နတ်ဘုရားကမ္ဘာ

"ဒေါင်ကွမ်တပည့်တစ်ယောက်လား။"

ရောက်ရှိနေသူအားလုံး အံ့အားသင့်သွားကြသည်။

သူတို့၏ အထင်တွင် ဝူရွှမ်းတာအိုသခင်မ ရွေးချယ်မည့် တာအိုလက်တွဲဖော်သည် ကျိန်းသေပေါက် ထူးခြားသောနောက်ခံရှိပြီး ပါရမီထူးကဲသူတစ်ဦး ဖြစ်လိမ့်မည်ဟု ထင်မှတ်ထားခဲ့သည်။ သို့သော် ဒေါင်ကွမ် (တာအိုရိပ်သာ) တပည့်တစ်ဦး ဖြစ်နေမည်ဟု မည်သူက ထင်မည်နည်း။

ထျန်းနတ်ဘုရားအဆင့်ဖြစ်နေသော်လည်း ဤနေရာတွင် ရောက်ရှိနေသော အစွမ်းထက်ပုဂ္ဂိုလ်များအတွက်မူ ထျန်းနတ်ဘုရားအဆင့်သည် သာမန်မျှသာဖြစ်ပြီး ထူးချွန်သည်ဟု မဆိုနိုင်ပေ။

သို့သော် ဝူရွှမ်းတာအိုသခင်မ ရွေးချယ်သော လက်တွဲဖော်ဖြစ်သည့်အတွက် သူတို့ ဘာမှဝင်မပြောသာပေ။

ထို့နောက် တာအိုလက်တွဲဖော် ပေါင်းဖက်ခြင်း အခမ်းအနားကို အစီအစဉ်အတိုင်း ဆက်လက်ကျင်းပလေသည်။

နောက်ဆုံးတွင် လီချန်နှင့် ဝူရွှမ်းတာအိုသခင်မတို့သည် နန်းဆောင်ကြီးအတွင်းရှိ ထိုင်ခုံများတွင် ဘေးချင်းယှဉ်လျက် ထိုင်နေကြပြီး ဝူရွှမ်းတာအိုနန်းတော်၏တပည့်များက ဒူးထောက်အရိုအသေပြုကြသည်။

တပည့်များထဲတွင် နန်ရှီသည် အံ့အားသင့်မှုမှ သတိမဝင်နိုင်သေးဘဲ ဆရာတူအစ်ကို၊ အစ်မများနှင့်အတူ လိုက်ပါရင်း ထိုင်ခုံပေါ်တွင် ထိုင်နေသော အဖြူရောင်ဝတ်စုံနှင့် လီချန်ကို ကြည့်ကာ... စီနီယာအစ်ကိုဘဝမှ ဆရာကြီးဘဝသို့ မည်သို့ရုတ်တရက် ပြောင်းလဲသွားသည်ကို စဉ်းစားမရ ဖြစ်နေသည်။

ဤသို့ဖြင့် ယွီဟွာနတ်ဘုရားဂိုဏ်း၏ အထက်ပိုင်းခေါင်းဆောင်များ ရှေ့မှောက်တွင် လီချန်နှင့် ဝူရွှမ်းတာအိုသခင်မတို့သည် တရားဝင် တာအိုလက်တွဲဖော်များ ဖြစ်သွားကြသည်။

အခမ်းအနားပြီးဆုံးပြီးနောက် ဧည့်သည်များ ပြန်လည်ထွက်ခွာသွားကြသည်။

......

ဘေးနန်းဆောင်တစ်ခုတွင်။

"ဆရာ၊ ကြိုမပြောခဲ့မိတာ ခွင့်လွှတ်ပေးပါ။"

လီချန်က ထိုင်နေသော ထျန်းလန်အရှင်သခင်ကို ပြောလိုက်သည်။

"လီချန်၊ မင်း ဒီတစ်ခါ ဆရာ့ကို တကယ် အံ့သြစေတာပဲ။ ပြောပါဦး၊ ဘယ်တုန်းက ဝူရွှမ်းတာအိုသခင်မနဲ့ ငြိသွားတာလဲ။"

ထျန်းလန်အရှင်သခင်၏ရင်ထဲတွင် မေးခွန်းပေါင်းများစွာ ပြည့်နှက်နေပြီး ယခုမှ မေးမြန်းခွင့်ရတော့သည်။

"ဆရာ... သိပ်မကြာသေးပါဘူး။ လပိုင်းလောက်ပဲ ရှိပါသေးတယ်။"

လီချန် ပြောလိုက်သည်။

"လပိုင်းလောက်ပဲ ရှိသေးတယ် ဟုတ်လား။"

ထျန်းလန်အရှင်သခင်က လီချန်ကို တစ်ချက်ကြည့်လိုက်သည်။ ဒါ အမှန်တရားမဟုတ်ကြောင်း ခံစားမိသော်လည်း ဆက်မမေးတော့ပေ။ သူသည် အတင်းအဖျင်း မေးရသည်ကို နှစ်သက်သူ မဟုတ်ပေ။

သို့သော် သူ့တပည့်ကို လေးစားမိသည်။ ဝူရွှမ်းတာအိုသခင်မ၏တာအိုလက်တွဲဖော် ဖြစ်သွားခြင်းဖြင့် နှစ်ပေါင်းများစွာ လျှောက်ရမည့် ခရီးကြမ်းကို ဖြတ်ကျော်နိုင်ခဲ့ပြီ မဟုတ်လား။

လီချန်၏ ကျင့်ကြံမှု အဘယ်ကြောင့် ဤမျှလျင်မြန်စွာ တိုးတက်လာရသည်ကို သူ ရုတ်တရက် နားလည်သွားသည်။ ဝူရွှမ်းတာအိုသခင်မနှင့် သေချာပေါက် ပတ်သက်နေမည်။

