အခန်း (၆၈၅-၆၈၆)

အခန်း ၆၈၅

တိုက်ပွဲပြီး အစည်းအဝေး

တိုက်ခိုက်မှု ထောင်ပေါင်းများစွာက ဟိုက်ပါဒရိုက် အခြေစိုက်စခန်းပေါ်သို့ ကျရောက်လာပြီး မျက်စိတစ်မှိတ်အတွင်းမှာပင် ၎င်းကို တစ်စစီ ဖြစ်သွားအောင် တိတ်တဆိတ် ဆွဲဖြဲပစ်လိုက်သည်။

ထိုအချိန်တွင် ဟန်ရှောင်းမှာ မဟူရာအလင်း လျှို့ဝှက်ယာဉ်ပေါ်သို့ ပြန်လည် ရောက်ရှိနေပြီ ဖြစ်သည်။ သူသည် ယန္တရားဝတ်စုံကို ချွတ်လိုက်ပြီး သူ၏ ပုခုံးများကို နှိပ်နယ်နေသည်။ ဟိုက်ပါဒရိုက် အခြေစိုက်စခန်း ပျက်စီးသွားသည်ကို မြင်သောအခါ ပြုံးလိုက်သည်။

“နောက်ဆုံးတော့ အနိုင်ရပြီ။ ငါ့ရဲ့ ကြိုးစားမှုတွေ အလဟဿ မဖြစ်ခဲ့ဘူး”

မဟာဗျူဟာမြောက် မစ်ရှင် ပြီးဆုံးကြောင်း အချက်ပေးချက်မှာ မျက်နှာပြင်ပေါ်တွင် ပေါ်လာသည်။ လက်နက်တပ်ဆင်ထားသည့် ဂြိုလ်တုခံတပ်ကို တစ်ကိုယ်တော် ဖျက်ဆီးနိုင်ခဲ့ခြင်းကြောင့် မစ်ရှင် အဆင့်သတ်မှတ်ချက်မှာ အလွန် မြင့်မားနေသည်။ ခရမ်းရောင်သလင်းကျောက်နှင့် သူ၏ မျက်နှာသာပေးမှုမှာ ၁၃၅၀ အထိ တိုးလာပြီး အတွေ့အကြုံအမှတ် သန်းပေါင်းများစွာကိုလည်း ဆုလာဘ်အဖြစ် ရရှိခဲ့သည်။

သို့သော် ဤသည်မှာ သူ ယခုတစ်ကြိမ် ရရှိခဲ့သည့် ဆုလာဘ်များ၏ အစိတ်အပိုင်း အနည်းငယ်သာ ရှိသေးသည်။ သူ့ထက် အဆင့်များစွာ မြင့်မားသော တာမာရီယာကို တစ်ကိုယ်တော် သတ်ဖြတ်နိုင်ခဲ့ခြင်းကပင် သူ့အား အတွေ့အကြုံ အမှတ် သန်း ၅၀၀ကျော် ရရှိစေခဲ့သည်။

“ကပ်ဘေးအဆင့်တွေကို သတ်ပြီး အတွေ့အကြုံအမှတ် ရှာရတာက တကယ်ကို ထိရောက်တာပဲ။ ကစားသမားတွေ မရှိတဲ့အချိန်မှာ ဒါက တကယ့် ရွေးချယ်စရာကောင်း တစ်ခုပဲ”

စစ်ပွဲမှာ အခွင့်အရေးတစ်ခု ဖြစ်သည်မှာ အမှန်ပင်။ အခြား မည်သည့်နေရာတွင် ကပ်ဘေးအဆင့် ရန်သူများစွာကို ဤသို့ ရှာတွေ့နိုင်မည်နည်း။

ဤတိုက်ပွဲမှတစ်ဆင့် သူသည် သူ၏ ကိုယ်ပိုင်အစွမ်းကို ပိုမို ရှင်းလင်းစွာ သိရှိသွားသည်။ လွန်ခဲ့သော နှစ်လနှင့် နှိုင်းယှဉ်ပါက သူ၏ တိုက်ခိုက်နိုင်စွမ်းမှာ ယခုအခါ လုံးဝ ကွဲပြားခြားနားသော အဆင့်တစ်ခုသို့ ရောက်ရှိနေပြီ ဖြစ်သည်။

(ဒဏ္ဍာရီ တိုက်ပွဲ နည်းစနစ်) နှင့်အတူ သူသည် သူ၏ ယန္တရားတပ်မတော် တစ်ခုတည်းဖြင့်ပင် ပြိုင်ဘက် အများစုကို ချေမှုန်းနိုင်သည်။ အဆင့် အေ+ နယ်ပယ်သို့ စတင် ဝင်ရောက်လာရုံသာ ရှိသေးသော်လည်း သူ၏ လက်တွေ့ တိုက်ခိုက်နိုင်စွမ်းမှာ ထိပ်တန်း အဆင့် အေ+ စူပါများထက်ပင် ကျော်လွန်နေပြီ ဖြစ်သည်။

အချင်းချင်း အထောက်အကူပြုနေသော အစွမ်းထက် ပုံသွင်းခြင်း အရည်အချင်းများစွာနှင့်အတူ တိုက်ပွဲအတွင်း လက်တွေ့ အကျိုးသက်ရောက်မှုမှာ သူ ထင်ထားသည်ထက် ပိုမို ကောင်းမွန်လှသည်။

သာမန် ကပ်ဘေးအဆင့် ဆယ်ဦးကို သူ့အား တိုက်ခိုက်ရန် စေလွှတ်ခြင်းမှာ သူ့အား အလကား သတ်ခိုင်းနေသကဲ့သို့ပင် ဖြစ်လိမ့်မည်။

“အဆင့် အေ အထက်ဆင့် စူပါတစ်ယောက် ဝင်မပါသရွေ့ သွေးစွန်းကုန်းမြေက တခြားသူတွေဟာ ငါ့ကို ယှဉ်နိုင်မှာ မဟုတ်ဘူး...”

ဟန်ရှောင်းသည် ဤအတွေးကို တစ်စက္ကန့်မျှသာ တွေးလိုက်ပြီးနောက် သူ၏ ပါးကို ချက်ချင်း ပြန်ရိုက်ကာ ထိုအတွေးကို ဖယ်ထုတ်လိုက်သည်။

“တော်သေးတယ်၊ ကိုယ့်သေတွင်း ကိုယ် တူးမိတော့မလို့”

ဟန်ရှောင်းသည် စစ်မြေပြင်သို့ လှည့်ကြည့်လိုက်သည်။

အခြေစိုက်စခန်း ပျက်စီးသွားသဖြင့် ရန်သူများမှာ သူတို့၏ စစ်ကူလမ်းကြောင်း ဆုံးရှုံးသွားကြသည်။ ရှေ့မတိုးသာ နောက်မဆုတ်သာ ဖြစ်နေသည့် အခြေအနေမှာ ချက်ချင်း ပြိုကွဲသွားသည်။ ဆက်ရှင်ဇီးရိုး၏ စိတ်ဓာတ်မှာ မြင့်တက်လာပြီး ကျန်ရှိနေသော ရန်သူများကို စတင် ရှင်းလင်းကြတော့သည်။ ရန်သူများ လုံးဝ ရှုံးနိမ့်သွားရန်မှာ အချိန်တစ်ခုသာ လိုတော့သည်။

ဟန်ရှောင်းသည် သူ၏ မစ်ရှင်ကို ပြီးဆုံးခဲ့ပြီ ဖြစ်သဖြင့် နောက်ဆက်တွဲ တိုက်ပွဲများတွင် ပါဝင်ခြင်း မရှိတော့ပေ။ သူသည် ဘလက်စတား စစ်တပ် ယာဉ်တန်းနှင့်အတူ ဘေးမှနေ၍ အေးအေးဆေးဆေး ကြည့်နေလိုက်သည်။

