ဆန္ဒပြည့်ဝ!

Vol. 80 Ch. 1199

လွန်ခဲ့သော ၂ နှစ်အတွင်း ပြည်တွင်းမှာအများကြီးဖြစ်ပျက်ခဲ့ပြီး ပြည်သူများ၏လူမှုဘဝအပေါ်သက်ရောက်မှုကြီးမားခဲ့သည်။

တစ်ခုက ချင်းလင်ဆော့၊ ဆော့ချစ်သူတိုင်းကြိုက်ကြသည်။

အစကနိုင်ငံခြားဆော့ဘရန်းနှစ်မျိုးကိုရွေးချယ်ကြသူများမှာ အခုချင်းလင်ဆော့ကိုရွေးချယ်ကြသည်။

ချင်းလင်အားဖြည့်လက်ဖက်ရည်ထွက်လာခြင်းက အားဖြည့်အချိုရည်ပြောင်းသောက်ကြရုံသာမက သူတို့လုပ်ငန်းခွင်အပေါ်လည်းသက်ရောက်မှုရှိသည်။

အနည်းဆုံးတော့ နေ့တိုင်းအလုပ်ဆင်းရင် သေလောက်အောင်မပန်းတော့။ တစ်ခါတလေ အချိန်ပိုဆင်းရရင်တောင် အိမ်သူကိုအင်အားပေးနိုင်သေးသည်။

အခုအလုပ်လုပ်ဖို့အင်အားရှိသည့်အပြင် ချင်းလင်လက်ဖက်ရည်လည်းရှိသောကြောင့် အားအမြန်ပြန်ပြည့်နိုင်သည်။ ညပိုင်း သုံးလေးကြိမ်ရသည်။

ကိုလာက ဆိုဒါကိုလည်းလုံးဝအစားထိုးလိုက်သည်။

အခု ကာဗွန်ပါသောဖျော်ရည်များကိုစိတ်ချချသောက်နိုင်ပြီ။ တဖက်တွင် အားဖြည့်အချိုရည်လည်းရှိသည်။

အမူးပြေမြက်ကလည်း အရက်မူးပြီးမောင်းခြင်းနှင့်မတော်တဆဖြစ်ရပ်များကိုလျှော့ချပေးနိုင်သည်။

ထက်မြက်သောဇနီးသည်က ယောက်ျားဖြစ်သူအပြင်မသွားခင် အမူးပြေမြက်နှစ်ထုပ်လောက်ပြင်ထားပေးလိမ့်မည်။

နောက်ပြီး အတွေ့အကြုံရှိသောအမျိုးသားက အမျိုးသမီးတစ်ဦးအိတ်ထဲတွင်အမူးပြေမြက်တွေ့ရင် အရက်သောက်တတ်သူ၊အရက်ကြိုက်သူမှန်းတန်းသိနိုင်သည်။

ဒါဆို လွယ်သွားပြီ။

အတော်များများဘဝကိုကယ်တင်ပေးနိုင်သောရေပူစမ်းဆေးမှုန့်လည်းရှိသည်။

မျက်စိကြည်ဂျင်ဆင်းရောပင်။ ပြည်တွင်းအနီးမှုန်အရေအတွက်ကိုလျင်မြန်စွာကျဆင်းစေပြီး မဝေးသောအနာဂတ်တွင် လုံးဝပပျောက်သွားမည့်ပုံရှိသည်။

မိုဘိုင်းနှင့်ကွန်ပျူတာသုံးနေရသူများ မနားတမ်းကြည့်နိုင်မည့်ပစ္စည်းကောင်းဖြစ်သည်။

ကိုယ့်ခွေးနှင့်ပြိုင်လုစားရလောက်သောခွေးစာလည်းရှိသည်။

ခွေးစာက လူစားတဲ့မုန့်ထက်ပိုကောင်းမယ်လို့ ဘယ်သူထင်မလဲ?

