အခြေတည်အဆင့် ကျင့်ကြံခဲ့သော နှစ်(၃၀)ကာလ၊ အမြုတေဖွဲ့စည်းခြင်း နယ်ပယ်သို့ တက်လှမ်းခြင်း(၂)။

"အစီအစဉ် မရှိဘူး.."

"သူတို့က လူသားမျိုးနွယ်စုမှာ ပါဝင်တဲ့ ဝိညာဉ်သန္ဓေသားအဆင့် အင်အားစုတွေ ဖြစ်ပြီး.. အချင်းချင်း ဆက်ဆံရေး ကောင်းမွန်ကြပေမယ့်…"

"သူတို့မှာ ငါတို့ကို ကူညီဖို့ အစီအစဉ် မရှိကြဘူး…"

"ဘာပဲဖြစ်ဖြစ်… ချန်လန်ပင်လယ်က အရမ်း ကျယ်ပြန့်တယ်လေ.. သူတို့ရဲ့ နယ်မြေတွေကို ကာကွယ်ဖို့ သက်သက်ကတင် အလုပ်ကြီးတစ်ခု ဖြစ်နေပြီ.."

"ဒီတော့.. လက်ရှိအချိန်မှာ.. ဒီ သားရဲလှိုင်းကို ရင်ဆိုင်ရာမှာ ငါတို့ ကိုယ့်ကိုယ်ကိုယ်ပဲ အားကိုးရမယ်…"

"ဒါပေမဲ့… တကယ့် စိုးရိမ်စရာက ကောင်းကင်မိစ္ဆာဂိုဏ်း.. ရွှမ်ယင်ဂိုဏ်းနဲ့ ဟေးရှားနန်းတော်တို့က ဒုက္ခပေးလာနိုင်တာပဲ.."

သမီးဖြစ်သူ၏ မေးခွန်းကို နားထောင်ရင်း ဝူကျိတာအိုအရှင်၏ သဘောထားသည် အတော်လေး ဖော်ရွေနူးညံ့သွားသည်။

မည်သို့ပင်ဆိုစေကာမူ၊ သူ့သမီးက သူ့အတွက် အမြဲတမ်း ဂုဏ်ယူစရာ ဖြစ်ခဲ့သည် မဟုတ်ပါလော။

သူမသည် ကောင်းကင်အဆင့် စိတ်ဝိညာဉ်အမြစ် ပါရမီ ပိုင်ဆိုင်ထားရုံသာမက၊ ထူးခြားသော ရုပ်ခန္ဓာကိုယ် ဖွဲ့စည်းပုံလည်း ရှိပေသည်။

ထို့ကြောင့် ဝိညာဉ်သန္ဓေသားအဆင့်သို့ တက်လှမ်းရန် အတားအဆီး မရှိပေ။ ဖြစ်နိုင်သည်မှာ၊ သူမသည် အနာဂတ်တွင် သူ့ကိုပင် ကျော်လွန်သွားနိုင်သည်။

ကံမကောင်းစွာဖြင့်၊ သူ့သမီးသည် သူမ၏ မြင့်မားသော စိတ်ဓာတ်နှင့် မာန်မာနကြီးမှုတို့ကြောင့် အမျိုးသား ကျင့်ကြံသူ အများအပြားကို အထင်သေးခဲ့သည်။

သူမသည် ယခုအချိန်အထိ တာအိုလက်တွဲဖော်တစ်ဦးကို ရှာမတွေ့သေးပေ။

သူသည် တစ်ခါက သူမအား အရည်အချင်းရှိသော လူငယ်အချို့နှင့် မိတ်ဆက်ပေးခဲ့ဖူးသော်လည်း အချည်းနှီးသာ ဖြစ်ခဲ့သည်။

ယခုအချိန်တွင် သူ လက်လျှော့လိုက်ပြီ ဖြစ်သည်။

သူ့သမီး ပျော်ရွှင်နေသရွေ့ အရာအားလုံး အဆင်ပြေသည်ဟုသာ ဖြေသိမ့်လိုက်ရတော့သည်။

"တကယ်လား.. သူတို့ကလည်း လူသားမျိုးနွယ်စုဝင်တွေ ဆိုတော့… ပင်လယ်မျိုးနွယ်စုကို ကူညီဖို့ တကယ်စဉ်းစားကြပါ့မလား…"