မောရက်ဒ်နှင့် ယာဉ်တန်း သုံးခုမှာ ကျန်ရှိနေသော ရန်သူများကို ကြားဖြတ် ဟန့်တားကာ ဝိုင်းရံလိုက်ကြသည်။ ဤတိုက်ပွဲ၏ အဆုံးသတ်မှာ ဆုံးဖြတ်ပြီးသား ဖြစ်သည်။ တိုက်ပွဲမှာ လျင်မြန်စွာ ပြီးဆုံးသွားပြီး ဆက်ရှင်ဇီးရိုးသည် နောက်ဆုံး၌ သူတို့၏ ပထမဆုံး အောင်ပွဲကြီးကို ရရှိခဲ့သည်။

ယာဉ်တန်း သုံးခုမှာ စစ်မြေပြင်ကို ရှင်းလင်းကာ လက်ရရှိပစ္စည်းများကို သိမ်းဆည်းပြီးနောက် အဖွဲ့လိုက် ထွက်ခွာသွားကြသည်။

ဟိုက်ပါဒရိုက်အတွင်း တစ်နာရီကျော် ခရီးနှင်ပြီးနောက် ယာဉ်တန်းမှာ ဘေးကင်းသော နေရာတစ်ခု၌ ဖြည်းဖြည်းချင်း ရပ်တန့်လိုက်သည်။

ဟန်ရှောင်းသည် ပင်မသင်္ဘောပေါ်တွင် ကျင်းပမည့် စစ်ပွဲပြီး အစည်းအဝေးသို့ တက်ရောက်ရန် မောရက်ဒ်ထံမှ ဖိတ်ကြားချက်ကို လက်ခံရရှိသည်။

ဟားလပ်စ်၊ ဟာမွန်နှင့် အခြားအရာရှိများကို ခေါ်ယူပြီးနောက် ဟန်ရှောင်းသည် သူ၏ အာကာသယာဉ်ကို ပင်မသင်္ဘောနှင့် ချိတ်ဆက်လိုက်သည်။

ဝူး

တံခါး ပွင့်သွားသည်။ သူတို့ ရှေ့တွင် ချိတ်ဆက်ထားသော စင်္ကြံလမ်း ရှိနေသည်။ ဟန်ရှောင်းသည် အခြားသူများကို ဦးဆောင်ကာ ပင်မသင်္ဘောအတွင်းသို့ ဝင်ရောက်ခဲ့သည်။ ဧည့်ကြိုအချို့က ထိုနေရာတွင် စောင့်ဆိုင်းနေကြသည်။ သူတို့က အလျင်အမြန် ချဉ်းကပ်လာပြီး ရိုသေသော လေသံဖြင့် ကြိုဆိုကြသည်။

“လူကြီးမင်း ဘလက်စတား၊ လူတိုင်း ရောက်နေကြပါပြီ။ သူတို့အားလုံး လူကြီးမင်းကို စောင့်နေကြပါတယ်”

“လမ်းပြပေးပါ”

ဟန်ရှောင်း ခေါင်းညိတ်လိုက်ပြီး ဧည့်ကြိုနောက်သို့ လိုက်ကာ ပင်မသင်္ဘောအတွင်းရှိ အစည်းအဝေးခန်းမ တံခါးဝသို့ ရောက်ရှိလာသည်။

တံခါး ပွင့်သွားသောအခါ ပျော်ရွှင်မြူးတူးသော အသံများ အတွင်းမှ ထွက်ပေါ်လာသည်။ လေထုမှာ အလွန် အကောင်းမြင်နေပုံရသည်။

အခန်းထဲတွင် လူအတော်များများ ရှိနေသည်။ ယာဉ်တန်းအတွင်းရှိ မိတ်ဖက်အဖွဲ့အစည်းများမှ တာဝန်ခံ အားလုံးကို ဖိတ်ကြားထားခြင်း ဖြစ်သည်။ နောက်ဆုံး၌ အောင်ပွဲ ရရှိခဲ့သဖြင့် လူတိုင်းမှာ ဝမ်းသာအားရ ဖြစ်နေကြသည်။

ဟန်ရှောင်း ဝင်လာသောအခါ ခန်းမအတွင်းရှိ စကားပြောသံများ ရုတ်တရက် ရပ်တန့်သွားသည်။ လူတိုင်း လှည့်ကြည့်ကြသည်။ ဟန်ရှောင်း ဖြစ်ကြောင်း မြင်သောအခါ သူတို့၏ မျက်လုံးများတွင် အထင်ကြီး လေးစားမှုများဖြင့် ပြည့်နှက်သွားသည်။ သူတို့သည် ဟန်ရှောင်းအတွက် လမ်းဖွင့်ပေးကြသည်။

“ဘလက်စတား၊ မင်း ရောက်လာပြီပဲ။ မြန်မြန်၊ ထိုင်ပါဦး”

ခန်းမ၏ အလယ်တွင် စက်ဝိုင်းပုံ အစည်းအဝေး စားပွဲတစ်ခု ရှိပြီး လူတိုင်း ထိုနေရာတွင် ထိုင်နေကြသည်။ မောရက်ဒ်မှာ အလှည့်ကျ သဘာပတိ နေရာတွင် ထိုင်နေသည်။ သူသည် ဟန်ရှောင်းကို မြင်သောအခါ အမြန် မတ်တပ်ရပ်ပြီး ဟန်ရှောင်းကို ထိုင်ရန် စိတ်ထက်သန်စွာ ဖိတ်ကြားလိုက်သည်။

“ဟိုင်း၊ ဘယ်လိုလဲ။ အားလုံး စားပြီးကြပြီလား” ဟန်ရှောင်းသည် သူ၏ နေရာတွင် ထိုင်လိုက်ပြီး အခြားသူများကို ပေါ့ပေါ့ပါးပါးပင် နှုတ်ဆက်လိုက်သည်။

“ဟားဟား၊ အခု လူစုံပြီဆိုတော့ အစည်းအဝေး စလိုက်ကြရအောင်။ လူကြီးမင်း ရပ်ဖ်က ကျွန်တော်တို့ကို ပြောစရာ ရှိတယ်လို့ ဆိုပါတယ်”

မောရက်ဒ်က ပြုံးကာ စားပွဲကို နှိပ်လိုက်သည်။ ရပ်ဖ်၏ အဝေးရောက် ပရိုဂျက်ရှင် ပုံရိပ်မှာ အစည်းအဝေး စားပွဲ၏ အလယ်ဗဟို အပေါ်တွင် ပေါ်လာသည်။

ရပ်ဖ်က လည်ချောင်းတစ်ချက် ဟန့်ကာ စကားပြောလိုက်သည်။

“အားလုံးပဲ၊ မင်းတို့ တကယ်ကို ကောင်းကောင်း လုပ်နိုင်ခဲ့ကြတယ်။ အခြေစိုက်စခန်းကို ဖျက်ဆီးနိုင်ခဲ့တဲ့အတွက် သွေးစွန်းကုန်းမြေရဲ့ အခြေစိုက်စခန်း ၁၂ ခုဟာ သီးခြားစီ ဖြစ်သွားပြီး သူတို့ရဲ့ တပ်ဖွဲ့ဝင်တွေလည်း ကွဲပြားသွားခဲ့ပြီ။ ငါတို့ တပ်ဖွဲ့တွေဟာ အဲဒီ အခြေစိုက်စခန်း ၁၂ ခုကို အကျအဆုံး အနည်းဆုံးနဲ့ အောင်မြင်စွာ ဖျက်ဆီးနိုင်ခဲ့ကြတယ်။ ဒါဟာ ငါတို့ရဲ့ ပထမဆုံး လွှမ်းမိုးနိုင်တဲ့ အောင်ပွဲပဲ”

ဖြောင်း ဖြောင်း ဖြောင်း

လူတိုင်း လက်ခုပ်တီးကြသည်။

“မောရက်ဒ်၊ မင်းဟာ အလွန် ပြတ်သားခဲ့တယ်။ အခြေစိုက်စခန်းကို ဖျက်ဆီးရာမှာ မင်းရဲ့ ပါဝင်ကူညီမှုက ကြီးမားပါတယ်။ ကယ်ရီ၊ မင်း ရန်သူတွေကို ဟန့်တားနိုင်ခဲ့ပြီး မင်းရဲ့ မစ်ရှင်ကို ပြီးမြောက်ခဲ့တယ်။ ပီယာရာ၊ မင်းကတော့...”

