လူသားမျိုးနွယ်၏ အိမ်အသစ် သို့မဟုတ် ခေတ်သစ်တစ်ခု...

Vol. 57 Ch. 825

" ဒါဘယ်နေရာလဲ။ " ကြီးမြတ်သူရွှမ်ယွမ်က ပတ်ဝန်းကျင်ကို သတိထား၍ ကြည့်လိုက်ပြီး လင်းယွမ်ကို မြင်မှ စိတ်အေးသွားသည်။

" ဒါက လူသားမျိုးနွယ်ရဲ့ အိမ်အသစ်ပဲ။ " လင်းယွမ်က ကြီးမြတ်သူကိုးယောက်ကို ကြည့်ပြီး ပြုံး၍ ပြောလိုက်သည်။

" အိမ်သစ်... လူသားမျိုးနွယ်ရဲ့ အိမ်အသစ်လား။ "

လူသားမျိုးနွယ်၏ ကြီးမြတ်သူကိုးယောက်က ပတ်ဝန်းကျင်ကို စိတ်ဝင်တစား ကြည့်လိုက်ကြသည်။ ကြယ်မျက်ရည်ကမ္ဘာက ပင်မစကြာဝဠာလောက် မကျယ်သော်လည်း ဤနေရာရှိ နေရာတိုင်းက နေထိုင်ရန် သင့်တော်ပေသည်။ လူသားမျိုးနွယ်၏ လူဦးရေမှာ ဆယ်ဆ သို့မဟုတ် အဆတစ်ရာတိုးလာလျှင်တောင် ထိုနေရာတွင် နေထိုင်နိုင်သေးသည်။

" ဒီကမ္ဘာက ထွက်ပေါ်လာတဲ့ စွမ်းအားက အတော်လေး နူးညံ့တယ်လို့ ငါခံစားရတယ်။ " ကြီးမြတ်သူရှချင်က စဉ်းစားဟန်ဖြင့် ပြောလိုက်သည်။

ထိုစွမ်းအားက အလွှာနှစ်နှင့် အလွှာသုံး အစောပိုင်းအဆင့် ဆင့်ကဲပြောင်းလဲသူများအတွက် အလွန်အကျိုးဖြစ်စေသည်။

" လင်းယွမ် ဒီနေရာက စျေးမနည်းလောက်ဘူးထင်တယ်။ " ကြီးမြတ်သူရှချင်က စိုးရိမ်တကြီး မေးလိုက်သည်။

" ကိစ္စမရှိဘူး။ " လင်းယွမ်က လက်ဝှေ့ရမ်းပြီး ပြောလိုက်သည်။

ထိုအစိတ်အပိုင်းကမ္ဘာကို သူက အလကားနီးပါး ရရှိခဲ့ခြင်းဖြစ်သည်။ လင်းယွမ်က လူသားမျိုးနွယ်ထံမှ ဖရိုဖရဲသလင်းကျောက် ၁.၂သန်း တောင်းဆိုရန် စိတ်ကူးမရှိပေ။ လူသားမျိုးနွယ်၏ ကြီးမြတ်သူကိုးယောက်က လင်းယွမ်မှာ သူ၏ ပိုင်ဆိုင်မှုအားလုံး သုံးစွဲခဲ့သည်ဟု ပို၍ ယုံကြည်သွားခဲ့သည်။

" ငါတို့ အလွှာဆယ့်နှစ် ကိုးယောက်က ဖရိုဖရဲသလင်းကျောက်တွေကို ကြိုးစားပြီး စုဆောင်းသွားရမယ်။ "

သူတို့အားလုံးက အသေးစိတ်ဆွေးနွေးပြီးနောက် လင်းယွမ်၏ အတွင်းစကြာဝဠာထဲမှ လူသားမျိုးနွယ်၏ နိုင်ငံသားများကို ကြယ်မျက်ရည်ကမ္ဘာထဲသို့ စတင်ပြောင်းရွှေ့ပေးလိုက်သည်။

" ဒါက ငါ့တို့ အနာဂတ်မှာ နေထိုင်ရမယ့် နေရာလား။ " အလွှာသုံး ဆင့်ကဲပြောင်းလဲသူတစ်ယောက်က ပတ်ဝန်းကျင်ကို စူးစမ်းလိုစိတ်ဖြင့် ကြည့်လိုက်သည်။

