ကျုံးယန် ထောင်ကျခြင်း

"ငါက အမြဲတမ်း ဖြူစင်ရိုးသားစွာနဲ့ ဂိုဏ်းရဲ့ စည်းမျဉ်းတွေကို တိတိကျကျ လိုက်နာခဲ့တဲ့သူပါ။"

"ဘယ်လိုလုပ်ပြီး ထိပ်တန်းဝိညာဉ်ကျောက် တစ်ခုတည်းနဲ့ ဂိုဏ်းတပည့်တစ်ယောက်ကို တမင်သက်သက် မီးပုံထဲ တွန်းပို့ပါ့မလဲ"

"သခင်လေးထန်... အရာရာတိုင်းမှာ သက်သေရှိဖို့ လိုပါတယ်။ ဒါက စည်းကမ်း ထိန်းသိမ်းရေး ခန်းမ၊ စွပ်စွဲချက်တွေ လျှောက်ပြောပြီး ငါ့ ကို မဟုတ်မမှန် လုပ်ကြံလို့ မရဘူးနော်"

ကျုံးယန်က အေးစက်စွာ ပြောလိုက်သည်။

ထန်ထျန်းက ပြုံးလျက် "ဒါက လုပ်ကြံတာလား၊ မဟုတ်ဘူးလားဆိုတာ စည်းကမ်း ထိန်းသိမ်းရေး ခန်းမက ဆုံးဖြတ်ပါလိမ့်မယ်။

ကျွန်တော်ကတော့ ကျွန်တော်သိတဲ့ အမှန်တရားကိုပဲ ပြောပြတာပါ။"

"သက်တော် စောင့်ငှားတုန်းက အကြီးအကဲ ကျုံးယန်ဟာ ကျွန်တော့်ဆီက ထိပ်တန်းဝိညာဉ်ကျောက် တစ်ခု ယူခဲ့တယ်။"

"ဒုတိယအကြိမ် ဧည့်သည် ရှာဖို့ တူညီတဲ့ တောင်းဆိုချက်မျိုး လုပ်တုန်းကလည်း သူက နောက်ထပ် ထိပ်တန်းဝိညာဉ်ကျောက် အတုံး ၁၀၀ ယူခဲ့ပြန်တယ်။"

"တတိယအကြိမ် တွေ့တုန်းကတော့ သူက ကျွန်တော့်ရဲ့ အဆိုပြုချက်ကို ငြင်းခဲ့ပေမဲ့ 'ကျေးဇူးတုံ့ပြန်ခ' ကိုတော့ လက်ခံခဲ့ပါတယ်။"

"အဲဒါကတော့ ရှန့်ထန်း တာအိုကျောက်စိမ်း တစ်ခုပါ။"

စကားဆုံးသည်နှင့် လူအများ အံ့သြသွားကြသည်။

တာအိုကျောက်စိမ်း ဆိုသည်မှာ သာမန်အရာ မဟုတ်ပေ။

ကျုံးယန်ကဲ့သို့ အဆင့်ရှိသော အကြီးအကဲတစ်ဦးအတွက်ပင် အလွန်တန်ဖိုးရှိပြီး ရခဲလှသော ရတနာဖြစ်သည်။

အကယ်၍ သူသာ ထိုကျောက်စိမ်းကို လက်ခံခဲ့သည်ဆိုလျှင် ဘာမှ ကူညီမပေးဘဲ နေလိမ့်မည်ဟု မည်သူမျှ မယုံကြည်ကြပေ။

"ကျုံးယန်... ထန်ထျန်းပြောတာ မှန်သလား"

ဟန်ဟိုင်က မေးလိုက်သည်။

ကျုံးယန်က တည်ငြိမ်စွာပင် "ဒါတွေ အကုန်လုံးက စွပ်စွဲချက်တွေပါ။

ကျွန်တော် သူ့ဆီက အဆင့်နိမ့် ဝိညာဉ်ကျောက် တစ်တုံး တောင် မယူခဲ့ပါဘူး။

သခင်လေးထန် ဒီလောက် သေချာပေါက် ပြောနေတာကတော့ သူ စိတ်ချောက်ချားနေလို့ ဖြစ်မှာပါ၊ ဆေးကုသဖို့ လိုနေပြီ ထင်တယ်။"

ဟန်ဟိုင်က ထန်ထျန်းကို တစ်ချက်ကြည့်ပြီး ထပ်မေးသည်။ "ဒါဆိုရင် စည်းကမ်း ထိန်းသိမ်းရေး ခန်းမက မင်းကို ရှာဖွေစစ်ဆေးတာကို လက်ခံရဲသလား"

ကျုံးယန် မျက်နှာ ပျက်သွားသည်။ "ဒါက..."