ရပ်ဖ်သည် ထိုနေရာတွင် ရှိနေသူ တစ်ဦးချင်းစီကို တစ်ယောက်ပြီးတစ်ယောက် ချီးကျူးစကား ပြောကြားသည်။ လက်ခုပ်သံများမှာ ဆက်တိုက် ထွက်ပေါ်နေသည်။ ဟန်ရှောင်း၏ မျက်နှာ အမူအရာမှာ ထူးဆန်းနေသည်။ ဤသည်မှာ သူ့အား စာမေးပွဲရလဒ် ထုတ်ပြန်ခြင်းကို သတိရစေသည်။

သူတို့ တိုက်ပွဲ အနိုင်ရရုံသာ ရှိသေးသော်လည်း ယခုအခါ သူတို့၏ ပါဝင်ကူညီမှုအတွက် အကဲဖြတ်ခြင်း ခံနေရပြီ ဖြစ်သည်။

“ပြီးတော့ ဒီအောင်ပွဲရဲ့ အကြီးမားဆုံးသော ဂုဏ်ပြုထိုက်သူကတော့...”

ရပ်ဖ်က မျက်နှာတွင် အပြုံးကြီးတစ်ခုဖြင့် ဟန်ရှောင်းဘက်သို့ လှည့်ကြည့်လိုက်သည်။ “ဘလက်စတား၊ မင်းဟာ ရန်သူ့ရဲ့ လက်နက်တပ်ဆင်ထားတဲ့ ဂြိုလ်တုခံတပ်နဲ့ ကာကွယ်ရေး နည်းလမ်းတွေကို တစ်ယောက်တည်း ဖျက်ဆီးပစ်ခဲ့တယ်၊ ဒါဟာ တိုက်ပွဲရဲ့ အခြေအနေကို ပြောင်းလဲစေခဲ့တဲ့ သော့ချက်လို့တောင် ပြောလို့ရတယ်။”

လူတိုင်းက သဘောတူသည့်အနေဖြင့် ခေါင်းညိတ်ကြသည်။

တစ်ဦးတစ်ယောက်တည်းက တိုက်ပွဲကို မပြောင်းလဲနိုင်ဘူးလို့ ဘယ်သူ ပြောသလဲ။ ဘလက်စတား တစ်ဦးတည်းကပင် ဤကဲ့သို့သော အဓိကကျသည့် နည်းဗျူဟာမြောက် မစ်ရှင်ကို ပြီးမြောက်အောင် ဆောင်ရွက်နိုင်ခဲ့သည်။ သူ၏ လုပ်ရပ်များက သူတို့၏ အောင်ပွဲကို ဆုံးဖြတ်ပေးခဲ့ပြီး တိုက်ပွဲ၏ ရလဒ်ကို အဆုံးအဖြတ် ပေးခဲ့ခြင်း ဖြစ်သည်။

“အဟမ်း၊ ကျွန်တော် လုပ်သင့်လုပ်ထိုက်တာကို လုပ်ခဲ့တာပါ” ဟန်ရှောင်းမှာ သူ၏ မျက်နှာ အမူအရာကို ထိန်းထားပြီး ၎င်းမှာ အရေးကြီးသည့် ကိစ္စမဟုတ်သကဲ့သို့ လက်ဝှေ့ယမ်းပြလိုက်သည်။

မောရက်ဒ်က မနေနိုင်ဘဲ ဝင်ပြောသည်။ “မင်းသာ မရှိရင် အလွန်ဆုံး ငါတို့တွေ သနားစရာကောင်းတဲ့ အောင်ပွဲပဲ ရလိမ့်မယ်။ ဒါကြောင့် မင်းဟာ အကြီးမားဆုံးသော ဂုဏ်ပြုမှုကို ရထိုက်ပါတယ်။”

ဟန်ရှောင်း၏ နှုတ်ခမ်းမှာ တွန့်သွားပြီး သူသည် ယဉ်ကျေးစွာ ပြုံးရုံမှတစ်ပါး အခြား ရွေးချယ်စရာ မရှိပေ။

ရပ်ဖ်က ပြုံးကာ ပြောလိုက်သည်။ “မင်း နှိမ့်ချနေစရာ မလိုပါဘူး။ ငါ အထက်လူကြီးတွေကို အစီရင်ခံပြီးပြီ။ သူတို့က မင်းရဲ့ အောင်မြင်မှုတွေအပေါ် အလွန် ကျေနပ်နေကြတယ်။ အထက်က လူတွေက ဆုလာဘ်အနေနဲ့ ဘလက်စတား စစ်တပ်အပေါ် သူတို့ရဲ့ ရင်းနှီးမြှုပ်နှံမှုတွေကို တိုးမြှင့်ဖို့ ဆုံးဖြတ်ထားကြတယ်။ ပြီးတော့ မင်းကို ရေရှည်မိတ်ဖက်အဖြစ် ခန့်အပ်ဖို့လည်း သူတို့ စဉ်းစားနေကြတယ်”

ရပ်ဖ်က ဤသို့ ပြောလိုက်သောအခါ လူတိုင်း၏ မျက်နှာ အမူအရာမှာ အနည်းငယ် ပြောင်းလဲသွားသည်။ သူတို့မှာ မနာလို ဖြစ်နေကြခြင်း ဖြစ်သည်။

ဤလျှို့ဝှက်စစ်ပွဲတွင် ပါဝင်ရာ၌ သူတို့၏ အကြီးမားဆုံးသော ရည်မှန်းချက်မှာ ကြယ်စုတန်း အဆင့် လူမှုအဖွဲ့အစည်း၏ ရေရှည်မိတ်ဖက် ဖြစ်လာရန် ဖြစ်သည်။ ဘလက်စတားက သူတို့ထက် တစ်လှမ်း သာသွားပြီ ဖြစ်သည်။

ခရမ်းရောင်သလင်းကျောက် လူမှုအဖွဲ့အစည်း၏ အထက်တန်းလွှာများ၏ အမြင်တွင်မူ ဘလက်စတား စစ်တပ်၏ အရေးပါမှုမှာ ဆက်ရှင်ဇီးရိုး အဖွဲ့ဝင် အခြား မည်သူ့ထက်မဆို ကျော်လွန်သွားပြီ ဖြစ်နိုင်သည်။

“ဒါမှ ငါ ကြားချင်တဲ့ စကားပဲ၊ တကယ့် အကျိုးအမြတ်တွေပေါ့...” ဟန်ရှောင်း ပြုံးလိုက်သည်။

“ဒါနဲ့၊ မင်းဟာ သွေးစွန်းကုန်းမြေရဲ့ တရားသူကြီး တာမာရီယာကိုလည်း သတ်ပစ်ခဲ့တယ်။ ဒါဟာ သေဆုံးသွားတဲ့ ပထမဆုံးသော သွေးစွန်းကုန်းမြေ အဆင့်မြင့်အရာရှိပဲ။ သွေးစွန်းကုန်းမြေဟာ အရေးကြီးတဲ့ အဖွဲ့ဝင်တစ်ယောက် ဆုံးရှုံးသွားခဲ့ပြီ။ မင်း တကယ်ကို ကောင်းကောင်း လုပ်နိုင်ခဲ့ပါတယ်”

ဟန်ရှောင်းမှာ မှင်တက်သွားသည်။ ငါ သတ်လိုက်တဲ့ အဲဒီ စိတ်တိုတတ်တဲ့ အမျိုးသမီးက ဤလျှို့ဝှက်စစ်ပွဲတွင် ပထမဆုံး သေဆုံးသွားသည့် အရေးပါသော သွေးစွန်းကုန်းမြေ အရာရှိ ဖြစ်နေတာလား။

‘ဒါဆိုရင်... ငါ တိုင်ရန့်ရဲ့ အရာရှိကို ပထမဆုံး သတ်လိုက်တာပေါ့’

