နောက်ထပ် တိုင်းတစ်ပါး နတ်ဘုရားတစ်ပါးကို သတ်ဖြတ်ခြင်း၊ ကောင်းကင်နတ်ဆိုးမြို့တော်ရှိ သွေးစွန်းသော တိုက်ပွဲ။

[ထိုနှစ်တွင်ပင် သင်၏ စစ်မှုထမ်း အမှတ်များကြောင့် တပ်ခွဲမှူး အဖြစ် ရာထူးတိုးမြှင့်ခံရပြီး ကျင့်ကြံသူ ရာပေါင်းများစွာကို ဦးဆောင်ကွပ်ကဲခွင့် ရရှိခဲ့သည်။]

[ထိုနှစ်တွင်ပင် သင်သည် ပြန်လည်မွေးဖွားခြင်း ဆေးလုံး ဖော်စပ်ရာတွင် သင်၏ ကျွမ်းကျင်မှုကို ရည်ရွယ်ချက်ရှိရှိ ထုတ်ဖော်ပြသခဲ့သည်။]

[ရှေ့တန်းရှိ စစ်သူကြီးတစ်ဦးသည် ဆေးလုံးအကြောင်း သိရှိသွားပြီးနောက် ကောင်းကင်နတ်ဆိုးမြို့တော် ကိုယ်စား ဆေးဖော်နည်းကို ဝယ်ယူရန် ဆန္ဒရှိကြောင်း ထုတ်ဖော်ပြောကြားခဲ့သည်။]

[ချင်းယွင်ကမ္ဘာငယ်၏ အလုံးစုံ အင်အားကို မြှင့်တင်ပေးနိုင်ရန် မျှော်လင့်ချက်ဖြင့် သင်သည် ဆေးဖော်နည်းကို ရောင်းချပေးခဲ့သည်။]

[သင်သည် ပုံမပေါ်သေးသော နတ်ဘုရားရတနာ သန္ဓေသားလောင်း တစ်ခုနှင့် ဝိညာဉ်ကျောက်တုံး တစ်သန်းကျော် အပါအဝင် များပြားလှသော ဆုလာဘ်များကို ရရှိခဲ့သည်...]

[ထို့အပြင် တခြား သတင်းကောင်းများလည်း ရှိသေးသည်၊ သင် နောက်တစ်ကြိမ် ရာထူးတိုးမြှင့် ခံရပြန်သည်။]

[သင်သည် တပ်ခွဲမှူး ရာထူးမှ တပ်ရင်းမှူး အဖြစ်သို့ တိုးမြှင့်ခံရပြီး ကျင့်ကြံသူ တစ်ထောင်ကျော်ကို ဦးဆောင်ကွပ်ကဲခွင့် ရရှိခဲ့သည်။]

[တပ်ရင်းမှူး ရာထူးသို့ ရောက်ရှိရန် စွမ်းအားကြီးမားသော ခွန်အား လိုအပ်ပြီး ပုံမှန်အားဖြင့် ကပ်ဘေးကျော်လွှားခြင်းအဆင့် ကျင့်ကြံသူများသာ ရရှိနိုင်သည်။ သို့သော် သင့်ကဲ့သို့ စစ်မှုထမ်း အမှတ်များမှတစ်ဆင့် နှစ်အနည်းငယ်အတွင်း တပ်စိတ်မှူး အဆင့်မှ တပ်ရင်းမှူး အဆင့်သို့ ရောက်ရှိသည့် ဖြစ်ရပ်မှာ အလွန် ရှားပါးလှသည်။]

[သို့သော် သင်သည် ဤမျှနှင့် မကျေနပ်သေးပေ။]

[အဘယ်ကြောင့်ဆိုသော် ပိုမိုမြင့်မားသော ရာထူးကို ရရှိမှသာ သင့်စကားသံကို လူကြားနိုင်မည်ဖြစ်ပြီး... အနာဂတ် လမ်းကြောင်းကို အတိုင်းအတာတစ်ခုအထိ ပြောင်းလဲနိုင်မည်ဟု သင် သိထားသောကြောင့် ဖြစ်သည်။]

