လျှို့ဝှက်ဆန်းကြယ်သော အနက်ရောင်ခေါင်းတလား

ထိုကဲ့သို့ ကြောက်မက်ဖွယ်ကောင်းသော နတ်ဆိုးကြီးသည် ကောင်းကင်နှင့် မြေကြီးကို ထိုးဖောက်ဖျက်ဆီးနိုင်စွမ်းရှိပြီး ကြီးမားသော ဘေးဒုက္ခများကို သယ်ဆောင်လာသည်။

၎င်းသည် မကောင်းသော အကျိုးဆက်များကိုသာ ဖြစ်ပေါ်စေလိမ့်မည်။

နတ်ဆိုးကြီးသည် ခေါင်းကိုမော့ကာ ဒေါသတကြီး ဟိန်းဟောက်လိုက်သည်။ တစ်ခဏချင်းမှာပင် ကောင်းကင်နှင့် မြေကြီးမှာ ပြိုလဲလုမတတ် ဖြစ်သွားပြီး အရာအားလုံး အငွေ့ပျံသွားသလို ခံစားရသည်။

လူတိုင်းသည် မိမိတို့၏လည်ပင်းပေါ်တွင် ဓားတစ်စင်း တင်ထားသကဲ့သို့ အန္တရာယ်ကို ခံစားနေကြရသည်။

'ဒါကို... ဘယ်လိုလုပ်ကြမလဲ'

ရှန်းချန်ကော သည် ဖန်ဆင်းခြင်းအဆင့် ကျွမ်းကျင်သူ သုံးဦးကို သတ်ဖြတ်ပြီးနောက် စိတ်ထဲတွင် မအေးမချမ်း ဖြစ်လာကာ ကြေးမှုံအလင်းတောင် သို့ ချက်ချင်း ပြန်လိုစိတ် ပေါ်လာသည်။

ထိုသူသုံးဦး ပြောသွားသော စကားများနောက်ကွယ်တွင် တစ်စုံတစ်ခု ရှိနေဦးမည်ဟု သူ ခံစားနေရသည်။

"မဟုတ်သေးဘူး၊ အမြန်ဆုံး ပြန်သွားတာ အကောင်းဆုံးပဲ။ ဒါပေမဲ့ သူတို့ ဘာလုပ်နိုင်မှာလဲ နောက်ထပ် ဖန်ဆင်းခြင်းအဆင့် ကျွမ်းကျင်သူတစ်ယောက် ထပ်လွှတ်ဦးမှာလား မဖြစ်နိုင်ပါဘူး။ ဖန်ဆင်းခြင်းအဆင့် ဆိုတာ မုန်လာဥတွေ၊ ဂေါ်ဖီထုပ်တွေလို ပေါတဲ့အရာ မဟုတ်ဘူး။ ပြီးတော့ သူတို့ ဒီကို ဆင်းလာဖို့ဆိုရင် တင်းကျပ်တဲ့ စည်းမျဉ်းတွေ ရှိမှာပဲ၊ ဒီလောက် လွယ်လွယ်ကူကူ ဆင်းလာလို့ မရနိုင်ဘူး။"

ရှန်းချန်ကောသည် ယခင်ကကဲ့သို့ မဟုတ်တော့ဘဲ ဤလူများ ကြေးမှုံအလင်းတောင်ကို အဘယ်ကြောင့် တိုက်ခိုက်လိုကြသနည်းဟု အမြဲ စဉ်းစားနေသည်။

သူသာ သူတို့နှင့်အတူ မလိုက်သွားခဲ့ပါက တစ်ဖက်လူက လှုပ်ရှားပေလိမ့်မည်။

သူသည် အထွတ်အထိပ်ဓားသိုင်း ၏ စွမ်းအားကြောင့် ပြိုလဲသွားသော ကောင်းကင်ကြီးကို တစ်ချက်ကြည့်လိုက်သည်။

အကယ်၍ ဤဓားချက်သာ ကြေးမှုံအလင်းတောင်အနီးတွင် ပေါက်ကွဲခဲ့ပါက တောင်၏ ထက်ဝက်ကျော်မှာ ပြတ်တောက်သွားပေလိမ့်မည်။

သူ သက်ပြင်းတစ်ချက် ချလိုက်သည်။ သို့သော် ထိုစဉ်၌...

