ဝိညာဉ်အရည် သန်း ၁၀၀ ကျော်အား အပိုင်သိမ်းခြင်းနှင့် ဆဌမအာရုံ နယ်ပယ်သို့ တက်လှမ်းနိုင်ခြင်း (အပိုင်း ၄)

[ဆယ်ရက်အကြာတွင် သင်သည် လောထျန်း အကျဉ်းခန်းအတွင်းသို့ ဝင်ရောက်ခဲ့သည်...]

[သင်သည် ဆင်းသက်ဂိုဏ်းသို့ ဝင်ရောက်ခဲ့သည်...]

[ဆင်းသက်ဂိုဏ်း အတွင်း သင်၏ အခြေအနေမှာ ကောင်းမွန်နေရာ သင်သည် ဝိညာဉ်အာရုံကို သီးသန့် ကျင့်ကြံအားထုတ်နေခဲ့သည်။]

[ဒုတိယနှစ်တွင် သင်၏ ဝိညာဉ်အာရုံသည် ဟင်းလင်ပြင်နယ်ပယ်တွင် လှည့်လည်သွားလာနေခဲ့သည်...]

[တတိယနှစ်တွင်လည်း သင်၏ ဝိညာဉ်အာရုံသည် ဟင်းလင်းပြင် နယ်ပယ်တွင် ဆက်လက် လှည့်လည်နေခဲ့သည်...]

[မကြာမီမှာပင် လေးနှစ်တာ ကာလသည် ကုန်ဆုံးသွားခဲ့လေပြီ။]

[ခုနစ်နှစ်မြောက်တွင် သင်၏ ဝိညာဉ်အာရုံ လွှမ်းခြုံနိုင်စွမ်းမှာ မိုင်ပေါင်း ၈,၃၀၀ အထိ ပြန့်ကားလာခဲ့သည်။]

[တစ်ချိန်တည်းမှာပင် ဝိညာဉ်အာရုံ ဆက်လက် ကြီးထွားလာသည်နှင့်အမျှ သင်သည် အတားအဆီး အနည်းငယ်ကို စတင် ခံစားလာရသည်။]

[ထိုနှစ်တွင်ပင် သင်သည် သဘာဝအဖွဲ့ခွဲ၏ ခေါင်းဆောင်ကို ဖယ်ရှားရန် စီစဉ်ခဲ့ပြီး သူ၏ နေရာတွင် အစားထိုး ဝင်ရောက်ခဲ့သည်။]

[ရှစ်နှစ်မြောက်တွင် သင်သည် ကျိန်စာသင့်နဂါးကို သုတ်သင်ခဲ့ပြီး နောင်တွင် စိတ်အေးချမ်းသာစွာဖြင့် ကျင့်ကြံနိုင်မည့် အခြေအနေကောင်းများ ဖန်တီးနိုင်ခဲ့သည်။]

[ဤနှစ်များအတွင်း ဝိညာဉ်စိုက်ခင်းဂူသည် အဆင့်နိမ့် ဝိညာဉ်အရည် စုစုပေါင်း ၄ သန်းကို ထုတ်လုပ်ပေးခဲ့သော်လည်း သင်သည် ၎င်းတို့ကို အသုံးမပြုဘဲ စုဆောင်းထားခဲ့သည်။]

[ထိုသို့ဖြင့် နောက်ထပ် သုံးနှစ်တာ ကာလသည် ကုန်ဆုံးသွားခဲ့ပြန်သည်...]

[၁၁ နှစ်မြောက်တွင် သွေးသခင်သုံးသည် ကြယ်ပြာသို့ ဆင်းသက်လာခဲ့သည်။]

[သင်သည် မွေးရာပါ ဖူစန်းသစ်ကိုင်းကို ဆက်သခဲ့ပြီး သွေးသခင်သုံးကို အောင်မြင်စွာ လှည့်စားနိုင်ခဲ့သည်...]

