မြင့်မြတ်သောဖွဲ့စည်းပုံ

ထျန်းရှင်းဓားဂိုဏ်း

ထိုခိုက်တွင် ဂိုဏ်းတစ်ခုလုံးမှာ ထူထပ်လှသော အနက်ရောင်မြူထုများဖြင့် ဖုံးလွှမ်းနေသည်။

အနက်ရောင်မြူများသည် ထူးဆန်းအေးစက်သော အငွေ့အသက်များနှင့်အတူ လှိုင်းထနေပြီး လူတိုင်းအပေါ်သို့ ကြီးမားသော ဖိအားများ ပေးနေသည်။

"အနက်ရောင်မြူတွေက ငါတို့ဂိုဏ်းရဲ့ ဓားဖွဲ့စည်းပုံထဲကို ကျူးကျော်ဝင်ရောက်သွားပြီ... အဲဒီထဲမှာ ကူးပြောင်းခြင်းအဆင့် ထိပ်ဆုံးက နတ်ဆိုးဘုရင်တစ်ကောင် ရှိနေပုံပဲ။ အခုတော့ ဓားဖွဲ့စည်းပုံက ဂိုဏ်းတစ်ခုလုံးကို ဖုံးလွှမ်းသွားပြီ၊ ဘယ်သူမှ မချိုးဖျက်နိုင်တော့ဘူး"

"ဂိုဏ်းချုပ်ကိုယ်တိုင် ဓားထိန်းချုပ်ခြင်းပညာနဲ့ ကြိုးစားခဲ့ပေမဲ့ မအောင်မြင်ဘဲ ပြန်ဆုတ်ခဲ့ရတယ်... နတ်ဆိုးထိန်းချုပ်ထားတဲ့ ဓားဖွဲ့စည်းပုံက အနန္တအမှောင်ထုအဆင့် ပညာရှင်တစ်ယောက်တောင် ရင်မဆိုင်နိုင်တဲ့ အရာပဲ"

အဓိကအချက်မှာ ထိုဓားဖွဲ့စည်းပုံကို မဖျက်ဆီးနိုင်ခြင်းပင် ဖြစ်သည်။

ထိုခိုက်တွင် ထျန်းရှင်းဓားဂိုဏ်းမှ တပည့်များမှာ စိတ်ဓာတ်များ ပြိုလဲတော့မတတ် ခံစားနေရသည်။

သူတို့သည် နှစ်ပေါင်းတစ်ရာနီးပါးနှင့် ပါရမီရှင်များစွာ၏အစွမ်းကို အသုံးချကာ ဤ "ထျန်းရှင်းဓားဖွဲ့စည်းပုံ" ကို တည်ဆောက်ခဲ့ခြင်း ဖြစ်သည်။

မည်သူမျှ မချိုးဖျက်နိုင်ဟု ယုံကြည်ထားသော်လည်း ယခုအခါ ထိုဖွဲ့စည်းပုံကြီး ပြီးစီးသွားချိန်တွင်...

၎င်းမှာ နတ်ဆိုးများ၏သိမ်းပိုက်ခြင်းကို ခံလိုက်ရသည်။

သူတို့ဂိုဏ်းကို "ဘုရင်အဆင့်" ဂိုဏ်းကြီးများပင် မခန့်လေးစား မလုပ်နိုင်အောင် ကာကွယ်ပေးလိမ့်မည်ဟု မျှော်လင့်ထားသော ဓားဖွဲ့စည်းပုံကြီးသည် ယခုအခါ သူတို့ဂိုဏ်းသားများကို ပြန်လည်သတ်ဖြတ်မည့် သေမင်းတမန်မိစ္ဆာကြီး ဖြစ်သွားလေပြီ။

ယခု ဘာလုပ်ကြမည်နည်း။

ဝုန်း

စတုတ္ထအကြိမ်မြောက် ဆူပူမှုစတင်လေပြီ။

ကောင်းကင်ယံတွင် အနက်ရောင်ဓားများ ပျံတက်လာပြီး အေးစက်ထူးဆန်းသော အရှိန်အဝါများကို ထုတ်လွှတ်နေသည်။

ပြင်းထန်သော စွမ်းအားများ အောက်သို့ စီးဆင်းလာပြီး ဧရာမနယ်မြေကြီးတစ်ခုသဖွယ် ဖြစ်ပေါ်လာသည်။

ရှပ်

ရှပ်

ရှပ်

မှင်ကဲ့သို့ မည်းနက်သော ဓားများသည် မိုးရေစက်များကဲ့သို့ အောက်သို့ တိုးဝင်လာသည်။

"အားးး"

