တည်နေရာရွှေ့ပြောင်းခြင်း

ဟင်

ထိုလူမှာ ရုတ်တရက် ရှင်းပြမရနိုင်သော အေးစိမ့်မှုကို ခံစားလိုက်ရကာ မနေနိုင်ဘဲ တုန်လှုပ်သွားသည်။

တစ်စုံတစ်ခုက သူ့ကို စိုက်ကြည့်နေသကဲ့သို့ ခံစားနေရပြီး ထိုခံစားချက်မှာ ပို၍ပို၍ ပြင်းထန်လာ၏။

သို့သော် သူ၏အရေးကြီးသော လုပ်ငန်းစဉ်က ပိုအရေးကြီးသည်။

ဤနေရာမှာ အလွန်မှောင်မည်းနေသည်ဟု သူခံစားရသော်လည်း၊ဤနေရာမှ ပြဿနာကို အရင်ဖြေရှင်းပြီးမှသာ အမြန်ဆုံး ထွက်ခွာသင့်သည်ဟု သူတွေးလိုက်သည်။

သူသည် သူ၏လက်ကို ချက်ချင်းလှီးလိုက်ပြီး သူ၏သွေးကို နတ်ဓားသခင်ရုပ်ထု ပေါ်သို့ ချလိုက်ရန် ပြင်လိုက်သည်။

၎င်းမှာ မြူခိုးသမုဒ္ဒရာ၏ နိယာမတစ်ခုပင်။

ပင်မဂိုဏ်း၏သွေးသည် နတ်ဓားသခင်ရုပ်ထုပေါ်သို့ ကျရောက်သွားပါက၊ လက်အောက်ခံဂိုဏ်းသည် ပင်မဂိုဏ်းရှိရာ အနီးအနားသို့ ချက်ချင်း ရွှေ့ပြောင်းခံရမည် ဖြစ်သည်။

ဤအရာက သူ့ခရီးစဉ်၏ အဓိက ရည်ရွယ်ချက်ပင်။

လက်အောက်ခံဂိုဏ်းကို ရွှေ့ပြောင်းပြီးသည်နှင့် ပင်မဂိုဏ်းက ချက်ချင်း အရေးယူကာ ဤဂိုဏ်းခွဲကို သိမ်းပိုက်လိမ့်မည်။ ရိုးရှင်းပြီး မြန်ဆန်လှသည်။

သူ၏သွေးတစ်စက်ကို နတ်ဓားသခင်ရုပ်ထုပေါ်သို့ ချလိုက်သည်။ ခဏအကြာတွင် ရုပ်ထုမှာ တစ်စုံတစ်ခုကို သိရှိသွားသကဲ့သို့ တုန်ခါသွားသည်။

အောင်မြင်သွားပြီ

သို့သော် ထိုအခိုက်အတန့်တွင် စိုက်ကြည့်ခံနေရသည့် ခံစားချက်မှာ ပိုမိုသန်မာလာသည်။

ဘာတွေ ဖြစ်နေတာလဲ

ကြီးမားသော ဘေးအန္တရာယ်တစ်ခုမှာ သူ့ထံသို့ အချိန်မရွေး ကျရောက်လာတော့မည်ဟု သူ ခံစားနေရသည်။

သူ ရုတ်တရက် နောက်သို့ လှည့်ကြည့်လိုက်သည်။

သူ ထိတ်လန့်သွား၏။ပုံရိပ်တစ်ခုက သူ့ကို အေးစက်စွာ ကြည့်နေသည်ကို သူ မြင်လိုက်ရသည်။

ထိုသူ၏မျက်လုံးများမှာ အေးစိမ့်သော စမ်းရေတွင်းကဲ့သို့ တောက်ပနေသည်။

ဤလူသည် ဤနေရာတွင် မည်သည့်အချိန်ကတည်းက ရပ်နေခဲ့သနည်း။

သူ၏ခန္ဓာကိုယ်မှာ တောက်ပနေသဖြင့် ဤမှောင်မည်းသော မြူထုထဲတွင် အလွန်ထင်ရှားနေသင့်သော်လည်း သူ ယခုမှ သတိပြုမိခြင်း ဖြစ်သည်။

ထူးဆန်းလှသည်။

အန္တရာယ်ရှိနေပြီ

သူ ခေါင်းကို လှည့်လိုက်ပြီး—

"မင်း... မင်းက ဘယ်သူလဲ"

သူ မျက်လုံးများကို မှေးကြည့်လိုက်သည်။ သူကိုယ်တိုင်လည်း ကူးပြောင်းခြင်းအဆင့် ပညာရှင်တစ်ဦး ဖြစ်သော်လည်း သူ၏ရှေ့မှ လူငယ်လေးကိုမူ ထိုးဖောက်မမြင်နိုင်ပေ။

