လက်နက်ပိုင်ဆိုင်ထားလျှင် သတ်ဖြတ်လိုစိတ်က အလိုလို ပေါ်ပေါက်လာစမြဲ။

ထိုစကားသံကို ကြားလိုက်ရသည်နှင့် ကျန်းဖန်သည် မည်သည့်အရာများ ဖြစ်ပျက်နေသည်ကို ချက်ချင်း သဘောပေါက်လိုက်လေသည်။

လုမိသားစု၏ မျိုးဆက်ဖြစ်သူ လုဝမ်တာသည် တစ်စုံတစ်ယောက်၏ ရုပ်ရည်အလှအပကို မက်မောပြီး ထိုအမျိုးသမီးကို အဓမ္မ လုယူရန် ကြိုးစားနေခြင်း ဖြစ်သည်။

ယခင်က ဤကဲ့သို့သော အဖြစ်အပျက်မျိုးကို ကြားဖူးရုံသာ ရှိခဲ့သည်။

သူ့မျက်စိရှေ့မှောက်တွင် ဤမျှ တိုက်ရိုက်ကြီး တွေ့မြင်ရလိမ့်မည်ဟု ထင်မှတ်မထားခဲ့မိပေ။

လုဝမ်တာ ဆိုသူသည် တကယ့်ကို ပျက်စီးနေသော အထက်တန်းလွှာ သားသမီးတစ်ယောက်၏ စံပြနမူနာပင် ဖြစ်သည်။

"ယုတ်မာလိုက်တာ... လုဝမ်တာက မကောင်းမှုတွေ ထပ်လုပ်နေပြန်ပြီ"

"လုမိသားစုရဲ့ မျိုးဆက် ဖြစ်ပြီးတော့ ဒီကောင်က နေ့တိုင်း ဘာမှမလုပ်ဘဲ အလကားနေနေတာ"

"သောက်စားပျော်ပါးလိုက်၊ မိန်းမကိစ္စရှုပ်လိုက်၊ လောင်းကစားလိုက်နဲ့... မကောင်းမှု ဒုစရိုက်မှန်သမျှ အကုန်လုပ်တယ်"

"ဟုတ်ပါ့... ဒီကောင်က အမျိုးကောင်းသမီးတွေကို ပြည့်တန်ဆာ လုပ်ခိုင်းတာတို့၊ မိန်းမ လုတာတို့ဆိုရင် သိပ်ကျွမ်းကျင်တာ... သူကြိုက်တဲ့ မိန်းကလေးဆိုရင် လမ်းပေါ်မှာတင် အတင်းဆွဲခေါ်ပြီး လုအိမ်တော်ကို ခေါ်သွားတာ... မောက်မာရိုင်းစိုင်းလွန်းတယ်"

"ခေါ်သွားပြီး ကောင်းကောင်းထားရင်တော့ တော်သေးတာပေါ့... ဒါပေမယ့် သူက ရိုးသွားတာ မြန်တယ်... စိတ်ကုန်သွားရင် အဲ့ဒီမိန်းကလေးတွေကို ပိုင်ဟွာအိမ်‌တော်ကို ရောင်းစားပြီး ပြည့်တန်ဆာ လုပ်ခိုင်းပစ်တာ... သေတာထက်တောင် ဆိုးသေးတယ်"

"မဖြစ်နိုင်တာ... ဒီလောက် ဥပဒေမဲ့နေတာကို... ဘယ်သူမှ မတားကြဘူးလား"

"ဟားဟား... ဘယ်သူက တားရဲမှာလဲ... သူက လုမိသားစုရဲ့ သွေးသားလေ... သူ့နောက်မှာ လုမိသားစုနဲ့ ငွေကြေးဂိုဏ်း ရှိနေတာကို... တားဖို့ကြိုးစားတဲ့သူတွေ အကုန်သေကုန်ကြပြီ"

"လုဝမ်တာက ယွင်ဇီမြို့ရဲ့ ကပ်ဘေးဆိုးကြီး ၄ ခုထဲက တစ်ခုပဲ"