ဂိုဏ်းအတွင်း၌ စူးစူးဝါးဝါး အော်ဟစ်သံများ ဆက်တိုက် ထွက်ပေါ်လာသည်။

လူတိုင်းမှာ ဆောင်းရာသီမှ ပုစဉ်းရင်ကွဲများကဲ့သို့ တိတ်ဆိတ်ငြိမ်သက်နေကြရသည်။

အချို့မှာ ဓားကို ဆွဲထုတ်ကာ ထိုအနက်ရောင်ဓားများကို ပြန်လည် ခုခံကြသော်လည်း ဂိုဏ်းတစ်ခုလုံးမှာ ပျက်စီးစပြုနေပြီ ဖြစ်သည်။

သူတို့၏ဓားဖွဲ့စည်းပုံကို အပြည့်အစုံဆုံးဖြစ်အောင် ပြုပြင်ခဲ့မိသည့်အတွက် ယခုအခါ နတ်ဆိုးဘုရင် လက်ထဲရောက်သွားချိန်တွင် မည်သို့မျှ ဖြေရှင်း၍မရသော ပြဿနာကြီး ဖြစ်သွားရတော့သည်။

"အကူအညီ တောင်းထားတာ ဘာထူးလဲ" ထိုစဉ် ထျန်းရှင်းဓားဂိုဏ်းချုပ်က အော်ဟစ်မေးမြန်းလိုက်သည်။

"မစ်ရှင် ထုတ်ပြန်ထားပါတယ်။ မကြာခင်မှာ မြူခိုးနေထိုင်သူတွေ နဲ့ ဝတ်ရုံနက် အဖွဲ့အစည်းတွေက လက်ခံပါလိမ့်မယ်။ ဒါပေမဲ့ ဝတ်ရုံနက်အဖွဲ့က လက်ခံဖို့ အခွင့်အလမ်း ပိုများပါတယ်" ဟု ဒု-ဂိုဏ်းချုပ်က အသက်ကို ပြင်းပြင်းရှူရင်း ပြောလိုက်သည်။

သူသည် လေထဲမှ ဓားအလင်းတန်းတစ်ခုကို ခုတ်ပိုင်းဖျက်ဆီးလိုက်ကာ မျက်လုံးများထဲ၌ အေးစက်သော အလင်းများ တောက်ပနေသည်။

"ယင်ဒြပ်စင်ငါးမျိုး ရောက်နေတဲ့ ကျွမ်းကျင်သူမပဲ ဒီမြင့်မြတ်ဓားဖွဲ့စည်းပုံကို ချိုးဖျက်နိုင်လိမ့်မယ်။ ငါ့အမြင်အရတော့ ဝတ်ရုံနက်အဖွဲ့မှာပဲ အဲဒီလို ပညာရှင်မျိုး ရှိနိုင်တယ်"

ဒု-ဂိုဏ်းချုပ်က ဆက်ပြောသည် "စိတ်မပူပါနဲ့၊ ကျုပ် မစ်ရှင်မှာ ဓားနည်းစနစ်ကို အထူးကျွမ်းကျင်ဖို့ လိုအပ်တယ်ဆိုတာကို မှတ်ချက် ရေးထားပါတယ်"

သို့သော်... သူတို့ရှေ့မှ ဓားဖွဲ့စည်းပုံကြီးကို ကြည့်ရင်း သူတို့ စိတ်မကောင်းဖြစ်နေရသည်။

၎င်းမှာ အလွန်ပင် ခိုင်မာပြီး ဟာကွက်မရှိလှပေ။

အနက်ရောင်မြူများ ကျူးကျော်ဝင်ရောက်မှုကြောင့် ပို၍ပင် အစွမ်းထက်လာနေသည်။

ဝတ်ရုံနက်ကျွမ်းကျင်သူတစ်ယောက် ဖြစ်နေလျှင်ပင်... နှစ်ပေါင်းရာချီ တည်ဆောက်ထားသည့် ဤရှေးဟောင်းဓားဖွဲ့စည်းပုံကို တကယ်ပဲ ချိုးဖျက်နိုင်မည်လော။

ထိုအရာသာမက ဓားဖွဲ့စည်းပုံ၏ဗဟိုချက်တွင် ကူးပြောင်းခြင်းအဆင့် ထိပ်ဆုံး၌ ရှိနေသည့် နတ်ဆိုးဘုရင်က ထိန်းချုပ်ထားသည်မဟုတ်ပါလား။