လူစားဖို့လည်း အသစ်ထွက်သည်။

ထုပ်ပိုးမှုပုံစံသာပြောင်းထားပြီး ခွေးစာနှင့်မခြားဟု အတော်များများကထင်ကြသည်။

ဒါပေမဲ့ ကိစ္စမရှိ။ အနည်းဆုံးတော့ ခွေးနှင့်ပြိုင်ပြီး ခွေးစာလုစားစရာမလိုတော့။

အူလမ်းကြောင်းဆေးမှုန့်ကလည်း အူလမ်းကြောင်းရောဂါများနှင့်အူမကြီးကင်ဆာကြောင့် ဒုက္ခပင်လယ်ဝေနေသူများကိုကယ်တင်နိုင်သည်။

တစ်ကမ္ဘာလုံး ပလိပ်ရောဂါမလွတ်သေးချိန် ပြည်တွင်းမှာကခုန်နေနိုင်ပြီ။

သွေးခဲပလိပ်ရောဂါဖြစ်တာ ကြာခဲ့သလိုပင်။

သန့်စင်မြက်ကိုလည်း မေ့ထားလို့မရ။

သန့်စင်မြက်နှင့် မြို့တော်ကိုပြောင်းလဲနိုင်ခဲ့သည်။

ကြောက်စရာလေအရည်အသွေးနှင့်မြို့တော်က အခုလတ်ဆတ်ပြီး အရင်ထက်ပိုကောင်းလာပြီ။

တခြားမြို့များမှာ သန့်စင်မြက်အမြန်ဆုံးရရေးစောင့်မျှော်နေကြသည်။

ဒီပစ္စည်းက အားလုံးလူနေမှုဘဝအပေါ်သက်ရောက်မှုရှိသည်။ အထူးသဖြင့် နိုင်ငံခြားကဓာတ်မခွဲနိုင်။ နိုင်ငံခြားကုမ္ပဏီများ ကိုယ်စားလှယ်လုပ်ခွင့်လည်းမရှိပေ။

ရလဒ်အနေနှင့် ပြည်တွင်းထုတ်ကုန်များအရမ်းကောင်းသည်ဟု အားလုံးသဘောပေါက်သွားပုံရသည်။ ပြန်တွေးကြည့်မှ အားလုံးက ချင်းလင်ကုမ္ပဏီထုတ်ကုန်ချည်း။

အမှန်ပင်၊ ချင်းလင်ကုမ္ပဏီထုတ်ကုန်များက အားလုံးလူနေမှုဘဝအပေါ် သက်ရောက်မှုကြီးမားသည်။

အဓိကက ချင်းလင်ကုမ္ပဏီထုတ်ကုန်အများစုမှာ အံ့ဩဖို့ကောင်းခြင်းပင်။

အံ့ဩစရာကောင်းလွန်းသောကြောင့်လည်း အနောက်နိုင်ငံများက ရယူဖို့ကြိုးစားနေကြသည်။

ထိုအထဲတွင် အမေရိကန်တွေအလောဆုံးဖြစ်သည်။

သန့်စင်မြက်ရရေး အမေရိကန်ကအကွက်အမျိုးမျိုးရွှေ့သော်လည်း လူတစ်ယောက်ကိုလျှော့တွက်မိသောကြောင့်မအောင်မြင်ခဲ့။

သို့ရာတွင် အမေရိကန်က လုံးဝလက်မလျှော့။ အမေရိကန်လူချမ်းသာများအတွက် အူလမ်းကြောင်းဆေးမှုန့်က အဓိကကျပြီး ဒုတိယအဆင့်ဦးစားပေးလည်းဖြစ်သည်။

သန့်စင်မြက်ကိုပစ်မှတ်ထားရာ လုံးဝမအောင်မြင်ခဲ့။

အူလမ်းကြောင်းဆေးမှုန့်က သန့်စင်မြက်လောက်အရေးမကြီး။

တစ်ခါအောင်မြင်ရင် ရှေ့လျှောက်သန့်စင်မြက်ရဖို့လွယ်သွားပြီ။ တစ်ကြိမ်ညှိနှိုင်းလို့ရရင် ဒုတိယအကြိမ်ညှိနှိုင်းနိုင်မှာပဲမလား?

