အခန်း (၄၄၈-၄၅၀)

အခန်း (၄၄၈) - မူလ စွမ်းအားကို လုယူခြင်း

~"မဖြစ်နိုင်တာ.."

ထိုမြင်ကွင်းကို မြင်လိုက်ရသောအခါ... ထျန်းယွဲ့ဂိုဏ်းချုပ်ကြီးမှာ အလွန်အမင်း အံ့ဩတုန်လှုပ်သွားပြီး အော်ဟစ်လိုက်မိသည်။ ဖုန်းဝူချန်၌ ဤမျှ ကြောက်မက်ဖွယ်ကောင်းသော စွမ်းအားများ ရှိနေသည်ကို သူ ယုံကြည်နိုင်ခြင်း မရှိ ဖြစ်နေရှာသည်။

"ဂိုဏ်းချုပ်လေး.."

ထျန်းယွဲ့ဂိုဏ်းမှ အကြီးတန်း ခေါင်းဆောင်များ အားလုံး စိုးရိမ်ပူပန်သွားကြသည်။

"ဆေးဧကရာဇ်ရဲ့ ဓားသိုင်းပညာက... ဒဏ္ဍာရီလာ 'အင်မော်တယ် သိုင်းကျမ်း' များလား"

ဟု ကောင်းကင်မီး တောင်ပေါ်စံအိမ် သခင်ကြီးက ကြောက်လန့်တကြား ရေရွတ်လိုက်မိသည်။

"မသေမျိုး ဆုံးဖြတ်ချက်.."

ကောင်းကင်မီး တောင်ပေါ်စံအိမ် သခင်ကြီး၏ ရေရွတ်သံကို ကြားလိုက်ရသောအခါ၊ ထိပ်တန်း ကျွမ်းကျင်ပညာရှင် အများအပြားမှာ တုန်လှုပ်ခြောက်ခြားသွားကြသည်။

ဖုန်းဝူချန်၏ လှုပ်ရှားမှုများသည် ပေါ့ပါးသော်လည်း၊ ပါဝင်နေသော စွမ်းအားများမှာမူ အလွန်အမင်း ကြောက်မက်ဖွယ် ကောင်းလှပေသည်။ ပြန်စဉ်းစားကြည့်လိုက်သောအခါ... 'အင်မော်တယ် သိုင်းကျမ်း' သာလျှင် ဤမျှ လွှမ်းမိုးကြီးစိုးပြီး ကြောက်မက်ဖွယ်ကောင်းသော စွမ်းအားကို ပိုင်ဆိုင်နိုင်လိမ့်မည်ဟု တွေးမိကြသည်။

ပိုပြီး တွေးလေ ပိုပြီး ကြောက်စရာ ကောင်းလေ ဖြစ်နေပြီး၊ ထိုအရာ ဖြစ်နိုင်ချေ အလွန် များနေသည်ဟု ခံစားမိကြသည်။

ထိုအခိုက်မှာ၊ ဖုန်းဝူချန်သည် 'နဂါးနတ်ဘုရားဓား' ကို ကိုင်ဆောင်ကာ ဟင်းလင်းပြင်သို့ ညွှန်လိုက်ရာ၊ ကိုးလွှာသော ကောင်းကင်မှ နတ်ဆိုးနတ်ဘုရား တစ်ပါးအလား ဖြစ်နေပြီး သူ၏ ဘုန်းတန်ခိုးက ကမ္ဘာမြေကို တုန်လှုပ်သွားစေသည်။

လွှမ်းမိုးကြီးစိုးသော အရှိန်အဝါက လူများကို အသက်ရှူကျပ်သွားစေသည်။

"ဟားဟာစ၊ ဖန်ရှောင်ယွင်... မင်း ရှုံးပြီ.."

ဖုန်းဝူချန်က မကောင်းဆိုးဝါးဆန်သော ရယ်သံဖြင့် ပြောလိုက်သည်။ သူ၏ အမူအရာမှာ အလွန်အမင်း မောက်မာဝင့်ကြွားနေသည်။

ဖုန်းဝူချန်က ဖန်ရှောင်ယွင် ရှုံးနိမ့်ကြောင်း ကြေညာလိုက်ခြင်း ဖြစ်ပေ၏။

အမှန်တကယ်ပင်... ဖုန်းဝူချန်၏ ကြောက်မက်ဖွယ် စွမ်းအားကို ဖန်ရှောင်ယွင် ယှဉ်နိုင်စွမ်း မရှိတော့ဘဲ ဒဏ်ရာများ ရရှိထားပြီးဖြစ်ရာ ရှုံးနိမ့်သွားပြီမှာ သေချာသလောက် ဖြစ်နေသည်။

နောက်ဆုံးတွင် ဖန်ရှောင်ယွင်၏ မျက်နှာပေါ်၌ ကြောက်ရွံ့မှုများ ပေါ်လာသည်။

ဖုန်းဝူချန်၏ ရှေ့တွင် ဖန်ရှောင်ယွင် အားကိုးရာမဲ့နေသလို ခံစားနေရပြီး၊ ဖုန်းဝူချန်ကို အနိုင်ယူနိုင်စွမ်း မရှိဘူးဆိုသော အတွေးများ သူ၏ ရင်ထဲတွင် ကြီးစိုးလာသည်။

ဤမျှ ကြောက်မက်ဖွယ်ကောင်းသော စွမ်းအားမျိုးနှင့် ရင်ဆိုင်ရလျှင်၊ ဖန်ရှောင်ယွင် အနိုင်ရဖို့ဆိုတာ လုံးဝ မဖြစ်နိုင်တော့ပေ။

'အရိပ်ဝိညာဉ် လိုက်လံချေမှုန်းခြင်း ဓားသိုင်းပညာ' သည် ဖန်ရှောင်ယွင်၏ အစွမ်းထက်ဆုံး သိုင်းပညာဖြစ်သော်လည်း၊ ယခုအခါ ဖုန်းဝူချန်က တို့ဖူးတုံးကို လှီးဖြတ်လိုက်သကဲ့သို့ လွယ်လွယ်ကူကူ နှစ်ပိုင်းဖြတ်ပစ်လိုက်သည် မဟုတ်ပါလော။

ပြင်းထန်ပြီး ကြောက်မက်ဖွယ်ကောင်းသော စွမ်းအားက ဖန်ရှောင်ယွင်၏ စိတ်ဓာတ်ကို လုံးဝ ရိုက်ချိုးပစ်လိုက်ပြီ ဖြစ်၏။

ဖုန်းဝူချန်က သန်မာလွန်းလှပေသည်။

'ကိုးထပ်ချန်ခွန်းမျှော်စင်' ၏ အကူအညီ မပါဘဲနှင့်ပင်၊ ဖုန်းဝူချန်သည် 'ကောင်းကင်ဘုံလူသား' စတုတ္ထအလွှာရှိသော ကျွမ်းကျင်ပညာရှင် တစ်ယောက်ကို ယှဉ်ပြိုင်နိုင်စွမ်း ရှိနေသည်။

ဖန်ရှောင်ယွင်၏ ဓားအလင်းတန်းကို လွယ်လွယ်ကူကူ ချေမှုန်းပစ်လိုက်နိုင်ပြီး ဒဏ်ရာရအောင် လုပ်နိုင်ခြင်းက ဖုန်းဝူချန်၏ ကြောက်မက်ဖွယ် စွမ်းအားကို သက်သေပြရန် လုံလောက်နေပြီ ဖြစ်၏။

ဖန်ရှောင်ယွင်က ဖုန်းဝူချန်ကို ကြောက်ရွံ့စွာ ကြည့်လိုက်ပြီး၊ လက်ရှိ ဖုန်းဝူချန်သည် နတ်ဆိုးကောင် တစ်ကောင်နှင့် တူနေသည်ဟု ခံစားလိုက်ရသည်။

"ဆေးဧကရာဇ် သေချာပေါက် နိုင်မှာ.."

"ဟုတ်တယ်.. ဆေးဧကရာဇ်က အခြေအနေကို ပြောင်းပြန်လှန်ပစ်လိုက်ပြီ.."

"ဖုန်းဝူချန်ရဲ့ စွမ်းအားက တကယ်ကို ကြောက်စရာကောင်းတာပဲ.."

တိတ်ဆိတ်ငြိမ်သက်နေသော တောင်တန်းများတွင် လူများ အသိပြန်ဝင်လာကြပြီးနောက်၊ ချက်ချင်းဆိုသလို အာမေဋိတ်သံများ မိုးကောင်းကင်သို့တိုင် ညံသွားကြသည်။

"ရွှစ်.."

ဖန်ရှောင်ယွင် ကြောက်လန့်နေစဉ်မှာပင်... ဖုန်းဝူချန်၏ ပုံရိပ် ရုတ်တရက် ပေါ်လာသဖြင့် ဖန်ရှောင်ယွင် လန့်ဖျတ်သွားပြီး နောက်သို့ ခြေလှမ်းအနည်းငယ် ဆုတ်လိုက်မိသည်။

"မင်း... မင်း ဘာလုပ်ချင်တာလဲ"

ဖန်ရှောင်ယွင်က ကြောက်လန့်တကြား မေးလိုက်သော်လည်း၊ စကားပြောပြီးသည်နှင့် တစ်ပြိုင်နက် ကိုယ့်အရှက်ကိုယ်ကွဲသွားမှန်း သိလိုက်ရသဖြင့် မျက်နှာ မည်းမှောင်သွားရသည်။

ထျန်းယွဲ့ဂိုဏ်းချုပ်လေး တစ်ယောက်အနေဖြင့် ဖုန်းဝူချန်၏ စွမ်းအားကို မယှဉ်နိုင်လျှင်တောင်မှ မကြောက်သင့်ပေ။

ဖုန်းဝူချန်၏ စွမ်းအား မည်မျှပင် ကြောက်စရာကောင်းပါစေ၊ ထျန်းယွဲ့ဂိုဏ်းကြီး တစ်ခုလုံးကို ယှဉ်နိုင်မည် မဟုတ်ပေ။

"ဘာလုပ်ချင်တာလဲ ဟုတ်လား။ သိသာနေတာပဲဟာ... မင်းကို သတ်မလို့ပေါ့.."

