျောက် ပျားအုံ ဒုတိယအသုတ်ကို အကောင်ဖောက်ထားမှ ရမယ်"

ဝမ်လော်ကျင်းက တွက်ချက်ပြနေလေသည်။

"ပြီးတော့ ထိပ်တိုက်ရင်ဆိုင်ရင် နိုင်ဖို့လမ်း မရှိဘူး လော်ချိုး... နင်က စတုတ္ထအစ်ကိုကြီးရှေ့မှာ ခြေခေါက်လဲချင်ယောင်ဆောင်လိုက် အဲဒီအချိန်ကျရင် ငါ ခရမ်းရောင် သလင်းကျောက် ပျားတွေကို လွှတ်လိုက်မယ် နင်က ငယ်သေးတော့ စတုတ္ထအစ်ကိုကြီးက သေချာပေါက် ကာကွယ်ပေးမှာပဲ... အဲဒီလို ရှုပ်ထွေးနေတဲ့အချိန်ကျမှ ကိုကိုငါးနဲ့ ကိုကိုခြောက်က အိတ်စွပ်ပြီး ဝင်လုံးကြမယ်လေ..."

ချွေးစေးများ...

ဝမ်ရှိုကျဲ့၏ နဖူးမှ ချွေးစေးများ စီးကျလာတော့သည်။

ဒါ ဘယ်လို အကြံဉာဏ်ကြီးပါလိမ့်။ ကောက်ကျစ်စဉ်းလဲပြီး ရက်စက်လိုက်တာ... ငါက နင်တို့ အစ်ကိုလေဟ... အထူးသဖြင့် ဝမ်လော်ကျင်း... နင်က ခရမ်းရောင် သလင်းကျောက် ပျားအုံ လိုချင်တယ်ဆိုလို့ ဝယ်ပေးခဲ့တာ ငါလေဟ...

နေပါဦး... သူမ ခရမ်းရောင် သလင်းကျောက် ပျားတွေကို တကယ် မွေးမြူနိုင်ခဲ့တာလား။ တကယ့် ဘီလူးမလေးပါလား။

ဒီ ညီငယ်ညီမငယ်တွေ တူမတွေ မြေးမတွေက သူ့ရှေ့မှာဆိုရင်တော့ ရိုးသားတဲ့ ပုံစံလေးတွေနဲ့ လိမ္မာရေးခြား ရှိကြသော်လည်း ကွယ်ရာကျတော့ သူတို့ကို လျှော့တွက်မိမှန်း ဝမ်ရှိုကျဲ့ သိလိုက်ရတော့သည်။

"လော်ကျင်း... နင်က တကယ့်ကို ထက်မြက်တာပဲ"

အမကြီး ဝမ်လိချီက ချီးကျူးလိုက်လေသည်။

"ငါ နင့်ကို ရေဘဝဲခြောက် တစ်ထုတ် ဆုချမယ် ပြီးရင် ကြီးကျယ်ခမ်းနားတဲ့ ပင်လယ်ကြီးအကြောင်း ခမ်းနားထည်ဝါတဲ့ ရွှေရောင်သဲသောင်ကျွန်းမြို့တော်အကြောင်းနဲ့ ဒီသခင်မလေးက အဲဒီမြို့မှာ ဘယ်လိုတွေ ဗိုလ်ကျစိုးမိုးခဲ့လဲ ဆိုတာတွေ ပြောပြမယ်"

ဝမ်ရှိုကျဲ့ ပါးစပ် အနည်းငယ် လှုပ်ရမ်းသွားတော့သည်။ ဒီ ဝမ်လိချီ... မုန့်တွေကို မျှမျှတတ ခွဲဝေပေးခိုင်းလိုက်ပါတယ်ဆိုမှ အခုတော့ သူ့ကို လုပ်ကြံဖို့အတွက် သုံးနေပါလား။

ပြီးတော့ "ဗိုလ်ကျစိုးမိုးခဲ့တယ်" ဟုတ်လား။ ဒီကောင်မလေးမှာ ဘာစွမ်းရည်ရှိလို့လဲ။ သူမရဲ့ ဉာဏ်ရည်က ဝမ်လော်ကျင်းရဲ့ ခြေဖဝါးအောက်မှာ ပြားပြားဝပ်သွားလောက်တယ်။

