ပြတ်သားသော ရိုက်ချက်

"ချန်အာကောတဲ့လား"

"သူက အလယ်ပိုင်းဒေသ သိုင်းလောကရဲ့ ပါရမီရှင် လူငယ်ဆိုတာလား"

ဟယ်ဟွမ်းဂိုဏ်း တပည့်များကြားတွင် တိုးတိုးတိတ်တိတ် ဆွေးနွေးနေကြခြင်းပင်။

ချန်အာကော​၏ ဂုဏ်သတင်းမှာ သိုင်းလောကတစ်ခုလုံးတွင် ပျံ့နှံ့နေပြီဖြစ်ရာ အနောက်ဒေသ နတ်ဆိုးဂိုဏ်းသားများပင် သိရှိထားကြသည်။

ယခု လူကိုယ်တိုင် မြင်လိုက်ရချိန်တွင် နတ်ဆိုးဂိုဏ်းမှ လူငယ်တပည့်များမှာ မိမိကိုယ်ကိုယ် အားမလိုအားမရ သက်ပြင်းချမိကြပေ​၏။

ချန်အာကောနှင့် ယှဉ်လျှင် သူတို့မှာ ပြောပလောက်သည့် အဆင့်ပင် မဟုတ်ပေ။

"ဒီလောက် ငယ်ငယ်ရွယ်ရွယ်နဲ့ ပထမအဆင့် သိုင်းသမား ဖြစ်နေပြီလား"

"ဒီလောက် ထူးခြားတဲ့ ပါရမီမျိုးဆိုရင် တစ်ချိန်က ပြိုင်ဘက်ကင်းခဲ့တဲ့ ကျန်းစန်းဖုန်း တောင် အရှုံးပေးရလိမ့်မယ်"

အကြီးအကဲခမှာ မျက်မှောင်ကြုတ်လျက် အခြေအနေကို အကဲခတ်နေသည်။

သူမသည် သူတို့ဂိုဏ်းရဲ့ ပထမအဆင့် တစ်ဦးတည်းသာ ဖြစ်ရာ ဝူတန်ဂိုဏ်းတွင် ယင်ဟွိုက်ယွီအပြင် ချန်အာကောပါ ရှိနေခြင်းမှာ သူမအတွက် လုံးဝ အသာမစီး မရနိုင်သည့် အခြေအနေပင်။

"ပြန်ကြတော့"

ချန်အာကောသည် ကောင်းကင်မှ ဆင်းသက်လာပြီး အကြီးအကဲကို အေးစက်စွာ ကြည့်လိုက်ပေ​၏။

သူ၏ အရှိန်အဝါမှာ ယင်ဟွိုက်ယွီထက်ပင် ပို၍ ထင်ရှားနေခြင်းပင်။

"အသက် ၂၀ နဲ့ ပထမအဆင့်လား"

"ငါတို့ ဂိုဏ်းချုပ်ထက်တောင် ပိုတော်နေတာပဲ"

အကြီးအကဲမှာ တံတွေးကို ခက်ခက်ခဲခဲ မျိုချနေရ​၏။

သို့သော် သူမက ဇွဲမလျှော့ဘဲ "ငါတို့ဂိုဏ်းချုပ်ကို မလွှတ်ပေးသရွေ့ ဟယ်ဟွမ်းဂိုဏ်းက အသေခံ တိုက်သွားမှာပဲ"

ဟု ကြုံးဝါးကာ သူမ၏ တောင်ဝှေးကို မြေကြီးပေါ် ဆောင့်ချလိုက်ရာ ကျောက်ပြားများမှာ မှုန့်မှုန့်ညက်ညက် ကြေမွသွားသည်။

"ဂိုဏ်းချုပ်အတွက် အသေခံတိုက်မယ်"

ဟယ်ဟွမ်းတပည့်များ၏ အော်ဟစ်သံကြောင့် အခြေအနေမှာ ပို၍ တင်းမာလာခဲ့သည်။

တောင်ခြေတွင် ဂိုဏ်းနှစ်ခုလုံးမှ တပည့်ပေါင်း ရာကျော် သေဆုံးနေပြီဖြစ်ရာ စစ်ပွဲ၏ အရိပ်မည်းမှာ အားလုံးကို လွှမ်းမိုးထားခြင်းပင်။

"အော်မေ့ဂိုဏ်းက လျိုဟွမ်းယင်ကို ခေါ်လာခဲ့"

ဟယ်ဟွမ်းတပည့်နှစ်ဦးသည် ဖရိုဖရဲဖြစ်နေသော လျိုဟွမ်းယင်ကို ခေါ်ဆောင်လာခဲ့သည်။

သူမသည် ဝူတန်တပည့်များကို ဒေါသတကြီး ကြည့်နေသော်လည်း အကြောပိတ်ခံထားရသဖြင့် စကားတစ်ခွန်းမျှ မပြောနိုင်ပေ။

"ငါ စုံစမ်းပြီးပြီ၊ ဒီလျိုဟွမ်းယင်က အော်မေ့ဂိုဏ်းရဲ့ အချစ်ဆုံး တပည့်ပဲ"

"သူမသာ ဝူတန်မှာ သေသွားရင် အော်မေ့ဂိုဏ်းက မင်းတို့ကို ဘယ်လိုမြင်မလဲ"

