အခန်း (၆၆၇-၆၆၈)

အခန်း (၆၆၇) ရုတ်တရက် အခြေအနေ

[တတိယအချီ - မုဆိုးအသစ်များ]

မစ်ရှင် မိတ်ဆက်- သင်သည် ပထမဆုံး မုဆိုးအုပ်စုကို အနိုင်ယူပြီး ဤဧရာမအင်အားစု၏ ရေခဲတောင်ထိပ်ဖျားကို မြင်တွေ့ခဲ့ရသည်။ ယခုအခါ မုဆိုးအုပ်စုအသစ် ရောက်ရှိလာပြီဖြစ်သည်။ သူတို့သည် ပိုသန်မာပြီး ပိုအန္တရာယ်များသည်၊ အရိပ်ထဲမှ သင့်ကို စိုက်ကြည့်နေပြီး လှုပ်ရှားရန် အဆင်သင့် ဖြစ်နေသည်။

မစ်ရှင် လိုအပ်ချက်များ- မုဆိုးအဖွဲ့သစ်၏ တိုက်ခိုက်မှုကို ဖြေရှင်းပါ။

ဆုကြေး- ၇၈,၅၀၀,၀၀၀ အတွေ့အကြုံအမှတ်။ မုဆိုးအဖွဲ့ဝင်များထဲမှ တစ်ဦး၏ ကျပန်းစွမ်းရည်တစ်ခု။

‘အဲလ်ဘတ်နှင့် သူ့အဖွဲ့နောက်က ကြိုးကိုင်သူက အဖွဲ့သစ်တစ်ခု ထပ်လွှတ်လိုက်ပြီး အမဲပြန်စလိုက်နေပြီလား။’

ဟန်ရှောင်း၏ အမူအရာ လေးနက်လာသည်။ မြင့်မားသော အတွေ့အကြုံအမှတ် ဆုကြေးသည် ဤမစ်ရှင် တတိယအချီ၏ ခက်ခဲမှုကို ညွှန်ပြနေသည်။

မစ်ရှင်မိတ်ဆက်သည် မရေမရာ ဖြစ်နေသည်။ သူသိသမျှမှာ မည်မျှအင်အားရှိမှန်း မသိသော ရန်သူတစ်စုသည် အရိပ်ထဲတွင် ခိုအောင်းနေခြင်း ဖြစ်သည်။ သူတို့၏ အစီအစဉ်က ဘာလဲဆိုတာ သူ ဘာမှမသိရပေ။

ဤသည်မှာ ချိန်ကိုက်ဗုံးတစ်လုံးနှင့် တူပြီး မည်သည့်အချိန်တွင် ပေါက်ကွဲမည်ကို သူ မသိပေ။ တစ်ခုတည်းသော သတင်းကောင်းမှာ အင်တာဖေ့စ် အသိပေးချက်က အနည်းဆုံးတော့ ဤချိန်ကိုက်ဗုံးအကြောင်း သူ့ကို သတိပေးလိုက်ခြင်း ဖြစ်သည်။

‘အတိတ်က သဲလွန်စတွေအရဆိုရင်၊ ဒီမုဆိုးတွေရဲ့ သခင်ဟာ တခြားကြယ်နယ်မြေတစ်ခုက ရှေးဟောင်းပုဂ္ဂိုလ်များ အဖွဲ့ဝင်တစ်ဦး ဖြစ်သင့်တယ်။ အဲဒီလူက အခုထိ လက်မလျှော့သေးဘဲ အဲလ်ဘတ် အဖွဲ့ထက် သေချာပေါက် ပိုသန်မာတဲ့ နောက်ထပ် အဖွဲ့တစ်’ဖွဲ့ကို အခု စေလွှတ်လိုက်ပြီ။ ဒါက တော်တော် ခက်ခဲလိမ့်မယ်။

ဟန်ရှောင်း စိတ်ဒုက္ခရောက်နေသည်။ လျှို့ဝှက်စစ်ပွဲကာလအတွင်း အခြား သန်မာသော ရန်သူတစ်စု ပေါ်ထွက်လာခြင်းသည် လျှို့ဝှက်စစ်ပွဲတွင် မသေချာမရေရာမှုများကို တိုးစေခဲ့ပြီး ၎င်းသည် သေချာပေါက် ကောင်းသောကိစ္စ မဟုတ်ပေ။

ခဏတာ စဉ်းစားပြီးနောက် လောလောဆယ် အရေးအကြီးဆုံးအရာမှာ ရန်သူများ ဘယ်မှာလဲဆိုတာ ရှာဖွေခြင်းဖြစ်သည်ဟု သူ ခံစားလိုက်ရသည်။ ရန်သူများ သူတို့ကိုယ်သူတို့ ထုတ်ပြလာသည်နှင့် တပြိုင်နက်၊ ၎င်းသည် သူ့ကို ကိုင်တွယ်ဖြေရှင်းရန် လုံလောက်သော ယုံကြည်မှု သူတို့မှာ ရှိသည်ဟု ဆိုလိုခြင်း ဖြစ်သည်။

မစ်ရှင် အသိပေးချက်က သူ့ကို သတိပေးထားသောကြောင့် သူ ကြိုတင်ပြင်ဆင်မှုများ လုပ်ချင်သည်။

တတိယအချီ ပေါ်လာတဲ့အတွက်၊ ဒါက မုဆိုးအဖွဲ့သစ်ဟာ ငါ့ကို ပစ်မှတ်ထားပြီးပြီလို့ ဆိုလိုတာပဲ။ ငါ့ကို ဖမ်းဖို့ဆိုတာ ဖြစ်နိုင်ချေ နည်းနည်းရှိတယ်...

ဟန်ရှောင်း စဉ်းစားနေသော်လည်း အဖြေမရပေ။ ရန်သူများ မည်သည့်အချိန်နှင့် မည်သည့်နေရာတွင် ရုတ်တရက် ပေါ်လာမည်ကို သူ မသိပေ။

ငါ အယူသည်းမှုရဲ့ အစွမ်းသတ္တိကို ငှားရမယ့်ပုံပဲ...

သူ အာကာသယာဉ်ပေါ် တက်ပြီး ဦးတည်ရာကို သတ်မှတ်လိုက်သည်။ မဟူရာအလင်း လျှို့ဝှက်ယာဉ်သည် ပျံတက်သွားပြီး အလင်းတန်းတစ်ခုအဖြစ် ပြောင်းလဲကာ ပျောက်ကွယ်သွားသည်။

ရက်အနည်းငယ်ကြာပြီးနောက် အာကာသယာဉ်တစ်စင်း မျောလွင့်နဂါးကျွန်းပေါ်သို့ ဆင်းသက်လာသည်။ ဟန်ရှောင်းသည် ဂလက်ဆီ ပင်လယ်ဓားပြများ၏ သူရဲဘောကြောင်ပြီး ကြောက်ရွံ့သော အကြည့်များကို လျစ်လျူရှုကာ အဘိုးအို အီဆော့၏ အိမ်သို့ တည့်တည့် သွားလိုက်သည်။

ယခင်က အဘိုးအို အီဆော့၏ ဘဝသည် စိတ်လှုပ်ရှားမှုများနှင့် ပြည့်နှက်နေပြီး သေခြင်းတရားကို မကြောက်ရွံ့ခြင်းတို့ ရှိခဲ့သည်။ သို့သော်လည်း အကြောင်းပြချက်အချို့ကြောင့်၊ သူ ယခု အသက်ကြီးပြီဖြစ်သောကြောင့် ဖြစ်ကောင်းဖြစ်မည်၊ သူသည် မျောလွင့်နဂါးကျွန်းတွင် အေးချမ်းစွာ အနားယူနေသဖြင့် သူ့ကို ရှာဖွေရန် အလွန်လွယ်ကူသည်။

“မင်းပြောနေတာက မုဆိုးအဖွဲ့သစ် ပေါ်လာပြီး မင်းဆီလာဖို့ စီစဉ်နေတယ်ပေါ့။”

အခန်းထဲတွင် အီဆော့သည် အစက်အပြောက်များပါသော ညဝတ်ဂါဝန်နှင့် ကောက်ကွေးနေသော ညဝတ်ဦးထုပ်ကို ဝတ်ဆင်ထားပြီး သမ်းဝေကာ မျက်လုံးများကို ပွတ်သပ်ရင်း ဟန်ရှောင်း ပြောသည့်စကားကို သံသယရှိကြောင်း ဖော်ပြလိုက်သည်။ သူသည် မူလက အဘိုးအိုတစ်ဦးကဲ့သို့ အိပ်ပျော်နေသော်လည်း ဟန်ရှောင်း၏ မရပ်မနား ခေါ်ဆိုမှုများကြောင့် နိုးလာခြင်း ဖြစ်သည်။

