ရန် နှင့် တု သွေးကြောမကြီးများ

တိုက်ပွဲအတွင်း ကျင့်ကြံခြင်း သည် မိမိ၏ ကျင့်ကြံမှုအဆင့်ကို မြှင့်တင်ရန် အကောင်းဆုံးနည်းလမ်းဖြစ်သည်မှာ သံသယဖြစ်ဖွယ်မရှိပေ။

ယင်ဟွိုက်ယွီသည် အသက် ၁၅၀ အထိ နေထိုင်ခဲ့သော ဝါရင့်သိုင်းသမားတစ်ဦး ဖြစ်သဖြင့် လင်ချွမ်၏ ရည်ရွယ်ချက်ကို သဘာဝကျကျ နားလည်ပါသည်။

နာကျင်ရမည်ဖြစ်သော်လည်း လက်တွေ့ဘဝကို လက်ခံရန်မှတစ်ပါး အခြားရွေးချယ်စရာမရှိပေ။

သေမည့်ရက်ကို ထိုင်စောင့်နေမည့်အစား လင်ချွမ်​၏ အကြံဉာဏ်ကိုယူပြီး အလောင်းအစားလုပ်ကြည့်ခြင်းက ပိုကောင်းပါသည်။

"အကြီးအကဲ ပြောတာ မှန်ပါတယ်၊ ဒီတပည့်ကို လမ်းညွှန်ပေးဖို့ တောင်းဆိုပါတယ်"

ယင်ဟွိုက်ယွီသည် စိတ်ကို တည်ငြိမ်အောင်ထားပြီး ပြတ်သားသော မျက်နှာထားဖြင့် ပြောလိုက်သည်။

ဤစကားသံများကြောင့် စုမေ့အာ နှင့် ကျန်းခွေ့တို့လည်း ထွက်လာကြသည်။

သူတို့နှစ်ဦးလုံးသည် ယင်ဟွိုက်ယွီကို စိတ်မဝင်စားကြဘဲ လင်ချွမ်ကိုသာ စိတ်ဝင်စားကြ ပေသည်။

လင်ချွမ်သည် အစွမ်းထက်ကြောင်း သူတို့သိသော်လည်း မည်မျှအထိ အစွမ်းထက်သနည်းဆိုသည်ကိုမူ မသိကြပေ။

ယခင်က လင်ချွမ်လက်ထဲတွင် ရှုံးနိမ့်ဖူးသောကြောင့် သူတို့သည် လင်ချွမ်​၏ ကျင့်ကြံမှုကို ပထမအဆင့်ဟုသာ အထင်သေးခဲ့ကြသည်။

သို့သော် လင်ယန်ရွှယ် ရောက်ရှိလာခြင်းက လင်ချွမ်​၏ အစွမ်းကို သူတို့အား ပြန်လည်ရှာဖွေတွေ့ရှိစေခဲ့သည်။

ငြင်း၍မရနိုင်သည်မှာ လင်ယန်ရွှယ်ပင်လျှင် လင်ချွမ်ကို မယှဉ်နိုင်ခြင်းပင်။

ဤသည်မှာ လင်ချွမ်သည် ပထမအဆင့်ကိုပင် ကျော်လွန်သွားပြီး သိုင်းလောကတွင် မကြုံစဖူး အဆင့်တစ်ခုသို့ ရောက်ရှိနေကြောင်း ပြသနေသည်။

"အလယ်ပိုင်းဒေသ သိုင်းလောကမှာ လင်ချွမ်ရှိနေတာဟာ စစ်သည်တော် တစ်ထောင်ရှိနေတာထက် ပိုတန်ဖိုးရှိတယ်"

ကျန်းခွေ့က လေးနက်စွာ ပြောလိုက်သည်။

"ကျွန်မရဲ့ ဆရာတောင် သူ့လက်မှာ ရှုံးနိမ့်ခဲ့တာဆိုတော့ အနောက်ဘက်ဒေသ နတ်ဆိုးဂိုဏ်း ၆ ဂိုဏ်းအနေနဲ့ အလယ်ပိုင်းဒေသကို သိမ်းပိုက်ဖို့ ခက်ခဲလိမ့်မယ်လို့ ထင်တယ်"

"သူက ဘာလို့ အခုထိ ကိုယ့်ကိုယ်ကိုယ် ဖုံးကွယ်ထားတာလဲ"

"နတ်ဆိုးဂိုဏ်း အလယ်ပိုင်းဒေသထဲ ဝင်လာမှ သရုပ်မှန် ဖော်ပြဖို့ စောင့်နေတာလား"

