အိမ်တံခါးဝသို့ ရောက်ရှိလာသော ပူးပေါင်းဆောင်ရွက်မှုတစ်ခု

ဒေါက် ဒေါက် ဒေါက်...

တန်ယန်က ရုံးခန်းတံခါးကို ခေါက်လိုက်သည်။

“ဝင်ခဲ့ပါ။”

တံခါးကို တွန်းဖွင့်လိုက်ပြီးနောက် တန်ယန်က ခေါင်းလေးစောင်းကာ သူမ၏ အတန်းပိုင် ဆရာမကို ကြည့်လိုက်သည် - “ဆရာမအို... သမီးကို ခေါ်တယ်ဆိုလို့။”

အိုချန်က ခေါင်းမော့ကြည့်လိုက်ပြီး ဝင်လာသူကို နူးညံ့သိမ်မွေ့သော အပြုံးဖြင့်ကြည့်ကာ “တန်ယန်... လာ၊ အထဲဝင်ခဲ့။”

တန်ယန် အထဲဝင်သွားပြီး ဆရာမစားပွဲဘေးက ကုလားထိုင်မှာ ထိုင်လိုက်ပြီးနောက် အိုချန်က ဆက်ပြောသည် - “တန်ယန်... ဒီလိုရှိတယ်၊ ဒီနေ့ ကျောင်းမှာ ရုပ်ရှင်ရိုက်ကူးရေး အဖွဲ့တစ်ဖွဲ့ ရောက်နေတာကို သမီး သိတယ်မလား”

တန်ယန်က ခေါင်းညိတ်ပြလိုက်သော်လည်း သူမ၏ မျက်ဝန်းများတွင် ဝေခွဲမရ ဖြစ်နေဟန် ပေါ်နေသည် - “ဆရာမတို့လည်း အနုပညာရှင်တွေကို အားပေးတတ်တာလားဟင်”

“ရိုက်ကူးရေး အဖွဲ့က ကျောင်းကတစ်ဆင့် သမီးကို မေးခိုင်းလိုက်တာ။ သူတို့ရဲ့ သီချင်းဗီဒီယို (MV) မှာ သမီးကို အမျိုးသမီး ဇာတ်ဆောင်အဖြစ် သရုပ်ဆောင်ဖို့ စိတ်ဝင်စားလားလို့ပေါ့။ ဒါပေမဲ့ ဒါက သမီးရဲ့ ဆန္ဒအပေါ်မှာပဲ မူတည်ပါတယ်။ သမီးသာ သဘောတူရင် ခဏနေရင် သူတို့ လာခေါ်လိမ့်မယ်။ သမီး သဘောမတူဘူး ဆိုရင်လည်း ဆရာမက သမီးကိုယ်စား ငြင်းပေးလိုက်မယ်။”

ဤစကားကို ကြားလိုက်ရသောအခါ တန်ယန်က ပို၍ပင် ဇဝေဇဝါ ဖြစ်သွားတော့သည်။ ရိုက်ကူးရေး အဖွဲ့က သူမကို ဘယ်လိုလုပ် သိနေတာလဲ၊ သူမက အနုပညာ လောကထဲကို ဝင်ဖို့စိတ်ကူး မရှိတာကြောင့် ဘာလို့ မင်းသမီးလုပ်ရမှာလဲ။ တကယ်လို့ သူတို့ဘက်ကသာ တစ်ယောက်ယောက်ကို မိတ်ဆက်ပေးခွင့် ရှိမယ်ဆိုရင် မီကိုကို စမ်းကြည့်ခိုင်းတာက မဆိုးဘူးဟု သူမ တွေးလိုက်မိသည်။