သူသည် လူအုပ်စုတစ်စုကို ရုတ်တရက် မြင်လိုက်ရသည်။ ထိုလူအားလုံးသည် ဖန်ဆင်းခြင်းအဆင့် ထိပ်တန်းကျွမ်းကျင်သူများ ဖြစ်နေကြသည်။

"သူတို့အားလုံး ဟေးရွှီနယ်မြေကနေ ဆင်းလာကြတာလား"

ရှန်းချန်ကော အလွန်အံ့အားသင့်သွားသည်။

ဟေးရွှီနယ်မြေမှ ဖန်ဆင်းခြင်းအဆင့် ကျွမ်းကျင်သူများမှာ မြူသမုဒ္ဒရာထဲတွင် ဤမျှ တန်ဖိုးမရှိလောက်အောင် ပေါများနေပြီလော။

ထိုကျွမ်းကျင်သူများသည် စုဝေးနေကြပြီး အလွန်မည်းမှောင်သော အရာတစ်ခုကို ထမ်းပိုးထားကြပုံရသည်။

နေပါဦး... အဲဒါ ခေါင်းတလား တစ်လုံးပါလား။

ဒါက ဘာတွေလဲ

ရှန်းချန်ကောသည် ထိုခေါင်းတလားကို ကြည့်ရုံဖြင့် ကြီးမားသော ဖိအားကို ခံစားလိုက်ရသည်။ ထိုနေရာတွင် ဖန်ဆင်းခြင်းအဆင့် ကျွမ်းကျင်သူများစွာ ရှိနေသော်လည်း ခေါင်းတလားကို ရွှေ့ရန် အလွန်ပင် ခက်ခဲနေပုံရသည်။

ကြီးမားလှသော ဖိအားတစ်ခု ရှိနေသကဲ့သို့ပင်။

ခေါင်းတလားကို အထူးပစ္စည်းတစ်ခုဖြင့် ပြုလုပ်ထားပြီး အနက်ရောင်ဖြစ်ကာ ထူးဆန်းသော ပုံစံများ ရှိသည်။

၎င်းမှာ နတ်ဆိုးဆန်သော အရှိန်အဝါများကို ထုတ်လွှတ်နေသည်။

"ချန်းဟုန် ဘယ်မှာလဲ၊ကျန်းကျန့်ယွမ်ရော သူတို့ သုံးယောက် ဘယ်ပျောက်သွားတာလဲ"

"တောက် ဒီတစ်ခေါက် တာဝန်ထမ်းဆောင်ဖို့ ဆင်းလာတဲ့သူတွေက ဘာလို့ ဒီလောက် တာဝန်မယူတတ်ဘဲ လည်ပတ်နေကြတာလဲ... ဒီခေါင်းတလားထဲက လူက သာမန်မဟုတ်ဘူး၊ ဘာမှ အမှားအယွင်း အဖြစ်မခံနိုင်ဘူး"

"တစ်ခုခု မှားယွင်းသွားရင် ငါတို့အားလုံး အသက်ရှင်မှာ မဟုတ်ဘူး"

ထိုဖန်ဆင်းခြင်းအဆင့် ကျွမ်းကျင်သူများသည် ခေါင်းတလားထဲမှ အရာကို အလွန်ကြောက်ရွံ့နေကြပုံရပြီး အလွန်သတိထားနေကြသည်။

"မရတော့ဘူး... ငါတို့ နောက်ထပ် လူအချို့ ရှာရမယ်။ သန့်စင်နယ်ပယ် မှာပဲ ရှိသေးတဲ့ ငါတို့အတွက် ဒီခေါင်းတလားကို ရွှေ့ဖို့က ခက်ခဲလွန်းတယ်။ ကံဆိုးမယ့် လူအချို့ကို ရှာပြီး သူတို့ရဲ့ အသက်အနှစ်သာရကို သုံးပြီး ခေါင်းတလားထဲက ယင်ချီ တွေကို ဖိနှိပ်ခိုင်းမှ ဖြစ်မယ်။"(သန့်စင်နယ်ပယ်ဆိုတာ ဖန်ဆင်းခြင်း အခြေခံပါ ပြီးရင် ယင်နယ်ပယ်၊ယန်နယ်ပယ်)

ထိုအခိုက်အတန့်တွင် မျက်လုံးပေါင်းများစွာသည် ရှန်းချန်ကောထံသို့ ကျရောက်လာသည်။

ရှန်းချန်ကောသည် မူလက ခရီးကို အလျင်စလို သွားနေခြင်း ဖြစ်သည်။ သူသည် ဤဖန်ဆင်းခြင်းအဆင့် ကျွမ်းကျင်သူများနှင့် မပတ်သက်ချင်သဖြင့် ရှောင်ကွင်းသွားရန် ကြိုးစားခဲ့သော်လည်း...

ဘယ်သူက ထင်ထားပါ့မလဲ

ဖန်ဆင်းခြင်းအဆင့် ကျွမ်းကျင်သူများသည် ရှန်းချန်ကောကို စိုက်ကြည့်နေကြပြီ ဖြစ်သည်။

"အနန္တအမှောင်ထုနယ်ပယ်ရဲ့ အရှိန်အဝါပဲ... ဒါက ဒီအနက်ရောင်ခေါင်းတလား စုပ်ယူဖို့အတွက် လုံလောက်မှာပါ..."

