အခန်း (၁၆၄၃)

ဟန်မူယဲ့၏ အရှေ့တွင် ရွှေရောင်ဂိတ်တံခါးက ပွင့်နေပြီး လက်သည်းရှည်သားရဲကလန်မှ စစ်တပ်များက ဂိတ်တံခါးထဲသို့ တစ်သုတ်ပြီးတစ်သုတ် ဝင်သွားကြသည်။

မရေမတွက်နိုင်သော စစ်သည်တော်များက ချိပ်ပိတ်နယ်မြေထဲသို့ ဝင်သွားကြသည်။ ၎င်းတို့ထံမှ သွေးချီစွမ်းအားက အလွန်အားကောင်းလေရာ ချိပ်ပိတ်နယ်မြေထဲမှ ဟင်းလင်းပြင်ဝိညာဉ်များ၏ ဝိညာဉ်စွမ်းအားက ဖိနှိပ်ခံလိုက်ရသည်။

မူလက ပြိုကွဲသွားတော့မည့် ယဇ်ပလ္လင်ပေါ်တွင် ရွှေရောင်မီးတောက်များက အလင်းစီးကြောင်းများနှင့် ရောယှက်သွားသည်။ နောက်အခိုက်အတန့်မှာ ရွှေရောင်နန်းတော်တစ်ခုက ယဇ်ပလ္လင်ပေါ်မှာ ထွက်ပေါ်လာသည်။

နန်းတော်ပေါ်မှ နတ်ဘုရားမီးတောက်များက ဘေးပတ်ဝန်းကျင်မှ နတ်ဆိုးမီးတောက်ဖြင့် ပေါင်းစပ်သွားသည်။

ထိုစွမ်းအားက ယင်ယန်အဆင့်နှင့် သေခြင်းရှင်ခြင်းအဆင့်ထက် ကျော်လွန်သွားသည်။

အဆုံးမရှိဟန်ရသော နတ်ဆိုးမီးပင်လယ်က ဤအခိုက်အတန့်မှာ တစ်ဟုန်ထိုး အစွမ်းမြင့်တတ်သွားပြီး ဘေးပတ်ဝန်းကျင်မှ မိုးမြေတစ်လျှောက်သို့ တလိပ်လိပ် ပျံ့နှံ့သွားသည်။

နတ်ဆိုးမီးပင်လယ်ထဲမှာ ပြန့်ကျဲနေကြသော မီးတောက်သက်ရှိများက ၎င်းတို့၏ ခန္ဓာကိုယ်ကို မထိန်းချုပ်နိုင်ကြတော့ချေ။ ၎င်းတို့အားလုံးက ချိပ်ပိတ်နယ်မြေထဲသို့ အတင်းအဓမ္မ ဆွဲသွင်းခံလိုက်ကြရသည်။

ဟန်မူယဲ့က ယဇ်ပလ္လင်ပေါ်မှာ ရပ်နေရင်း သူ၏ လက်ထဲမှ ဓားနှစ်လက်ကို တင်းကျပ်စွာ ဆုပ်လိုက်သည်။

သူ၏ အရှေ့တွင် ဟင်းလင်းပြင်ချိုးဖြတ်ပုတီးစေ့များက တရစပ် ကျဆင်းလာနေသည်။ သူက ပုတီးစေ့များကို အမြန်သိမ်းဆည်းလိုက်သည်။

သူ၏ ခန္ဓာကိုယ်ထဲမှ ဟင်းလင်းပြင်ချိုးဖြတ်စွမ်းအားက ယခင်ကထက် အများကြီး ပိုသိပ်သည်းလာသည်။

ဓားနှစ်လက်ပေါ်မှ ရွှေရောင်မီးတောက်များက သူ၏ ခန္ဓာကိုယ်အနှံ့ စီးဆင်းသွားပြီး ဟင်းလင်းပြင်ချိုးဖြတ်စွမ်းအားကို သူ့ကိုယ်ပိုင်စွမ်းအားအဖြစ် သန့်စင်ပေးနေသည်။