ဆရာသခင်မက်မွန်ပွင့် မျက်မှောင်ကြုတ်လိုက်သည်။

"ဟမ့်... မိစ္ဆာလမ်းစဉ်က လူတွေ အကုန်လုံး အတ္တကြီးကြတယ်…"

"သူတို့မှာ မျိုးနွယ်စုတစ်ခုရဲ့ ကြီးမြတ်တဲ့ တရားမျှတမှုဆိုတာတွေ ဘာတွေ မရှိကြဘူး…"

"လောကကြီးက သူတို့ကို သစ္စာဖောက်တာ ခံရမယ့်အစား… သူတို့ကပဲ အားလုံးကို သစ္စာဖောက်ဖို့ ရွေးချယ်ကြလိမ့်မယ်…"

"သူတို့ရဲ့ ကျင့်ကြံမှုကို မြှင့်တင်ဖို့ အခွင့်အရေး ရှိရင်… ဒီ မိစ္ဆာကျင့်ကြံသူတွေက လူသားမျိုးနွယ်စုကို နောက်ကျောကနေ ဓားနဲ့ထိုးဖို့ တွန့်ဆုတ်နေမှာ မဟုတ်ဘူး…"

"ဒါကြောင့်မလို့.. လူတိုင်း ဒီလိုလူတွေကို လိုက်လံဖမ်းဆီးပြီး သုတ်သင်သင့်တယ်…"

ဝူကျိတာအိုအရှင် အေးစက်စွာ နှာခေါင်းရှုံ့လိုက်သည်။

သူ၏ ကြောက်မက်ဖွယ် သတ်ဖြတ်လိုစိတ် အရှိန်အဝါသည် အခန်းတစ်ခုစလုံးကို ချက်ချင်း ဖုံးလွှမ်းသွားပြီး၊ ဝိညာဉ်သန္ဓေသား တာအိုနယ်ပယ်တစ်ခု ဖွဲ့စည်းလိုက်သကဲ့သို့ ကြောက်စရာကောင်းသော ဖိအားကို ဖြစ်ပေါ်စေသည်။

စုဝေးနေသော ဝိညာဉ်သန္ဓေသားအဆင့် ဘိုးဘေးများ အားလုံး ကြောက်ရွံ့မှုကြောင့် တုန်ရီနေကြသည်။ ဤသည်မှာ ဝူကျိမဟာမိတ်အဖွဲ့ ခေါင်းဆောင်ကြီး၊ ဝိညာဉ်သန္ဓေသား ပြီးပြည့်စုံမှုအဆင့်ကို ရရှိထားပြီးသော နတ်ဘုရားအသွင်ပြောင်းအဆင့်အတွက် အလားအလာ အရှိဆုံး မဟာကျင့်ကြံသူကြီး တစ်ဦး၏ ကြောက်မက်ဖွယ် စွမ်းအားပင် ဖြစ်သည်။

"သားရဲလှိုင်းသာ လာရင်.. ဝူကျိမဟာမိတ်အဖွဲ့ရဲ့ အစွန်အဖျားကျွန်းတွေက ထိခိုက်မှု အရှိဆုံး ဖြစ်လောက်တယ်…"

ဤအခိုက်အတန့်တွင် ဆရာသခင်မက်မွန်ပွင့်သည် သူမ စုဆောင်းလိုခဲ့သော၊ ဤအစွန်အဖျား ကျွန်းများတွင် တည်ရှိနေပုံရသည့် ရွှေအမြုတေ အမျိုးသမီးကျင့်ကြံသူ သုံးဦးကို သတိရလိုက်သည်။

ဤတစ်ကြိမ်တွင်၊ ၎င်းတို့သည် သွေးစွန်းမိစ္ဆာအိုနှင့် အပေါင်းအပါများအား သုတ်သင်သတ်ဖြတ်ခြင်းမှ သိသာထင်ရှားသော ဂုဏ်သတင်းကို ရရှိခဲ့ကြပေသည်။

ဝူကျိမဟာမိတ်အဖွဲ့၏ နက်ရှိုင်းသော အထင်ကြီးမှုကို ရရှိစေနိုင်သော ၎င်းတို့၏ စွမ်းအားကို ပြသခဲ့ကြသည်။

ဤသည်မှာ ကောင်းမွန်သော သူမ၏အမြင်ကို လုံလောက်စွာ သက်သေပြလိုက်ခြင်းဟုပင် ဆိုနိုင်ပေသည်။

သို့သော် ထို အမျိုးသမီးကျင့်ကြံသူ သုံးဦးက သူမ၏ စုဆောင်းမှုကို လက်မခံလိုကြသည်မှာ ဝမ်းနည်းစရာပင်။

"ဒီကိစ္စကိုတော့ ငါတို့ ဘာမှ မတတ်နိုင်ဘူး.."