ဝူရွှမ်းတာအိုသခင်မ ပေးအပ်သော ကျင့်ကြံခြင်းအရင်းအမြစ်များ ရှိမှသာ လီချန် ဤမျှမြန်မြန် ကျင့်ကြံနိုင်ခြင်းဖြစ်သည်။

မဟုတ်လျှင် ပါရမီမည်မျှကောင်းစေကာမူ လုံလောက်သော အရင်းအမြစ်မရှိဘဲ ဤမျှမြန်ဆန်ရန် မဖြစ်နိုင်ပေ။

ထျန်းလန်အရှင်သခင်၏ မျက်နှာအမူအရာကို ကြည့်ပြီး ဆရာ့၏ အတွေးကို လီချန် နားလည်လိုက်သည်။ ဆရာသခင်၏စိတ်ထဲတွင် သူသည် 'ထမင်းပျော့စားသူ' (မိန်းမအားကိုးသူ) လုပ်နေသည်ဟု ထင်နေလောက်သည်။

ဆရာသခင်တစ်ဦးတည်းသာ မကဘဲ ယွီဟွာနတ်ဘုရားဂိုဏ်းတစ်ခုလုံးကလည်း ထိုသို့ပင် ထင်ကြပေလိမ့်မည်။

ဘုရားကတော့သိတယ်၊ သူ တကယ် 'ထမင်းပျော့' မစားပါဘူး။

သူ့၏ လက်ရှိကျင့်ကြံမှုအဆင့်အားလုံးသည် ကိုယ်ပိုင်ကြိုးစားအားထုတ်မှုဖြင့် ရရှိလာခြင်းဖြစ်သည်။

"လီချန်၊ ဒါဆို မင်း လော်ယွမ်းတာအိုရိပ်သာကို ပြန်လာဦးမှာလား။"

ထျန်းလန်အရှင်သခင် မေးလိုက်သည်။

"ပြန်လာမှာပေါ့ ဆရာ။"

လီချန် ပြုံးလိုက်သည်၊ "ကျွန်တော် ဝူရွှမ်းတာအိုသခင်မနဲ့ တာအိုလက်တွဲဖော် ဖြစ်သွားပေမယ့် လော်ယွမ်းတာအိုရိပ်သာရဲ့တပည့် ဖြစ်နေတုန်းပါပဲ။"

သူသည် ဝူရွှမ်းတာအိုသခင်မနှင့် အတူနေရန် အစီအစဉ် မရှိပေ။

ဝူရွှမ်းတာအိုနန်းတော်အတွင်းရှိ ဝူရွှမ်းတာအိုသခင်မ၏ တံခါးပိတ်ကျင့်ကြံရာ နန်းဆောင်ထဲတွင် နေရာရွှေ့ပြောင်းခြင်းအစီအရင်တစ်ခု တပ်ဆင်ထားပြီးဖြစ်သည်။ ထိုအစီအရင်မှတစ်ဆင့် ဝူရွှမ်းတာအိုသခင်မသည် အချိန်ခေါင်းလောင်းလှိုဏ်ဂူကောင်းကင်ဘုံထဲသို့ ဝင်ရောက်နိုင်သည်။

ဝူရွှမ်းတာအိုသခင်မမှလွဲ၍ အခြားမည်သူမျှ နေရာရွှေ့ပြောင်းခြင်းအစီအရင်ကို အသုံးပြုခွင့် မရှိပေ။

"မင်း ဝူရွှမ်းတာအိုနန်းတော်မှာ မနေဘူးလား။"

ထျန်းလန်အရှင်သခင် အံ့အားသင့်သွားသည်။

လီချန် ခေါင်းခါလိုက်သည်။

.....

ထျန်းလန်အရှင်သခင် ထွက်ခွာသွားပြီးနောက် လီချန်သည် ဝူရွှမ်းတာအိုသခင်မ၏အိပ်ဆောင်သို့ ပြန်လာခဲ့သည်။

"လီချန်... ရှင် ဒီမှာ မနေဘူးဆိုတာ သေချာလား။"

ဝူရွှမ်းတာအိုသခင်မက မေးလိုက်သည်။

"မနေတော့ဘူး။"

လီချန် ခေါင်းခါလိုက်သည်။

သူ တကယ် 'ထမင်းပျော့' စားနေတာမှ မဟုတ်တာ။

ထို့နောက် သူသည် သိုလှောင်ပစ္စည်းထဲမှ ကျောက်စိမ်းပြားတစ်ခုကို ထုတ်ယူကာ ဝူရွှမ်းတာအိုသခင်မအား ပေးလိုက်သည်၊ "ဒီစာရင်းထဲက လူတွေကို လျှောက်ထားပေးပါဦး။"

ဝူရွှမ်းတာအိုသခင်မသည် ကျောက်စိမ်းပြားကိုယူပြီး စစ်ဆေးကြည့်ရာ အံ့အားသင့်သွားသည်၊ "ဒါတွေအားလုံး အောက်ဘုံက ရှင့်တပည့်တွေလား။"

"ဟုတ်တယ်။"

လီချန် ခေါင်းညိတ်လိုက်သည်၊ "ခင်ဗျားရဲ့ ဝူရွှမ်းတာအိုနန်းတော်မှာ တပည့်အရေအတွက် သိပ်မရှိဘူးဆိုတော့ ကျွန်တော့်တပည့်တွေ ဝင်လာရင် လူအင်အား ဖြည့်တင်းပြီးသားဖြစ်သွားတာပေါ့။"

"ကောင်းသားပဲ။ ပြင်ပက လူတွေကိုခေါ်ယူရတာ ကျွန်မ သိပ်စိတ်မချဘူး။"