ဖုန်းဝူချန်က လှောင်ပြောင်သော အေးစက်စက် ရယ်သံဖြင့် ပြောလိုက်ရာ၊ 'နဂါးနတ်ဘုရားဓား' သည် ဖန်ရှောင်ယွင်၏ နှလုံးသားတည့်တည့်ကို ချိန်ရွယ်ထားပြီး ဖြစ်နေသည်။

ဖုန်းဝူချန်က ဓားကို အနည်းငယ် တွန်းလိုက်ရုံဖြင့် ဖန်ရှောင်ယွင်၏ နှလုံးသားကို ဖောက်ဝင်သွားစေပြီး သတ်ပစ်နိုင်သည်။

ဖန်ရှောင်ယွင်၏ မျက်နှာထား ထပ်မံ ပြောင်းလဲသွားပြန်ပြီး၊ ထိတ်လန့်တကြား နောက်သို့ ခြေလှမ်းအနည်းငယ် ထပ်ဆုတ်လိုက်ရပြန်သည်။

"ဘာဖြစ်လို့လဲ... ကြောက်နေတာလား"

ဖုန်းဝူချန်က လှောင်ပြောင်သရော်လိုက်သည်။

"ခွေးကောင်.."

ဖန်ရှောင်ယွင် ဒေါသထွက်လွန်း၍ ရူးသွပ်မတတ် ဖြစ်နေသည်။ ဖုန်းဝူချန်က သူ့နယ်မြေက လူတွေအားလုံးရဲ့ ရှေ့မှောက်မှာ သူ့ကို တမင်တကာ အရှက်ခွဲနေခြင်း ဖြစ်သည်။

ဖုန်းဝူချန်က သူ့ဂုဏ်သိက္ခာကို ခြေမွနေခြင်း ဖြစ်သည်။

"ငါ အခွင့်အရေး မပေးဘူးလို့ မပြောနဲ့နော်။ နယ်မြေ တစ်ခုလုံးက လူတွေ ကြည့်နေကြတယ်။ မင်းမှာ အရည်အချင်းတွေ ကျန်နေသေးရင် ထုတ်သုံးလိုက်တော့။ ငါက သိပ်ပြီး စိတ်ရှည်တဲ့သူ မဟုတ်ဘူး"

ဖုန်းဝူချန်က အေးစက်စွာ ပြောလိုက်ပြီး၊ သူ၏ အကြည့်များက ပိုမို စူးရှထက်မြက်လာသည်။

"မင်း.."

ဖန်ရှောင်ယွင် ဒေါသထွက်နေသော်လည်း၊ သူ၏ စွမ်းအားက ဖုန်းဝူချန်ကို ယှဉ်နိုင်စွမ်း မရှိတော့ပေ။

"ကြည့်ရတာ မင်းမှာ တခြား အရည်အချင်းတွေ မရှိတော့ဘူးနဲ့ တူတယ်.. ဒါဆိုရင်တော့... မင်းရဲ့ မူလ စွမ်းအားကို ငါ ယူရတော့မယ်.."

ဖုန်းဝူချန်က အမူအရာမဲ့စွာ လှောင်ပြောင်လိုက်ပြီး၊ နက်မှောင်သော မျက်လုံးများထဲတွင် ရက်စက်မှုများ ဝင်းလက်သွားသည်။

ဖန်ရှောင်ယွင် ထိုစကားကို ကြားလိုက်ရသောအခါ မျက်နှာ ပျက်သွား၏။

‘ဖုန်းဝူချန်က ငါ့ရဲ့ မူလ စွမ်းအားကို ယူမယ်လို့ ပြောလိုက်တာလား။’

ဖန်ရှောင်ယွင် သွေးပျက်မတတ် ကြောက်ရွံ့သွားသည်။ အကယ်၍ ဖုန်းဝူချန်သာ သူ့မူလ စွမ်းအားကို ယူသွားပါက၊ ယီထျန်းချင်းက ကောင်းကင်ဘုံ နယ်မြေ၏ ထိပ်တန်း ပါရမီရှင် နေရာကို သေချာပေါက် ရယူသွားတော့မည် မဟုတ်ပါလော။

"မူလ စွမ်းအားက မင်းဆီမှာ ရှိနေတာ နှမြောစရာပဲ.."

ဖုန်းဝူချန်က အေးစက်စက် ပြောလိုက်သည်။ သူ နောက်ပြောင်နေခြင်း မဟုတ်ဘဲ အတည်ပြောနေခြင်း ဖြစ်သည်။

"ဖုန်းဝူချန်.. မင်း လုပ်ရဲရင် လုပ်ကြည့်လေ.."

ထျန်းယွဲ့ဂိုဏ်းချုပ်ကြီးက နောက်ဆုံးတွင် ငြိမ်မနေနိုင်တော့ဘဲ မတ်တတ်ထရပ်ကာ ဒေါသတကြီး အော်ဟစ်လိုက်သည်။ လွှမ်းမိုးကြီးစိုးသော လူသတ်လိုစိတ်များက ရိုင်းစိုင်းစွာ ပျံ့နှံ့ထွက်ပေါ်လာသည်။

အလွန်အမင်း ကြောက်မက်ဖွယ် ကောင်းသော လူသတ်လိုစိတ်များကြောင့် ရောက်ရှိနေသော ကျင့်ကြံသူ အားလုံး ကြောက်လန့်တကြား ဖြစ်ကုန်ကြသည်။

ဖုန်းဝူချန်က ထျန်းယွဲ့ဂိုဏ်းချုပ်ကြီးကို ကျောချမ်းဖွယ် အေးစက်စက် အကြည့်ဖြင့် ပြန်လည် စိုက်ကြည့်လိုက်ပြီး လှောင်ပြောင်လိုက်သည်။

"ဂိုဏ်းချုပ်ကြီး... တိုက်ပွဲ မပြီးသေးပါဘူး။ ဝင်ပါမလို့လား"

"မင်း.."

ထျန်းယွဲ့ဂိုဏ်းချုပ်ကြီး ဒေါသထွက်လွန်း၍ ပြောစရာစကား မရှိ ဖြစ်သွားရသည်။

ဖုန်းဝူချန်၏ စိန်ခေါ်မှု တိုက်ပွဲ မပြီးဆုံးသေးသည်မှာ အမှန်ပင်။ ကောင်းကင်ဘုံ နယ်မြေရှိ အင်အားစု အသီးသီးမှ ကျင့်ကြံသူများစွာ ရောက်ရှိနေကြရာ၊ အကယ်၍ ထျန်းယွဲ့ဂိုဏ်းချုပ်ကြီး ဝင်ရောက်စွက်ဖက်ပါက၊ သူတို့ဂိုဏ်းသည် ကောင်းကင်ဘုံ နယ်မြေတစ်ခုလုံး၏ လှောင်ပြောင်စရာ ဖြစ်သွားပေလိမ့်မည်။

"ဒီကောင်စုတ်က တကယ်ကို မောက်မာလွန်းတယ်.."

အကြီးအကဲ 'ရန်' ၏ မျက်နှာအိုကြီးမှာ မည်းမှောင်နေသည်။

ဖန်ရှောင်ယွင်က လျိုချင်းယန်ကို သတ်လုနီးပါး လုပ်ခဲ့ခြင်းကြောင့် ဖုန်းဝူချန် ဒေါသထွက်နေရသည့်အထဲ၊ ယခု အတိတ်မေ့နေသော လျိုချင်းယန်ကို အသုံးချပြီး သူတို့ကို တိုက်ခိုက်ခိုင်းနေခြင်းက ဖုန်းဝူချန်ကို သည်းမခံနိုင်အောင် ဖြစ်စေခဲ့သည်။ ဖုန်းဝူချန်က သူ့ကို ဘယ်လိုလုပ်ပြီး လွှတ်ပေးနိုင်ပါမည်နည်း။

ဖုန်းဝူချန်အတွက် ဖန်ရှောင်ယွင်ကို ဓားတစ်ချက်တည်းဖြင့် သတ်ပစ်လိုက်ရန် လွယ်ကူသော်လည်း၊ ထိုသို့လုပ်လိုက်ခြင်းက သူ့ကို သက်ညှာပေးရာ ရောက်နေသည်။

ထို့ကြောင့် ဖုန်းဝူချန်သည် မူလ စွမ်းအားကို လုယူရန် စဉ်းစားလိုက်ခြင်း ဖြစ်သည်။

ဖုန်းဝူချန်က ဖန်ရှောင်ယွင်ကို အနက်ရှိုင်းဆုံး ချောက်ကမ်းပါးထဲသို့ တွန်းချပစ်လိုက်ချင်နေခြင်း ဖြစ်သည်။

စိတ်ဆန္ဒ တစ်ချက်ဖြင့်... ဖုန်းဝူချန်၏ မျက်ခုံးနှစ်ခုကြားရှိ ရှေးဟောင်း ရွှေနဂါး တံဆိပ်တော်မှ ရွှေရောင် အလင်းတန်းများ ရုတ်တရက် လင်းလက်လာသည်။

အထွတ်အထိပ်သို့ ရောက်ရှိနေပြီး ရိုင်းစိုင်းကြမ်းတမ်းသော အရှိန်အဝါများ ပျံ့နှံ့လာရာ၊ ဧကရာဇ်တစ်ပါး၏ ဘုန်းတန်ခိုးအာနုဘော်ကဲ့သို့ သူရဲကောင်း အပေါင်းကို လွှမ်းမိုးခြိမ်းခြောက်သွားသည်။

"သိုင်းဝိညာဉ်.. လွှမ်းမိုးကြီးစိုးလိုက်တဲ့ သိုင်းဝိညာဉ်ပါလား.."