[သင်သည် ဂိုဏ်းဝင်ခွင့်လက်မှတ်ကို ရရှိခဲ့သည်။ သွေးသခင်သုံး ထွက်ခွာသွားပြီးနောက် သင်သည် ဝိညာဉ်သွေးကြောနဂါးကို ဝိညာဉ်စိုက်ခင်းဂူသို့ ပြန်လည် ခေါ်ဆောင်လာခဲ့သည်။]

[ဝိညာဉ်သွေးကြောနဂါး ဂူအတွင်းသို့ ရောက်ရှိလာသည်နှင့် ဂူအတွင်းရှိ ဝိညာဉ်စွမ်းအားများမှာ ပိုမို ကြွယ်ဝလာခဲ့သည်။]

[အဆင့်နိမ့် ဝိညာဉ်အရည် ထုတ်လုပ်မှုနှုန်းမှာ ထက်ဝက်နီးပါး တိုးတက်လာခဲ့ပြီး အလယ်အလတ်အဆင့် ဝိညာဉ်အရည်များလည်း စတင် ထွက်ပေါ်လာတော့သည်။]

[၁၂ နှစ်မြောက်တွင် သင် အသစ်ထပ်မံ စုဆောင်းမိသော အဆင့်နိမ့် ဝိညာဉ်အရည်မှာ ၆.၅ သန်းအထိ ရှိလာခဲ့ပြီး အလယ်အလတ်အဆင့် ဝိညာဉ်အရည်မှာ ၈၀,၀၀၀ အထိ ရောက်ရှိလာခဲ့ပြီ ဖြစ်သည်။]

[ကြယ်ပြာပေါ်ရှိ သင်၏ဘဝမှာ အလွန်ပင် အေးချမ်းလှသည်။ နေ့စဉ် ဝိညာဉ်အာရုံကို ကျင့်ကြံခြင်း၊ ပန်းမန်များနှင့် အပင်များကို ပြုစုပျိုးထောင်ခြင်းဖြင့် သင်သည် ဝိညာဉ်အရည်များကို စုဆောင်းနေခဲ့သည်...]

[ထိုသို့ဖြင့် နောက်ထပ် ငါးနှစ်တာ ကာလသည် ကုန်ဆုံးသွားခဲ့ပြန်သည်။]

[၁၇ နှစ်မြောက်တွင် သင် စုဆောင်းမိသော အဆင့်နိမ့် ဝိညာဉ်အရည်မှာ ၁၀ သန်းအထိ ရှိလာပြီး အလယ်အလတ်အဆင့် ဝိညာဉ်အရည်မှာ ၅၀၀,၀၀၀ နီးပါး ရှိလာခဲ့ပြီ ဖြစ်သည်။]

[ဟင်းလင်းပြင် ဝိညာဉ်များကို အဆက်မပြတ် ဝါးမျိုခြင်းဖြင့် သင်၏ ဝိညာဉ်အာရုံသည် မိုင်ပေါင်း ၈,၆၀၀ အထိ ပြန့်ကားလာခဲ့သော်လည်း ၎င်း၏ ကြီးထွားမှုနှုန်းမှာ တဖြည်းဖြည်း ကျဆင်းလာနေခဲ့သည်...]

[ဤနှစ်တွင် သရုပ်ပြခြင်း ကြာမြင့်ချိန်ကို ဆွဲဆန့်နိုင်ရန်အတွက် သင်သည် သားရဲထိန်းချုပ်ရေးနယ်မြေသို့ သွားရောက်ခဲ့သည်။]

[အနှစ် ၂၀ မြောက်တွင် သင်၏ ဝိညာဉ်အာရုံသည် မိုင်ပေါင်း ၈,၇၀၀ အထိ ကြီးထွားလာခဲ့သည်။]

[၂၅ နှစ်မြောက်တွင်မူ သင်၏ ဝိညာဉ်အာရုံသည် မိုင်ပေါင်း ၈,၈၀၀ အထိ ပြန့်ကားသွားခဲ့ပြီ...]