“ဆရာမ... သမီးကတော့ MV ရိုက်ဖို့ သိပ်စိတ်မဝင်စားဘူး။ ဒါပေမဲ့ သမီးရဲ့သူငယ်ချင်း မီကိုကို အကြံပြုပေးလို့ ရမလားဟင်။ သူက ဘေကျင်းရုပ်ရှင် အကယ်ဒမီကို လျှောက်ဖို့ စဉ်းစားထားတာဆိုတော့ ဒီလိုမျိုး အတွေ့အကြုံက သူ့အတွက် အများကြီး အထောက်အကူ ဖြစ်စေမှာမို့လို့ပါ။” တန်ယန်က သူမရရှိသည့် အခွင့်အရေးကို ငြင်းပယ်လိုက်သော်လည်း သူမ၏ အခင်ဆုံးသူငယ်ချင်း အတွက်တော့ ထိုအခွင့်အရေးကို ရအောင် ယူပေးချင်နေသည်။

“ဆရာမ သူတို့ကို မေးပေးကြည့်ပါ့မယ်။ ဒါပေမဲ့ ရလဒ်က ဘယ်လိုဖြစ်လာမလဲ ဆိုတာတော့ အာမမခံနိုင်ဘူးနော်။” ခေတ္တမျှ စဉ်းစားပြီးနောက် အိုချန်က တန်ယန်၏ တောင်းဆိုမှုကို သဘောတူလိုက်ပြီး သူမ၏ ကျောင်းသားအတွက် အခွင့်အရေးတစ်ခု ပေးလိုက်ရန် ဆုံးဖြတ်လိုက်သည်။

“ဝမ်းသာလိုက်တာ၊ ကျေးဇူးတင်ပါတယ် ဆရာမအို။ ရလဒ်က ဘယ်လိုပဲဖြစ်ဖြစ် မီကိုကိုယ်စား ကျေးဇူးအများကြီး တင်ပါတယ်ရှင်။” တန်ယန်ကပြုံးလျက် အရိုအသေပေးကာ ဆရာမကို နှုတ်ဆက်ပြီး အတန်းထဲသို့ ပြန်လာခဲ့သည်။ မီကိုကို ဒီသတင်းကောင်း ချက်ချင်း ပြောပြချင်သော်လည်း အကယ်၍ ရလဒ်က မကောင်းခဲ့ပါက မီကိုစိတ်ပျက်သွားမှာကို သူမ စိုးရိမ်မိသည်။

“ထားလိုက်ပါဦး... လောလောဆယ်တော့ မပြောသေးတာ ကောင်းမယ်။ ဒီတစ်ခါ မအောင်မြင်ရင်တောင် ငါ့မှာ ယီယွီလို အင်အားတောင့်တင်းတဲ့ ကုမ္ပဏီ ရှိနေတာပဲ၊ မီကိုအနေနဲ့ နာမည်ကြီးဖို့ အခွင့်အရေးမရမှာ ကြောက်စရာ လိုလို့လား”

အရာအားလုံးကို တွေးတော ပြင်ဆင်ပြီးနောက် တန်ယန်သည် လေ့ကျင့်ခန်း ပုစ္ဆာများ၏ ပင်လယ်ပြင်ထဲသို့ တစ်ဖန်ပြန်လည် နှစ်မြှုပ်လိုက်ပြန်သည်။ တက္ကသိုလ် ပထမနှစ် သင်ခန်းစာများသည် သူမအတွက် သိပ်မခက်ခဲလှပေ။ ဤသည်မှာ ဉာဏ်ရည်ဉာဏ်သွေးကို အမြင့်ဆုံး အဆင့်အထိ မြှင့်တင်ထားခြင်း၏ အကျိုးကျေးဇူး ဖြစ်ပေလိမ့်မည်။

တစ်ချက်ကြည့်လိုက်ရုံနှင့် နားလည်နိုင်သော အရာများစွာ ရှိနေပြီး ၎င်းတို့ကို အသေးစိတ် ထပ်မံလေ့လာရန် မလိုအပ်ဟု သူမယူဆသည်။ အဘယ်ကြောင့်ဆိုသော် သူမ၏ အနာဂတ် အစီအစဉ်တွင် သုတေသန ပညာရှင်တစ်ဦး ဖြစ်လာရန် ရည်မှန်းချက် မရှိသောကြောင့်ပင်။