“ဟုတ်တယ်။” ဟန်ရှောင်း ခေါင်းညိတ်လိုက်သည်။

“ဒါကြောင့် ရန်သူတွေ ဘာလုပ်မလဲဆိုတာ ကြိုမြင်ပြီး မင်းကို ကူညီပေးစေချင်လို့ မင်း ငါ့ဆီ ရောက်လာတာပေါ့၊ ဟုတ်လား။” အီဆော့သည် သူ့မုတ်ဆိတ်မွေးကို ပွတ်သပ်ရင်း မျက်လုံးမှေးကြည့်လိုက်သည်။

“ဟုတ်တယ်၊ ရန်သူတွေက အရိပ်ထဲမှာ ပုန်းနေကြတယ်၊ ခင်ဗျားအကူအညီ လိုတယ်။”

အီဆော့သည် ရုတ်တရက် ဟန်ရှောင်း ကို အကဲခတ်လိုက်ပြီး ခေါင်းစဉ် ပြောင်းလိုက်သည်။ “မကြာသေးခင်က မင်း အဆင့် အေ အထက်ဆင့် မျိုးစေ့ ဖြစ်လာတယ်လို့ ငါကြားတယ်။”

ဟန်ရှောင်း ကြောင်အသွားပြီး သူ ဘာကြောင့် ဒီကိစ္စကို ရုတ်တရက် ထည့်ပြောမှန်း မသိသဖြင့် ခေါင်းညိတ်ရုံသာ တတ်နိုင်သည်။

“အင်း၊ အဲဒီလို ဖြစ်လာမယ်လို့ ငါမမျှော်လင့်ထားဘူး။” အီဆော့ စုပ်သပ်လိုက်သည်။ “ဒါပေမယ့် အဲဒီဘွဲ့ကို အရမ်းမယုံပါနဲ့။ အဆင့် အေ အထက်ဆင့် ရောက်ဖို့ အဲလောက် မလွယ်ပါဘူး။ အဲဒါက ခွန်အားတိုးလာတာသက်သက် မဟုတ်ဘဲ သက်ရှိပုံစံ မြင့်တက်လာခြင်း ပိုဆန်တယ်။ အဆင့် အေ အထက်ဆင့် တိုင်းက တကယ်တော့ မျိုးနွယ်စုအသစ် တစ်ခုပဲ...”

အီဆော့သည် ယခင်က အဆင့် အေ အထက်ဆင့် များစွာနှင့် ထိတွေ့ဆက်ဆံခဲ့ဖူးသဖြင့် သူသိသမျှ အချို့ကို ဟန်ရှောင်းအား ပြောပြရန် ဝန်မလေးပေ။

ဟန်ရှောင်း သည် စိတ်ရှည်ရှည်ဖြင့် နားထောင်ခဲ့သည်။ အင်တာဖေ့စ် ရှိသော်လည်း အတွေ့အကြုံကို နားထောင်ခြင်းတွင် အကျိုးကျေးဇူးများသာရှိပြီး ဆိုးကျိုးမရှိပေ။ ဆိုရိုးစကားအတိုင်း အိမ်မှာ သက်ကြီးရွယ်အိုတစ်ဦး ရှိခြင်းသည် ရတနာတစ်ပါး ရှိခြင်းနှင့် တူသည်။ အချိန်အတန်ကြာ ပြောပြီးနောက် အီဆော့ ရုတ်တရက် ခေါင်းခါလိုက်သည်။

“မင်းသာ တစ်သောင်းမှာ တစ်ကြိမ်ဖြစ်နိုင်တဲ့ အခွင့်အရေးကိုရပြီး အဆင့် အေ အထက်ဆင့် ဖြစ်အောင် လုပ်နိုင်ရင်၊ မုဆိုးတွေရဲ့ နောက်ကွယ်က ရှေးဟောင်းပုဂ္ဂိုလ်က မင်းကို လိုက်ဖမ်းနေတာ ချက်ချင်း ရပ်သွားလိမ့်မယ်။ မကြာသေးခင်က အာရုံစိုက်မှု အများကြီး ရရှိနေတဲ့ လျှို့ဝှက်စစ်ပွဲ လည်း မင်းတစ်ယောက်တည်းကြောင့် ပြီးသွားလိမ့်မယ်။ ကွဲအက်ကြယ်စင်ကွင်းရဲ့ အဆင့် အေ အထက်ဆင့် အသစ်တစ်ဦးအနေနဲ့ မင်းက အမြင့်ဆုံး ညစာစားပွဲမှာ ချက်ချင်း ထိုင်နိုင်လိမ့်မယ်၊ ပြီးတော့ အဲဒီ ကြယ်စုတန်း အဆင့် လူမှုအဖွဲ့အစည်းတွေက မင်းနဲ့ မျှဝေဖို့ သူတို့ရဲ့ ကိတ်မုန့်ကို တက်တက်ကြွကြွ ယူလာကြလိမ့်မယ်။ မင်းရဲ့ရည်ရွယ်ချက်ကို ဖော်ပြသရွေ့ မင်းက ထောက်ပံ့မှု အမြောက်အမြားကို အလွယ်တကူ ရရှိနိုင်လိမ့်မယ်။ မင်းကို ဒုက္ခပေးနေတဲ့ အရာအားလုံး ချက်ချင်း ပြေလည်သွားလိမ့်မယ်...”

အီဆော့ ခေတ္တရပ်ပြီး သက်ပြင်းချလိုက်သည်။ “အဲဒီနေ့ တကယ်ရောက်လာရင် မင်း မျောလွင့်နဂါးကျွန်းကနေ သေချာပေါက် ထွက်ခွာရလိမ့်မယ်။ အဆင့် အေ အထက်ဆင့် တစ်ယောက်က တခြား အဆင့် အေ အထက်ဆင့် တစ်ယောက်ရဲ့ လက်အောက်ငယ်သား ဖြစ်ဖို့ဆိုတာ မဖြစ်နိုင်ဘူး။”

ဟန်ရှောင်း ပြန်မဖြေပေ။

အမှန်တကယ်ပင် သူ အဆင့် အေ အထက်ဆင့် ရောက်ရှိပါက မျောလွင့်နဂါးကျွန်းမှ သေချာပေါက် ထွက်ခွာရမည်ဖြစ်သည်။

အစကတည်းကပင် မျောလွင့်နဂါးကျွန်းသည် သူ့အတွက် ခြေနင်းကျောက်တုံး ဖြစ်သည်။ သူသည် နှစ်များတစ်လျှောက် မျောလွင့်နဂါးကျွန်းကို အရာများစွာ အောင်မြင်အောင် ကူညီပေးခဲ့သည်။ ထို့ကြောင့် အဖွဲ့ဝင်တစ်ဦးအနေဖြင့် အမှန်တကယ် ပါဝင်ကူညီခဲ့သည်ဟု ဆိုနိုင်သည်။ သူ မျောလွင့်နဂါးကျွန်းမှ ထွက်ခွာလျှင်ပင် အေးမီစ်၏ ရန်သူ ဖြစ်လာမည် မဟုတ်ပေ။

အေးမီစ် မပျော်ရွှင်နိုင်သော်လည်း ဂျင်နီကတော့ သူ့ကို အမြန်ဆုံး ထွက်သွားစေချင်သည်မှာ သေချာသည်။

အီဆော့သည် သူ့နဖူးကို ပွတ်သပ်ပြီး ပြောလိုက်သည်။ “ငါ့ကို ဂရုမစိုက်ပါနဲ့။ လူကြီးတွေက အမြဲ စကားများတယ်။ ခေါင်းစဉ်ကို ပြန်သွားရအောင်၊ မင်းငါ့ကို သဲလွန်စ နည်းနည်းပဲ ပေးတယ်။ နိမိတ်ဖတ်ခြင်းက ဘယ်လောက်တိကျတယ်ဆိုတာ ငါအာမ မခံနိုင်ဘူး။ အဲဒါကို ကိုးကားချက် အနေနဲ့ပဲ သုံးလို့ရမယ်။”