"ငါက ဒီဂိုဏ်းက လူတစ်ယောက်ပါ"

ဒီဂိုဏ်းက လူတစ်ယောက် ဟုတ်လား

ထိုလူ၏မျက်နှာမှာ သိသိသာသာ ပြောင်းလဲသွားသည်။

ခဏအတွင်းမှာပင် သူ၏အတွေးများမှာ လျှပ်စီးကဲ့သို့ မြန်ဆန်စွာ လည်ပတ်နေသည်။

သူသည် ဤဂိုဏ်းက အဖွဲ့ဝင်တစ်ဦး ဖြစ်ပါလျက်နှင့် သူ လုပ်ဆောင်သမျှကို ဘာကြောင့် တိတ်တဆိတ် စောင့်ကြည့်နေခဲ့ရသနည်း။

သူက အမူအရာမပျက်စေရန်ဖြင့် တည်ငြိမ်အောင် ဟန်ဆောင်လိုက်သည်။

"မကြာခင်မှာ ဒီနေရာကို ကောင်းကင်ဘုံဓားဂိုဏ်း ရဲ့ပင်မဂိုဏ်းဆီ ရွှေ့ပြောင်းတော့မှာပါ။ မင်းတို့လို သစ္စာဖောက်တွေ အားလုံး အပြစ်ပေးခံရလိမ့်မယ်။"

သူ၏အသံမှာ အေးစက်နေသော်လည်း အမှန်တကယ်တွင်မူ သူ တစ်ခုခုကို စမ်းသပ်နေခြင်း ဖြစ်သည်။

အကြောင်းမှာ... ဤစကားကို ကြားသော်လည်း ထိုလူငယ်၏ မျက်နှာထားမှာ အပြောင်းအလဲ မရှိပေ။

သူသည် ကောင်းကင်ဘုံဓားဂိုဏ်း နှင့် ရင်ဆိုင်ရမည်ကို စိုးရိမ်ခြင်း သို့မဟုတ် ကြောက်ရွံ့ခြင်း မရှိပုံရပေ။

ဤသည်မှာ သူ အကြောက်ဆုံး အချက်ပင်။

အကယ်၍ ဤလူငယ်က ဘာမှမသိလျှင် ထားပါဦး၊ ယခုမူ သူ ဘာလုပ်နေသည်ကို သိသိကြီးနှင့် အစကတည်းက မတားဆီးခဲ့ခြင်း ဖြစ်သည်။

ဤအရာက ဘာကို ဆိုလိုသနည်း...

သူသည် ပင်မဂိုဏ်းနှင့် ဆက်သွယ်သွားမည်ကို လုံးဝ မကြောက်ခြင်းပင်။

ထို့ပြင် အကြောင်းရင်းကို မသိသော်လည်း ဤလူငယ်ကို မြင်လိုက်ရချိန်တွင် သူသည် ပင်မဂိုဏ်းကိုပင် ယှဉ်နိုင်စွမ်းရှိသည်ဟူသော မဖြစ်နိုင်သည့် ခံစားချက်တစ်ခုကို ခံစားလိုက်ရသည်။

"မင်း..."

"မင်း စကားတွေ အရမ်းများနေပြီ"

ထိုအခိုက်အတန့်တွင် လူငယ်က နောက်ဆုံး၌ စကားပြောလိုက်သည်။

သူ စကားပြောလိုက်သည်နှင့် ပတ်ဝန်းကျင်ရှိ အပူချိန်မှာ ချက်ချင်း ကျဆင်းသွားသည်။

မရေမတွက်နိုင်သော ဓားများက ထိုနေရာတစ်ခုလုံးကို ဝန်းရံထားသကဲ့သို့ပင်။

ဝုန်း

ကောင်းကင်ဘုံဓားဂိုဏ်း (ဂိုဏ်းခွဲ) မှာ ရုတ်တရက် အပြောင်းအလဲ ဖြစ်သွားသည်။

"ဘာတွေ ဖြစ်နေတာလဲ ဘာလို့ ကမ္ဘာကြီးတစ်ခုလုံး ချာချာလည်နေသလို ခံစားနေရတာလဲ"

"ဘာဖြစ်တာလဲ ငါ အခုလေးတင် အဝတ်အစားတွေ ချွတ်ပြီး အိပ်တော့မလို့ပဲ၊ ရုတ်တရက် မြေကြီးတွေ တုန်ခါလာတယ်..."