‘ဒါဆို... ဟီဘာ ဒေါသထွက်မှာ မဟုတ်ပါဘူး... ဟုတ်တယ်မလား’

လွန်ခဲ့သော နှစ်လအတွင်း သူတို့ ရင်ဆိုင်ခဲ့ရသော အားနည်းချက်များကြောင့် ရပ်ဖ်မှာ အလွန်အမင်း ဖိအားများ ခံစားခဲ့ရသည်။ သူသည် တောက်လျောက် လက်စားချေချင်နေခဲ့သည်။ ဘလက်စတား ပြန်ရောက်လာသည်နှင့် သူသည် သွေးစွန်းကုန်းမြေကို နောက်ဆုံး၌ ရှုံးနိမ့်အောင် လုပ်နိုင်ခဲ့ပြီ ဖြစ်သည်။ ရပ်ဖ်မှာ စိတ်သက်သာရာ ရသွားသည်။

သူသည် ဟန်ရှောင်းကို ကြည့်လေလေ ပို၍ ကျေနပ်လေလေ ဖြစ်သည်။

သူ၏ အမြင်တွင်မူ ဘလက်စတား ပြသခဲ့သော တိုက်ခိုက်နိုင်စွမ်းမှာ သာမန် ကပ်ဘေးအဆင့်များ၏ စံနှုန်းကို ကျော်လွန်နေပြီ ဖြစ်သည်။ ပုံမှန်အားဖြင့် အဆင့် အေ အထက်ဆင့်များသာ ကပ်ဘေးအဆင့် အုပ်စုတစ်စုကို ဤသို့ ချေမှုန်းနိုင်သည်။ သို့သော် ဘလက်စတားမှာ အဆင့် အေ အထက်ဆင့် မဟုတ်ပေ။ ထို့ကြောင့် ၎င်းအတွက် ရှင်းလင်းချက် တစ်ခုသာ ရှိသည်ဟု သူ ခံစားရသည်။ ၎င်းမှာ ဘလက်စတား၏ အလားအလာမှာ ထူးခြားဆန်းပြားနေခြင်း ဖြစ်သည်။ ထို့ပြင် သူ၏ အလားအလာမှာ တကယ့် စွမ်းအားအဖြစ်သို့ အလွန် လျင်မြန်စွာ ပြောင်းလဲနေသည်။ သူသည် လွန်ခဲ့သော နှစ်လကထက် သိသိသာသာ ပိုမို သန်မာလာသည်မှာ ထင်ရှားလှသည်။

ခရမ်းရောင်သလင်းကျောက်သည် ဟန်ရှောင်း၏ အတိတ်ကို ယခင်က စုံစမ်းခဲ့ဖူးသည်။ လွန်ခဲ့သော ဆယ်နှစ်ခန့်က ဘလက်စတားမှာ ဂလက်ဆီအတွင်းသို့ စတင် ဝင်ရောက်လာပြီး သူ၏ ကြေးစားအဖွဲ့ကို တည်ထောင်ခဲ့ရုံသာ ရှိသေးသည်။ ထိုအချိန်က သူသည် အဆင့် ဘီ ပင် မဟုတ်သေးသော်လည်း ဆယ်နှစ်မပြည့်မီ အချိန်အတွင်းမှာပင် သူသည် အလွန် လျင်မြန်စွာ တက်လှမ်းလာခဲ့သည်။

၎င်းမှာ ဘလက်စတားတွင် အဆင့် အေ အထက်ဆင့် ဖြစ်လာရန် အမြင့်မားဆုံးသော အလားအလာ ရှိနေခြင်းကို ဆိုလိုခြင်း ဖြစ်သည်။

စူးစမ်းရှာဖွေရေးခေတ် ကုန်ဆုံးပြီးကတည်းက ယခုအချိန်အထိ မည်သည့် အဆင့် အေ အထက်ဆင့်မျှ ဘလက်စတားလောက် လျင်မြန်စွာ တက်လှမ်းနိုင်ခဲ့ခြင်း မရှိပေ။

ရပ်ဖ်မှာ စိတ်လှုပ်ရှားနေသည်။ တိုင်ရန့်က တစ်စုံတစ်ခု မလုပ်သရွေ့ ဘလက်စတားသည် သွေးစွန်းကုန်းမြေ၏ ကပ်ဘေးအဆင့် အားလုံးကို ချေမှုန်းနိုင်လိမ့်မည် ဖြစ်သည်။ သူသည် အဆင့်မြင့် တိုက်ခိုက်ရေးသမားများကြားတွင် လူသတ်လက်နက်တစ်ခုနှင့် တူနေပြီး ဆက်ရှင်ဇီးရိုး ရရှိထားသည့် အကြီးမားဆုံးသော အားသာချက်ပင် ဖြစ်သည်။

တိုက်ပွဲအပြီးတွင် ဤသို့ အကဲဖြတ်ခြင်းမှာ ရည်ရွယ်ချက် ရှိရှိ ပြုလုပ်ခြင်း ဖြစ်သည်။ အကြောင်းရင်း တစ်ခုမှာ ဘလက်စတားကို ဆုချခြင်းအား နမူနာအဖြစ် အသုံးပြုကာ အခြား ဆက်ရှင်ဇီးရိုး အဖွဲ့ဝင်များကိုလည်း တိုက်ပွဲများ အနိုင်ရရှိစေရန် တိုက်တွန်းရန် ဖြစ်ပြီး မဟာမိတ်တပ်ဖွဲ့၏ အားနည်းချက်ကို ဖယ်ရှားရန် ဖြစ်သည်။

ဒုတိယ အကြောင်းရင်းမှာ ဘလက်စတားအပေါ် သူတို့ မည်မျှ အလေးထားကြောင်း သူတို့၏ သဘောထားကို ဖော်ပြရန် ဖြစ်သည်။

မြားတစ်စင်းတည်းနှင့် ငှက်နှစ်ကောင် ပစ်ခြင်းပင် ဖြစ်သည်။

ထိုအချိန်တွင် ဤတိုက်ပွဲငယ်လေး၏ အကျိုးသက်ရောက်မှုမှာ သူတို့ ထင်ထားသည်ထက် များစွာ ပိုမို ကြီးမားလိမ့်မည် ဖြစ်ကြောင်း မည်သူမျှ သတိမပြုမိခဲ့ကြပေ...

စာစဉ် (၄၃)၊ အခန်း (၆၈၅) ပြီးပါပြီ။

လင်းဆက်

+++++

အခန်း (၆၈၆) အာဏာရှင်၏ အစီအစဉ်

ဤအောင်ပွဲအပြီးတွင် ဆက်ရှင်ဇီးရိုးသည် တန်ပြန်တိုက်စစ် ဆောင်ရွက်မှုများကို ခေတ္တ ရပ်နားထားလိုက်သည်။ ဟန်ရှောင်းသည် မောရက်ဒ်နှင့် အခြားသူများ၏ ဆက်သွယ်ရန်လိပ်စာများကို ရယူပြီးနောက် ပင်မယာဉ်တန်းမှ ထွက်ခွာလာသည်။

ဤမစ်ရှင်အတွက် ဆုလာဘ်မှာ အလွန်လျင်မြန်စွာ ရောက်ရှိလာသည်။ ခရမ်းရောင် သလင်းကျောက်သည် အလွန်ပင် ရက်ရောလှပြီး စုစုပေါင်း အီးနား ၂၇ သန်းနှင့် အခြားသော ရှားပါးအရင်းအမြစ်များကို ပေးအပ်ခဲ့ရာ ဟန်ရှောင်းကို ၎င်းတို့ မည်မျှ အလေးထားကြောင်း သိသာလှသည်။

ဤတိုက်ပွဲအပြီးတွင် ရပ်ဖ်သည် ဟန်ရှောင်းကို ရတနာတစ်ခုကဲ့သို့ မြင်လာသည်။ သူသည် ဟန်ရှောင်းကို ခေတ္တ အနားယူရန် ပြောကြားခဲ့သည်။ အရေးကြီးသော မစ်ရှင်များတွင်သာ ဘလက်စတားဟူသော ဝှက်ဖဲကို အသုံးပြုရန် သူ စဉ်းစားလိမ့်မည်။ သာမန် ပြောက်ကျားစစ်ဆင်ရေးများအတွက် သူ့ကို စေလွှတ်ရန် မလိုအပ်ပေ။