ဝူရွှမ်း ခေါင်းညိတ်လိုက်သည်။

ယခုတစ်ကြိမ် ယွီဟွာနတ်ဘုရားဂိုဏ်း၏ လူသစ်စုဆောင်းမှုတွင် ဝူရွှမ်းတာအိုနန်းတော်သည် တပည့်အသစ်များကို သေချာပေါက် လက်ခံရမည်ဖြစ်သည်။ ထျန်းရှူးတာအိုနန်းတော်ဘက်မှ ဝူရွှမ်းတာအိုသခင်မနှင့် လုံးဝ လမ်းခွဲထားပြီဖြစ်ရာ သေချာပေါက်ခြေထိုးမှုများ လုပ်ဆောင်လာနိုင်သည်။

ဝူရွှမ်းတာအိုနန်းတော်သည် ယွီဟွာနတ်ဘုရားဂိုဏ်း၏ တာအိုနန်းတော်ကြီး ရှစ်ခုထဲမှ တစ်ခုဖြစ်ပြီး အဆင့်အတန်းမြင့်မားသဖြင့် နတ်ဘုရားဓားဂိုဏ်းမှ လူများကို လက်ခံရန် အပြည့်အဝစွမ်းဆောင်နိုင်သည်။

လော်ယွမ်းတာအိုရိပ်သာကမူ မတူညီပေ။ တပည့် ဒါဇင်ပေါင်းများစွာကို တစ်ကြိမ်တည်း လက်ခံရန်မှာ မဖြစ်နိုင်ပေ။

......

ထျန်းလန်အရှင်သခင် လော်ယွမ်းတာအိုရိပ်သာသို့ ပြန်ရောက်သောအခါ။

"ဆရာတူအစ်ကိုကြီး၊ ဝူရွှမ်းတာအိုသခင်မ ရွေးချယ်လိုက်တဲ့ တာအိုလက်တွဲဖော်က ဘယ်သူလဲ။"

ထျန်းမင်သည် အတင်းအဖျင်း စိတ်ဝင်စားသူဖြစ်ပြီး ထျန်းလန်အရှင်သခင် ပြန်ရောက်လာသည်ကို မြင်သောအခါ မေးလိုက်သည်။

အခြား ဆရာတူညီလေး ဟယ်ခွန်းနှင့် တပည့်အချို့လည်း ရောက်ရှိနေကြသည်။

ဤကာလအတွင်း ဝူရွှမ်းတာအိုသခင်မ၏ တာအိုလက်တွဲဖော် ရွေးချယ်မှုသည် ယွီဟွာနတ်ဘုရားဂိုဏ်း၏ ရေပန်းအစားဆုံး ခေါင်းစဉ်ဖြစ်ခဲ့သည်။

ကွယ်ရာတွင် လူမည်မျှ ခန့်မှန်းနေကြသည်မသိ။

"လီချန်။"

ထျန်းလန်အရှင်သခင် ဖြေလိုက်သည်။

"ဘာ..."

ဟယ်ခွန်း သံသယဖြင့် မေးလိုက်သည်၊ "ဘယ်လီချန်လဲ။"

"ငါ ပြောတာက လီချန်လို့။"

ထျန်းလန်အရှင်သခင် ပြုံးလိုက်သည်။

"ဆရာတူအစ်ကိုကြီး... နောက်မနေပါနဲ့။ တူလေးလီချန်က ပါရမီထူးကဲပြီး ဆယ်စုနှစ်အနည်းငယ်အတွင်း ထျန်းနတ်ဘုရားဖြစ်လာပေမယ့် ဝူရွှမ်းတာအိုသခင်မရဲ့ တာအိုလက်တွဲဖော်ဖြစ်ဖို့တော့ မဖြစ်နိုင်ပါဘူး။ ပြီးတော့ တူလေးလီချန်သာ တကယ်ဖြစ်ရင် ကျွန်တော်တို့ ကြိုမသိဘဲ နေမလား။"

ထျန်းမင်က ပြောလိုက်သည်။

"ငါတောင် မသိခဲ့ဘူး။ အခမ်းအနားမှာ လီချန်ကို တွေ့မှ ငါယုံတာ။"

ထျန်းလန်အရှင်သခင် ခေါင်းခါလိုက်သည်။ အခုထိ အိပ်မက်မက်နေသလို ခံစားနေရတုန်းပင်။

သူ့တိုက်ရိုက်တပည့်က ဝူရွှမ်းတာအိုသခင်မ၏ တာအိုလက်တွဲဖော် ဖြစ်သွားပြီတဲ့လား။

"ဆရာ၊ ဆရာတူညီလေးက တကယ်ပဲ ဝူရွှမ်းတာအိုသခင်မရဲ့ တာအိုလက်တွဲဖော် ဖြစ်သွားတာလား။"

ဘေးတွင် ရပ်နေသော ရှောင်းဟယ် မနေနိုင်ဘဲ မေးလိုက်သည်။

"သူပြန်လာရင် မင်းတို့ဘာသာမင်းတို့ မေးကြည့်ကြ။"

ထျန်းလန်အရှင်သခင် လက်ကာပြလိုက်သည်။

"ဒါက..."

လူအားလုံး တစ်ယောက်မျက်နှာ တစ်ယောက်ကြည့်နေကြသည်။ ထျန်းလန်အရှင်သခင်က နောက်နေပုံ မရပေ။

လီချန်က တကယ်ပဲ ဝူရွှမ်းတာအိုသခင်မရဲ့တာအိုလက်တွဲဖော် ဖြစ်သွားတာလား။

........