[ပြန်လည်မွေးဖွားခြင်း ဆေးလုံး ဖော်စပ်ခြင်းသည် မလွယ်ကူပေ။ အထူးသဖြင့် အချို့သော အဆင့် (၇) သို့မဟုတ် အဆင့် (၈) ဆေးပညာရှင်များအတွက် သူတို့၏ အောင်မြင်မှုနှုန်းနှင့် ဆေးလုံး အရည်အသွေးသည် သင်၏ အောင်မြင်မှုများအောက် များစွာ နိမ့်ကျနေသည်။]

[တစ်နေ့လျှင် လေးနာရီ အချိန်ပေး ဆေးဖော်စပ်ခြင်းဖြင့် သင်သည် ပြန်လည်မွေးဖွားခြင်း ဆေးလုံး ခုနစ်သုတ်မှ ရှစ်သုတ်အထိ ထုတ်လုပ်နိုင်ပြီး အားလုံးသည် အဆင့် (၇) သို့မဟုတ် အဆင့် (၈) များ ဖြစ်ကြ၏။ ရံဖန်ရံခါတွင် ထိပ်တန်း အရည်အသွေး ဆေးလုံးများပါ ပါဝင်သည်။]

[သာမန် အဆင့် (၇) ဆေးပညာရှင်များသည် အဆင့် (၇) ပြန်လည်မွေးဖွားခြင်း ဆေးလုံးကို ဖော်စပ်ရာတွင် အောင်မြင်မှုနှုန်း နည်းပါးရုံသာမက တစ်နေ့လျှင် အများဆုံး တစ်သုတ်၊ နှစ်သုတ်သာ ထုတ်လုပ်နိုင်သဖြင့် သင်နှင့် ယှဉ်လျှင် အလှမ်းဝေးလှသည်။]

[ထိုကဲ့သို့သော ဆေးဖော်စပ်ခြင်း ကျွမ်းကျင်မှုကြောင့် သင်သည် သင့်အား မကြာခဏ ရာထူးတိုးမြှင့်ပေးသော မြေကမ္ဘာနတ်ဘုရား စစ်သူကြီးတစ်ဦး၏ အာရုံစိုက်မှုကို ရရှိခဲ့သည်။]

[နှစ်အနည်းငယ်အတွင်း သင်သည် ဗိုလ်ချုပ်ရာထူး အတွက် ရေပန်းစားသော ကိုယ်စားလှယ်လောင်း တစ်ဦး ဖြစ်လာခဲ့သည်။]

[ကောင်းကင်နတ်ဆိုးမြို့တော်တွင် ဗိုလ်ချုပ် ဖြစ်လာရန် လူသားအဆင့် နတ်ဘုရား ခွန်အား လိုအပ်သည်။]

[ရံဖန်ရံခါ၌ ထူးကဲသော ပါရမီရှင် ကပ်ဘေးကျော်လွှားခြင်းအဆင့် ကျင့်ကြံသူများသည်လည်း ထိုရာထူးကို ရရှိတတ်ကြသည်။]

[ဤနှစ်များအတွင်း သင်သည် ဓားသိုင်းပညာနှင့် ကာကွယ်ရေး ဓားအရှိန်အဝါကို လေ့ကျင့်ရန် ရံဖန်ရံခါ အပြင်ထွက်ခဲ့ပြီး တစ်ပိုင်းတစ်စ နတ်ဘုရားအဆင့် တိုင်းတစ်ပါး မျိုးနွယ်စု နှစ်ကောင်၊သုံးကောင်ကို သတ်ဖြတ်ခဲ့သည်။]

[ယင်းက တပ်မတော်အတွင်းရှိ သင့်ဂုဏ်သတင်းကို ပိုမို မြင့်မားစေခဲ့သည်။]

[၅၀ နှစ်မြောက်တွင် သင်၏ ကာကွယ်ရေး ဓားအရှိန်အဝါ စုစုပေါင်း အရေအတွက်သည် ၁၁၈၀ အထိ ရောက်ရှိလာခဲ့သည်။]

[ပုံမှန် နားလည်သဘောပေါက်မှုနှင့် ရံဖန်ရံခါ တိုက်ပွဲဝင်ခြင်းများ ပေါင်းစပ်မှုကြောင့် သင်သည် တစ်နှစ်လျှင် ဓားချီအတားအဆီး ၁၀ လွှာနီးပါး တိုးတက်နှုန်း ရရှိခဲ့သည်။]