"ဘာသိုင်းဝိညာဉ်မှန်း မသိပေမဲ့... တော်တော် ကြောက်စရာ ကောင်းတာပဲ.."

"ဖုန်းဝူချန်က တကယ်ကြီး..ဖန်ရှောင်ယွင်ရဲ့ မူလ စွမ်းအားကို ယူတော့မလို့လား"

ဖုန်းဝူချန်၏ သိုင်းဝိညာဉ် အရှိန်အဝါကို ခံစားလိုက်ရသဖြင့်၊ အင်အားစု အသီးသီးမှ ကျင့်ကြံသူများမှာ နောက်တစ်ကြိမ် ကြောက်ရွံ့ထိတ်လန့် သွားကြပြန်သည်။

ဖန်ရှောင်ယွင်သည် ကြောက်လန့်တကြားဖြင့် ဖုန်းဝူချန်ကို ကြည့်လိုက်ပြီး၊ သူ့ခန္ဓာကိုယ်က အလိုအလျောက် နောက်ဆုတ်သွားမိကာ၊ ရုတ်တရက် နောက်လှည့်ပြီး အရှိန်ပြင်းစွာ ထွက်ပြေးလေတော့သည်။

"မင်း ပြေးလို့ မလွတ်ပါဘူး.."

ဖုန်းဝူချန်က အေးစက်စက် ပြောလိုက်ပြီး၊ မျက်တောင်တစ်ခတ်အတွင်း ဖန်ရှောင်ယွင်၏ ရှေ့မှ ပိတ်ရပ်လိုက်သည်။

"ဝါးမြိုစမ်း.."

ဖုန်းဝူချန်က ကြမ်းတမ်းစွာ အော်ဟစ်လိုက်ရာ၊ ရှေးဟောင်း ရွှေနဂါး တံဆိပ်တော်မှ ကြောက်မက်ဖွယ် ဝါးမြိုခြင်း စွမ်းအားများ ချက်ချင်း ပေါက်ကွဲထွက်ပေါ်လာသည်။

"မလုပ်ပါနဲ့.. ရပ်လိုက်.."

ဖန်ရှောင်ယွင်မှာ မျှော်လင့်ချက်မဲ့စွာ အော်ဟစ်လိုက်ပြီး၊ သူ၏ စွမ်းအားများကို အသည်းအသန် ထုတ်ဖော်ကာ ခုခံရန် ကြိုးစားသည်။

သို့သော် ဖုန်းဝူချန်၏ ပိုမို လွှမ်းမိုးကြီးစိုးပြီး ကြောက်မက်ဖွယ် ကောင်းသော စွမ်းအားရှေ့တွင် ဖန်ရှောင်ယွင်၏ စွမ်းအားများမှာ လုံးဝ အရာမထင်တော့ပေ။

ဖုန်းဝူချန်၏ လက်ဝါးက ဖန်ရှောင်ယွင်၏ ဦးခေါင်းထက်တွင် ဖိကပ်ထားပြီး၊ ကြောက်မက်ဖွယ် ဝါးမြိုခြင်း စွမ်းအားများက ဖန်ရှောင်ယွင်၏ ခန္ဓာကိုယ်ထဲမှ မူလ စွမ်းအားများကို ရူးသွပ်စွာ စုပ်ယူဝါးမြိုနေသည်။

"အ့.."

ဖန်ရှောင်ယွင်က ကြောက်လန့်တကြား အော်ဟစ်လိုက်သည်။ သူ၏ မူလ စွမ်းအားများ ခန္ဓာကိုယ်ထဲမှ လျင်မြန်စွာ စုပ်ယူခံနေရသည်ကို ရှင်းလင်းစွာ ခံစားနေရသည်။

"ဖုန်းဝူချန်.. မြန်မြန် ရပ်လိုက်.. ရပ်လိုက်.."

ဖန်ရှောင်ယွင်က ထိတ်လန့်တကြား အော်ဟစ်လိုက်သည်။

"ဂလု..."

"ဖုန်းဝူချန်က တကယ်ကြီး သခင်လေးဖန်ရဲ့ မူလ စွမ်းအားကို ဝါးမြိုနေတာပဲဟ.."

ကြည့်ရှုနေသော ကျင့်ကြံသူ အများအပြားမှာ အလွန်အမင်း ထိတ်လန့်တုန်လှုပ်နေကြသည်။

"ဖုန်းဝူချန်.."

ထျန်းယွဲ့ဂိုဏ်းချုပ်ကြီး ဒေါသထွက်လွန်း၍ ပေါက်ကွဲထွက်မတတ် ဖြစ်နေပြီး၊ ဆက်လက် သည်းမခံနိုင်တော့ပေ။

"ဂိုဏ်းချုပ်ကြီး... စိတ်လျှော့ပါဦး"

အကြီးအကဲ 'ရန်' က လေးနက်စွာ ပြောလိုက်သည်။

"တိုက်ပွဲပြီးရင် ကျွန်တော်တို့ ဖုန်းဝူချန်ကို သတ်ပြီး မူလ စွမ်းအားကို ပြန်ယူလို့ ရပါတယ်.."

"ကောင်စုတ်.. ငါ မင်းကို အပိုင်းပိုင်းအစစ ဆုတ်ဖြဲပြီး... မင်းရဲ့ ဝိညာဉ်ကို လေထဲမှာ လွင့်ပျောက်သွားအောင် လုပ်ပစ်မယ်.."

ထျန်းယွဲ့ဂိုဏ်းချုပ်ကြီးက ဒေါသတကြီး ဟိန်းဟောက်လိုက်ရာ၊ ပြင်းထန်သော စွမ်းအားများ ထိန်းချုပ်မရနိုင်အောင် ပေါက်ကွဲထွက်ပေါ်လာသည်။

"ဖုန်းဝူချန်... ရပ်လိုက်စမ်း.."

ထိုအချိန်တွင် လျိုချင်းယန်က ရုတ်တရက် ဒေါသတကြီး အော်ဟစ်လိုက်ပြီး၊ ဓားကို ဆွဲထုတ်ကာ ဖုန်းဝူချန်ထံသို့ ပြေးဝင်သွားတော့သည်။

"အစ်ကိုလျို.."

မြောင်ချင်းချင်း၏ မျက်နှာ ဖြူဖပ်ဖြူရော် ဖြစ်သွားသည်။

"ပေတိုယန်.. ချင်းယန်ကို တားထားလိုက်.."

ဖုန်းဝူချန်က အော်ဟစ် အမိန့်ပေးလိုက်သည်။

အခန်း (၄၄၉) - ရန်စွယ်များ မြင့်တက်လာခြင်း

~ထိုအခါ၊ ပေတိုယန်က လျှပ်စီးကဲ့သို့ ပေါ်လာပြီး လျိုချင်းယန်၏ ရှေ့မှ ပိတ်ရပ်လိုက်သည်။

"ဖယ်စမ်း.."

လျိုချင်းယန်က မျှော်လင့်ချက်မဲ့စွာ အော်ဟစ်လိုက်ပြီး၊ သူ၏ ဓားရှည်ကို ရက်စက်ကြမ်းကြုတ်စွာ ဝှေ့ယမ်းလိုက်သည်။

ပေတိုယန်၏ မျက်နှာထားမှာ ခံစားချက်မဲ့နေပြီး၊ တစ်လက်မမျှပင် ရွေ့လျားခြင်း မရှိပေ။

သို့သော် လျိုချင်းယန်၏ ဓားရှည် သူ့ထံသို့ ရောက်ရှိလာသောအခါ၊ ပေတိုယန်၏ ခန္ဓာကိုယ်မှ အဖြူရောင် စွမ်းအင်တစ်ခု ရုတ်တရက် ထွက်ပေါ်လာပြီး ထိုတိုက်ခိုက်မှုကို တားဆီးလိုက်လေသည်။

လျိုချင်းယန်၏ တိုက်ခိုက်မှုသည် ပေတိုယန်ကို နောက်ဆုတ်သွားအောင် မလုပ်နိုင်ခဲ့သည့်အပြင်၊ သူကိုယ်တိုင်ပင် ပြန်လည် လွင့်ထွက်သွားရသည်။

ပေတိုယန်သည် 'ကောင်းကင်ဘုံလူသား' ပထမအလွှာသို့ ရောက်ရှိနေပြီဖြစ်ရာ၊ သူ၏ စွမ်းအားသည် လျိုချင်းယန် ယှဉ်နိုင်သည့် အနေအထားတွင် မရှိတော့ပေ။

လျိုချင်းယန်က တိုက်ခိုက်နေသည်ကို မြင်လိုက်ရသော ယီထျန်းချင်းနှင့် ပိုင်မိတို့မှာ အလွန် နားမလည်နိုင် ဖြစ်နေကြသည်။ လျိုချင်းယန်က ဘာကြောင့် ဖုန်းဝူချန်ကို ဓားဖြင့် တိုက်ခိုက်နေရသနည်း ဟူသည့် အချက်ကို စဉ်းစား၍ မရနိုင် ဖြစ်နေကြသည်။

"ဖုန်းဝူချန်... ရပ်လိုက်စမ်း.."

လျိုချင်းယန်က ဒေါသတကြီး အော်ဟစ်နေသော်လည်း၊ ပေတိုယန်ကို ကျော်ဖြတ်နိုင်စွမ်း မရှိပေ။

"အား.."