ကျင်းဟုန်သည် ဟင်းလင်းပြင်ဝိညာဉ်စွမ်းအားကို သူ့ကိုယ်ပိုင်စွမ်းအားအဖြစ် သန့်စင်ရန် ကျရှုံးခဲ့သည်။ ထို့ကြောင့် ဟင်းလင်းပြင်ဝိညာဉ်မျိုးနွယ်မှ နတ်ဘုရားအဆင့် အစွမ်းထက်ပညာရှင်က သူ့ကို ထိန်းချုပ်ရန် ကြိုးစားနိုင်ခဲ့ခြင်း ဖြစ်သည်။

ဤအခိုက်အတန့်မှာ ဟန်မူယဲ့က အလျင်မလိုပေ။ သူက ဟင်းလင်းပြင်ချိုးဖြတ်စွမ်းအားကို သူ့ကိုယ်ပိုင်စွမ်းအားအဖြစ် တည်ငြိမ်စွာ သန့်စင်ပေးနေပြီး ယင်းကို သူ၏ ကျင့်ကြံခြင်းစွမ်းအားနှင့် ပေါင်းစည်းလိုက်သည်။

ဟင်းလင်းပြင်ဝိညာဉ်မျိုးနွယ်မှ အစွမ်းထက်ပညာရှင်များ ရောက်လာမည်ဆိုလျှင်ပင် ၎င်းတို့က သူ၏ ခန္ဓာကိုယ်ထဲမှ ဟင်းလင်းပြင်ချိုးဖြတ်စွမ်းအားကို ထိန်းချုပ်နိုင်ကြလိမ့်မည် မဟုတ်ချေ။

သူက လက်တစ်ဖက်မြှောက်လိုက်လေရာ ရွှေရောင်အလင်းတန်းက ဟန်မူယဲ့၏ အရှေ့မှာ ထွက်ပေါ်လာသည်။

ရွှေရောင်အလင်းတန်းထဲတွင် သူ၏ တိုက်ပွဲအကျိုးပြုအမှတ်များက တစ်ဟုန်ထိုး မြင့်တတ်သွားနေကြောင်း မြင်နိုင်ပေသည်။

ချိပ်ပိတ်နယ်မြေထဲ၌ ဟင်းလင်းပြင်ဝိညာဉ်များကို သတ်ဖြတ်ခြင်းဖြစ်စေ သို့မဟုတ် လက်သည်းရှည်သားရဲကလန်သားများက ချိပ်ပိတ်နယ်မြေထဲမှာ သေဆုံးသွားခြင်းဖြစ်စေ ယင်းတို့က သူ၏ တိုက်ပွဲအကျိုးပြုအမှတ်များကို တစ်ဟုန်ထိုး တိုးပွားသွားစေသည်။

အချိန်တစ်ခဏလေးအတွင်းမှာ သူက တိုက်ပွဲအကျိုးပြုအမှတ် နောက်ထပ် ရှစ်သန်းကို စုဆောင်းမိသွားသည်။

ရွှေရောင်အလင်းထောင့်တိုင်၏ အပေါ်တွင် သူ၏ တိုက်ပွဲအကျိုးပြုအမှတ်များက အံ့ဖွယ်ကောင်းစွာ သန်းရှစ်ရာအထိ ရှိသွားသည်။

တိုက်ပွဲအကျိုးပြုအမှတ်သန်းရှစ်ရာ… ။

ယင်းက ကောင်းကင်ဘုံစစ်ပွဲအတွင်း စစ်သည်တော်များ နှစ်ပေါင်းတစ်ရာကြာအောင် စုဆောင်းမှ ရရှိနိုင်မည့် ပမာဏဖြစ်သည်။

လက်ရှိ ကောင်းကင်ဘုံစစ်ပွဲ စတင်ခဲ့သည်မှာ အချိန်မည်မျှရှိသေးသနည်း။

ဟန်မူယဲ့ဦးဆောင်သော စစ်သည်တော်နှစ်သန်း၏ တိုက်ပွဲအကျိုးပြုအမှတ်က နှစ်ပေါင်းတစ်ရာ ကြိုးစားအားထုတ်မှုနှင့် ညီမျှသွားသည်။