[ထိုနှစ်တွင်ပင် သင်သည် ထူးခြားသော အခြေအနေဖြင့် ဗိုလ်ချုပ် ရာထူးသို့ တိုးမြှင့်ခံရသည်။ သင်သည် ထောက်ပံ့ရေး ဌာနကို တာဝန်ယူကာ ဆေးပညာရှင်များနှင့် အဆောင်လက်ဖွဲ့ ပညာရှင် အများအပြားကို ဦးဆောင်လျက် ရှေ့တန်းသို့ မဟာဗျူဟာမြောက် အရင်းအမြစ်များကို လစဉ် ပံ့ပိုးပေးခဲ့သည်။]

[မကြာသေးမီ နှစ်များအတွင်း တိုင်းတစ်ပါး မျိုးနွယ်စုဝင်များ၏ ကျူးကျော်မှု အရှိန်မြှင့်လာသည်နှင့်အမျှ ရှေ့တန်း အခြေအနေသည် ပိုမို ဆိုးရွားလာခဲ့သည်။]

[ကံကောင်းထောက်မစွာဖြင့် ကောင်းကင်နတ်ဆိုးမြို့တော်သည် ကြိုတင် သတိပေးချက် ရရှိထားပုံရသည်။ ထို့ကြောင့် သူတို့သည် လူသားအဆင့် နတ်ဘုရား အထက် အကူအညီများကို ရရှိထားသည်။]

[ဆိုလိုသည်မှာ ထောက်ပံ့ရေးနှင့် သိုလှောင်ရေး ဌာနတွင်ပင် လူသားအဆင့် နတ်ဘုရား ကျင့်ကြံသူ တစ်ဦး သို့မဟုတ် နှစ်ဦး စောင့်ကြပ်နေသည်ဟု ဆိုလိုခြင်း ဖြစ်သည်။]

[ကောင်းကင်လျှို့ဝှက်ချက်မျှော်စင်သို့ သင် ရောင်းချခဲ့သော သတင်းအချက်အလက်များသည် အကျိုးသက်ရောက်မှု ရှိခဲ့သည်ဟု သင် ခန့်မှန်းလိုက်သည်။]

[နှစ်များတစ်လျှောက် သင်သည် ထောက်လှမ်းရေး သတင်းများကို စုဆောင်းခဲ့ရာ သတင်းအချို့ ကြားသိခဲ့ရသည်။]

[အဖြူရောင် ဧကရာဇ်မြို့တော်တွင် တစ်သီးပုဂ္ဂလ ကျင့်ကြံသူများသည် ကောင်းကင်နတ်ဘုရား ကျင့်ကြံသူ တစ်ဦး၏ ဦးဆောင်မှုဖြင့် စုစည်းခဲ့ပြီး ဆင်းသက်ဂိုဏ်း တည်ရှိရာ ချိုင့်ဝှမ်းကို ရုတ်တရက် ဝင်ရောက် စီးနင်း တိုက်ခိုက်ခဲ့ကြသည်။]

[သွေးမျိုးစေ့ ပြိုင်ပွဲကို နှောင့်ယှက်နိုင်ရုံသာမက သွေးနံပါတ်အမည်ရှိသော ဆင်းသက်ဂိုဏ်း အရာရှိ အများအပြားကိုလည်း နေရာတွင်ပင် သတ်ဖြတ်ခဲ့ကြသည်။]

[သွေးသခင်ကိုးဆယ့်ကိုးသည်လည်း သူတို့အထဲတွင် ထင်ရှားစွာ ပါဝင်ခဲ့သည်။]

လက်တွေ့ကမ္ဘာတွင် စုရှင်းသည် ဤအရာကိုမြင်သော် မပြုံးဘဲ မနေနိုင်တော့ပေ။

"ကျွတ် ကျွတ်၊ အဘိုးကြီး ကိုးဆယ့်ကိုး။ မင်း ငါ့ကို အကြိမ်‌ပေါင်းများစွာ သတ်ခဲ့တာလေ... အခု မင်း ခံစားရမယ့်အလှည့် ရောက်ပြီ ဟားဟား"

စုရှင်း၏ နှုတ်ခမ်းများ ကွေးညွတ်သွားသည်။ သွေးသခင်ကိုးဆယ့်ကိုး၏ ခွန်အားသည် မြေကမ္ဘာနတ်ဘုရား အဆင့်နီးပါး ရှိနေသည့်အတွက် စုရှင်း ယှဉ်နိုင်မည့် ပြိုင်ဘက် မဟုတ်သေးပေ။

