စတော့ဈေးကျ၊ ရွှေဈေးတက်

အမေရိကန်၏ ကပ်ဘေးအခြေအနေသည် ပိုမို ဆိုးရွားလာပြီး ကမ္ဘာတစ်ဝန်းလုံး တုန်လှုပ်ခြောက်ခြားသွားခဲ့သည်။

ဖုန်းယွီသည်လည်း လူသားတစ်ဦး ဖြစ်သဖြင့် ထိုကြေကွဲဖွယ်ရာ မြင်ကွင်းများကို မြင်တွေ့ရသောအခါ စိတ်မကောင်း ဖြစ်မိသည်။ နိုင်ငံအချင်းချင်း ငြိမ်းချမ်းစွာ အတူယှဉ်တွဲ နေထိုင်၍ မရနိုင်ပါသလော။ လူသေမှ ဖြစ်မည်လော။

အမေရိကန်ဘက်မှ ချက်ချင်း တုံ့ပြန်မှုများ ပြုလုပ်သော်လည်း စီးပွားရေး ဆုံးရှုံးမှု အချို့ကို ရှောင်လွှဲ၍ မရနိုင်ပေ။

ဤကိစ္စ ဖြစ်ပွားပြီးနောက် အမေရိကန် ရှယ်ယာရှင်များသည် ကြောက်လန့်တကြား ရှယ်ယာများကို ထုတ်ရောင်းကြရာ Dow Jones၊ Nasdaq နှင့် S&P ညွှန်းကိန်းများ အားလုံး ထိုးကျသွားခဲ့သည်။

အမေရိကန် စီးပွားရေးသည် ပြင်းထန်သော ရိုက်ခတ်မှု ခံရမည်ဟု လူတိုင်းက ယူဆကြပြီး စတော့ဈေးကွက်မှ ငွေများကို ထုတ်ယူခြင်းက ပိုကောင်းသည်ဟု ထင်မြင်ကြသည်။ ရှယ်ယာဆိုသည်မှာ ရှယ်ယာသာ ဖြစ်ပြီး ငွေသား မဟုတ်ပေ။ ဒေါ်လာကို ကိုင်ဆောင်ထားမှသာ ပိုမို စိတ်ချရမည် ဖြစ်သည်။

ဤတစ်ကြိမ်တွင် မည်သည့်ကုမ္ပဏီ၏ ရှယ်ယာဈေးနှုန်းမျှ ဈေးကွက်ကို ဆန့်ကျင်၍ မတက်နိုင်ခဲ့ပေ။ ရှယ်ယာအားလုံး ကျဆင်းနေပြီး ကုမ္ပဏီ ကြီးလေ၊ ကျဆင်းမှု ပိုများလေ ဖြစ်သည်။

ယခင်က Blue Chip Stocks ဟု ခေါ်ဆိုကြသော ရှယ်ယာများသည်လည်း ဦးဆောင် ကျဆင်းနေသည်။ ဤအခြေအနေမျိုးတွင် ကုမ္ပဏီကြီးများက ပိုမို ပြင်းထန်သော ရိုက်ခတ်မှု ခံရမည်ဟု လူအများက ယူဆကြသောကြောင့် ဖြစ်သည်။

အမှန်တကယ်လည်း ထိုအတိုင်း ဖြစ်သည်။ ကမ္ဘာ့ကုန်သွယ်ရေး စင်တာတွင် ကုမ္ပဏီကြီး အများအပြား ရှိနေသည်။ ဤကိစ္စကြောင့် ကုမ္ပဏီ အများအပြား၏ အချက်အလက်များ ပျောက်ဆုံးပြီး လုပ်ငန်းများ ရပ်တန့်သွားခဲ့သည်။

ထိုနေ့တွင် Nasdaq ညွှန်းကိန်းသည် ၅ ရာခိုင်နှုန်းကျော် ကျဆင်းခဲ့ပြီး နောက်တစ်နေ့တွင်လည်း လျင်မြန်စွာ ဆက်လက် ကျဆင်းနေသည်။