သူမသည် ကျယ်ပြောလှသော စကြဝဠာကြီးထဲတွင် အလွန်သေးငယ်သော ဖုန်မှုန့်လေး တစ်စုံသာ ဖြစ်သည်။ သူမ၏ ရည်မှန်းချက်မှာ သေးငယ်ပါသည်—မိသားစုနှင့် သူငယ်ချင်းများ ဘေးကင်းလုံခြုံပြီး ပျော်ရွှင်နေဖို့သာ ဖြစ်သည်။

သိပ်မကြာခင်မှာပင် အတန်းပိုင်ဆရာမက လူလွှတ်၍ မီကိုကို ခေါ်ခိုင်းသည်။ တန်ယန်သည် မီကိုအတွက် အလွန် ဝမ်းသာသွားသည်။ အခြေအနေများ အဆင်ပြေသွားပြီ ထင်၏။

မျှော်လင့်ထားသည့် အတိုင်းပင် မီကိုသည် ကျောင်းဆင်းချိန်အထိ ပြန်မလာခဲ့ဘဲ ပြန်လာချိန်တွင်လည်း အလွန်အမင်း စိတ်လှုပ်ရှားနေပုံရသည်။

တန်ယန်သည် အခြေအနေကို နားလည်သဖြင့် ဘာမှ ထပ်မမေးတော့ပေ။ ကားပေါ်ရောက်မှသာ မီကိုသည် သူမ၏ စိတ်လှုပ်ရှားမှုကို မထိန်းနိုင်တော့ဘဲ တန်ယန်ကိုဖက်ကာ ပျော်ရွှင်စွာ အော်ဟစ်တော့သည်။

"ယန်ယန်... ယန်ယန်၊ နင့်ကိုငါ အရမ်းချစ်တာပဲ၊ ဒီတစ်နေကုန်လုံး ငါ့အိုင်ဒေါနဲ့ အနီးကပ် ရှိနေခဲ့ရတာ သိလား။ အာ... ဒါတင်မကဘူး၊ နင်က ငါ့ကို သူ့ရဲ့ MV မင်းသမီးအဖြစ် အကြံပြုပေးခဲ့တာလို့ အိုင်ဒေါက ပြောပြတယ်၊ ဝါး... နင့်လိုသူငယ်ချင်းမျိုး ရှိနေမှတော့ ငါဘာများ ထပ်လိုဦးမှာလဲ"

မီကိုသည် စကားပြောပြီးနောက် တန်ယန်၏ ပါးပြင်ကို ဆွဲနမ်းလိုက်တော့သည်။ အသားလေးက အလွန်နုညက်လှသည်။ သူမသည် မိမိပါးကို ပြန်ကိုင်ကြည့်ပြီး "အိုး... ယန်ယန့်ပါးလောက် မချောပါလား" ဟု တွေးလိုက်မိသေးသည်။

"ဒါဆိုရင် ငါ့နားမှာပဲ ကပ်နေတော့၊ နင့်ကို အနုပညာ လောကကို သိမ်းပိုက်နိုင်အောင် ငါလုပ်ပေးမယ်" ဟု တန်ယန်စိတ်ထဲမှ ကြုံးဝါးလိုက်သည်။ သူမသည် မီကိုအတွက် အနုပညာ ကုမ္ပဏီတစ်ခုတောင် တည်ထောင်ပေးထားပြီးပြီ မဟုတ်ပါလား။

"ဒါနဲ့ယန်ယန်... ငါ့အိုင်ဒေါကို အပ်ထားလိုက်ဦးနော်။ သူက နင်ရေးထားတဲ့ စန္ဒယားတေးသွားကို အရမ်းကြိုက်တယ်တဲ့။ ငါတို့ လူရှန်းကန်ကို သွားတုန်းက နင်တီးခဲ့တဲ့ အပုဒ်မလား" မီကို၏ မျက်ဝန်းများမှာ အံ့သြဝမ်းသာမှုများဖြင့် တောက်ပနေသည်။

တန်ယန်က "ဟုတ်တယ်" ဟု ခေါင်းညိတ်ပြလိုက်သည်။ မီကိုက LINE မှတစ်ဆင့် ပို့ပေးသော အလုပ်ကတ်ကို ကြည့်ကာ သူငယ်ချင်းအဖြစ် လက်ခံရန် နှိပ်လိုက်သည်။

