ဖန်တီးခြင်း စွမ်းအင်နှစ်မျိုး

"သတ္တမမြောက် စွန့်ပစ်နယ်မြေ၊ နတ်ဘုရားချောက်နက်ကို အောင်မြင်စွာ ပို့ဆောင်ပြီးစီးပြီ..."

ထိုအေးစက်တိတ်ဆိတ်သော အသံထဲတွင် အထက်လူကြီးတစ်ယောက်က လက်အောက်ခံကို ကြည့်သည့် မထီမဲ့မြင်ပြုမှုမျိုးပင် မပါရှိပေ။

ခံစားချက်ကင်းမဲ့သော တည်ငြိမ်မှုသာ ရှိနေပြီး ပုရွက်ဆိတ်တစ်ကောင်၏ ဖြစ်တည်မှုက ထိုနေရာမှ ပုဂ္ဂိုလ်များအတွက် မည်သည့် စိတ်လှုပ်ရှားမှုကိုမျှ မပေးစွမ်းနိုင်သကဲ့သို့ပင်။

ထိုအခိုက်အတန့်တွင်...

မြူခိုးနေထိုင်သူများ ထဲမှ လူအချို့မှာ သက်ပြင်းချလိုက်ကြသည်။

ထိုနေရာမှ လူများနှင့် စကားပြောရသည့် အကြိမ်တိုင်းတွင် ဖော်ပြ၍မရသော ဖိအားများကို ခံစားရလေ့ရှိသည်။

၎င်းတို့သည် မဟာပျက်စီးခြင်းနယ်မြေထဲမှ လူများနှင့် တစ်ခါမျှ တိုက်ရိုက်အဆက်အသွယ် မရှိခဲ့ဖူးသလို၊ စစ်မှန်သော မဟာပျက်စီးခြင်းနယ်မြေက မည်သို့ရှိသည်၊ ထိုသူများ၏ကျင့်စဉ်အဆင့်နှင့် သက်ရှိအဆင့်အတန်းက မည်မျှမြင့်မားသည်ကိုလည်း မည်သူမျှ မသိရှိကြပေ။

နက်ရှိုင်းသော လမ်းကြောင်းတစ်ခုအတွင်းမှ အလွန်လက်ရာမြောက်သော သံသေတ္တာငယ်လေးတစ်ခု ထွက်ပေါ်လာသည်။

"ဒါက နတ်ဘုရားချောက်နက် ပဲ" ဟု မြူခိုးနေထိုင်သူများအဖွဲ့မှ အတွေ့အကြုံရင့် ကျွမ်းကျင်သူတစ်ဦးက အခြားသူများကို ဖြည်းညှင်းစွာ ပြောပြလိုက်သည်။

"ကဲ... ၁၀ ယောက်မြောက် နတ်ဘုရားတမန်တော်ကို သွားကြိုကြစို့။"

...

"ဘာပြောလိုက်တယ်... ၁၀ ယောက်မြောက် နတ်ဘုရားတမန်တော် ပေါ်လာတော့မယ် ဟုတ်လား။ ၁၀ ခုမြောက် နတ်ဘုရားချောက်နက်ကိုတောင် လျှောက်ထားပြီးသွားပြီလား" ဝတ်ရုံနက်အဖွဲ့ မှ ပုဂ္ဂိုလ်အချို့ ထိုင်နေကြပြီး ၎င်းတို့၏မျက်ဝန်းများတွင် စိုးရိမ်မှုမကင်းသည့် အရိပ်အယောင်များ ပေါ်လွင်နေသည်။

အခန်းတွင်း၌ တိတ်ဆိတ်မှုက အချိန်အတော်ကြာ ကြီးစိုးသွားသည်။

"ဒါက ရှန်းချန်ကော ဖြစ်နေမလား..."

နောက်ဆုံးတွင် လူတစ်ယောက်က တိတ်ဆိတ်မှုကို ဖြိုခွင်းလိုက်သည်။

ထိုနာမည်ကို ကြားလိုက်ရသည့်အခါ လူတိုင်း၏ စိတ်နှလုံးများ မငြိမ်မသက် ဖြစ်သွားကြသည်။

ရှန်းချန်ကောသည် သတ်ဖြတ်ခြင်းနည်းစနစ်ကို တတ်မြောက်ထားသူ မဟုတ်ပါလော။

သူသည် ပျက်သုဉ်းခြင်းနယ်မြေ ထဲတွင် ထိုသိုင်းနည်းစနစ်ကို အသုံးပြုခဲ့ဖူးသည်။

မယုံနိုင်စရာ ကောင်းနေပြီး အကယ်၍သာ ရှန်းချန်ကောကို ရှာတွေ့သွားခဲ့လျှင် သူသည် တိုက်ရိုက်ပင် နတ်ဘုရားတမန်တော်အဖြစ် ရာထူးတိုးမြှင့်ခံရပေလိမ့်မည်။