ထို့နောက် အီဆော့ မျက်လုံးများကို မှိတ်ပြီး သူ့နိမိတ်ဖတ်ခြင်းကို စတင်လိုက်သည်။

မကြာမီ သူ မျက်လုံးများကို ဖွင့်လိုက်သည်။

ဟန်ရှောင်း စိတ်ရှည်လက်ရှည် စောင့်ဆိုင်းနေသည်ကို မြင်သောအခါ အီဆော့ က ပြောလိုက်သည်။ “ငါ ဝါးနေတဲ့ ပုံရိပ်အနည်းငယ်ကိုပဲ မြင်လိုက်ရတယ်။ ကြီးမားတဲ့ အရိပ်တစ်ခုက မင်းကို လွှမ်းခြုံထားတယ်။ မင်း ဘယ်ဘက် ညာဘက် ပြေးလွှားနေပေမယ့် ဘယ်လိုပဲဖြစ်ဖြစ် အရိပ်ကနေ မလွတ်မြောက်နိုင်ဘူး။ အဆုံးမှာတော့ အရိပ်က မင်းကို လုံးဝ မျိုချသွားတယ်။”

ဟန်ရှောင်း မျက်မှောင်ကြုတ်ပြီး မေးလိုက်သည်။ “အဲဒါ ဘာအဓိပ္ပာယ်လဲ။”

“ငါမြင်လိုက်တဲ့အရာက အမှန်တရား မဟုတ်နိုင်ဘူး၊ သင်္ကေတတစ်ခုပဲ ဖြစ်နိုင်တယ်။ ဒီနိမိတ်ဖတ်ခြင်းက ဒီကိစ္စရဲ့ နောက်ကွယ်က လူတွေဟာ မင်းကို ဆက်ပြီး လိုက်ဖမ်းနေကြမယ်၊ ပြီးတော့ မင်း သူ့ဆီကနေ လွတ်မြောက်နိုင်မှာ မဟုတ်ဘူးလို့ ဆိုလိုတာပဲ။ နိဂုံးချုပ်အနေနဲ့ ဆိုလိုတာက မင်း အန္တရာယ် ရှိနေတယ်။”

“ဒါပဲလား။” ဟန်ရှောင်း၏ ပါးစပ် တွန့်သွားသည်။ ‘ခင်ဗျား ကျွန်တော့်ကို နောက်နေတာလား။’

“ငါပြောသလိုပဲ၊ သဲလွန်စတွေ အရမ်းနည်းလွန်းတယ်။ နိမိတ်ဖတ်ခြင်းက အရမ်းဝါးနေပြီး မှန်ချင်မှ မှန်လိမ့်မယ်။” အီဆော့ ပခုံးတွန့်လိုက်သည်။ “ငါသာ အကုန်သိနေရင် အဲဒီတုန်းက မင်းငါ့ကို ပြန်ဖမ်းနိုင်မယ်လို့ ထင်လား။”

ဟန်ရှောင်း စကားမပြောနိုင် ဖြစ်သွားသည်။

‘အဲဒါက ဘာမှမပြောတာနဲ့ အတူတူပဲ မဟုတ်ဘူးလား။ ကံကြမ္မာ၏ ကလေးငယ် ဇာတ်ကောင် ဆင့်ခေါ်ကတ်က ခင်ဗျားထက် ပိုအသုံးဝင်တယ်လို့ ဘာလို့ ခံစားနေရတာလဲ။ နောက်ဆုံး အသုံးပြုခွင့် တစ်ကြိမ်ပဲ ကျန်တော့လို့ မဟုတ်ရင် အဲဒါကို သုံးခဲ့တာ ကြာပြီ။ ခင်ဗျား သိပ်အားကိုးမရဘူးပဲ၊ အဘိုးကြီး အီဆော့။’

အီဆော့သည် မည်သည့်အကူအညီမှ မပေးနိုင်သဖြင့် ဟန်ရှောင်းလှည့်ပြီး အေးမီစ်ကို သွားတွေ့လိုက်သည်။ သူ ဒီရောက်နေပြီဆိုတော့ သေချာပေါက် သူမကို တွေ့ရမည်။

အေးမီစ်သည် နန်းတော်ထဲတွင် တစ်ယောက်တည်း ရှိနေပြီး ဟန်ရှောင်းကို တွေ့သောအခါ အတော်လေး ပျော်ရွှင်သွားသည်။ သူတို့နှစ်ဦး ခဏတာ စကားစမြည် ပြောကြသည်။ ဟန်ရှောင်းသည် ဟီလာနှင့် အော်ရိုရာကို မတွေ့ရသဖြင့် အေးမီစ်ကို မေးမြန်းလိုက်သည်။ ထို့နောက် အကြောင်းပြချက်အချို့ကြောင့် ဟီလာသည် မကြာသေးမီက အလွန်စိတ်အားထက်သန်နေပြီး အော်ရိုရာကို ဆွဲခေါ်ကာ အပိုလေ့ကျင့်မှုများ ပြုလုပ်နေကြောင်း သိလိုက်ရသည်။ ဟန်ရှောင်းသည် ဤအလည်အပတ်ခရီးစဉ်အကြောင်း အခြားမည်သူ့ကိုမျှ မပြောခဲ့သဖြင့် ဟီလာနှင့် အော်ရိုရာကို အနှောင့်အယှက်ပေးရန် အစီအစဉ်မရှိပေ။ အေးမီစ်နှင့် အချိန်အနည်းငယ်ကြာ စကားစမြည် ပြောနေပြီး နောက်ဆုံးတွင် အေးမီစ်ကို အကူအညီ တောင်းခံလိုက်သည်။

မစ်ရှင်၏ တတိယအချီသည် အလွန်အန္တရာယ်များမည်ဟု သူ အလိုလို ခံစားမိသည်။ အကယ်၍ အေးမီစ်ကို ကူညီစေနိုင်လျှင် သူစိုးရိမ်စရာ ဘာမှရှိမည် မဟုတ်ပေ။

မမျှော်လင့်ဘဲ အေးမီစ်သည် ကျက်သရေရှိစွာနှင့် လက်ရာမြောက်စွာ ပြုံးပြီးမှ သူ့ကို ငြင်းပယ်လိုက်သည်။

“ဘလက်စတား၊ ဒီတစ်ခါတော့ ငါမလုပ်နိုင်ဘူး။ ငါ့မှာ တခြားလုပ်စရာ ရှိတယ်။ ပြီးတော့ မင်း ငါ့အကူအညီကိုပဲ ဆက်တောင်းနေလို့ မရဘူး။ ဒီကိစ္စက အရမ်းအန္တရာယ်များကောင်း များနိုင်ပေမယ့်၊ မင်းမှာ အနာဂတ်မှာ အဆင့် အေ အထက်ဆင့် ဖြစ်လာနိုင်တဲ့ အလားအလာ ရှိတယ်၊ ဒါကြောင့် မင်းတကယ် အဲဒီလို လုပ်ချင်ရင် အတားအဆီး တစ်ခုပြီးတစ်ခု ကျော်လွှားဖို့ ကိုယ့်ကိုယ်ကိုယ် အားကိုးရမယ်။”

မကြာသေးမီက ကောလဟာလများအရ အေးမီစ်သည် အနာဂတ်တွင် ဟန်ရှောင်း အဆင့် အေ အထက်ဆင့် ဖြစ်လာနိုင်ခြေကို မြင်တွေ့ခဲ့ရသည်။ ထို့ကြောင့် သူမသည် ဟန်ရှောင်းကို လျှော့ပြီး ကူညီရန် ဆုံးဖြတ်ခဲ့သည်။ သူမ မြင်သည့်အတိုင်း အန္တရာယ်သည် မြေသြဇာ ဖြစ်သည်။ အန္တရာယ်မှတဆင့်သာ မျိုးစေ့သည် အညှောင့်ပေါက်ပြီး မြေကြီးထဲမှ ကြီးထွားလာနိုင်မည်ဖြစ်သည်။

အီဆော့ သူမ၏ ဆရာဖြစ်စဉ်က သူသည်လည်း လင်းယုန်ပုံစံ ပညာရေးကို အသုံးပြုခဲ့ပြီး သူမကို ကြီးပြင်းစေကာ လွတ်လပ်စေခဲ့သည်။ အေးမီစ်သည် ဤအရာမှ သင်ယူခဲ့ပြီး ဟီလာနှင့် အော်ရိုရာတို့အပေါ် အလားတူ အသုံးပြုခဲ့သည်။ တစ်ခုတည်းသော ကွာခြားချက်မှာ ဤညီအစ်မများသည် စွန့်စားခန်းများနှင့် တိုက်ပွဲများကို တစ်ယောက်တည်း သွားရောက်နိုင်သည့် စံနှုန်းသို့ မရောက်ရှိသေးခြင်း ဖြစ်သည်။

