ကြမ်းတမ်းသော အစွမ်း

~"ဒါ... ဒါ ဘယ်လို စွမ်းအားမျိုးလဲ"

ခဏတာ ထိပ်တိုက် တွေ့ဆုံလိုက်ရုံနှင့်တင် ကောင်းကင်ဝံပုလွေ တစ်ယောက် မယှဉ်သာသော စွမ်းအားကြီး တစ်ခု၏ ရိုက်ခတ်မှုကြောင့် လွင့်စင်သွားရသဖြင့် ကြောက်လန့်တကြား ရေရွတ်လိုက်မိသည်။

"အစ်ကို"

ကောင်းကင်ကျားသည်လည်း ထိတ်လန့်တုန်လှုပ်သွားသည်။

တစ်လတည်းနှင့်... ဖုန်းဝူချန်၏ စွမ်းအားသည် ဤမျှအထိ ကြောက်မက်ဖွယ် ကောင်းလာခဲ့ပြီ ဖြစ်သည်။

"ရွှစ်.."

နောက်တစ်စက္ကန့်တွင် ပေတိုယန်သည် သရဲတစ္ဆေတစ်ကောင်အလား ကောင်းကင်ကျားရှေ့သို့ ရောက်လာပြီး ပိတ်ဆို့လိုက်လေသည်။

"မင်းရဲ့ ပြိုင်ဘက်က ငါကွ"

ဟု ပေတိုယန်က မျက်နှာသေဖြင့် ပြောလိုက်၏။

ဘွားခနဲ ပေါ်လာသော ပေတိုယန်ကြောင့် ကောင်းကင်ကျား လန့်ဖျပ်သွားပြီး ခြေလှမ်းအနည်းငယ် နောက်ဆုတ်လိုက်မိသည်။

ကောင်းကင်ကျား၏ မျက်နှာကြီး နီရဲလာပြီး ရက်စက်စွာ ပြုံးလိုက်သည်။

"ခွေးကောင်လေး မင်း ငါ့လက်နဲ့ သေချင်နေတာလား"

"ဘုန်း"

"အား..."

ကောင်းကင်ကျား လှုပ်ရှားရန် ပြင်လိုက်စဉ်မှာပင် ပေါက်ကွဲသံကြီးတစ်ခု ထွက်ပေါ်လာသည်။ သူ၏ မျက်နှာထား ပြောင်းလဲသွားပြီး နာကျင်စွာ အော်ဟစ်လျက် အမြောက်ဆံတစ်စင်းအလား လွင့်စင်ထွက်သွားရရှာသည်။

"တစ်လပဲ ရှိသေးတာကို... ဒီကောင်လေးရဲ့ စွမ်းအားက ဘယ်လိုလုပ် ဒီလောက် ကြောက်စရာ ကောင်းသွားရတာလဲ"

ကောင်းကင်ကျား မယုံကြည်နိုင်စွာ အော်ဟစ်လိုက်မိသည်။

ပေတိုယန်၏ အမြန်နှုန်းက သာမန်ထက် လွန်ကဲနေသဖြင့် ကောင်းကင်ကျား မြင်ပင် မမြင်လိုက်ရချေ။

"အားရစရာ.. ကောင်းလိုက်တဲ့ စွမ်းအား"

ပေတိုယန်၏ နှုတ်ခမ်းထောင့်စွန်းတွင် အန္တရာယ်များသော အပြုံးတစ်ခု ဖြစ်ပေါ်လာသည်။ သူသည် ခြေဖျားဖြင့် မြေကြီးကို တို့ထိလိုက်ပြီး လေပွေတစ်ခုအသွင် ပြောင်းလဲကာ အရှိန်အဟုန်ဖြင့် တိုးဝင်သွားလေသည်။

"ကိုကြီးပေတိုရဲ့ စွမ်းအားက တဖြည်းဖြည်း ပိုကြမ်းလာပြီ"