သူလက်ဝှေ့ယမ်းလိုက်လေရာ ရွှေရောင်ဂိတ်တံခါးက သူ့အရှေ့မှာ ထွက်ပေါ်လာသည်။

သူက ခြေတစ်လှမ်းနှင့်အတူ မဟာပန်သွန်ဘုံမှ အဓိကတပ်စခန်းဆီသို့ ပြန်ရောက်သွားသည်။

ယခု တပ်စခန်းထဲမှာ စစ်သည်တော်ငါးသိန်းကျော်က အနားယူနေကြသည်။ သူတို့ထဲမှ အများစုက မြို့စောင့်တပ်ဖွဲ့မှ စစ်သည်တော်များ ဖြစ်ကြသည်။

ဟန်မူယဲ့က မည်သူ့ကိုမှ အသိမပေးဘဲ တိုက်ပွဲအကျိုးပြုအမှတ်လဲလှယ်သော တဲအိမ်ဆီသို့ လျှောက်သွားသည်။

တဲအိမ်ထဲမှာ စောင့်ကြပ်နေကြသော စစ်သည်တော်များက ဟန်မူယဲ့ကို မြင်သွားသောအခါ အံ့ဩသွားကြသည်။

“ အဲ့ဒါ… အဲ့ဒါ စစ်ဦးစီးချုပ်ဟန် ”

“ စစ်ဦးစီးချုပ် ”

“ ဟန်မူယဲ့ ပြန်ရောက်လာပြီ… ”

တိုက်ပွဲအကျိုးပြုအမှတ်လဲလှယ်ခြင်းကို တာဝန်ယူထားသော ဗိုလ်ချုပ်က အရှေ့သို့ အမြန်လျှောက်လာပြီး ဟန်မူယဲ့ကို အရိုအသေပေးလိုက်သည်။

“ စီနီယာဟန်က ဘာကိစ္စကြောင့် ရောက်လာတာပါလဲ ”

ဟန်မူယဲ့နှင့် တန်ကိုင်သည် စစ်ဦးစီးချုပ်ရာထူးအတွက် ယှဉ်ပြိုင်နေကြသည်။ အကယ်၍ ဟန်မူယဲ့ အနိုင်ရသွားမည်ဆိုလျှင် သူက ရှန်းဟဲစီရင်စု ကောင်းကင်ဘုံအစောင့်တပ်၏ စစ်ဦးစီးချုပ်ဖြစ်လာလိမ့်မည်။

သို့သော်လည်း လောလောဆယ်မှာ ဟန်မူယဲ့က စစ်ဦးစီးချုပ်မဟုတ်သေးပေ။

“ ငါ တိုက်ပွဲအကျိုးပြုအမှတ်တွေကို လဲလှယ်ချင်တယ် ”

ဟန်မူယဲ့က သူ၏ လာရင်းကိစ္စကို ပြောပြီး သူ၏ သရုပ်တုံကင်ကို ထုတ်လိုက်သည်။

တိုက်ပွဲအကျိုးပြုအမှတ်တွေ လဲလှယ်ဖို့လား… ။

ဗိုလ်ချုပ်က ဟန်မူယဲ့ကို ကြည့်လိုက်ပြီး ခေါင်းညိတ်လိုက်သည်။

တိုက်ပွဲအကျိုးပြုအမှတ်များကို ဝိညာဉ်သတ္ထုများ၊ သံချပ်ကာများနှင့် တခြားအရင်းအမြစ်ပစ္စည်းများဖြင့် လဲလှယ်နိုင်သည်။ သို့မှသာ သူ၏ လက်အောက်မှ စစ်သည်တော်များက လုံလောက်သော တိုက်ပွဲစွမ်းအားကို ပိုင်ဆိုင်နိုင်ကြလိမ့်မည်။