သူသည် လက်ရှိလောက၏သဘာဝတရားများကို ချိုးဖောက်နေသော ဖြစ်တည်မှုတစ်ခုပင်။

"ငါတို့ လှုပ်ရှားကြမလား"

"လှုပ်ရှားမယ် ဟုတ်လား... မင်း ရူးနေလား။ မြူခိုးသမုဒ္ဒရာကမ္ဘာကြီးကို ရှေးဟောင်းနတ်ဘုရား မျိုးဆက်တွေ ဝါးမြိုသွားတာကို မင်း မြင်ချင်လို့လား။ ဒါမှမဟုတ် စစ်မှန်တဲ့ ဧကရာဇ်အဆင့် ပါရမီရှင်တစ်ယောက် ပေါ်ထွန်းလာတာကို မမြင်ချင်တာလား။ ဧကရာဇ်အဆင့် အနန္တအမှောင်ထုအဆင့် ကျွမ်းကျင်သူတစ်ယောက် မွေးဖွားလာတာက ငါတို့ ရှေးဟောင်းနတ်ဘုရားချောက်နက်နဲ့ တိုက်ပွဲမှာ အနိုင်ရမယ့် မျှော်လင့်ချက်ပဲ" ဟု ရွှေရောင်သင်္ကေတတမန်တော်က ထိုလူကို ဒေါသတကြီး ကြိမ်းမောင်းလိုက်သည်။

"ဒါပေမဲ့..."

သူတို့အားလုံး နားလည်ကြသည်။

အကယ်၍ ဤအတိုင်းသာ ဆက်သွားနေမည်ဆိုလျှင် ဝတ်ရုံနက်အဖွဲ့သည် မြူခိုးနေထိုင်သူများ၏ ဖိနှိပ်မှုကို ခံရမည်ဖြစ်ပြီး နှစ်ဖက်အဖွဲ့အစည်းကြားရှိ ဟန်ချက်ညီမှု ပျက်ပြားသွားနိုင်သည်။

ထိုကဲ့သို့ ကြောက်မက်ဖွယ်ကောင်းသော ကျွမ်းကျင်သူတစ်ဦး ပေါ်ထွန်းလာမှုကြောင့် ဝတ်ရုံနက်အဖွဲ့မှာ ဆုတ်ယုတ်သွားပေလိမ့်မည်။

"အားနည်းသူက ရှုံးပြီး သန်မာသူက နိုင်တာ သဘာဝပဲ" ဟု ရွှေရောင်သင်္ကေတ စေတမန်က ပြောလိုက်သည်။

"ငါတို့တွေ ညှိနှိုင်းလို့ရတယ်၊ မိတ်ဖွဲ့လို့ရတယ်၊ ဒါပေမဲ့ ဒီလိုအခြေအနေမျိုးမှာ အချင်းချင်း ပြန်တိုက်ခိုက်နေတာက မြူခိုးသမုဒ္ဒရာကမ္ဘာကြီးရဲ့ ပျက်စီးမှုကို အရှိန်မြှင့်ပေးသလိုပဲ ဖြစ်လိမ့်မယ်။"

သို့သော် ထိုအချိန်၌ အေးစက်သော အသံတစ်ခု ဟိန်းထွက်လာသည်။

"မဟုတ်ဘူး... သူ သေရမယ်။"

ထိုအသံကြောင့် ရှိနေသူအားလုံး တုန်လှုပ်သွားကြသည်။

ပုံရိပ်ယောင်ပုံရိပ်တစ်ခု ဖြည်းညှင်းစွာ ပေါ်ထွက်လာသည်။

အနက်ရောင်ဝတ်ရုံက သူ၏တစ်ကိုယ်လုံးနှင့် မျက်နှာကို ဖုံးအုပ်ထားသော်လည်း အေးစက်ပြီး နက်ရှိုင်းသော မျက်လုံးတစ်စုံက လူတိုင်းကို ဖြူဖပ်ဖြူရော် ဖြစ်သွားစေသည်။

အနန္တအမှောင်ထုနယ်ပယ် အထွတ်အထိပ်အဆင့် ရှိသူပင်လျှင် ထိုအကြည့်အောက်တွင် တုန်လှုပ်သွားရလိမ့်မည်။

"အရှင်... ဘာပဲဖြစ်ဖြစ် မြူခိုးသမုဒ္ဒရာကမ္ဘာမှာ ဧကရာဇ်အဆင့် ပါရမီရှင်တစ်ယောက် ပေါ်ထွန်းလာတာက ကောင်းတဲ့ကိစ္စပါပဲ..." ဟု ရွှေရောင်သင်္ကေတ တမန်တော်က အားတင်းကာပြောလိုက်သည်။

"ကောင်းတယ် ဟုတ်လား"