"ဒါပေမယ့် အရင်ဆုံး သဘောတူထားရမယ့် အချက်တွေ ရှိတယ်နော်"

ဝမ်လော်ကျင်းက ပြောလိုက်လေသည်။

"စတုတ္ထဦးလေးကို ငါတို့ကို အတင်းအဓမ္မ စာမဖတ်ခိုင်းဖို့ ကတိ လက်မှတ်ထိုးခိုင်းရုံပဲ လုပ်ရမယ် ပြီးတော့ မျက်နှာကို မရိုက်ရဘူး သူက အရမ်းချောတာ မျက်နှာဖူးယောင်သွားရင် ကြည့်ကောင်းတော့မှာ မဟုတ်ဘူး"

ငါ နားမထောင်နိုင်တော့ဘူး...

ဝမ်ရှိုကျဲ့ ပြုံးလျက် လမ်းလျှောက် ထွက်လာလိုက်တော့သည်။

"လော်ကျင်း... နင် စတုတ္ထဦးလေးကို ဒီလောက် ဂရုစိုက်လိမ့်မယ်လို့ ထင်မထားဘူး ဦးလေး ရင်ထဲ နွေးထွေးသွားတာပဲ"

"ဟင်"

မိစ္ဆာဘုရင်ကြီးကို ဘယ်လို ကိုင်တွယ်ရမလဲဆိုပြီး အစီအစဉ်ဆွဲနေကြသော ကလေးတစ်သိုက်မှာ ကြက်သေသေသွားကြတော့သည်။ ဒါ နောက်နေတာလား။ သူတို့ ဒီလောက် ကောင်းကောင်း စီစဉ်နေတာကို မိစ္ဆာဘုရင်ကြီးက ခိုးနားထောင်နေပြီး လက်ပူးလက်ကြပ် မိသွားပြီတဲ့လား။

သွားပါပြီ...

အကြောက်ဆုံးကတော့ ဝမ်လော်ကျင်းနှင့် ဝမ်လိချီပင် ဖြစ်သည်။

တစ်ယောက်က ဦးဆောင်သူ နောက်တစ်ယောက်က အစီအစဉ်ဆွဲသူ... သူတို့နှစ်ယောက်လုံး ကောင်းသောသူများ မဟုတ်ကြပေ။

"စတုတ္ထဦးလေး မင်္ဂလာပါ... စတုတ္ထဦးလေး သွားတော့မယ်နော်"

ဝမ်လိချီ ခြေထောက်များ ပျော့ခွေသွားပြီး ထွက်ပြေးရန် ပြင်လိုက်သည်။

ဝမ်လော်ကျင်း၏ မျက်နှာ ဖြူဖပ်ဖြူရော် ဖြစ်သွားပြီး ဝမ်ရှိုယုံး၏ နောက်ကျောတွင် တိတ်တဆိတ် ဝင်ပုန်းနေလိုက်သည်။ မိန်းကလေး သုံးယောက်ထဲတွင် အသက် ၁၁ နှစ်သာ ရှိသေးသော ဝမ်လော်ချိုး တစ်ယောက်သာ ဝမ်ရှိုကျဲ့ကို စိုက်ကြည့်နေပြီး သူပေါ်လာသည့်အတွက် မကျေမနပ် ဖြစ်နေပုံရသည်။

ညီငယ် နှစ်ယောက်ဖြစ်သော ဝမ်ရှိုယုံးနှင့် ဝမ်ရှိုလျန်တို့မှာမူ သတ္တိအနည်းဆုံး ဖြစ်ပုံရသည်။ ဝမ်မျိုးနွယ်စု၏ ပညာရေးစနစ်တွင် ယောက်ျားလေးများကို ပိုမိုတင်းကျပ်စွာ ဆုံးမလေ့ရှိပြီး ဝမ်ရှိုကျဲ့သည် အစ်ကိုကြီး ဖြစ်သလို မျိုးနွယ်စုခေါင်းဆောင်လည်း ဖြစ်သဖြင့် သူ့ကို မလေးမစား လုပ်မိပါက ပြစ်ဒဏ်ခံရမည်မှာ သေချာပေသည်။

