အိမ်သစ်

မွန်းတည့်ချိန်အထိ ကစားပြီးနောက် သူတို့သည် ကုန်တိုက်ရှိ စားသောက်ဆိုင်တစ်ခုတွင် နေ့လယ်စာစားကြပြီး ချန်းချန်းလေးမှာ အိပ်ငိုက်လာလေသည်။

တစ်မနက်ခင်းလုံး ကုန်တိုက်ထဲတွင် အငြိမ်မနေဘဲ လျှောက်ဆော့ထားသဖြင့် သူမ မပင်ပန်းလျှင်မှ ထူးဆန်းပေလိမ့်မည်။

ထို့ကြောင့် နေ့လယ်စာစားပြီးနောက် ကျန်းဆူရှင်းသည် ချန်းချန်းလေးကို ကားဖြင့် အိမ်သို့ပြန်ခေါ်သွားသည်။ လုအန်းကျီသည် လမ်းဘေးမှနေ၍ တက္ကစီလေး မောင်းထွက်သွားသည်ကို ကြည့်ရင်း ကားတစ်စီးဝယ်ရန် အကြံမှာ တစ်ကျော့ပြန် ပေါ်လာပြန်သည်။

သို့သော် ဆိုင်ပြင်ဆင်မှုပြီးစီးသည်အထိ စောင့်ရဦးမည်ဖြစ်သလို၊ ကားအမျိုးအစားများကို လေ့လာရန်လည်း ရက်အနည်းငယ် လိုအပ်သေးသည်။

နောက်ပိုင်းရက်များတွင် လုအန်းကျီသည် ဆိုင်နှင့် ကျန်းဆူရှင်း၏ အိမ်ကြားသို့ ခေါက်တုံ့ခေါက်ပြန် သွားလာနေခဲ့သည်။

ဆိုင်ပြင်ဆင်မှုမှာ အလွန်ပင် ချောမွေ့နေပြီး ပြီးစီးရန် နီးကပ်လာပြီဖြစ်သည်။ သူမှာယူထားသော “ဆန်းဝေ့စာအုပ်ဆိုင်” ဟူသည့် ဆိုင်းဘုတ်မှာလည်း အသင့်ဖြစ်ပြီဖြစ်၍ ဆိုင်ရှေ့တွင် ချိတ်ဆွဲလိုက်ရာ အလွန်ပင် ကျော့ရှင်းပြီး အဆင့်အတန်းရှိလှသည်။

ဒုတိယထပ်အတွက် ပရိဘောဂများအားလုံး ရောက်ရှိလာပြီဖြစ်၍ လုအန်းကျီသည် လေဝင်လေထွက်ကောင်းစေရန် ပြတင်းပေါက်များကို ခဏခဏ ဖွင့်ထားလေ့ရှိသည်။ ပထမထပ်ရှိ ကောင်တာနှင့် စာအုပ်စင်တန်းများမှာလည်း နေရာတကျ ရှိနေပြီဖြစ်သော်လည်း စာအုပ်များ မရောက်သေးသဖြင့် စင်များမှာ အလွတ်ဖြစ်နေသေးသည်။

သူသည် ဆိုင်အတွင်း၌ စာအုပ်စင်များကို အလွန်အကျွံ မထားဘဲ ဖတ်ရှုသူများ ထိုင်ဖတ်နိုင်ရန် စားပွဲနှင့် ကုလားထိုင်များကိုလည်း နေရာလွတ်ချန်၍ ထည့်သွင်းထားသည်။

ဤပုံစံမှာ ကျောင်းနားရှိ စာအုပ်များ ပြည့်နှက်နေသော စာအုပ်ဆိုင်များနှင့်မတူဘဲ အေးချမ်းဆိတ်ငြိမ်သော ပတ်ဝန်းကျင်တစ်ခုကို ဖော်ဆောင်ပေးထားသည်။

သူ၏ ဒုတိယဘဝတွင် မိမိကိုယ်ကိုယ် စိတ်ချမ်းသာစေမည့် ပတ်ဝန်းကျင်မျိုးကို ဖန်တီးနိုင်ခြင်းမှာ သူအနှစ်သက်ဆုံး အရာပင်ဖြစ်သည်။

“ချန်းချန်းလေးလည်း ဒီနေရာကို သဘောကျမှာပါ” ဟု လုအန်းကျီသည် သပ်ရပ်သော်လည်း အလွတ်ဖြစ်နေသေးသော ဆန်းဝေ့စာအုပ်ဆိုင်ကို ကြည့်ရင်း တွေးမိသည်။

ထိုသို့တွေးလိုက်စဉ် ကျန်းဆူရှင်း၏ ပုံရိပ်မှာလည်း စိတ်ထဲသို့ ရုတ်တရက် ရောက်ရှိလာပြီး ကျန်းဆူရှင်းလည်း ဤအငွေ့အသက်မျိုးကို သဘောကျလိမ့်မည်ဟု သူ တွေးနေမိသည်။

လုအန်းကျီသည် ဆိုင်ရှေ့တွင် အရောင်းဝန်ထမ်းခေါ်စာကို ကပ်ထားသလို အလုပ်အကိုင်ရှာဖွေရေး ဝဘ်ဆိုဒ်များတွင်လည်း ကြေညာချက် တင်ထားလိုက်သည်။ ဆိုင်တွင် တစ်နေကုန် ကောင်တာ၌ ထိုင်နေရန် သူ စိတ်မကူးထားပေ။