ဟန်ရှောင်းမှာလည်း အေးအေးဆေးဆေး နေရသည်ကို ပို၍ သဘောကျလှသည်။ သူသည် ခရမ်းရောင် သလင်းကျောက် လူမှုအဖွဲ့အစည်းထံမှ ရရှိထားသော အရင်းအမြစ်များကို အသုံးပြုကာ သူ၏ ယန္တရားတပ်မတော်ကို ပြန်လည် ဖြည့်တင်းရန် ဤအခွင့်အရေးကို အသုံးချနိုင်သည်။ ထို့ပြင် လားဂျီးမှာလည်း လမ်းခုလတ်သို့ ရောက်ရှိနေပြီ ဖြစ်သည်။

တစ်ချိန်တည်းမှာပင် ဤစစ်ပွဲ၏ ရိုက်ခတ်မှုမှာ တဖြည်းဖြည်း ပြန့်နှံ့လာနေသည်။

“ဆက်ရှင်ဇီးရိုးသည် ကာယာကြယ်စနစ်တွင် အောင်ပွဲကြီး ရရှိခဲ့ပြီး သွေးစွန်းကုန်းမြေ၏ အခြေစိုက်စခန်း ဂြိုလ် ၁၂ ခုကို ဖျက်ဆီးပစ်ခဲ့သည်”

ဤလျှို့ဝှက်စစ်ပွဲကို အာရုံစိုက်နေကြသော ကွဲအက်ကြယ်စင်ကွင်းရှိ အမျိုးမျိုးသော လူမှုအဖွဲ့အစည်းများနှင့် အဖွဲ့အစည်းများအတွက် ဤသတင်းမှာ ၎င်းတို့ကို စိတ်ဓာတ်တက်ကြွစေသည်။ စစ်ပွဲစတင်ကတည်းက ဤသည်မှာ ဆက်ရှင်ဇီးရိုး၏ ပထမဆုံးသော အောင်မြင်သည့် တန်ပြန်တိုက်စစ် ဖြစ်သည်။ ၎င်းတို့သည် ဆက်တိုက် ရှုံးနိမ့်နေမှုများကို နောက်ဆုံး၌ အဆုံးသတ်နိုင်ခဲ့ပြီ ဖြစ်သည်။

ဤအဖွဲ့အစည်းများသည် ခရမ်းရောင် သလင်းကျောက်၏ ဗျူဟာကို သိရှိကြသည်။ ၎င်းမှာ နယ်မြေအချို့ကို မဟာဗျူဟာမြောက် စွန့်လွှတ်ကာ သွေးစွန်းကုန်းမြေ၏ တပ်ဖွဲ့ဝင်များကို ခွဲထုတ်ရန် ဖြစ်သည်။ ဤလျှို့ဝှက်စစ်ပွဲမှာ အနှေးနှင့်အမြန် ရှေ့မတိုးသာ နောက်မဆုတ်သာ အခြေအနေသို့ ရောက်ရှိသွားမည်ဖြစ်ပြီး စစ်ပွဲမှာ နှစ်ပေါင်းများစွာ ကြာမြင့်မှသာ ပြီးဆုံးမည် ဖြစ်ကြောင်း ၎င်းတို့ သိကြသည်။

စစ်ပွဲအတွင်း ပေါ်ထွက်လာသော ပါရမီရှင်များမှာ အမျိုးမျိုးသော အဖွဲ့အစည်းများ၏ အာရုံစိုက်ရာ ဖြစ်လာသည်။ စစ်ပွဲမှာ အမြဲတမ်း အင်အားကြီးသူများအတွက် စင်မြင့်တစ်ခု ဖြစ်သလို ဂုဏ်သိက္ခာအတွက် ဖြတ်လမ်းတစ်ခုလည်း ဖြစ်သည်။ စစ်ပွဲမှတစ်ဆင့် နာမည်ကျော်လာသူများ အမြဲ ရှိတတ်သည်။ အာရုံစိုက်နေသူ အားလုံးအတွက်မူ ဟန်ရှောင်းမှာ ဤစင်မြင့်ပေါ်တွင် မွေးဖွားလာသည့် အတောက်ပဆုံး ကြယ်တစ်ပွင့် ဖြစ်နေသည်မှာ ထင်ရှားလှသည်။ အခြားသူ အားလုံးမှာ သူ၏ရှေ့တွင် အရောင်မှိန်သွားကြသည်။

ဘလက်စတား၏ စစ်ပွဲစတင်ကတည်းက အချိုးအကွေ့မှာ ရှေ့ပြေးအရာရှိ ရှစ်ဦး၏ တိုက်ခိုက်မှုကို ကြံ့ကြံ့ခံနိုင်ခဲ့ခြင်း ဖြစ်သည်။ ထို့ကြောင့် သူသည် ‘မဖျက်ဆီးနိုင်သောကိုယ်ထည်’ ဆိုသည့် အမည်ကို ရရှိခဲ့ပြီး ကြယ်နယ်မြေတစ်ခုလုံးသို့ ပြန့်နှံ့သွားခဲ့သည်။

နှစ်လအကြာမှာပင် သူသည် တာမာရီယာ အပါအဝင် ကပ်ဘေးအဆင့် စူပါ ဆယ်ဦးကို သတ်ဖြတ်နိုင်ခဲ့သည့် အံ့ဩဖွယ် အောင်မြင်မှုများကို ထပ်မံရရှိသည်။ သူသည် နောက်တစ်ကြိမ် သတင်းကြီးသွားပြန်သည်။

အတိတ်က အဆင့် အေ အထက်ဆင့် မျိုးစေ့များသည် အချိန်အတော်ကြာ တိတ်ဆိတ်နေခဲ့ကြသည်။ နှစ်ပေါင်းများစွာ ကြာခဲ့သော်လည်း ၎င်းတို့ထဲမှ မည်သူမျှ အဆင့် အေ အထက်ဆင့်သစ် ဖြစ်မလာခဲ့ပေ။ ထိုနည်းတူစွာ ထိုမျိုးစေ့များသည် စာရင်းထဲသို့ စတင် ဝင်ရောက်လာချိန်တွင် အကျော်ကြားဆုံး ဖြစ်ခဲ့ကြသည်။ သံသရာတစ်ခုကဲ့သို့ ယခုအခါ ဘလက်စတား၏ အလှည့် ရောက်ရှိလာခြင်းပင် ဖြစ်သည်။

ဘလက်စတားသည် အဆင့် အေ အထက်ဆင့် မျိုးစေ့ ဖြစ်လာသည်မှာ မကြာသေးပေ။ ဤအောင်မြင်မှု နှစ်ခုမှာ သူ၏ ထင်ရှားသော လုပ်ရပ်များ ဖြစ်လာပြီး လူပေါင်းများစွာကြား ဆွေးနွေးစရာ ဖြစ်လာခဲ့သည်။ ဤမယုံကြည်နိုင်ဖွယ် အောင်မြင်မှု နှစ်ခုမှာ ဓာတ်ပြုမှုတစ်ခုကို ဖြစ်ပေါ်စေပြီး ဟန်ရှောင်းကို ကြယ်နယ်မြေ၏ နောက်ဆုံးပေါ် ခေါင်းစဉ်တစ်ခု ဖြစ်လာစေခဲ့သည်။ ကွဲအက်ကြယ်စင်ကွင်း၌ သူ၏ ကျော်ကြားမှုမှာ အရှိန်အဟုန်ဖြင့် မြင့်တက်လာပြီး သူ၏ အဆင့်အတန်းမှာလည်း လျင်မြန်စွာပင် ကြီးထွားလာခဲ့သည်။