"ဝတ်ရုံနက် အမှတ် (၈) က ကျွန်တော်တို့ မစ်ရှင်ကို လက်ခံလိုက်ပါပြီ"

"အမှတ် (၈) လား"

ဂိုဏ်းချုပ်၏မျက်နှာ ဝင်းပသွားသည်။

အကယ်၍ အဆင့်မြင့် ကျင့်ကြံသူတစ်ယောက်ဆိုလျှင် သူ ယုံကြည်ချက်ရှိသည်။

ထိုအဆင့်ရှိသူများမှာ အနည်းဆုံး ကူးပြောင်းခြင်းအဆင့် တွင် ရှိကြပြီး အနန္တအမှောင်ထုအဆင့် ကျွမ်းကျင်သူများပင် ပါဝင်နိုင်ခြေ ရှိသည်။

"နေဦး... ဒါက... မြူခိုးနေထိုင်သူရဲ့ အမှတ် (၁၀) လား"

သူတို့နှစ်ယောက်စလုံး တစ်ယောက်ကိုတစ်ယောက် သံသယဖြင့် ကြည့်လိုက်ကြသည်။

မြူ‌ခိုးနေထိုင်သူများ အဖွဲ့အစည်းတွင် "အမှတ် ၁၀" ဆိုသည်ကို တစ်ခါမျှ မကြားဖူးပေ။

ဤမစ်ရှင်မှာ ဓားသိုင်းကျင့်ကြံမှု အဆင့်အတန်း အလွန်မြင့်မားရန် သတ်မှတ်ထားသည် မဟုတ်ပါလော။

"ထားလိုက်ပါတော့။ မြူခိုးနေထိုင်သူထဲက အဆင့်မြင့်ကျင့်ကြံသူတွေ ရောက်လာရင် ကိစ္စက ပြေလည်သွားမှာပါ။သူတို့ ဘယ်လိုအလုပ်လုပ်လဲဆိုတာ ငါတို့ နားမလည်ပေမဲ့ အမှတ် (၁၀) ဆိုတဲ့သူကိုလည်း ငါတို့ သွားပြီး မစော်ကားမိဖို့ပဲ လိုတယ်"

မကြာခင်မှာပင် ဝတ်ရုံနက်ကျွမ်းကျင်သူများ ရောက်ရှိလာတော့သည်။

"ဒီမြင့်မြတ်ဓားဖွဲ့စည်းပုံက မြူခိုးသမုဒ္ဒရာတစ်ခုလုံးမှာ နာမည်ကြီးတာပဲ။ ရှေးဟောင်းအမွေအနှစ်တစ်ခုလို့ ပြောကြတယ်။ အရင်က ပျက်စီးနေခဲ့ပေမဲ့ ထျန်းရှင်းဓားဂိုဏ်းက နှစ်ပေါင်းရာချီပြီး ပြန်ပြင်ထားတာ။ ကံမကောင်းတာက အခုတော့ နတ်ဆိုးတွေနဲ့ အနက်ရောင်မြူတွေရဲ့ ကျူးကျော်မှုကို ခံလိုက်ရပြီး ပိုကြောက်စရာကောင်းတဲ့အရာ ဖြစ်နေပြီ"

ထိုခိုက်တွင် ထျန်းရှင်းဓားဂိုဏ်း၏ အပြင်ဘက်၌ ပုံရိပ်သုံးခု ရပ်နေကြသည်။

"ဒီဖွဲ့စည်းပုံက ပြည့်စုံလုနီးပါးပဲ။ ပုံမှန်ဆိုရင်တော့ အင်အားသုံးပြီး ချိုးဖျက်လို့ရပေမဲ့ အခုက နတ်ဆိုးဘုရင်က ထိန်းချုပ်ထားတာဆိုတော့ အင်အားသုံးလို့ မရဘူး။ ဒီမစ်ရှင်က တကယ် ခက်ခဲမှာပဲ..."