"ဒါ... ဒါက သိပ်ရင်းနီးနေသလိုပဲ။ ငါတို့ တခြားဂိုဏ်းတွေကို ဝါးမျိုပြီး သူတို့ရဲ့ ရုပ်ထုတွေကို သိမ်းပိုက်တုန်းကနဲ့ တူနေတယ်။ ဘာတွေ ဖြစ်နေတာလဲ"

ကျန်းစန်းကျန့် သည် ကျမ်းစာတိုက်ထဲမှ ထွက်လာသည်။ သူ၏မျက်လုံးများမှာ သံသယနှင့် စိုးရိမ်မှုများ ပြည့်နှက်နေ၏။

ဝုန်း

ကောင်းကင်နှင့် မြေကြီးမှာ လည်ပတ်နေပြီး နတ်ဓားသခင်ရုပ်ထုမှာ အဆက်မပြတ် တုန်ခါကာ တောက်ပသော အလင်းများ ထွက်ပေါ်နေသည်။

မည်သူက နတ်ဓားသခင်ရုပ်ထုကို ထိတွေ့လိုက်သနည်း။

အပြင်ဘက်တွင် အနက်ရောင်မြူထုများမှာ တဝဲဝဲလည်နေပြီး ခဏအကြာတွင် နှေးကွေးသွားသည်။

တပည့်အချို့ အပြင်သို့ ကြည့်လိုက်သောအခါ အပြင်ဘက်မြင်ကွင်းမှာ လုံးဝ မရင်းနီးသောနေရာ ဖြစ်နေသည်ကို တွေ့လိုက်ရသည်။

"ဘာတွေ ဖြစ်ကုန်တာလဲ..."

"ငါတို့ နေရာပြောင်းသွားပြီ ထင်တယ်... ဒါပေမဲ့ ဒါက မဖြစ်နိုင်ဘူးလေ။ မြူသမုဒ္ဒရယရဲ့ လျှို့ဝှက်နိယာမတွေကြောင့်လား"

ကျန်းစန်းကျန့်၏ မျက်နှာမှာ အလွန်ပင် ပျက်ယွင်းသွားသည်။

အကြောင်းမှာ သူ အပြင်ဘက်ကို ကြည့်လိုက်သောအခါ ထိုနေရာမှာ အလွန်ပင် ရင်းနှီးနေသောကြောင့် ဖြစ်သည်။

အနက်ရောင်မြူထုများ ဖုံးလွှမ်းနေသော်လည်း ဤနေရာမှာ ကောင်းကင်ဘုံဓားဂိုဏ်း၏ ပင်မဂိုဏ်း ဖြစ်သည်ကို သူ မှတ်မိလိုက်သည်။

သူတို့ ပင်မဂိုဏ်းဆီကို ရောက်လာကြပြီ။

ယခင်က သူတို့သည် ပင်မဂိုဏ်းသို့ ဝင်ရောက်လိုခဲ့ကြသော်လည်း၊ ယခုအခါ သူတို့သည် အခြားဂိုဏ်းများကို ဝါးမျိုကာ နတ်ဓားသခင်ရုပ်ထု သုံးခုအထိ ပိုင်ဆိုင်ထားပြီ ဖြစ်သည်။

မြူခိုးသမုဒ္ဒရာ၏နိယာမမှာ တစ်ဦးကိုတစ်ဦး ဝါးမျိုရန် ဖြစ်သော်လည်း၊ ယခု သူတို့သည် ပင်မဂိုဏ်းနှင့် အဆင့်တူ သို့မဟုတ် ထိုထက်ပင် သာလွန်နေပြီ ဖြစ်သည်။

ဤအရာက မကောင်းပေ အန္တရာယ်ရှိနိုင်၏။

အကယ်၍ လက်ရှိဂိုဏ်းခွဲက ပင်မဂိုဏ်းထဲသို့ ရောက်သွားပါက ပင်မဂိုဏ်းက ၎င်းကို လွှတ်ပေးမည် မဟုတ်ပေ။

အနည်းဆုံး တာဝန်ရှိသူများကို အကျဉ်းချကာ ကျန်ရှိသောသူများကို စောင့်ကြည့်စစ်ဆေးမည် ဖြစ်သည်။

သို့သော် အမှန်အတိုင်း ပြောရလျှင် သူသည် မကျေနပ်ဖြစ်‌မိလေ၏။

မြူခိုးသမုဒ္ဒရယအတွင်း၌ ပင်မဂိုဏ်းက သူတို့ကို မကာကွယ်နိုင်ခဲ့ပေ။ သူတို့သည် မိမိဘာသာ ရုန်းကန်ခဲ့ရသည်။

ရှန်းချန်ကော သာ မရှိလျှင် သူတို့ဂိုဏ်းမှာ ပျက်စီးသွားသည်မှာ ကြာလှပြီ။ ယခု သူတို့ အင်အားကြီးလာသောအခါမှ ပင်မဂိုဏ်းက လာရောက်ခေါ်ယူခြင်းမှာ သူတို့ ဆက်လက်ကြီးထွားလာမည်ကို စိုးရိမ်သောကြောင့် ဖြစ်သည်မှာ ထင်ရှားသည်။

ဟူး...