ကောင်းကင်ယံထက်တွင် ဖန်ရှောင်ယွင်၏ နာကျင်စွာ အော်ဟစ်သံများ ဆက်တိုက် ထွက်ပေါ်နေသည်။

ဖန်ရှောင်ယွင်၏ ခန္ဓာကိုယ်ထဲမှ မူလ စွမ်းအားများသည် တဖြည်းဖြည်း အားနည်းလာပြီး၊ နောက်ဆုံးတွင် သူ၏ ခန္ဓာကိုယ်ထဲမှ လုံးဝ စုပ်ယူခြင်း ခံလိုက်ရ၏။

ဖန်ရှောင်ယွင်၏ အရှိန်အဝါသည် 'ကောင်းကင်ဘုံလူသား' ဒုတိယအလွှာသို့ ချက်ချင်း ပြုတ်ကျသွားသည်။

မူလ စွမ်းအား မရှိတော့သည့်နောက် ဖန်ရှောင်ယွင်၏ စွမ်းအားသည် သာမန် 'ကောင်းကင်ဘုံလူသား'ဘုံ ကျင့်ကြံသူ တစ်ယောက်ထက် အနည်းငယ်မျှသာ သာလွန်တော့မည် ဖြစ်သည်။

"ဟာ…ဖန်ရှောင်ယွင်ရဲ့ မူလ စွမ်းအား တကယ် အစုပ်ယူခံလိုက်ရပြီ.."

ပွဲခင်းတစ်ခုလုံး သဲသဲရုတ်ရုတ် ဆူညံသွားသည်။

ထျန်းယွဲ့ဂိုဏ်းချုပ်ကြီးနှင့် အကြီးတန်း ခေါင်းဆောင်များ ကြည့်နေသည့် ကြားမှပင်၊ ဖုန်းဝူချန်က ဖန်ရှောင်ယွင်၏ မူလ စွမ်းအားကို ဝါးမြိုရဲသည် ဟုတ်လား။

ဖုန်းဝူချန်က သေမင်းကို စိန်ခေါ်နေခြင်း ဖြစ်သည်။

ဖုန်းဝူချန်သည် ဖန်ရှောင်ယွင်ကို အနိုင်ယူနိုင်သော ကြောက်မက်ဖွယ် စွမ်းအားကို ပိုင်ဆိုင်ထားသော်လည်း၊ ထျန်းယွဲ့ဂိုဏ်းချုပ်ကြီးကို ယှဉ်နိုင်ရန် လုံးဝ မဖြစ်နိုင်ပေ။

ထျန်းယွဲ့ဂိုဏ်းချုပ်ကြီးသည် ကောင်းကင်ဘုံ နယ်မြေ၏ ထိပ်တန်း ကျွမ်းကျင်ပညာရှင် တစ်ဦးဖြစ်ပြီး၊ သူ၏ ကျင့်ကြံမှုမှာ 'ကောင်းကင်ဘုံလူသား' သတ္တမအလွှာသို့ ရောက်ရှိနေပြီဖြစ်ရာ၊ ဖုန်းဝူချန်ကို သတ်ရန် မျက်တောင်တစ်ခတ်စာ အချိန်သာ လိုပေသည်။

ဖုန်းဝူချန်က "ဖန်ရှောင်ယွင်... မင်းက မူလ ခန္ဓာကိုယ် ပိုင်ဆိုင်ထားတယ် ဆိုရင်တောင်၊ နောက်တစ်ကြိမ် မူလ စွမ်းအား ပြန်ရလာဖို့ စိတ်ကူးမယဉ်နဲ့တော့။ မူလ စွမ်းအားရဲ့ မူလရင်းမြစ်ကို ငါ ဝါးမြိုလိုက်ပြီ.."

ဟု လှောင်ပြောင်သရော်လိုက်သည်။

မူလရင်းမြစ်ကို ဝါးမြိုလိုက်ပြီဖြစ်ရာ ဖန်ရှောင်ယွင်သည် မူလ စွမ်းအားကို လုံးဝ ဆုံးရှုံးသွားခဲ့ပြီ ဖြစ်သည်။

"ငါ့ရဲ့ မူလ စွမ်းအားတွေ... အကုန် ပျောက်ကုန်ပြီ.."

ဖန်ရှောင်ယွင်က သူ့လက်များကို သူ ပြန်ကြည့်ရင်း ထိတ်လန့်တုန်လှုပ်နေရှာသည်။ မူလ စွမ်းအား၏ အရိပ်အယောင်မျှပင် အာရုံခံ၍ မရတော့ပေ။

"ဖုန်းဝူချန်.. ငါ့စွမ်းအားတွေကို ပြန်ပေး.."

ဖန်ရှောင်ယွင်က ရူးသွပ်မတတ် အော်ဟစ်လိုက်ပြီး ဖုန်းဝူချန်ထံသို့ ပြေးဝင်သွားတော့သည်။

ထိုအခါမှာ၊ ဖုန်းဝူချန်က လက်ကို ဝှေ့ယမ်းလိုက်ရုံဖြင့် ကြောက်မက်ဖွယ် စွမ်းအားတစ်ခု ထွက်ပေါ်လာပြီး ဖန်ရှောင်ယွင်ကို သွေးအန်ကာ လွင့်စင်သွားစေသည်။ ဖန်ရှောင်ယွင်၏ ခန္ဓာကိုယ်သည် အောက်သို့ ပြုတ်ကျသွားပြီး စင်မြင့်ပြင်ပသို့ ရောက်ရှိသွားသည်။

"ဝုန်း.."

"အဟွတ်..”

ဖန်ရှောင်ယွင် စင်မြင့်အပြင်ဘက်သို့ ပြုတ်ကျသွားခြင်းသည် ဖုန်းဝူချန်၏ အပြတ်အသတ် အနိုင်ရရှိမှုကို ပြသနေသည်။

"ငါ နိုင်ပြီ.."

ဖုန်းဝူချန်က စင်မြင့်ပေါ်သို့ ဖြည်းညှင်းစွာ ဆင်းသက်လိုက်ပြီး၊ မောက်မာဝင့်ကြွားသော မျက်နှာထားဖြင့် ကြေညာလိုက်၏။

"သားလေး.."

ထျန်းယွဲ့ဂိုဏ်းချုပ်ကြီးက အလျင်အမြန်ပင် ပျံသန်းရောက်ရှိလာသည်။

"ဒဏ်ရာတွေက မပြင်းထန်ပေမဲ့... မူလ စွမ်းအားတွေကို အတင်းအကြပ် ဆွဲထုတ်ခံလိုက်ရလို့ 'ချီပင်လယ်' ပျက်စီးသွားပြီ။ ချက်ချင်း ကုသပေးမှ ရမယ်.."

အကြီးအကဲ 'ရန်' က လေးနက်စွာ ပြောလိုက်ပြီး၊ ဖန်ရှောင်ယွင်အတွက် ဆေးလုံးတစ်လုံးကို အလျင်အမြန် ထုတ်ယူကာ တိုက်ကျွေးလိုက်သည်။ ထို့နောက် သူ၏ 'အစစ်အမှန်ယွမ်' စွမ်းအားများကို အသုံးပြုပြီး ဖန်ရှောင်ယွင်ကို ကူညီကုသပေးသည်။

"ဖုန်းဝူချန်.. ဒီနေ့ ထျန်းယွဲ့တောင်ကနေ မင်း အသက်ရှင်လျက် ပြန်ထွက်သွားလို့ မရစေရဘူး.."

ထျန်းယွဲ့ဂိုဏ်းချုပ်ကြီးက ဒေါသတကြီး အော်ဟစ်လိုက်ရာ၊ အဆုံးမဲ့ လူသတ်လိုစိတ်များ ပျံ့နှံ့လာပြီး ထျန်းယွဲ့တောင် တစ်ခုလုံးကို လွှမ်းခြုံသွားသည်။

ထျန်းယွဲ့ဂိုဏ်းချုပ်ကြီး ဒေါသအိုး ပေါက်ကွဲပြီ ဖြစ်၏။

ရောက်ရှိနေသော ကျင့်ကြံသူ အများအပြားမှာ အလွန်အမင်း ထိတ်လန့်သွားကြပြီး၊ သတ္တိနည်းသူများနှင့် ကျင့်ကြံမှု နိမ့်ပါးသူများမှာ ထျန်းယွဲ့တောင်မှ အလုအယက် ထွက်ပြေးကုန်ကြသည်။

"ဝီ.."

'ကောင်းကင်ဘုံလူသား' သတ္တမအလွှာ၏ ကြောက်မက်ဖွယ် စွမ်းအားများ ပေါက်ကွဲထွက်ပေါ်လာရာ၊ ထျန်းယွဲ့တောင် တစ်ခုလုံး ပြင်းထန်စွာ တုန်ခါသွားပြီး၊ ပတ်ဝန်းကျင်ရှိ မိုးထိအောင် မြင့်မားသော တောင်ထိပ်ကြီးများပင် တုန်ခါကာ ပြိုကျကုန်သည်။

"ပြေးကြ.."

"ထျန်းယွဲ့ဂိုဏ်းချုပ်ကြီး ဒေါသထွက်နေပြီ.. မပြေးရင် အကုန် သေကုန်လိမ့်မယ်.."

ကျင့်ကြံသူ အများအပြားမှာ သွေးပျက်မတတ် ကြောက်လန့်နေကြပြီး၊ ပွဲခင်းတစ်ခုလုံး ရုတ်ရုတ်သဲသဲ ဖြစ်သွားသည်။

"ဝှစ်... ဝှစ်... ဝှစ်.."