လီချန် လော်ယွမ်းတာအိုရိပ်သာသို့ ပြန်ရောက်သောအခါ ချက်ချင်းပင် ဂိုဏ်းသားများ ဝိုင်းရံမေးမြန်းခြင်းကို ခံရသည်။

လီချန် ဝန်ခံလိုက်မှသာ သူတို့ ယုံကြည်သွားကြသည်။

"ဆရာတူညီလေး၊ ငါလည်း မကြိုးစားချင်တော့ဘူးကွာ။"

တတိယဆရာတူအစ်ကို ချန်ယွီက အားကျစိတ်ဖြင့် ပြောလိုက်သည်။

လူအုပ်ကြီးကို မနည်းရှင်းထုတ်ပြီးနောက် လီချန်သည် ဂူစံအိမ်သို့ ပြန်ရောက်လာသည်။

သူ အနည်းငယ် စိတ်ပင်ပန်းနေသည်။

လူရှေ့သူရှေ့ ထွက်ရတာကို သူ သိပ်မကြိုက်မှန်း သိသာနေသည်။

လီချန်သည် အစီအရင်ကို ဖွင့်ပြီးနောက် အချိန်ခေါင်းလောင်းလှိုဏ်ဂူကောင်းကင်ဘုံထဲသို့ ဝင်ရောက်သွားပြီး နတ်ဝိညာဉ်ဆေးပင်များကို ပြုစုပျိုးထောင်လိုက်သည်။

အဆင့်တက်ပြောင်းလဲနေသော ကျောက်စိမ်းနတ်ဘုရားဝိညာဉ်ဂျင်ဆင်း ဒါဇင်ပေါင်းများစွာကို ကြည့်ပြီး သူ ပြုံးလိုက်မိသည်။

ဆိုလိုသည်မှာ သူသည် ကျောက်စိမ်းနတ်ဘုရားဝိညာဉ်ဂျင်ဆင်းများကို တည်ငြိမ်စွာ စိုက်ပျိုးထုတ်လုပ်နိုင်ပြီဖြစ်သည်။

ထို့ပြင် သူ၏စိုက်ပျိုးမှုအောင်မြင်နှုန်းသည် အလွန်မြင့်မားသည်။

သူ၏ ဝိညာဉ်ဆေးပင်စိုက်ပျိုးသူအဆင့်ကြောင့်သာမက အချိန်ခေါင်းလောင်းကြောင့်လည်း ပါဝင်သည်။

သူ အချိန်ရတိုင်း အချိန်ခေါင်းလောင်းကို ထိုးလေ့ရှိပြီး ခေါင်းလောင်းသံဖြင့် နတ်ဝိညာဉ်ဆေးပင်များ၏ ကြီးထွားမှုကို အားပေးကူညီသည်။

အကျိုးသက်ရောက်မှု အလွန်ကောင်းမွန်သည်။

အခြားအမျိုးအစား နတ်ဝိညာဉ်ဆေးပင်များတွင်လည်း နတ်ဝိညာဉ်ဆေးပင်အဖြစ် ပြောင်းလဲနေသော အပင်အချို့ ရှိနေသည်။

ဤနတ်ဝိညာဉ်ဆေးပင်များ၏အဆင့်တက်ခြင်းနိယာမကို သူ နားလည်သွားပါက သက်ဆိုင်ရာ နတ်ဝိညာဉ်ဆေးပင်များကို တည်ငြိမ်စွာ စိုက်ပျိုးနိုင်မည်ဖြစ်သည်။

ဒေါင်...

ခေါင်းလောင်းသံ တစ်ချက် ထွက်ပေါ်လာသည်။

လီချန်သည် ခေါင်းလောင်းသံများကြားတွင် ရေချိုးသန့်စင်နေသည်။

သူသည် အချိန်ခေါင်းလောင်းအောက်တွင် တင်ပျဉ်ခွေထိုင်ကာ ဓားတာအိုအငွေ့အသက်ကို စတင်ဆင်ခြင်သုံးသပ်လိုက်သည်။

....

တစ်ချိန်တည်းမှာပင် အချိန်ခေါင်းလောင်းလှိုဏ်ဂူကောင်းကင်ဘုံ၏ အခြားတစ်ဖက်၊ သီးသန့်ခွဲခြားထားသော နေရာလွတ်တစ်ခုတွင် ဝူရွှမ်းတာအိုသခင်မသည်လည်း နေရာရွှေ့ပြောင်းခြင်းအစီအရင်မှတစ်ဆင့် ဝင်ရောက်လာသည်။

ရုတ်တရက် သူမ၏ခန္ဓာကိုယ် အနည်းငယ် တုန်ခါသွားပြီး မမြင်ရသော ခေါင်းလောင်းသံတစ်ခု သူမ၏ စိတ်ထဲတွင် မြည်ဟည်းသွားသည်ကို ကြားလိုက်ရသလို ခံစားလိုက်ရသည်။ သူမ၏ဝိညာဉ်စွမ်းအား၊ တာအိုအငွေ့အသက်နှင့် အေးခဲမီးတောက် နိယာမမျိုးစေ့များ တက်ကြွလှုပ်ရှားလာသည်။

"ဒါ ဘာဖြစ်တာလဲ။"

သူမ မျက်နှာတွင် သံသယများ ပေါ်လာသည်။

သို့သော် သူမသည် ချက်ချင်း တင်ပျဉ်ခွေထိုင်ကာ စတင်ကျင့်ကြံလိုက်သည်။

......