ယခင်က ဘလက်စတားကို ကွဲအက်ကြယ်စင်ကွင်း၌ ကြီးကျယ်သောသူတစ်ဦးအဖြစ် မသတ်မှတ်ခဲ့ကြပေ။ သူ၏ အဆင့်အတန်း အများစုမှာ မျောလွင့်နဂါးကျွန်းကြောင့် ဖြစ်သည်။ သို့သော် သူသည် မျောလွင့်နဂါးကျွန်း၏ အရိပ်အောက်မှ တဖြည်းဖြည်း ထွက်ခွာလာခဲ့ပြီး သူ၏ ကိုယ်ပိုင် အဆင့်အတန်းမှာ စတင် ကြီးထွားလာသည်။ သူသည် ညတွင်းချင်း နာမည်ကျော်သွားသူဟုပင် ဆိုနိုင်သည်။

ဤတိုက်ပွဲမှတစ်ဆင့် ဟန်ရှောင်း ပြသခဲ့သည်မှာ အလားအလာသာမက သူ၏ အဆင့်တူများထဲတွင် မည်သူမျှ မယှဉ်နိုင်သော သူ၏ တကယ့် တိုက်ခိုက်နိုင်စွမ်းလည်း ဖြစ်သည်။ အဖွဲ့အစည်းများစွာအတွက်မူ ဘလက်စတားမှာ အဆင့် အေ အထက်ဆင့် တစ်ဝက် ဖြစ်နေပြီ ဖြစ်သည်။ တစ်နေ့တွင် သူသည် အဆင့် အေ အထက်ဆင့် ပလ္လင်ပေါ်တွင် ထိုင်နိုင်မည့် အခွင့်အရေး ရှိနေသည်မှာ သိသာလှသည်။

အဆင့် အေ အထက်ဆင့်တိုင်း၏ ထွက်ပေါ်လာမှုမှာ အမြဲတမ်း လူပြောများလှသည်။ အကယ်၍ ကွဲအက်ကြယ်စင်ကွင်း၌ ပဉ္စမမြောက် အဆင့် အေ အထက်ဆင့်သာ ပေါ်ပေါက်လာပါက ကလင့်နှင့် ခရမ်းရောင် သလင်းကျောက်ကြားက ပြဿနာများမှာ အရေးမကြီးတော့ပေ။

ဟန်ရှောင်းသည် ရှေ့ပြေးအရာရှိ ရှစ်ဦးကို ကြံ့ကြံ့ခံခဲ့စဉ်က ထိုအဖွဲ့အစည်းကြီးများမှာ စောင့်ကြည့်နေရုံသာ ရှိသေးသည်။ သို့သော် သူသည် ကပ်ဘေးအဆင့် အများအပြားကို သတ်ဖြတ်လိုက်သည့် သတင်း ပြန့်နှံ့သွားပြီးနောက် လူအများအပြားမှာ ငြိမ်မနေနိုင်တော့ပေ။

အချို့က သူ့ကို သေစေချင်ကြပြီး အချို့ကမူ သူ့ကို အသက်ရှင်စေချင်ကြသည်။ လူအများအပြားက သူ့ကို ဆက်သွယ်ချင်လာကြသည်။ ယခင်က စောင့်ကြည့်နေရုံသာ ရှိသောသူ အများအပြားမှာလည်း ဝင်ပါရန် ဆုံးဖြတ်လိုက်ကြသည်။ သူ ဖန်တီးလိုက်သော မုန်တိုင်းများကြောင့် ဤလျှို့ဝှက်စစ်ပွဲ၏ ရိုက်ခတ်မှုမှာ ရှိသင့်သည်ထက် ပိုမို ကျော်လွန်သွားသည်ကို ဟန်ရှောင်း မသိသေးပေ။

လျှို့ဝှက်စစ်ပွဲအောက်၌ ဝဲဂယက်တစ်ခု စတင် ဖြစ်ပေါ်နေပြီ ဖြစ်သည်။ ဤအချိန်တွင် ကလင့်နှင့် ခရမ်းရောင် သလင်းကျောက်တို့မှာ ၎င်းကို ဘာမျှ မသိရှိကြသေးသလို ဤစစ်ပွဲမှာ ၎င်းတို့ ထိန်းချုပ်မှုအပြင်ဘက်သို့ ရောက်ရှိသွားမည်ဟုလည်း မထင်ထားကြပေ။

သွေးစွန်းကုန်းမြေ ရုံးချုပ်ရှိ အာဏာရှင်၏ နန်းတော်အတွင်း၌ တောင်ငယ်တစ်ခု အရွယ်အစားရှိသော ဟီဘာသည် ပျံဝဲနေသော ပလ္လင်ပေါ်တွင် ထိုင်ရင်း ထိတ်လန့်နေသော ဂျော့ဒ်ကို ငုံ့ကြည့်နေသည်။

“တာမာရီယာ... သေသွားပြီလား”

ဂျော့ဒ် တုန်လှုပ်သွားသည်။ သူသည် မော့မကြည့်ရဲဘဲ မြေပြင်ကိုသာ စိုက်ကြည့်ရင်း ပြောလိုက်သည်။ “သူမ ဘလက်စတားရဲ့ လက်ချက်နဲ့ သေဆုံးသွားပါပြီ။ ကျွန်တော့်မှာလည်း တာဝန်ရှိပါတယ်၊ ကျွန်တော့်၏ သတင်းအချက်အလက်တွေက မတိကျခဲ့လို့ပါ...”

ကပ်ဘေးအဆင့်အောက်ရှိ သူများ သေဆုံးပါက ပြဿနာမရှိသော်လည်း တာမာရီယာမှာမူ မတူပေ။ ၎င်းသည် သွေးစွန်းကုန်းမြေ စတင်တည်ထောင်ကတည်းက တိုက်ပွဲများတွင် လိုက်ပါခဲ့သည့် အဓိက အဖွဲ့ဝင်များထဲမှ တစ်ဦး ဖြစ်သည်။ ၎င်းသည် ယခင်က အာဏာရှင်ထံမှ ကိုယ်တိုင် သင်ကြားပြသမှုများကိုပင် ရရှိခဲ့ဖူးသည်။ ဝါရင့် တရားသူကြီးတစ်ဦး သေဆုံးခြင်းမှာ ကြီးမားသော ဆုံးရှုံးမှု ဖြစ်သည်။

“အင်း၊ ကောင်းပြီ” ဟီဘာက အေးစက်သော လေသံဖြင့် ပြောလိုက်သည်။

ဂျော့ဒ် ခဏမျှ ငြိမ်သက်နေသော်လည်း သူ မျှော်လင့်ထားသည့် နောက်ဆက်တွဲ စကားများကို မကြားရသဖြင့် သူက သတိထားကာ မေးလိုက်သည်။ “ဘာများ... လုပ်ဖို့ အစီအစဉ် ရှိပါသလဲ”

“စစ်ပွဲမှာ သေဆုံးရတာက စစ်သည်တော်များအတွက် ဂုဏ်သိက္ခာရှိတဲ့ အဆုံးသတ်ပဲ” ဟီဘာက နှေးကွေးစွာ ပြောလိုက်သည်။ “စစ်ပွဲမှာ မင်းက လူတွေကို သတ်နိုင်သလို လူတွေကလည်း မင်းကို သတ်နိုင်တယ်”

ဂျော့ဒ် မှင်တက်သွားသည်။ ဤသည်မှာ အာဏာရှင်အနေဖြင့် လက်စားချေရန် အစီအစဉ် မရှိဟု ဆိုလိုခြင်းလော။

“အာ... ကျွန်တော် ထင်တာက အရှင်...”