ပတ်ဝန်းကျင်ရှိ အနက်ရောင်မြူခိုးများမှာ ရုတ်တရက် ဆုတ်ဖြဲခံလိုက်ရသည်။ ကြောက်မက်ဖွယ်ကောင်းသော အရှိန်အဝါတစ်ခုမှာ ကောင်းကင်ဘုံဓားဂိုဏ်း တစ်ခုလုံးကို လွှမ်းခြုံသွားသည်။

လူတိုင်းမှာ ထိုအရှိန်အဝါအောက်တွင် တုန်လှုပ်သွားကြသည်။

အနက်ရောင်မြူခိုးများ တဖြည်းဖြည်း ကင်းစင်သွားသည်။

ထိုအခိုက်တွင် ဂိုဏ်းအပြင်ဘက်၌ လူအုပ်ကြီး တစ်ခုရှိနေသည်။

သူတို့၏အဝတ်အစားများမှာ ဂိုဏ်းခွဲနှင့် ဆင်တူသော်လည်း ပိုမိုကောင်းမွန်သော ပစ္စည်းများဖြင့် ပြုလုပ်ထားပြီး ပိုမိုလှပသော ပုံစံများ ပါဝင်သည်။

သူတို့အားလုံးမှာ ဂိုဏ်းခွဲလေးကို မောက်မာစွာ ကြည့်နေကြသည်။

"လက်အောက်ခံဂိုဏ်းတစ်ခုက ပင်မဂိုဏ်းရဲ့ လုပ်ငန်းတွေကို ဝင်ရောက်စွက်ဖက်ပြီး ဂိုဏ်းတွေကို ဝါးမျိုနေတယ်။ သူတို့ရဲ့ ပုန်ကန်လိုတဲ့ ရည်ရွယ်ချက်က ရှင်းနေတာပဲ"

"ဒီဂိုဏ်းခွဲက သေသင့်တယ်။ အကြီးအကဲတွေ အားလုံးနဲ့ အဲဒီဂိုဏ်းချုပ်ကို သတ်ပစ်ရမယ်။"

"ငါ ကြားတာတော့ အဲဒီဂိုဏ်းချုပ်နဲ့ ငါတို့ဂိုဏ်းရဲ့ အရင် သူတော်စင်မိန်းမပျိုဖြစ်တဲ့ အခုအကြီးအကဲတို့ကြားမှာ ပတ်သက်မှုတစ်ခု ရှိတယ်တဲ့။ ဒီကိစ္စ ဘယ်လိုဖြစ်မလဲဆိုတာ စောင့်ကြည့်ရမယ်။"

တပည့်များမှာ တီးတိုးဆွေးနွေးနေကြသည်။

ကောင်းကင်ဘုံဓားဂိုဏ်း (ပင်မဂိုဏ်း)၏ အင်အားမှာ အလွန်ပင် ကြောက်စရာကောင်းလှသည်။

တပည့်အများစုမှာ လွတ်မြောက်ခြင်းအဆင့် တွင် ရှိနေကြပြီး၊ အချို့မှာ နတ်တံတားအဆင့် သို့ ရောက်နေပြီ ဖြစ်သည်။

အကြီးအကဲအများစုမှာ ကူးပြောင်းခြင်းအဆင့် အထွတ်အထိပ်တွင် ရှိနေကာ၊ ပို၍ ကြောက်မက်ဖွယ်ကောင်းသော အကြီးအကဲများမှာမူ အနန္တအမှောင်ထုအဆင့် သို့ပင် ရောက်ရှိနေနိုင်ပါသည်။

ကွာခြားချက်မှာ အလွန်ပင် သိသာလှသည်။ကျန်းစန်းကျန့်၏ မျက်နှာမှာ ဖြူလျော်သွားသည်။

ဘာဆက်လုပ်ရမည်နည်း။

"ကောင်းကင်ဘုံဓားဂိုဏ်း ပင်မဂိုဏ်းဆိုတာ မင်းတို့ ယှဉ်နိုင်တဲ့ အရာမဟုတ်ဘူး... အမြန်ဆုံး အရှုံးပေးလိုက်တာက မင်းတို့အတွက် အကောင်းဆုံးပဲ" ဟု နတ်ဓားသခင်ရုပ်ထုရှေ့မှ လူက ချွေးပြန်ကာ တုန်တုန်ယင်ယင် ပြောလိုက်သည်။

ထိုနေရာတွင် သူတို့နှစ်ဦးသာ ရှိနေသဖြင့် မည်သူမျှ မသိနိုင်ပေ။

သို့သော် ရှန်းချန်ကော ကမူ စိတ်ဝင်တစားရှိနေပုံရသည်။

"အဘိုးကြီးနဲ့ အဲဒီ သူတော်စင်မိန်းမပျိုကြားမှာ ဘာတွေ ဖြစ်ခဲ့တာလဲ"