သို့သော် သူ ဘာမှမပြောရသေးမီ ဘေးမှ နားထောင်နေသော အကြီးအကဲ ဟုန်ဟွမ် က ဖြည်းဖြည်းချင်း ဝင်ပြောလာသည်။ "ဒါက လုပ်ထုံးလုပ်နည်းနဲ့ မညီဘူး ထင်တယ်နော်။"

"ခိုင်လုံတဲ့ သက်သေမရှိဘဲ လူတစ်ယောက်ရဲ့ စကားအနည်းငယ်ကြောင့်နဲ့ ဂိုဏ်းအကြီးအကဲတစ်ဦးကို စစ်ဆေးရှာဖွေလို့ ဘယ်ရပါ့မလဲ

နောက်ပြီး ထန်ထျန်းပြောတဲ့ လာဘ်ပေးပစ္စည်းက ဝိညာဉ်ကျောက်တွေလေ။

ရှာတွေ့တဲ့ ဝိညာဉ်ကျောက်တွေက ထန်ထျန်း ပေးထားတာလို့ ဘယ်လို အတည်ပြုမှာလဲ"

ဟုန်ယွမ်က ဝင်ပါပေးလိုက်သဖြင့် ကျုံးယန်၏ မျက်နှာမှာ ချက်ချင်းပင် ပြန်လည် ဝင်းပလာသည်။

ဟန်ဟိုင်နှင့် အခြားအရာရှိ များ တိုင်ပင်ကြသော်လည်း ဟုန်ယွမ်၏ စကားမှာ ကျိုးကြောင်းဆီလျော်သဖြင့် ခက်ခဲနေကြသည်။

ထိုစဉ် ဟုန်ယွမ်က စကားလမ်းကြောင်းပြောင်းလိုက်သည်။ "ဒီတစ်ခါ စီရင်ချက်မှာ မင်းတို့ တစ်ခုခုကို မေ့နေသလိုပဲ။

အထောက်အထားမရှိတဲ့ ကိစ္စတွေကို ငြင်းခုန်နေမယ့်အစား ဂိုဏ်းရဲ့ လက်ရှိ ယိုယွင်းနေတဲ့ စည်းကမ်းတွေကို အာရုံစိုက်သင့်တယ်။"

"သက်တော်စောင့်နဲ့ ဂုဏ်ထူးဆောင်တပည့်ကြားမှာ ငှားရမ်းမှု ဆက်ဆံရေးပဲ ရှိရမယ်၊ တာဝန်နဲ့ ဝတ္တရားတွေက ရှင်းနေတာပဲ။

ဒါပေမဲ့ သက်တော်စောင့်မှာ ကိုယ်ဝန်ရှိလာတယ်ဆိုတဲ့ ကိစ္စမျိုးကတော့ မဖြစ်သင့်ဘူး။

ဒီလိုကိစ္စမျိုးကို လွှတ်ထားရင် ဂိုဏ်းရဲ့ အခြေခံကို ထိခိုက်လာလိမ့်မယ်။"

ထန်ထျန်း ကြောင်သွားသည်။

ဒီလူ က ဘာလို့ ရုတ်တရက် သူ့ဘက်ကို လှံဦးလှည့်လာတာလဲ

ငါ သူ့ကို အရင်က ပြစ်မှားဖူးလို့လား ဟု သူ တွေးတောနေစဉ် ဟန်ဟိုင်နှင့် ဟုန်ယွမ်တို့ ထိပ်တိုက်တွေ့ကြတော့သည်။

"ဒီနေ့ စီရင်ချက်ရဲ့ အဓိကအကြောင်းအရာက ဂိုဏ်းတူအချင်းချင်း လုပ်ကြံမှုနဲ့ အတွင်းပိုင်း အဂတိလိုက်စားမှုပဲ။

