အထက်တန်းလွှာ၏ လက်ပါးစေများကို သတ်ဖြတ်ခြင်း၊ သတ္တမအဆင့် အခွင့်အလမ်းကို ရရှိခြင်း

သို့သော် ထိုသို့ဖြစ်နေသည့်တိုင် မသေမျိုး ဂူနန်းတော် အတွင်းသို့ ဝင်ရောက်လိုသူများမှာ အဆုံးမရှိအောင် များပြားနေဆဲ ဖြစ်သည်။

ထို့ပြင် ကောင်းကင်အောက်တွင် လေလုံသော နံရံဟူ၍ မရှိပေ။

အချိန်ကြာလာသည်နှင့်အမျှ မသေမျိုး ဂူနန်းတော်နှင့် မသေမျိုး လက်မှတ်တို့၏ သတင်းများသည် တဖြည်းဖြည်း စတင် ပျံ့နှံ့လာခဲ့သည်။

မရိုးသားသော ရည်ရွယ်ချက်ရှိသူ အချို့ သိရှိသွားကြသည်။

သံသယဖြစ်ဖွယ် မရှိသည်မှာ မျက်ခုံးနီ ပုန်ကန်သူတပ်ခေါင်းဆောင် ချန်ယောက်ချွမ်သည် ထိုကဲ့သို့သော လူစားမျိုး ဖြစ်သည်။ ယွင်မုန်ကန်၏ နက်ရှိုင်းသော နေရာရှိ မသေမျိုး ဂူနန်းတော်အကြောင်းအား သူ မည်ကဲ့သို့ သိရှိသွားသည်ကိုမူ မည်သူမျှ မသိကြပေ။

"ဒါပေမဲ့ ဘာလို့ ချန်ယောက်ချွမ်က ငါတို့ လုမိသားစုကို ပစ်မှတ်ထားရတာလဲ"

"ယွင်ဇီမြို့က မိသားစုကြီး သုံးခုစလုံးက ဒီလျှို့ဝှက်ချက်ကို သိကြတာပဲဟာ... ပြီးတော့ သူတို့အားလုံးမှာ မသေမျိုး လက်မှတ်တွေ ရှိကြတာပဲ"

"ငါတို့ လုမိသားစုကို အနိုင်ကျင့်ရ လွယ်တယ်လို့ ထင်နေတာများလား"

လုမိသားစု အကြီးအကဲ တစ်ဦးသည် အံကြိတ်ရင်း အလွန် စိတ်ရှုပ်ထွေးနေလေသည်။

မည်သို့ပင်ဆိုစေကာမူ ယွင်ဇီမြို့တွင် လုမိသားစု၊ ရှဲ့မိသားစု နှင့် မူမိသားစု ဟူသော အထက်တန်းလွှာ မိသားစုကြီး သုံးခု ရှိသည်။

လုမိသားစုသည် ငွေကြေးဂိုဏ်းကို ထိန်းချုပ်ထားပြီး ယွင်ဇီမြို့တွင် ဆိုင်ခန်းအများအပြားနှင့် မှောင်ခိုဈေးကွက်များကို ပိုင်ဆိုင်ထားသည်။

မူမိသားစုကမူ ယွင်ဇီမြို့၏ စစ်တပ်ကို ထိန်းချုပ်ထားပြီး မူမိသားစု ခေါင်းဆောင် မူတာသည် ယွင်ဇီမြို့၏ မြို့စားနှင့် သိုင်းပညာ အရှင်သခင် တစ်ဦးဖြစ်ကာ ကြီးမားသော အာဏာကို ပိုင်ဆိုင်ထားသည်။

ရှဲ့မိသားစုသည် သီးသန့်နေတတ်ပြီး အာဏာသိပ်မရှိသော်လည်း ရေယာဉ်စုတစ်ခုကို ထိန်းချုပ်ထားကာ ယွင်မုန်ကန်၏ ငါးဖမ်းလုပ်ငန်းနှင့် ဆိပ်ကမ်းလုပ်ငန်းများကို လက်ဝါးကြီးအုပ်ထားသဖြင့် နေ့စဉ် ငွေကြေးအမြောက်အမြား ရရှိနေသည်။

