ငါ့ရဲ့ ဂိုဏ်းတူ ညီအစ်ကိုတွေ

တိုက်ပွဲက အလျင်အမြန်ပင် စတင်ခဲ့သည်။

ဤတစ်ကြိမ်တွင်မူ ပွဲကြည့်ပရိသတ် တပည့်များက တိုက်ပွဲဖြစ်စဉ်ကို အသေအချာ မြင်တွေ့ခွင့် ရကြတော့သည်။

လူနှစ်ဦးကြားမှ တိုက်ခိုက်မှုများက မျက်စိလည်လောက်အောင် မြန်ဆန်နေဆဲ ဖြစ်သော်လည်း အနည်းဆုံးတော့ အနည်းငယ် နားလည်နိုင်စွမ်း ရှိလာကြပြီ ဖြစ်သည်။

ထို့ပြင် ဤတိုက်ပွဲက စိန်ခေါ်ပွဲများ စတင်ကတည်းက အပြင်းထန်ဆုံးနှင့် အနှစ်သာရ အရှိဆုံး ပွဲတစ်ပွဲလည်း ဖြစ်သည်။

လူငယ်မှာ အမှန်တကယ်ပင် အစွမ်းထက်လှသည်။ သူ၏ ဆန်းကြယ်သော ကျင့်စဉ် မျိုးစုံမှာ တစ်ခုပြီးတစ်ခု ထွက်ပေါ်လာပြီး စင်မြင့်ထက်မှာ သူ၏ တစ်ကိုယ်တော် ပြကွက်တစ်ခုကဲ့သို့ပင်။ လှပဆန်းကြယ်လှသော ပညာရပ်များကြောင့် ကြည့်ရှုသူများမှာလည်း အဆက်မပြတ် အံ့သြဘနန်း အော်ဟစ်နေကြရသည်။

သို့သော် ထန်ထျန်းကမူ အစမှအဆုံး ထိုင်ခုံပေါ်တွင်သာ ထိုင်လျက် အေးဆေးတည်ငြိမ်သော ပုံစံရှိနေသည်။

ထိုလူငယ် မည်မျှပင် ကြိုးစားအားထုတ်ပါစေ၊ ထန်ထျန်းက အလွယ်တကူပင် ဖြေရှင်းသွားခဲ့သည်။ ထန်ထျန်းကို ထိုင်ခုံပေါ်မှ ထအောင်ပင် သူ မစွမ်းဆောင်နိုင်ခဲ့ပေ။

ပြင်းထန်သော တိုက်ပွဲအပြီးတွင် ထန်ထျန်းက လက်ညှိုးတစ်ချက် ဝေ့ယမ်းလိုက်ရာ လူငယ်မှာ ချက်ချင်းပင် လွင့်ထွက်သွားပြီး လေထဲ မှ ကျကာ ခြေလှမ်းအနည်းငယ် နောက်ဆုတ်လိုက်ရသည်။ သူ၏ မျက်နှာမှာ ဖြူလျော်သွားပြီး ပါးစပ်ထောင့်မှ သွေးစအချို့ ထွက်လာသည်။

သူက အသက်ရှူနှုန်းကို အတော်လေး ထိန်းညှိလိုက်ရပြီးမှ မတ်မတ်ရပ်နိုင်တော့သည်။

ထို့နောက် လူငယ်က ထန်ထျန်းကို ရိုသေစွာ ဦးညွှတ်ကာ အရှုံးပေးကြောင်း ပြောလိုက်သည်။

" ကျေးဇူးတင်ပါတယ်"

သူ ထိုစကားကြီးကို ထပ်မပြောချင်တော့ပေ။

ထန်ထျန်း ခေါင်းညိတ်ပြလိုက်သည်။ ဤလူငယ်၏ ခွန်အားမှာ ယွီဟောက်မြောင်ထက် များစွာ သာလွန်ရုံသာမက နားလည်နိုင်စွမ်း မှာလည်း အလွန်ပင် ကောင်းမွန်လှသည်။ ခုနက တိုက်ပွဲအတွင်းမှာတင် သူ အများကြီး သင်ယူသွားနိုင်ခဲ့သည်။