ထန်ထျန်းနဲ့ ကုရှောင်းရွှယ် ကိစ္စက ဒီနေ့ စီရင်ချက်နဲ့ မဆိုင်ဘူး။

နောက်ပြီး ဂိုဏ်းက တပည့်အချင်းချင်း ချစ်ကြိုက်တာကို မတားမြစ်ထားဘူး၊ နှစ်ဦးသဘောတူ ဖြစ်နေသရွေ့ အတင်းအဓမ္မ မဟုတ်ရင် ရပါတယ်" ဟု ဟန်ဟိုင်က ပြန်ချေပသည်။

ဟုန်ယွမ်က ပြုံးလျက် "တကယ်လို့ အတင်းအဓမ္မ ဖြစ်နေရင်ကော"

ဟန်ဟိုင် မျက်မှောင်ကြုတ်ကာ "ဒါကိုတော့ သေချာ စုံစမ်းစစ်ဆေးရမှာပေါ့။

ဒါပေမဲ့ ဒီနေ့တော့ ဒီကိစ္စကို ဆွေးနွေးမှာ မဟုတ်ဘူး။"

ဟုန်ယွမ်က ခေါင်းခါသည်။ "ပိုပြီး ပြင်းထန်တဲ့ ကိစ္စကို မပြောဘဲ အခြေအမြစ်မရှိတာတွေကိုပဲ ပြောနေတော့...

မင်းရဲ့ စည်းကမ်း ထိန်းသိမ်းရေး လုပ်ငန်းစဉ်ကလည်း အားနည်းချက်တွေ အများကြီး ရှိနေတာပဲ။"

သူတို့နှစ်ဦး စကားပြောရင်း လမ်းကြောင်းလွဲလာသဖြင့် ထန်ထျန်းက စားပွဲကို ခေါက်ကာ သူတို့ကို ပြန်ခေါ်လိုက်သည်။

"ကုရှောင်းရွှယ်မှာ ကိုယ်ဝန်ရှိတယ်လို့ ဘယ်သူပြောလဲ"

"ပြီးတော့... ကျုံးယန် လာဘ်စားခဲ့တယ်ဆိုတဲ့ သက်သေ ကျွန်တော့်မှာ မရှိဘူးလို့ ဘယ်သူပြောလဲ"

"ဟမ်" ဟန်ဟိုင်နှင့် ဟုန်ယွမ်တို့ နှစ်ဦးလုံး ထန်ထျန်းကို လှမ်းကြည့်လိုက်ကြသည်။

"ရှောင်းရွှယ်မှာ ကိုယ်ဝန်မရှိဘူးလား"

ဟန်ဟိုင်က မေးသည်။

ထန်ထျန်းက ပြုံးလျက် "မှန်ပါတယ်၊ သူမဟာ ဖြူစင်တဲ့ အပျိုစင်ဘဝအတိုင်းပါပဲ။

ဒီလို သိက္ခာကျစရာ သတင်းအမှားတွေကို ဘယ်သူက လျှောက်ဖြန့်တာလဲ ကျွန်တော်လည်း မသိဘူး၊ အရမ်းကို ယုတ်မာလွန်းပါတယ်။

ဒီနေ့ ဒီနေရာမှာပဲ အမှန်တရားကို ရှင်းပြပါရစေ။"

ဟန်ဟိုင် ခဏမျှ ကြောင်သွားသည်။

စိတ်အေးသွားသော ကျုံးယန်မှာမူ မျက်မှောင်ကြုတ်ကာ ထန်ထျန်းကို ကြည့်သည်။ "

ထန်ထျန်း... ဒါ မင်းကိုယ်တိုင် ပြောခဲ့တာ မဟုတ်ဘူးလား"

ထန်ထျန်းက မေးစေ့ကို ပွတ်ရင်း "အော်...

ကျွန်တော် ဘယ်တုန်းက ပြောလို့လဲ"

ကျုံးယန်က "ငါ တို့ တတိယအကြိမ် တွေ့တုန်း..."