ထို့နောက်တွင် စာအုပ်များအကြောင်း ရှိလာသည်။

လုအန်းကျီသည် အယ်ဒီတာ ကူးကူး မှတစ်ဆင့် မယ်ဘယ်လ်ထရီးနှင့် ဆက်သွယ်ပြီး စာအုပ်များ မှာယူရန် ချိတ်ဆက်မှုများ ပြုလုပ်ခဲ့သည်။

ကူးကူး က ကျူကျူ မှတစ်ဆင့် မက်ဆေ့ချ် ပို့လာသည် - “ဆရာဘီ ြလမ်းကြောင်းတွေအားလုံး ညှိနှိုင်းပြီးပါပြီ၊ ရှင့်ရဲ့ လုပ်ငန်းလိုင်စင်ရတာနဲ့ စာအုပ်တွေ ပို့ပေးပါ့မယ်။ Dragon Raja III လည်း ပုံနှိပ်ပြီးပါပြီ။ လိုင်စင်ရတာနဲ့ အခြားစာအုပ်တွေနဲ့အတူ တစ်ခါတည်း ပို့ပေးပါ့မယ်။”

လုအန်းကျီ၏ ဆန်းဝေ့စာအုပ်ဆိုင်သည်လည်း ထိုစာအုပ်များကို လက်ခံရရှိမည်ဖြစ်သည်။

အခြားစာအုပ်များအတွက်မူ လုအန်းကျီကိုယ်တိုင် ရွေးချယ်သလို ကျန်းဆူရှင်းကလည်း အကြံပြုပေးသည်။ ချန်းချန်းလေးကပင် သူမ၏ စိတ်အာရုံအတိုင်း ကလေးစာအုပ်အချို့ကို ရွေးပေးခဲ့ရာ လုအန်းကျီက အကုန်ဝယ်ယူရန် ဆုံးဖြတ်လိုက်သည်။

ယနေ့တွင် လုအန်းကျီသည် ဟိုတယ်မှ ဆင်းလာပြီး ဆိုင်သို့ ပြောင်းရွှေ့နေထိုင်ရန် ပြင်ဆင်လိုက်သည်။

သူ၏ဖုန်း မြည်လာသဖြင့် ကြည့်လိုက်ရာ ကျန်းဆူရှင်း ဆီမှ ဖြစ်နေသည်။

“ရှင် ဆိုင်မှာလား” ဟု ကျန်းဆူရှင်းက မေးသည်။

လုအန်းကျီက “ဟုတ်တယ်၊ ဆိုင်မှာပဲ။ အခုပဲ ဟိုတယ်က ဆင်းလာတာ၊ ဒီနေ့ကစပြီး ဆိုင်မှာပဲ နေတော့မယ်” ဟု ပြန်ဖြေသည်။

ကျန်းဆူရှင်းက “ရှင့်ရဲ့ စာအုပ်ဆိုင် လိုင်စင်လည်း ကျပြီ၊ ကျွန်မတို့ စတူဒီယိုအတွက်လည်း အဆင်သင့်ပဲ။ အခု ကိုယ်စားလှယ်ဆီက လိုင်စင်သွားယူထားတယ်၊ ရှင်ဆိုင်မှာရှိရင် ကျွန်မ လာပို့ပေးမယ်လေ” ဟု ဆို၏။

ထိုစဉ် ချန်းချန်းလေး၏ အသံထွက်ပေါ်လာသည် - “ဖေဖေ! ဖေဖေ!”

ကျန်းဆူရှင်းက ချန်းချန်းလေးကို ဖုန်းပေးလိုက်ပုံရသည်။ “ဖေဖေ... ချန်းချန်း လာရှာမယ်နော်။ မေမေလည်း လာရှာမယ်” ဟု ချန်းချန်းလေးက အော်ပြော လိုက်လေသည်။

လုအန်းကျီက ပြုံးလိုက်ပြီး “အေးပါကွယ်၊ ဖေဖေက ဆိုင်မှာ စောင့်နေမယ်နော်” ဟု ပြန်ပြောလိုက်သည်။

အရာအားလုံးမှာ လုအန်းကျီ မျှော်လင့်ထားသည်ထက် ပို၍ ချောမွေ့နေသည်။ လိုင်စင်ရောက်လာသည်နှင့် စာအုပ်များ ရောက်လာမည်ဖြစ်ပြီး သူ၏ ကိုယ်ပိုင်ဝတ္ထု ပွဲဦးထွက်မှုကိုလည်း သူကိုယ်တိုင် တွေ့မြင်ရတော့မည်ဖြစ်သည်။

လုအန်းကျီသည် ဆိုင်ထဲသို့ဝင်ကာ လှည့်ပတ်ကြည့်ရှုရင်း အနံ့အသက်ဆိုးများ မရှိသည်ကို အတည်ပြုပြီးမှ စိတ်အေးသွားရသည်။

သူသည် ဒုတိယထပ်သို့ တက်ကာ ကျောပိုးအိတ်ကို ချလိုက်ပြီးနောက် ပထမထပ်သို့ ပြန်ဆင်းလာကာ ရေနွေးအိုး တည်လိုက်သည်။ ပြီးနောက် ကျန်းဆူရှင်းနှင့် ချန်းချန်းလေး ရောက်လာမည်ကို အေးအေးလူလူ ထိုင်စောင့်နေတော့သည်။

ဆိုင်ကို အကုန်ပြင်ဆင်ပြီးမှ ချန်းချန်းလေး ပထမဆုံးအကြိမ် ရောက်လာခြင်း ဖြစ်သည်။ သူမ ဒီနေရာကို သဘောကျမှာပါ၊ ဟုတ်တယ်မလား။