နဂါးအသွင်ပြောင်း ရေကန်တွင် ကျင့်ကြံရန် ရွေးချယ်ခံရခြင်းမှာ အကြောင်းမဲ့ မဟုတ်ပေ။

အကြီးအကဲ၏ ကြေညာချက်နှင့်အတူ ထန်ထျန်းက သူ၏ တတိယမြောက် နိုင်ပွဲကို ရရှိသွားခဲ့သည်။

ဆက်လက်၍ အေးစက်လှပသော မျက်နှာထားရှိသည့် အမျိုးသမီးတစ်ဦး စင်ပေါ်သို့ ခုန်တက်လာသည်။

"အရှေ့ တောင်ထိပ်က ပိုင်ချင်းလင် ပဲ"

"မနှစ်က နှစ်လယ်ပိုင်းမှာ အကောင်းဆုံး ရလဒ်နဲ့ အတွင်းစည်းကို ဝင်လာတဲ့သူလေ၊ ခွန်အားကလည်း အတိမ်အနက် မသိနိုင်ဘူး"

လူအများက သူမကို မှတ်မိကြသော်လည်း သူမက ထန်ထျန်းကို အနိုင်ယူနိုင်လိမ့်မည်ဟုတော့ မမျှော်လင့်ကြတော့ပေ။

မတူညီသော တိုက်ပွဲသုံးပွဲကို ကြည့်ပြီးနောက် ထန်ထျန်းမှာ အမှန်တကယ်ပင် အနိုင်ယူ၍ မရနိုင်သော သူတစ်ဦးကဲ့သို့ ဖြစ်နေသည်။

ပိုင်ချင်းလင်က စင်ပေါ်တွင် ရပ်ကာ ဖြည်းညှင်းစွာ ပြောသည်။ "အရင်ကတော့ ဂုဏ်ထူးဆောင် တပည့်တွေဆိုတာ အပြောပဲ ရှိပြီး လူကြားထဲ ဟန်ရေးပြတတ်တဲ့ သူတွေလို့ပဲ ငါ ထင်ခဲ့တာ။

အခုတော့ ငါ့အမြင်က အရမ်းကျဉ်းမြောင်းခဲ့မှန်း သိလိုက်ရပြီ။"

ထန်ထျန်းက "ကျင့်ကြံခြင်း လောကမှာ ပါရမီရှင်တွေ အများကြီးပဲ။ ဘယ်အချိန်မှာမဆို ဘယ်သူ့ကိုမှ အထင်မသေးသင့်ဘူး" ဟု ဆိုသည်။

သူကိုယ်တိုင်ပင်လျှင် ဤအဆင့် တွင် အမြဲတမ်း ပြိုင်ဘက်ကင်းနေမည်ဟု မထင်ပေ။

ကမ္ဘာကြီးက ကျယ်ပြောလှသဖြင့် ကောင်းကင်ကို ဆန့်ကျင်နိုင်သော ပါရမီရှင် များစွာ ရှိနေနိုင်သေးသည်။

အကယ်၍ မှန်ကန်သော စိတ်နေစိတ်ထား မရှိပါက တစ်နေ့တွင် အရှက်ကွဲ ရှုံးနိမ့်သွားနိုင်ပေသည်။

"ဟုတ်ပါတယ်"

ပိုင်ချင်းလင်က ပြောသည်။ "စီနီယာအကို ထန်က အခုတင်ပဲ အဲဒီအချက်ကို ကျွန်မကို နားလည်စေခဲ့ပါပြီ။

ဒါပေမဲ့ ကျွန်မ ရှင်နဲ့ တိုက်ခိုက်ကြည့်ချင်သေးတယ်။ ကျွန်မနဲ့ ရှင် ဘယ်လောက်အထိ ကွာခြားနေလဲဆိုတာ သိချင်လို့ပါ"

ထန်ထျန်း ခေါင်းညိတ်သည်။

"လာခဲ့လေ"

ထို့နောက် တိုက်ပွဲ စတင်ခဲ့သည်။

ပိုင်ချင်းလင်မှာ အမှန်တကယ်ပင် ပါရမီရှင် တစ်ဦးပီသစွာ တိုက်ခိုက်မှုများမှာ အလွန်ပင် ပြတ်သားလှသည်။ သတ်ဖြတ်ခြင်း အော်ရာ များမှာ စင်မြင့်တစ်ခုလုံးကို လွှမ်းခြုံထား၏။

သူမ ကျင့်ကြံထားသော တာအိုမှာ တစ်မျိုးတည်း ဖြစ်သော်လည်း "သတ်ဖြတ်ခြင်း တာအို" အပေါ် နားလည်မှုမှာ အလွန် မြင့်မားသော အဆင့်သို့ ရောက်ရှိနေသည်။

စင်အောက်ရှိ ပရိသတ်များပင်လျှင် အသက်ရှူကျပ်လောက်သော သူမ၏ တိုက်စစ်အရှိန်ကို ခံစားနေရသည်။