လူသားမျိုးနွယ်၏ နိုင်ငံသားများနှင့် စက်ရုပ်များက ဆင်းသက်လာကြပြီး ပြန်လည်တည်ဆောက်ရေး လုပ်ငန်းများကို စတင်လိုက်ကြသည်။ အထက်တစ်နေရာတွင် လင်းယွမ်နှင့် လူသားမျိုးနွယ်၏ ကြီးမြတ်သူများက ကြယ်မျက်ရည်ကမ္ဘာကို ကြည့်နေကြသည်။

" ဒီနေ့ကစပြီး လူသားမျိုးနွယ်က ဒီကမ္ဘာမှာ အခြေချတော့မယ်။ " ကြီးမြတ်သူကုလီက ပြုံး၍ ပြောလိုက်သည်။

" လူသားမျိုးနွယ်က ဖရိုဖရဲဟင်းလင်းပြင်မှာ ခေတ်သစ်တစ်ခုကို စတင်တော့မယ်။ " ကြီးမြတ်သူရှုချန်က ထပ်လောင်းပြောလိုက်သည်။

အိမ်သစ်၊ ခေတ်သစ်။ လူသားမျိုးနွယ်၏ သမိုင်းကြောင်က အခန်းကဏ္ဍအသစ်တစ်ခုကို စတင်ဝင်ရောက်လာခဲ့ပြီဖြစ်သည်။ နှစ်ပေါင်း ၂.၆သန်း ကြာမြင့်ခဲ့သော ကြယ်ပင်လယ်ခေတ်က နောက်ဆုံးတွင် ခေတ်ဟောင်းတစ်ခုဖြစ်သွားခဲ့သည်။

ဆယ်လအတွင်း ကြယ်မျက်ရည်အစိတ်အပိုင်းကမ္ဘာက လုံးဝ ပြောင်းလဲသွားခဲ့သည်။ နည်းပညာမြင့်မားသော အဆောက်အဦးအမျိုးမျိုး ထွက်ပေါ်လာပြီး VR ကမ္ဘာ ကွန်ရက်ကိုလည်း အပြည့်အဝ ဖန်တီးနိုင်ခဲ့သည်။

လုပ်ငန်းစဉ်တစ်ခုလုံးက အဆင်ပြေချောမွေ့စွာ ပြီးမြောက်သွားခဲ့သည်။ တစ်ချိန်တည်းတွင် လူသားမျိုးနွယ်က ပြည်တွင်းကုန်သွယ်မှုကို ပြန်လည်ထူထောင်ခဲ့ပြီး ကုမင်ဖရိုဖရဲကုန်းမြေနှင့်ပင် ကုန်သွယ်မှုလမ်းကြောင်းကို ချဲ့ထွင်နိုင်ခဲ့သည်။

မရေတွက်နိုင်သော နိုင်ငံသားများအတွက် ကြယ်တာယာကောင်းကင်မရှိသည်မှလွဲ၍ သူတို့၏ ဘဝက ကျယ်ပြောလှသော စကြာဝဠာထဲမှ ဘဝနှင့် ကွာခြားခြင်းမရှိကြပေ။ အမှန်တကယ်တွင် ဤနေရာရှိ ဘဝက ပို၍ပင် ကောင်းမွန်နေသေးသည်။

" ဒါက ငါနေဖို့ ချပေးတဲ့ အိမ်လား။ အရမ်းကျယ်တာပဲ။ ဒါကို အလကားပေးတာလား။ "

" ငါတို့ရဲ့ နေစရာ၊ အလုပ်အကိုင်၊ ဆေးကုသမှုနဲ့ ပညာရေးအားလုံးကို စီမံခန့်ခွဲပေးတယ်။ တကယ်ကို မယုံကြည်နိုင်စရာပဲ။ "

" ဟုတ်တယ်။ အိမ်သစ်ကို တကယ်ပြောင်းရွှေ့ရရင် အစကနေ ပြန်စရမယ်ထင်ပြီး ခက်ခက်ခဲခဲ နေထိုင်ရလိမ့်မယ်လို့ ထင်ခဲ့တာပဲ။ "

မရေတွက်နိုင်သော နိုင်ငံသားများက လျင်မြန်စွာ လိုက်လျောညီထွေဖြစ်သွားကြသည်။ အဓိကအားဖြင့် အခွင့်အရေးများနှင့် လူမှုဖူလုံရေးများက မူလအတိုင်း ရှိနေရုံသာမက ပိုမိုပင်တိုးတက်လာခဲ့သည်။ ထိုထက်ပိုအရေးကြီးသည်မှာ...