"ရပ်လိုက်စမ်း"

ဝမ်ရှိုကျဲ့ ပြုံးရင်း ပြောလိုက်လေသည်။

"ဝမ်လိချီ ဝမ်လော်ကျင်း... နင်တို့ သေချာ စဉ်းစားနော် ပြေးမလွတ်ဘူးဆိုတာ"

မိန်းကလေးနှစ်ယောက် တစ်ယောက်မျက်နှာ တစ်ယောက်ကြည့်ကာ ငုံးကလေးများပမာ ဝမ်ရှိုကျဲ့ရှေ့သို့ လိမ်လိမ်မာမာ ပြန်ရောက်လာကြတော့သည်။

"စတုတ္ထဦးလေး... သမီးတို့ နောက်မလုပ်တော့ပါဘူး"

"စတုတ္ထဦးလေး... ဟင့်... သမီးတို့က ဦးလေးကို စတာပါ"

ဝမ်ရှိုကျဲ့ သူတို့ကို ဂရုမစိုက်ဘဲ ဝမ်ရှိုယုံးနှင့် ဝမ်ရှိုလျန်ဘက်သို့ လှည့်ကြည့်ကာ ပြုံးလျက် မေးလိုက်လေသည်။

"ရှိုယုံး... ရှိုလျန်... မင်းတို့က စတုတ္ထဦးလေးအပေါ် မကျေနပ်စရာတွေ ရှိနေတာလား"

ညီငယ်နှစ်ယောက် ကြောက်လန့်တကြား ခေါင်းခါလိုက်ကြသည်။

"မရှိပါဘူး မရှိပါဘူး... ကျွန်တော်တို့က စတုတ္ထဦးလေးကို အမြဲတမ်း လေးစားပါတယ်"

ဒါက အမှန်တရားပင် ဖြစ်သည်။ ရှို မျိုးဆက်ထဲတွင် ဝမ်ရှိုကျဲ့သည် တောက်ပသော ကြယ်တစ်ပွင့်ကဲ့သို့ ဖြစ်ပြီး သူတို့အားလုံး ရင်ထဲကနေ လေးစားကြသည်။

"ဒါဆို ဘာလို့ ဒီတစ်ခေါက် စတုတ္ထဦးလေးကို အိတ်စွပ်ရိုက်ဖို့ ကြိုးစားကြတာလဲ တစ်ယောက်ယောက်များ မြှောက်ပေးလိုက်လို့လား"

ဝမ်ရှိုကျဲ့ ဒီစကားကို ပြောလိုက်တော့ ရင်ထဲတွင် မူးဝေချင်သလို ဖြစ်သွားသည်။ သူ့ကို အိတ်စွပ်ရိုက်မယ်တဲ့... ဒီကောင်တွေ တော်တော်လေး ဖန်တီးဉာဏ် ကောင်းကြတာပဲ။

"ဟင့်အင်း... ဘယ်သူမှ မခိုင်းပါဘူး"

သူတို့နှစ်ယောက်စလုံး ခေါင်းခါလိုက်ကြသည်။ ကြောက်နေကြသော်လည်း ဆက်ပြောလေသည်။

"ဒါ ကျွန်တော်တို့ ကိုယ်ပိုင် အကြံဉာဏ်ပါ စတုတ္ထအစ်ကိုကြီး အပြစ်ပေးချင်ရင် ပေးပါ ကျွန်တော်တို့ ခံယူပါ့မယ်"

ဒါမှ ဝမ်မျိုးနွယ်စုရဲ့ ယောက်ျားကောင်း ပီသတာပေါ့။ ဝမ်ရှိုကျဲ့ စကားပြောမည့်ဆဲဆဲမှာပင် သူ့ကို မျက်ထောင့်နီကြီးဖြင့် စိုက်ကြည့်နေသော ဝမ်လော်ချိုးက ခါးထောက်ပြီး ဝင်ပြောလေသည်။

"စတုတ္ထအစ်ကိုကြီး... အစ်ကိုကြီးက အနိုင်ကျင့်တယ်"