"ဒါဆိုရင် ပြဿနာမရှိတော့ဘူး။ သူ့ကို အရင်ဆုံး ဖိနှိပ်မယ်၊ ပြီးတော့ သူ့ကို အနက်ရောင်ခေါင်းတလားကို ဆွဲခိုင်းမယ်။ ခေါင်းတလားက သူ့ကို အကုန်စုပ်ယူသွားအောင် လုပ်မယ်"

လူအချို့၏ မျက်လုံးများတွင် ရက်စက်မှုများ ပြက်ပြက်ထင်ထင် ပေါ်လာသည်။

သို့သော် နောက်တစ်ခဏ၌

ဝတ်စုံဖြူနှင့် လူငယ်မှာ ရုတ်တရက် ပျောက်ကွယ်သွားသည်။

"ဘာ..." သူတို့ မျက်လုံးကို ပွတ်ပြီး အံ့အားသင့်သွားကြသည်။

ဘယ်လိုလုပ်ပြီး ရုတ်တရက် ပျောက်သွားတာလဲ

ဖန်ဆင်းခြင်းအဆင့် ကျွမ်းကျင်သူ အုပ်စုကြီးရှေ့မှာ အနန္တအမှောင်ထုနယ်ပယ် ကျွမ်းကျင်သူတစ်ယောက်က မည်သို့ ပျောက်ကွယ်သွားနိုင်ရသနည်း။

ရှန်းချန်ကောမှာမူ သူ၏ဟင်းလင်းပြင်လွတ်မြောက်ခြင်း နှင့် လှုပ်ရှားခြင်းနည်းစနစ်ကို အသုံးပြုလိုက်ခြင်း ဖြစ်သည်။

သူ ဤနေရာတွင် အချိန်မဖြုန်းချင်သလို ကြေးမှုံအလင်းတောင်အတွက်လည်း စိုးရိမ်နေသည်။

သို့သော် ထိုခဏ၌... ရုတ်တရက်...

သူ၏မျက်လုံးများ ခဏတာ ဝေဝါးသွားသည်။

အဝေးမှ အရာတစ်ခုမှာ အလွန်မြန်သော အရှိန်ဖြင့် ပျံသန်းလာသည်။

၎င်းမှာ အမည်းရောင်ဖြစ်ပြီး... ထူးဆန်းကာ မကောင်းသော အရှိန်အဝါများ ပြည့်နှက်နေသည်။

တောက် အနက်ရောင်ခေါင်းတလားပါလား။

ရှန်းချန်ကော အံ့အားသင့်သွားသည်။ ယခုလေးတင် ဖန်ဆင်းခြင်းအဆင့် ကျွမ်းကျင်သူများ ထမ်းထားသည့် ခေါင်းတလားက မည်သို့ဖြင့် ဤနေရာသို့ ရောက်လာသနည်း။

မျက်တောင်တစ်ခတ်အတွင်းမှာပင် အနက်ရောင်ခေါင်းတလားသည် ကြောက်မက်ဖွယ်ကောင်းသော အလင်းတန်းတစ်ခုအဖြစ် ပြောင်းလဲကာ ရှန်းချန်ကောထံသို့ တိုးဝင်လာသည်။

ရှန်းချန်ကော တုံ့ပြန်ရန်ပင် အချိန်မရလိုက်ဘဲ ခေါင်းတလားသည် သူ၏ကျောပြင်ပေါ်သို့ ကပ်ပါသွားခဲ့သည်။

ရှန်းချန်ကော၏ကျောဘက်မှ အားနည်းသော အသံတစ်သံ ထွက်ပေါ်လာသည်။

"ငါ့ကို ကယ်ပါ..."

"မင်း လိုချင်တဲ့ အရာအားလုံး ငါ ပေးပါ့မယ်..."