" ငါ့သားလေး ခုမှမွေးတာ သူ့မှာ ဆင့်ကဲပြောင်းလဲခြင်းပါရမီပါလာတယ်။ အနာဂတ်ကျရင် သူက ဆင့်ကဲပြောင်းလဲသူတစ်ယောက် ဖြစ်လာလိမ့်မယ်။ "

" ငါ့သမီးလေးလည်း အတူတူပဲ။ "

" မင်းတို့အားလုံးရောလား။ ငါ့မြေးလေးရဲ့ ပါရမီတွေကလည်း တော်တော်လေးကောင်းတယ်။ "

ကြယ်မျက်ရည်အစိတ်အပိုင်းကမ္ဘာက နူးညံ့သော စွမ်းအားများ ကိန်းဝပ်နေပြီး ၎င်းက သက်ရှိများ၏ ဆင့်ကဲပြောင်းလဲခြင်းဖြစ်စဉ်ကို အထောက်အကူဖြစ်စေသည်။

၎င်းက မွေးကင်းစကလေးများ၏ အလားအလာကို မြှင့်တင်ပေးပြီး သက်တမ်းကို တိုးတက်စေသော အကျိုးကျေးဇူးများ ပါဝင်နေသည်။ စကြာဝဠာထဲတွင် နိုင်ငံသားအမြောက်အမြားမှ ဆင့်ကဲပြောင်းလဲခြင်းပါရမီရှင်တစ်ယောက် ထွက်ပေါ်လာနိုင်သော်လည်း ထိုအစိတ်အပိုင်းကမ္ဘာထဲတွင်မူ ထိုပါရမီများကို အဆင့်အမျိုးမျိုးဖြင့် ပိုင်ဆိုင်ထားကြသည်။

အခြေခံဆင့်ကဲပြောင်းလဲသူများ ထွက်ပေါ်လာခြင်းက အလယ်အလတ်နှင့် အဆင့်မြင့် ဆင့်ကဲပြောင်းလဲသူများ ထွက်ပေါ်လာနိုင်ခြေကို တိုးမြှင့်ပေးနိုင်သည်။ ထို့ကြောင့် လူသားမျိုးနွယ်၏ ဖွံ့ဖြိုးတိုးတက်မှုက စကြာဝဠာထဲတွင် ရှိခဲ့စဉ်ကထက် များစွာသာလွန်သွားခဲ့သည်။

လင်းယွမ်က လူသားမျိုးနွယ်ကို အညံ့ခံလာသော အခြားမျိုးနွယ်များအား မည်သို့ကိုင်တွယ်ရမည်ကို ကြီးမြတ်သူကိုးယောက်နှင့် ဆွေးနွေးနေသည်။ စကြာဝဠာပျက်ဆီးခြင်းအောက်တွင် မလွတ်မြောက်နိုင်သော အခြားမျိုးနွယ်များက အသက်ရှင်နိုင်ရန်အတွက် လူသားမျိုးနွယ်ကို အညံ့ခံရန် ရွေးချယ်ခဲ့ကြသည်။

" အဲ့ဒီမျိုးနွယ်ခြားတွေက လူသားမျိုးနွယ်နဲ့ နှစ်ပေါင်းများစွာ တိုက်ခိုက်ခဲ့ကြတာပဲ။ အခု ငါတို့ သူတို့ကို ဘာလုပ်သင့်လဲ။ " ကြီးမြတ်သူရှုချန်က ပြောလိုက်သည်။