ကောင်မလေးက ငယ်သော်လည်း အတော်လေး ဟိတ်ဟန်ပါလေသည်။

"လော်ချိုး"

ဝမ်ရှိုကျဲ့ ရယ်လိုက်မိသည်။

"ပြောပါဦး စတုတ္ထအစ်ကိုကြီးက ညီမလေးကို ဘယ်လို အနိုင်ကျင့်လို့လဲ"

"ညီမလေး အဲဒီစာအုပ်တွေ မဖတ်ချင်ဘူး အရမ်းပျင်းစရာ ကောင်းတာပဲ"

ဝမ်လော်ချိုးက ခေါင်းကိုက်နေသည့် ပုံစံဖြင့် ပြောလိုက်လေသည်။

"စတုတ္ထအစ်ကိုကြီး... ညီမလေးကို စာမဖတ်ခိုင်းဘဲ နေလို့ မရဘူးလားဟင်"

"ညီမလေး မဖတ်ချင်ရင် မဖတ်နဲ့လေ"

ဝမ်ရှိုကျဲ့ ခေါင်းငြိမ့်လိုက်သည်။

"တကယ်လား"

ဝမ်လော်ချိုး အလွန် ဝမ်းသာသွားလေသည်။

"စတုတ္ထအစ်ကိုကြီးက အကောင်းဆုံးပဲ"

"အရမ်းကြီး မပျော်နဲ့ဦး မဖတ်ချင်ရင် ခံဝန်ချက် တစ်ခုတော့ ရှိတယ်"

ဝမ်ရှိုကျဲ့က မောင်နှမ လေးယောက်နှင့် တူမ တစ်ယောက်ကို ကြည့်ရင်း ပြုံးလိုက်လေသည်။

"ငါက အစ်ကိုကြီးအနေနဲ့ (သို့) မျိုးနွယ်စုခေါင်းဆောင် အနေနဲ့ နင်တို့ကို အတင်းအဓမ္မ စာဖတ်ခိုင်းရင် ဟန်ပြပဲ လုပ်ကြမှာ ကြိုးကြိုးစားစား ဖတ်ကြမှာ မဟုတ်ဘူး အဲဒီတော့ သဘောတူညီချက် တစ်ခု လုပ်ကြမယ်... နှစ်တိုင်း ငါ့ကို အတိအလင်း ဖြစ်ဖြစ် တိတ်တဆိတ် ဖြစ်ဖြစ် စိန်ခေါ်ခွင့် ပေးမယ်... နင်တို့ နိုင်ရင် နင်တို့ လုပ်ချင်တာ လုပ်ခွင့်ပေးမယ်... ရှုံးရင်တော့ တစ်နှစ်လုံး ကြိုးကြိုးစားစား စာဖတ်ရမယ်"

"ကောင်းပြီ သဘောတူတယ်"

ဝမ်လော်ချိုး၏ မျက်လုံးများ အရောင်လက်သွားလေသည်။

"အားလုံးကိုယ်စား ညီမလေး သဘောတူလိုက်ပြီ"

ကျန်တဲ့သူများက သူမကို အနည်းငယ် မကျေမနပ် ကြည့်လိုက်ကြသည်။ ဘယ်သူက သူမကို အားလုံးကိုယ်စား သဘောတူခွင့် ပေးလိုက်လို့လဲ။ စတုတ္ထအစ်ကိုကြီး သတိ မထားမိခင်တုန်းကဆိုရင်တော့ အစီအစဉ်ဆွဲပြီး လုပ်ကြံဖို့ မျှော်လင့်ချက် ရှိကောင်း ရှိနိုင်သေးသည်။ အခုတော့ သူက သိသွားပြီဆိုတော့ ဘယ်လိုလုပ် စိန်ခေါ်နိုင်တော့မှာလဲ။

"အားမလျှော့ကြနဲ့ဟာ ရှုံးရင် ပိုပြီး ကြိုးစားလေ့လာ ကျင့်ကြံရုံပေါ့ နောက်နှစ်မှ နိုင်အောင် တိုက်ကြတာပေါ့"