အချိန်များ ကုန်ဆုံးသွားသည်။ မျက်စိတစ်မှိတ်အတွင်း သုံးနှစ် ကြာသွားသည်။

ဤသုံးနှစ်အတွင်း လီချန်သည် လော်ယွမ်းတာအိုရိပ်သာမှ ထွက်ခဲလှလေသည်။

သူ၏ကျင့်ကြံမှုအဆင့်သည် လျင်မြန်စွာတိုးတက်နေပြီး အထူးသဖြင့် လင့်တုန်းမျိုးစေ့၏ အညှောက်ပေါက်နှုန်းသည် အံ့မခန်း မြန်ဆန်လှသည်။ ဤသည်မှာ ဝူရွှမ်းတာအိုသခင်မနှင့် သဘာဝကျကျ သက်ဆိုင်နေသည်။

အမှန်တကယ်တော့ ဝူရွှမ်းတာအိုသခင်မ ရရှိသော အကျိုးကျေးဇူးများသည် သူ့လောက်မများသော်လည်း မနည်းလှပေ။

လွန်ခဲ့သော နှစ်နှစ်က ယွီဟွာနတ်ဘုရားဂိုဏ်း၏ လူသစ်စုဆောင်းမှုတွင် နတ်ဘုရားဓားဂိုဏ်းမှ လူဒါဇင်ပေါင်းများစွာသည် ဝူရွှမ်းတာအိုနန်းတော်သို့ ဝင်ရောက်နိုင်ခဲ့ပြီး အလုပ်ကြမ်းတပည့်များ ဖြစ်လာကြသည်။

ဒါက အဆက်အသွယ်ရှိခြင်း၏အကျိုးကျေးဇူးဖြစ်သည်။

အချိန်ခေါင်းလောင်းအောက်တွင် လီချန်သည် တင်ပျဉ်ခွေထိုင်နေပြီး တာအိုအငွေ့အသက် ဆင်ခြင်သုံးသပ်ခြင်း ပြီးဆုံးသွားသောအခါ မျက်လုံးများကို ဖွင့်လိုက်သည်။

သူသည် စနစ်မျက်နှာပြင်ကို ခေါ်ယူပြီး နောက်ဆုံးအချက်အလက်များကို ကြည့်ရှုလိုက်သည်။

ထျန်းနတ်ဘုရားအဆင့် ၇ (၉၈/၁၀၀)။

အချိန်ခေါင်းလောင်း (နတ်ဘုရားကိရိယာ ၉၇၀၂/၁၀၀၀၀၀၀၀)။

ကောင်းကင်ဘုံသတ္တမဓား (ကြီးမားသောပြီးမြောက်မှု ၂၈/၁၀၀)။

မျက်လုံးခြောက်လုံးပိုင်ဆိုင်သော ပရမ်းပတာ လျှို့ဝှက်နတ်ဘုရား သက်ဆင်းခြင်းပညာ(ကြီးမားသော သက်ဆင်းခြင်း ၉၉/၁၀၀)။

ဓားတာအိုအငွေ့အသက် (တာအိုအဖြစ်ပြောင်းလဲခြင်း ၈၈/၁၀၀)။

လင့်တုန်းမျိုးစေ့ (အညှောင့်ပေါက် ၈၆/၁၀၀)။

ချန်ယွမ်အစီအရင်ကျမ်း (ဆယ့်ခြောက်အခြေခံ ၄၁/၁၀၀)။

ဝိညာဉ်ဆေးပင်စိုက်ပျိုးသူ (အဆင့် ၆ ၁၆/၁၀၀)။

လက်နက်သန့်စင်သူ (အဆင့် ၅ ၈၃/၁၀၀)။

အဂ္ဂိရတ်ဆရာ (အဆင့် ၅ ၃၉/၁၀၀)။

ထျန်းနတ်ဘုရားအဆင့်သို့ ရောက်ပြီးနောက် မြေနတ်ဘုရားအဆင့်တုန်းကကဲ့သို့ တစ်နှစ်၊ နှစ်နှစ်အတွင်း အဆင့်တက်ရန်မှာ မဖြစ်နိုင်တော့ပေ။

သို့သော်လည်း သူ၏ လက်ရှိကျင့်ကြံမှုနှုန်းသည် အလွန်အံ့သြဖွယ်ကောင်းနေဆဲဖြစ်သည်။

ရှစ်နှစ်၊ ကိုးနှစ်ခန့်အတွင်း အဆင့်တစ်ဆင့် တက်နိုင်မည်ဖြစ်သည်။

ဤသည်မှာ အချိန်ခေါင်းလောင်း၏ အထောက်အပံ့ကြောင့်သာမက ဝူရွှမ်းတာအိုသခင်မနှင့် နှစ်ကိုယ်တူကျင့်ကြံမှုပြုလုပ်ခြင်းကြောင့်လည်း ဖြစ်သည်။ လင့်တုန်းမျိုးစေ့ တိုးတက်ရုံသာမက တာအိုအငွေ့အသက် ဆင်ခြင်သုံးသပ်မှုလည်း လျင်မြန်စွာ တိုးတက်လာသည်။

လက်ရှိနှုန်းထားဖြင့်ဆိုလျှင် သူသည် နှစ်အနည်းငယ်အတွင်း တာအိုအဖြစ်ပြောင်းလဲ ဆေးလုံးဖွဲ့ခြင်းအဆင့်သို့ ရောက်ရှိနိုင်မည်ဟု ခန့်မှန်းရသည်။

တာအိုအဖြစ်ပြောင်းလဲ ဆေးလုံးဖွဲ့ခြင်းပြီးသည်နှင့် ကျင့်ကြံမှုအဆင့် ထျန်းနတ်ဘုရားအဆင့် ကိုးဆင့်မြောက် အထွတ်အထိပ်သို့ ရောက်ရှိပါက ရွှမ်းနတ်ဘုရားအဆင့်သို့ တက်လှမ်းနိုင်မည်ဖြစ်သည်။

သို့သော် လီချန် မလောဘဲ ဖြည်းဖြည်းချင်း သွားလိုသည်။

သူသည် ရွှမ်းနတ်ဘုရားအဆင့်သို့ မတက်လှမ်းမီ တာအိုအငွေ့အသက်အဆင့် မြင့်မားစေရန် မျှော်လင့်ထားသည်။ အကောင်းဆုံးမှာ တာအိုအဖြစ်ပြောင်းလဲ ဆေးလုံးဖွဲ့ခြင်း၊ သန္ဓေသားအဖြစ်ပြောင်းလဲခြင်းနှင့် သန္ဓေသားဖွဲ့ခြင်းအဆင့်အထိ ရောက်ရှိပြီးမှသာ... ထိုသို့ဆိုလျှင် သူသည် ကောင်းကင်သို့ တစ်လှမ်းတည်း တက်လှမ်းနိုင်မည်ဖြစ်သည်။

