အမြုတေဖွဲ့စည်းခြင်း ကောင်းကင်ဖြစ်စဉ်၊ ကျန်းထောင်ချီသော ရောင်ခြည်အလင်းတန်းများ(၂)။

ဤအချိန်တွင် ကျိပင်းယွီ၊ မုဇီယန်၊ ရှားကျင်းယန်၊ လန်ယွဲ့ရှီ၊ လင်းယာကျူနှင့် ရှန်ပိချန်တို့အားလုံး အင်မော်တယ်ရှားတောင်ထွတ်ပေါ်ရှိ လိုဏ်ဂူနေအိမ် အပြင်ဘက်တွင် စောင့်ဆိုင်းနေကြပြီး၊ အနည်းငယ် စိုးရိမ်ပူပန်နေကြသည်။

သူတို့သည်လည်း ဤတစ်ကြိမ် ကျိုးစွေ့၏ အမြုတေဖွဲ့စည်းခြင်း အတွက် အလွန် စိုးရိမ်နေကြသည်။

အဘယ်ကြောင့်ဆိုသော် ဤတစ်ကြိမ်သည် ကျိုးစွေ့အတွက် အမြုတေဖွဲ့စည်းခြင်း သက်သက် မဟုတ်ဘဲ၊ အမှီအခိုကင်း အမြုတေဖွဲ့စည်းခြင်း ဖြစ်သောကြောင့် ဖြစ်သည်။ ထိုသို့ ပြုလုပ်ခြင်းဖြင့် အန္တရာယ် မည်မျှ ဆတိုး များပြားလာနိုင်မည်အား သူတို့ မသိကြပေ။

သူတို့၏ ခင်ပွန်းသည် ထိုကဲ့သို့သော ဆုံးဖြတ်ချက်မျိုး ချခဲ့သည်အား သူတို့ မယုံကြည်နိုင်ကြပေ။

"ငါတို့ ခင်ပွန်းက ဒီတစ်ခါ အမြုတေဖွဲ့စည်းခြင်းမှာ အောင်မြင်နိုင်မလား မသိဘူးနော်…"

ရှားကျင်းယန်၏ မျက်နှာသည် စိုးရိမ်မှုများဖြင့် ပြည့်နှက်နေသည်။

"စိတ်မပူပါနဲ့.. သေချာပေါက် ပြဿနာ ရှိမှာ မဟုတ်ပါဘူး.."

"နင်တို့အားလုံး ငါတို့ ယောက်ျားရဲ့ စရိုက်ကို သိကြတာပဲဟာ.."

"သေချာပေါက် အောင်မြင်မယ်လို့ မသေချာရင်.. သူက ကိုယ်ပိုင်အမှီအခိုကင်း အမြုတေဖွဲ့စည်းခြင်းကို ကြိုးစားပါ့မလား…"

"ပြီးတော့… သူ့မှာ ရွှေရည်ကျောက်စိမ်း ပြန်လည်ရှင်သန်ခြင်းဆေးလုံး ရှိတယ်…"

"မတော်တဆတွေ ဖြစ်ခဲ့ရင်တောင်… ကုစားဖို့ အခွင့်အလမ်း ရှိနေပါသေးတယ်…"

လန်ယွဲ့ရှီက လေးနက်စွာ ပြောလိုက်သည်။

"တကယ်ပဲ.. အဲ့ဒါ မှန်တယ်.."

"ငါတို့ ခင်ပွန်းက သူ မသေချာတဲ့ ဘယ်အရာကိုမှ လုပ်မှာ မဟုတ်ဘူး…"

ကျိပင်းယွီနှင့် မုဇီယန်တို့လည်း ဤအချက်ကို စိတ်ပါလက်ပါ သဘောတူကြသည်။

ရိုးရိုးသားသား ဆိုရလျှင်၊ သူတို့၏ ခင်ပွန်းထက် ပိုသတိကြီးသောသူ မရှိပေ။ ခင်ပွန်းဖြစ်သူက မည်သည့်အတွက်ကြောင့် အန္တရာယ်ရှိသော အလုပ်ကို လုပ်ပါမည်နည်း။ ယင်းအား လုပ်ဆောင်ရဲသည်ဆိုပါက၊ အန္တရာယ်သိပ်များဟုသာ ဆိုလိုပေသည်။