အိမ်ပြန်ရောက်သည်အထိ တစ်ဖက်လူက သူမ၏ သူငယ်ချင်းအဖြစ် တောင်းဆိုမှုကို လက်မခံသေးပေ။ သူတို့ အလုပ်ရှုပ်နေ၍ ဖြစ်မည်ဟု တွေးကာ တန်ယန် ထိုကိစ္စကို ဘေးဖယ်ထားပြီး ညစာစားရန် ပြင်လိုက်သည်။

ညစာစားပြီးနောက် တန်ယွဲဂျားသည် တန်ယန်အနားတွင် ကပ်နေပြီး သူမ လတ်တလော သင်ထားသော စန္ဒယားတေးသွားကို တီးပြချင်သည်ဟု ဆိုသည်။ မထင်မှတ်ဘဲ တန်ယွဲဂျား တီးခတ်လိုက်သော တေးသွားမှာ တန်ယန်ကိုယ်တိုင် ရေးစပ်ထားသည့် "လရောင်အောက်မှ စိမ်းလန်းသော တောင်ကုန်းနှင့် ရေကန်" ဖြစ်နေသည်။

ကလေးမလေးမှာ သူမ၏ မှတ်ချက်ကို မျှော်လင့်တကြီး ကြည့်နေသည်။ သူမ၏ လက်ကလေး နှစ်ဖက်မှာ ရင်ဘတ်ရှေ့တွင် ဂနာမငြိမ် ဖြစ်နေခြင်းက သူမမည်မျှ စိတ်လှုပ်ရှားနေသည်ကို ပြသနေသည်။

တန်ယန်က ပြုံးလျက် သူမ၏ခေါင်းလေးကို ပွတ်သပ်ကာ ရိုးသားစွာ ချီးကျူးလိုက်သည် - "ဂျားဂျားက တကယ် တော်တာပဲလား၊ စန္ဒယားသင်တာ ခဏလေးပဲ ရှိသေးတာကို ဒီလောက်ခက်တဲ့ အပုဒ်ကို တီးနိုင်နေပြီလား ဂျားဂျားရေ၊ နေ့တိုင်း အကြာကြီး လေ့ကျင့်တယ် ထင်တယ်နော်"

"ငါလည်း ပျင်းနေလို့ မဖြစ်တော့ဘူးပဲ။ ဂျားဂျားက ငါ့ကို ကျော်တက်သွားရင် ငါ့ညီမလေးကို မျက်နှာပြရမှာတောင် ရှက်စရာ ဖြစ်နေဦးမယ်"

"မဖြစ်နိုင်တာ၊ သမီးအစ်မက ချန်ပီယံပဲဥစ္စာ၊ အစ်မက အတော်ဆုံးပဲ" တန်ယွဲဂျားက သူမပြောတာကို မယုံမှာစိုး၍ ရင်ဘတ်လေးကို မတ်ကာ ယုံကြည်ချက် အပြည့်ဖြင့် ပြောလိုက်သည်။

"ဖူးး... အင်းပါ၊ အင်းပါ၊ အစ်မက စတာပါ၊ လာ... ဒီအပုဒ်ကို အစ်မသင်ပေးမယ်။" ထို့နောက် တန်ယန်သည် "လရိပ်ကန်" ကို တစ်ဆင့်ချင်း၊ တစ်ကွက်ချင်း စိတ်ရှည်လက်ရှည် သင်ကြားပေးတော့သည်။

သင်ပေးသူကလည်း ကြိုးစားသင်သလို၊ သင်ယူသူကလည်း အာရုံစိုက်သဖြင့် မကြာခင်မှာပင် တန်ယွဲဂျားသည် ပထမစာပိုဒ်ကို ချောချောမွေ့မွေ့ တီးခတ်နိုင်လာရာ သူမမှာ အလွန်ပင် ပျော်ရွှင်သွားခဲ့သည်။