စုမေ့အာက အဝေးမှ လင်ချွမ်ကို ကြည့်ရင်း တိုးတိုးလေး ရေရွတ်နေမိသည်။

ရှောင်းယောက် တောင်ထိပ်တွင် နေထိုင်စဉ်အတွင်း သူတို့နှစ်ဦးသည် လင်ချွမ်​၏ ရည်ရွယ်ချက်ကို အမြဲခန့်မှန်းခဲ့ကြသော်လည်း မည်သည့် သတင်းအချက်အလက်မှ မရရှိခဲ့ပေ။

လင်ချွမ်​၏ လုပ်ရပ်များသည် လုံးဝ ခန့်မှန်း၍မရနိုင်အောင် ထူးဆန်းလှသည်။

"ဝှစ်!"

ရုတ်တရက် လေပြင်းတစ်ချက် တိုက်ခတ်လာသည်။

သူတို့နှစ်ဦး အမြန် မော့ကြည့်လိုက်ကြ၏။

အေးချမ်းလှသော ရှောင်းယောက် တောင်ထိပ်သို့ လေပြင်းများ ရုတ်တရက် ဝင်ရောက်လာခြင်းပင်ဖြစ်သည်။

ထိုလေမှာ လင်ချွမ်ပင် ဖြစ်၏။

သူ၏ နက်ရှိုင်းလှသော အတွင်းအားမှာ ကုန်ခမ်းခြင်းမရှိဟု ထင်ရ‌ ပေသည်။

ခြေလှမ်း ၅၀၀ ခန့် အကွာအဝေးမှပင် လင်ချွမ်ထံမှ ထွက်ပေါ်လာသော ကြီးမားသော ဖိအားကို ခံစားနေရသည်။

"အရမ်း အားကောင်းတာပဲ"

"ဆရာ့ထက် အများကြီး ပိုသာတယ်"

စုမေ့အာ မျက်လုံးများ ပြူးကျယ်သွားသည်။

လင်ချွမ်​၏ ကျင့်ကြံမှုကို တိုင်းတာသည့်အခါ သူမသည် သတိမထားမိဘဲ လင်ယန်ရွှယ်နှင့် နှိုင်းယှဉ်နေမိသည်။

လင်ယန်ရွှယ်သည် သိုင်းသမားများ၏ အင်အားကို တိုင်းတာသည့် ယူနစ်တစ်ခုကဲ့သို့ပင် ဖြစ်နေတော့သည်။

"ငါ စတော့မယ်။ အဆင်သင့်ပဲလား"

လင်ချွမ်​၏ ပေါ့ပါးသော အသံ ထွက်ပေါ်လာသည်။

ရှောင်းယောက် တောင်ထိပ်ရှိ လူအားလုံး၏ အကြည့်များမှာ သူ၏အပေါ်သို့ ကျရောက်နေသည်။

"အကြီးအကဲ... ကျေးဇူးပြုပြီး စတင်ပါ"

ယင်ဟွိုက်ယွီ အစွမ်းကုန် သတိထားနေ၏။

ပညာရှင်တစ်ဦးနှင့် ယှဉ်ပြိုင်ရခြင်းမှာ မိမိ၏ အစွမ်းကို မြှင့်တင်ရန် အကောင်းဆုံး အခွင့်အရေးဖြစ်ကြောင်း ဝါရင့်သိုင်းသမားတစ်ဦးအနေဖြင့် သူ ကောင်းစွာသိသည်။

သို့သော် သူသည် လင်ချွမ်​၏ တိုက်ခိုက်မှုကို အမှန်တကယ် ခံနိုင်ပါမည်လော။

"စကြစို့"

ရုတ်တရက် လင်ချွမ်က အသံခပ်အုပ်အုပ်ဖြင့် အော်လိုက်သည်။

လေပြင်းမှာ ပို၍ ပြင်းထန်လာပြီး တောင်ပေါ်ရှိ သစ်ပင်ကြီးများပင် ကျိုးပဲ့လုနီးပါး ဖြစ်သွားသည်။

တစ်ချိန်တည်းမှာပင် လင်ချွမ်​၏ ပုံရိပ်မှာ ဝေဝါးသွားပြီး လေထုနှင့် ရောနှောသွားကာ မျက်စိဖြင့် မမြင်နိုင်လောက်အောင် လျင်မြန်သွားသည်။

"ဝူတန် နဝမမြောက်ယန် သိုင်း"