"ဒါက ငါတို့ ခင်ပွန်းရဲ့ ရွေးချယ်မှုလည်း ဖြစ်တယ်…"

"သူသာ ကိုယ်ပိုင်အမှီအခိုကင်း အမြုတေဖွဲ့စည်းခြင်းကို အောင်အောင်မြင်မြင် ရရှိနိုင်ခဲ့ရင်.. သူ့ရဲ့ အနာဂတ် ဝိညာဉ်သန္ဓေသား ဖွဲ့စည်းနိုင်ခြေက သိသိသာသာ တိုးတက်လာလိမ့်မယ်…"

"အမြဲတမ်း ခြေတစ်လှမ်း စောနေတော့တာပဲ…"

ရှန်ပိချန် စိတ်လှုပ်ရှားစွာ သက်ပြင်းချလိုက်သည်။

ကိုယ်ပိုင်အမှီအခိုကင်း အမြုတေဖွဲ့စည်းခြင်းသည် ဝိညာဉ်သန္ဓေသား ဖွဲ့စည်းနိုင်ခြေကို သိသိသာသာ တိုးတက်စေနိုင်ကြောင်း သူမ သဘာဝကျကျ သိထားသော်လည်း၊ ကိုယ်ပိုင်အမှီအခိုကင်း အမြုတေဖွဲ့စည်းခြင်း၏ အောင်မြင်မှုနှုန်းမှာ အလွန် နိမ့်ကျလွန်းသည်။

သူမသည် ပထမအဆင့် စိတ်ဝိညာဉ်အမြစ်ကို ပိုင်ဆိုင်ထားသော်လည်း၊ အတိတ်က အထောက်အကူပြု အမြုတေဖွဲ့စည်းခြင်း စိတ်ဝိညာဉ်ပစ္စည်းများကို အသုံးပြု၍သာ အမြုတေဖွဲ့စည်းခြင်းကို အောင်မြင်ခဲ့ရသည်။

အကယ်၍ အမြုတေဖွဲ့စည်းခြင်းအတွက် အထောက်အကူပြု စိတ်ဝိညာဉ်ပစ္စည်းများ မရှိခဲ့လျှင်၊ သူမ ကျရှုံးသွားဖွယ် ရှိသည်။

ကိုယ်ပိုင်အမှီအခိုကင်း အမြုတေဖွဲ့စည်းခြင်းကို အမှန်တကယ် စွမ်းဆောင်နိုင်သူများသည် သန်းတစ်ရာတွင် တစ်ယောက်သာ ရှိသည်ဟုပင် ပြောနေစရာ လိုမည်မထင်ပေ။

ကောင်းကင်အဆင့် စိတ်ဝိညာဉ်အမြစ် ကျင့်ကြံသူများပင်လျှင်၊ အန္တရာယ် လျော့ပါးစေရန်အတွက် အထောက်အကူပြု အမြုတေဖွဲ့စည်းခြင်း စိတ်ဝိညာဉ်ပစ္စည်းများကို အများဆုံး အသုံးပြုကြသည်။

"အခု ငါတို့ တတ်နိုင်တာ ဘာမှ မရှိတော့ဘူး…"

"ငါတို့ လုပ်နိုင်တာက ယုံကြည်ဖို့ပဲ…"

"အရေးအကြီးဆုံးက.. ငါတို့ ယောက်ျားရဲ့ အမြုတေဖွဲ့စည်းခြင်းကို ဘယ်သူ့ကိုမှ အနှောင့်အယှက် ပေးခွင့် ပြုလို့မဖြစ်ဘူး…"

လင်းယာကျူသည် သတ်ဖြတ်လိုစိတ်ဖြင့် မျက်နှာအမူအရာ တင်းမာနေသည်။

"မှန်တယ်…"

လန်ယွဲ့ရှီနှင့် အခြားသူများ ခေါင်းညိတ်လိုက်ကြသည်။

သူတို့သည်လည်း ခင်ပွန်းသည်၏ အမြုတေဖွဲ့စည်းခြင်း လုပ်ငန်းစဉ်ကို မတော်တဆ အကြောင်းအရာများက အနှောင့်အယှက် မဖြစ်စေရန် နေအိမ် အပြင်ဘက်တွင် စောင့်ကြပ်နေကြသည်။