ရုတ်တရက် လီချန် ထလိုက်ပြီး အချိန်ခေါင်းလောင်းအောက်မှ ထွက်ခွာကာ ကိုယ်ကိုလှုပ်ရှားလိုက်ရာ မျက်စိတစ်မှိတ်အတွင်း အချိန်ခေါင်းလောင်းလှိုဏ်ဂူကောင်းကင်ဘုံ၏ အခြားတစ်ဖက်သို့ ရောက်ရှိသွားသည်။

ဤနေရာတွင် ခြံဝင်းကြီးတစ်ခုသဖွယ် ပြင်ဆင်ထားပြီး နတ်ဝိညာဉ်သစ်ပင်များ၊ မြက်ပင်များ ပေါက်ရောက်နေကာ စမ်းချောင်းလေး စီးဆင်းနေပြီး ဝါးအိမ်အချို့ ဆောက်လုပ်ထားသည်။

အချိန်ခေါင်းလောင်းလှိုဏ်ဂူကောင်းကင်ဘုံသည် ကမ္ဘာငယ်လေးတစ်ခု အဆင့်သို့ ရောက်ရှိနေပြီဖြစ်ပြီး သက်ရှိများ မွေးဖွားခြင်းမရှိသေးသော်လည်း လီချန်၏ပြုပြင်မွမ်းမံမှုအောက်တွင် စစ်မှန်သော လျှို့ဝှက်နယ်မြေငယ်တစ်ခုသဖွယ်ဖြစ်လာခဲ့ပြီဖြစ်သည်။

ထို့ပြင် ၎င်းသည် သူ အကြွင်းမဲ့ထိန်းချုပ်ထားသော ကမ္ဘာငယ်လေးဖြစ်သည်။

ဝိညာဉ်မက်မွန်ပင်အောက်တွင် အဖြူရောင်ဝတ်စုံနှင့် အမျိုးသမီးတစ်ဦးသည် ဓားကိုကိုင်ကာ ဖြည်းညှင်းစွာ ကခုန်နေသည်။ သူမ၏ကိုယ်နေဟန်ထားသည် နတ်သမီးတစ်ပါးကဲ့သို့ ကျော့ရှင်းလှပပြီး လှုပ်ရှားမှုတိုင်းတွင် ဝိညာဉ်စွမ်းအင်များ ပြည့်နှက်နေကာ ပတ်ဝန်းကျင်တစ်ခုလုံးနှင့် ပေါင်းစပ်ပြီး လှုပ်ရှားနေသော ပန်းချီကားချပ်တစ်ခုသဖွယ် ဖြစ်နေသည်။

လီချန် ဖြည်းညှင်းစွာ လျှောက်သွားလိုက်သည်။

ရုတ်တရက် အဖြူရောင်ဝတ်စုံနှင့် အမျိုးသမီး၏လက်ထဲမှ ဝိညာဉ်ဓားသည် တုန်ခါသွားပြီး ဓားသံစဉ်တစ်ခုနှင့်အတူ လှပသော ဓားချီကမ္ဘာတစ်ခု ပွင့်လန်းလာကာ လီချန်ကို ဆွဲဆောင်လိုက်သည်။

လီချန် ပြုံးလိုက်ပြီး သူ့လက်ထဲတွင်လည်း လျန်ချီးဝိညာဉ်ဓားပေါ်လာကာ အေးစက်သော ဓားချီများ ပျံ့နှံ့သွားပြီး လင့်တုန်းမျိုးစေ့၏ အငွေ့အသက်များသည် လေထဲတွင် လွင့်ပျံနေသော မက်မွန်ပွင့်ဖတ်များကို နှင်းပွင့်များသဖွယ် ပြောင်းလဲသွားစေသည်။

အပြန်အလှန် တိုက်ခိုက်ပြီးနောက် အဖြူရောင်ဝတ်စုံနှင့် အမျိုးသမီးသည် ရုတ်တရက် ဓားကိုသိမ်းလိုက်ပြီး ပြုံးကာ ပြောလိုက်သည်၊ "ရှင်ရဲ့ နိယာမတိုးတက်မှုက ထပ်ပြီး တိုးတက်လာပြန်ပြီ..."

စောစောက ဓားသိုင်းအပြိုင်အဆိုင် ကစားခြင်းသည် နိယာမများ၏ ထိပ်တိုက်တွေ့ဆုံမှုဖြစ်သည်။

သူမ၏ ကျင့်ကြံမှုအဆင့်သည် လီချန်ထက် များစွာမြင့်မားသော်လည်း နိယာမအဆင့်တွင်မူ သူမ လုံးဝ အရေးနိမ့်ခဲ့သည်။

"ရှင် ဘယ်လိုလုပ်လိုက်တာလဲဆိုတာ ကျွန်မ တကယ် စဉ်းစားလို့မရဘူး။ ထျန်းနတ်ဘုရားအဆင့်ပဲ ရှိသေးတာကို... တာအိုအဖြစ်ပြောင်းလဲခြင်းအဆင့်ဆိုပေမယ့် နိယာမအဆင့်က ဒီလောက် မြင့်မားနေရတာလဲ။"