သို့သော်လည်း ဟန်မူယဲ့ ထွက်သွားသည်မှာ အချိန်သိပ်မကြာသေးပေ။ ယခု သူက တိုက်ပွဲအကျိုးပြုအမှတ်များ လဲလှယ်ရန် တပ်စခန်းဆီသို့ ပြန်ရောက်လာသည်။ ယင်းကို ကြည့်ခြင်းအားဖြင့် ရှေ့တန်းစစ်မြေပြင်က မည်မျှပြင်းထန်ကြောင်း သိနိုင်ပေသည်။

ဟန်မူယဲ့က တိုက်ပွဲအကျိုးပြုအမှတ်များ အသုံးပြုနေသည့်အချိန် တန်ကိုင်က တိုက်ပွဲအကျိုးပြုအမှတ်များကို စုဆောင်းနေလိမ့်မည်။ ယင်းက ဟန်မူယဲ့အနိုင်ရမည့် ရာခိုင်နှုန်းကို လျော့ကျသွားစေလိမ့်မည်။

ဗိုလ်ချုပ်က ခေါင်းညိတ်လိုက်ပြီး ရိုသေလေးစားစွာ ပြောသည်။

“ စီနီယာဟန်ရဲ့ သရုပ်နဲ့ဆိုရင် တိုက်ပွဲအကျိုးပြုအမှတ်တွေကို တိုက်ရိုက် လဲလှယ်နိုင်ပါတယ် ”

ဗိုလ်ချုပ်က စကားပြောနေရင်း အရှေ့သို့ ခြေတစ်လှမ်း လှမ်းလိုက်ပြီး ဘေးဖယ်ပေးလိုက်သည်။ သူ၏ အနောက်တွင် ဧရာမကျောက်စိမ်းပြားတစ်ချပ် ထွက်ပေါ်လာသည်။

ဟန်မူယဲ့ စစ်ဦးစီးချုပ်ဖြစ်လာသည် မဖြစ်လာသည်က အရေးမကြီးပေ။ အကယ်၍ ဟန်မူယဲ့က စစ်ဦးစီးချုပ်ဖြစ်မလာလျှင်ပင် သူက တပ်စခန်းထဲမှာ ရာထူးမြင့်အရာရှိတစ်ဦး ဖြစ်လာလိမ့်မည်။ သူ့ကဲ့သို့ ဗိုလ်ချုပ်တစ်ယောက်က ထိုသို့ပုဂ္ဂိုလ်ကို မဆန့်ကျင်နိုင်ပေ။

ဟန်မူယဲ့က ဧရာမကျောက်စိမ်းပြားဆီသို့ လျှောက်သွားပြီး ကျောက်စိမ်းပြားပေါ်သို့ သူ၏ သရုပ်တုံကင်ကို ဖိကပ်လိုက်သည်။

“ ဝီး ”

ကိန်းဂဏန်းများက ကျောက်စိမ်းပြားပေါ်မှာ ထွက်ပေါ်လာသည်။

ဘေးပတ်ဝန်းကျင်မှ စစ်သည်တော်များက ခေါင်းမော့လိုက်ကြပြီး ဟန်မူယဲ့၏ တိုက်ပွဲအကျိုးပြုအမှတ်များကို စူးစမ်းလိုစွာ ကြည့်လိုက်ကြသည်။

“ ဟူး… ”

“ အို ဘုရားရေ… ”

လူတိုင်းက မျက်လုံးပြူးကျယ်သွားကြပြီး သူတို့၏ ခန္ဓာကိုယ်က တုန်ယင်သွားသည်။

သူတို့၏ သွေးချီက ထိန်းချုပ်မရအောင် လှုပ်ယမ်းသွားသည်။ သူတို့က မြေကြီးပေါ်သို့ လဲကျလုနီးပါး ယိမ်းယိုင်သွားကြသည်။