နေအိမ်အတွင်း၌၊ ကျိုးစွေ့သည် အပြင်ဘက်မှ ဆူညံသံများကို လုံးဝ သတိမထားမိပေ။

မည်သို့ပင်ဆိုစေကာမူ၊ သူ၏ခွန်အား အလုံးစုံအား အမြုတေဖွဲ့စည်းခြင်းအတွက် မြှုပ်နှံထားသည်ဖြစ်ရာ၊ မည်သည့်အရာကိုမှ အာရုံမစိုက်တော့ချေ။

ရလဒ်သည် သူ မျှော်လင့်ထားသည့်အတိုင်း အတိအကျပင် ဖြစ်၏။

သူ၏ နက်ရှိုင်းသော အခြေခံအုတ်မြစ်နှင့် စေ့စပ်သေချာသော ပြင်ဆင်မှုများကြောင့်၊ အမြုတေဖွဲ့စည်းခြင်းသည် အခက်အခဲ မရှိဘဲ ဆက်လက် ဖြစ်ပွားနေသည်။

အဆုံးမရှိသော ရွှေရောင်အလင်းတန်းများ ထုတ်လွှတ်နေသည့် ရွှေအမြုတေတစ်ခုသည် ဒန်တျန် ချီပင်လယ်၏ နက်ရှိုင်းရာတွင် ဖွဲ့စည်းထားပြီး ဖြစ်သည်။

၎င်းကို လျှို့ဝှက်ဆန်းကြယ်သော ရုန်းသင်္ကေတများဖြင့် အမှတ်အသား ပြုလုပ်ထားပြီး၊ ပြိုင်ဘက်ကင်းသော မြင့်မြတ်မှုအသွင်အပြင် ဖြစ်သည့် နက်မှောင်သော ရွှေရောင်ကို ထုတ်ဖော်ပြသနေသည်။

သို့သော် ယခုမှ ဖွဲ့စည်းထားခြင်း ဖြစ်သောကြောင့်၊ ဤရွှေအမြုတေသည် အပြည့်အဝ တည်ငြိမ်ခြင်း မရှိသေးပေ။

ယေဘူယျအားဖြင့်၊ သူသည် အမြုတေဖွဲ့စည်းခြင်းကို ပြီးမြောက်ပြီး ဖြစ်သည်။

ကျန်ရှိနေသည်မှာ အစွမ်းထက်သော ရွှေအမြုတေတစ်ခုကို စုစည်းရန် သဘာဝဝိညာဉ်စွမ်းအင် အမြောက်အမြားကို စိတ်ရှည်ရှည်ဖြင့် စုပ်ယူရန် လိုအပ်သည့် နှေးကွေးသော လုပ်ငန်းစဉ် တစ်ခုသာ ဖြစ်သည်။

မှန်ပေသည်၊ အခြေခံအုတ်မြစ် နက်ရှိုင်းလေ၊ ဖွဲ့စည်းလိုက်သော ရွှေအမြုတေသည် ပိုသန်မာလေပင် ဖြစ်၏။

သို့သော်ငြား၊ ယင်းအားသေချာပေါက် အောင်မြင်ပြီဟူ၍ တွက်၍မရချေ။

အမှန်တကယ်တွင်၊ ဤလုပ်ငန်းစဉ်အတွင်း အမျိုးမျိုးသော စိတ်မိစ္ဆာများသည် သူ၏ သိစိတ်ပင်လယ် နက်ရှိုင်းရာတွင် ဖြစ်ပေါ်လာပြီး၊ သူ၏ ရွှေအမြုတေဖွဲ့စည်းခြင်းကို ထိခိုက်စေကြပေမည်။

အကယ်၍ သူသည် စိတ်မိစ္ဆာများထံ အမှန်တကယ် ရှုံးနိမ့်သွားပါက၊ အမြုတေဖွဲ့စည်းခြင်း ကျရှုံးသွားပေလိမ့်မည်။

၎င်းသည် အတုအယောင်အမြုတေကို ဖြစ်ပေါ်စေပြီး၊ အနာဂတ် အခွင့်အလမ်းများကို ဆုံးရှုံးစေလိမ့်မည်။