" ငါ့အမြင်အရ သူတို့ကို ရောင်းစားလိုက်သင့်တယ်။ ငါမှတ်မိသလောက်ဆို ကုမင်ဖရိုဖရဲကုန်းမြေမှာ သူတို့ကို လိုအပ်တဲ့နေရာတွေ ရှိတယ်မဟုတ်လား။ " ကြီးမြတ်သူကုလီက ပွင့်ပွင့်လင်းလင်း ပြောလိုက်သည်။

သူက ထိုမျိုးနွယ်ခြားများအပေါ် စိတ်စေတနာကောင်းမရှိပေ။ လင်းယွမ်ကြောင့်သာမဟုတ်လျှင် သူတို့ကို ကယ်တင်ရန် စိတ်ကူးပင်ရှိလိမ့်မည်မဟုတ်ပေ။

" သူတို့အားလုံးက အလွှာဆယ့်နှစ်အောက် သက်ရှိတွေပဲ။ ကုန်သည်တွေကို ရောင်းရင်တောင် စျေးကောင်းရမှာမဟုတ်ဘူး။ " ကြီးမြတ်သူယုတိုင်က ပြောလိုက်သည်။

" အဲ့ဒီအစား သူတို့ကို ပျိုးထောင်ပေးပြီး လူသားမျိုးနွယ်အတွက် အကျိုးရှိအောင် လုပ်လို့ရတာပဲ။ ဖရိုဖရဲဟင်းလင်းပြင်မှာ ငါတို့လူသားမျိုးနွယ်က အားနည်းနေတုန်းပဲ။ ဖွံ့ဖြိုးတိုးတက်ဖို့အတွက် အရင်းအမြစ်တွေအားလုံးကို စုစည်းဖို့ လိုအပ်တယ်။ "

စကြာဝဠာအတွင်းရှိ အထွတ်အထိပ်မျိုးနွယ်များက အသုံးချရန် ထိုက်တန်သော အားသာချက်များ ရှိနေကြသည်။ သူတို့က ရင်းနှီးပြီးသား ဖြစ်သောကြောင့် အသုံးချရသည်မှာလည်း အဆင်ပြေကြသည်။

" ဒါပေမယ့် သူတို့ကို ခွဲဝေပေးမယ့် အရင်းအမြစ်တွေကလည်း ကန့်သတ်ချက်ရှိရမယ်။ ဒီမျိုးနွယ်ခြားတွေ အင်အားပြန်ကောင်းလာပြီး အနာဂတ်မှာ ငါတို့ကို တိုက်ခိုက်တာမျိုး မလိုချင်ဘူး။ "

" အင်အားပြန်ကောင်းလာဖို့လား။ လင်းယွမ်ရှိနေရင် သူတို့က ဘာနဲ့ပြန်ပုန်ကန်နိုင်မှာလဲ။ "

" မှန်တယ်။ ဒါပေမယ့် ကန့်သတ်ချက်တွေတော့ လိုနေသေးတယ်။ "

ကြီးမြတ်သူကိုးယောက်က လျင်မြန်စွာပင် သဘောတူညီမှု ရရှိသွားကြသည်။ အစီအစဉ်မှာ ထိုမျိုးနွယ်ခြားများအား အရင်းအမြစ်အချို့ ခွဲဝေပေးပြီး သူတို့၏ ဖွံ့ဖြိုးတိုးတက်မှုကို လူသားမျိုးနွယ်အတွက် အသုံးချရန် ဖြစ်သည်။

ဥပမာ အင်းဆက်မျိုးနွယ်ကို ကြည့်လျှင် သူတို့က လူသားမျိုးနွယ်ကို အပြင်းထန်ဆုံး တိုက်ခိုက်ခဲ့သည့်မျိုးနွယ်ဖြစ်သည်။ သူတို့၏ ဧကရီများက မရေတွက်နိုင်သော အင်းဆက်စစ်သည်များကို မွေးထုတ်ပေးနိုင်ပြီး သူတို့ကို အန္တရာယ်ရှိသော နေရာများသို့ စူးစမ်းရှာဖွေရန် အသုံးပြုနိုင်သည်။

" လင်းယွမ် အလွှာဆယ့်နှစ်တွေကို ဘယ်လိုကိုင်တွယ်မှာလား။ " ကြီးမြတ်သူရွှမ်ယွမ်က လင်းယွမ်ကို သိလိုစိတ်ဖြင့် မေးလိုက်သည်။