အမေရိကန် အစိုးရသည် တုံ့ပြန်မှုများ ပြုလုပ်ပြီး ဈေးကွက် တည်ငြိမ်စေရန် ငွေကြေး အမြောက်အမြား ထည့်သွင်းသော်လည်း မလုံလောက်ပေ။ လူတိုင်းက ရှယ်ယာ ထုတ်ရောင်းချင်နေချိန်တွင် အစိုးရ၏ငွေကြေး ထည့်သွင်းမှုသည် အရာမထင်ပေ။

တစ်ပတ်ဆက်တိုက် စတော့ဈေးကွက် ကျဆင်းနေပြီး Nasdaq ညွှန်းကိန်းသည် ၁၆ ရာခိုင်နှုန်းကျော် ကျဆင်းခဲ့သည်။ ၎င်းသည် Enron၊ WorldCom အရှုပ်တော်ပုံများ ဖြစ်ပွားစဉ်ကထက် ပိုမြန်သလို အင်တာနက် ပူဖောင်း ပေါက်ကွဲစဉ်ကထက်လည်း ပိုမြန်သည်။

Dow Jones ညွှန်းကိန်းသည် ၁၄ ရာခိုင်နှုန်းကျော် ကျဆင်းပြီး S&P ညွှန်းကိန်းသည် ၁၁ ရာခိုင်နှုန်းကျော် ကျဆင်းခဲ့သည်။

အမေရိကန် စတော့ဈေးကွက် ကျဆင်းမှုသည် ကမ္ဘာ့ စတော့ဈေးကွက်များကိုပါ ဆွဲချသွားခဲ့သည်။ လန်ဒန်၊ တိုကျို၊ ဟောင်ကောင် စသည့် စတော့ဈေးကွက်များလည်း ကျဆင်းနေသော်လည်း နယူးယောက်လောက် မပြင်းထန်ပေ။

...

"သူဌေး၊ စတော့ဈေးကွက် ကျဆင်းနေတာကို ခင်ဗျား မပျော်ဘူးလား။ ကျွန်တော်တို့ Leverage အများကြီး မသုံးထားပေမဲ့ ဒီတစ်ခါ အမြတ်နှစ်ဆလောက် ရမှာ သေချာတယ်လေ"

ဒရပ်ကင်မီလာသည် ဆိုရော့စ်၏ အေးစက်သော မျက်နှာထားကို ကြည့်ပြီး နားမလည်နိုင် ဖြစ်နေသည်။

"ဒရပ်ကင် ဖုန်းယွီက ဒီကိစ္စကို ကြိုသိနေတယ်လို့ မင်း မထင်မိဘူးလား" ဆိုရော့စ်က လေးလေးနက်နက် မေးလိုက်သည်။

ဒရပ်ကင်မီလာ အလွန် အံ့အားသင့်သွားသည်။

"သူဌေး… ဒါ မဖြစ်နိုင်ပါဘူး။ တကယ်လို့ ဖုန်းယွီ ကြိုသိနေရင် သူ ဒီလောက် နည်းနည်းလေးပဲ ရင်းနှီးမြှုပ်နှံပါ့မလား။ ကျွန်တော်တို့ စုံစမ်းထားသလောက် သူ Short လုပ်ထားတဲ့ ပမာဏက ဒေါ်လာ ၁၀ ဘီလီယံတောင် မပြည့်ဘူး။ ပြီးတော့ Hedgingတွေ အများကြီး လုပ်ထားသေးတယ်။ Leverage ကလည်း ကျွန်တော်တို့လောက် မမြင့်ဘူး"

ဒရပ်ကင်မီလာ၏ ဆိုလိုရင်းမှာ ရှင်းလင်းသည်။ ဖုန်းယွီသာ ကြိုသိခဲ့လျှင် Leverage မြင့်မြင့်မားမား သုံးပြီး Short လုပ်ကာ ငွေအမြောက်အမြား ရှာပေလိမ့်မည်။ ဖုန်းယွီ၏ ရန်ပုံငွေ အင်အားအရ ဒေါ်လာ ဘီလီယံ ၂၀၊ ၃၀ ထုတ်သုံးရန် ပြဿနာ မရှိပေ။ ထိုသို့ဆိုလျှင် ဖုန်းယွီသည် အနည်းဆုံး ဒေါ်လာ ဘီလီယံ ရာချီ၊ ထောင်ချီပင် အမြတ်ရနိုင်သည်။