ဟူးလား…။

ထိုအခိုက်အတန့်တွင် ကျိုးစွေ့သည် ကူနတ်ဘုရားကျင့်စဉ်ကို အသက်သွင်းလိုက်ရာ၊ ကောင်းကင်နှင့် မြေကြီးမှ အဆုံးမရှိသော ဝိညာဉ်စွမ်းအင်များသည် သူ့ဆီသို့ လှိမ့်ဝင်လာပြီး၊ ဒန်တျန် ချီပင်လယ်ထဲသို့ စီးဝင်သွားကာ၊ ရွှေအမြုတေ၏ ဝါးမျိုခြင်းကို ခံလိုက်ရသည်။

ရွှေအမြုတေသည် သိသာထင်ရှားစွာ ကြီးထွားလာနေပြီး၊ ၎င်း၏ ကြီးထွားမှု နှုန်းကို သာမန် မျက်စိဖြင့်ပင် မြင်နိုင်သည်။

သို့သော် ဤလုပ်ငန်းစဉ်တွင် ကောင်းကင်နှင့် မြေကြီးမှ မိစ္ဆာချီအချို့ကို စုပ်ယူမိခြင်းသည် ရှောင်လွှဲမရနိုင်ဘဲ၊ စိတ်မိစ္ဆာ အမြောက်အမြားကို ဖြစ်ပေါ်စေသည်။

၎င်းသည် ဝိညာဉ်သန္ဓေသားအဆင့် အတွင်းရှိ စိတ်မိစ္ဆာကပ်ဘေးလောက် ကြောက်စရာ မကောင်းသော်လည်း၊ တာအိုစိတ်ဝိညာဉ် မတည်ငြိမ်သော ကျင့်ကြံသူများအတွက် သေစေနိုင်သော ထိုးနှက်ချက် တစ်ခု ဖြစ်သည်။

ဘုန်း…။

ထိုစဉ်၊ စိတ်မိစ္ဆာတစ်ကောင်မှ သက်ရောက်စေသော မမြင်နိုင်သော စွမ်းအားတစ်ခု သူ့ဆီသို့ တိုးဝင်လာပြီး၊ ကျိုးစွေ့၏ စိတ်ဝိညာဉ်ကို ထင်ယောင်ထင်မှား ဖြစ်မှုထဲသို့ ချက်ချင်း ဆွဲခေါ်သွားတော့သည်။

ရုတ်တရက်၊ ကျိုးစွေ့၏ အမြင်အာရုံ မဲမှောင်သွားပြီး၊ သူသည် ခမ်းနားထည်ဝါစွာ အလှဆင်ထားသော နန်းတော်တစ်ခုထဲတွင် ရောက်ရှိနေသည်ကို တွေ့လိုက်ရကာ၊ အဝတ်အစား မလုံတလုံ ဝတ်ဆင်ထားသော လှပသည့် အမျိုးသမီးများ ဝန်းရံလျက် ရှိနေသည်။

တစ်ယောက်ချင်းစီတိုင်းသည် ဆွဲဆောင်မှုရှိပြီး ညှို့ယူဖမ်းစားနိုင်ကာ၊ ပိုင်ဆိုင်ခံရရန် စောင့်ဆိုင်းနေကြသည်။

သာမန် ကျင့်ကြံသူများသည် ထိုကဲ့သို့သော စမ်းသပ်မှုကို ခံနိုင်ရည် ရှိကြမည် မဟုတ်ပေ။ သူတို့သည် သွေးဆောင်မှုထဲသို့ ချက်ချင်း ကျရောက်သွားမည် ဖြစ်ပြီး၊ ကိုယ့်ကိုယ်ကိုယ် ရုန်းထွက်နိုင်စွမ်း ရှိကြမည် မဟုတ်ပေ။

"အတုကြီးပဲ.. သောက်ရမ်းကို အတုအယောင်ဆန်လွန်းတယ်…"

"သောက်ကျိုးနည်း…ဒါက စိတ်မိစ္ဆာရဲ့ စမ်းသပ်မှုတဲ့လား…"

ကျိုးစွေ့ မျက်တောင်ခတ်လိုက်မိသည်။ အခြား ကျင့်ကြံသူများအတွက်မူ၊ ထိုကဲ့သို့သော ထင်ယောင်ထင်မှား ဖြစ်မှုသည် အလွန်တရာ လက်တွေ့ကျကောင်း ကျနေနိုင်ပြီး၊ အမှန်တကယ် ဖြစ်ပျက်နေသကဲ့သို့ ခံစားရနိုင်သည်။