ကျောက်စိမ်းပြားပေါ်မှ ကိန်းဂဏန်းများက အလွန်ကြောက်စရကောင်းသည်။

“ သန်းရှစ်ရာ… ငါးဆယ့်ရှစ်သိန်း… ခြောက်ထောင့်သုံးရာ တိုက်ပွဲအကျိုးပြုအမှတ်… ”

“ အဲ့ဒါ ဘယ်လိုလုပ်ဖြစ်နိုင်မှာလဲ ”

“ ဘာလို့ တစ်ယောက်ယောက်ရဲ့ တိုက်ပွဲအကျိုးပြုအမှတ်တွေက အဲ့လောက် များနေတာလဲ ”

အံ့ဩသော အော်သံက တဲအိမ်ထဲမှာ ထွက်ပေါ်လာသည်။

တိုက်ပွဲအကျိုးပြုအမှတ်များ လဲလှယ်ပေးရန် တာဝန်ရှိသော ဗိုလ်ချုပ်များက တစ်ယောက်ကိုတစ်ယောက် မယုံကြည်နိုင်စွာ ကြည့်လိုက်ကြသည်။ သူတို့၏ မျက်လုံးထဲမှာ စိတ်လှုပ်ရှားသော အကြည့် ထွက်ပေါ်လာသည်။

ထိုမျှများပြားသော တိုက်ပွဲအကျိုးပြုအမှတ်များဖြင့်ဆိုလျှင် ဟန်မူယဲ့က သေချာပေါက် စစ်ဦးစီးချုပ်ဖြစ်လာလိမ့်မည်။

သူတို့အရှေ့မှ ပုဂ္ဂိုလ်က အနာဂတ်မှာ ဤတပ်စခန်း၏ ခေါင်းဆောင်ဖြစ်လာမည့်လူ ဖြစ်သည်။

ဟန်မူယဲ့က မထူးမခြားနား အမူအရာဖြင့် ရှိနေသည်။ သူက လက်တစ်ဖက်ကို မြှောက်လိုက်ပြီး ကျောက်စိမ်းပြားပေါ်သို့ ဖိကပ်လိုက်သည်။

ရွှေရောင်အလင်းက ကျောက်စိမ်းပြားပေါ်မှာ မှိတ်တုတ်မှိတ်တုတ် လင်းလက်သွားပြီး တိုက်ပွဲအကျိုးပြုအမှတ်များက ပျောက်ကွယ်သွားသည်။ ထို့နောက် မရေမတွက်နိုင်သော စာတန်းများက ဟန်မူယဲ့၏ အရှေ့မှာ ထွက်ပေါ်လာသည်။

ထိုစာတန်းများကို သူတစ်ယောက်တည်းသာ မြင်နိုင်ပေသည်။

ကောင်းကင်ခွဲမိုးကြိုး… ။

ကနဦးမူလအဆင့် ကျင့်ကြံသူတွေကို အလွယ်တကူ သတ်ပစ်နိုင်စွမ်းရှိတယ်… ။

လောလောဆယ် ကောင်းကင်ခွဲမိုးကြိုး(၃၂၀၀)ခုပဲ ကျန်ရှိတော့တယ်… ။

ကောင်းကင်ခွဲမိုးကြိုးတစ်ခုကို တိုက်ပွဲအကျိုးပြုအမှတ်(၃၀၀)ကုန်ကျမယ်… ။

တိမ်မိုးကြိုးလှံ… ။

တိုက်ပွဲအကျိုးပြုအမှတ်(၂၀၀)နဲ့ လဲလှယ်နိုင်တယ်… ။

တိမ်မိုးကြိုးလှံက အချောင်းသုံးသိန်း ကျန်ရှိသေးတယ်… ။

သွေးချီစုစည်းဆေးလုံး… ။

သွေးချီစုစည်းဆေးလုံးက ကျင့်ကြံသူတွေရဲ့ သွေးနဲ့ ချီကို အားဖြည့်ပေးနိုင်တယ်… ။

ဆေးတစ်လုံးကို တိုက်ပွဲအကျိုးပြုအမှတ်(၈၀၀)နဲ့ လဲလှယ်နိုင်တယ်… ။

လောလောဆယ် တပ်စခန်းထဲမှာ သွေးချီစုစည်းဆေးလုံးငါးသိန်း ကျန်ရှိသေးတယ်… ။

…..