ဆိုရော့စ် ခေါင်းခါလိုက်သည်။

"မဟုတ်ဘူး၊ ငါသာ ကြိုသိခဲ့ရင်တောင် အဲဒီလို လုပ်မှာ မဟုတ်ဘူး။ အစိုးရက စုံစမ်းစစ်ဆေးမယ်လို့ မင်း မထင်ဘူးလား။ ဒီကိစ္စနဲ့ ပတ်သက်နေတဲ့ ဘယ်သူမဆို ဒုက္ခရောက်မှာ သေချာတယ်။ ဟုတ်တယ်၊ ငါလည်း ခန့်မှန်းကြည့်တာပါ။ တိုက်ဆိုင်တာ ဖြစ်ကောင်း ဖြစ်နိုင်ပါတယ်"

"သူဌေ၊ အစိုးရက စတော့ဈေးကွက် တည်ငြိမ်အောင် အသည်းအသန် ကြိုးစားနေတယ်။ ကျွန်တော်တို့ ဘယ်အချိန်မှာ စာချုပ်တွေ ပြန်ဝယ်ပြီး စာရင်းရှင်းသင့်လဲ"

"နောက်တစ်ပတ် စနေ၊ တနင်္ဂနွေ မတိုင်မီ စာရင်းရှင်းမယ်"

"သူဌေး နောက်တစ်ပတ် စနေ၊ တနင်္ဂနွေ မတိုင်မီ စတော့ဈေးကွက် ပြန်တက်လာဖို့ မဖြစ်နိုင်ဘူး။ ဆက်ပြီး ကျဆင်းနေဦးမှာပါ" ဒရပ်ကင်မီလာ မျက်မှောင်ကြုတ်လိုက်သည်။

"ငါတို့ ရန်ပုံငွေတွေကို ထုတ်ပြီး ရွှေဈေးကွက်မှာ ရင်းနှီးမြှုပ်နှံမယ်"

ထိုအခါမှ ဒရပ်ကင်မီလာ သဘောပေါက်သွားသည်။ စစ်ပွဲ ကာလတိုင်းတွင် ရွှေသည် စစ်မှန်သော နိုင်ငံတကာ ငွေကြေးအဖြစ် အခိုင်မာဆုံး ရပ်တည်လေ့ရှိပြီး ဈေးနှုန်း မြင့်တက်လေ့ ရှိသည်။

ယခု အဖြစ်အပျက်ကြီး ဖြစ်ပွားခဲ့သည်။ စစ်ပွဲ မဟုတ်သော်လည်း စစ်ပွဲနှင့် မခြားပေ။ ရွှေဈေး တက်မည်မှာ သေချာသည်။

အမေရိကန်က ပြည်ပစစ်ပွဲ ဆင်နွှဲပါက ရွှေဈေး ပိုမို မြင့်တက်လာမည် ဖြစ်သည်။

ထို့အပြင် သူတို့သည် အမေရိကန် လူမျိုးများ ဖြစ်သဖြင့် ဤအချိန်တွင် အမေရိကန် စတော့ဈေးကွက်ကို အကြီးအကျယ် Short လုပ်ခြင်းသည် မသင့်တော်ပေ။ အရင်းရှင်များ၏ အကျိုးစီးပွားကိုလည်း ထိခိုက်စေနိုင်ပြီး နောက်ပိုင်း ဆက်ဆံရေး အဆင်မပြေ ဖြစ်လာနိုင်သည်။ အမြတ်ပိုရချင်၍ စတော့ဈေးကွက်ကို ဆက်လက် ဖိနှိပ်ပါက လူအများ၏ ပစ်မှတ် ဖြစ်လာမည့်အပြင် ဂျော့ချ် ဒဗလျူ ဘုရှ် အစိုးရ၏ အငြိုးထားခြင်းကို ခံရနိုင်သည်။

...