"ငါ့ရဲ့ ဓားထိန်းချုပ်မှုအဆင့်က ယင်ဒြပ်စင်ငါးမျိုးအဆင့် မှာ ရှိတယ်။ ဝတ်ရုံနက် အဖွဲ့အစည်းတစ်ခုလုံးမှာတောင် ငါက ထိပ်တန်းပဲ။ ငါ အရင်ကြိုးစားကြည့်မယ်၊ အကယ်၍ ငါမရရင်တော့ ဒီဓားဂိုဏ်းအတွက် မျှော်လင့်ချက် မရှိတော့ဘူးလို့သာ မှတ်လိုက်တော့"

ထိုသူက သက်ပြင်းချရင်း ရှေ့သို့ ဖြည်းဖြည်းချင်း တက်လာသည်။

သူ၏မျက်လုံးများမှာ နှင်းခဲများကဲ့သို့ အေးစက်နေပြီး ကျောနောက်မှ ဓားကို ဆွဲထုတ်လိုက်ကာ ရှေ့သို့ ထိုးနှက်လိုက်သည်။

သူ၏ဓားစွမ်းအားမှာ ယင်မီးတောက်ဖြစ်ပြီး ဓားအိမ်မှ ထွက်လာသည်နှင့် မှိန်ဖျော့သော မီးလျှံများက ဓားကို ရစ်ပတ်သွားကာ ကြောက်မက်ဖွယ်ကောင်းလှသည်။

ဝုန်း

"အောင်မြင်ပြီ"

ထျန်းရှင်းဓားဖွဲ့စည်းပုံကြီးသည် ပန်းကန်လုံးတစ်လုံး ကွဲအက်သွားသကဲ့သို့ ပွင့်ထွက်သွားသည်။

"ငါတို့ ဒီဓားဖွဲ့စည်းပုံကို အထင်ကြီးလွန်းသွားပုံပဲ။ ယင်ဒြပ်စင်ငါးမျိုးအဆင့်က ဒါကို အလွယ်လေး ဖြိုခွဲနိုင်တာပဲ" ဟု ထိုသူက သူ၏ဓားကျွမ်းကျင်မှုကို ဂုဏ်ယူစွာဖြင့် ပြောလိုက်သည်။

ဘေးမှ ကျွမ်းကျင်သူနှစ်ဦးလည်း သက်ပြင်းချနိုင်သွားသည်။

ထိုခိုက်တွင် ထျန်းရှင်းဓားဂိုဏ်းမှ လူများမှာ အလွန် စိတ်လှုပ်ရှားသွားကြသည်။

သူတို့သည် ကြောက်မက်ဖွယ်ကောင်းသော ဓားအလင်းတန်းက ဓားဖွဲ့စည်းပုံကြီးကို ဖြိုခွဲလိုက်သည်ကို မြင်လိုက်ရသည်။

"ဝတ်ရုံနက် ကျွမ်းကျင်သူက တကယ်ပဲ နာမည်နဲ့လိုက်အောင် တော်တာပဲ။ ဒီဓားဖွဲ့စည်းပုံကြီးကိုတောင် အလွယ်လေး ဖြိုခွဲနိုင်တယ်"

ဂိုဏ်းချုပ်နှင့် ဒု-ဂိုဏ်းချုပ်တို့မှာ ဝမ်းသာအားရ ဖြစ်နေကြသည်။

သူတို့၏စိတ်ထဲမှ အမှောင်ထုများလည်း ကင်းစင်သွားသယောင် ရှိတော့သည်။

ဝတ်ရုံနက် ကျွမ်းကျင်သူသုံးဦးသည် ဂိုဏ်းအတွင်းသို့ မည်သူမျှ မတားဆီးနိုင်သည့် အရှိန်အဝါဖြင့် လျှောက်လှမ်းဝင်လာကြသည်။

သို့သော်...

ရုတ်တရက်

ဓားဖွဲ့စည်းပုံ၏အထက်တွင် ဝဲဂယက်များ ပေါ်လာပြီး ထိုဝဲဂယက်များ၏ အလယ်တွင် တစ္ဆေမျက်နှာကြီးတစ်ခု ဖြည်းဖြည်းချင်း ပေါ်ပေါက်လာသည်။

ထိုမျက်နှာမှာ ထူးဆန်းမှောက်မှိုင်းနေပြီး အေးစက်သော အငွေ့အသက်များကို ထုတ်လွှတ်နေသည်။

၎င်းမှာ ထိုနေရာရှိ လူအားလုံးကို လှောင်ပြောင်သည့်အလား စိုက်ကြည့်နေသည်။

"မကောင်းတော့ဘူး"

ဝတ်ရုံနက်ကျွမ်းကျင်သူ သုံးဦးစလုံး မျက်နှာများ ချက်ချင်း ပျက်သွားသည်။

သူတို့သည် ဤဓားဖွဲ့စည်းပုံနှင့် အတွင်းမှ နတ်ဆိုးဘုရင်ကို လျှော့တွက်ခဲ့မိပြီ ဖြစ်သည်။