သို့သော် ထိုအချက်က စုရှင်း၏ ဉာဏ်ဆင် ကစားခြင်းမှ တားဆီးနိုင်ခြင်း မရှိပေ။ သူ တိုက်ရိုက် မနိုင်နိုင်သော်လည်း သတင်းအချက်အလက် အနည်းငယ် ပေါက်ကြားလိုက်ရုံဖြင့် ဖြောင့်မတ်မှန်ကန်သော ကျင့်ကြံသူများသည် မိစ္ဆာကျင့်ကြံသူများကို လိုက်လံ သတ်ဖြတ်ကြလိမ့်မည်။

ဟုတ်ပါသည်။ မိစ္ဆာကျင့်ကြံသူများကို ရှင်းလင်းသော ဖြောင့်မတ်မှန်ကန်သည့် ကျင့်ကြံသူများသည် သဘောထားကြီးလွန်းသည်ဟု မထင်လိုက်ပါနှင့်။ သူတို့တွင်လည်း ရရှိစရာ အကျိုးအမြတ်များ ရှိနေ၍ ဖြစ်သည်။

ကမ္ဘာသုံးထောင်တွင် ကြီးလေးသော ရာဇဝတ်မှုများ ကျူးလွန်ခြင်း သို့မဟုတ် ရက်စက်စွာ သတ်ဖြတ်လုယက်ခြင်းများ မပြုလုပ်သရွေ့ ဖြောင့်မတ်မှန်ကန်သော ကျင့်ကြံသူဟု သတ်မှတ်နိုင်သည်။ သို့သော် သူတို့ထံမှ မကောင်းမှုကို အပြစ်ပေးပြီး ကောင်းမှုကို အားပေးရန် မျှော်လင့်ခြင်းသည် လက်တွေ့မကျလှပေ။

သာမန် ကျင့်ကြံသူများသည် အခြား ကျင့်ကြံသူများကို လုယက်တိုက်ခိုက်ပါက မိစ္ဆာကျင့်ကြံသူ စာရင်းဝင်သွားမည်ဖြစ်၏။ ထိုအခါ သူတို့အတွက် တစ်ခုတည်းသော ရွေးချယ်စရာမှာ ဆင်းသက်ဂိုဏ်း ကဲ့သို့သော အစွန်းရောက် အဖွဲ့အစည်းများကို ဝင်ရောက်ရန်သာ ရှိတော့သည်။

သို့သော် သာမန် ကျင့်ကြံသူများက မိစ္ဆာကျင့်ကြံသူများကို လုယက်တိုက်ခိုက်ပါက ကြွယ်ဝချမ်းသာမှု အားလုံးကို သိမ်းပိုက်နိုင်ရုံသာမက ဂုဏ်သတင်းကောင်းကိုလည်း ရရှိနိုင်ပေသည်။

မကြာခဏ လုယက်လေ့ရှိသော မိစ္ဆာကျင့်ကြံသူများသည် သာမန် ကျင့်ကြံသူများထက် ပိုမို ချမ်းသာကြွယ်ဝသည်မှာ လူတိုင်းသိသော အမှန်တရား ဖြစ်သည်။

စုရှင်း မေးစေ့ကို ပွတ်သပ်ရင်း ရေရွတ်လိုက်သည်။

"ဟမ်း၊ နောက်ကျ အချိန်ရရင် ဆင်းသက်ဂိုဏ်းရဲ့ ချိုင့်ဝှမ်းကို နောက်တစ်ခေါက် သွားပြီး သူတို့ စုဝေးတဲ့ နေရာတွေကို မြေပုံဆွဲမှတ်တမ်းတင်ရမယ်... ပြီးကျမှ တစ်ချက်တည်းနဲ့ အကုန် ရှင်းပစ်လိုက်မယ်"

ဆင်းသက်ဂိုဏ်းတွင် အမှန်တကယ် စွမ်းအားကြီးသူများမှာ သွေးနံပါတ်အမည် အဆင့်ဆင့်တွင် ထိပ်တန်း ၂၀ သို့မဟုတ် ထိပ်တန်း ၁၀ ဦးအတွင်း ဝင်သူများ ဖြစ်ကြသည်။ သူတို့၏ ကျင့်ကြံခြင်းအဆင့်များသည် နှစ်ပေါင်းသောင်းချီ ကျင့်ကြံထားသူများ ဖြစ်သဖြင့် ကြောက်မက်ဖွယ် ကောင်းလှသည်။