ယင်ဟွိုက်ယွီက ခါးသီးစွာ ပြုံးရင်း သူ၏အတွင်းအားကို အစွမ်းကုန် ထုတ်ဖော်ကာ ခန္ဓာကိုယ်ပတ်လည်တွင် အကာအကွယ်အရှိန်အဝါကို တည်ဆောက်လိုက်သည်။

တိုက်စစ်သည် အကောင်းဆုံး ခုခံစစ်ဖြစ်ကြောင်း သူသိသော်လည်း လင်ချွမ်ကိုပင် မမြင်ရဘဲ မည်သို့ တိုက်ခိုက်ရမည်နည်း။

"ဝူတန် နဝမမြောက်ယန် သိုင်း ဟုတ်လား၊ ဒီလို အဆင့်နိမ့်သိုင်းကို သုံးပြီး ငါ့ရှေ့မှာ အရှက်မခွဲပါနဲ့"

လင်ချွမ်​၏ ရယ်သံမှာ ယင်ဟွိုက်ယွီ၏ နောက်ကျောဘက်မှ ထွက်ပေါ်လာသည်။

ယင်ဟွိုက်ယွီ မတုံ့ပြန်နိုင်ခင်မှာပင် သူ၏ အကာအကွယ်မှာ "ဂျွတ်" ခနဲ အက်ကွဲသွားသည်။

ထို့နောက် ပူလောင်လှသော အတွင်းအားများ တိုးဝင်လာသည်။

၎င်းမှာ ဝူတန် နဝမမြောက် ယန်သိုင်းနှင့် တူသော်လည်း ပို၍ အစွမ်းထက်လှသည်။

"နဝမမြောက် ယန်နတ်ဘုရားကျမ်းစာ"

ကျောက်ကျောင်းဆောင်ထဲမှ ကျန်းခွေ့သည် လင်ချွမ်ကို ကြောင်ကြည့်ရင်း အော်လိုက်သည်။

လင်ချွမ်း သုံးနေသော ကျင့်စဉ်ကို သူ တိုက်ရိုက်ပင် သိလိုက်ခြင်းဖြစ်၏။

ထိုပူလောင်သော အတွင်းအားမှာ မြစ်ကြီးတစ်စင်းကဲ့သို့ အဆက်မပြတ် စီးဆင်းနေသည်။

ရှောင်လင်ကျောင်းတော်၏ အထွတ်အထိပ်သိုင်းဖြစ်သော ဤကျမ်းစာမှသာ ဤအဆင့်သို့ ရောက်ရှိနိုင်သည်။

"သူက ရှောင်လင်ရဲ့ နတ်ဘုရားကျမ်းစာကိုတောင် တတ်နေတာလား"

စုမေ့အာ အလွန်အံ့ဩသွားသည်။

လင်ချွမ်မှာ သူမအတွက် နားလည်ရခက်သော နက်ရှိုင်းလှသည့် ချောက်ကြီးတစ်ခုကဲ့သို့ပင်။

အခြားတစ်ဖက်တွင် လင်ချွမ်သည် ယင်ဟွိုက်ယွီ၏ နောက်တွင်ရပ်လျက် လက်ညှိုးနှင့် လက်ခလယ်ကို ဓားကဲ့သို့ သုံး၍ ထိုးနှက်လိုက်သည်။

နှေးကွေးသည်ဟု ထင်ရသော်လည်း ယင်ဟွိုက်ယွီမှာ လုံးဝ မခုခံနိုင်ပေ။

"ဟား၊ အကြီးအကဲက ဒီအဘိုးကြီးကို အနိုင်ကျင့်လွန်းရာ ကျနေပြီ"

"အကြီးအကဲက အတွင်းအားနဲ့ ဖိထားမှတော့ ကျွန်တော် ဘယ်လို ပြန်တိုက်နိုင်မှာလဲ"

ယင်ဟွိုက်ယွီက ညည်းညူလိုက်မိသည်။

၁၈ နှစ်အရွယ် ကောင်လေးတစ်ယောက်၏ အတွင်းအားမှာ မိမိထက် များစွာ သာလွန်နေသည်ကို သူ ဝန်ခံလိုက်ရသည်။

"စကားများမနေနဲ့၊ မင်းရဲ့ ရန် နဲ့ တု သွေးကြောမကြီးတွေကို ဖွင့်ပေးနေတာ"

"ငါက မင်းနဲ့ ကစားနေတယ်လို့ ထင်နေတာလား"

လင်ချွမ်က စိတ်မရှည်စွာ ပြောလိုက်၏။

ရန် နှင့် တု သွေးကြောမကြီးများတွင် အကြောစုံမှတ် စုစုပေါင်း ၅၂ ခု ရှိသည်။

အမှတ်တစ်ခုချင်းစီကို ဖွင့်ရန် အတွင်းအား အမြောက်အမြား လိုအပ်သည်။

"ထျန်းထု၊ ချန်ကျန်း၊ လျန်ချွမ်၊ ဟွားဂိုက်"