ဝမ်လော်ချိုးက စိတ်ဓာတ်ခွန်အား အပြည့်ဖြင့် ပြောလိုက်လေသည်။

ဝမ်ရှိုကျဲ့ သူမ၏ သတ္တိနှင့် ပြတ်သားမှုကို အနည်းငယ် သဘောကျသွားမိသည်။ ငယ်ငယ်ရွယ်ရွယ်နဲ့ ချီသန့်စင်ခြင်း ဒုတိယအဆင့်ကို ရောက်နေတာ မဆန်းပါဘူး။ မိသားစုရဲ့ လက်ရှိ အရင်းအမြစ်တွေနဲ့ဆိုရင် သူမဟာ ဘိုးဘေးလုံယန်လောက် မဟုတ်ရင်တောင် အမျိုးသမီး သူရဲကောင်းတစ်ယောက် ဖြစ်လာမှာ သေချာပါသည်။

ဝမ်ရှိုကျဲ့သည် ဒီလို ကြုံတွေ့လိုက်ရသည့်အတွက် အနည်းငယ် အံ့သြမိသော်လည်း ညီမငယ်များက အတော်လေး တက်ကြွလန်းဆန်းနေသည်ဟု တွေးမိသည်။ သို့သော် ညီငယ်နှစ်ယောက်ကတော့ စိတ်ဓာတ်ခွန်အား နည်းပြီး အနည်းငယ် ထိုင်းမှိုင်းနေကြသည်။ သူတို့ကို သွေးပေးပြီး ပွတ်သပ်ပေးဖို့ လိုအပ်နေသေးသည်။

မိသားစုတစ်ခုဆိုတာ ဝမ်ရှိုကျဲ့ တစ်ယောက်တည်းအပေါ် မှီခိုနေလို့ မရဘူး။ ထူးချွန်ထက်မြက်တဲ့ လူတော်လူကောင်းတွေ များများပေါ်ထွက်လာမှ မျိုးဆက်သစ်တွေ အဆက်မပြတ် ပေါ်ထွက်လာမှသာ မိသားစုက တကယ်တမ်း အင်အားကြီးမားလာမှာ ဖြစ်ပါတယ်။

"ဟဲဟဲ... နင်တို့ကို တစ်ခုလောက် သင်ပေးလိုက်မယ်"

ဝမ်ရှိုကျဲ့ ရယ်ရင်း ပြောလိုက်လေသည်။

"တစ်ခုခုကို အစီအစဉ်ဆွဲတော့မယ်ဆိုရင် လူသူကင်းဝေးပြီး လုံခြုံတဲ့ နေရာကို ရှာရတယ်ကွ"

"စတုတ္ထအစ်ကိုကြီး... ညီမလေး တောင်းပန်ပါတယ်"

ဝမ်လော်ချိုး မျက်ရည်ဝဲလျက် အနားသို့ ရောက်လာပြီး ပြောလေသည်။

"အစ်ကိုကြီးက ညီမလေးအပေါ် အရမ်းကောင်းပေမယ့် ညီမလေးက စာမဖတ်ချင်လို့ပါ... ဝူး ဝူး..."

"ကိစ္စမရှိပါဘူး ညီမလေးကို အပြစ်မတင်ပါဘူး"

ဝမ်ရှိုကျဲ့ လော်ချိုးကို သနားသွားမိသည်။ သူတို့၏ စတုတ္ထဦးလေး စောစီးစွာ ကွယ်လွန်သွားသဖြင့် သားအမိတွေ ကျန်ရစ်ခဲ့ရသည်။ မိသားစုက စောင့်ရှောက်ထားသော်လည်း ဖခင်မေတ္တာတော့ လိုအပ်နေရှာသည်။

"ညီမလေးကို ခွင့်လွှတ်ပေးမှာလားဟင် စတုတ္ထအစ်ကိုကြီး"

ဝမ်လော်ချိုးက မျှော်လင့်ချက်အပြည့်ပါသော မျက်ဝန်းများဖြင့် မော့ကြည့်နေလေသည်။

"ဘာကို အပြစ်တင်စရာ ရှိလို့လဲ အစကတည်းက အစ်ကိုကြီး ညီမလေးကို အပြစ်မတင်ခဲ့ပါဘူး"