ထိုအသံမှာ အေးစက်ပြီး အားနည်းနေသော်လည်း နားထောင်လို့ အလွန်ကောင်းသော အမျိုးသမီးအသံ ဖြစ်သည်။

သို့သော် ရှန်းချန်ကောမှာ ခေါင်းတလားထဲက အသံကို စိတ်ဝင်စားနေရန် အချိန်မရှိပေ။

ဖန်ဆင်းခြင်းအဆင့် ကျွမ်းကျင်သူ ငါးဦးမှာ ဒေါသတကြီးဖြင့် သူရှိရာသို့ ပြေးဝင်လာနေကြပြီ ဖြစ်သည်။

"သတ္တိရှိလှချည်လား ကောင်ကလေး ငါတို့နဲ့ ခုနကပဲ တွေသေးတာကို မင်းက တိတ်တဆိတ် လှည့်ကွက်သုံးပြီး ငါတို့ရဲ့ အဖိုးတန်ပစ္စည်းကို ခိုးယူသွားတယ်ပေါ့လေ"

"မင်း အသက်ရှင်ရတာ ငြီးငွေ့နေပြီ ထင်တယ်"

ဖန်ဆင်းခြင်းအဆင့် ကျွမ်းကျင်သူများသည် ရှန်းချန်ကော ပျောက်ကွယ်သွားစဉ်က လက်လျှော့ရန် ပြင်ခဲ့သော်လည်း၊ သူတို့ ထမ်းလာသည့် ခေါင်းတလားကို ရှန်းချန်ကောက တစ်နည်းနည်းဖြင့် လုယူသွားသည်ဟု ထင်မှတ်ကာ ဒေါသအလွန်ထွက်နေကြသည်။

ရှန်းချန်ကောမှာ သွေးအန်ချင်စိတ်ပင် ပေါက်သွားသည်။

ဘာတွေလဲဟ

ဤအရာက ကောင်းကင်ပေါ်မှကျလာသော ဘေးဒုက္ခ မဟုတ်လော။

သူက ကျောပေါ်က ခေါင်းတလားကို ပြန်ပစ်ချချင်သော်လည်း ၎င်းမှာ ကျောနှင့် တသားတည်း ကပ်နေသည်။

ခေါင်းတလားထဲက အသံကလည်း တိုးတိုးလေး ဆက်ပြောနေသည်။

"မြန်မြန်ပြေး... ငါ့ကို ဒီကနေ ခေါ်ထုတ်သွားပါ၊ ငါ့ကို ကယ်ရင် နင် စိတ်ကူးနိုင်သမျှ အရာအားလုံး ပေးမယ်..."

"ငါ့ကို လူယုတ်မာတွေက လုပ်ကြံပြီးမြှုပ်နှံဖို့ ကြိုးစားနေတာ..."

"မြန်မြန် ကယ်ပါ..."

အသံမှာ ပိုပိုပြီး စိုးရိမ်ပူပန်လာပုံရသည်။ ရှန်းချန်ကော မလှုပ်မယှက် ရပ်နေသည်ကို မြင်သောအခါ သူမ၏နောက်ဆုံးအင်အားကို သုံးပြီး ရှန်းချန်ကော၏ကျောပေါ်သို့ ရောက်လာခဲ့ခြင်း ဖြစ်သည်။

သို့သော် ရှန်းချန်ကောကတော့ ဘာမှမဖြစ်သလို ရပ်နေသည်။ ဖန်ဆင်းခြင်းအဆင့် ကျွမ်းကျင်သူ ငါးဦး ရောက်လာပြီး ဖိအားများ ပေးလာကြသည်။

ရှန်းချန်ကော သက်ပြင်းချလိုက်သည်။ ဤနေရာတွင် ယင်-ယန် နယ်ပယ် ကျွမ်းကျင်သူ တစ်ယောက်မှ မပါဘဲ အခြေခံ ဖန်ဆင်းခြင်းအဆင့်တွေသာ ဖြစ်သည်။

ဤခေါင်းတလားထဲမှ လူ၏အဆင့်အတန်းက အလွန်ထူးခြားမှာ သေချာသည်။ မဟုတ်လျှင် ဤလောက်လူအင်အားနှင့် လာကြမည်မှာ မဟုတ်ပေ။

"ကောင်လေး... သေပေတော့"

ဖန်ဆင်းခြင်းအဆင့် ကျွမ်းကျင်သူ ငါးဦး၏ တိုက်ခိုက်မှုရှေ့တွင် ရှန်းချန်ကောမှာ တည်ငြိမ်စွာ ရပ်နေသည်။

အခြားသူများ၏အမြင်တွင်မူ သူ ကြောက်လန့်ပြီး ဆွံ့အသွားသည်ဟု ထင်နေကြသည်။ အနက်ရောင်ခေါင်းတလားထဲက အမျိုးသမီးလည်း စိတ်ပျက်သွားပုံရသည်။

'ဒီကောင်လေး... ကြောက်ပြီး ကြောင်သွားတာလား'

'ငါ အသက်ကို ဖက်နဲ့ထုပ်ပြီး နောက်ဆုံးအခွင့်အရေးအနေနဲ့ စွန့်စားခဲ့တာ... နောက်ဆုံးတော့ ဒီလိုပဲ အဆုံးသတ်ရတော့မှာလား... ငါ့ဘဝက တကယ်ကို ခါးသီးပါလား'