အကယ်၍ သူမက ခုနက လူငယ်နှင့် တိုက်ခိုက်လျှင်ပင် မည်သူနိုင်မည်ကို ခန့်မှန်းရ ခက်ပေလိမ့်မည်။

သို့သော် နှမြောစရာ ကောင်းသည်မှာ သူမ၏ ပြိုင်ဘက်မှာ ထန်ထျန်း ဖြစ်နေခြင်းပင်။

သူတို့နှစ်ဦးမှာ အဆင့်အတန်းချင်း လုံးဝ မတူညီကြပေ။

ပိုင်ချင်းလင်၏ တိုက်ခိုက်မှု အားလုံးကို တားဆီးပြီးနောက် ထန်ထျန်းက လက်ဖက်ခြောက် တစ်ခုကို လက်ချောင်းဖြင့် ခတ်ထုတ်လိုက်ရာ သူမ၏ သတ်ကွက်အားလုံး ချက်ချင်း ပြယ်ပျက်သွားပြီး သူမ၏ ဖြူစင်သော လက်မောင်းပေါ်တွင် သွေးစွန်းရာတစ်ခု ပေါ်လာသည်။

ပိုင်ချင်းလင်က အသက်ကို ပြင်းပြင်းရှူလိုက်ပြီး အရိုအသေပေး ကာ အရှုံးပေးလိုက်သည်။

"စီနီယာအကို့ကို ကျေးဇူးတင်ပါတယ်"

သူမက စင်ပေါ်မှ လှည့်ကာ ပျံဆင်းသွားသည်။

"ကျစ်... ရှုံးပြန်ပြီပဲ"

တစ်ဦးက သက်ပြင်းချသည်။

"ဟီးဟီး... ဒါက ထင်ထားတဲ့အတိုင်းပဲ မဟုတ်လား"

"အဆင်ပြေပါတယ်၊ အနည်းဆုံးတော့ ထန်ထျန်းကို လက်နက် တစ်ခု သုံးစေ နိုင်ခဲ့တာပဲ"

"မင်း ဦးနှောက်က ကောင်းသေး ရဲ့လား လက်ဖက်ခြောက် က လက်နက်လားဟ မင်းလည်း လက်ဖက်ခြောက် တစ်ခုလောက် ထွေးထုတ်ကြည့်ပါလား၊ သူများကို ဒဏ်ရာရအောင် လုပ်နိုင်မလားလို့"

"ဟေ့လူ... မင်းက တကယ်ကြီး ထွေးတာလား ငါ့နှာခေါင်းထဲ ဝင်သွားပြီ၊ သေချင်လို့လားကွ"

......

ပရိသတ်ထဲတွင် ဆူညံသံလေးများ ဖြစ်ပေါ်သွားသော်လည်း အကြီးအကဲများက ချက်ချင်း ငြိမ်သက်စေခဲ့သည်။

စိန်ခေါ်ပွဲများမှာ ဆက် ကျင်းပ နေသည်။

ပိုင်ချင်းလင်ပြီးနောက် ပင်မတောင်ထိပ်မှ ဟော်ကျင်းဝေ၊ အနောက်တောင်ထိပ်မှ ကျောက်ဟဲ့ နှင့် အခြားနာမည်မကြီးသော်လည်း အစွမ်းထက်သော အထူးတပည့်များ တစ်ဦးပြီးတစ်ဦး စင်ပေါ် တက်လာကြသည်။

သို့သော် သူတို့ မည်မျှပင် စွမ်းအားကုန် သုံးပါစေ၊ မည်သူမှ ထန်ထျန်းကို ထိုင်ခုံပေါ်မှ မထစေနိုင်ခဲ့ပေ။

ထိုအထဲတွင် ချီယွမ် အထူးမှာကြားထားသော ဆဋ္ဌမ တောင်ထိပ်မှ ပါရမီရှင် မုချန်းချန့် လည်း ပါဝင်သည်။

ထိုမောက်မာလှသော ကောင်မလေးကို ထန်ထျန်းက ချီယွမ် ပြောသည့်အတိုင်း အားစိုက်ကာ ကောင်းကောင်းကြီး ပညာပေးလိုက်သည်။

ဤတိုက်ပွဲတွင် ပရိသတ်များက အနည်းငယ်မျှ အလေးအနက်ထားသော ထန်ထျန်းမှာ မည်မျှ ကြောက်စရာကောင်းကြောင်း မြင်တွေ့လိုက်ရသည်။