[ဟင်းလင်းပြင် ဝိညာဉ်များ၏ ဝိညာဉ်အာရုံကို မြှင့်တင်ပေးနိုင်စွမ်းမှာ အကန့်အသတ်မရှိသည်ကို သင် တွေ့ရှိလိုက်ရသည်။ ဆက်လက် ကြီးထွားနိုင်ရန်အတွက် သင်သည် ပိုမို မြင့်မားသော အဆင့်ရှိသည့် ဝိညာဉ်များကို ဝါးမျိုရန် လိုအပ်သည်။]

[အဝါရောင်အဆင့် ဝိညာဉ်များက သင့်အတွက် အကျိုးကျေးဇူး အနည်းငယ်သာ ပေးနိုင်တော့၏။ ကမ္ဘာမြေအဆင့် ဝိညာဉ်များကသာ သင့်အတွက် ပိုမိုကောင်းမွန်သော သက်ရောက်မှု ရှိတော့သည်။]

[ကောင်းကင်အဆင့် ဝိညာဉ်ကိုမူ ဆယ်စုနှစ်ပေါင်းများစွာ ရှာဖွေခဲ့သော်လည်း သင် တစ်ခါမျှ မတွေ့ခဲ့ရပေ...]

[၂၈ နှစ်မြောက်တွင် သင်၏ ဝိညာဉ်အာရုံသည် မိုင်ပေါင်း ၈,၉၀၀ အထိ ပြန့်ကားလာခဲ့သည်။]

[ထိုနှစ်တွင် သင် စုဆောင်းမိသော အဆင့်နိမ့် ဝိညာဉ်အရည်မှာ ၁၈ သန်းအထိ ရှိလာပြီး အလယ်အလတ်အဆင့် ဝိညာဉ်အရည်မှာ ၁.၄ သန်းအထိ ရှိလာခဲ့သည်။]

[ထိုနှစ်မှာပင် နတ်ဆိုးသူတော်စင်သည် နတ်ဆိုးနှိမ်နှင်းရေး စခန်းသို့ ဆင်းသက်လာခဲ့ရာ သင်သည် "အချိန်ဆွဲခြင်း" နည်းဗျူဟာကို စတင် အသုံးပြုခဲ့သည်။]

[မျက်တောင်တစ်ခတ်အတွင်းမှာပင် ငါးနှစ်တာ ကာလသည် ကုန်ဆုံးသွားခဲ့ပြန်သည်...]

[၃၃ နှစ်မြောက်တွင် သင် စုဆောင်းမိသော အဆင့်နိမ့် ဝိညာဉ်အရည်မှာ ၂၂ သန်းအထိ ရှိလာပြီး အလယ်အလတ်အဆင့် ဝိညာဉ်အရည်မှာ ၁.၈ သန်းအထိ ရှိလာခဲ့သည်။]

[ထိုနှစ်မှာပင် သင်၏ ဝိညာဉ်အာရုံသည် မိုင်ပေါင်း ၉,၀၀၀ အထိ ကြီးထွားလာခဲ့လေသည်။]

[ဝိညာဉ်အာရုံ မိုင်ပေါင်း ၉,၀၀၀ သို့ ရောက်ရှိသွားချိန်တွင် သင်သည် အတားအဆီး အနည်းငယ်ကို ခံစားလိုက်ရပြန်သည်။]

[ထို့ကြောင့် သင်သည် ဟင်းလင်းပြင် နယ်ပယ်အတွင်း လှည့်လည်သွားလာရုံမျှ မဟုတ်တော့ဘဲ "ဝိညာဉ်ပုံဖော်ခြင်း"ကိုပါ ကျင့်ကြံအားထုတ်ရန် ပိုမို အာရုံစိုက်လိုက်သည်။]

[ထိုသို့ဖြင့် ခုနစ်နှစ်တာ ကာလသည် ကုန်ဆုံးသွားခဲ့သည်။]

[အနှစ် ၄၀ မြောက်တွင် သင်သည် အဆင့်နိမ့် ဝိညာဉ်အရည် သန်း ၃၀ နှင့် အလယ်အလတ်အဆင့် ဝိညာဉ်အရည် ၂.၅ သန်းအထိ စုဆောင်းနိုင်ခဲ့ပြီ ဖြစ်သည်။]

[သင်သည် ဝိညာဉ်စုစည်းပန်းများကို ပိုမို စိုက်ပျိုးခဲ့ရာ သင့်တွင် စုစုပေါင်း အပင်ပေါင်း ၁၅,၀၀၀ နီးပါးအထိ ရှိလာခဲ့သည်။]

[ထိုနှစ်တွင်ပင် သင်၏ ဝိညာဉ်အာရုံသည် မိုင်ပေါင်း ၉,၂၀၀ နီးပါးအထိ အနိုင်နိုင် တိုးတက်လာခဲ့သည်။]