ဝမ်ရှိုကျဲ့ သူမ၏ ခေါင်းလေးကို ပွတ်သပ်ပေးရင်း နှစ်သိမ့်လိုက်သည်။

"တကယ်တော့ နင်တို့ အခုလို တက်ကြွနေတာ ကိုယ်ပိုင် အတွေးအခေါ်လေးတွေ ရှိနေတာ နည်းနည်းလေး ဆိုးချင်နေတာတွေက သဘာဝကျပါတယ်လို့ အစ်ကိုကြီး ထင်ပါတယ် ဘာပဲဖြစ်ဖြစ် နင်တို့က ငါ့ကို တကယ် ဒုက္ခပေးချင်ကြတာမှ မဟုတ်တာ"

ဖြစ်နိုင်ပါ့မလား...

ဝမ်လိချီ အံ့သြသွားလေသည်။ သူမသည် ဘဲတစ်ကောင်လို လှုပ်တုပ်လှုပ်တုပ်ဖြင့် အနားသို့ အမြန်တိုးကပ်သွားပြီး သူမ၏ ဖောင်းကားနေသော ပါးမို့မို့လေးများဖြင့် ဟန်ဆောင်တောင်းပန်သော အမူအရာ လုပ်လိုက်လေသည်။

"စတုတ္ထဦးလေး... စတုတ္ထဦးလေး... သမီးလည်း နည်းနည်း ဆိုးချင်နေတာပါ ဦးလေး သမီးကိုလည်း အပြစ်မတင်လောက်ဘူး မဟုတ်လားဟင်"

"ထွက်သွားစမ်း"

ဝမ်ရှိုကျဲ့ ဒေါသတကြီး စိုက်ကြည့်လိုက်ရာ ဝမ်လိချီ ကြောက်လန့်တကြား နောက်သို့ ခြေလှမ်းအနည်းငယ် ဆုတ်သွားရသည်။ သူမသည် တုန်လှုပ်နေသော ရင်ဘတ်ကို ဖိရင်း စိတ်ပျက်လက်ပျက် ဖြစ်သွားရသည်။ ဘာလို့ ဝမ်လော်ကျင်းကျတော့ ချွဲလို့ရပြီး ငါကျတော့...

"စတုတ္ထအစ်ကိုကြီး ကျေးဇူးတင်ပါတယ်"

ဝမ်လော်ကျင်းသည် မျက်လုံးများကို တစ်ဝက်မှိတ်ကာ ဝမ်ရှိုကျဲ့၏ ရင်ခွင်ထဲသို့ ဝင်တိုးလိုက်လေသည်။

"ဘာပဲဖြစ်ဖြစ် ညီမလေး ကျိန်ဆိုပါတယ် တစ်သက်လုံး စတုတ္ထအစ်ကိုကြီးကို ကာကွယ်သွားပါ့မယ်"

"ဟဲဟဲ... လော်ကျင်း... ညီမလေးရဲ့ စကားတွေက တကယ်ပဲ ထိမိပါတယ် အစ်ကိုကြီး ယုံပါတယ်"

ဝမ်ရှိုကျဲ့ ရယ်လိုက်လေသည်။

"ဒါပေမယ့် လာချွဲနေတုန်း အစ်ကိုကြီး ရင်ခွင်ထဲကို ထူးဆန်းတဲ့ ပိုးကောင်တွေ ပစ်မထည့်ပါနဲ့လား ညီမလေးရဲ့ မြှူဆွယ်တဲ့ နည်းလမ်းလေးတွေက အစ်ကိုကြီးအပေါ်မှာ မတိုးဘူးကွ"

ထိုသို့ပြောရင်း သူ လက်ချောင်းလေးကို ပတ္ လိုက်ရာ တစ်ပေကျော်ခန့် ရှည်သော ခေါင်းနီ ကင်းခြေများတစ်ကောင် လွင့်ထွက်သွားလေသည်။ ထိုကင်းခြေများသည် မြေကြီးပေါ်တွင် ခဏမျှ တွန့်လိမ်နေပြီးနောက် အသက်ထွက်သွားတော့သည်။