ပေတိုထျန်းယဲ့သည် စိတ်လှုပ်ရှားစွာ အော်ပြောလိုက်သည်။

"ဆေးဧကရာဇ်ရဲ့ စွမ်းအားက ပိုတောင် ကြောက်စရာ ကောင်းသေးတယ်... ဒီအရှိန်အဝါက ကောင်းကင်ဘုံ လူသား အဆင့်လည်း မဟုတ်ဘူး... ထျန်းယွမ်ဘုံ နဝမအလွှာ အထွတ်အထိပ်လည်း မဟုတ်ဘူး... ဘယ်အဆင့်လဲ ဆိုတာ ငါ မခန့်မှန်းတတ်တော့ဘူး။ ဒါပေမဲ့ ဓားတစ်ချက်တည်းနဲ့ ကောင်းကင်ဝံပုလွေကို လွင့်ထွက်သွားစေတာကို ကြည့်ရင်... ဘယ်လောက် ကြောက်စရာကောင်းလဲ သိသာတယ်"

နန်းကုန်းကျန့်က ဖုန်းဝူချန်ကို ကြည်ညိုလေးစားစွာ ကြည့်ရင်း ပြောလိုက်သည်။

"ဂိုဏ်းချုပ်က ကောင်းကင်ဘုံ လူသား အဆင့်ကို မရောက်သေးတာတော့ သေချာတယ်"

ချီဟွမ်က အတိအကျ ပြောလိုက်သည်။

"သူတို့ သေဖို့ပဲ ရှိတော့တယ်..."

မြောင်ချင်းချင်းက အေးစက်စွာ ပြောလိုက်သည်။ လန်ယွဲ့သာ မရှိခဲ့လျှင် သူတို့အားလုံး သေဆုံးသွားနိုင်သည် မဟုတ်ပါလော။

ဤမျှ ကြီးမားသော ခြိမ်းခြောက်မှုကို ဖုန်းဝူချန်က ဘယ်လိုလုပ် အလွတ်ပေးပါ့မလဲ။

ပေတိုယန်သည် ကြမ်းတမ်းသော တိုက်ခိုက်မှုများကို တရစပ် ပြုလုပ်နေသည်။ ကောင်းကင်ကျားသည် လုပ်ကြံသတ်ဖြတ်သူ တစ်ဦးအဖြစ် နှစ်ပေါင်းများစွာ ကျင်လည်ခဲ့ပြီး လှည့်ကွက်များ၊ နည်းစနစ်များ ကြွယ်ဝသော်လည်း၊ ပေတိုယန်၏ တိုက်ခိုက်မှုများကို မခုခံနိုင်ချေ။ ပေတိုယန်သည် နည်းစနစ်များကို ဂရုမစိုက်ဘဲ အသားကုန် ဖိတိုက်နေခြင်း ဖြစ်သည်။

ကောင်းကင်ကျား ဘယ်လို သိုင်းကွက်တွေပဲ သုံးသုံး၊ ပေတိုယန်က လက်သီးသက်သက်ဖြင့် ဖြိုခွင်းပစ်လိုက်သည်။

"ကျားသစ်"

ကောင်းကင်ကျား ခံနေရသည်ကို မြင်သောအခါ ကောင်းကင်ဝံပုလွေ စိတ်ပူသွားသည်။

"ဝှစ်.."

ကောင်းကင်ဝံပုလွေ ဝင်ကူရန် ပြင်လိုက်ချိန်မှာပင် ဖုန်းဝူချန်၏ ပုံရိပ်က ရှေ့က ပိတ်ရပ်လိုက်လေသည်။

"သူ့ကို ကယ်ချင်ရင်... ငါ့ကို အရင် ကျော်သွားလိုက်"

ဖုန်းဝူချန်က အေးစက်စွာ ပြောလိုက်ပြီး 'အထွတ်အထိပ် နဂါးနတ်ဘုရား ဓား' ဖြင့် ကောင်းကင်ဝံပုလွေ၏ နှလုံးသားတည့်တည့်ကို ထိုးစိုက်လိုက်တော့သည်။

"ဖုန်းဝူချန်..."

ကောင်းကင်ဝံပုလွေ အံကြိတ်လိုက်သည်။ သူ့မျက်နှာကြီး ရှုံ့တွသွားပြီး သတ်ဖြတ်လိုစိတ်များ ကောင်းကင်သို့ ထိုးတက်သွား၏။

"ဝီ..."