[ဤအချိန်တွင် တိုင်းတစ်ပါး မျိုးနွယ်စုများ၏ နောက်ထပ်တစ်ကြိမ် နတ်ဆိုးနှိမ်နှင်းရေး စခန်းအပေါ် တိုက်ခိုက်မှုမှာ နီးကပ်လာခဲ့ပြီ ဖြစ်သည်။]

[သင်သည် ကြယ်ပြာပေါ်တွင် ဆက်လက် မနေထိုင်တော့ဘဲ အရင်းအမြစ်များ ပိုမို ရရှိနိုင်ရန်အတွက် လောကသုံးထောင်ဆီသို့ သွားရန် စီစဉ်လိုက်သည်။]

[သင်၏ အဓိက ရည်မှန်းချက်မှာ အရည်အသွေးမြင့် ဝိညာဉ်အရည်များကို ရယူရန်ပင် ဖြစ်သည်။]

[သင်သည် ဝိညာဉ်စုစည်းပန်း အပင် ၁၅,၀၀၀ စလုံးကို သိုလှောင်လက်စွပ်အတွင်းသို့ ထည့်သွင်းလိုက်ပြီး နှစ်ပေါင်း လေးဆယ်အတွင်း စုဆောင်းထားခဲ့သော ဝိညာဉ်အရည် သန်း ၃၀ ကို ယူဆောင်ကာ သတ်ဖြတ်ခြင်း စစ်တလင်းပြင်ဆီသို့ ဦးတည်ထွက်ခွာခဲ့သည်။]

[သင်သည် သွေးနီရောင်လမင်း ရှိရာသို့ ဦးတည်လျှောက်လှမ်းကာ သင်၏ လက်မှတ်ကို ပြသပြီး အခြားကမ္ဘာ ဟင်းလင်းပြင်ထဲသို့ ဝင်ရောက်ခဲ့လေသည်။]

လက်တွေ့ကမ္ဘာတွင် စုရှင်းသည် သူ၏ ရှေ့မှ သရုပ်ပြစာသားများကို ကြည့်ရင်း အသာအယာ ခေါင်းညိတ်လိုက်သည်။

"နှစ်ပေါင်း လေးဆယ်ကြာတာတောင် ဝိညာဉ်အရည် သန်း ၃၀ ပဲ စုဆောင်းနိုင်သေးတာလား။"

"ဟူး... ဒီဝိညာဉ်အရည်ကို ရဖို့က တကယ် မလွယ်ကူပါလား။"

"ဒါပေမဲ့ ဝိညာဉ်စုစည်းပန်းတွေကတော့ တန်ဖိုးအရှိဆုံးပဲ။ ငါသာ ဒီဝိညာဉ်စုစည်းပန်းတွေကို လောကသုံးထောင်ဆီ ယူသွားနိုင်ရင်... ဝိညာဉ်အရည်တွေ အများကြီး ထပ်ရမှာ ကျိန်းသေတယ်"

စုရှင်း၏ မျက်ဝန်းများတွင် ယုံကြည်ချက်များ ပြည့်နှက်နေသည်။ ထို့နောက် သူသည် စိတ်ထဲမှ တိုးတိုးလေး ရွတ်ဆိုလိုက်သည်။

"မြှုပ်နှံသရုပ်ပြခြင်းကို သုံးမယ်၊ ကြာမြင့်ချိန် ရက် ၃၀..."

[ဒင်...]

သရုပ်ပြခြင်းအတွင်းရှိ ရက်ပေါင်း ၃၀ သည် လျင်မြန်စွာ ကုန်ဆုံးသွားခဲ့၏။ လက်တွေ့ကမ္ဘာတွင်မူ စက္ကန့်အနည်းငယ်သာ ကြာမြင့်ခဲ့သည်။ စုရှင်းသည် မျက်လုံးများကို ဖြည်းဖြည်းချင်း ဖွင့်လိုက်ပြီး သက်ပြင်းချလိုက်သည်။