လင်ချွမ်သည် ရန်သွေးကြောရှိ အကြောမှတ် ၂၄ ခုကို တစ်ခုချင်းစီ ရွတ်ဆိုရင်း အတွင်းအားများဖြင့် ထိုးနှက်လိုက်သည်။

ယင်ဟွိုက်ယွီမှာ နာကျင်လွန်းသဖြင့် အော်နေရသည်။

တိုက်ပွဲအတွင်း လှုပ်ရှားနေခြင်းက နာကျင်မှုကို လျော့နည်းစေမည်ဟု လင်ချွမ်က မှာထားသော်လည်း ယင်ဟွိုက်ယွီမှာ လင်ချွမ်ကို လုံးဝ မထိနိုင်ဘဲ သနားစရာကောင်းအောင် ဖြစ်နေသည်။

"နောက်တစ်ခုက တု သွေးကြော"

ယင်ဟွိုက်ယွီ ချွေးများစိုရွှဲနေ၏။

ရန် နှင့် တု သွေးကြောများ ဖွင့်ရသည်မှာ နာကျင်လိမ့်မည်ဟု သိထားသော်လည်း ယခုကဲ့သို့ သေလုမတတ် နာကျင်ရမည်ဟု သူ မထင်ထားခဲ့ပေ။

"အကြာကြီး နာနေတာထက်စာရင် တစ်ခါတည်း နာလိုက်တာက ပိုကောင်းပါတယ်! လာစမ်းပါ"

သူသည် ခုခံခြင်းကို စွန့်လွှတ်လိုက်ပြီး လင်ချွမ်စိတ်ကြိုက်လုပ်ရန် လက်ကို ဖြန့်ပေးလိုက်သည်။

"ရှေ့ပိုင်း ၊ ပိုင်ဟွေ့၊ နောက်ပိုင်း.."

လင်ချွမ်းသည် တုသွေးကြောရှိ အကြောမှတ် ၂၈ ခုလုံးကို အတွင်းအားဖြင့် အတင်းအကျပ် ဖွင့်ပေးလိုက်သည်။

ဟင်ဟွိုက်ယွီသည် အံကြိတ်ကာ အသံတိတ် အောင့်ခံနေခဲ့သည်။

နောက်ဆုံး အကြောစုံမှတ် ပွင့်သွားသောအခါ ယင်ဟွိုက်ယွီကို ဆယ်စုနှစ်ပေါင်းများစွာ တားဆီးထားသော အတားအဆီးများမှာ တစ်ခဏချင်း ပြိုလဲသွားတော့သည်။

"ပထမအဆင့် အထက်ပိုင်း"

"ငါ နောက်ဆုံးတော့ အဆင့်တက်နိုင်ပြီ၊ အဆင့်နှစ်ဆင့်တောင် တစ်ခါတည်း တက်သွားတာပဲ"

ယင်ဟွိုက်ယွီ အားရပါးရ ရယ်မောလိုက်မိသည်။

မကြာသေးမီက နာကျင်မှုများကိုပင်ချက်ချင်း မေ့သွားတော့၏။

ထို့နောက် သူသည် လင်ချွမ်​၏ ရှေ့တွင် ဒူးထောက်ကာ သုံးကြိမ်တိုင်တိုင် ဦးချလိုက်သည်။

"အကြီးအကဲရဲ့ ကျေးဇူးကို ဘယ်တော့မှ မမေ့ပါဘူး"

"နောင်မှာ အကြီးအကဲ ဘာပဲခိုင်းခိုင်း ကျွန်တော် ဘယ်တော့မှ မငြင်းပါဘူး"

ယင်ဟွိုက်ယွီသည် အလွန်အမင်း စိတ်လှုပ်ရှားနေမိသည်။

သိုင်းသမားတစ်ဦးအတွက် ကျင့်ကြံမှုအဆင့် တိုးတက်ခြင်းမှာ သူတို့၏ ဘဝတစ်ခုလုံးနှင့် ဆိုင် ပေသည်။

ထို့အပြင် လင်ချွမ်သည် သူ၏အသက်ကို နှစ်ကြိမ်တိုင်တိုင် ကယ်တင်ခဲ့သဖြင့် ကျေးဇူးရှင်ကြီးအဖြစ် သတ်မှတ်လိုက်ပြီ ဖြစ်သည်။