ဝူရွှမ်းတာအိုသခင်မ ဝိညာဉ်ဓားကို သိမ်းလိုက်သည်။

ပြင်ပတွင် လီချန်သည် သူမထံမှ 'ထမင်းပျော့' ကို စားနေသည်ဟု ကောလာဟလများ ထွက်နေသော်လည်း လီချန်က သူမကို ပိုမိုအကူအညီပေးနေကြောင်း သူမသာ သိသည်။ သုံးနှစ်အတွင်း သူမ၏ဒဏ်ရာများ လုံးဝပျောက်ကင်းသွားရုံသာမက ကျင့်ကြံမှုအဆင့်နှင့် နိယာမမျိုးစေ့ပါ အများကြီး တိုးတက်လာခဲ့သည်။

အထူးသဖြင့် အေးခဲမီးတောက် နိယာမမျိုးစေ့သည် ယခင်ကဆိုလျှင် နှစ် ၃၀ ကြိုးစားလျှင်ပင် ဤကဲ့သို့သော ရလဒ်မျိုး ရရှိမည်မဟုတ်ပေ။

ထို့ပြင် လီချန် ပြသနေသော တိုးတက်မှုနှုန်းအရဆိုလျှင် နိယာမမျိုးစေ့ လုံးဝအညှောက်ပေါက်ပြီး ကောင်းကင်နှင့်မြေကြီးတွင် အမြစ်တွယ်ကာ တာအိုနှင့်ပေါင်းစပ်ခြင်းအောင်မြင်ရန်မှာ သေချာပေါက် ဖြစ်လာပေလိမ့်မည်။

ဆိုလိုသည်မှာ မပျက်သုဉ်းနိုင်သော ရွှေနတ်ဘုရားဖြစ်လာနိုင်ခြေ အလွန်များပြားသည်။

ထိုအချိန်ကျလျှင် သူမသည် တာအိုလက်တွဲဖော်အနေဖြင့် တာအိုနှင့်ပေါင်းစပ်ခြင်းအောင်မြင်ရန် မျှော်လင့်ချက် ရှိလာမည်ဖြစ်သည်။

လီချန် ပြုံးရုံသာ ပြုံးလိုက်သည်။

သူ့တွင် အချိန်ခေါင်းလောင်းဟူသော နတ်ဘုရားကိရိယာ အထောက်အကူ ရှိနေရာ ဝူရွှမ်းနှင့် ယှဉ်၍ရမှာလား။

အမှန်တကယ်တော့ အချိန်ခေါင်းလောင်း၏ ခေါင်းလောင်းသံသည် ဝူရွှမ်း၏ ကျင့်ကြံမှုအတွက်လည်း အထောက်အကူ ဖြစ်စေသော်လည်း လီချန်လောက် မထိရောက်ပေ။

"ဒါနဲ့ ရှင်ရဲ့ နတ်ဘုရားအထောက်အထားကိစ္စ အတည်ပြုပြီးပြီ။ သုံးလနေရင် နတ်ဘုရားအထောက်အထား ချီးမြှင့်ပွဲ ကျင်းပလိမ့်မယ်။ အဲဒီအချိန်ကျရင် ရှင် နတ်ဘုရားကမ္ဘာကို ဝင်ရောက်ခွင့် တစ်ကြိမ် ရလိမ့်မယ်။"

ဝူရွှမ်းက ရုတ်တရက် ပြောလိုက်သည်။

ဤတစ်ကြိမ် နတ်ဘုရားအထောက်အထား ယှဉ်ပြိုင်မှု ပြင်းထန်သော်လည်း လီချန်သည် ထျန်းနတ်ဘုရားအဆင့် ဖြစ်ရုံသာမက သူမ၏ တာအိုလက်တွဲဖော်လည်း ဖြစ်နေသဖြင့် ဦးစားပေးအဆင့် အလွန်မြင့်မားသည်။

"နတ်ဘုရားကမ္ဘာကို ဝင်ရောက်ခွင့် တစ်ကြိမ် ဟုတ်လား။"

လီချန် အလွန်အံ့သြသွားသည်။

သူ ဤအချက်အလက်ကို တစ်ခါမျှ မကြားဖူးပေ။ နတ်ဘုရားအထောက်အထား ရရှိခြင်းသည် အဆင့်အတန်းတစ်ခု ရရှိခြင်းမျှသာဟု ထင်မှတ်ထားခဲ့သည်။ ယခုကြည့်ရသည်မှာ ထင်သလောက် ရိုးရှင်းပုံမရပေ။

"ဟုတ်တယ်။ နတ်ဘုရားကမ္ဘာဆိုတာ ကျင့်ကြံခြင်းလောကအထက်မှာရှိတဲ့ ကမ္ဘာတစ်ခုပါ။ အဲဒီ နတ်ဘုရားကမ္ဘာကို ရောက်မှသာ စစ်မှန်တဲ့ ထာဝရအသက်ရှင်ခြင်းကို ရနိုင်တယ်လို့ ပြောကြတယ်။ ကျင့်ကြံသူအားလုံးရဲ့ ဘဝရည်မှန်းချက် ပန်းတိုင်ပဲ။"

ဝူရွှမ်း ခေါင်းညိတ်လိုက်သည်။

"မပျက်သုဉ်းနိုင်သော ရွှေနတ်ဘုရားဖြစ်ရင် မသေဆုံးမပျက်သုဉ်းနိုင်တဲ့အဆင့်ဖြစ်ပြီ မဟုတ်ဘူးလား။"

လီချန် စူးစမ်းစွာ မေးလိုက်သည်။

"ဘယ်လိုလုပ် ဖြစ်နိုင်မှာလဲ။"

ဝူရွှမ်း ခေါင်းခါပြီး ခါးသက်သက် ပြုံးလိုက်သည်၊ "ဗလာနတ်ဘုရား၊ မြေနတ်ဘုရားအဆင့်၊ ထျန်းနတ်ဘုရားအဆင့်၊ ရွှမ်းနတ်ဘုရားအဆင့်နဲ့ မပျက်သုဉ်းနိုင်သော ရွှေနတ်ဘုရားဆိုတာတွေ အားလုံးက အတုအယောင်နတ်ဘုရားတွေပါပဲ။"