ကောင်းကင်ဝံပုလွေသည် အစွမ်းကုန် ထုတ်သုံးလိုက်ရာ မြေကြီးများ ချိုင့်ဝင်သွားပြီး အက်ကွဲကြောင်းကြီးများ ဖြစ်ပေါ်လာသည်။

သူ၏ စွမ်းအားသည် ကောင်းကင်ကျားထက် အနည်းငယ် သာလွန်လေ၏။

"ထွက်သွားစမ်း"

ကောင်းကင်ဝံပုလွေက မိုးပေါ်သို့ မော့ကာ အော်ဟစ်လိုက်ရာ ကြောက်မက်ဖွယ် စွမ်းအင်လှိုင်းများ ထွက်ပေါ်လာသည်။ ဖုန်းဝူချန်သည် ထိုစွမ်းအင်လှိုင်း၏ ရိုက်ခတ်မှုကြောင့် နောက်သို့ ဆုတ်ခွာသွားရသည်။

"မင်းက ဖန်ရှောင်ယွင်လောက်တောင် မစွမ်းပါဘူးကွာ... မင်း ဘယ်သူပဲ ဖြစ်ဖြစ်၊ ဒီနေ့ မင်း သေရမယ်"

ဖုန်းဝူချန်က အေးစက်စွာ ပြောလိုက်သည်။ သူ၏ ကျောဘက်မှ အတောင်ပံများကို ခတ်လိုက်ပြီး ဓားကို ကိုင်ဆောင်ကာ ထပ်မံ တိုးဝင်သွားပြန်၏။

ယခုတစ်ကြိမ်တွင် ဖုန်းဝူချန်၏ အရှိန်အဟုန်က ပိုမို ကြမ်းတမ်းလာပြီး၊ အမြန်နှုန်းကလည်း ပိုမို လျင်မြန်လာသည်။

ဖုန်းဝူချန်သည် ဟန်ရေးပြမနေဘဲ ဓားကို တည့်တည့် ထိုးစိုက်လိုက်သည်။ ရိုးရှင်းသော်လည်း ထိုဓားချက်တွင် ပါဝင်သော စွမ်းအားက ကြောက်ခမန်းလိလိပင်။

ထိုအခါ၊ ကောင်းကင်ဝံပုလွေ ထိတ်လန့်သွားပြီး လက်နှစ်ဖက်ကို ပူးကာ အော်ဟစ်လိုက်သည်။

"နက်နဲခြင်းအဆင့် ထိပ်တန်း သိုင်းပညာ၊ ကောင်းကင် လေစွမ်းအင် ဒိုင်း"

လေပွေ တစ်ခုသည် သူ့ရှေ့တွင် စုစည်းသွားပြီး ကြီးမားသော လေစွမ်းအင် ဒိုင်းကြီးတစ်ခု ဖြစ်ပေါ်လာ၏။

"ဒင်"

"ဝီ..."

ဖုန်းဝူချန်သည် မိုးကြိုးပစ်ချလိုက်သကဲ့သို့ အရှိန်ပြင်းပြင်း ဝင်ရောက်လာပြီး လေစွမ်းအင် ဒိုင်းကို ဓားဖြင့် ထိုးစိုက်လိုက်သည်။ သတ္တုချင်း ထိခတ်သံ ကျယ်လောင်စွာ ထွက်ပေါ်လာပြီး ကောင်းကင်ဝံပုလွေသည် ဒိုင်းနှင့်အတူ နောက်သို့ မီတာအနည်းငယ် ဆုတ်ခွာသွားရသည်။ မြေကြီးများ အက်ကွဲကုန်ကြ၏။

"ကောင်းကင်ဝံပုလွေ... မင်း တကယ်ပဲ ဒီလောက် စွမ်းတယ်လို့ ထင်နေတာလား..."

ဟု ဖုန်းဝူချန် အံကြိတ်ကာ မေးလိုက်သည်။

"ထင်ယောင်ထင်မှား ဖျက်ဆီးခြင်း ဓားသိုင်းပညာ ကောင်းကင်နဲ့ မြေကြီးက ထင်ယောင်ထင်မှား ဖျက်ဆီးခြင်း ပျက်စီးစမ်း"

ဖုန်းဝူချန် ကြမ်းကြုတ်စွာ အော်ဟစ်လိုက်သည်။ ဓားအရှိန်အဝါများ ကောင်းကင်သို့ ထိုးတက်သွားပြီး 'နဂါးနတ်ဘုရား ဓား' မှ အသက်ရှူမှားလောက်သော စွမ်းအားများ ထွက်ပေါ်လာသည်။