“ငါ ဒေါသထွက်ပြီး တာမာရီယာအတွက် ချက်ချင်း လက်စားချေလိမ့်မယ်လို့ မင်း ထင်နေတာလား” ဟီဘာက မျက်မှောင်ကြုတ်လိုက်သည်။ “ဒါဆိုရင် ငါက မင်းတို့ကို ဘာအတွက် လိုအပ်တော့မှာလဲ”

ဟီဘာသည် အာဏာရှင်ဆန်သော်လည်း ၎င်းမှာ သူသည် မဆင်မခြင်နှင့် စိတ်လိုက်မာန်ပါ လုပ်တတ်သူဟု မဆိုလိုပေ။ သူသည် တည်ငြိမ်သူဖြစ်ပြီး သူ၏ လက်အောက်ငယ်သား တစ်ဦး နှစ်ဦး သေဆုံးသွားရုံဖြင့် သူ၏ အစီအစဉ်ကို ပြောင်းလဲမည် မဟုတ်ပေ။

ရန်သူ့ဘက်တွင် အဆင့် အေ အထက်ဆင့် ဝင်ရောက် တိုက်ခိုက်ခြင်း မရှိသရွေ့ သူသည် လွယ်လွယ်နှင့် လှုပ်ရှားမည် မဟုတ်ပေ။ ဤသည်ကို ကလင့်နှင့် ရှေးယခင်ကတည်းက သဘောတူထားခဲ့ခြင်း ဖြစ်သည်။

ပုံမှန်အားဖြင့် ဟီဘာသည် သူ၏ လက်အောက်ငယ်သားများကို မျက်နှာသာပေးတတ်သော်လည်း စစ်ပွဲအတွင်းမှာမူ သူသည် သွေးအေးသူ ဖြစ်သည်။ စစ်ပွဲများသည် သွေးနှင့် မီးတို့၏ စမ်းသပ်မှုများ ဖြစ်သည်၊ ဟီဘာသည် သူ၏ လက်အောက်ငယ်သားများကို ကာကွယ်ပေးမည် မဟုတ်ပေ။ သူသည် သူ၏ အရာရှိများကို စစ်မီးများကြားတွင် ကြီးထွားလာစေချင်သည်။ ၎င်းတို့ အားလုံး သေဆုံးသွားလျှင်ပင် သူ ဝမ်းနည်းမည် မဟုတ်ပေ။ သူ၏ အဖွဲ့အစည်းမှာ သူ၏ ကိရိယာတစ်ခုသာ ဖြစ်ပြီး သူ၏ အားနည်းချက် မဟုတ်ပေ။

ဂျော့ဒ် ဘာပြောရမှန်း မသိတော့ပေ။

“ဒါပေမဲ့ ဒါက ပြီးသွားပြီလို့တော့ မဆိုလိုဘူး” ဟီဘာက ပြောသည်။

“ဒါက ဘာကို ဆိုလိုတာလဲ ခင်ဗျာ” ဂျော့ဒ်က မေးလိုက်သည်။

“သူ ဒီကိစ္စအတွက် တာဝန်ခံရလိမ့်မယ်၊ ငါတို့ရဲ့ တိုက်ပွဲက ရှောင်လွှဲလို့ ရမှာ မဟုတ်ဘူး” ဟီဘာက အေးစက်စွာ ပြောလိုက်သည်။ “သူ့မှာ အဆင့် အေ အထက်ဆင့် အလားအလာ ရှိပေမဲ့ အခုချိန်အထိတော့ သူက ကပ်ဘေးအဆင့်ပဲ ရှိသေးတယ် ။ အကယ်၍ ငါ သူ့ကို အခု သတ်လိုက်ရင် အရမ်းပျင်းစရာ ကောင်းလိမ့်မယ်၊ ဒါကြောင့် သူ့ကို ကြီးထွားလာဖို့ အချိန်ပေးမယ်။”

“အကယ်၍ သူက ကပ်ဘေးအဆင့်မှာပဲ ရှိနေရင် ငါ သူ့ကို ဘာမှ လုပ်မှာ မဟုတ်ဘူး၊ ဒါပေမဲ့ သူ အဆင့် အေ အထက်ဆင့် ဖြစ်လာတာနဲ့ ငါ ကိုယ်တိုင် သူ့ကို သေတဲ့အထိ ရိုက်သတ်ပစ်မယ်။”

ခဏမျှ နားပြီးနောက် ဟီဘာက ဆက်ပြောသည်။ “အကယ်၍ စစ်ပွဲပြီးတဲ့အထိ သူ အဆင့် အေ အထက်ဆင့် ဖြစ်မလာနိုင်ဘူးဆိုရင်လည်း အဲဒီအချိန်ကျရင် ငါ သူ့ကို သတ်ပစ်ဦးမှာပဲ”

“ဒါပေမဲ့... ဘလက်စတားက အရမ်း သန်မာပါတယ်။ သူက ကျွန်တော်တို့၏ အဆင့်မြင့် တိုက်ခိုက်ရေးသမားများကို အများကြီး ထိခိုက်စေပါလိမ့်မယ်” ဂျော့ဒ်က မနေနိုင်ဘဲ ဝင်ပြောလိုက်သည်။ ဟီဘာ စိတ်ပြောင်းပြီး ဘလက်စတားကို ချက်ချင်း သတ်ပစ်ရန် သူ မျှော်လင့်နေသည်။

“ထိခိုက်မှုတွေ များလိမ့်မယ်ဆိုတာ ငါ သိတယ်...” ဟီဘာသည် ဂျော့ဒ်ကို ငုံ့ကြည့်ကာ နှေးကွေးစွာ ပြောလိုက်သည်။ “ဒါကြောင့် ဘလက်စတားဆိုတာ ငါ မင်းတို့အတွက် ချန်ထားပေးတဲ့ ရန်သူပဲ။ သူ့ကို ရင်ဆိုင်ပြီး အသက်ရှင်အောင် နေပါ၊ ပိုပြီး သန်မာလာအောင် လုပ်ပါ ဒါမှမဟုတ် သေလိုက်ကြတော့။ ကိုယ့်ကိုယ်ကိုယ် ဒီလောက်ကလေးတောင် ယုံကြည်မှု မရှိတဲ့သူတွေ ဌာနချုပ်ကို ပြန်လာဖို့ တောင်းဆိုနိုင်တယ်။ မင်းတို့ နောက်ထပ် စစ်မြေပြင်ကို သွားစရာ မလိုတော့ဘူး”

ဟန်ရှောင်း သန်မာသည်ကို ဟီဘာ သိသည်၊ ထို့ကြောင့် သူ့ကို အသုံးပြုကာ သူ၏ လက်အောက်ရှိ အရာရှိများကို လေ့ကျင့်ပေးချင်ခြင်း ဖြစ်သည်။ ယခုအခါ အဖွဲ့အစည်း အားလုံးက ဘလက်စတားကို အာရုံစိုက်နေကြသည်၊ အကယ်၍ သူကဲ့သို့သော အဆင့် အေ အထက်ဆင့် တစ်ဦးက ကပ်ဘေးအဆင့် တစ်ဦးကို ကိုယ်တိုင် တိုက်ခိုက်မည်ဆိုပါက ၎င်းမှာ သဘောထား သေးသိမ်ရာ ရောက်လိမ့်မည်။ ဘလက်စတားမှာ အဆင့် အေ အထက်ဆင့် မျိုးစေ့ ဖြစ်နေလျှင်ပင် သူသည် သူ့ကို လွယ်လွယ်နှင့် သတ်နိုင်သည်။

ဟီဘာသည် ဘလက်စတားကို သတ်ရန် အထင်အမြင် သေးလှသည်။ သူ၏ အမြင်တွင်မူ ၎င်းမှာ ယုတ်ညံ့သော လုပ်ရပ် ဖြစ်ရုံသာမက အမြော်အမြင် ကင်းမဲ့ရာလည်း ရောက်သည်။ ဘလက်စတားကို ချက်ချင်း သတ်ပစ်ခြင်းမှာ အလွန်ဆုံး စစ်ပွဲအတွင်းရှိ အဟန့်အတားများကို ဖယ်ရှားခြင်းနှင့် သူ၏ အဖွဲ့အစည်း ဆုံးရှုံးမှုများကို လျှော့ချခြင်းသာ ဖြစ်လိမ့်မည်။ ဟီဘာ၏ အမြင်တွင်မူ ၎င်းမှာ အဆင့် အေ အထက်ဆင့် တစ်ဦးကို သတ်ဖြတ်ခြင်းမှ ရရှိနိုင်သည့် အရာနှင့် နှိုင်းယှဉ်လျှင် ပြောပလောက်သည့် အရာ မဟုတ်ပေ။