ဒီတော့ အူလမ်းကြောင်းဆေးမှုန့်ရဖို့ HKR လိုပစ္စည်းမျိုးထုတ်သုံးရမည်။

ဒီကိစ္စတာဝန်ခံမှာ အမေရိကန်သား Adoxi ဖြစ်ပြီး သူ့နောက်တွင် အရင်းရှင်တချို့ရှိသည်။ ချင်းလင်ကုမ္ပဏီက ဒီပစ္စည်းရအောင်ယူနိုင်ရင် အရင်းရှင်တွေကိုသူ့ကိုပိုထောက်ပံ့ပေးကြမည်။

Adoxi က ပါးနပ်သူပင်။

အရင်လူတွေလို သန့်စင်မြက်ကိုအရင်မျက်စိမကျဘဲ အောင်မြင်ဖို့ပိုဖြစ်နိုင်သောအူလမ်းကြောင်းဆေးမှုန့်ကိုမျက်စိကျနေသည်။

ဒီအကြောင်း အရှေ့တိုင်းကလူတွေနှင့် Adoxi ဆွေးနွေးတာ ပထမဆုံးအကြိမ်မဟုတ်။

အကြိမ်ကြိမ်ဆွေးနွေးပြီးနောက် ဆေးကိုလက်ခံကာ စမ်းသပ်ပြီးရင်အကြောင်းပြန်မည်ဖြစ်ကြောင်း ကတိရလာသည်။

ဒါသူ့အတွက် သတင်းကောင်းပင်။

တဖက်ကလက်ခံမည်ဟုလည်း သူသိထားသည်။

HKR ဆေးမှာ ပျက်စီးနေသောဆဲလ်ပြန်ကောင်းစေသောကြောင့် ဆေးသုတေသနတစ်ဆင့်မြင့်သည်။

အရှေ့တိုင်းက ဒီအပိုင်းမှာ သုတေသနရလဒ်မရှိသေးသလို ဘာထုတ်ကုန်မှမရှိသောကြောင့် ဒီအခွင့်အရေးကိုလက်လွှတ်ခံမည်မဟုတ်။

သူတို့ဘာသာ ဒီလိုနည်းပညာမျိုးဖွံ့ဖြိုးအောင်လုပ်ဖို့ အနည်းဆုံးနှစ် ၂၀ ကြာလိမ့်မည်။

ဒီတော့ သူတို့ပြောင်းလဲရမည်။

နောက်ပြီး ဆိုခဲ့သည့်အတိုင်း တစ်ကြိမ်ညှိနှိုင်းလို့ရရင် ဒုတိယအကြိမ်ညှိနှိုင်းရလွယ်သွားပြီ။

နောက်ထပ်ပစ်မှတ်က သန့်စင်မြက်ပင်။

ဒါ နောက်တစ်လှမ်းပြန်ဆုတ်ရခြင်းအကြောင်းရင်းဖြစ်သည်။

သူတွေးတောနေစဉ် ဆံပင်ရွှေအိုရောင်နှင့်အမျိုးသမီးတစ်ဦးခပ်သုတ်သုတ်ရောက်လာပြီး_

"မစ္စတာ Adoxi.. သူတို့ပြန်ဖြေထားပြီ''

"အစည်းအဝေးဘယ်တော့လဲ?''

Adoxi က တန်းမေးသည်။

အခုပြန်ဖြေပြီဆိုတော့ နောက်ဆက်လုပ်ရမှာက အူလမ်းကြောင်းဆေးမှုန့်နဲ့လဲဖို့စဉ်းစားရမည်။

ဆံပင်ရွှေအိုရောင်၊မျက်လုံးပြာပြာနှင့်အမျိုးသမီးက မျက်နှာပျက်သွားပြီး_

"မစ္စတာ Adoxi.. သူတို့က ဆက်ပြီးဆွေးနွေးဖို့ငြင်းလိုက်တာ... ကျွန်မတို့နည်းပညာကိုမလိုတော့ဘူးလို့လည်းပြောတယ်''