သူ ရုတ်တရက် စကားရပ်သွားသည်။ စိတ်ထဲတွင် မကောင်းသော ခံစားချက် ကို ခံစားလိုက်ရသည်။

ထန်ထျန်းက ရယ်သည်။ "သက်သေမရှိဘဲ လူတစ်ယောက်ရဲ့ အရှက်ကို မခွဲသင့်ဘူးလေ။

ရှောင်းရွှယ်က အခု တံခါးပိတ်ကျင့်ကြံနေပေမဲ့ ကျွန်တော့်မှာ သက်သေ ရှိပါတယ်။"

စကားဆုံးသည်နှင့် ဘေးမှ ချီယွမ် ဝုန်းခနဲ မတ်တပ်ရပ်လိုက်သည်။

"ဟားဟား... လာကြ၊ လာကြည့်ကြ။

ငါ့ညီလေးအတွက် ငါ သက်သေခံပေးမယ်။ အဲဒီကောင်မလေးက အဖြူထည်လေးပါ၊ ဘာမှ မဖြစ်ခဲ့ဘူး။"

အားလုံးက ချီယွမ်ကို ကြည့်ကြသော်လည်း လုံးဝကြီးတော့ မယုံကြသေးပေ။ ချီယွမ်က မျက်လုံးပြူးကာ "ဟောဗျာ... ငါ့ကို မယုံဘူးလား

ဟိုကောင်လေး... ယွင်ခုံး မင်း လာပြောပြလိုက်စမ်း။

မြန်မြန်"

ယွင်ခုံး က ရှက်ကိုးရှက်ကန်းဖြင့် မတ်တပ်ရပ်ကာ "မှန်ပါတယ် အကြီးအကဲတို့။

ကုရှောင်းရွှယ်မှာ ကိုယ်ဝန်မရှိပါဘူး၊ သူမဟာ စင်ကြယ်နေဆဲပါ။"

အားလုံး အချင်းချင်း ကြည့်လိုက်ကြသည်။

ယွင်ခုံးက ဂိုဏ်းချုပ်လေး ဖြစ်ရာ ဤကဲ့သို့ ကိစ္စမျိုးကို လိမ်ညာမည် မဟုတ်ပေ။ ကုရှောင်းရွှယ် ကျင့်ကြံရာမှ ထွက်လာလျှင် အမှန်တရားက ပေါ်လာမည်သာ ဖြစ်သည်။

သို့သော် ထူးဆန်းသည်မှာ ဤသတင်းမှာ ထန်ထျန်း၏ ပါးစပ်မှ ထွက်လာခြင်း ဖြစ်သည်။ ထန်ထျန်းက အရက်မူးပြီး လျှောက်ပြောခြင်းလား၊

သို့မဟုတ် တစ်ခုခုကို ရည်ရွယ်ခြင်းလား

ကျုံးယန်၏ မျက်နှာမှာ ပျာယာခတ်လာသည်။

ဟုန်ယွမ်လည်း မျက်လုံးမှိတ်ကာ စဉ်းစားနေသည်။

"ထန်ထျန်း... ကျုံးယန် လာဘ်စားတယ်ဆိုတဲ့ သက်သေ ရှိတယ်ဆိုတာကော"

ဟန်ဟိုင်က မေးသည်။

ထန်ထျန်း ခေါင်းညိတ်သည်။ "ပထမနဲ့ ဒုတိယအကြိမ် ဝိညာဉ်ကျောက်တွေကိုတော့ ကျွန်တော် သက်သေမပြနိုင်ဘူး။

ဒါပေမဲ့ တတိယအကြိမ် 'ရှန့်ထန်း တာအိုကျောက်စိမ်း' ကိုတော့..."

သူက ကျောက်စိမ်းပြားလေးကို ထုတ်လိုက်သည်။

"ဒါက မဟာအကြီးအကဲက ကျွန်တော့်အတွက် သီးသန့်လုပ်ပေးထားတဲ့ ပစ္စည်းလေးပါ။ ဒါက ဘာလုပ်နိုင်လဲဆိုတာ အားလုံး ကြည့်လိုက်ကြပါ။"

ပြောပြီးသည်နှင့် သူက ထိုကျောက်စိမ်းပြားကို ဟန်ဟိုင်ထံ ပစ်ပေးလိုက်သည်။

ဟန်ဟိုင်က ကျောက်စိမ်းပြားကို စစ်ဆေးပြီးနောက် ချက်ချင်းပင် ၎င်း၏ အသုံးဝင်ပုံကို သိသွားသည်။