ဟန်ရှောင်းအတွက်မူ အေးမီစ်သည် သူ့ခွန်အားအပေါ် ယုံကြည်မှု များစွာရှိသည်။ ဘလက်စတားကို အကာအကွယ် အလွန်အကျွံ ပေးခြင်းသည် ကောင်းသောကိစ္စ မဟုတ်ဟု သူမ ခံစားရသည် - ၎င်းသည် ဘလက်စတား သူ့ကိုယ်သူ သွေးတိုးစမ်းရန် အခွင့်အရေးများကို လျှော့ချစေလိမ့်မည်။ သူမသည် ဘလက်စတား ပိုမိုသန်မာလာသည်ကို ရိုးသားစွာ မြင်တွေ့လိုပြီး သူငယ်ချင်းတစ်ဦးအနေဖြင့် သူ့အတွက် ဝမ်းသာလိမ့်မည်။

ဟန်ရှောင်း ဘာမှမလုပ်နိုင်ပေ။ အဆုံးတွင်တော့ အေးမီစ်သည် အဖွဲ့ခေါင်းဆောင် ဖြစ်သည်။ ရန်သူများ ယခုတစ်ကြိမ် ပေါ်ပင်မလာသေးသည့် အချက်ကို ထည့်မပြောနှင့်ဦး၊ သူမသည် သူ့ကို အကြိမ်တိုင်း ကူညီရန် ဆန္ဒရှိမည် မဟုတ်ပေ၊

အေးမီစ်၏ အကူအညီကို တောင်းခံခြင်းသည် ကိစ္စရပ်များကို ပိုမိုလွယ်ကူစေရန်သာ ဖြစ်သည်။ အကယ်၍ နဂါးဧကရီက ကူညီမည်မဟုတ်ပါက သူကိုယ်တိုင် လုပ်ရမည်။ လွန်ခဲ့သည့် နှစ်အနည်းငယ်အတွင်း သူသည် မရေမတွက်နိုင်သော အန္တရာယ်များနှင့် ကြုံတွေ့ခဲ့ရသဖြင့် သူသည် မည်သည့်အခါမျှ ကြောက်ရွံ့နေမည် မဟုတ်ပေ။

အေးမီစ်ကို နှုတ်ဆက်ပြီးနောက် ဟန်ရှောင်းသည် လျင်မြန်စွာ ရောက်လာပြီး လျင်မြန်စွာပင် ထွက်ခွာသွားကာ သူ့အာကာသယာဉ်ဖြင့် မျောလွင့်နဂါးကျွန်းမှ ထွက်ခွာသွားသည်။

မျောလွင့်နဂါးကျွန်းသို့ ဤခရီးစဉ်မှ သူ များများစားစား မရရှိခဲ့သဖြင့် သေချာပေါက် အနည်းငယ် စိတ်ဆိုးနေသည်။ အဆုံးတွင်တော့ ကိုယ့်ကိုယ်ကိုယ် အားကိုးခြင်းသည် အကောင်းဆုံး ရွေးချယ်မှု ဖြစ်နေဆဲပင်။

သူ ပိုမိုသန်မာလာပြီး သူ့အဖွဲ့အစည်း ပိုမိုမြန်ဆန်စွာ ဖွံ့ဖြိုးတိုးတက်လာသည်နှင့်အမျှ သူပါဝင်သည့် တိုက်ပွဲများသည် ပိုမိုကြီးမားလာသည်။ ယခု မျောလွင့်နဂါးကျွန်း ပေးနိုင်သော အကူအညီသည် ယခင်ကကဲ့သို့ မကြီးမားတော့ပေ။

ယာဉ်မောင်းအခန်းတွင် ဟန်ရှောင်းသည် အစီအစဉ်တစ်ခု စဉ်းစားရင်း အာကာသယာဉ်ကို မောင်းနှင်နေသည်။

အေးမီစ်က မကူညီဘူး၊ အီဆော့ကလည်း အခြေခံအားဖြင့် အသုံးမဝင်ဘူး၊ ဒါကြောင့် ငါ ရာထူးတိုးခြင်းကို အမြန်ဆုံး ပြီးမြောက်အောင် လုပ်ရမယ်။ ငါ့ခွန်အား နည်းနည်းတိုးလာတာတိုင်းက အရေးကြီးတယ်...

ခဏတာ စဉ်းစားပြီးနောက် ဟန်ရှောင်းသည် ဆက်သွယ်ရေးစက်ကို ထုတ်လိုက်ပြီး လက်ရည်ယှဉ်မည့်သူများ ရှာဖွေရန် သူ့သူငယ်ချင်းများကို ဆက်သွယ်တော့မည်အပြုတွင်...

တီ တီ

ဆက်သွယ်ရေးစက် ရုတ်တရက် တုန်ခါသွားသည်။ ဘန်းနက်ထံမှ ရုတ်တရက် ရောက်လာသော မက်ဆေ့ခ်ျ ဖြစ်သည်။

ဟန်ရှောင်း အံ့အားသင့်သွားသည်။ သူ ဖတ်ကြည့်လိုက်ပြီး သူ့မျက်နှာ ချက်ချင်း လေးနက်သွားသည်။

၎င်းသည် သတင်းကောင်း မဟုတ်ပေ။

ဘန်းနက် ဘလက်စတားမြို့တော်ကို တည်ဆောက်ပြီးကတည်းက နေ့စဉ်နေ့တိုင်း သူဖြေရှင်းရမည့် ကိစ္စရပ်များကြောင့် ဟန်ရှောင်းကို ဆက်သွယ်ခြင်း မရှိသည်မှာ အချိန်အတော်ကြာပြီ ဖြစ်သည်။ အရေးကြီးသော ကိစ္စမရှိပါက ဘန်းနက် သူ့ကို အနှောင့်အယှက်ပေးမည် မဟုတ်ပေ။

ဤအစဦးဂြိုလ်သည် ဟန်ရှောင်းအတွက် အမြဲတမ်း အတော်လေး အရေးပါသည်။ ကစားသမားဟောင်းများ အားလုံး အခြေခံအားဖြင့် သူ့တပ်မတော်သို့ ဝင်ရောက်ခဲ့ကြသော်လည်း အနာဂတ်တွင် ကစားသမားသစ်များစွာ ရှိနေဦးမည်ဖြစ်သည်။

ဤအချိန်တွင် သူ အလွန် အကဲဆတ်နေ၏။ ရေပင်လယ်ဂြိုလ်ပေါ်တွင် ရုတ်တရက် ဖြစ်ပျက်နေသည့်အရာကို (သားကောင်) ၏ တတိယအချီနှင့် မချိတ်ဆက်ဘဲ မနေနိုင်ပေ။

ဟန်ရှောင်း မျက်မှောင်ကြုတ်လိုက်ပြီး အမြင့်ဆုံး သတိအနေအထားတွင် ရှိနေသည်။

“ဒါ သေချာပေါက် ထောင်ချောက်ပဲ”

ရေပင်လယ်ဂြိုလ်ပေါ်တွင် တစ်ရက်မတိုင်မီက...