ထိုကျောက်စိမ်းပြားသည် တပ်စခန်းထဲမှ စစ်တပ်ရိက္ခာများကို သိမ်းဆည်းထားသောနေရာ မဟုတ်ပေ။ ယင်းအစား ကျောက်စိမ်းပြားကို ရှန်းဟဲစီရင်စု၏ စစ်တပ်ရိက္ခာပို့ဆောင်ရေးရုံးတော်က ပိုင်ဆိုင်သည်။

ကောင်းကင်ဘုံစစ်ပွဲကို အရှိန်မြှင့်တင်ရန်အလို့ငှာ ဝူလင်းကုန်းမြေမှ အစောင့်အရှောက်ရွှေနန်းတော်က စီရင်စုအသီးသီးတွင် ကုန်သွယ်ရေးစံအိမ်များကို တည်ဆောက်ထားသည်။

ကောင်းကင်ဘုံစစ်ပွဲထဲမှ တိုက်ပွဲသတင်းများကို ဝူလင်းကုန်းမြေ၏ အစောင့်အရှောက်ရွှေနန်းတော်ဆီသို့ တိုက်ရိုက် တင်ပို့ရသည်။

ဟန်မူယဲ့က စစ်တပ်ရိက္ခာပစ္စည်းအားလုံးကို ကျော်ဖတ်လိုက်သည်။ နောက်ဆုံးမှာတော့ သူ၏ အကြည့်က အပေါ်ဆုံးနေရာသို့ ကျရောက်သွားသည်။

အစောင့်အရှောက်ရွှေနန်းတော်မှ အာဏာရှင်အဆင့် အစွမ်းထက်ပညာရှင်တစ်ယောက်၏ အကူအညီကို တိုက်ပွဲအကျိုးပြုအမှတ်သန်း(၁၀၀)ဖြင့် လဲလှယ်နိုင်သည်။

အာဏာရှင်အဆင့် အစွမ်းထက်ပညာရှင်တစ်ယောက်၏ လှုပ်ရှားမှုအတွက် တိုက်ပွဲအကျိုးပြုအမှတ်သန်း(၁၀၀) လိုအပ်ပေသည်။

ထိုအစွမ်းထက်ပညာရှင်က ရှန်းဟဲစီရင်စုမှ မဟုတ်ပေ။ ယင်းအစား ရွှေအစောင့်အရှောက်နန်းတော်မှ တိုက်ရိုက် ဆင်းသက်သူ ဖြစ်သည်။

ဝူလင်းကုန်းမြေတစ်ခုလုံးတွင် အာဏာရှင်အဆင့် အစွမ်းထက်ပညာရှင်များက အများကြီး မရှိပေ။

ကျောက်စိမ်းပြားပေါ်မှာ လက်တင်လိုက်သည်နှင့် တောက်ပသော အလင်းက ဟန်မူယဲ့၏ မျက်လုံးထဲမှာ ထွက်ပေါ်လာသည်။

ဟန်မူယဲ့က သူ၏ တိုက်ပွဲအကျိုးပြုအမှတ်သန်းရှစ်ရာကို အာဏာရှင်အဆင့် အစွမ်းထက်ပုဂ္ဂိုလ်ရှစ်ယောက်၏ အကူအညီဖြင့် တိုက်ရိုက် လဲလှယ်လိုက်သည်။

ကျန်ရှိသော တိုက်ပွဲအကျိုးပြုအမှတ်များကိုတော့ စစ်တပ်ရိက္ခာများဖြင့် လဲလှယ်လိုက်သည်။