ဟယ်ကျောင်းကျီသည် ကွန်ပျူတာ မျက်နှာပြင်မှ အချက်အလက်များကို ကြည့်ရင်း ဇဝေဇဝါ ဖြစ်နေသည်။ သူဌေးက လွန်ခဲ့သော ရက်အနည်းငယ်က ဟောင်ကောင်သို့ ရောက်လာပြီး ကျန်ရှိသော ရန်ပုံငွေ အားလုံးဖြင့် ရွှေဝယ်ယူရန် မှာကြားခဲ့သည်။ ယခု ရွှေဈေး တကယ် တက်လာခဲ့ပြီ။

ယခင်က သူဌေးသည် အမေရိကန် စတော့ဈေးကွက်ကို Short လုပ်ရန် အမြဲ ပြောခဲ့သည်။ အမေရိကန် စတော့ဈေးကွက်သည် တကယ်ပင် ကြီးမားသော ရိုက်ခတ်မှု ခံရပြီး ဆက်တိုက် ကျဆင်းနေသည်။ သူဌေးက အမေရိကန် စတော့ဈေး ကျမည်ဟု ထင်မြင်ကြောင်း အမြဲပြောသော်လည်း သူဌေးသည် ဤဖြစ်ရပ်ကြီး ဖြစ်ပွားမည်ကို ကြိုတင် သိရှိနေသကဲ့သို့ သူ ခံစားရသည်။

ဖုန်းယွီ အတိုင်ပင်ခံ ကုမ္ပဏီ၏ အထွေထွေ မန်နေဂျာ ဖြစ်သော သူသည် အမိန့်နာခံရုံမှလွဲ၍ ကြီးကြီးမားမား အသုံးမဝင်သလို ခံစားရပြီး စိတ်ပျက်အားငယ်မိသည်။ တစ်ချိန်က သူသည် ဟောင်ကောင်၏ နာမည်ကျော် ငွေကြေး အကျိုးဆောင် တစ်ဦး ဖြစ်ခဲ့သည်။

ယခု သူ၏ ဂုဏ်သတင်း ပိုမို ကြီးမားလာသော်လည်း ဤဂုဏ်သတင်းများသည် သူဌေးကြောင့် ရရှိလာခြင်း ဖြစ်သည်ဟု ခံစားနေရသည်။ သို့သော် ကောင်းသည့်အချက်မှာ သူဌေးသည် သူ၏ လုပ်ဆောင်ချက်များကို အလွန် ကျေနပ်အားရနေသည်။ သူဌေးနောက်လိုက်ခဲ့သော ဤနှစ်များအတွင်း သူ၏ ဝင်ငွေသည်လည်း တိုးပွားလာခဲ့သည်။

ခြုံငုံကြည့်လျှင် ဖုန်းယွီ အတိုင်ပင်ခံ ကုမ္ပဏီသို့ ဝင်ရောက်ခဲ့ခြင်းအတွက် သူ လုံးဝ နောင်တမရပေ။

ဤတစ်ကြိမ်တွင် ဖုန်းယွီ အတိုင်ပင်ခံ ကုမ္ပဏီသည် စတော့ဈေးကွက်တွင် အမြတ်တစ်ဖြတ် ရရှိမည့်အပြင် ရွှေဈေးကွက်တွင်လည်း အမြတ်တစ်ဖြတ် ရရှိဦးမည် ဖြစ်သည်။ သူဌေး၏ အမြော်အမြင်သည် ကြောက်စရာကောင်းလောက်အောင် တိကျမှန်ကန်လှသည်။

အခြားသူများ မည်သို့ ထင်မြင်စေကာမူ ဟယ်ကျောင်းကျီနှင့် ဖုန်းယွီ အတိုင်ပင်ခံ ကုမ္ပဏီ ဝန်ထမ်း အားလုံးကမူ ဖုန်းယွီသည် ကမ္ဘာ့အတော်ဆုံး ဘဏ္ဍာရေး ကျွမ်းကျင်သူဟု လက်ခံထားကြသည်။

...