ညဉ့်နက်လာပြီ ဖြစ်သလို ဒေါ်လေးဖြစ်သူကလည်း ဆိုင်မှ ပြန်ရောက်လာသဖြင့် တန်ယွဲဂျားကိုခေါ်ကာ ရေမိုးချိုးပေးတော့သည်။ တန်ယန်လည်း သူမ၏ အခန်းသို့ ပြန်လာခဲ့သည်။

စာကြည့်ခန်း အသေးလေးရှေ့မှ ဖြတ်သွားစဉ် တန်ယွီတစ်ယောက် စာတွေကို အသည်းအသန် ရေးနေသည်ကို တွေ့လိုက်ရသဖြင့် အောက်ထပ်သို့ ပြန်ဆင်းကာ သူငယ်ချင်းအတွက် မုန့်အချို့ ပြင်ဆင်ပေးလိုက်သည်။ မောင်နှမ သံယောဇဉ်ကို ဒီလိုလေးတော့ ပြုစုပျိုးထောင်ပေးရမည် မဟုတ်ပါလား။

အခန်းသို့ ပြန်ရောက်သောအခါ တန်ယန်သည် သူမ၏ သူငယ်ချင်းအဖြစ် တောင်းဆိုမှုကို တစ်ဖက်လူက လက်ခံလိုက်ပြီ ဖြစ်ကြောင်း တွေ့ရှိလိုက်သည်။ ထို့အပြင် တစ်ဖက်လူမှာ အတော်လေး စိတ်လှုပ်ရှားနေပုံရ၏။ မဟုတ်လျှင် LINE စာတို အစောင် ၂၀ နီးပါး ပို့ထားမည် မဟုတ်ပေ။

ထိုစဉ်မှာပင် တစ်ဖက်လူက စာရိုက်နေကြောင်း အချက်ပြချက် ပေါ်လာပြီး...

ယွမ်ရှီး: တန်ယန်လား၊ ရှိလားဟင်။

တန်ယန်: ဟုတ်ကဲ့၊ ရှိပါတယ်ရှင်။ တောင်းပန်ပါတယ်၊ ခုနက ဖုန်းလက်ထဲမှာ မရှိလို့ပါ။

ယွမ်ရှီး: ကျွန်တော်ထင်သားပဲ၊ ဟားဟား။ အခုလိုညဉ့်နက်မှ ဆက်သွယ်မိတာ အားနာပါတယ်။ ကျွန်တော်က ခင်ဗျားနဲ့ အလုပ်အတူလုပ်ဖို့ ကိစ္စကို တကယ်ပဲ စိတ်အားထက်သန်နေလို့ပါ။

တန်ယန်: ကိုယွမ်ရှီးကလည်း အားနာစရာကြီး။ ဒါနဲ့ ဘယ်လိုမျိုး အလုပ်အတူ လုပ်ချင်တာလဲဟင်။ ကျွန်မက အထက်တန်း ကျောင်းသူလေးပဲ ရှိသေးတာ သိတယ်မလား။

ယွမ်ရှီး: ကျွန်တော် Weibo ပေါ်မှာ ခင်ဗျားရဲ့ သတင်းတွေကို တွေ့ခဲ့တယ်။ အမျိုးသားအဆင့် လူငယ်စန္ဒယား ပြိုင်ပွဲက ခင်ဗျားရဲ့ ဗီဒီယိုကိုလည်း ကြည့်ပြီးပြီ။ အထူးသဖြင့် "လရောင်အောက်က စိမ်းလန်းတဲ့ တောင်တန်းရေကန်" ဆိုတဲ့ အပုဒ်ကို ကျွန်တော်တကယ် သဘောကျတယ်။ အဲဒီအပုဒ်ကို ခင်ဗျားကိုယ်တိုင် ရေးစပ်ခဲ့တာလို့ ကြားတယ်။

တန်ယန်: ဟုတ်ပါတယ်ရှင်၊ သဘောကျပေးလို့ ကျေးဇူးတင်ပါတယ်။ (ပြုံးနေသောမျက်နှာ) အစ်ကိုယွမ်ရှီးရဲ့ သီချင်းတွေကလည်း အရမ်းနားထောင်လို့ ကောင်းပါတယ်ရှင်။

