ရွှမ်ထျန်းဇီ၏ မျက်နှာပျက်သွားခြင်း

ယေဘုယျအားဖြင့်ဆိုရလျှင် အကုသိုလ်ကံက ကုသိုလ်ကံထက် သာလွန်နေသူများကိုသာ ဟေးဝူးချန် တို့ကဲ့သို့သော ငရဲမင်းတမန်များက လာရောက်ဖမ်းဆီးလေ့ ရှိကြသည်။

“ဒါ... ဒါက ဘယ်လိုလုပ် ငရဲမင်းတမန် ဖြစ်နေရတာလဲ။ ဘိုးဘေးကြီးက တစ်သက်လုံး ကုသိုလ်တွေပဲ လုပ်လာတာလေ ၊ မကောင်းမှုဆိုတာ လုံးဝ မလုပ်ခဲ့ဘူးဆိုတာ ငါအသိဆုံးပဲ”

မိမိရှေ့မှ ငရဲမင်းတမန်ကို ကြည့်ကာ ရွှမ်ထျန်းဇီ ၏ မျက်နှာမှာ ဖြူလျော့သွားတော့သည်။

“မော်ရှန်းဂိုဏ်းက ရွှမ်ယိအန်း ၊ မင်းက ကောင်းကင်အလိုကို ဆန့်ကျင်ပြီး သက်တမ်းကို အဓမ္မတိုးခဲ့တဲ့အတွက် ကြီးမားတဲ့ ဝဋ်ကြွေးတွေကို ခံစားရမယ်၊ အခုချက်ချင်း ငရဲပြည်ကို လိုက်ခဲ့ပြီး အပြစ်ဒဏ် ခံယူစမ်း”

ငရဲမင်းတမန်က အေးစက်စွာ ဟောက်လိုက်ပြီးနောက် ဝိညာဉ်ဖမ်းသံကြိုးများကို ထုတ်ကာ ဘိုးဘေးကြီးရွှမ်ယိအန်းကို ချည်နှောင်လိုက်တော့သည်။

“ဘာပြောတယ်... သက်တမ်းတိုးခဲ့တဲ့ ကိစ္စကြောင့်ဟုတ်လား”

ရွှမ်ထျန်းဇီ၏ မျက်နှာမှာ ပို၍ပင် ပျက်ယွင်းသွားတော့သည်။ ဘိုးဘေးကြီးမှာမူ ခါးသီးစွာ ပြုံးလိုက်၏။

“လာရမယ့်အရာကတော့ လာတာပါပဲလေ၊ ရွှမ်ထျန်း... မင်း မှတ်ထားပါ ၊ သက်တမ်းကို အတင်းအဓမ္မ တိုးမြှင့်တာက ကောင်းကင်ကို စိန်ခေါ်တာပဲ ၊ နောက်နောင် ဒါမျိုးကို ဘယ်တော့မှ လုပ်ဖို့ မကြိုးစားပါနဲ့”

“ဘိုးဘေးကြီးရယ်... အဲ့ဒါကို သိရက်နဲ့ ဘာလို့ လုပ်ခဲ့တာလဲဗျာ”

ရွှမ်ထျန်းဇီမှာ ဘိုးဘေးကြီးသည် ဂိုဏ်း၏ အနာဂတ်အတွက် မိမိကိုယ်ကို စတေးခဲ့ခြင်းဖြစ်ကြောင်း နားလည်သွားသဖြင့် ရင်ထဲ၌ ဆို့နင့်နေတော့သည်။ ဘိုးဘေးကြီးမှာ ငရဲပြည်သို့ ပါသွားခဲ့ပြီ ဖြစ်သော်လည်း သူ၏ သေဆုံးမှုကို ဂိုဏ်းအတွင်း လျှို့ဝှက်ထားရန် နောက်ဆုံးအနေနဲ့ မှာကြားသွားခဲ့သည်။ လင်းရန်ယန်သည်လည်း ဘိုးဘေးကြီးကို အရိုအသေပြုလျက် နှုတ်ဆက်လိုက်တော့သည်။

နာရီဝက်ခန့် ကြာပြီးနောက် ရွှမ်ထျန်းဇီသည် ဝမ်းနည်းမှုများကို ထိန်းချုပ်ကာ ဘိုးဘေးကြီး၏ ခန္ဓာကိုယ်ကို ရေခဲခေါင်းတလားအတွင်းသို့ ထည့်သွင်းလိုက်တော့သည်။

“လင်းရန်ယန်... ဒါက ဘိုးဘေးကြီးရဲ့ သိုလှောင်လက်စွပ်ပဲ ၊ အခုကစပြီး ဒါက မင်းအပိုင်ပဲ၊ ဒါပေမဲ့ ဘိုးဘေးကြီး ကွယ်လွန်သွားတဲ့ ကိစ္စကိုတော့...”