အစိုးရ ရုံးလုပ်ငန်း အဆောက်အအုံတွင် ဘန်းနက် သည် ဖိုင်များကို ပြန်လည်သုံးသပ်ခြင်း ပြီးခါစ ဖြစ်သည်။ သူ သက်ပြင်းချလိုက်ပြီး ဘောပင်ကို ချလိုက်ကာ သူ့ပင်ပန်းနွမ်းနယ်မှုကို ဖြေလျှော့ရန် ကြိုးစားရင်း နားထင်များကို ပွတ်သပ်လိုက်သည်။

“ဟင်း၊ နိုင်ငံတစ်နိုင်ငံရဲ့ ခေါင်းဆောင် ဖြစ်ရတာက စစ်တိုက်တာထက် ပိုပင်ပန်းတယ်။”

ဘန်းနက် သက်ပြင်းချလိုက်သည်။ သူဘေးနားရှိ ရေနွေးကြမ်းကို ကောက်ယူလိုက်ပြီး မှုတ်ကာ ဖြည်းညှင်းစွာ သောက်လိုက်သည်။ ရေနွေးကြမ်းသည် သူ့လည်ချောင်းထဲသို့ စီးဆင်းသွားပြီး သူ့ဗိုက်ထဲသို့ နွေးထွေးမှု ယူဆောင်လာသည်။ ပင်ပန်းနွမ်းနယ်မှုများ တဖြည်းဖြည်း ပျောက်ကွယ်စပြုလာပြီး သူ သက်တောင့်သက်သာ ရှူထုတ်လိုက်သည်။

သူသည် ကြမ်းပြင်မှ မျက်နှာကြက်အထိရှိသော ပြတင်းပေါက်များကို မျက်နှာမူရန် ထိုင်ခုံကို လှည့်လိုက်ပြီး အပြင်ဘက်ရှိ မြို့ကို အပေါ်စီးမှ ကြည့်လိုက်သည်။ ရထားများသည် သံလမ်းများအတိုင်း ပြေးဆွဲနေပြီး လမ်းသွားလမ်းလာများ ရယ်မောနေကြသည်။ ၎င်းသည် သဟဇာတဖြစ်ပြီး သက်ဝင်လှုပ်ရှားနေသည်။ သူ စိတ်သက်သာရာရစွာ ပြုံးလိုက်သည်။

လူများသည် ငြိမ်းချမ်းပြီး တည်ငြိမ်သော ဘဝများ ရရှိနေသည်ကို မြင်ရသဖြင့် အရာအားလုံး တန်သည်ဟု ဘန်းနက် ခံစားလိုက်ရသည်။

ကလင် ကလင်

ရုတ်တရက် စားပွဲပေါ်ရှိ တယ်လီဖုန်း အလျင်စလို မြည်လာသည်။

“တကယ်ကို အနားယူဖို့ အချိန် လုံးဝမရှိဘူးပဲ။”

ဘန်းနက် ဖုန်းကို ကိုင်လိုက်သည်။

“လူ—လူကြီးမင်း၊ နိုင်ငံ၆နိုင်ငံ”

အစိုးရ အရာရှိတစ်ဦးသည် ဖုန်း၏ တစ်ဖက်ခြမ်းတွင် ရှိနေပြီး စူးရှသော အသံဖြင့် ထစ်အအ ပြောနေသည်။ ဖုန်းမှတဆင့်ပင် သူ့ထိတ်လန့်မှုကို ဘန်းနက် ရှင်းလင်းစွာ ကြားနေရသည်။ သူ့နားစည် နာကျင်နေသလို ခံစားရပြီး တယ်လီဖုန်းကို သူ့နားနှင့် အနည်းငယ် ဝေးဝေးတွင် ကိုင်ထားလိုက်သည်။

“မင်း ဘာတွေအော်နေတာလဲ။ ဘာဖြစ်လို့လဲ။”

“နို—နိုင်ငံ၆နိုင်ငံက ကျွန်တော်တို့ကို တစ်ပြိုင်နက်တည်း စစ်ကြေငြာလိုက်ပြီ!”

ဘန်းနက် ချက်ချင်း တောင့်တင်းသွားသည်။ သူ့မျက်လုံးများ ပြူးကျယ်သွားပြီး ချက်ချင်း မတ်တပ်ထရပ်လိုက်သည်။

“သူတို့အားလုံး ရူးကုန်ကြပြီလား။”

ကလန့်

လက်ဖက်ရည်ခွက် မြေကြီးပေါ် ပြုတ်ကျသွားပြီး ရေနွေးကြမ်းများ ကြမ်းပြင်အနှံ့ ဖိတ်စင်သွားသည်။

စာစဉ် (၄၂)၊ အခန်း (၆၆၇) ပြီးပါပြီ။

လင်းဆက်

+++++

အခန်း (၆၆၈) ငါ့ကွန်ရက်က မင်းတို့စိတ်ကူးထက် ကျော်လွန်နေတယ်

နိုင်ငံ၆နိုင်ငံသည် သတိပေးချက်မရှိဘဲ စစ်ကြေငြာခဲ့ပြီး ဘန်းနက်တည်ဆောက်ခဲ့သော သတ္တမမြောက်နိုင်ငံကို ဖယ်ရှားလိုပုံရသည်။ ဘန်းနက်သည် ၎င်းကို အတည်ပြုရန် တစ်နေ့လုံး ကြိုးစားခဲ့သည်။ သူသည် နိုင်ငံ၆နိုင်ငံ၏ ခေါင်းဆောင်များထံ ပုဂ္ဂလိက ဖုန်းလိုင်းများဖြင့် ကိုယ်တိုင်ဖုန်းခေါ်ဆိုမှု ဒါဇင်ပေါင်းများစွာ ပြုလုပ်ခဲ့သော်လည်း အားလုံးငြင်းပယ်ခံခဲ့ရသည်။ နိုင်ငံ၆နိုင်ငံသည် အဘယ်ကြောင့် ရုတ်တရက် ရူးသွပ်သွားသည်ကို သူ လုံးဝမသိသလို ရှာဖွေရန် နည်းလမ်းလည်းမရှိပေ။ သူသည် ဤကဲ့သို့သော ကိစ္စကြီးကို တစ်ယောက်တည်း မဖြေရှင်းနိုင်သဖြင့် နောက်ဆုံးတွင် ဟန်ရှောင်းကို အကြောင်းကြားလိုက်သည်။

အကယ်၍ မစ်ရှင်၏ တတိယအချီ မပေါ်လာပါက၊ ဟန်ရှောင်းသည် ဤအရာမှာ ဂလက်ဆီငွေကြေးအုပ်စုများက နိုင်ငံ၆နိုင်ငံအား ပေးအပ်ခဲ့သော နည်းပညာများကြောင့် ၎င်းတို့၏ ယုံကြည်မှု တိုးလာပြီး အာဏာပြန်လည်ရယူလိုခြင်းကြောင့် ဖြစ်သည်ဟု ထင်မြင်မိလိမ့်မည်... ၎င်းသည်လည်း ဖြစ်နိုင်ခြေအလွန်နည်းပါးသည်။ နိုင်ငံ၆နိုင်ငံသည် အရူးများမဟုတ်ကြပေ။ ၎င်းတို့သည် ဂလက်ဆီနှင့် ပိုမိုထိတွေ့လေလေ၊ ၎င်းတို့ မည်မျှသေးငယ်ကြောင်း ပိုသိလာလေလေ ဖြစ်သည်၊ ကွာခြားချက်မှာ အလွန်ရှင်းလင်းပြီး မြင်သာသည်။ နိုင်ငံ၆နိုင်ငံသည် ဤမျှလွယ်ကူစွာ မာနကြီးလာမည်မဟုတ်ပေ။

ဂလက်ဆီငွေကြေးအုပ်စုများသည် သူနှင့် မျောလွင့်နဂါးကြောင့်သာ ရေပင်လယ်ဂြိုလ်ပေါ်တွင် ရင်းနှီးမြှုပ်နှံခဲ့ကြခြင်း ဖြစ်သည်။ ရေပင်လယ်ဂြိုလ်ဤမျှ လျင်မြန်စွာ ဖွံ့ဖြိုးတိုးတက်လာခြင်းမှာ သူတစ်ယောက်တည်းကြောင့် ဖြစ်သည်။ နိုင်ငံ၆နိုင်ငံသည် ဟန်ရှောင်းကို မှီခိုနေရကြောင်း ကောင်းကောင်းသိထားသင့်သည် - သူ့ကို စစ်ကြေငြာခြင်းသည် အခြေခံအားဖြင့် ၎င်းတို့၏ကိုယ်ပိုင်သင်္ချိုင်းကို တူးနေခြင်းပင် ဖြစ်သည်။

သို့သော်လည်း နိုင်ငံ၆နိုင်ငံသည် တစ်ပြိုင်နက်တည်း သူတို့၏အသိဉာဏ် ကင်းမဲ့သွားကြသည်။ ဤအရာမှာ အဓိပ္ပာယ်မရှိပေ။

“ဒီကိစ္စရဲ့ နောက်ကွယ်မှာ တခြားသူတွေ ရှိနေတာ သေချာသလောက်ပဲ၊ ပြီးတော့ သူတို့က မုဆိုးအဖွဲ့သစ် ဖြစ်ဖို့ အလားအလာ အများဆုံးပဲ။ ဒီလူတွေက ကိုင်တွယ်ဖြေရှင်းဖို့ ပိုခက်တယ်။ သူတို့က ငါပြန်လာအောင် မျှားခေါ်ဖို့ ရေပင်လယ်ဂြိုလ်ကို အသုံးပြုနေကြတာ။” ဟန်ရှောင်း မျက်မှောင်ကြုတ်လိုက်သည်။