သို့သော် ‘အိပ်မက်ဝိညာဉ်ကူ’ကို ရရှိပြီးကတည်းက၊ သူသည် ပုံရိပ်ယောင်ပညာရပ်များတွင် ဆရာကျသူတစ်ဦး ဖြစ်လာခဲ့ပြီး၊ အိပ်မက်နယ်မြေ စွမ်းအားကို လိုသလို ထိန်းချုပ်နိုင်စွမ်း ရှိသည်။

စိတ်မိစ္ဆာ၏ စွမ်းအားနှင့် အိပ်မက်နယ်မြေ၏ စွမ်းအားတို့သည် လက်တွေ့အားဖြင့် ထပ်တူညီနေသည်။

ထို့ကြောင့် ထိုကဲ့သို့သော စိတ်မိစ္ဆာ၏ ထင်ယောင်ထင်မှား ဖြစ်မှုသည် သူ့ရှေ့တွင် ပေါ်လာသောအခါ၊ ၎င်းသည် ကလေးကစားစရာနှင့် တူညီနေသည်။

"ဒါကို ဝါးမျိုလိုက်ကွာ.."

ကျိုးစွေ့က 'အိပ်မက်ဝိညာဉ်ကူ'ကို အမိန့်ပေးလိုက်သည်။

ဝှမ်…။

ချက်ချင်းပင် သတ္တဝါတစ်ကောင်သည် ထင်ယောင်ထင်မှား စိတ်မိစ္ဆာကမ္ဘာထဲတွင် ပေါ်လာသည်။ ၎င်းမှာ ပိုးကောင်တစ်ကောင် ဖြစ်သည်။

စိတ်မိစ္ဆာအတွက်မူ၊ ဤအရာသည် သမိုင်းမတင်မီခေတ်က ဘီလူးကြီးတစ်ကောင်နှင့် တွေ့ဆုံရခြင်းကဲ့သို့ ကြောက်မက်ဖွယ် ကောင်းလှသည်။

'အိပ်မက်ဝိညာဉ်ကူ'သည် ၎င်း၏ ပါးစပ်ကို ဖွင့်လိုက်ပြီး ရက်စက်စွာ ကိုက်ဝါးလိုက်ပြီး၊ စိတ်မိစ္ဆာ၏ ထင်ယောင်ထင်မှားကမ္ဘာ တစ်စိတ်တစ်ပိုင်းကို ချက်ချင်း ဝါးမျိလိုက်တော့သည်။

"အားးးး"

"ဒါ ဘယ်လိုလုပ် ဖြစ်နိုင်မှာလဲ…"

"ဒီကျင့်ကြံသူက ငါတို့ စိတ်မိစ္ဆာတွေကို ဘယ်လိုလုပ် ထိခိုက်အောင် လုပ်နိုင်တာလဲ.."

"ချီးတဲ့မှ.. ပြေးဟေ.. ပြေးဟ…"

မျက်စိတစ်မှိတ်အတွင်း ထိတ်လန့်ဖွယ်ရာ အော်ဟစ်သံများသည် ထင်ယောင်ထင်မှားကမ္ဘာတစ်လျှောက် ပဲ့တင်ထပ်သွားသည်။

စိတ်မိစ္ဆာများ ကြောက်လန့်တကြားဖြင့် လူစုခွဲကာ ထွက်ပြေးကြတော့သည်။

ကံမကောင်းစွာဖြင့်၊ အချိန်နှောင်းသွားခဲ့ပြီ ဖြစ်သည်။

အဆင့်သုံး၏ အောက်ခြေနယ်ပယ်သို့ တက်လှမ်းထားသော 'အိပ်မက်ဝိညာဉ်ကူ'သည် ယခင်ကထက် အဆပေါင်းများစွာ ပိုမို သန်မာနေသည်။

၎င်းသည် တွင်းနက်ကြီးတစ်ခု ပေါ်လာသည့်အလား ရေဝဲကဲ့သို့သော စွမ်းအားတစ်ခုကို ထုတ်လွှတ်လိုက်သည်။

စိတ်မိစ္ဆာ ထင်ယောင်ထင်မှားကမ္ဘာ တစ်ခုလုံးသည် ပူဖောင်းတစ်ခုအဖြစ် ပြောင်းလဲသွားပြီး ပေါက်ကွဲသွားကာ၊ ၎င်း၏ ဗိုက်ထဲသို့ ဝါးမျိုခံလိုက်ရတော့သည်။