"ဘုန်း"

ဓားစွမ်းအား ပေါက်ကွဲသွားသည်နှင့် လေစွမ်းအင် ဒိုင်းကြီးသည် အက်ကွဲကြောင်းများ ဖြစ်ပေါ်လာပြီး 'ခွပ်' ခနဲ ကွဲကြေသွားတော့သည်။ ကောင်းကင်ဝံပုလွေသည် သွေးအန်ကာ နောက်သို့ လွင့်စင်ထွက်သွားရရှာသည်။

"အဟွတ်"

"ခွပ်”

လုပ်ကြံသတ်ဖြတ်သူ တစ်ယောက် ဖြစ်လင့်ကစား၊ အကြွင်းမဲ့ စွမ်းအား၏ ရှေ့မှောက်တွင် သူ၏ လှည့်ကွက်များအားလုံး အရာမထင်တော့ပေ။

"ကောင်းကင်ဘုံ လူသား ပထမအလွှာ ဖြစ်ပြီးတော့... ဆေးဧကရာဇ် ရှေ့မှာ ပြန်တောင် မတိုက်နိုင်ပါလား"

နန်းကုန်းကျန့် အံ့ဩတကြီး ရေရွတ်လိုက်မိသည်။

ဖုန်းဝူချန်က အစွမ်းကုန် ထုတ်သုံးထားခြင်း မရှိသေး။ ပိုမို အစွမ်းထက်သော ဓားသိုင်းကွက်များကို မသုံးရသေးခင်မှာပင် ကောင်းကင်ဝံပုလွေ ခံစစ်ကျိုးပေါက်သွားခဲ့ပြီ ဖြစ်သည်။

"ဂိုဏ်းချုပ် သတ်ပစ်လိုက်"

ချီဟွမ်၊ ရွှယ်ဖုန်းနှင့် ကျန်လူများက ဒေါသတကြီး အော်ဟစ်အားပေးလိုက်ကြသည်။

"ဝုန်း"

ကောင်းကင်ဝံပုလွေသည် ဒဏ်ရာများဖြင့် ကောင်းကင်သို့ ပျံတက်သွားသည်။ သူ့မျက်နှာက သွေးဆုတ်ပြီး ဖြူလျော်နေ၏။

"ဖြောင်း"

သူသည် လက်ခုပ်တစ်ချက် တီးလိုက်ပြီး ပြန်ဖြန့်လိုက်ရာ အပြာရောင် ဓားကြီးတစ်လက် လေထဲတွင် ဘွားခနဲ ပေါ်လာသည်။ ၎င်းသည် မြေကမ္ဘာအဆင့် ဝိညာဉ်လက်နက် ဖြစ်သည်။

လက်နက် ရလိုက်သည်နှင့် ကောင်းကင်ဝံပုလွေ၏ အရှိန်အဝါ ပြန်လည် မြင့်တက်လာသည်။

"မြေကမ္ဘာအဆင့် သိုင်းပညာ ငါ့မှာလည်း ရှိတယ်ကွ"

ကောင်းကင်ဝံပုလွေ အော်ဟစ်လိုက်သည်။ ဒဏ်ရာကို ဂရုမစိုက်ဘဲ စွမ်းအားများကို ဓားကြီးထဲသို့ အကုန် ထည့်သွင်းလိုက်သည်။

ဓားအရှိန်အဝါများ ပြန့်ကားသွားပြီး လေထုတစ်ခုလုံး တုန်ခါသွားသည်။

"ပေတို မဟာဓားသိုင်း မိုင်တစ်ထောင် လေပြင်း ခုတ်ချက်"

ကောင်းကင်ဝံပုလွေသည် ဓားကြီးကို တင်းကျပ်စွာ ဆုပ်ကိုင်ပြီး အပေါ်စီးမှနေ၍ ဖုန်းဝူချန်ဆီသို့ ခုတ်ချလိုက်လေသည်။

"ရွှစ်.."

"ဝီ..."