လူအများအပြားသည် စိတ်အားထက်သန်စွာ ဆွေးနွေးနေကြ၏။ သူတို့သည် လုဝမ်တာ၏ အတိတ်က လုပ်ရပ်များကို ဖော်ထုတ်ပြောဆိုနေကြသည်။ ပြောမပြတတ်အောင်ပင် ဆိုးရွားလှပေသည်။

သို့သော် သူတို့သည် တီးတိုးသာ ပြောဆိုရဲကြသည်။ အသံကျယ်ကျယ် မထွက်ရဲကြချေ။

လုဝမ်တာ (သို့မဟုတ်) သူ့လက်ပါးစေများ ကြားသွားပါက ကျရောက်လာမည့် ကပ်ဘေးကို ကြောက်ရွံ့နေကြသောကြောင့် ဖြစ်သည်။

"လုမိသားစု တစ်ခုလုံးက တကယ့် ကပ်ပါးကောင်တွေပဲ"

ကျန်းဖန်၏ မျက်လုံးများတွင် အေးစက်သော အရိပ်အယောင်များ လက်သွားလေသည်။

ယခင်က လုယန်သည် သူ နာမည်ကောင်းရရန်အတွက် သူတစ်ပါးကို မဟုတ်မမှန် စွပ်စွဲရန် ကြိုးစားခဲ့ခြင်းကို ကြည့်လျှင် လုမိသားစု၏ ပြုစုပျိုးထောင်ပုံက မည်သို့ရှိကြောင်း သိသာထင်ရှားနေသည်။

တိုက်ရိုက်မျိုးဆက်များကပင် ဤကဲ့သို့ ဖြစ်နေလျှင် အခြား လုမိသားစုဝင်များ၏ စိတ်နေသဘောထားကိုဆို ခန့်မှန်းကြည့်နိုင်ပေသည်။

လုမိသားစုထဲတွင် ကိုယ်ချင်းစာတရားရှိသူ အနည်းငယ် ရှိကောင်းရှိနိုင်ပါသည်။

သို့သော် အများစုမှာမူ ရက်စက်ကြမ်းကြုတ်ပြီး မကောင်းမှု ဒုစရိုက်များကို ကျူးလွန်သူများ ဖြစ်သည်ဆိုသည်မှာ သေချာသလောက်ပင်။

အားလုံးကို သတ်ပစ်လိုက်လျှင်တောင်မှ အပြစ်ကင်းသူ အနည်းငယ် ပါဝင်ရန် ခဲယဉ်းလှသည်။

ဤအမျိုးသမီးသည်လည်း လုဝမ်တာ၏ နာမည်ဆိုးကို ကြားဖူးထားလောက်သည်။ သူမသည် အလွန် ကြောက်လန့်နေသော်လည်း သူ့ကို မပြစ်မှားရဲပေ။

"သခင်လေး... ကျွန်မက အိမ်ထောင်သည်ပါ... ကျေးဇူးပြုပြီး ကိုယ့်ကိုယ်ကိုယ် လေးစားပါဦး"

"ဪ... အိမ်ထောင်သည်လား"

"ဒါဆို မင်းယောကျာ်းကို သတ်လိုက်ရင် မင်းက မုဆိုးမ ဖြစ်သွားပြီပေါ့"

"အဲ့ဒါဆိုရင် ငါ့မယားငယ် ဖြစ်ဖို့ တရားဝင်သွားပြီလေ"

လုဝမ်တာက ပုံမှန်ကိစ္စတစ်ခုလို ပြောလိုက်သည်။

သူသည် ဤကဲ့သို့သော ကိစ္စရပ်များကို မရေမတွက်နိုင်အောင် လုပ်ဆောင်ခဲ့ဖူးသည်။

အထူးသဖြင့် ခင်ပွန်းသည်၏ ရှေ့မှောက်တွင် ဇနီးသည်ကို လုယူရခြင်းကို သူ အလွန် နှစ်သက်သည်။

၎င်းက သူ့အတွက် ထူးခြားသော စိတ်လှုပ်ရှားမှုကို ပေးစွမ်းသည်။

ဘာ…

ထိုစကားကို ကြားရသော် လူငယ်စုံတွဲ၏ မျက်နှာများ ဖြူဖျော့သွားကြသည်။

လုဝမ်တာ၏ ရူးသွပ်မှုသည် ဤမျှအထိ အစွန်းရောက်ပြီး ဥပဒေမဲ့နေလိမ့်မည်ဟု သူတို့ ထင်မှတ်မထားခဲ့ကြပေ။