စစ်တပ်ရိက္ခာများက တစ်လအတွင်း ရောက်ရှိလာလိမ့်မည်။

အာဏာရှင်အဆင့် အစွမ်းထက်ပုဂ္ဂိုလ်ရှစ်ယောက်သည်တော့ သူတို့က အကြောင်းကြားမှုကို ရရှိသည်နှင့်ချက်ချင်း အမြန်ရောက်လာကြလိမ့်မည်။

ထိုသို့လုပ်ဆောင်ပြီးနောက် ဟန်မူယဲ့က သူ၏ သရုပ်တုံကင်ကို ပြန်သိမ်းဆည်းလိုက်သည်။ ထို့နောက် သူက အနောက်လှည့်လိုက်ပြီး မဟာမူလဘုံဆီသို့ ပြန်သွားသည်။

သူထွက်သွားပြီး သိပ်မကြာမီ ကျယ်လောင်သော စကားသံများက တဲအိမ်ထဲမှာ ဆက်တိုက် ထွက်ပေါ်လာသည်။

“ မြန်မြန်… စစ်ဦးစီးချုပ်ဟန် တိုက်ပွဲအကျိုးပြုအမှတ်ဘယ်လောက်တောင် လဲလှယ်သွားလဲ သွားကြည့်ရအောင် ”

တစ်စုံတစ်ယောက်က အော်ပြောလိုက်သည်။

လူအုပ်ကြီးက တဲအိမ်အပြင်သို့ အမြန်ပြေးထွက်သွားကြပြီး ကောင်းကင်ပေါ်မှ ရွှေရောင်အလင်းထောင့်တိုင်ကို မော့ကြည့်လိုက်ကြသည်။

သို့သော်လည်း ရွှေရောင်အလင်းတန်းပေါ်မှ တိုက်ပွဲအကျိုးပြုအမှတ်က ဖုံးကွယ်ခံထားရသည်။ အဆင့်မြင့်အရာရှိတစ်ယောက်က လှုံ့ဆော်မှသာလျှင် တိုက်ပွဲအကျိုးပြုအမှတ်က ထွက်ပေါ်လာလိမ့်မည်။

အတိတ်တွင် မည်သူမှ သူတို့၏ တိုက်ပွဲအကျိုးပြုအမှတ်များကို အသုံးပြု၍ ရွှေရောင်အလင်းတန်းကို လှုံ့ဆော်ရန် စိတ်မဝင်စားခဲ့ကြပေ။ သို့သော်လည်း ယခုအချိန်မှာ လူအများအပြားက စိတ်ဝင်စားလာကြသည်။

မုတ်ဆိတ်ဖြူအကြီးအကဲတစ်ယောက်က လက်မြှောက်လိုက်သည်။ ရွှေရောင်အလင်းတန်းနှစ်ခုက ကောင်းကင်ပေါ်သို့ ပျံတတ်သွားပြီး ရွှေရောင်အလင်းထောင့်တိုင်နှင့် ပေါင်းစည်းသွားသည်။

သူ၏ တိုက်ပွဲအကျိုးပြုအမှတ်နှစ်ရာက လေထဲမှာ ပျောက်ကွယ်သွားသည်။

ထိုအကြီးအကဲက နှလုံးနာကျင်သော အမူအရာကို ထုတ်ဖော်လိုက်သည်။ ထို့နောက် သူက ခေါင်းမော့လိုက်လေရာ ပါးစပ်အဟောင်းသား ဖြစ်သွားသည်။

တန်ကိုင်၏ ရွှေရောင်အလင်းတန်းပေါ်မှာ တိုက်ပွဲအကျိုးပြုအမှတ် ဆယ်သန်းငါးသိန်းကျော် ရှိသည်။

ဟန်မူယဲ့၏ ရွှေရောင်အလင်းတန်းပေါ်မှာတော့ တိုက်ပွဲအကျိုးပြုအမှတ်သုံးထောင်သာ ကျန်ရှိတော့သည်။