အကြီးအကဲက ဝူတန်ကို အော်မေ့ဂိုဏ်းဖြင့် ခြိမ်းခြောက်နေခြင်းပင်။

လျိုဟွမ်းယင်သည် လင်ချွမ်နှင့် လင်ယန်ရွှယ်တို့ ပူးပေါင်းကာ လူသတ်ခဲ့သည်ကို မြင်ခဲ့သူဖြစ်ရာ သူမသာ အမှန်အတရားကို ပြောလိုက်ပါက လင်ချွမ်သည် အလယ်ပိုင်းဒေသ သိုင်းလောက၏ အစွန့်ပစ်ခံ ဖြစ်သွားပေလိမ့်မည်။

"နှုတ်ပိတ်ဖို့အတွက် သတ်ပစ်ရမလား"

ဟု လင်ချွမ် တွေးလိုက်မိသည်။

ရုတ်တရက် လေပြင်းတစ်ချက် ဝေ့သွားပြီး လျိုဟွမ်းယင်ကို ချုပ်ထားသော တပည့်နှစ်ဦးမှာ နေရာတင် ပွဲချင်းပြီး သေဆုံးသွားသည်။

ချန်အာကောသည် လျိုဟွမ်းယင် ဘေးနားသို့ ကိုယ်ယောင်ဖျောက်သကဲ့သို့ ရောက်ရှိသွားရာ ဟယ်ဟွမ်း အကြီးအကဲမှာ ချွေးစေးများ ထွက်လာတော့သည်။

"မဖြစ်နိုင်တာ... ဒီလောကမှာ အထွတ်အထိပ် နယ်ပယ် က တကယ်ရှိနေတာလား"

သူမ၏ တောင်ဝှေးကို ဆုပ်ကိုင်ထားသော လက်များ တုန်ယင်လာသည်။

"ငါ ထပ်ပြောမယ်... ထွက်သွားကြ"

"မဟုတ်ရင် အားလုံး သေရမယ်"

ချန်အာကော​၏ အေးစက်သော အော်သံမှာ ဓားတစ်လက်ကဲ့သို့ ဟယ်ဟွမ်းတပည့်များ၏ နှလုံးသားကို ထိုးစိုက်လိုက်သည်။

တပည့်များမှာ ကြောက်ရွံ့ကာ ဆုတ်ခွာချင်နေကြသော်လည်း အကြီးအကဲမှာ ဂုဏ်သိက္ခာကို ငဲ့ကွက်ကာ ဇွတ်တိုးနေဆဲပင်။

"မင်းတို့ ပြန်ချင်ရင် ပြန်ကြ"

"ငါကတော့ ဒီမှာပဲ နေခဲ့မယ်"ဟု သူမ ခေါင်းမာနေဆဲပင်။

လင်ချွမ်​၏ မျက်လုံးများက အကြီးအကဲထံသို့ စူးစိုက်ကျရောက်သွားသည်။

သူမက သေချင်နေမှတော့ သူက ဖြည့်ဆည်းပေးရပေမည်။

"ဝူး"

လေပြင်းတစ်ချက် တိုက်ခတ်သွားပြီး လင်ချွမ်သည် အကြီးအကဲ​၏ ရှေ့တွင် ရုတ်တရက် ပေါ်လာသည်။

အတွင်းအား၏ ဖိအားကြောင့် ဘေးမှ ဟယ်ဟွမ်းတပည့်များ လွင့်ထွက်သွားပြီး အကြီးအကဲမှာ အသက်ရှူပင် ကျပ်သွားရပေ​၏။

သူမ၏ မျက်လုံးထဲတွင် ထိန်းမနိုင်သိမ်းမရသော ကြောက်ရွံ့မှုများ ပေါ်လာသည်။

"မင်း အသက်ရှင်နိုင်ပါသေးတယ်"

"ဒါပေမဲ့ မင်းကိုယ်တိုင်က သေလမ်းကို ရွေးခဲ့တာပဲ"

လင်ချွမ်​၏ စကားမဆုံးခင်မှာပင် တောင်ကြီးတစ်ခု ဖိချလိုက်သကဲ့သို့ အကြီးအကဲမှာ ဒူးထောက်ကျသွားသည်။

ဓားအရှိန်အဝါ တစ်ခုက သူမ၏ နဖူးတည့်

တည့်ကို ဖောက်ထွက်သွားပြီ။

ဝူတန်တောင်တစ်ခုလုံး တိတ်ဆိတ်ခြင်းသို့။

ဟယ်ဟွမ်းဂိုဏ်း၏ အကြီးအကဲ တစ်ဦးအဖြစ် ထင်ရှားသော ပထမအဆင့် ကျင့်ကြံသူ မှာ ဤမျှလွယ်လွယ်နှင့် သေဆုံးသွားသည်လား။

အမြဲတမ်း နူးညံ့သိမ်မွေ့သည်ဟု ထင်ရသော ချန်အာကောမှာ ဤမျှ ရက်စက်ပြတ်သားလိမ့်မည်ဟု မည်သူမျှ မထင်ထားခဲ့ကြပေ။

ဝူတန်ကျောင်းထိုင်ဆရာတော်ပင် မှင်တက်လျက် ရေရွတ်လိုက်မိသည်။

"သူက တကယ်ပဲ အာကော ဟုတ်ရဲ့လား"