"လုဝမ်တာ... ခင်ဗျားက ဂုဏ်သရေရှိ လုမိသားစုရဲ့ မျိုးဆက်တစ်ယောက်လေ"

"ဒီလို ဥပဒေမဲ့တဲ့ ကိစ္စတွေ လုပ်ရဲတယ်လား... လုမိသားစုရဲ့ ဂုဏ်သိက္ခာကျမှာ ခင်ဗျား မကြောက်ဘူးလား"

ထိုလူငယ်သည် တုန်လှုပ်ခြင်းနှင့် ဒေါသထွက်ခြင်းတို့ တပြိုင်နက် ဖြစ်ပေါ်နေသည်။

သူသည် ကျိုးကြောင်းဆီလျော်စွာ ပြောပြရန် ကြိုးစားလိုက်သည်။

အချည်းနှီး ဖြစ်မည်ကို သိသော်လည်း သူ့ဇနီးသည်ကို အခြားသူတစ်ယောက်က ခေါ်ဆောင်သွားသည့် မြင်ကွင်းကို သူ လက်ပိုက်ကြည့်မနေနိုင်ချေ။

"ဥပဒေမဲ့တယ် ဟုတ်လား... ဘာတွေ လာပြောနေတာလဲ"

"ယွင်ဇီမြို့မှာ ငါ့လုမိသားစုက ဥပဒေပဲ၊ ကောင်းကင်ပဲ"

"ငါ့လုမိသားစုကို အာခံတာကမှ ဥပဒေမဲ့တာ"

"သာမန်အရပ်သား တစ်ယောက်ကများ ငါ့ကို လာအော်ရဲတယ်ပေါ့"

"ဖမ်းလိုက်စမ်း... လုအိမ်တော်ကို ခေါ်သွားပြီး ခွေးကျွေးပစ်လိုက်"

လုဝမ်တာက အေးစက်စွာ ပြုံးလိုက်ပြီး ထိုသာမန်လူကို အရေးပင် မစိုက်ချေ။

လုမိသားစု၏ ကျောထောက်နောက်ခံ ရှိနေသဖြင့် သူသည် ယွင်ဇီမြို့တွင် ဥပဒေဖြစ်ပြီး ပြိုင်ဘက်ကင်းသည်ဟု ယုံကြည်ထားသည်။

အမိန့်တစ်ခွန်း ပေးလိုက်ရုံဖြင့် လူ့အသက်ပေါင်းများစွာကို နှုတ်ယူပစ်နိုင်သည်။

"ဟုတ်ကဲ့ပါ"

ချက်ချင်းပင် အစောင့်အချို့ ရှေ့တိုးလာပြီး ထိုလူငယ်ကို လက်သီးဖြင့် ထိုးချလိုက်ရာ နှာခေါင်းရိုး ကျိုးသွား၏။ ချက်ချင်း မျက်နှာတစ်ခုလုံး သွေးများ ဖုံးလွှမ်းသွားကာ နာကျင်စွာ လူးလိမ့်နေရရှာသည်။

အမျိုးသမီးငယ်လေးမှာမူ ကြောက်လန့်လွန်းသဖြင့် မြေပြင်ပေါ်သို့ လဲကျသွားပြီး သတိလစ်မေ့မြောလုနီးပါး ဖြစ်သွားသည်။

"ဒါက..."

ဤမြင်ကွင်းကို မြင်လိုက်ရသော လူအုပ်ကြီးသည် သနားကရုဏာသက်သော အကြည့်များဖြင့် ကြည့်နေကြသည်။

ဤစုံတွဲသည် လမ်းလျှောက်လာရုံသာ ရှိသေးသည်။

လုဝမ်တာနှင့် တွေ့ဆုံလိုက်ရခြင်းသည် ကောင်းကင်မှ ကျလာသော ကပ်ဘေးတစ်ခုနှင့် ကြုံတွေ့လိုက်ရခြင်းပင် ဖြစ်၏။