တိုက်ပွဲအကျိုးပြုအမှတ် သုံးထောင်လား… ။

အစောနက တဲအိမ်ထဲမှာ ဟန်မူယဲ့က တိုက်ပွဲအကျိုးပြုအမှတ်သန်းရှစ်ရာကို ထုတ်ဖော်ပြခဲ့သည်။

“ သူက ဘယ်လိုအရာကို လဲလှယ်လိုက်လို့ တိုက်ပွဲအကျိုးပြုအမှတ်သန်းရှစ်ရာတောင် ကုန်သွားတာလဲ… ”

မည်သည့်စစ်တပ်ရိက္ခာက တိုက်ပွဲအကျိုးပြုအမှတ်သန်းရှစ်ရာကို ကုန်ဆုံးစေခဲ့သနည်း။

အဖြေကို မည်သူမှ မသိကြချေ။

လူတိုင်းက ရွှေရောင်အလင်းထောင့်တိုင်ပေါ်၌ ဖြည်းဖြည်းချင်း ပျောက်ကွယ်သွားသော ကိန်းဂဏန်းများကို ကြည့်ရင်း နှုတ်ဆိတ်သွားကြသည်။

ထိုအခိုက်အတန့်မှာ မဟာမူလဘုံ၏ အဝေးတစ်နေရာတွင် စစ်သည်တော်ရှစ်သန်းကို ဦးဆောင်ထားသော တန်ကိုင်က ရုတ်တရက် ခေါင်းငုံ့လိုက်သည်။

သူ၏ လက်ထဲတွင် ရွှေရောင်အလင်းက အသက်ဝင်လာသည်။

ရွှေရောင်အလင်းတန်းထဲမှာ ကိန်းဂဏန်းများ ထွက်ပေါ်လာသည်။

“ တိုက်ပွဲအကျိုးပြုအမှတ်ဆယ်သန်း ”

“ ဟား ဟား ဟား… စစ်ဦးစီးချုပ်က ဒီလောက်အချိန်တိုလေးအတွင်းမှာ စစ်ရေးအကျိုးပြုအမှတ်ဆယ်သန်းကို စုဆောင်းနိုင်ခဲ့တယ်… စစ်ဦးစီးချုပ်က တကယ်ပဲ အစွမ်းသတ္တိရှိလှပါတယ် ”

တန်ကိုင်၏ ဘေးပတ်ဝန်းကျင်မှ ဗိုလ်ချုပ်များက စိတ်လှုပ်ရှားသော အမူအရာကို ထုတ်ဖော်လိုက်ကြပြီး အော်ပြောလိုက်ကြသည်။

အတိတ်မှာ ပြုလုပ်ခဲ့သော ကောင်းကင်ဘုံစစ်ပွဲများထဲမှာ ထိုသို့ရလဒ်ကို ရရှိနိုင်သူများက အလွန်နည်းပါးသည်။

အကယ်၍ ဤနှုန်းအတိုင်း ဆက်သွားမည်ဆိုလျှင် နှစ်ပေါင်းတစ်ရာကြာပြီးနောက် သူတို့က မည်မျှများပြားသော တိုက်ပွဲအကျိုးပြုအမှတ်များကို စုဆောင်းနိုင်သွားမည်နည်း။

“ ဟန်မူယဲ့ကရော ”

အနက်ရောင်သံချပ်ကာဝတ် လူသန်းကြီးက ပြောသည်။

တန်ကိုင်၏ လက်ထဲမှ ရွှေရောင်အလင်းက ဖျတ်ခနဲ ဝင်းလက်သွားပြီး ဟန်မူယဲ့၏ တိုက်ပွဲအကျိုးပြုအမှတ်များကို ဖော်ပြလိုက်သည်။

ဟန်မူယဲ့၏ တိုက်ပွဲအကျိုးပြုအမှတ်ကို မြင်သောအခါ တန်ကိုင်က အံ့ဩသွားသည်။ ထို့နောက် အပြုံးက သူ၏ မျက်နှာပေါ်မှာ ထွက်ပေါ်လာသည်။

“ ဟန်မူယဲ့ သေသွားပြီ ”