စိတ်မိစ္ဆာအုပ်စုသည် 'အိပ်မက်ဝိညာဉ်ကူ'၏ အပြီးတိုင် ဝါးမျိုခြင်းကို ခံလိုက်ရပြီး ၎င်း၏ အစာ ဖြစ်လာခဲ့သည်။

ထိုအခိုက်အတန့်တွင် 'အိပ်မက်ဝိညာဉ်ကူ'၏ စွမ်းအားသည် ဆတိုးကိန်းဖြင့် မြင့်တက်လာခဲ့သည်။

၎င်းသည် လူသား ကျင့်ကြံသူများ၏ စိတ်ဝိညာဉ်များကို စားသုံးခြင်းထက် စိတ်မိစ္ဆာများကို စားသောက်ပွဲ ကျင်းပခြင်းမှ ပိုမို အကျိုးကျေးဇူး ရရှိပုံရသည်။ အလွန် အာဟာရပြည့်ဝသော အစာတစ်မျိုးကို တွေ့ရှိလိုက်သကဲ့သို့ပင် ဖြစ်ချေသည်။

"နေဦး... ဒီ စိတ်မိစ္ဆာတွေက ကျင့်ကြံသူတွေရဲ့ နှလုံးသားကနေ မွေးဖွားလာတဲ့ ထူးခြားတဲ့ အရာတွေထက် ပိုနေတာများ ဖြစ်နိုင်မလား…"

"သူတို့က ပြင်ပကမ္ဘာက မွေးဖွားလာတဲ့ ထူးခြားသတ္တဝါတွေများ ဖြစ်နိုင်မလား.."

ကျိုးစွေ့ သံသယများဖြင့် ပြည့်နှက်နေပြီး၊ စိတ်မိစ္ဆာများ၏ ဇာစ်မြစ်နှင့် ပတ်သက်၍ ဇဝေဇဝါဖြစ်နေမိတော့သည်။

သို့သော် သူ ဆက်လက်စဉ်းစားရန် အချိန်မရမီမှာပင်၊ ထင်ယောင်ထင်မှား စိတ်မိစ္ဆာကမ္ဘာသည် ရုတ်တရက် ပြိုကျသွားပြီး၊ ဘာမှ မဖြစ်ပျက်ခဲ့သည့်အလား သူ၏ ဝိညာဉ် ပြန်လည် ရောက်ရှိလာသည်။

ဤတစ်ခေါက် သူသည် စိတ်မိစ္ဆာကပ်ဘေးကို အားစိုက်ထုတ်စရာမလိုဘဲ လွယ်ကူစွာ ဖြတ်ကျော်နိုင်ခဲ့သည်။

ထို့အပြင် စိတ်မိစ္ဆာများကို ဝါးမျိုပြီးနောက်၊ ကျိုးစွေ့သည် သူ၏ နှလုံးသား နက်ရှိုင်းရာမှ ဖုန်မှုန့်လွှာ တစ်ခုကို ဖယ်ရှားလိုက်သကဲ့သို့ အတွင်းစိတ် ကြည်လင်မှုကို ခံစားလိုက်ရပြီး၊ တာအိုနှလုံးသား အခြေအနေကို နားလည် သဘောပေါက်စေခဲ့သည်။

စိတ်မိစ္ဆာတစ်ကောင်ကို ဖယ်ရှားလိုက်တိုင်း၊ ကျင့်ကြံသူတစ်ဦးအတွက် သိသာထင်ရှားသော တိုးတက်မှုကို ကိုယ်စားပြုပြီး၊ အကျိုးကျေးဇူးများသည် ထင်ရှားနေသည်။

ဤတစ်ကြိမ်အတွက်မူ၊ နောက်ထပ် အတားအဆီးများ မရှိတော့ပေ။

ကျိုးစွေ့တစ်ယောက် သူ၏ ကျင့်ကြံမှုကို ဆက်လက် ပြုလုပ်နေစဉ်တွင်ပင် အချိန်များ ကုန်ဆုံးသွားခဲ့ပြီး၊ မျက်စိတစ်မှိတ်အတွင်း ရက်ပေါင်းတစ်ရာ ကုန်လွန်သွားခဲ့တော့သည်။