လုဝမ်တာ၏ လုပ်ရပ်များသည် စကားလုံးဖြင့် ဖော်ပြ၍ မရနိုင်လောက်အောင် ယုတ်မာလွန်းလှသည်။

သို့သော် မည်သူကမျှ သူ့ကို အပြစ်ပေးနိုင်ခြင်း မရှိပေ။

လူအုပ်ကြီးသည် စွမ်းအားမဲ့နေကြသည်။

ယွင်ဇီမြို့တွင် လုမိသားစု၏ အာဏာစက်သည် ကြီးမားလွန်းသဖြင့် မည်သူမျှ ရန်မစရဲကြချေ။

လုမိသားစုကို ပြစ်မှားမိပါက ယွင်ဇီမြို့တွင် အသက်မွေးဝမ်းကျောင်းပြုရန် ဆိုသည်မှာ မဖြစ်နိုင်တော့ပေ။

"ငါ တကယ် သည်းမခံနိုင်တော့ဘူး"

ကျန်းဖန်၏ မျက်လုံးများတွင် အေးစက်သော အရိပ်အယောင်များ ပေါ်လာသည်။

သူသည် ကိုယ့်ကိစ္စကိုယ်သာ ဂရုစိုက်ပြီး သူတစ်ပါးကိစ္စတွင် ဝင်မပါရန် တွေးထားခဲ့သည်။

ဤကိစ္စသည် သူနှင့် မဆိုင်ပေ။

ဤကမ္ဘာလောကတွင် ဝမ်းနည်းဖွယ်ရာ ဇာတ်လမ်းများ များပြားလွန်းလှသဖြင့် သူ အားလုံးကို ဂရုမစိုက်နိုင်ပေ။

သို့သော် လုဝမ်တာ၏ အာဏာရှင်ဆန်မှုသည် စည်းကျော်လွန်းနေပြီ ဖြစ်သည်။

သူ့စိတ်ကို အနှောင့်အယှက် ဖြစ်စေသည်။

ယခင်က သူသည် သာမန်တံငါသည် တစ်ယောက်သာဖြစ်ပြီး ဤလိုကိစ္စရပ်များကို ဘာမှ မတတ်နိုင်ခဲ့ပေ။

သို့သော် ယခုမူ သူသည် ကိုယ်တွင်းအင်္ဂါ သန့်စင်ခြင်း အဆင့် သိုင်းပညာရှင် တစ်ယောက် ဖြစ်နေပြီ ဖြစ်သည်။

ယွင်ဇီမြို့တွင် ထိပ်တန်း တိုက်ခိုက်ရေးသမား တစ်ဦး ဖြစ်သည်။

ဆိုရိုးစကား ရှိသည်မဟုတ်လော… "လက်နက်ပိုင်ဆိုင်ထားရင် သတ်ဖြတ်လိုစိတ်က အလိုလို ပေါ်ပေါက်လာတတ်တယ်" ဟူ၍။

အကယ်၍ လုဝမ်တာကို မသတ်ဖြတ်လိုက်ရပါက သူ့စိတ်များ ရှင်းလင်းနိုင်မည် မဟုတ်ပေ။

အခြားအကြောင်းပြချက် မရှိပါ... သူ စိတ်ထွက်ပေါက် လိုချင်ရုံ သက်သက်သာ ဖြစ်သည်။

အထက်တန်းလွှာများကို သာမန်လူများတွင်လည်း ဒေါသဆိုတာ ရှိကြောင်း ပြသချင်သည်။

အကယ်၍ သူတို့ စည်းကျော်လာပါက အထက်တန်းလွှာ မိသားစုများ အားလုံး မျိုးပြုန်းသွားနိုင်သည် ဆိုသည့်အချက်ကို သိစေချင်သည်။

ထိုသို့ တွေးတောရင်း ကျန်းဖန်သည် ဟင်းလင်းပြင်လက်စွပ် အတွင်းမှ ကျောက်ခဲအချို့ကို ထုတ်ယူလိုက်လေသည်။

ဤကျောက်ခဲများကို အရေးကြီးသော အချိန်များတွင် လက်နက်အဖြစ် အသုံးပြုရန် သိမ်းဆည်းထားခဲ့ခြင်း ဖြစ်သည်။