ထိုသူက အေးစက်စွာ တုံ့ပြန်သည်။

"မင်းထင်နေတာက ဧကရာဇ်အဆင့် အနန္တအမှောင်ထုအဆင့် ကျွမ်းကျင်သူတစ်ယောက် ပေါ်ထွန်းလာဖို့ အဲ့ဒီလောက် လွယ်ကူတယ် ထင်နေသလား။ ဒီလိုအောက်ဘုံနယ်မြေ အစွန်အဖျားမှာ ဒီလိုကောင်လေးတစ်ယောက် ပေါ်ထွက်လာတာက သူ့မှာ ကြီးမားတဲ့လျှို့ဝှက်ချက် ရှိနေလို့ပဲ။ သူ သေကို သေရမယ်။ အနည်းဆုံးတော့ သူ့ဆီက လျှို့ဝှက်ချက်ကို မဟာပျက်စီးခြင်းမင်းဆက် ပြင်ပက အဖွဲ့အစည်းတွေဆီ ပါသွားခွင့် မပေးနိုင်ဘူး။"

မဟာပျက်စီးခြင်းနယ်မြေမှ လူများအတွက်မူ မြူခိုးသမုဒ္ဒရာကမ္ဘာကြီးသည် စွန့်ပစ်ခံ အမှိုက်ပုံတစ်ခုမျှသာ ဖြစ်သည်။

သူတို့ ဂရုစိုက်မည် မဟုတ်ပေ။

ပုရွက်ဆိတ်သိုက်ထဲတွင် သန်မာသော ပုရွက်ဆိတ်တစ်ကောင် ထွက်ပေါ်လာသည်ကို မြင်ရသကဲ့သို့သာ ခံစားရသည်။

၎င်းတို့သည် ထိုကဲ့သို့ ပါရမီရှင်မျိုး ဝတ်ရုံနက်အဖွဲ့ထဲတွင် ပေါ်မလာဘဲ တစ်ဖက်အဖွဲ့တွင် ပေါ်လာသောကြောင့်သာ ဒေါသထွက်နေကြခြင်း ဖြစ်သည်။

ထိုပုဂ္ဂိုလ် ထွက်ခွာသွားပြီးနောက်...

"ငါတို့ ဘာလုပ်ကြမလဲ"

"မင်းသိတဲ့အတိုင်းပဲ... ငါတို့က ပုရွက်ဆိတ်အုပ်စု တစ်စုပဲလေ။ ပုရွက်ဆိတ်တွေမှာ ရွေးချယ်ခွင့် မရှိဘူး။ အဲ့ဒီလူက 'ဖန်ဆင်းခြင်းအဆင့်' ကျွမ်းကျင်သူပဲ။သူသာ လှုပ်ရှားလိုက်ရင် မြူခိုးသမုဒ္ဒရာကမ္ဘာကြီး တစ်ခုလုံး ပြောင်းပြန်လန်သွားလိမ့်မယ်..."

"ဘာပဲဖြစ်ဖြစ်၊ ငါတို့ ကြိုးစားကြည့်သင့်တယ်" ဟု ရွှေရောင်သင်္ကေတ တမန်တော် ပြောလိုက်သည်။

ရှန်းချန်ကောအနေဖြင့် နောက်ထပ် အံ့ဖွယ်ရာတစ်ခုကို ဖန်တီးနိုင်ရန်သာ ၎င်းတို့ မျှော်လင့်နိုင်တော့သည်။

သို့သော် ဖန်ဆင်းခြင်းအဆင့် နှင့် အနန္တအမှောင်ထုအဆင့်ကြား ကွာခြားချက်က ကြီးမားလွန်းလှသည်။

ထိုအချိန်တွင် ကောင်းကင်ဘုံဓားဂိုဏ်း အတွင်းသို့ လူတစ်စု ရောက်ရှိလာသည်။

"နတ်ဘုရားတမန်တော် အရှင်သခင်... ကျေးဇူးပြုပြီး ကျုပ်တို့ ဓားသမားတွေရဲ့ ဂုဏ်သိက္ခာကို ပြန်လည်ဆယ်တင်ပေးပါ"

၎င်းတို့မှာ မြူခိုးနေထိုင်သူ အဖွဲ့အစည်းမှ ဓားသမားများ ဖြစ်ကြသည်။

၁၀ ယောက်မြောက် နတ်ဘုရားတမန်တော်မှာ ဓားသမားတစ်ဦး ဖြစ်နေသဖြင့် ၎င်းတို့မှာ အလွန်ပင် စိတ်လှုပ်ရှားနေကြသည်။

၎င်းတို့သည် ရှန်းချန်ကောကို ကြိုဆိုရန်နှင့် သစ္စာခံရန် ရောက်ရှိလာကြခြင်း ဖြစ်ပါတော့သည်။