"ဟင်းလင်းပြင် လမ်းစဉ်ကို နားလည်ဖို့ ကြိုးစားရတာက တကယ်ကြီး ခက်ခဲတာပဲ... ဝိညာဉ်နိုးထဆေးလုံးနဲ့ ဉာဏ်ပညာကြီးမားခြင်း အခြေအနေရဲ့ အကူအညီကြောင့်မို့ ဆယ်နှစ်စာ ပင်ပန်းတကြီး ကျင့်ကြံတာနဲ့ ညီမျှတာတောင်မှ အစအနလေးပဲ သိလိုက်ရတယ်တဲ့လား"

စုရှင်း ခေါင်းခါလိုက်မိသည်။ သူ၏ မျက်ဝန်းများတွင် စိတ်ပျက်ရိပ် အနည်းငယ် ပေါ်လာ၏။ သို့ရာတွင် မကြာမီမှာပင် သူသည် ယုံကြည်ချက်များကို ပြန်လည် စုစည်းလိုက်သည်။

"တစ်ကြိမ်နဲ့ မရရင် နှစ်ကြိမ်၊ သုံးကြိမ် ကြိုးစားမယ်ကွာ၊ အဲ့ဒါမှမရရင် အကြိမ်တစ်ရာ၊ အကြိမ်တစ်ထောင်အထိ ကြိုးစားရမှာပေါ့။"

"ငါ့မှာ အချိန်တွေ အများကြီး ရှိတာပဲကို... ငါ ဟင်းလင်းပြင် လမ်းစဉ်ကို သေချာပေါက် နားလည်အောင် လုပ်ရမယ်။"

စုရှင်း၏ ရင်ထဲတွင် ရဲရင့်သော စိတ်ဓာတ်များ တိုးဝှေ့လာသည်။ သူသည် အပတ်တိုင်း မြှုပ်နှံ သရုပ်ပြခြင်းကို လုပ်ဆောင်နိုင်သည်။ ဟင်းလင်းပြင် လမ်းစဉ်က မည်မျှပင် ခက်ခဲပါစေ၊ သူသာ ဇွဲလုံ့လရှိရှိ အားစိုက်ထုတ်လျှင် နောက်ဆုံးတွင် ပိုင်ဆိုင်နိုင်လိမ့်မည်ဟု သူ ယုံကြည်သည်။

ထိုသို့ တွေးတောရင်း စုရှင်း၏ အကြည့်သည် သရုပ်ပြ မျက်နှာပြင်ဆီသို့ ပြန်လည် ရောက်ရှိသွားသည်။

[သင် သတိပြန်ဝင်လာချိန်တွင် ချင်းယွင်ကမ္ဘာငယ်ရှိ တောင်တန်း တစ်သိန်း၏ မြောက်ဘက်ပိုင်းသို့ ရောက်ရှိနေပြီ ဖြစ်သည်။]

[သင် ပထမဆုံး လုပ်ဆောင်သည့် အလုပ်မှာ သင်၏ သိုလှောင်လက်စွပ်ကို စစ်ဆေးခြင်း ဖြစ်သည်။ ဝိညာဉ်စုစည်းပန်းများ၊ ဝိညာဉ်အရည်များနှင့် အခြားသော အရင်းအမြစ်များ အစုံအလင် ရှိနေသည်ကို မြင်လိုက်ရသဖြင့် သင် စိတ်သက်သာရာရစွာ သက်ပြင်းချလိုက်မိသည်...]

[ယခုတစ်ကြိမ် သင်၏ ရည်မှန်းချက်မှာ ရှေးဟောင်းဝိညာဉ် ကပ်ဘေးကို ကျော်ဖြတ်ရုံသာမက ဝိညာဉ်အရည်များကို အလုံအလောက် စုဆောင်းရန်လည်း ဖြစ်သည်။]

[ထို့ပြင် ဝိညာဉ်စွမ်းအား ကပ်ဘေးကို ကျော်ဖြတ်နိုင်ရန် အခြေခံကောင်းများ ချမှတ်ရန်သာမက နတ်ဘုရားအဆင့်သို့ ရောက်ရှိပြီးနောက် ကျင့်ကြံခြင်းအတွက် အရင်းအမြစ်များကို စုဆောင်းရန်လည်း ဖြစ်သည်။]

[အရင်းအမြစ်များကို အမြန်ဆုံး စုဆောင်းနိုင်မည့် နည်းလမ်းမှာမူ ချင်းယွင်ဂိုဏ်းသို့ ဝင်ရောက်ရန်သာ ဖြစ်သည်။]