နောက်ဆုံးတော့ အသုံးပြုရမည့်အချိန် ရောက်လာခဲ့လေပြီ။

ဝှစ်…

ချက်ချင်းပင် သူသည် ကျောက်ခဲတစ်လုံးကို ဆုပ်ကိုင်လိုက်ပြီး လုဝမ်တာရှိရာဆီသို့ ပြင်းထန်စွာ ပစ်လွှတ်လိုက်လေသည်။

သူသည် လက်နက်ပုန်း အသုံးပြုရာတွင် မကျွမ်းကျင်သော်လည်း သူ၏ ဓားသိုင်းအဆင့်သည် အသေးစိတ် အဆင့်သို့ ရောက်ရှိနေပြီ ဖြစ်သည်။

သူသည် မိမိခန္ဓာကိုယ်ရှိ အင်အားအားလုံးကို ပြီးပြည့်စုံစွာ ထိန်းချုပ်နိုင်သည်။

ဆိုရိုးစကား ရှိသည်မဟုတ်လော... တစ်ခုကို နားလည်ပါက အများအပြားကို သဘောပေါက်နိုင်သည် ဟူ၍။

သိုင်းပညာလမ်းစဉ်သည်လည်း ထိုသဘောတရားအတိုင်းပင် ဖြစ်သည်။

လက်ထဲတွင် ကျောက်ခဲတစ်လုံး ရှိနေလျှင်ပင် ပစ်မှတ်ကို တိကျစွာ ထိမှန်အောင် ပစ်ခတ်နိုင်သည်။

နောက်တစ်စက္ကန့်တွင် ပေါင်တစ်ထောင်အား ပါဝင်သော ကျောက်ခဲသည် လုဝမ်တာဆီသို့ ကျည်ဆန်တစ်တောင့်ကဲ့သို့ ပျံသန်းသွားလေသည်။

ဘုန်း…

လုဝမ်တာ၏ မျက်နှာသည် ရက်စက်သော အပြုံးဖြင့် ပြည့်နှက်နေ၏။ သူသည် ထိုအမျိုးသမီးကို ဖမ်းဆီးကာ အိမ်သို့ ခေါ်ဆောင်သွားမည်။ ပြီးနောက် နည်းမျိုးစုံဖြင့် နှိပ်စက်ကစားကာ သူမ၏ ဆင်းရဲဒုက္ခကို ကြည့်ရှုခံစားမည့် အကြောင်းကို စိတ်ကူးယဉ်နေသည်။

ဤအရာက သူ၏ ဖောက်ပြန်သော ဆန္ဒများကို ဖြည့်ဆည်းပေးသည်။

မည်သို့ပင်ဆိုစေ သူမသည် သာမန်အရပ်သူ တစ်ယောက်သာဖြစ်ပြီး သူ့ကို ဖီဆန်နိုင်စွမ်း မရှိပေ။

လုမိသားစု၏ မျိုးဆက်တစ်ယောက် အနေဖြင့် သူ့ကို ဘယ်သူက ရင်ဆိုင်ရဲမှာလဲ။

သို့သော် ထိုအချိန်တွင် ကျောက်ခဲတစ်လုံး ဝင်ရောက်လာပြီး သူ့ခေါင်းကို တစ်ခါတည်း ထိမှန်သွားခဲ့လေသည်။

ရုတ်ခြည်းပင် ကြီးမားသော တုန်ခါမှုဒဏ်ကို မခံနိုင်တော့ဘဲ သူ့ခေါင်းသည် ဖရဲသီးကွဲထွက်သကဲ့သို့ ပေါက်ကွဲသွားပြီး အသားစများ လွင့်စဉ်ကာ ခေါင်းပြတ်အလောင်းသာ ကျန်ရစ်တော့သည်။

သွေးအိုင်ကြီး တစ်ခုသည် မြေပြင်ပေါ်တွင် ပျံ့နှံ့သွားပြီး မြေကြီးကို ရဲရဲနီသွားစေသည်။

တစ်ချက်တည်းနှင့် လုဝမ်တာ၏ ခေါင်း ပေါက်ကွဲသွားပြီး ရုန်းကန်ရန် အခွင့်အရေးပင် မရလိုက်ဘဲ ချက်ချင်း သေဆုံးသွားခဲ့ရသည်။