"လက်ရှိမှာ ဝူကျိမဟာမိတ်အဖွဲ့ရဲ့ အင်အားက အဓိက ကျွန်းအချို့ကိုပဲ ကာကွယ်နိုင်တယ်…"

"အစွန်အဖျား ကျွန်းတွေအတွက်ကတော့.. သူတို့ ကိုယ့်ကိုယ်ကိုယ်ပဲ အားကိုးရလိမ့်မယ်…"

ဝူကျိတာအိုအရှင် ခေါင်းခါလိုက်ပြီး၊ သူ့တွင် ဖြေရှင်းနည်း မရှိကြောင်း အမူအရာ ပြသလိုက်သည်။

မည်သို့ပင်ဆိုစေကာမူ၊ ဝူကျိမဟာမိတ်အဖွဲ့၏ အင်အားသည် အကန့်အသတ်မဲ့ မဟုတ်သလို၊ ကျင့်ကြံသူ အရေအတွက်သည်လည်း အကန့်အသတ် ရှိသည် မဟုတ်ပါလော။

ကြီးမားသော သားရဲလှိုင်းကို ရင်ဆိုင်ရချိန်တွင်၊ သူတို့သည် အရေးမပါသော ကျွန်းအချို့ကို စွန့်လွှတ်ကာ သူတို့၏ ခံစစ်များကိုသာ စုစည်းနိုင်တော့သည်။

"ဟုတ်ကဲ့ပါ.. အဖေ.."

ဆရာသခင်မက်မွန်ပွင့် ခေါင်းညိတ်လိုက်သည်။ ဝူကျိမဟာမိတ်အဖွဲ့ ၏ လက်ရှိ အကျပ်အတည်းကို သူမ နားလည်သည်။

"ကောင်းပြီ.. မင်းတို့ သွားလို့ရပြီ…"

"ဒီတစ်ခါ ဝူကျိမဟာမိတ်အဖွဲ့က အနှစ်တစ်ထောင်မှာ တစ်ကြိမ်ကြုံရတဲ့ သားရဲလှိုင်းကို ရင်ဆိုင်ဖို့ ခံစစ်လိုင်းတွေကို စုစည်းလိမ့်မယ်.."

"ငါတို့ ပင်လယ်မျိုးနွယ်စုရဲ့ ကျူးကျော်မှုကို တားဆီးရမယ်.."

ဝူကျိတာအိုအရှင်က လေးနက်သော အသံဖြင့် ပြောလိုက်သည်။

"ဟုတ်ကဲ့ပါ မဟာမိတ် ခေါင်းဆောင်ကြီး…"

ဝိညာဉ်သန္ဓေသားအဆင့် ဘိုးဘေးအားလုံး ခေါင်းညိတ်လိုက်ကြသည်။

…

သွေးစွန်းမိစ္ဆာအိုနှင့် အခြား ရွှေအမြုတေဆရာသခင်များ အသတ်ခံရပြီးကတည်းက အင်မော်တယ်ရှားမြို့တော်သည် သိသာထင်ရှားသော အာရုံစိုက်မှုကို ရရှိခဲ့သည်။

ဝူကျိမဟာမိတ်အဖွဲ့၏ အဝေးဆုံး ကျွန်းများမှ ကျင့်ကြံသူများပင်လျှင် အင်မော်တယ်ရှားမြို့တော်၏ သတင်းကို စတင် ကြားသိလာကြသည်။

ဒုတိယအဆင့် ဝိညာဉ်အရက်နှင့် အရည်အသွေးမြင့် အခြေတည်ဆေးလုံးများ၏ ဆွဲဆောင်မှုအပြင်၊ ယင်းအချက်ကြောင့် ကျင့်ကြံသူ အမြောက်အမြားသည် အင်မော်တယ်ရှားမြို့တော် သို့ ဝင်ရောက်လာကြသည်။