ထျန်းယွဲ့ဂိုဏ်းမှ ကျွမ်းကျင်ပညာရှင်များသည် တစ်ယောက်ပြီး တစ်ယောက် ထွက်ပေါ်လာကြပြီး ဖုန်းဝူချန်ကို ဝိုင်းရံလိုက်ကြသည်။

သို့သော် ဖုန်းဝူချန်ကမူ ကြောက်ရွံ့ခြင်း အလျဉ်းမရှိဘဲ၊ သူ၏ အေးစက်သော မျက်လုံးများဖြင့် အကြီးအကဲ 'ရန်' ကိုသာ စိုက်ကြည့်နေသည်။ ထျန်းယွဲ့ဂိုဏ်းချုပ်ကြီးကို လုံးဝ ဂရုမစိုက်သည့် ပုံစံမျိုးပင်။

ဖန်ရှောင်ယွင်ကို ကုသပေးနေသော အကြီးအကဲ 'ရန်' သည် ဖုန်းဝူချန်၏ အေးစက်သော အကြည့်ကို ခံစားလိုက်ရသဖြင့် မျက်နှာ ဖြူဖပ်ဖြူရော် ဖြစ်သွားသည်။

"ဒုက္ခပဲ.."

အကြီးအကဲ 'ရန်' ၏ ရင်ထဲတွင် ထိတ်လန့်မှုများ မြင့်တက်လာသည်။

"သူ့ကို ကယ်ချင်တယ်ပေါ့လေ.."

ဖုန်းဝူချန်က မကောင်းဆိုးဝါးဆန်သော အပြုံးဖြင့် မေးလိုက်ပြီး၊ တဆက်တည်း၌၊ သူ၏ စိမ်းပြာရောင် မီးတောက်များကို လှုံ့ဆော်လိုက်သည်။

စိတ်ဆန္ဒ တစ်ချက်ဖြင့်... ဖုန်းဝူချန်သည် အကြီးအကဲ 'ရန်' ၏ ခန္ဓာကိုယ်ထဲရှိ မီးအဆိပ်များကို ထိန်းချုပ်လိုက်ပြီး အပြင်သို့ ထုတ်လွှတ်လိုက်တော့၏။

မီးအဆိပ်များ ရုတ်တရက် ပေါက်ကွဲထွက်ပေါ်လာသည်ကို သိလိုက်ရသဖြင့် အကြီးအကဲ 'ရန်' ၏ မျက်နှာထား ရုတ်ချည်း ပြောင်းလဲသွားပြီး၊ မျက်နှာပေါ်တွင် ကြောက်ရွံ့မှုများ ပေါ်လာသည်။

"ဘာဖြစ်တာလဲ... ဘာလို့ မီးအဆိပ်တွေက... အား.."

အကြီးအကဲ 'ရန်' သည် ကြောက်လန့်တကြား အော်ဟစ်လိုက်ပြီး၊ သူ၏ ခန္ဓာကိုယ်မှ မည်းနက်သော မီးခိုးလုံးကြီးများ ထွက်ပေါ်လာကာ တစ်ကိုယ်လုံး မီးတောက်များဖြင့် ဖုံးလွှမ်းသွားသည်။ အကြီးအကဲ 'ရန်' မှာ နာကျင်စွာ အော်ဟစ်ရင်း မြေပြင်ပေါ်တွင် လူးလှိမ့်နေရရှာသည်။

မီးအဆိပ် ရုတ်တရက် ပေါက်ကွဲထွက်ပေါ်လာမှုကြောင့် ထျန်းယွဲ့ဂိုဏ်းမှ အကြီးတန်း ခေါင်းဆောင်များမှာ ကြောက်လန့်တကြား နောက်ဆုတ်လိုက်ကြရပြီး၊ ဘေးပတ်လည်ရှိ ကျင့်ကြံသူများလည်း အဝေးသို့ ထွက်ပြေးတိမ်းရှောင်လိုက်ကြသည်။

မည်သူကမျှ ထိုကြောက်မက်ဖွယ် မီးအဆိပ်ကို အနားမကပ်ရဲကြပေ။

"မဟာ အကြီးအကဲ..."

ထျန်းယွဲ့ဂိုဏ်းချုပ်ကြီး၏ မျက်နှာ ပျက်သွားသည်။ ဤကဲ့သို့ အချိန်မျိုးတွင် အကြီးအကဲ 'ရန်' ၏ မီးအဆိပ် ပေါက်ကွဲလာလိမ့်မည်ဟု သူ ထင်မထားခဲ့မိပေ။

ထျန်းယွဲ့ဂိုဏ်းချုပ်ကြီးက အဝေးမှ လက်လှမ်းလိုက်ပြီး ဖန်ရှောင်ယွင်ကို သူ့ဘေးနားသို့ ဆွဲယူလိုက်သည်။

ထို့နောက် ဖုန်းဝူချန်ဘက်သို့ လှည့်ကာ ကြောက်မက်ဖွယ် မျက်နှာထားဖြင့် ဒေါသတကြီး ဟိန်းဟောက်လိုက်သည်။

"လူယုတ်မာ.. မင်းလက်ချက် မဟုတ်လား.."

"ဒီအဘိုးကြီးက ခင်ဗျားတို့ ထျန်းယွဲ့ဂိုဏ်းအတွက်..တော်တော် အရေးပါပုံ ရတယ်နော်"

ဖုန်းဝူချန်က အေးစက်စက် ပြုံးလျက် ပြောလိုက်သည်။ အကြီးအကဲ 'ရန်' ကို အသက်ကယ်ဆေးအဖြစ် အသုံးပြုပြီး ဤနေရာမှ လွတ်မြောက်နိုင်ရန် မျှော်လင့်နေခြင်း ဖြစ်သည်။

"အဖေ.. ဖုန်းဝူချန်ကို သတ်ပါ.. သူ့ကို မြန်မြန် သတ်ပစ်လိုက်.."

ဖန်ရှောင်ယွင်က ရူးသွပ်မတတ် အော်ဟစ်လိုက်သည်။

"မူလ စွမ်းအားကို ပြန်ပေးခဲ့... ဒါဆိုရင် မင်းရဲ့ အလောင်းကို အကောင်းပကတိအတိုင်း ချန်ထားပေးမယ်.."

ထျန်းယွဲ့ဂိုဏ်းချုပ်ကြီးက ရက်စက်စွာ ပြောလိုက်ပြီး၊ သူ၏ ကြောက်မက်ဖွယ် လူသတ်လိုစိတ်များက ဖုန်းဝူချန်ကို ချိန်ရွယ်ထားပြီး ဖြစ်သည်။

"ရွှစ်... ရွှစ်... ရွှစ်.."

ထိုအချိန်တွင် ကောင်းကင်မီး တောင်ပေါ်စံအိမ် သခင်ကြီး 'ယီယွင်'၊ ပေတိုအကြီးအကဲ၊ ယီထျန်းချင်းနှင့် ကောင်းကင်မီး တောင်ပေါ်စံအိမ်မှ အကြီးတန်း ခေါင်းဆောင်များ ရောက်ရှိလာကြသည်။

"စံအိမ်သခင်ကြီး ယီ... ဒါ ဘာသဘောလဲ"

ထျန်းယွဲ့ဂိုဏ်းချုပ်ကြီးက အေးစက်စွာ မေးလိုက်သည်။ ယီယွင်တို့ ဖုန်းဝူချန်ဘက်မှ ရပ်တည်တော့မည်ကို သူ ရိပ်မိလိုက်သည်။

"ဆေးဧကရာဇ်က ကျွန်တော်တို့ ကောင်းကင်မီး တောင်ပေါ်စံအိမ်အပေါ် ကျေးဇူးရှိပါတယ်။ ကျွန်တော်တို့ ဘယ်လိုလုပ်ပြီး လက်ပိုက်ကြည့်နေနိုင်မှာလဲ"

ယီယွင်က တည်ငြိမ်စွာ ပြန်ပြောလိုက်လေသည်။

"ရွှစ်... ရွှစ်... ရွှစ်.."

ယဲ့မိသားစု ခေါင်းဆောင် 'ယဲ့ရွှေဟန်' နှင့် သူ၏ အကြီးတန်း ခေါင်းဆောင်များလည်း လျင်မြန်စွာ ရောက်ရှိလာကြသည်။

ထျန်းယွဲ့ဂိုဏ်းချုပ်ကြီး၏ မျက်နှာထား ပို၍ မည်းမှောင်သွားသည်။ ယဲ့မိသားစုလည်း ဖုန်းဝူချန်ဘက်မှ ပါဝင်လာပြီဖြစ်ကြောင်း မေးစရာပင် မလိုတော့ပေ။

"မိသားစုခေါင်းဆောင် ယဲ့... ခင်ဗျား ရောက်လာတာ အတော်ပဲ။ ကျွန်တော်တို့ရဲ့ အရင်က အကြွေးဟောင်းတွေကို ရှင်းရမယ့်အချိန် ရောက်ပြီ ထင်တယ်"

ထျန်းယွဲ့ဂိုဏ်းချုပ်ကြီးက အေးစက်စက် ပြောလိုက်ပြီး၊ ကျဉ်းမြောင်းသွားသော သူ၏ မျက်လုံးများထဲတွင် ကြောက်မက်ဖွယ် လူသတ်လိုစိတ်များ လှိုင်းထနေသည်။

ယဲ့ရွှေဟန်က လေးနက်သော အသံဖြင့် ပြောလိုက်သည်။

"အကြွေးရှင်းရမယ့် အချိန် ရောက်ပြီဆိုတာ..အမှန်ပါပဲ"

ထျန်းယွဲ့ဂိုဏ်းသည် ယဲ့မိသားစုနှင့် အငြိုးအတေး ရှိခဲ့ဖူးပြီး၊ ယဲ့မိသားစုနှင့် စစ်ပွဲကို အကြောင်းပြကာ ကောင်းကင်မီး တောင်ပေါ်စံအိမ်ကိုပါ စစ်ပွဲထဲ ဆွဲသွင်းပြီး တစ်ပြိုင်နက်တည်း သုတ်သင်ပစ်ရန် ကြံစည်ခဲ့ဖူးသည်။

ယခု ထိုအင်အားစုနှစ်ခုက ဦးဆောင်ပြီး ထွက်ပေါ်လာကြပြီဖြစ်ရာ၊ ထျန်းယွဲ့ဂိုဏ်းအနေဖြင့် သူတို့ကို တရားဝင် သုတ်သင်ပစ်ရန် အခွင့်အရေး ရရှိသွားပြီ ဖြစ်၏။

"ခရမ်းရောင်တိမ်တိုက် စံအိမ်က ဆေးဧကရာဇ်အတွက် အသက်ပေးဖို့ အသင့်ပါပဲ.."