သို့သော် ရှဲ့မိသားစု၏ အင်အားသည် ကြောက်မက်ဖွယ် အကောင်းဆုံး ဖြစ်သည်။ အဘယ်ကြောင့်ဆိုသော် ရှဲ့မိသားစုတွင် ဝိညာဉ်အမြစ် ရှိသော ကျင့်ကြံသူတစ်ဦး ရှိခဲ့ဖူးပြီး ထိုသူသည် မသေမျိုး ကမ္ဘာတွင် ကျင့်ကြံနေသည်ဟု သတင်းထွက်နေသောကြောင့် ဖြစ်သည်။ ထို့ကြောင့် မည်သူမျှ မရန်စရဲကြပေ။

ကျင့်ကြံသူ၏ မျိုးဆက်များ မရှိလျှင်တောင်မှ ရှဲ့မိသားစုမှ သိုင်းပညာ အရှင်သခင် အနည်းငယ်သည်ပင် ထိတွေ့၍ မရနိုင်လောက်အောင် အင်အားကြီးမားလှသည်။

လုမိသားစု တစ်ခုတည်းသာ ကြွယ်ဝချမ်းသာပြီး ဂုဏ်သရေရှိပုံ ပေါက်နေသော်လည်း အမှန်တကယ်တွင် အထက်တန်းလွှာ မိသားစုကြီး သုံးခုထဲတွင် အားအနည်းဆုံး ဖြစ်သည်။

လက်ရှိတွင် လုမိသားစုအတွက် တစ်ဦးတည်းသော သိုင်းပညာ အရှင်သခင်သည် ခေါင်းဆောင် လုခိုင်သာ ရှိသည်။

ကျန်ရှိနေသော အကြီးအကဲများသည် ကိုယ်တွင်းအင်္ဂါ သန့်စင်ခြင်း အဆင့်မျှသာ ရှိကြပြီး အရှင်သခင် ဖြစ်လာရန် မျှော်လင့်ချက် မရှိကြချေ။

"ဝန်မခံချင်ပေမဲ့ ချန်ယောက်ချွမ်က ငါတို့ လုမိသားစုကို အနိုင်ကျင့်ရ လွယ်တယ်လို့ မြင်နေပုံရတယ်"

"ဒါကြောင့် သူက ငါတို့ကို အကြိမ်ကြိမ် ပစ်မှတ်ထားနေတာပေါ့"

"ပြီးတော့ မကြာခင် မျက်ခုံးနီ ပုန်ကန်သူတပ်က ယွင်ဇီမြို့ကို ထပ်တိုက်တော့မယ်"

"မြို့ကျသွားရင် ငါတို့ လုမိသားစုအတွက် ကပ်ဘေးဆိုးကြီး ဖြစ်လာလိမ့်မယ်"

လုမိသားစု ခေါင်းဆောင် လုခိုင် အံကြိတ်ထားမိသည်။ သူ အလွန် မကျေမနပ် ဖြစ်နေမိသည်။

နှစ်ပေါင်းများစွာ စည်းစိမ်ချမ်းသာ ခံစားလာခဲ့ပြီးနောက် ဤကဲ့သို့သော အဖြစ်အပျက်မျိုး ဖြစ်လာသည်ကို မည်သူ သည်းခံနိုင်ပါမည်နည်း။

လုမိသားစု၏ အာဏာကို ကာကွယ်ရန်အတွက် သူတို့သည် မည်သည့်အရာကိုမဆို လုပ်ဆောင်ကြပေလိမ့်မည်။

"ခေါင်းဆောင်... အခု ကျွန်တော်တို့ ဘာဆက်လုပ်ကြမလဲ"

"မျက်ခုံးနီ ပုန်ကန်သူတပ်ကို ခုခံဖို့အတွက် တခြား အထက်တန်းလွှာ မိသားစုကြီး နှစ်ခုနဲ့ ပူးပေါင်းလို့ မရဘူးလား"

"ဟုတ်တယ်... မျက်ခုံးနီ ပုန်ကန်သူတပ် ယွင်ဇီမြို့ကို ထိုးဖောက်ဝင်ရောက်လာတာမျိုး ဘယ်လိုနည်းနဲ့မှ အဖြစ်ခံလို့ မရဘူး"

အကြီးအကဲ အများအပြား အလွန် စိုးရိမ်ပူပန်နေကြသည်။ လူငယ်စုံတွဲအား လက်စားချေရေးကဲ့သို့သော အသေးအဖွဲ ကိစ္စများကို သူတို့ ဂရုမစိုက်နိုင်ကြတော့ပေ။ လုမိသားစုအပေါ် ကျရောက်လာမည့် ကပ်ဘေးကြီးက သူတို့၏ စိတ်ကို ကြီးမားစွာ ဖိစီးထားသောကြောင့် ဖြစ်သည်။