သဘာဝအတိုင်း ၎င်းတို့သည် စိတ်ဝိညာဉ်ဆေးဝါး၊ ဆေးလုံး၊ မှော်လက်နက်၊ စိတ်ဝိညာဉ်ပစ္စည်းများနှင့် အခြားအရာ အမြောက်အမြားကို ၎င်းတို့နှင့်အတူ ယူဆောင်လာကြသည်။

ဤအချက်က အင်မော်တယ်ရှားမြို့တော်တွင် ကြွယ်ဝချမ်းသာမှုကို တိုးပွားလာစေခဲ့သည်။

သို့သော် ထိုကြွယ်ဝချမ်းသာမှုသည် အနီးနားရှိ မြို့များတွင် ကုန်သွယ်မှု ကျဆင်းခြင်းကို ဖြစ်ပေါ်စေခဲ့သည်။

မည်သို့ပင်ဖြစ်စေ၊ ကျင့်ကြံသူများအတွက် အရေးကြီးဆုံးမှာ အရင်းအမြစ်များ ဖြစ်ကြသည်။

လူစည်ကားသောနေရာတွင် စီးပွားရေး ဖြစ်ထွန်းသည်မှာ သဘာဝပင်ဖြစ်၏။ ထိုရွှေအမြုတေ မိသားစု များ ၎င်းနှင့်ပတ်သက်ပြီး ဘာမှ မလုပ်နိုင်ကြပေ။

အဘယ်ကြောင့်ဆိုသော် အင်မော်တယ်ရှားမြို့တော်၏ အင်အားသည် သူတို့ ယှဉ်ပြိုင်နိုင်သော အရာ မဟုတ်တော့သောကြောင့် ဖြစ်သည်။

သူတို့သည် အင်မော်တယ်ရှားမြို့တော် စည်ပင်ဝပြောလာကာ ဝိညာဉ်ကျောက်တုံး အမြောက်အမြားကို စုပ်ယူနေသည်ကို အကူအညီမဲ့စွာ ရပ်ကြည့်နေရုံသာ တတ်နိုင်ကြသည်။

ထိုအချိန်တွင် ကျိုးစွေ့သည် အင်မော်တယ်ရှားတောင်ထွတ်အတွင်း၌ သူ၏ ဇနီးမယားများနှင့်အတူ ရှက်ရွံ့ခြင်းကင်းသော အေးချမ်းသည့် တူနှစ်ကိုယ်ကျင့်ကြံခြင်း ဘဝပုံစံကို ဖြတ်သန်းနေခဲ့သည်။

သူ၏ ကျင့်ကြံမှုအဆင့် မြင့်တက်လာသည်နှင့်အမျှ၊ ကျိပင်းယွီ၊ ရှားကျင်းယန်နှင့် မုဇီယန်တို့ သုံးဦးအပေါ် သူ၏ ပြန်လည်ပေးဆပ်မှုသည်လည်း သိသိသာသာ တိုးတက်လာခဲ့သည်။

ချီသန့်စင်ခြင်းအဆင့်တွင်၊ သူတို့သည် ကျိုးစွေ့အတွက် များစွာ အထောက်အကူ ဖြစ်ခဲ့ကြသည်။

သို့သော် အခြေတည်အဆင့်သို့ တက်လှမ်းပြီးနောက်၊ ကျိုးစွေ့သည် ကျိပင်းယွီနှင့် အခြား လက်တွဲဖော်များအား ၎င်းတို့၏ ကျင့်ကြံမှုအဆင့်များကို မြှင့်တင်ရာတွင် ကူညီပေးခဲ့သူ ဖြစ်သည်။

ယင်းသည် နှေးကွေးသောနှုန်းဖြင့် ဖြစ်သော်လည်း၊ ၎င်းတို့၏ စိတ်ဝိညာဉ်အမြစ် ပါရမီကိုပင် မြှင့်တင်ပေးနိုင်ခဲ့သည်။