ခရမ်းရောင်တိမ်တိုက် စံအိမ်၏ ဆောင်သခင်နှင့် အကြီးတန်း ခေါင်းဆောင်များ ပွဲခင်းထဲသို့ ရောက်ရှိလာကြပြီး၊ ဖုန်းဝူချန်အတွက် ထျန်းယွဲ့ဂိုဏ်းကို ရင်ဆိုင်ရန် အဆင်သင့် ဖြစ်နေကြသည်။

"ပိုင်မိသားစုက ဆေးဧကရာဇ်အတွက် အသက်ပေးဖို့ အသင့်ပါပဲ.."

ပိုင်မိသားစု ခေါင်းဆောင်နှင့် အကြီးတန်း ခေါင်းဆောင်များလည်း နောက်မှ လိုက်ပါလာကြပြီး၊ ပိုင်မိလည်း သူတို့နှင့်အတူ ပါလာသည်။

"မင်ဘုရင်ဂိုဏ်းက ဆေးဧကရာဇ်အတွက် အသက်ပေးဖို့ အသင့်ပါပဲ.."

ချက်ချင်းဆိုသလိုပင် မင်ဘုရင်ဂိုဏ်း၏ ဂိုဏ်းချုပ်နှင့် အကြီးတန်း ခေါင်းဆောင်များလည်း ရောက်ရှိလာကြသည်။

မျက်တောင်တစ်ခတ်အတွင်းမှာပင်... ကောင်းကင်ဘုံ နယ်မြေရှိ အင်အားစုကြီး ခြောက်ခုအနက် ငါးခုသည် ဖုန်းဝူချန်၏ ဘက်မှ ရပ်တည်လိုက်ကြပြီ ဖြစ်၏။

ဖုန်းဝူချန်၏ နောက်လိုက်ရန် ဆန္ဒရှိကြသော ကောင်းကင်ဘုံ နယ်မြေမှ ပါရမီရှင်များနှင့် သူတို့၏ နောက်ကွယ်မှ အင်အားစုများလည်း ထွက်ပေါ်လာကြသည်။

ထိုမြင်ကွင်းကို မြင်လိုက်ရသောအခါ... ထျန်းယွဲ့ဂိုဏ်းချုပ်ကြီးနှင့် အကြီးတန်း ခေါင်းဆောင်များမှာ ကြက်သေသေကာ မှင်သက်သွားကြသည်။

ဖုန်းဝူချန်၌ မည်သို့သော စွမ်းရည်နှင့် ဂုဏ်သရေများ ရှိနေသဖြင့် ကောင်းကင်ဘုံ နယ်မြေရှိ အင်အားစု အများအပြားက သူ့အတွက် အသက်ပေးရန် ဆုံးဖြတ်လိုက်ကြရသနည်း။

ရောက်ရှိနေသော ကျင့်ကြံသူ အများအပြားမှာ စစ်ပွဲကြီး ဖြစ်ပွားတော့မည်ကို ရိပ်မိလိုက်ကြသဖြင့် အလုအယက် ထွက်ပြေးကုန်ကြသည်။

ပါရမီရှင်များ၏ တိုက်ပွဲသည် နောက်ဆုံးတွင် ကောင်းကင်ဘုံ နယ်မြေရှိ အင်အားစုကြီးများ၏ စစ်ပွဲကြီးအဖြစ်သို့ ကူးပြောင်းသွားလေတော့သည်။

အခန်း (၄၅၀) - စစ်ပွဲကြီး ဖြစ်ပွားခြင်း

~ထျန်းယွဲ့တောင်တွင် အခြေအနေများ ရှုပ်ထွေးနေသည်။ ကျင့်ကြံမှုအဆင့် မြင့်မားသူများမှလွဲ၍ အခြားသူများ အားလုံး ထွက်ပြေးကုန်ကြပြီ ဖြစ်၏။

စစ်ပွဲကြီး ဖြစ်ပွားတော့မည်မှာ ရှောင်လွှဲ၍ မရနိုင်တော့ပေ။

ဖန်ရှောင်ယွင်၏ မူလ စွမ်းအားများကို ဖုန်းဝူချန်က အတင်းအကြပ် လုယူသွားခဲ့ခြင်းကို ထျန်းယွဲ့ဂိုဏ်းက သည်းခံနေမည် မဟုတ်ပေ။

သို့သော်လည်း... အင်အားစု အများအပြားက ဖုန်းဝူချန်အတွက် အသက်စွန့်ရန် ဆုံးဖြတ်ထားကြသည်ကို တွေ့လိုက်ရသဖြင့်၊ ထျန်းယွဲ့ဂိုဏ်းမှ လူများ အလွန်အမင်း အံ့ဩတုန်လှုပ်သွားကြသည်။

ဘာကြောင့်ပါလိမ့်။

ကောင်းကင်ဘုံ နယ်မြေရှိ အင်အားစုကြီး ငါးခုက ဘာကြောင့် ဖုန်းဝူချန်အပေါ် မျက်စိမှိတ် သစ္စာစောင့်သိနေကြရသနည်း။

ဖုန်းဝူချန်က တကယ်တမ်း ဘယ်သူလဲ။

ထျန်းယွဲ့ဂိုဏ်းမှ မည်သူကမျှ ဖုန်းဝူချန်၏ နောက်ခံကို မသိကြသော်လည်း၊ ကောင်းကင်မီး တောင်ပေါ်စံအိမ် ကဲ့သို့သော အခြား အင်အားစုကြီးများကမူ သိရှိထားကြသည်။

ထျန်းယွဲ့ဂိုဏ်းချုပ်ကြီးက အရူးမဟုတ်ပေ။ ဖုန်းဝူချန်သည် ကောင်းကင်ဘုံ နယ်မြေက လူမဟုတ်ဘဲ၊ လောကတွင် ပြိုင်ဘက်ကင်းသော ကြောက်မက်ဖွယ် ပါရမီရှင်တစ်ဦး ဖြစ်နေသည်ကို ကြည့်ခြင်းအားဖြင့်၊ အင်အားကြီးမားသော မိသားစုတစ်ခုခုမှ သခင်လေး သို့မဟုတ် ပါရမီရှင် တပည့်တစ်ဦး ဖြစ်လောက်သည်ဟု ခန့်မှန်းမိသည်။

"ဖုန်းဝူချန်... မင်း တကယ်တမ်း ဘယ်သူလဲ"

ဟု ထျန်းယွဲ့ဂိုဏ်းချုပ်ကြီးက အသံနက်ကြီးဖြင့် မေးလိုက်သည်။

"ယန်ဟော်အင်ပါယာ၊ ဖုန်းမိသားစု"

ဖုန်းဝူချန်က မကောင်းဆိုးဝါးဆန်သော အပြုံးဖြင့် ပြန်ဖြေလိုက်သည်။

"ယန်ဟော်အင်ပါယာ.."

ထျန်းယွဲ့ဂိုဏ်းချုပ်ကြီးက မျက်မှောင်ကြုတ်လိုက်သည်။ ဖုန်းဝူချန်၏ စကားကို သူ မယုံကြည်ပေ။

ဖုန်းဝူချန်၏ အကြည့်များက လျိုချင်းယန်ဆီသို့ ရောက်သွားပြီး ပြောသည်။

"ချင်းယန်... မင်းလည်း ယန်ဟော်အင်ပါယာကပဲ။ ဖန်ရှောင်ယွင်က မင်းရဲ့ ရန်သူကွ။ သူက ကောင်းကင်မြစ်နားမှာ မင်းကို သတ်လုနီးပါး လုပ်ခဲ့တာ။ ကံကောင်းလို့ ကျောက်စိမ်းမြို့သားတွေက မင်းကို ကယ်ခဲ့တာ။ ငါတို့ ကျောက်စိမ်းမြို့ကို ရောက်လာရတာကလည်း ဖန်ရှောင်ယွင် မျှားခေါ်လို့ ရောက်လာရတာ။ သူက ထောင်ချောက်ဆင်ထားပြီးသား။ ကျောက်စိမ်းမြို့သားတွေကို သတ်ခဲ့တာလည်း သူ့လူတွေပဲ။ ရည်ရွယ်ချက်က မင်းနဲ့ ငါတို့ကို ရန်တိုက်ပေးဖို့ပဲ"

"အတိတ်မေ့နေတာလား"

ယီထျန်းချင်းနှင့် ပိုင်မိတို့ နောက်ဆုံးတွင် နားလည်သွားကြသည်။ လျိုချင်းယန်က ထျန်းယွဲ့ဂိုဏ်းဘက်မှ ရပ်တည်နေခြင်းမှာ အကြောင်းရှိတာကိုး။

"လျိုချင်းယန်... မင်း ဘာမှ မမှတ်မိတော့ဘူးလား"

နန်းကုန်းကျန့်က ဒေါသတကြီး အော်ဟစ်မေးမြန်းလိုက်သည်။

"ငါ..."