ဤအကျပ်အတည်းကို မကျော်လွှားနိုင်ပါက လုမိသားစု လုံးဝ မျိုးပြုန်းသွားနိုင်သည်။

ထို့ကြောင့် သေရေးရှင်ရေးနှင့် ရင်ဆိုင်ရချိန်တွင် အခြားအရာ အားလုံးကို ဘေးဖယ်ထားရမည် ဖြစ်သည်။

လုဝမ်တာ သေဆုံးခြင်းအတွက်မူ လုမိသားစုဝင် တစ်ယောက် ဆုံးရှုံးလိုက်ရခြင်းမျှသာ ဖြစ်သည်။

မိသားစု တစ်ခုလုံးနှင့် ယှဉ်လျှင် ပြောပလောက်စရာ မရှိပေ။

"ပေါင်းလိုက်ရင်တောင်မှ ငါတို့မှာ အရှင်သခင် ၄၊ ၅ ယောက်လောက်ပဲ ရှိတာ"

"ဒါပေမဲ့ ကြားတာတော့ ချန်ယောက်ချွမ်က အပြင်ကနေ အရှင်သခင် အများအပြားကို ငွေအများကြီးပေးပြီး ငှားထားတယ်တဲ့"

"အောင်ပွဲက သူ့လက်ထဲ ရောက်နေပြီလို့ ပြောလို့ရတယ်"

"သူ ဒီလောက် အရေးတကြီး လှုပ်ရှားနေတာ ကြည့်ရင်... ချန်ယောက်ချွမ်က မသေမျိုး ဂူနန်းတော် မကြာခင် ပွင့်တော့မယ်ဆိုတာ သိနေပုံရတယ်"

"ဒါကြောင့် သူက ငါတို့ ယွင်ဇီမြို့ကို အမြန်ဆုံး တိုက်ခိုက်ချင်နေတာပေါ့"

"ဒါကြောင့် ငါတို့ အစီအစဉ် နှစ်မျိုး ပြင်ဆင်ထားဖို့ လိုတယ်"

ခေါင်းဆောင် လုခိုင် လေးနက်စွာ ပြောလိုက်သည်။

"ခေါင်းဆောင်... ဘာတွေ ပြင်ဆင်ဖို့ လိုသလဲ"

အကြီးအကဲ အများအပြား မေးမြန်းလိုက်ကြသည်။

ယခုအချိန်သည် လုမိသားစုအတွက် သေရေးရှင်ရေး အခိုက်အတန့် ဖြစ်ကြောင်း သူတို့ နားလည်ထားကြသည်။

မည်သို့သော အခြေအနေမျိုး ဖြစ်ပါစေ အားလုံး စည်းလုံးညီညွတ်ရန် လိုအပ်သည်။

"မသေမျိုး ဂူနန်းတော်ထဲ ဝင်ရောက်မယ့် ကိုယ်စားလှယ်လောင်းတွေကို ရွေးချယ်ဖို့ လိုတယ်"

"ယွင်ဇီမြို့ တင်းခံနိုင်ရင်တော့ ကောင်းတာပေါ့"

"မခံနိုင်ရင်တော့ လူတချို့ကို လျှို့ဝှက်လမ်းကနေတစ်ဆင့် ယွင်ဇီမြို့အပြင်ဘက်ကို ပို့ဆောင်ပြီး မသေမျိုး လက်မှတ်ကိုပါ ယူသွားခိုင်းရမယ်"

"မသေမျိုး လက်မှတ် ရှိနေသရွေ့ ငါတို့ လုမိသားစုက မကြာခင် ဒါမှမဟုတ် နောက်ပိုင်းကျရင် ပြန်လည် ထွန်းတောက်လာနိုင်မှာပဲ"

"ဝိညာဉ်အမြစ်ပါတဲ့ မျိုးဆက်သစ်တစ်ယောက် ပေါ်ထွက်လာရင် အောင်မြင်မှု အကြီးကြီး ရလိမ့်မယ်"

"ဒါကြောင့် ငါတို့ သေသွားရင်တောင် မသေမျိုး လက်မှတ်ကို အဆုံးရှုံးခံလို့ မဖြစ်ဘူး"

ခေါင်းဆောင် လုခိုင်က ပြတ်သားစွာ ပြောလိုက်သည်။

"ဟုတ်ကဲ့ပါ ခေါင်းဆောင်"