ကြောက်မက်ဖွယ် ဓားချက်ကြီးသည် ကောင်းကင်နှင့် မြေကြီးကို တုန်ခါသွားစေမည့် အရှိန်အဟုန်ဖြင့် ကျဆင်းလာသည်။ မြေကမ္ဘာအဆင့် သိုင်းပညာ၏ စွမ်းအားသည် အမှန်တကယ်ပင် ကြောက်စရာ ကောင်းလှပေသည်။

"ဒင်"

ဖုန်းဝူချန်သည် ဓားကို မြေကြီးထဲသို့ စိုက်ချလိုက်ရာ သွေးရောင် အစီအရင်တစ်ခု ပေါ်လာပြီး သွေးရောင် သင်္ကေတများ ဝဲပျံတက်လာသည်။ ထို့နောက် သွေးရောင် အလင်းတန်းကြီးတစ်ခု ကောင်းကင်ယံသို့ ထိုးတက်သွားပြီး ဓားအရှိန်အဝါများ လွှမ်းခြုံသွားလေသည်။

"ထင်ယောင်ထင်မှား ဖျက်ဆီးခြင်း ဓားသိုင်းပညာ ထင်ယောင်ထင်မှား နဝမကောင်းကင် ဖျက်ဆီးခြင်း"

ဖုန်းဝူချန် အော်ဟစ်လိုက်သည်နှင့် သွေးရောင် အလင်းတန်းများသည် ကြီးမားသော သွေးရောင် ဓားကြီးတစ်လက်အဖြစ် ပြောင်းလဲသွားပြီး ကောင်းကင်သို့ ထိုးတက်သွားလေသည်။

ဤဓားချက်၏ စွမ်းအားသည် ယခင်ကထက် ပိုမို ကြမ်းတမ်းပြီး ကြောက်မက်ဖွယ် ကောင်းလှ၏။

ကောင်းကင်ဝံပုလွေ၏ မျက်နှာတွင် ကြောက်ရွံ့မှုများ ပေါ်လာသည်။ ပထမဆုံးအကြိမ်အဖြစ် ထွက်ပြေးချင်စိတ်များ ဝင်ရောက်လာသည်။

"ဝုန်း"

"ဝေါ့"

မျက်တောင်တစ်ခတ် အတွင်းမှာပင် စွမ်းအားကြီး နှစ်ခု ထိပ်တိုက် တွေ့ဆုံကာ ပေါက်ကွဲသွားသည်။ တောင်တန်းများ တုန်ခါသွားပြီး စွမ်းအင်ဂယက်များ ရိုက်ခတ်မှုကြောင့် ကောင်းကင်ဝံပုလွေ သွေးအန်ကာ လွင့်စင်သွားရပြန်သည်။

မြေကမ္ဘာအဆင့် သိုင်းပညာကို ထုတ်သုံးတာတောင်မှ... ဖုန်းဝူချန်၏ ဓားချက်ကို တစ်ချက်ကလေးမှ မခံနိုင်ပါလား

စွမ်းအင်ဂယက်များ ဖြတ်သန်းသွားရာ လမ်းတစ်လျှောက်ရှိ တောင်တန်းများ၊ သစ်ပင်များအားလုံး ပြာကျသွားရသည်။

ပေ (၆၀) ၊ (၇၀) ပတ်လည် အတွင်းရှိ မြေပြင်သည် သဲကန္တာရအလား ပြောင်းလဲသွားခဲ့ရလေသတည်း။

"မဖြစ်နိုင်ဘူး"

ကောင်းကင်ဝံပုလွေ၏ ရင်ထဲတွင် မျှော်လင့်ချက်မဲ့ခြင်းများနှင့် မကျေနပ်ခြင်းများ ပြည့်နှက်သွားသည်။

နှစ်ယောက်စလုံး မြေကမ္ဘာအဆင့် သိုင်းပညာချင်း တူသော်လည်း၊ ဖုန်းဝူချန်၏ ဓားသိုင်းက သူ့ထက် အဆပေါင်းများစွာ သာလွန်နေသည် မဟုတ်ပါလော။

သူတို့နှစ်ယောက်၏ အဆင့်အတန်းက မိုးနှင့်မြေလို ကွာခြားလွန်းလှ၏။

ထိပ်တိုက်တွေ့ဆုံမှုတွင် ကောင်းကင်ဝံပုလွေ၏ ဒဏ်ရာများ ပိုမို ပြင်းထန်သွားပြီး အသက်အန္တရာယ် စိုးရိမ်ရသည့် အခြေအနေသို့ ရောက်ရှိသွားလေတော့သည်။