သူတို့၏ ကျင့်ကြံမှုသည် အခြေတည် အလယ်အလတ်အဆင့်သို့ အလွယ်လေး တိုးတက်လာရုံ သာမက၊ သိသာထင်ရှားသော တိုးတက်မှုများကိုလည်း ရရှိခဲ့သည်။

အသိသာဆုံး တိုးတက်သူမှာ လန်ယွဲ့ရှီပင်။

နောက်တစ်ကြိမ် တူနှစ်ကိုယ်ကျင့်ကြံခြင်း ပြုလုပ်ပြီးနောက်၊ လန်ယွဲ့ရှီသည် နောက်ဆုံးတွင် ဖောက်ထွက်နိုင်ခဲ့ပြီး ရွှေအမြုတေ အလယ်အလတ်အဆင့်သို့ တက်လှမ်းနိုင်ခဲ့သည်။

ရွှေအမြုတေ ကျင့်ကြံသူများအတွက်၊ ဤသည်ကို ကြီးမားသော ချိုးဖြတ်မှုတစ်ခုအဖြစ် သတ်မှတ်နိုင်သည်။

မည်သို့ပင်ဆိုစေကာမူ၊ သာမန် ရွှေအမြုတေ ကျင့်ကြံသူများသည် ဤအတားအဆီးတွင် နှစ်ရာပေါင်းများစွာအထိပင် ပိတ်မိနေတတ်ကြသည်။

သို့သော် လန်ယွဲ့ရှီအတွက်မူ ဆယ်စုနှစ် တစ်ခု၊ နှစ်ခုခန့် ကျင့်ကြံရုံဖြင့် ရွှေအမြုတေ အလယ်အလတ်အဆင့်သို့ တက်လှမ်းနိုင်ခဲ့သည်။

ဤသည်ကို လျင်မြန်သော တိုးတက်မှုတစ်ခုအဖြစ် သတ်မှတ်နိုင်သည်။

အကယ်၍ ဤနည်းအတိုင်း ဆက်လက် ကျင့်ကြံပါက၊ အသက် နှစ်ရာ မပြည့်မီမှာပင် ရွှေအမြုတေ နှောင်းပိုင်းအဆင့်သို့ တက်လှမ်းနိုင်ကောင်း တက်လှမ်းနိုင်ပေလိမ့်မည်။

လင်းယာကျူနှင့် ရှန်ပိချန်တို့အတွက်မူ၊ သူတို့သည် ရွှေအမြုတေ နှောင်းပိုင်းအဆင့်တွင် ဆက်လက် သန့်စင်နေကြသည်။

ထို့နည်းတူစွာ၊ ကျိုးစွေ့၏ ကျင့်ကြံမှု အဆင့်သည်လည်း ဖြေးဖြေးမှန်မှန် တိုးတက်လာနေသည်။

အထူးသဖြင့် သူ၏ လက်တွဲဖော်များ၏ ကျင့်ကြံမှု တိုးတက်လာပြီးနောက်၊ တူနှစ်ကိုယ်ကျင့်ကြံခြင်း တစ်ခုစီ၏ အကျိုးသက်ရောက်မှုသည် အလွန် သိသာထင်ရှားလာသည်။

ဤအရာက သူ့ခန္ဓာကိုယ်အတွင်းရှိ မှော်စွမ်းအားကို အရှိန်အဟုန်ဖြင့် ခဲသွားစေနိုင်ခဲ့သည်။

"မဆိုးဘူး… လုံးဝ မဆိုးဘူး…"

"ယေဘုယျအနေနဲ့ဆိုရင်.. အခြေတည်အဆင့် ပြီးပြည့်စုံမှုရှိတဲ့ သာမန် ကျင့်ကြံသူတစ်ယောက်အတွက်.. သူတို့ရဲ့ ဒန်တျန် ချီပင်လယ်ထဲက မှော်စွမ်းအားရဲ့ ပျစ်ခဲမှု ကနဦးလက္ခဏာ ပြလာဖို့အတွက်တောင် အရမ်းခက်ခဲတယ်.."