အကြီးအကဲ အများအပြား ခေါင်းညိတ်လိုက်ကြသည်။ ခေါင်းဆောင်သည် အဆိုးရွားဆုံး ရလဒ်အတွက် ကြိုတင်ပြင်ဆင်ထားပြီး ဖြစ်သည်မှာ သံသယဖြစ်ဖွယ် မရှိပေ။

မည်သို့ပင်ဖြစ်စေ နှစ်ရာချီ တည်ထောင်ထားသော မျိုးနွယ်စုကြီးတစ်ခု အနေဖြင့် ရန်သူများက လုမိသားစုကို အမြစ်ပြတ် သုတ်သင်ရန် ဆိုသည်မှာ လွယ်ကူမည် မဟုတ်ချေ။

…

သုံးရက်အကြာတွင် ဖြစ်သည်။

ကျန်းဖန်နှင့် စုဝေဝေတို့သည် အိမ်၌ပင်နေ၍ အေးချမ်းစွာ နေထိုင်နေခဲ့ကြသည်။

လုဝမ်တာကို တိတ်တဆိတ် သတ်ဖြတ်ခဲ့ခြင်းသည် သူ့အား မည်သည့် ပြဿနာမျှ ယူဆောင်လာပေးခြင်း မရှိခဲ့ချေ။

မည်သို့ပင်ဆိုစေ သူ၏ လုပ်ရပ်များသည် အလွန် လျှို့ဝှက်ပြီး မျက်မြင်သက်သေပင် မရှိခဲ့ပေ။

မျက်မြင်သက်သေ ရှိခဲ့လျှင်ပင် ထိုအချိန်က သူသည် ရုပ်ဖျက်ထားခဲ့ပြီး ဖြစ်သည်။

ထို့ကြောင့် သူ အမှန်တကယ် ဘယ်နေရာရောက်နေသည် ဆိုသည်ကို ရှာဖွေရန် မဖြစ်နိုင်ပေ။

အခြေခံအားဖြင့် လျှို့ဝှက်အန္တရာယ် အားလုံးကို သူ ဖယ်ရှားပြီး ဖြစ်သည်။

သို့သော် သူ့ကို စိတ်ရှုပ်ထွေးစေသည့် အချက်မှာ လုမိသားစုသည် လုဝမ်တာကို သတ်ဖြတ်သူအား ရှာဖွေရန် အသည်းအသန် ကြိုးပမ်းခြင်း မရှိဘဲ ထိန်းသိမ်းထားခြင်း၊ မိသားစုဝင်များကိုပင် အပြုအမူ ထိန်းသိမ်းရန်နှင့် မြို့တွင်းမှ အပြင်မထွက်ရန် ညွှန်ကြားထားခြင်းတို့ ဖြစ်သည်။

ရလဒ်အနေဖြင့် လုမိသားစု၏ ဆိုးသွမ်းသော သားသမီးများက ဒုက္ခမပေးတော့သဖြင့် ယွင်ဇီမြို့ အပြင်ဘက်ပိုင်း၏ လုံခြုံရေးသည် ပိုမို ကောင်းမွန်လာခဲ့သည်။

သို့သော် လုမိသားစုသည် ဤကိစ္စလေးတစ်ခုကြောင့် သူတို့၏ အကျင့်ဗီဇကို ပြောင်းလဲလိမ့်မည် မဟုတ်ဟု ကျန်းဖန် ခံစားမိသည်။

လုမိသားစု ဤမျှ ယဉ်ကျေးသိမ်မွေ့လာစေရန် အတွက် ကြီးမားသော ကိစ္စရပ်တစ်ခု ဖြစ်ပျက်ခဲ့ရမည် ဖြစ်သည်။

မည်သို့ပင်ဆိုစေ ခွေးသည် မစင်စားသည့် အကျင့်ကို ဖျောက်ဖျက်၍ မရနိုင်ပေ (ဆိုလိုသည်မှာ လူယုတ်မာသည် သဘောထား ပြောင်းလဲမည် မဟုတ်ပေ)။

ဤမျှ မောက်မာပြီး မဆင်မခြင် ပြုမူတတ်သော လုမိသားစုက ဤကဲ့သို့ ထိန်းသိမ်းနေခြင်းသည် ကြီးမားသော အကြောင်းရင်းတစ်ခု ရှိနေသောကြောင့်သာ ဖြစ်ပေလိမ့်မည်။

သေချာသည်မှာ သူ၏ အလိုလိုသိစိတ်သည် မှန်ကန်နေပေသည်။