လျိုချင်းယန်မှာ ဘယ်သူ့ကို ယုံရမှန်း မသိတော့ပေ။ ဖုန်းဝူချန် လိမ်ပြောနေသည်ဟု မခံစားရသော်လည်း၊ ဖန်ရှောင်ယွင်ကလည်း ဒီကာလအတွင်း သူ့ကို ကောင်းကောင်းမွန်မွန် စောင့်ရှောက်ပေးခဲ့သည် မဟုတ်ပါလော။

"ငါ ဘာမှ မမှတ်မိတော့ဘူး... ခေါင်းတွေ အရမ်းကိုက်နေပြီ.."

လျိုချင်းယန်က နောက်ဆုံးတွင် ခေါင်းခါလိုက်သည်။ စဉ်းစားဖို့ ကြိုးစားလိုက်တိုင်း ခေါင်းထဲတွင် စူးရှသော နာကျင်မှုများ ခံစားရသည်။

မြောင်ချင်းချင်းက မျက်ရည်များ ဝဲတက်နေသော မျက်ဝန်းအိမ်များဖြင့် မေးလိုက်ရှာသည်။

"အစ်ကိုလျို... အစ်ကိုဖုန်း ပြောတာ အမှန်တွေပါ။ အစ်ကိုလျို... ကျွန်မ ချင်းချင်းလေ... ကျွန်မကိုတောင် မမှတ်မိတော့ဘူးလားဟင်။ ကျွန်မတို့ အတူတူ ကြီးပြင်းလာခဲ့ကြတာလေ... အတူတူ ကျင့်ကြံခဲ့ကြတာလေ..."

"တော်တော့.. ဆက်မပြောကြနဲ့တော့.."

လျိုချင်းယန်က ခေါင်းကို လက်နှစ်ဖက်ဖြင့် အုပ်ထားပြီး နာကျင်စွာ အော်ဟစ်လိုက်သည်။ သူ၏ စိတ်ထဲတွင် ဝေဝါးသော ပုံရိပ်များ ဆက်တိုက် ပေါ်လာနေသည်။

"ချင်းယန်.. သူတို့ရဲ့ အဓိပ္ပာယ်မရှိတဲ့ စကားတွေကို နားမထောင်နဲ့.. သူတို့က မင်းကို လှည့်စားနေတာ.. ဖုန်းဝူချန်က လူသတ်ကောင်ကွ.. ကောင်းကင်ဘုံ နယ်မြေ အရှေ့ဘက်ခြမ်းက အင်အားစု ရှစ်ခုလုံးကို သူ သတ်ဖြတ်ခဲ့တာ.. ကျောက်စိမ်းမြို့သားတွေကို သတ်ခဲ့တာလည်း သူပဲ.."

ဖန်ရှောင်ယွင်က ကျယ်လောင်စွာ အော်ဟစ်ပြောဆိုလိုက်သည်။

"လျိုချင်းယန်... လေ့ထျန်းကျွယ်ကို မေးကြည့်လေ... ယီထျန်းချင်းကို မေးကြည့်လေ။ သူတို့ အားလုံး သက်သေခံပေးနိုင်တယ်"

ပေတိုယန်က ဝင်ပြောလိုက်သည်။

"ပါးစပ်ပိတ်ထားစမ်း.."

လျိုချင်းယန်က ရုတ်တရက် ဒေါသတကြီး အော်ဟစ်လိုက်သည်။

"ချင်းယန်က သူ့အခြေအနေသူ သိပါတယ်။ သူ့ကို ထပ်ပြီး စိတ်မလှုပ်ရှားစေနဲ့တော့။ သူ့ရဲ့ သွေးကြောတွေ ရှုပ်ထွေးနေတုန်းပဲ။ ထျန်းယွဲ့ဂိုဏ်းက သေချာ မကုသပေးထားဘူး။ ငါတို့ သူ့ကို ဆက်ပြီး ဖိအားပေးနေရင်... ချင်းယန် အရူး ဖြစ်သွားလိမ့်မယ်"

ဖုန်းဝူချန်က မျက်မှောင်ကြုတ်လျက် ပြောလိုက်သည်။

"ဆေးဧကရာဇ်... ဖန်ရှောင်ယွင်ကို လွှတ်ပေးလို့ မဖြစ်ဘူး.."

နန်းကုန်းကျန့်က အံကိုကြိတ်ထားပြီး ဖန်ရှောင်ယွင်ကို လူသတ်လိုစိတ်များဖြင့် စူးစူးရဲရဲ ကြည့်လိုက်သည်။

"ဖုန်းဝူချန်... မင်းသာ ငါ့ရဲ့ မူလ စွမ်းအားကို ပြန်မပေးရင်... ဒီနေ့ ထျန်းယွဲ့တောင်ကနေ အသက်ရှင်လျက် ပြန်ထွက်သွားဖို့ စိတ်ကူးမယဉ်နဲ့.."

ဖန်ရှောင်ယွင်က ဒေါသတကြီး အော်ဟစ်လိုက်သည်။

"အိုးယန်... ချင်းယန်ကို ခေါ်သွားပြီး အနားယူခိုင်းလိုက်"

ထျန်းယွဲ့ဂိုဏ်းချုပ်ကြီးက အသံနက်ကြီးဖြင့် အမိန့်ပေးလိုက်သည်။

"ချင်းယန်... လာ... အရင်ဆုံး ပြန်နားလိုက်ကြရအောင်"

အိုးယန်က ခေါင်းကိုက်ဝေဒနာ ခံစားနေရသော လျိုချင်းယန်ကို တွဲကူလိုက်ပြီး ပျံသန်းထွက်ခွာသွားသည်။

"အစ်ကိုဖုန်း... အစ်ကိုလျိုကို ကျွန်မ သွားကယ်လိုက်ဦးမယ်.."

မြောင်ချင်းချင်းက အလျင်အမြန် လိုက်သွားသည်။ ဖုန်းဝူချန် တားချိန်ပင် မရလိုက်ပေ။

"ယီထျန်းချင်း.. ချင်းချင်းကို ကာကွယ်ပေးလိုက်.."

ဖုန်းဝူချန်က အလျင်အမြန် အော်ဟစ်လိုက်သည်။

"ဟုတ်ကဲ့... ဆေးဧကရာဇ်.."

ယီထျန်းချင်းက မည်သည့် တုံ့ဆိုင်းမှုမျှ မရှိဘဲ ပျံသန်းလိုက်သွားသည်။

ထျန်းယွဲ့ဂိုဏ်းချုပ်ကြီးက အဆုံးမဲ့ လူသတ်လိုစိတ်များ ပြည့်နှက်နေသော မျက်လုံးများဖြင့် ဝေ့ဝဲကြည့်လိုက်ပြီး အေးစက်စက် ပြောသည်။

"မင်းတို့အားလုံး စုနေကြပြီဆိုတော့... တစ်ယောက်ချင်းစီ လိုက်ရှာနေစရာ မလိုတော့ဘူးပေါ့။ ဒီနေ့တိုက်ပွဲ ပြီးရင်... ကောင်းကင်ဘုံ နယ်မြေမှာ အင်အားစုကြီး ခြောက်ခု ဆိုတာ ရှိတော့မှာ မဟုတ်ဘူး... ထျန်းယွဲ့ဂိုဏ်း တစ်ခုတည်းပဲ ရှိတော့မယ်.."

ထိုစကားကို ကြားသောအခါ... ကောင်းကင်မီး တောင်ပေါ်စံအိမ် သခင်ကြီး ယီယွင်နှင့် အခြား အင်အားစုကြီးများမှ ခေါင်းဆောင်ပိုင်းများ အားလုံး၏ မျက်နှာထားများ လေးနက်သွားကြသည်။

ထျန်းယွဲ့ဂိုဏ်းချုပ်ကြီး၏ စွမ်းအားမှာ အလွန်အမင်း ကြောက်မက်ဖွယ် ကောင်းလှပြီး၊ ကောင်းကင်ဘုံ နယ်မြေတွင် အသန်မာဆုံး ပုဂ္ဂိုလ်များထဲတွင် ပါဝင်သည်။

ကောင်းကင်ဘုံ နယ်မြေတစ်ခုလုံးကို ကြည့်လိုက်လျှင်၊ ထျန်းယွဲ့ဂိုဏ်းချုပ်ကြီးလောက် စွမ်းအားကြီးမားသူကို ရှာတွေ့ရန် ခက်ခဲလှပေသည်။

"ထျန်းယွဲ့ဂိုဏ်းချုပ်ကြီး... ကျွန်တော်တို့ လက်တွဲလိုက်ရင် ခင်ဗျား နိုင်ချင်မှ နိုင်မှာနော်.."

ခရမ်းရောင်တိမ်တိုက် စံအိမ် ဆောင်သခင်ကြီးက လေးနက်စွာ သတိပေးလိုက်သည်။

ထျန်းယွဲ့ဂိုဏ်းချုပ်ကြီးက လေထဲသို့ ခုန်တက်လိုက်ပြီး၊ 'ကောင်းကင်ဘုံလူသား' သတ္တမအလွှာ၏ ကြောက်မက်ဖွယ် အရှိန်အဝါများကို ရိုင်းစိုင်းစွာ ထုတ်လွှတ်လိုက်ရာ၊ မီးတောင်ပေါက်ကွဲသကဲ့သို့ ပြိုင်ဘက်ကင်း စွမ်းအင်များ ပေါက်ကွဲထွက်ပေါ်လာသည်။

"ဝီ... ဝီ.."

"ဝေါ..ဝေါ.."