ယွမ်ရှီး: ချီးကျူးပေးလို့ ကျေးဇူးပါ။ ကျွန်တော် အသည်းအသန် ဆက်သွယ်ရတဲ့ အကြောင်းရင်းကတော့ ကျွန်တော့်ရဲ့ အယ်လ်ဘမ်အသစ်က သီချင်းတစ်ပုဒ်အတွက် စန္ဒယားတေးသွားတစ်ခု လိုအပ်နေလို့ပါ။ ရွေးချယ်စရာတွေ အများကြီးရှိပေမဲ့ တစ်ခုမှ စိတ်တိုင်းမကျ ဖြစ်နေတုန်း ခင်ဗျားရဲ့ တေးသွားကို ကြားလိုက်ရပြီး လုံးဝ အံ့သြမှင်တက်သွားလို့ပါ။ ဒါကြောင့် ကျွန်တော့်အတွက် သင့်တော်မယ့် တေးသွားလေးတစ်ခု ဖန်တီးပေးနိုင်မလားလို့ မေးချင်တာပါ။ အခကြေးငွေလည်း ပေးပါ့မယ်၊ ရမလားဟင်။

တန်ယန်: အကယ်၍ စိတ်မရှိဘူးဆိုရင် ဒီသီချင်းနဲ့ ပတ်သက်ပြီး ရှင် ဘယ်လိုပုံစံ လိုချင်တယ်ဆိုတာ သိပါရစေ။ အခကြေးငွေကတော့ ထားလိုက်ပါတော့ရှင်။ ဒီနေ့ ကျွန်မရဲ့ အခင်ဆုံး သူငယ်ချင်းကို MV ထဲမှာ ပါဝင်ခွင့် ပေးခဲ့တဲ့အတွက် ကျေးဇူးတုံ့ပြန်တာလို့ပဲ သဘောထားပေးပါ။

ယွမ်ရှီး: (demo.mp4 ပေးပို့လိုက်သည်)

ယွမ်ရှီး: အရင်ဆုံး နားထောင်ကြည့်ပေးပါဦး။ အားလုံး ပြီးပြည့်စုံတဲ့ ဗားရှင်းတော့ မဟုတ်သေးဘူး၊ ဒါပေမဲ့ အခြေခံ အသံနေ အသံထားကတော့ ဒီအတိုင်းပါပဲ။

တန်ယန်: ဟုတ်ကဲ့ပါရှင်။

တန်ယန်သည် ထိုသီချင်းကို စပီကာမှတစ်ဆင့် တိုက်ရိုက် ဖွင့်လိုက်သည်။ ကြည်လင်ပြီး နားဝင်ချိုလှသော အမျိုးသား အသံလေးက ချစ်သူက ခွဲခွာသွားပြီးနောက် ရင်ထဲတွင် ကျန်ရစ်ခဲ့သည့် နာကျင်မှုနှင့် အထီးကျန် ဆွေးမြည့်မှုတို့ကို သာယာငြိမ့်ညောင်းလှစွာ သီဆိုနေသည်။ ဤသည်မှာ တစ်ဦးတည်း ရေရွတ်နေသည့် အသံနှင့်တူပြီး ခံစားချက်အပြည့် ပါဝင်နေသည်။ သီချင်းတစ်ပုဒ်လုံးတွင် ကြားဖြတ်ပါဝင်သော ရက်ပ်အပိုင်းများကလည်း သီချင်းကို ပိုမို ပြည့်စုံသွားစေသည်။

သူမ ဤသီချင်းကို တကယ် သဘောကျသွားသည်။ သီချင်းတစ်ပုဒ်လုံးကို နားထောင်ပြီး နောက်တွင် တန်ယန်၏ ခေါင်းထဲ၌ စိတ်ကူးစိတ်သန်း အပိုင်းအစများစွာ တဖွဲဖွဲပေါ်လာပြီး သူမသည် အလွန်ပင် စိတ်လှုပ်ရှား တက်ကြွသော အခြေအနေသို့ ရောက်ရှိသွားတော့သည်။