အကယ်၍ သူသာ အင်တာဖေ့စ်မှ သတိပေးချက်ကို မရရှိခဲ့ပါက၊ နိုင်ငံ၆နိုင်ငံ၏ သစ္စာဖောက်မှုအကြောင်း ကြားလိုက်ရသည်နှင့် တပြိုင်နက် သူ သေချာပေါက် တုန်လှုပ်သွားလိမ့်မည်။ သူ သံသယဝင်လိမ့်မည် ဖြစ်သော်လည်း ယခုကဲ့သို့ သတိရှိလိမ့်မည်မဟုတ်သဖြင့် အကြောင်းရင်းကို ရှာဖွေရန် ပြန်သွားလိမ့်မည်။

နိုင်ငံ၆နိုင်ငံကို သစ္စာဖောက်စေခြင်းသည် ငါးမျှားစာဖြစ်သည်၊ အမှန်တကယ် ရန်သူများသည် အရိပ်ထဲတွင် ပုန်းအောင်းနေကြသည်။ သူတို့တွင် ရေပင်လယ်ဂြိုလ်ကို တိုက်ရိုက်ဖျက်ဆီးနိုင်စွမ်းရှိသော်လည်း ၎င်းသည် အဓိပ္ပာယ်မရှိပေ။ ၎င်းတို့၏အမှန်တကယ် ပစ်မှတ်မှာ ဟန်ရှောင်းဖြစ်သဖြင့် သူတို့ ပေါ်လာပါက သူ့ကို သတိပေးသလို ဖြစ်လိမ့်မည်။

အကယ်၍ ရေပင်လယ်ဂြိုလ်ဖျက်ဆီးခံရပါက၊ ၎င်းသည် ဘလက်စတားတွင်ရှိသော အလွန်နည်းပါးသည့် ‘အားနည်းချက်’များထဲမှ တစ်ခုကို ၎င်းတို့ဖျက်ဆီးလိုက်ခြင်း ဖြစ်လိမ့်မည်။ ထိုအခါ သူတို့တွင် သူ့ကို လှည့်စားရန် နည်းလမ်းရှိတော့မည်မဟုတ်ပေ။ ထို့ကြောင့် သူတို့သည် ရေပင်လယ်ဂြိုလ်ကို ထောင်ချောက်အဖြစ် အသုံးပြုရန် ရွေးချယ်ခဲ့ပြီး ရေပင်လယ်ဂြိုလ်ပေါ်တွင် ခြုံခိုတိုက်ခိုက်မှုတစ်ခု တိတ်တဆိတ် ပြင်ဆင်ကာ သားကောင်ဖြစ်သော သူ ထောင်ချောက်ထဲသို့ တန်းတန်းမတ်မတ် ဝင်လာမည်ကို စောင့်ဆိုင်းနေကြသည်။

“ကံကောင်းလို့၊ မစ်ရှင်က ငါ့ကို သတိပေးလိုက်တာ...”

ဟန်ရှောင်း တိတ်တဆိတ် စိတ်သက်သာရာရသွားသည်။ ဒီတစ်ကြိမ် ရန်သူများသည် ပိုမိုဉာဏ်ကောင်းကြောင်း သူ ဝန်ခံရမည်။ အကယ်၍ သူ မစ်ရှင်အသိပေးချက်က သတိမပေးခဲ့ပါက၊ သူ ထောင်ချောက်ထဲသို့ ကျရောက်သွားနိုင်ခြေရှိသည်။ ထိုအချိန်ကျလျှင် သူသည် အလွန်ခက်ခဲသော အခြေအနေသို့ ရောက်နေလိမ့်မည်။

“ငါ့ရဲ့ လက်ရှိအားသာချက်က ရန်သူတွေက ငါဘာမှ မသင်္ကာဘူးလို့ ထင်နေကြတာ၊ ဒါပေမယ့် ငါက သူတို့ရှိနေမှန်း သိပြီးသားပဲ။”

ဟန်ရှောင်း စဉ်းစားလိုက်သည်။ မုဆိုးများသည် နိုင်ငံ၆နိုင်ငံကို အကြောင်းပြချက်အချို့ဖြင့် သူ့အား သစ္စာဖောက်စေခဲ့ပြီး ၎င်းသည် ရွေးစရာမရှိဘဲ သူတိုးဝင်ရမည့် အကြံအစည်တစ်ခု ဖြစ်သည်။ ရေပင်လယ်ဂြိုလ်သည် သူ့အတွက် မဟာဗျူဟာမြောက် အရေးပါမှုရှိသည်၊ ၎င်းသည် ကြီးမားသော ကြက်သွန်မြိတ် စိုက်ခင်းတစ်ခုဖြစ်သဖြင့် သူ အချိန်အကြာကြီး တည်ဆောက်ခဲ့ရသော အခြေအနေကို ရန်သူများ ဖျက်ဆီးပစ်သည်ကို သူ ကြည့်မနေနိုင်ပေ။ ထို့ကြောင့် သူ သေချာပေါက် ပြန်သွားပြီး နိုင်ငံ၆နိုင်ငံနှင့် ပြဿနာများကို ဖြေရှင်းရမည်။

ရန်သူများက ထိုအကြောင်းကို သေချာပေါက် သိကြသည်။

“ရန်သူတွေဆီကနေ ပုန်းရှောင်တာက ပိုဆိုးတဲ့ ပျက်စီးဆုံးရှုံးမှုကိုပဲ ဖြစ်စေလိမ့်မယ်၊ ၎င်းတို့ကို တိုက်ရိုက်ရင်ဆိုင်မှသာ ပြဿနာကို ဖြေရှင်းနိုင်မယ်။ ကံကောင်းချင်တော့၊ ဖြေရှင်းနည်းတစ်ခု စဉ်းစားဖို့ ငါ့မှာ အချိန်ရှိတယ်။ ရန်သူတွေရဲ့ အင်အားနဲ့ အရေအတွက်ကို မသိရဘူး၊ ဒါပေမယ့် ကပ်ဘေးအဆင့် ခြောက်ယောက်အောက် မနည်းသင့်ဘူး။ ငါတစ်ယောက်တည်း သူတို့ကို တိုက်ခိုက်ဖို့က ခက်ခဲလိမ့်မယ်။ ငါ အကူအညီယူရမယ်။”

ဟန်ရှောင်း သူ့မေးစေ့ကို ပွတ်သပ်ရင်း အနည်းငယ် စိတ်ဒုက္ခရောက်နေသည်။ နဂါးဧကရီက သူမ ကူညီမည်မဟုတ်ကြောင်း ပြောထားသည်၊ ဆက်ရှင်ဇီးရိုးက စစ်တိုက်နေပြီး အခြားအဖွဲ့အစည်းများသည် အချိန်ကြာမြင့်လိမ့်မည်။ ခဏတာ စဉ်းစားပြီးနောက် လောလောဆယ် အကူအညီပေးနိုင်မည့် တစ်ခုတည်းသော မဟာမိတ်မှာ ဂိုဒိုရာ ဖြစ်ပုံရသည်။

“ခရမ်းရောင် သလင်းကျောက် လူမှုအဖွဲ့အစည်းလည်း အကူအညီ ဖြစ်နိုင်တယ်...” ဟန်ရှောင်း တွန့်ဆုတ်သွားသည်။ ခရမ်းရောင်သလင်းကျောက်တွင် ကပ်ဘေးအဆင့် အများအပြား ရှိနေသည်မှာ သေချာသည်။ သူတို့သည် တရားဝင်အစိုးရ၏ အစိတ်အပိုင်းဖြစ်သောကြောင့် လျှို့ဝှက်စစ်ပွဲတွင် မပါဝင်ကြပေ။

သို့သော်လည်း ခရမ်းရောင် သလင်းကျောက်က သူ့ကို ကူညီမည်၊ မကူညီမည်ကို ဟန်ရှောင်း မသေချာပေ။ သူတို့သည် စစ်ပွဲကိုသာ စိတ်ဝင်စားပြီး ဤကိစ္စကို စိတ်ဝင်စားမည်မဟုတ်ပေ။

“ငါ ကြိုးစားကြည့်လိုက်မယ်။ ဘာပဲဖြစ်ဖြစ် မေးကြည့်တာ ဘာမှမဖြစ်ပါဘူး။”

ဟန်ရှောင်း ဆက်သွယ်ရေးစက်ကို ထုတ်လိုက်သည်။

သူ သေချာပေါက် အကူအညီရှာတော့မည်။ သူ့ကို ကူညီမည့်သူ မရှိပါက သူ တစ်ယောက်တည်း ပြန်မည်မဟုတ်ပေ။

ကွန်ရက်ချိတ်ဆက်ခြင်းသည် တစ်ဦးတစ်ယောက်၏ ခွန်အားအစိတ်အပိုင်းတစ်ခုဖြစ်သည်။

...