မိုင်ပေါင်းသောင်းချီသော အကွာအဝေးအတွင်း ဟင်းလင်းပြင် တစ်ခုလုံး ပြင်းထန်စွာ တုန်ခါသွားပြီး၊ ကြီးမားသော အနက်ရောင် အက်ကြောင်းကြီးများ ပေါက်ကွဲထွက်ပေါ်လာကာ ဖွဲ့တည်လာသည်။ မြေပြင်များ ပြိုကျသွားပြီး၊ ပတ်ဝန်းကျင်ရှိ ခန့်ညားထည်ဝါသော တောင်တန်းကြီးများလည်း ဆက်တိုက် ပြိုလဲကုန်ကြသည်။

သူ့အရှိန်အဝါ သက်သက်ဖြင့်ပင် ကောင်းကင်နှင့် မြေကြီးကို ဖျက်ဆီးပစ်နိုင်သော ကြောက်မက်ဖွယ် စွမ်းအားကို ပိုင်ဆိုင်ထားသည် ဟုတ်လား။

ထိတ်လန့်ဖွယ် ကောင်းသော မြင်ကွင်းကြောင့် အဝေးမှ ကြည့်ရှုနေသူများမှာ ဝိညာဉ်လွင့်ပါးမတတ် ကြောက်ရွံ့သွားကြပြီး ခြေထောက်များ ပျော့ခွေကုန်ကြသည်။

ကြောက်မက်ဖွယ် စွမ်းအားက ဟင်းလင်းပြင်ကိုပင် စုတ်ဖြဲပစ်နိုင်စွမ်း ရှိနေသည် မဟုတ်ပါလော။

"ဒီအဘိုးကြီးက ပိုပိုပြီး ကြောက်စရာ ကောင်းလာပါလား.."

ယီယွင်က လေးနက်သော မျက်နှာထားဖြင့် ပြောလိုက်ပြီး၊ မျက်လုံးထဲတွင် ကြောက်ရွံ့မှုများ လက်ခနဲ ဖြစ်သွားသည်။

ယီယွင်သည် 'ကောင်းကင်ဘုံလူသား' ဆဌမအလွှာသာ ရှိသေးသော်လည်း၊ ထျန်းယွဲ့ဂိုဏ်းချုပ်ကြီးမှလွဲလျှင် ကောင်းကင်ဘုံ နယ်မြေတွင် အသန်မာဆုံး ဖြစ်သည်။

ယဲ့မိသားစု ခေါင်းဆောင် ယဲ့ရွှေဟန်သည် 'ကောင်းကင်ဘုံလူသား' ပဉ္စမအလွှာသို့ ရောက်ရှိသည်မှာ မကြာသေးပေ။ ပိုင်မိသားစု ခေါင်းဆောင်လည်း ပဉ္စမအလွှာသာ ရှိသေးသည်။

ခရမ်းရောင်တိမ်တိုက် စံအိမ် ဆောင်သခင်နှင့် မင်ဘုရင်ဂိုဏ်း ဂိုဏ်းချုပ်တို့မှာမူ 'ကောင်းကင်ဘုံလူသား' စတုတ္ထအလွှာ အဆင့်သာ ရှိကြသည်။

"'ကောင်းကင်ဘုံလူသား' သတ္တမအလွှာဆိုတော့... သူ့စွမ်းအားက ငါတို့ထက် အများကြီး သာလွန်နေတယ်။ ငါတို့ ပေါင်းတိုက်ရင်တောင် နိုင်ပါ့မလား မသိဘူး.."

မင်ဘုရင်ဂိုဏ်း ဂိုဏ်းချုပ်က စိုးရိမ်တကြီး ပြောလိုက်သည်။

"သူ့ကို အရင် တားထားကြတာပေါ့.. ပြီးမှ အင်အားစုကြီးတွေက အကြီးအကဲတွေ လာကူညီကြလိမ့်မယ်.. တိုက်ကြစို့.."

ယီယွင်က အသံနက်ကြီးဖြင့် အော်ဟစ်လိုက်ပြီး၊ သူ၏ 'အစစ်အမှန်ယွမ်' စွမ်းအားများကို အစွမ်းကုန် ထုတ်ဖော်ကာ ကောင်းကင်ယံသို့ ဦးစွာ ပျံတက်သွားသည်။

ယဲ့ရွှေဟန်နှင့် အခြား လေးဦးလည်း အသက်စွန့် တိုက်ခိုက်ရုံမှတစ်ပါး အခြား ရွေးချယ်စရာ မရှိတော့သဖြင့် လိုက်ပါသွားကြသည်။

"ဝီ... ဝီ.."

ကြောက်မက်ဖွယ် စွမ်းအားများ တစ်ခုပြီးတစ်ခု ပေါက်ကွဲထွက်ပေါ်လာသည်။ ကောင်းကင်ဘုံ နယ်မြေ၏ ဟင်းလင်းပြင်ကြီး တုန်ခါသွားပြီး၊ အဝေးမှ ကြည့်ရှုနေသူများ၏ ခန္ဓာကိုယ်များလည်း လိုက်ပါ တုန်ရီလာကြသည်။

စစ်ပွဲကြီး စတင်ပြီ ဖြစ်၏။

"စပြီ..."

"ထျန်းယွဲ့ဂိုဏ်းချုပ်ကြီးက တစ်ယောက်တည်းနဲ့ ငါးယောက်ကို ရင်ဆိုင်နေတာ.."

"ထျန်းယွဲ့ဂိုဏ်းချုပ်ကြီးက အရမ်း စွမ်းအားကြီးတယ်။ ကောင်းကင်မီး တောင်ပေါ်စံအိမ်ဘက်က လူတွေ အခြေအနေ မကောင်းဘူး ထင်တယ်.."

ကြည့်ရှုနေသူ အများအပြားမှာ မျက်နှာများ ဖြူဖပ်ဖြူရော် ဖြစ်နေကြပြီး၊ အလွန်အမင်း ကြောက်လန့်နေကြသော်လည်း ဤကြီးကျယ်ခမ်းနားသော စစ်ပွဲကြီးကို လက်လွတ်မခံချင်ကြပေ။

"ထျန်းယွဲ့ဂိုဏ်းကို အမြစ်ပြတ် သုတ်သင်ပစ်.. တစ်ယောက်မှ အရှင်မထားနဲ့.."

ဖုန်းဝူချန်က အေးစက်စက် အမိန့်ပေးလိုက်သည်။ စစ်ပွဲက ရှောင်လွှဲမရ ဖြစ်နေပြီဖြစ်သလို၊ ဖုန်းဝူချန်ကလည်း ဖန်ရှောင်ယွင်ကို သတ်ချင်နေပြီ ဖြစ်ရာ၊ သေမင်းနှင့် စစ်ခင်းရုံမှတစ်ပါး အခြား နည်းလမ်း မရှိတော့ပေ။

"သတ်.."

အင်အားစု အသီးသီးမှ ခေါင်းဆောင်များနှင့် ကျွမ်းကျင်ပညာရှင်များ တဟုန်ထိုး ပြေးဝင်သွားကြသည်။

ယခုအချိန်တွင် ဖုန်းဝူချန်သည် သူတို့၏ ခေါင်းဆောင် ဖြစ်သွားခဲ့ပြီ ဖြစ်၏။ မည်သူကမျှ ဖုန်းဝူချန်၏ အမိန့်ကို မလွန်ဆန်ရဲကြပေ။

အင်အားစုကြီး ငါးခုမှ အကြီးအကဲများ ပေါင်းလိုက်လျှင် 'ကောင်းကင်ဘုံလူသား'ဘုံ ကိုးယောက် ရှိပြီး၊ ဖုန်းဝူချန်၊ လန်ယွဲ့နှင့် ပေတိုယန်တို့ပါ ပေါင်းလိုက်လျှင် အမှန်တကယ်ပင် ကြောက်မက်ဖွယ် ကောင်းသော အင်အားစုကြီး ဖြစ်နေသည်။

ထို့အပြင် အင်အားစုကြီးများမှ ကျွမ်းကျင်ပညာရှင်များ စုစုပေါင်း ရာချီ ရှိနေသေးရာ၊ ဤကြောက်မက်ဖွယ် အင်အားစုကို လျှော့တွက်၍ မရနိုင်ပေ။

သို့သော် ထျန်းယွဲ့ဂိုဏ်းသည်လည်း လွယ်လွယ်နှင့် ထိပါး၍ရသော ဂိုဏ်းမျိုး မဟုတ်ပေ။ ကောင်းကင်ဘုံ နယ်မြေ၏ အသန်မာဆုံး ဂိုဏ်းဖြစ်သည့်အားလျော်စွာ၊ ဂိုဏ်းအတွင်း၌ ရေတွက်၍ မကုန်နိုင်သော ကျွမ်းကျင်ပညာရှင်များ ရှိနေပြီး၊ အရှေ့ဘက်ခြမ်း တစ်ခုလုံးမှ ကျွမ်းကျင်ပညာရှင်များ ပေါင်းစည်းထားခြင်း ဖြစ်ရာ၊ ဖုန်းဝူချန်၏ အင်အားစုနှင့် ယှဉ်လျှင် အားမနည်းပေ။

ထျန်းယွဲ့တောင်ကို စစ်မြေပြင်အဖြစ် သတ်မှတ်ပြီး စစ်ပွဲကြီး ပေါက်ကွဲထွက်ပေါ်လာပြီ ဖြစ်၏။

ဖုန်းဝူချန်သည် 'နဂါးနတ်ဘုရားဓား' ကို ကိုင်ဆောင်လျက် ဖန်ရှောင်ယွင်ထံသို့ တစ်လှမ်းချင်း လျှောက်လှမ်းလာသည်။ သူ၏ အေးစက်သော လူသတ်လိုစိတ်များက ထျန်းယွဲ့ဂိုဏ်းမှ ကျွမ်းကျင်ပညာရှင်များကို ခြိမ်းခြောက်ထားသဖြင့် မည်သူမျှ မလှုပ်ရှားရဲကြပေ။

သူ၏ အထွတ်အထိပ်သို့ ရောက်ရှိနေသော ကြောက်မက်ဖွယ် အရှိန်အဝါကြောင့် ထျန်းယွဲ့ဂိုဏ်းသားများမှာ ကြောက်လန့်တကြား ထွက်ပြေးကုန်ကြ တော့သည်။