" သူတို့လား..." လင်းယွမ်က ပြုံးလိုက်သည်။ " သူတို့အားလုံးကို တားမြစ်ချက်တွေနဲ့ ချုပ်နှောင်ပြီးသားပဲ။ သူတို့ကို နောက်မှပဲစီစဉ်ကြတာပေါ့။ "

ထိုအလွှာဆယ့်နှစ် မျိုးနွယ်ခြားများကို ခေါ်ထုတ်ခဲ့ခြင်းမှာ လင်းယွမ်က အလျင်စလို ဆုံးဖြတ်ခဲ့ခြင်းဖြစ်သည်။ သူတို့ကို ခေါ်ဆောင်လာခြင်းက သူနှင့်ပက်သက်သော သတင်းအချက်အလက်များ ပေါက်ကြားခြင်းမှ တားဆီးနိုင်သည်။

လင်းယွမ်၏ အတွင်းစကြာဝဠာ ကြီးထွားနှုန်းမှာ ဖရိုဖရဲဟင်းလင်းပြင်၏ စံနှုန်းများဖြင့် ကြည့်လျှင်တောင် အံ့အားသင့်ဖွယ်ကောင်းလှသည်။ သူတို့က ထိုအကြောင်းများကို သိရှိထားကြသဖြင့် သူတို့ကို လွှတ်ပေးလိုက်ခြင်းက သူ့အတွက် အန္တရာယ်ရှိနိုင်သည်။

" ဒါနဲ့ ကုမင်ဖရိုဖရဲကုန်းမြေမှာ အလွှာဆယ့်နှစ် ဆင့်ကဲပြောင်းလဲခြင်းလမ်းစဉ်တွေကို ရောင်းဝယ်တဲ့ နေရာတစ်ခုလို့ မင်းပြောခဲ့တာငါမှတ်မိတယ်။ " ကြီးမြတ်သူရွှမ်ယွမ်က ပြုံး၍ ပြောလိုက်သည်။

" ဟုတ်ပါတယ်။ " လင်းယွမ်က ခေါင်းညိမ့်ပြီး ပြောလိုက်သည်။

လမ်းစဉ်တစ်သောင်းခန်းမက အလွှာဆယ့်နှစ် ဆင့်ကဲပြောင်းလဲခြင်းလမ်းစဉ်များကို ရောင်းချပေးပြီး ထိုလမ်းစဉ်များတွင်လည်း အလွှာဆယ့်နှစ် ကြီးမြတ်သူများမရှိကြောင်း အာမခံထားသည်။

" ငါတို့ အလွှာဆယ့်နှစ် ဆင့်ကဲပြောင်းလဲခြင်းလမ်းစဉ်အချို့ ဝယ်ယူဖို့ စီစဉ်ထားတယ်။ " ကြီးမြတ်သူရွှမ်ယွမ်နှင့် အခြားသူများက သူတို့၏ အစီအစဉ်များကို ထုတ်ပြောလိုက်ကြသည်။

" အလွှာဆယ့်နှစ် ဆင့်ကဲပြောင်းလဲခြင်းလမ်းစဉ်တွေကို ဝယ်မလို့လား။ " လင်းယွမ်က အကြောင်းရင်းကို ခန့်မှန်းကြည့်လိုက်သည်။

ဖရိုဖရဲဟင်းလင်းပြင်သို့ ဝင်ရောက်လာကြသော လူသားမျိုးနွယ်မှ ဆင့်ကဲပြောင်းလဲသူများက သူတို့၏ အသက်အနှစ်သာရကို ဖရိုဖရဲဟင်းလင်းပြင်၏ အချိန်မြစ်ထဲသို့ လွှဲပြောင်းနေကြပြီဖြစ်သည်။ ပတ်ဝန်းကျင်မှ ကန့်သတ်ချက်က မြင့်မားလာပြီဖြစ်သောကြောင့် အလွှာဆယ့်တစ် ဆင့်ကဲပြောင်းလဲသူများက အလွှာဆယ့်နှစ်သို့ တက်လှမ်းရန်အတွက် ပြင်ဆင်နေကြပြီဖြစ်သည်။