ပြန်လည် ခုခံနိုင်စွမ်း လုံးဝ မရှိခြင်းပင်

စင်မြင့် ပေါ်တက်ကတည်းက ပြီးဆုံးသည်အထိ သူမမှာ တစ်ချက်ကလေးတောင် ပြန်မတိုက်နိုင်ဘဲ အနှိပ်စက်ခံရုံ သက်သက် ဖြစ်ခဲ့သည်။

ဒါတင်မကသေးဘဲ ထိုကောင်မလေးမှာ နှုတ်သီး အတော်သန်သည်။

ဘယ်လိုမှ အရှုံးမပေးပေ။

နောက်ဆုံးတွင် ထန်ထျန်းက သူမကို လေ ထဲမှနေ၍ လက်ဝါးဖြင့် ရိုက်ကာ စင်မြင့် အပြင်သို့ လွင့်ထွက်သွားစေလိုက်သည်။

"နင် စောင့်နေလိုက် ငါ ဒီအကြွေးကို ပြန်ယူမယ်"

ကြည့်ပါဦး၊ အခုထိ လက်မလျှော့ သေးပေ။

ထန်ထျန်း ခေါင်းခါကာ သူမကို လျစ်လျူရှုလိုက်ပြီး အခြားပါရမီရှင်များကို "သင်ခန်းစာ" ဆက်ပေးနေသည်။

စင်မြင့်ပေါ်ရှိ အခြေအနေကို ကြည့်ကာ ချီယွမ်က နှာခေါင်းရှုံ့လျက် ပြောသည်။ "မင်းတို့တွေက ငါ့ညီ ကို သုံးပြီး တပည့်တွေကို လေ့ကျင့်ပေးနေတာပဲ။

ဒါက နည်းနည်းတော့ မတရားဘူး "

မဟာအကြီးအကဲက သူ့ကို ကြည့်ကာ "ထန်ထျန်းရဲ့ ကောင်း မှုတွေကို ငါ မှတ်တမ်းတင်ထားပါ့မယ်" ဟု ဆိုသည်။

ချီယွမ်က မထီမဲ့မြင် ပြုံးကာ "ကောင်းမှုလား

ငါ့ညီက ချမ်းသာလွန်းလို့ သူ သေးပေါက် ရင်တောင် ရှန့်ထန်း တာအိုကျောက် တွေ ထွက်လာဦးမယ်။ မင်းရဲ့ ကောင်းမှုအမှတ်လေးတွေကို သူက လိုချင်ပါ့မလား

ဘာလို့ တချို့လူတွေက အသက်ကြီးလာလေ၊ အလကား ရဖို့ပဲ ကြံစည်နေကြတာလဲ"

လီထျန်းဟွာ ကို ဤကဲ့သို့ ခနဲ့တဲ့တဲ့ ပြောဝံ့သူမှာ ချင်းယွဲ့ဂိုဏ်း တစ်ခုလုံးတွင် ချီယွမ် တစ်ဦးတည်းသာ ရှိပေလိမ့်မည်။

မဟာအကြီးအကဲမှာ သက်ပြင်းချလျက် "ထန်ထျန်းက ဒီတစ်ကြိမ်မှာ အထူးတပည့် အများကြီးကို ကူညီပေးခဲ့တာပဲလေ ။

ကောင်းမှုအမှတ်တွေအပြင် တောင်ထိပ်အသီးသီးက သခင်တွေကလည်း သူ့ကို ကျေးဇူးတင်ကြမှာပါ" ဟု ပြောသည်။

ချီယွမ်က မျက်ခုံးပင့်ကာ "ကျေးဇူးတင်တာက ဘာလုပ်လို့ရမှာလဲ စားလို့ရလား

ငါ့ညီက အဲဒီလို အနှစ်မရှိတဲ့ အရာတွေကို အလိုမရှိဘူး"

မဟာအကြီးအကဲက ဒေါသထွက်ကာ "မင်း အထာမနပ်သလို လုပ်မနေစမ်းပါနဲ့

ဂိုဏ်းပေါင်းတစ်ရာ တိုက်ပွဲက နီးနေပြီ၊ အဲဒီနောက်မှာ 'အဲဒီရာထူး' ကို ဆုံးဖြတ်ရမယ့် အချိန်ရောက်ပြီ။ အဲဒီအချိန်မှာ ဒီကျေးဇူးတင်တာတွေက ဘာလုပ်နိုင်မလဲဆိုတာ မင်း မသိဘူးလား"