သို့သော် ထိုကဲ့သို့သော စွမ်းအားရှင်ကြီးများသည် ကမ္ဘာသုံးထောင်၏ ကမ္ဘာအမျိုးမျိုးကြား ကူးသန်းသွားလာနေလေ့ရှိပြီး ချင်းယွင်ကမ္ဘာငယ်တွင် တပ်စွဲထားလေ့ မရှိကြပေ။

ထိပ်တန်း ၂၀ သို့မဟုတ် ၅၀ ကျော်လွန်သော အဆင့်ရှိသူများကို ချန်ထားခဲ့ပါက ချင်းယွင်ကမ္ဘာငယ်ရှိ အင်အားစုများ အနေဖြင့် ၎င်းတို့ကို ရှင်းလင်းပစ်နိုင်ရန် ဖြစ်နိုင်ခြေ ရှိပေသည်။

စုရှင်း ခေတ္တမျှ စဉ်းစားပြီးနောက် သူ၏ အကြည့်သည် သရုပ်ပြခြင်း မျက်နှာပြင်စီသို့ ရောက်ရှိသွားသည်။

[ဆင်းသက်ဂိုဏ်းနှင့် ပတ်သက်သော သတင်းများအပြင် တောင်ကြီးတစ်သိန်းအတွင်း အင်အားပြုန်းတီးမှုနှုန်း သိသိသာသာ လျော့ကျသွားကြောင်းကိုလည်း သင် တွေ့ရှိခဲ့သည်။ နတ်ဆိုးဘုရင်များ အချင်းချင်း စစ်တိုက်နေကြဆဲ ဖြစ်သော်လည်း သေသည်အထိ တိုက်ခိုက်သည့် ဖြစ်ရပ်မှာ ရှားပါးလာသည်။]

[ယခင်က နတ်ဆိုးဘုရင် ၃၆ ပါး ရှိခဲ့ရာ ယခု ၂၀ ကျော် ကျန်ရှိနေသေးသည်ဖြစ်ရာ နတ်ဆိုးကျင့်ကြံသူများ၏ စွမ်းအားကြီးမားမှုကို ဖော်ပြနေသည်။]

[ထို့အပြင် နတ်ဆိုးကျင့်ကြံသူများသည် တိုင်းတစ်ပါး မျိုးနွယ်စုများကို တိုက်ခိုက်ရာတွင် ရှေ့တန်း၌ သင်တို့နှင့်အတူ ပါဝင်နေသည်ကို သင် သတိပြုမိသည်။]

[သူတို့သည် လူသား ကျင့်ကြံသူများထက် မကြာခဏ ပိုမို ရက်စက်ကြမ်းကြုတ်ကြပြီး သတ်ဖြတ်ထားသော တိုင်းတစ်ပါး မျိုးနွယ်စုဝင်များ၏ နှလုံးသားနှင့် အသားအဆီအနှစ်များကို တိုက်ရိုက် ထုတ်ယူ စားသုံးကြ၏။ ၎င်းတို့က ကြီးမားသော အားဖြည့်ပစ္စည်း ဖြစ်ကြောင်းလည်း ပြောဆိုကြသည်။]

[ကံကောင်းထောက်မစွာဖြင့် နတ်ဆိုးကျင့်ကြံသူ တပ်ဖွဲ့များသည် သာမန် ကျင့်ကြံသူများနှင့် ဝေးကွာသော နေရာတွင် တပ်စွဲထားသဖြင့် ပဋိပက္ခဖြစ်ပွားမှုတော့ မရှိခဲ့ပေ။]

[ဆယ်စုနှစ်တစ်ခုကြာ ပင်ပန်းဆင်းရဲရမည့် ရှေ့တန်းစစ်ပွဲ ဖြစ်ရမည့်အစား သင့်အတွက် အငြိမ်းစား ဘဝတစ်ခု ဖြစ်လာခဲ့သည်။]

[သင်သည် နေ့စဉ် အလှည့်ကျ ခြောက်နာရီကြာ ဆေးဖော်စပ်ခြင်း အလုပ်ကို ပြီးစီးအောင် လုပ်ဆောင်ခဲ့ပြီး ကျန်ရှိသော အချိန်များကို သင်အလိုရှိသလို ကုန်ဆုံးနိုင်ခဲ့သည်။]

…