သူသည် ဟန်ရှောင်းကို ကြီးထွားလာရန် အချိန်ပေးချင်သည်။ သွေးစွန်းကုန်းမြေမှာ ဤမျှ ကြီးမားပြီး အင်အားကြီးမားနေခြင်းမှာ သူကဲ့သို့သော အဆင့် အေ အထက်ဆင့် တစ်ဦးက အားလုံးကို စုစည်းထားသည့် အူတိုင် ဖြစ်နေသောကြောင့် ဖြစ်သည်။ သူ ရှိနေသရွေ့ မည်သည့် ဆုံးရှုံးမှုမျိုးမဆို ပြန်လည် ကုစားနိုင်သည်။ သူ ရှိနေသရွေ့ သွေးစွန်းကုန်းမြေမှာ လျင်မြန်စွာ ဖွံ့ဖြိုးတိုးတက်နိုင်မည် ဖြစ်သည်။

သူသည် တိုက်ခိုက်ရကျိုးနပ်သည့် ပြိုင်ဘက်တစ်ဦးကို လိုအပ်သည်။ အကယ်၍ ဘလက်စတားသာ တကယ် အဆင့် အေ အထက်ဆင့် ဖြစ်လာပါက ကြယ်နယ်မြေတစ်ခုလုံးမှာ ဟိုးလေးတကျော် ဖြစ်သွားလိမ့်မည်။ ထိုအချိန်ကျမှ သူ ဘလက်စတားနှင့် တိုက်ခိုက်မည်ဆိုပါက မည်သူမျှ ပြဿနာ ရှိလိမ့်မည် မဟုတ်ပေ။

“မင်း အားနည်းနေချိန်မှာ ငါ မင်းကို အနိုင်မကျင့်ဘူး။ မင်း ငါ့အဆင့်ကို ရောက်လာတဲ့အထိ စောင့်မယ်၊ ပြီးမှ မင်းကို သတ်မယ်”

အမြဲတမ်းလိုပင် အာဏာရှင်ဆန်လှသည်… ဤနည်းဖြင့် သူ ရရှိမည့် လွှမ်းမိုးမှုမှာ များစွာ ပို၍ ကြီးမားလိမ့်မည် ဖြစ်သည်။ ဘလက်စတား၏ သေဆုံးမှုမှာ ‘အာဏာရှင်’ ဟူသော ဘွဲ့ထူးအတွက် ဂုဏ်သက္ခာကို တစ်ဖန် ပြန်လည် ဆောင်ကြဉ်းပေးလိမ့်မည် ဖြစ်သည်။

“နားလည်ပါပြီ၊ အရှင်ရည်ရွယ်ချက်ကို လူတိုင်း သိအောင် ကျွန်တော် လုပ်လိုက်ပါ့မယ်” ဟီဘာ၏ ကိုယ်ပိုင် အရှိန်အဝါကြောင့် ဂျော့ဒ်၏ အသံမှာ ပို၍ ကျယ်လောင်လာသည်။ ဂျော့ဒ်၏ အမြင်အရ ဘလက်စတားကို ကြီးထွားလာအောင် လွှတ်ထားခြင်းမှာ အမြော်အမြင်ရှိသော ရွေးချယ်မှု မဟုတ်သော်လည်း ၎င်းမှာ အလွန်ပင် အာဏာရှင်ဆန်လှသည်။ သူသည် ဟီဘာအပေါ် အကြွင်းမဲ့ ယုံကြည်မှု ရှိသည်။ ဘလက်စတား အဆင့် အေ အထက်ဆင့် ဖြစ်လာလျှင်ပင် သူသည် အာဏာရှင်ကို ယှဉ်နိုင်မည် မဟုတ်ပေ။

“အရှင် ဟီဘာ၏ အမြင်က တခြား အဆင့်တစ်ခုမှာ ရှိနေတာပဲ။ ကျွန်တော့်၏ အမြင်က ဒီစစ်ပွဲအတွင်းမှာပဲ ပိတ်မိနေချိန်မှာ အရှင်က ပိုပြီး ကြီးမားတဲ့ အခွင့်အရေးကို မြင်နေတာပဲ။ ငါ တကယ်ကို သဘောထား သေးသိမ်ခဲ့တာပဲ။”

“ဘလက်စတားက ထပ်ပြီး သန်မာလာပြန်ပြီ”

မျောလွင့်နဂါးကျွန်း နန်းတော်အတွင်း၌ အီဆော့သည် သတင်းများကို ကြည့်နေသည်။ သူသည် သက်ပြင်းချလိုက်ပြီး ပျံဝဲနေသော ပလ္လင်ပေါ်တွင် ထိုင်နေသည့် အေးမီစ်ကို လှည့်ကြည့်လိုက်သည်။

“ငါ သူ့ကို အထင်သေးခဲ့မိတာပဲ ။ အဲဒီတုန်းက ဘလက်စတားကို မင်း၏ လက်ရုံးတစ်ဦး ဖြစ်လာစေချင်ခဲ့တာ။ သူ ဒီလောက်အထိ မြန်မြန် ကြီးထွားလာလိမ့်မယ်လို့ ငါ လုံးဝ မထင်ထားခဲ့ဘူး။ အနှေးနဲ့အမြန် သူ မျောလွင့်နဂါးကျွန်းကနေ ထွက်ခွာဖို့ တောင်းဆိုလာလိမ့်မယ်”

အေးမီစ် တိတ်ဆိတ်နေသည်။ သူမသည် ဟန်ရှောင်းကို သန်မာလာစေချင်သော်လည်း ဟန်ရှောင်း သူမအနားမှ ထွက်ခွာသွားသည်ကို မလိုလားပေ။

အီဆော့က သက်ပြင်းချကာ ပြောလိုက်သည်။ “သူ မျောလွင့်နဂါးကျွန်းအတွက် အများကြီး လုပ်ပေးခဲ့ပါတယ်၊ ဒါပေမဲ့ ငါ အဆင့် အေ အထက်ဆင့် အများအပြားကို မြင်ဖူးတယ် ။ စကြဝဠာ လူမှုအဖွဲ့အစည်း သုံးခုက မွေးမြူထားတဲ့သူများကလွဲရင် ဘယ်သူကမှ တခြားတစ်ယောက်၏ လက်အောက်မှာ မနေချင်ကြဘူး။ သူက မင်းအတွက် အရေးကြီးတယ်ဆိုတာ ငါ သိပါတယ်၊ ဒါပေမဲ့ ကွဲအက်ကြယ်စင်ကွင်းက အရမ်း ကြီးမားတယ် ။ သူက မင်း၏ လက်အောက်ငယ်သားအဖြစ် ထာဝရ နေမှာ မဟုတ်ဘူး”

“သူ ထွက်သွားနိုင်မှာ မဟုတ်ဘူး” အေးမီစ်က အေးစက်စွာ ပြောလိုက်သည်။

အီဆော့ မျက်မှောင်ကြုတ်လိုက်သည်။ “စိတ်လိုက်မာန်ပါ မလုပ်ပါနဲ့ ။ ဘာပဲဖြစ်ဖြစ် ဘလက်စတားက မင်း၏ သူငယ်ချင်းပဲ။ ဒီဆက်ဆံရေးနှင့်ဆိုရင် မင်းတို့ နှစ်ယောက်က မဟာမိတ်တွေ ဖြစ်လာမှာ သေချာပါတယ်။ ပဋိပက္ခတွေ ဖန်တီးဖို့ မလိုပါဘူး...”

“ကျွန်မ ပြောပြီးပြီပဲ၊ သူ ထွက်သွားနိုင်မှာ မဟုတ်ဘူးလို့”

အေးမီစ်က သူမ၏ အသံကို မြှင့်ကာ အီဆော့၏ စကားကို ဖြတ်ပြောလိုက်ပြီးနောက် အောက်ကိုကြည့်လိုက်သည်။

“ကျွန်မ သူ့ကို မတားနိုင်မှပဲ ဖြစ်လိမ့်မယ်”