ချီယွမ်က "ဪ..." ဟု အသံအရှည်ကြီး ဆွဲလိုက်ပြီးမှ "ဒါကို ဆိုလိုတာကိုး။

အဲဒါကို တိုက်ရိုက်ပြောလိုက်ရင် ပြီးနေတာပဲကို၊ ဘာလို့ ချုံပုတ်ကို ရိုက် နေတာလဲ" ဟု ရယ်မောလိုက်သည်။

မဟာအကြီးအကဲမှာ ဒေါသထွက်ကာ ဘာမှ ပြန်မပြောတော့ပေ။

ချီယွမ်က တမင်လုပ်ခြင်း ဖြစ်သည်။ လှည့်ပတ်ပြောခြင်းနှင့် တိုက်ရိုက် ဖွင့်ပြောခြင်းမှာ အကျိုးသက်ရောက်မှု လုံးဝ ကွဲပြားသည်။

ယခုမူ ချီယွမ်၏ အစရှာမှုကြောင့် ဂိုဏ်းအဆင့်မြင့်ပိုင်း အားလုံးက ဤကိစ္စကို အလေးအနက် ထားကြရတော့မည် ဖြစ်သည်။

ချီယွမ်မှာ ကြွက်သားပဲ ရှိပြီး ဦးနှောက်မရှိပုံ ပေါက်သော်လည်း တကယ်တော့ အလွန် ပါးနပ်သူ ဖြစ်သည်။

တောင်ထိပ်သခင်များက ဘာမှ မပြောသော်လည်း အခြားအကြီးအကဲများမှာမူ တိတ်တဆိတ် တွက်ချက်နေကြပြီ ဖြစ်သည်။

လုချန်းကျီ၊ ထျန်းယန်ရှန်း နှင့် မိုရှောင်းရှောင်း တို့ သုံးဦးမှာလည်း အဝေးသို့ ငေးကြည့်ရင်း တစ်ခုခုကို စဉ်းစားနေကြသည်။

စင်မြင့်ပေါ်တွင်မူ တိုက်ပွဲများ ဆက် ဖြစ် နေသည်။

အချိန်ကြာလာသည်နှင့်အမျှ အထူးတပည့် ၂၀ ကျော်မှာ ထန်ထျန်းကို စိန်ခေါ်ပြီးသွားပြီ ဖြစ်သည်။

အစပိုင်းမှ လူသန်ကြီးနှင့် ယွီဟောက်မြောင်မှလွဲ၍ နောက်ပိုင်းတက်လာသူများမှာ ဝိညာဉ်အသွင်ပြောင်းခြင်း အဆင့် များ ဖြစ်ကြပြီး ခွန်အားကြီးမားကြသည်။

ဝိညာဉ်အသွင်ပြောင်းခြင်း အလယ်အလတ် အဆင့် တစ်ဦးပင် ပါဝင်ပြီး ထန်ထျန်း၏ အင်္ကျီလက်ကို ထိလုနီးပါး ဖြစ်ခဲ့သဖြင့် အလွန် အစွမ်းထက်လှသည်။

သို့သော် သူတို့ မည်မျှပင် အစွမ်းကုန်သုံးပါစေ၊ ထန်ထျန်းကို ထိုင်ခုံမှ ထအောင် မစွမ်းဆောင်နိုင်ကြပေ။

ခဏအကြာတွင် ရင်းနှီးသောသူတစ်ဦး ထန်ထျန်းရှေ့သို့ ရောက်လာပြန်သည်။

"ကျွန်မ ရှင် ဘယ်လောက်အထိ အစွမ်းထက်လဲဆိုတာ ခန့်မှန်းကြည့်ခဲ့ပေမယ့် အခုတော့ အများကြီး လိုသေးမှန်း သိလိုက်ရပြီ"

ရောက် လာသူမှာ နျဲ့ဝူရွှမ်း ဖြစ်သည်။

နဂါးအသွင်ပြောင်း ရေကန်ခရီးစဉ်အပြီးတွင် သူမက ဝိညာဉ်အသွင်ပြောင်းခြင်း အဆင့်သို့ ရောက်ရှိနေပြီ ဖြစ်သည်။

"ဒါပေမဲ့ ကျွန်မ ရှင်နဲ့ ထိပ်တိုက် တိုက်ခိုက်ကြည့်ချင်သေးတယ်။ ဒါက ကျွန်မရဲ့ ဆန္ဒပဲ" ဟု နျဲ့ဝူရွှမ်းက ပြောလိုက်သည်။