"အတုအယောင်နတ်ဘုရား ဟုတ်လား။"

လီချန် အကြီးအကျယ် အံ့သြသွားသည်။

ဤကျင့်ကြံခြင်းလောက၏ အဆင့်သတ်မှတ်ချက်များသည် အလွန်ထူးဆန်းပြီး ရှုပ်ထွေးသည်ဟု သူ အရင်ကတည်းက ခံစားခဲ့ရသည်။

ကျင့်ကြံသူများသည် နတ်ဘုရားချီ မဟုတ်ဘဲ နတ်ဝိညာဉ်ချီကို အသုံးပြုပြီး ဝိညာဉ်စွမ်းအားကို ကျင့်ကြံကြသော်လည်း ဘာကြောင့် နတ်ဘုရားအဆင့်များလို့ ခွဲခြားထားတာလဲ။

"ဒီနတ်ဘုရားအဆင့် သတ်မှတ်ချက်တွေက တကယ်တော့ နတ်ဘုရားကမ္ဘာကနေ ဆင်းသက်လာတာ။ ရှင် နတ်ဘုရားအထောက်အထား ရပြီးလို့ နတ်ဘုရားကမ္ဘာကို တစ်ခေါက် ရောက်ဖူးသွားရင် အခြေအနေမှန်ကို သိလာပါလိမ့်မယ်။"

ဝူရွှမ်း ပြုံးလိုက်သည်။

"နတ်ဘုရားကမ္ဘာမှာ ဘာတွေ ရှိလဲ။"

လီချန် မေးလိုက်သည်။

"ရှင် နတ်ဘုရားအထောက်အထား မရခင်တော့ ကျွန်မ ပြောပြလို့ မရဘူး။"

ဝူရွှမ်း ခေါင်းခါလိုက်သည်။

ဤအချက်က လီချန်ကို အံ့အားသင့်စေသည်။ နတ်ဘုရားကမ္ဘာတွင် ကြီးမားသော လျှို့ဝှက်ချက်တစ်ခုရှိနေပြီး ပြောပြ၍ပင် မရနိုင်လောက်အောင်ဖြစ်နေပုံရသည်။

၎င်းက သူ့ကို နတ်ဘုရားကမ္ဘာအပေါ် ပိုမိုစူးစမ်းချင်စိတ် ဖြစ်ပေါ်စေသည်။

"ဝူရွှမ်း၊ ကျွန်တော်တို့က အတုအယောင်နတ်ဘုရားတွေဆိုရင် စစ်မှန်နတ်ဘုရားဆိုတာ ရှိလား။"

လီချန် ထပ်မေးလိုက်သည်။

"မသိဘူး။"

ဝူရွှမ်း တိတ်ဆိတ်သွားပြီး တစ်စုံတစ်ခုကို တွေးမိပုံရကာ ခေါင်းခါလိုက်သည်။

"မသိဘူး ဟုတ်လား။"

လီချန် အံ့သြသွားသည်။ ဝူရွှမ်းက နတ်ဘုရားကမ္ဘာကို ရောက်ဖူးသည်ဆိုလျှင် စစ်မှန်နတ်ဘုရား ရှိမရှိ ဘာလို့မသိရတာလဲ။

"မပျက်သုဉ်းနိုင်သော ရွှေနတ်ဘုရားက မပျက်စီးနိုင်ဘူးဆိုမှတော့ စစ်မှန်နတ်ဘုရားလို့ ယူဆလို့ မရဘူးလား။"

သူ မနေနိုင်ဘဲ ထပ်မေးလိုက်သည်။

"လီချန်၊ မပျက်စီးနိုင်ဘူးဆိုတာကလည်း နှိုင်းယှဉ်တဲ့သဘောတရားပါပဲ။ ပြီးတော့... မပျက်သုဉ်းနိုင်သော ရွှေနတ်ဘုရားရဲ့ ခန္ဓာကိုယ်ကသာ မပျက်စီးနိုင်တာ။ ဝိညာဉ်ကတော့ အချိန်ကာလရဲ့ တိုက်စားမှုအောက်မှာ ပျက်စီးသွားမှာပဲ။"

ဝူရွှမ်း တိုးတိုးလေး ပြောလိုက်သည်။

"ခန္ဓာကိုယ် မပျက်စီးနိုင်ဘူးလား။ ဒါဆို မပျက်သုဉ်းနိုင်သော ရွှေနတ်ဘုရားက ဘယ်လောက်ကြာကြာ အသက်ရှင်နိုင်လဲ။"

လီချန် မေးလိုက်သည်။

"ခန့်မှန်းခြေ တစ်ယွမ် (တစ်ယွမ် - ၁၂၉,၆၀၀ နှစ်) လောက်ပေါ့။ ဒါပေမဲ့ အရမ်းရှားပါးတဲ့ အထူးမပျက်သုဉ်းနိုင်သော ရွှေနတ်ဘုရားတချို့ကတော့ တစ်ယွမ်ထက် ပိုအသက်ရှင်နိုင်တယ်လို့ ဆိုကြတယ်။ တိကျတဲ့ အခြေအနေကိုတော့ ကျွန်မလည်း သိပ်မသိပါဘူး။"

ဝူရွှမ်း၏ လှပသောမျက်နှာထက်တွင် မျှော်လင့်တောင့်တမှုများ ပေါ်လာသည်။

သူမအတွက်မူ မပျက်သုဉ်းနိုင်သော ရွှေနတ်ဘုရားဖြစ်လာခြင်းသည် ဘဝတစ်သက်တာ အိပ်မက်ဖြစ်သည်။

***