ဖူရုန်ချီသည် နေအိမ်တွင် သံဝေဂ ရနေမိသည်။ အရင်က ဖုန်းယွီက ရွှေအချို့ ဝယ်ထားရန် အကြံပြုခဲ့သော်လည်း ရွှေဈေးနှုန်းသည် အတက်အကျ ကြမ်းပြီး ကျဆင်းနေသဖြင့် ရေတိုတွင် ကြီးကြီးမားမား တက်နိုင်၊ ကျနိုင်ခြေ မရှိကြောင်းနှင့် ဦးတည်ချက် မသေချာကြောင်း သူ သုံးသပ်ခဲ့သည်။

သို့သော် မကြာမီ ထိုဖြစ်ရပ်ကြီး ဖြစ်ပွားခဲ့ပြီး ရွှေဈေးနှုန်း လျင်မြန်စွာ မြင့်တက်လာခဲ့သည်။

သူသည် ဈေးကွက်ထဲသို့ ချက်ချင်း ဝင်ရောက် ဝယ်ယူခဲ့သော်လည်း အမြတ်အစွန်း များစွာ လျော့နည်းသွားခဲ့သည်။ သို့သော် တုံ့ပြန်မှု မြန်ဆန်ခဲ့သဖြင့် အမြတ်အနည်းငယ်တော့ ရရှိဦးမည် ဖြစ်သည်။ ပါမောက္ခလျန် စီမံခန့်ခွဲနေသော ဖူကွမ်းကျန့်၏ ရန်ပုံငွေ ကုမ္ပဏီသည်လည်း အစပိုင်းတွင် ရွှေမဝယ်ခဲ့ဘဲ နောက်ပိုင်းမှ ဝင်ရောက် ဝယ်ယူခဲ့သည်။ ပါမောက္ခလျန်နှင့် ဖူရုန်ချီတို့၏ သုံးသပ်ချက် တူညီခဲ့သောကြောင့် ဖြစ်သည်။

သို့သော် ထိုဖြစ်ရပ်ကြီး တိုက်ဆိုင်စွာ ဖြစ်ပွားခဲ့သည်။ သူတို့သာ ဖုန်းယွီကို မယုံကြည်လျှင် ဖုန်းယွီ ကြိုသိနေသည်၊ သို့မဟုတ် ပါဝင်ပတ်သက်နေသည်ဟုပင် ထင်မြင်မိကြပေလိမ့်မည်။

ဖုန်းယွီ အတိုင်ပင်ခံ ကုမ္ပဏီက အမေရိကန် စတော့ဈေးကွက်ကို Short လုပ်ခြင်းသည် မှားယွင်းသော ရွေးချယ်မှုဟု သူတို့ ထင်ခဲ့သော်လည်း ယခု ပြန်ကြည့်လျှင် အလွန် ပညာသားပါသော လုပ်ရပ်ဖြစ်ကြောင်း တွေ့ရသည်။ ကံကောင်းထောက်မစွာ သူတို့သည် အမေရိကန် စတော့ဈေးကွက်မှ ရင်းနှီးမြှုပ်နှံမှုများကို ရုပ်သိမ်းပြီး ဟောင်ကောင် စတော့ဈေးကွက်တွင် ရင်းနှီးမြှုပ်နှံခဲ့ကြသည်။ ယခု ဟောင်ကောင် စတော့ဈေးကွက်လည်း ရိုက်ခတ်မှု ရှိသော်လည်း မကြီးမားလှဘဲ လက်ခံနိုင်သော အတိုင်းအတာတွင်သာ ရှိသည်။

ဘဏ္ဍာရေး ရင်းနှီးမြှုပ်နှံသူ အများစုသည် ဤဖြစ်ရပ်တွင် အကြီးအကျယ် ရှုံးနိမ့်ခဲ့ကြသော်လည်း သူတို့သည် အနည်းငယ်သာ ရှုံးနိမ့်ခဲ့ပြီး ရွှေဈေးကွက်တွင် ရင်းနှီးမြှုပ်နှံခြင်းဖြင့် ပြန်လည် အမြတ်ရနိုင်မည် ဖြစ်သည်။ ဤသည်မှာ အောင်မြင်မှုပင် ဖြစ်သည်။

******