လျှို့ဝှက်စစ်ပွဲ၏ ရှေ့တန်းတွင်၊ သွေးစွန်းကုန်းမြေတပ်မတော်သည် နယ်စပ် ကြယ်စနစ် သုံးခုသို့ ရောက်ရှိလာပြီး နောက်တစ်ကြိမ် ပြန်လည်ချဲ့ထွင်လာသည်။ ဆက်ရှင်ဇီးရိုးသည် အလွန်ခက်ခဲသော အချိန်များကို ကြုံတွေ့နေရသည်။ သူတို့သည် ရန်သူများကို နှောင့်ယှက်ရန်နှင့် နှေးကွေးစေရန် ကြိုးစားရင်း ယာဉ်တန်းအသေးစားများကိုသာ စေလွှတ်နိုင်သည်။

သူတို့သည် စစ်ပွဲတွင် အလွန်ခံစစ်အနေအထားရောက်နေပြီး နေ့စဉ်နေ့တိုင်း မရေမတွက်နိုင်သော အခက်အခဲများ ပေါ်ပေါက်လာနေသည်။ အဆုံးမရှိသော အခက်အခဲများသည် ရပ်ဖ်ကို အလွန်အမင်း စိတ်ဖိစီးစေ၏၊ အထူးသဖြင့် အဆင့်မြင့်တိုက်ခိုက်ရေးသမားများနှင့် ပြဿနာများ ဖြစ်သည်။

ဖျောင်းဖျမှုများနှင့် အကျိုးအမြတ်ကတိပေးမှု အမျိုးမျိုးပြီးနောက်၊ ဆက်ရှင်ဇီးရိုး၏ အဆင့်မြင့်တိုက်ခိုက်ရေးသမားများသည် နောက်ဆုံးတွင် တိုက်ပွဲများကို ရှောင်ရှားခြင်း ရပ်တန့်သွားသော်လည်း သူတို့သည် အစွမ်းကုန်လုပ်ဆောင်ရန် ဆန္ဒမရှိကြသေးပေ။ သူတို့သည် မိမိကိုယ်ကို ကာကွယ်ရန် ခွန်အား၏ ၇၀ ရာခိုင်နှုန်းကို ချန်ထားပြီး ရန်သူများကို ကိုင်တွယ်ဖြေရှင်းရန် ၃၀ ရာခိုင်နှုန်းသာ အသုံးပြုကြသည်။ အဆင့်မြင့်တိုက်ခိုက်ရေးသမားများ အပိုင်းတွင်၊ ဆက်ရှင်ဇီးရိုးသည် လုံးဝအားနည်းချက်ရှိနေဆဲဖြစ်ပြီး သွေးစွန်းကုန်းမြေ၏ စစ်ပွဲအရူးများ၏ ရိုက်နှက်ခြင်းကို ခံနေရသည်။ ရပ်ဖ်သည် နေ့တိုင်းလိုလို အားကိုးရသော ဘလက်စတားကို တွေးနေမိသည်။

ဘလက်စတားသည် စစ်ပွဲအခြေအနေကို တစ်ယောက်တည်း ပြောင်းလဲနိုင်မည်မဟုတ်သော်လည်း ဘလက်စတားသည် သူတတ်နိုင်သမျှ အားလုံးကို ပေးဆပ်ခဲ့သော တစ်ဦးတည်းသောသူ ဖြစ်သည်။

ရပ်ဖ် ကိစ္စရပ်များကို ဖြေရှင်းနေစဉ် ၎င်း၏ဆက်သွယ်ရေးစက်တွင် ဘလက်စတားထံမှ ဆက်သွယ်မှုတောင်းဆိုချက် ရုတ်တရက် ရောက်ရှိလာသည်။ ၎င်း၏ပင်ပန်းနွမ်းနယ်နေသောစိတ်သည် ရုတ်တရက် အားပြည့်လာသည်။

ရပ်ဖ် ဖုန်းကို ကိုင်လိုက်သည်နှင့် သူက ပြောလိုက်သည်။ “ဘလက်စတား၊ မင်း နောက်ဆုံးတော့ ငါ့ကို ဆက်သွယ်လာပြီပဲ။ မင်းရဲ့အားလပ်ရက် ပြီးပြီလား။ စစ်မြေပြင်ကို မြန်မြန်ပြန်လာခဲ့၊ ငါတို့ မင်းကို လိုအပ်တယ်။”

ဟန်ရှောင်း ချောင်းဟန့်ပြီး ပြောလိုက်သည်။ “ဆောရီး၊ ကျွန်တော် ပြန်မလာနိုင်သေးဘူး။ ကျွန်တော့်အိမ်၊ ရေပင်လယ်ဂြိုလ်မှာ ပြည်တွင်းစစ် ဖြစ်ပွားနေတယ်။ တစ်ယောက်ယောက်က ကျွန်တော့်ကိုယ်စားလှယ်ကို ဖြုတ်ချချင်နေတယ်။ အဲဒါကို ဖြေရှင်းဖို့ ပြန်သွားရမယ်။”

ရပ်ဖ် စိတ်ပျက်သွားသည်။

“အဲဒါကို ငါ့ဆီ အသိပေးဖို့ ဖုန်းခေါ်တာလား။”

“မဟုတ်ဘူး မဟုတ်ဘူး၊ ကျွန်တော် ခရမ်းရောင်သလင်းကျောက်လူမှုအဖွဲ့အစည်းရဲ့ အကူအညီ လိုချင်တယ်။”

ရပ်ဖ် စိတ်ရှုပ်ထွေးသွားသည်။ “အဲဒါ လိုအပ်လို့လား။ ဒါက မျက်နှာပြင်လူမှုအဖွဲ့အစည်းရဲ့ ပြည်တွင်းစစ် သက်သက်ပဲလေ။ မင်းဘာသာမင်း မဖြေရှင်းနိုင်ဘူးလား။”

“အဲဒါက အဲလောက် မရိုးရှင်းဘူး...”

ဟန်ရှောင်း ဖုံးကွယ်မထားဘဲ မုဆိုးအဖွဲ့သစ်အကြောင်း ရပ်ဖ်ကို ပြောပြလိုက်ပြီး ဤသတင်းအချက်အလက်၏ အရင်းအမြစ်ကို ချန်လှပ်ထားကာ အသေးစိတ်အချက်အလက်အချို့ကို ပြောင်းလဲလိုက်သည်။

လောလောဆယ်တွင် ဟန်ရှောင်း၊ အီဆော့နှင့် အလွန်နည်းပါးသော လူအချို့သာ မုဆိုးများ၏ နောက်ကွယ်ရှိ အစစ်အမှန်သခင်မှာ ရှေးဟောင်းပုဂ္ဂိုလ်များအဖွဲ့ဝင်တစ်ဦး ဖြစ်ကြောင်း သိကြသည်။ ပြီးခဲ့သည့်အကြိမ် အဲလ်ဘတ်နှင့် အဖွဲ့ကို ရှင်းလင်းစဉ်က ဟန်ရှောင်းသည် အဲလ်ဘတ်က ကလင့်အပေါ် အပြစ်ပုံချခြင်းကို မတားဆီးခဲ့သဖြင့် ခရမ်းရောင် သလင်းကျောက် အပါအဝင် ကွဲအက်ကြယ်စင်ကွင်းအဖွဲ့အစည်း အများအပြားသည် ကလင့်က ကြိုးကိုင်သူဟု ထင်ခဲ့ကြသည်။

ကလင့်သည် သူ့ကို ရှင်းလင်းရန် မုဆိုးတစ်ဖွဲ့ စေလွှတ်လိုက်ကြောင်း ဟန်ရှောင်း အရိပ်အမြွက် ပြောလိုက်သည်။