“ကျေးဇူးတင်ပါတယ် ဂိုဏ်းချုပ် ၊ ကျွန်တော် ဘယ်သူ့ကိုမှ မပြောဘူးလို့ ကတိပေးပါတယ်”

လင်းရန်ယန်က တည်ကြည်စွာ ပြန်လည်ဖြေကြားလိုက်၏။ ထို့နောက် သူက မိမိ၏ ကိုယ်ပေါ်ရှိ ‘သွေးဝိညာဉ်ကျိန်စာ’ အကြောင်းကို တင်ပြလိုက်ရာ ရွှမ်ထျန်းဇီမှာ ထိတ်လန့်သွားတော့သည်။ ၎င်းမှာ မြေကမ္ဘာအရှင်သခင် အဆင့်တစ်ဆယ်ရှိသော မိစ္ဆာပညာရှင်တစ်ဦး၏ ကျိန်စာဖြစ်နေသောကြောင့်ပင် ဖြစ်သည်။

“မင်း ဒီတစ်နှစ်အတွင်းမှာ ဂိုဏ်းထဲကနေ လုံးဝ အပြင်မထွက်နဲ့”

ရွှမ်ထျန်းဇီက စိုးရိမ်တကြီး သတိပေးလိုက်သော်လည်း လင်းရန်ယန် စိတ်ထဲမှာမူ တခြားအကြောင်းအရာကို တွေးတောနေလေသည်။ သူသည် ဂိုဏ်းချုပ်ထံမှ ဆုလာဘ်များကို လက်ခံပြီးနောက် သူ၏ ခြံဝင်းအတွင်းသို့ ပြန်လာခဲ့သည်။

“ဝုန်း”

လင်းရန်ယန်၏ ခန္ဓာကိုယ်ပတ်လည်၌ ထူးခြားသော စွမ်းအားများ ထွက်ပေါ်လာပြီး သူ၏ ပုံရိပ်မှာ ပျောက်ကွယ်သွားတော့သည်။

“ဝုန်း”

ငရဲပြည်၏ အတိုင်းအဆမရှိ ကျယ်ပြောလှသော နန်းဆောင်ကြီးအတွင်းသို့ ရောက်ရှိသွားခြင်းဖြစ်သည်။ သူသည် ငရဲပြည်၏ အရှင်သခင်အဖြစ် ရာဇပလ္လင်ပေါ်၌ ထိုင်လိုက်ချိန်တွင် သူ၏ ကိုယ်မှ ထွက်ပေါ်နေသော အရှိန်အဝါမှာ တစ်လောကလုံးကို တုန်လှုပ်စေသည်။

“ငရဲတရားသူကြီး ကျုန်းခွေ ၊ မော်ရှန်းဂိုဏ်းက ရွှမ်ယိအန်းကို ငါ့ဆီ ခေါ်လာခဲ့စမ်း”

လင်းရန်ယန်၏ အမိန့်တော်ကြောင့် တရားသူကြီး ကျုန်းခွေက တုန်တုန်ရင်ရင်ဖြင့် ဘိုးဘေးကြီးကို ခေါ်ဆောင်လာတော့သည်။ ဘိုးဘေးကြီးမှာ မိမိရှေ့မှ ပုဂ္ဂိုလ်မှာ ငရဲပြည်၏ အရှင်သခင် ဖြစ်နေသည်ကို မြင်သောအခါ အသက်ဓာတ်ပင် ပျောက်ကွယ်လုနီးပါး ထိတ်လန့်သွားတော့သည်။

“တရားသူကြီး ကျုန်းခွေ ၊ လူသားလောကမှာ သက်တမ်းကို အနှစ်ငါးဆယ် အတင်းအဓမ္မတိုးခဲ့တဲ့သူကို ဘယ်လို အပြစ်ပေးရသလဲ”

လင်းရန်ယန်က အေးစက်စွာ မေးလိုက်သည်။ ကျုန်းခွေက ငရဲဥပဒေအရ ငရဲဘုံ ၁၈ ထပ်တွင် ထာဝရ ကျခံရမည်ဖြစ်ကြောင်း တင်ပြလိုက်တော့သည်။ ထိုစကားကြောင့် ဘိုးဘေးကြီးမှာ မျှော်လင့်ချက် ကုန်ဆုံးသွားဟန်ဖြင့် တုန်ယင်နေတော့သည်။

“လျှော့ပေါ့ပေးလို့ မရဘူးလား”

လင်းရန်ယန်၏ စကားကြောင့် ကျုန်းခွေမှာ ချက်ချင်းပင် သဘောပေါက်သွား၏။ ဤပုဂ္ဂိုလ်မှာ အရှင်သခင်၏ လူဖြစ်နေသည်မှာ သံသယဖြစ်ဖွယ်မရှိ။

“အရှင်မင်းကြီး အလိုရှိရင်တော့ တစ်ခွန်းတည်းနဲ့ ပြောင်းလဲလို့ ရပါတယ်”

ကျုန်းခွေက အလျင်အမြန်ပင် ပြန်လည်လျှောက်တင်လိုက်သည်။ လင်းရန်ယန်သည် ထိုဥပဒေမှာ လူသားလောက၏ ဟန်ချက်အတွက် သတ်မှတ်ထားခြင်းဖြစ်ကြောင်း သိရှိသွားသဖြင့် ဥပဒေကို မဖျက်သိမ်းဘဲ ဘိုးဘေးကြီးကိုသာ အပြစ်မှ ကင်းလွတ်ခွင့် ပေးလိုက်တော့သည်။

“ကျေးဇူးကြီးလှပါတယ် အရှင်မင်းကြီး ၊ ကျွန်တော်မျိုး နောင်တရပါပြီ”

ဘိုးဘေးကြီးမှာ ဝမ်းသာအားရဖြင့် ဦးတိုက်လိုက်၏။ လင်းရန်ယန်က ဘိုးဘေးကြီး၏ ကုသိုလ်ကံမှာ မဆိုးလှသဖြင့် တရားသူကြီး ကျုန်းခွေ၏ လက်အောက်တွင် အဆင့်ရှစ် အငယ်တန်းအရာရှိအဖြစ် တာဝန်ထမ်းဆောင်ရန် အမိန့်ချမှတ်လိုက်တော့သည်။