"ဒါက အရေးအကြီးဆုံးနဲ့ အခက်ခဲဆုံး အဆင့်ပဲ…"

"သူတို့က အမြုတေ ဖွဲ့စည်းခြင်း စိတ်ဝိညာဉ်ဆေးဝါး သောက်သုံးမှသာ ဒီအဆင့်ကို ကျော်ဖြတ်နိုင်ခြေ ရှိတယ်…"

"ဒါပေမဲ့ ငါ ဒါကို လုပ်စရာ မလိုဘူး.. ငါက အရေးအကြီးဆုံး အဆင့်ကို ကျော်ဖြတ်ပြီးပြီ…"

"အခု ငါ့ခန္ဓာကိုယ်ထဲက မှော်စွမ်းအား ဘယ်လောက်အထိ ခဲသွားနိုင်မလဲ ဆိုတာပေါ်ပဲ မူတည်တော့တယ်.."

ကျိုးစွေ့ မျက်လုံးများ ကျဉ်းမြောင်းသွားပြီး၊ စိတ်အာရုံဖြင့် သူ၏ ဒန်တျန် ချီပင်လယ်ကို စစ်ဆေးလိုက်သည်။

ဒန်တျန် ချီပင်လယ်ထဲတွင် မှော်စွမ်းအား အရည်စက် တစ်ထောင် ရှိနေသည်ကို သူ အာရုံခံမိသည်။

ကောင်းကင်အဆင့် စိတ်ဝိညာဉ်အမြစ်ရှိသော အခြေတည်အဆင့် ပြီးပြည့်စုံမှု ကျင့်ကြံသူများသည် မှော်စွမ်းအား အရည်စက် (၃၆၀)သာ ပိုင်ဆိုင်ကြပြီး၊ ၎င်းက ပြီးပြည့်စုံသော အခြေအနေကို ညွှန်ပြနေပြီ ဖြစ်သည်။

သို့သော် သူ့တွင် မှော်စွမ်းအား အစက် တစ်ထောင် အပြည့် ရှိနေချေသည်။

ဤသည်မှာ သူ၏ နက်ရှိုင်းသော အခြေခံအုတ်မြစ်ကို သက်သေပြရန် လုံလောက်ပြီး၊ ၎င်းသည် ရိုးရှင်းစွာပင် စိတ်ကူးမယဉ်နိုင်လောက်အောင် ဖြစ်သည်။

မှန်ပေသည်၊ ဆိုလိုသည်မှာ သူ ဖွဲ့စည်းမည့် ရွှေအမြုတေသည် သဘာဝအတိုင်း ပိုမို သန်မာပေလိမ့်မည်။

ဤအခိုက်အတန့်တွင် သူ၏ ခန္ဓာကိုယ်အတွင်းရှိ အရည် မှော်စွမ်းအား ဆယ်ပုံနှစ်ပုံ ခဲသွားပြီ ဖြစ်သည်။

အဝေးမှ ကြည့်လျှင်၊ ထိုမှော်စွမ်းအား အစုအဝေးသည် ကြီးမားနက်မှောင်သော ရွှေရောင် ဆေးလုံးကြီး တစ်လုံးနှင့် တူနေပေသည်။ သို့သော် ယင်းသည် အရည် အခြေအနေတွင်သာ ရှိနေဆဲ ဖြစ်၏။

သူ ဆန္ဒရှိလျှင် အမြုတေ ဖွဲ့စည်းခြင်း လုပ်ငန်းစဉ်ကို ချက်ချင်း စတင်နိုင်သည်။ သို့သော် သူ ထိုမျှ မမိုက်မဲပေ။

အမြုတေ ဖွဲ့စည်းခြင်းလို ကိစ္စမျိုးအတွက်၊ သဘာဝအတိုင်း ဖြစ်ပျက်စေသည်က ပိုကောင်းသည် မဟုတ်ပါလော။

မှော်စွမ်းအားကို ၎င်း၏ ကန့်သတ်ချက်အထိ ခဲသွားစေပြီးနောက်မှသာ၊ အမြုတေ ဖွဲ့စည်းခြင်းကို စတင်ပါက၊ အောင်မြင်နိုင်ခြေ ပိုများပေလိမ့်မည်။

"နောက်ထပ် နှစ်အနည်းငယ်လောက်ဆိုရင်.. ငါ အမြုတေ ဖွဲ့စည်းခြင်းကို ကြိုးစားလို့ ရလောက်ပြီ…"

ကျိုးစွေ့တစ်ယောက် စိတ်ဓာတ်တက်ကြွနေတော့သည်။

…