သူက ကျောက်စိမ်းပြားအတွင်းမှ အစီအရင် ကို လှုပ်ရှား စေလိုက်သည်။

ရုတ်တရက် ခန်းမအတွင်း ဟင်းလင်းပြင် လှိုင်းအချို့ ထွက်ပေါ်လာပြီး ထိုလှိုင်းများ၏ ဗဟိုချက်မှာ အောက်တွင်ရှိသော ကျုံးယန် ဖြစ်နေသည်။

သူ၏ ထိတ်လန့်နေသော မျက်လုံးများရှေ့မှာပင် လှပသော ရှန့်ထန်း တာအိုကျောက်စိမ်း တစ်ခုက သူ၏ သိုလှောင်လက်စွပ် အတွင်းမှ အလိုလို ပေါ်ထွက်လာပြီး အမည်းရောင် ခန်းမကြီးအတွင်း တောက်ပသွားတော့သည်။

ထိုကျောက်စိမ်း ပေါ်လာသည်နှင့် တစ်ပြိုင်နက် အကြီးအကဲဟုန်ယွမ် စကားတစ်ခွန်းမျှ မပြောတော့ဘဲ စည်းကမ်း ထိန်းသိမ်းရေး ခန်းမမှ လှည့်ထွက်သွားတော့သည်။

ကျုံးယန် လုံးဝ ပျာယာခတ်သွားသည်။ "မဟုတ်ဘူး... ဒါ လုပ်ကြံတာ

ထန်ထျန်း တစ်ခုခု လုပ်ထားတာ"

"အကြီးအကဲဟုန်ယွမ် အကြီးအကဲဟုန်ယွမ်

ကျွန်တော့်အတွက် တရားမျှတအောင် လုပ်ပေးပါဦး"

သို့သော် သူ မည်မျှပင် အော်ဟစ်နေပါစေ ဟုန်ယွမ်က လှည့်မကြည့်ဘဲ ပျောက်ကွယ်သွားသည်။

ကျုံးယန် ကြမ်းပြင်ပေါ်သို့ ပုံကျသွားသည်။ သူ့ကို ငရဲသို့ ပို့လိုက်သည့်အရာမှာ သူ အမြတ်တနိုး သိမ်းထားခဲ့သော တာအို ကျောက်စိမ်း ဖြစ်လိမ့်မည်ဟု သူ ထင်မထားခဲ့ပေ။

ထန်ထျန်းက သူ့ကို တည်ငြိမ်စွာ ကြည့်နေသည်။

သူ့ကို လာထိသူမှန်သမျှ သူ ပြန်တိုက်ခိုက်မည်သာ။

ကျုံးယန်၏ အမှားမှာ ထန်ထျန်း၏ အစွမ်းကို လျှော့တွက်ခဲ့ခြင်းပင်။

နောက်ဆုံးတွင် ဟုန်ယွမ်၏ ကာကွယ်မှု မရှိတော့သဖြင့် ကျုံးယန်က အရာအားလုံးကို ဝန်ခံလိုက်ရသည်။

မဟာအကြီးအကဲ၏ ဂိုဏ်းစည်းကမ်း တင်းကျပ်မှုကြောင့် ကျုံးယန်က အမှောင်ထောင်အတွင်း ၁၀ နှစ် ကျခံရန်နှင့် ရာထူးအားလုံး ရုပ်သိမ်းခြင်း ခံလိုက်ရသည်။

ဤရလာဒ်အပေါ် ထန်ထျန်းမှာ ကျေနပ်သည်၊ မကျေနပ်သည် မရှိပေ။

သူက သူ့ ဒေါသကို ဖြေဖျောက်ရုံသာ ဖြစ်သည်။

စီရင်ချက်အပြီးတွင် ထန်ထျန်းက သံသယများမှ ကင်းစင်သွားသလို ကုရှောင်းရွှယ်၏ ဂုဏ်သိက္ခာကိုလည်း ပြန်လည် ဆယ်တင်နိုင်ခဲ့သည်။

ထန်ထျန်း ထွက်သွားရန် ပြင်စဉ်မှာပင် ဟန်ဟိုင်က သူ့ကို လှမ်းခေါ်လိုက်သည်။

"သခင်လေးထန်"

"ခဏလောက် စကားပြောပါရစေ"