ဟန်ရှောင်း၏ ရှင်းပြချက်ကို ရပ်ဖ် ကြားပြီးနောက်၊ သူသည် အချက်အလက်များကို ချိတ်ဆက်ပြီး ကလင့်၏ ‘ရည်ရွယ်ချက်’ကို ခန့်မှန်းလိုက်သည်။

‘ဘလက်စတားက ရှေ့ပြေးအရာရှိ ရှစ်ယောက်ကို တစ်ယောက်တည်း တိုက်ခိုက်ခဲ့ပြီး သူ၏ အဆင့် အေ အထက်ဆင့် အလားအလာကို ပြသခဲ့တယ်။ ကလင့်က ကြိုတင်စီစဉ်နေတာ။ ဖြစ်နိုင်ခြေက ဘီလီယံတစ်ပုံပုံမှ တစ်ပုံပဲ ရှိရင်တောင် ကောလ်တန်ကြယ်စုတန်းမှာ အဆင့် အေ အထက်ဆင့်အသစ်တစ်ယောက် ပေါ်ထွက်လာတာကို သူတို့ ခွင့်မပြုနိုင်ဘူး။ ခရမ်းရောင်သလင်းကျောက်က ဘလက်စတားအပေါ် ရင်းနှီးမြှုပ်နှံဖို့ အခွင့်အရေး ရမှာကို မလိုချင်ကြဘူး၊ ဒါကြောင့် သူတို့က ဂါတွန်ကြယ်စနစ်ထဲကို တိတ်တဆိတ် ထိုးဖောက်ဝင်ရောက်ဖို့ လူတစ်စုကို စေလွှတ်ပြီး အဆင့် အေ အထက်ဆင့် မျိုးစေ့ ဘလက်စတားကို ရှင်းလင်းချင်နေကြတာ။’

ရပ်ဖ် တုန်လှုပ်သွားပြီး အမှန်တရားကို ရှာဖွေတွေ့ရှိလိုက်ပြီဟု ခံစားလိုက်ရသည်။ ကလင့်နိုင်ငံ၏ ရည်ရွယ်ချက်မှာ အလွန်ကျိုးကြောင်းဆီလျော်သည်။ သူ၏ ခန့်မှန်းချက်တွင် မှားယွင်းမှု တစ်စုံတစ်ရာ မတွေ့ရှိခဲ့ပေ။ သူသာ သူတို့နေရာတွင် ရှိပါက၊ ခရမ်းရောင် သလင်းကျောက်သည်လည်း အလားတူ လုပ်ဆောင်ရန် ရွေးချယ်မိလိမ့်မည်။

ရပ်ဖ်၏ အမူအရာ ချက်ချင်းလေးနက်သွားပြီး သူက လေသံနှိမ့်ကာ ပြောလိုက်သည်။ “သဘောပေါက်ပြီ။ ဒီကိစ္စရဲ့ နောက်ကွယ်မှာ ပိုနက်ရှိုင်းတဲ့ အကြောင်းပြချက်ရှိတယ်။ ဘလက်စတား၊ ငါတို့ မင်းအပေါ် မျှော်လင့်ချက်အများကြီး ထားတယ်။ ကလင့်ကို မင်းအား အလွယ်တကူ ခြိမ်းခြောက်ခွင့် ပြုမှာမဟုတ်ဘူး။ ငါ မင်းရဲ့တောင်းဆိုချက်ကို ချက်ချင်းတင်ပြလိုက်မယ်၊ ပြီးတော့ အထက်ကလူတွေက မင်းကို ကူညီဖို့ အဆင့်မြင့်အစိုးရတိုက်ခိုက်ရေးသမားတချို့ စေလွှတ်ပေးသင့်တယ်။”

ဟန်ရှောင်း ဝမ်းသာသွားသည်။ သူထင်ထားသည်ထက် ပိုချောမွေ့သွားသည် - ရပ်ဖ်ကို လှည့်စားရသည်မှာ အတော်လေး လွယ်ကူသည်။

သူမသိသည့်အချက်မှာ ခရမ်းရောင်သလင်းကျောက်လူမှုအဖွဲ့အစည်း အထက်ပိုင်းသည် လွန်ခဲ့သော ကာလရှည်ကတည်းက သီးသန့်အစည်းအဝေး ကျင်းပခဲ့ပြီး သူ့အပေါ် အကြီးအကျယ် ရင်းနှီးမြှုပ်နှံရန် ဆုံးဖြတ်ခဲ့ကြခြင်း ဖြစ်သည်။ ဟန်ရှောင်းသည် သူသည် သာမန် ဆက်ရှင်ဇီးရိုးအဖွဲ့ဝင်တစ်ဦးသာ ဖြစ်သည်ဟု ထင်နေဆဲဖြစ်သော်လည်း လက်တွေ့တွင် သူ၏တောင်းဆိုချက်များ အလွန်အကျွံ မဖြစ်သရွေ့ ခရမ်းရောင်သလင်းကျောက်သည် သူ့ကို ကူညီရန် အမြဲတမ်း ဆန္ဒရှိနေမည်ဖြစ်သည်။ တကယ်တော့ ၎င်းတို့က သူ့ကို တတ်နိုင်သမျှ ကူညီချင်ကြသည်။

“ဒါနဲ့၊ အာမခံချက်အနေနဲ့၊ ကျွန်တော် ဂိုဒိုရာတွေဆီကနေလည်း အကူအညီတောင်းဖို့ စီစဉ်ထားတယ်” ဟန်ရှောင်းက ထပ်ပြောသည်။

“ဂိုဒိုရာက ဂါတွန်ကြယ်စနစ်ရဲ့ အုပ်စိုးသူ ဟုတ်တယ်မလား။ သူတို့က မင်းရဲ့မဟာမိတ်ဆိုတာ ငါမှတ်မိတယ်။ သေချာတာပေါ့၊ သူတို့က ငါတို့အောက်မှာ ရှိတယ်။ ငါ သူတို့ကို ပြောပေးဖို့ လိုလား။”

“… အဲဒါဆို အကောင်းဆုံးပေါ့။”

ခရမ်းရောင်သလင်းကျောက်၏ လူများကို ဆွဲဆောင်ရန် မည်မျှလွယ်ကူကြောင်း ဟန်ရှောင်း တိတ်တဆိတ် အံ့သြသွားသည်။

ဆက်သွယ်မှုကို ချလိုက်ပြီး ဟန်ရှောင်းသည် ဂိုဒိုရာကို ဆက်သွယ်လိုက်သည်။

ဂိုဒိုရာသည် သူ၏မဟာမိတ်ဟောင်းဖြစ်သဖြင့် ပဉ္စမမြောက်ဆားဗီးယားသည် သူ၏တောင်းဆိုချက်ကို ကြားသောအခါ တွန့်ဆုတ်ခြင်းမရှိဘဲ သဘောတူခဲ့သည်။

ဘလက်စတားသာ သူတို့ထံမှ အကူအညီတောင်းခံခဲ့ပါက ခဏတာ တွန့်ဆုတ်နေကောင်း နေနိုင်မည်ဖြစ်သည်။ သို့သော်လည်း ခရမ်းရောင်သလင်းကျောက်က သူတို့လည်း ပါဝင်ပတ်သက်ကြောင်း အတည်ပြုခဲ့သဖြင့် ဂိုဒိုရာများသည် ကြောက်ရွံ့စရာမရှိတော့ဘဲ သဘောတူရန် စိတ်အားထက်သန်နေကြသည်။

ဂိုဒိုရာများ၏ မျက်လုံးထဲတွင် ဘလက်စတားသည် ကြယ်စုတန်းအဆင့် လူမှုအဖွဲ့အစည်းနှင့် ဆက်ဆံရေး တိုးတက်စေရန် အခွင့်အရေးပေးနေခြင်းဖြစ်သည်။

အသေးစိတ်အစီအစဉ်ကို ဆွေးနွေးရန် လိုအပ်သေးသည်။ ဟန်ရှောင်းသည် ရေပင်လယ်ဂြိုလ်အနီးရှိ လူမနေသော ဂြိုလ်တစ်လုံးကို စုဝေးရာနေရာအဖြစ် ရွေးချယ်လိုက်ပြီး သူ၏အာကာသယာဉ်ဖြင့် ဦးတည်ထွက်သွားသည်။

စာစဉ် (၄၂)၊ အခန်း (၆၆၈) ပြီးပါပြီ။

လင်းဆက်

+++++