ကျန်းဟယ်၏ နည်းဗျူဟာ

အနောက်ဒေသ။

ယခင်မင်းဆက်၏ ရတနာသတင်းများ ထွက်ပေါ်လာပြီးနောက် အနောက်ဒေသသည် မကြုံစဖူး စည်ကားလာခဲ့သည်။

အလယ်ပိုင်းဒေသမှ သူတော်စင်ဂိုဏ်းများနှင့် ဒေသခံ နတ်ဆိုးဂိုဏ်းများ ရောထွေးနေထိုင်လာကြရာ ပဋိပက္ခများမှာ ရှောင်လွှဲမရနိုင်ပေ။

အကြီးအကျယ် တိုက်ခိုက်မှုမျိုး မရှိသေးသော်လည်း မြို့ရွာအနှံ့တွင် ဂိုဏ်းသားအချင်းချင်း စကားများရန်ဖြစ်ကြသည်မှာ သာမန်ကိစ္စကဲ့သို့ပင်။

ဆယ်ရက်အတွင်းတွင် အနောက်ဒေသမြို့ငယ်လေးများ၌ သူတော်စင်ဂိုဏ်းဝင် ဦးရေမှာ မိနတ်ဆိုးဂိုဏ်းသားများထက်ပင် ပို၍ များပြားလာခဲ့သည်။

မြို့ငယ်လေးတစ်မြို့ရှိ တည်းခိုခန်းတစ်ခုတွင် ကတုံးပြောင်နှင့် သင်္ကန်းဝတ် ရဟန်းတစ်စုက စားပွဲသုံးလုံးစာ နေရာယူထားကြသည်။

ထိုရဟန်းများကြားတွင် ခန့်ညားထည်ဝါသော အဝတ်အစားများ ဝတ်ဆင်ထားသည့် လူငယ်တစ်ဦး ပါဝင်နေသည်။

"နန်းတွင်းကြီးကြပ်ရေးမှူးကိုယ်တိုင် အနောက်ဒေသကို လာတာ တစ်ခုခုဖြစ်သွားရင် ဆင်းရဲသားဘုန်းကြီးအနေနဲ့ ဧကရာဇ်မင်းကို ဘယ်လိုရှင်းပြရမလဲ မသိဘူး"

ဟု ရှောင်လင်မှ ကျဲ့ခုန်း က စိုးရိမ်တကြီး ဆိုသည်။

ကျန်းဟယ် က ယပ်တောင်ကို ခတ်ရင်း ပြုံးလိုက်သည်။

"ကိုယ်တော် ကျဲ့ခုန်း စိတ်မပူပါနဲ့"

"ကျွန်တော်ကလည်း သိုင်းလောကနဲ့ မစိမ်းလှပါဘူး"

"မိစ္ဆာကောင်တွေကို တိုက်ခိုက်ဖို့ ကိုယ့်ကိုယ်ကိုယ် ကာကွယ်နိုင်စွမ်း အနည်းငယ်တော့ ရှိပါတယ်"

နန်းတော်အတွင်းရှိ သိုင်းကျမ်းတိုက်မှာ ရှောင်လင်​၏ သိုင်းကျမ်းထက်တော့ မသေးပေ။

ဧကရာဇ် ယုံလယ်သည် စစ်ဆင်ရေးများအတွင်း ဂိုဏ်းများစွာကို တိုက်ခိုက်ချေမှုန်းခဲ့စဉ်က ထိုဂိုဏ်းများ၏ သိုင်းကျမ်းများကို သိမ်းပိုက်ခဲ့ခြင်းကြောင့်ပင်။

ကျန်းဟယ်မှာ ဧကရာဇ်၏ လူယုံပီပီ ထိုအဖိုးတန်သိုင်းကျမ်းများကို လေ့ကျင့်ခွင့်ရထားသူ ဖြစ်​၏။

"နန်းတွင်းက လူယုံအရာရှိတွေက နန်းတော်ထဲမှာ အတော်ဆုံးတွေလို့ ကြားဖူးတယ်"

"အကြီးအကဲရဲ့ အဆင့်ကိုတောင် ကိုယ်တော် မခန့်မှန်းနိုင်ဘူး"

"သိပါရစေဦး၊ အကြီးအကဲရဲ့ သိုင်းအဆင့်က ဘယ်လောက်လဲ"

ဟု ကျဲ့ခုန်းက သိချင်စိတ်ဖြင့် မေးလိုက်သည်။

ကျန်းဟယ်က အပြုံးဖြင့်သာ တုံ့ပြန်ပြီး တိတိကျကျ မဖြေခဲ့ပေ။

သူသည် သိုင်းလောကသားများကို နန်းတွင်းဘက်ပါအောင် စည်းရုံးရန် လာခြင်းဖြစ်ရာ သူ၏ အစွမ်းကို ထုတ်မပြဘဲ လျှို့ဝှက်ထားခြင်းက ပို၍ ထိရောက်မည်ဟု ယူဆထားသည်။

ထိုစဉ် အသူရာဂိုဏ်း မှ တပည့်တစ်စု တည်းခိုခန်းထဲသို့ ဝင်လာသဖြင့် အခြေအနေမှာ တင်းမာသွားသည်။

"ဒီမှာ ဝူတန်ဂိုဏ်းကလူတွေ မရှိဘူး"

ဟု အသူရာတပည့်သားတစ်ဦးက ဆိုသည်။

သူတို့သည် ဝူတန်ဂိုဏ်းသားများကို ရှာနေခြင်းလား။

"ဝူတန်ဂိုဏ်းက တောင်တံခါးပိတ်ထားတယ်ဆိုတာ တကယ်ပဲလား"

ဟု ကျန်းဟယ်က ကျဲ့ခုန်းကို မေးလိုက်သည်။

ကျဲ့ခုန်းကလည်း အသူရာဂိုဏ်း၏ ညာလက်ရုံးအစောင့်အရှောက် ကျန်းခွေ့မှာ ဝူတန်တွင် အဖမ်းခံထားရဆဲ ဖြစ်သော်လည်း ဝူတန်က ဘာကြောင့် ရတနာကိစ္စကို စိတ်မဝင်စားဘဲ တံခါးပိတ်နေသလဲဆိုသည်ကို သူကိုယ်တိုင်လည်း နားမလည်ကြောင်း ပြောပြလာ၏။

"ဝူတန်ဂိုဏ်းလား၊ စိတ်ဝင်စားစရာပဲ"

"အခွင့်သာရင် ဝူတန်တောင်ကို သွားလည်ချင်သေးတယ်" ဟု ကျန်းဟယ်က ဆိုလိုက်သည်။

သူသည် ပထမအဆင့် အထွတ်အထိပ်ထက် သာလွန်သည်ဟု ကျော်ကြားသော ချန်အာကောအကြောင်းကိုလည်း စိတ်ဝင်စားနေခြင်းပင်။

ထိုစဉ် အသူရာတပည့်များက ကျန်းဟယ်ကို သတိထားမိသွားသည်။

"မင်းရဲ့ စကားပြောပုံနဲ့ အမူအရာက အရာရှိတစ်ယောက်နဲ့ တူတယ် မင်းက နန်းတွင်းက မဟုတ်လား"

ဟု သူတို့က မေးလိုက်သည်။

ကျန်းဟယ်က သူ၏ အထောက်အထားကို မဖုံးကွယ်ခဲ့ပေ။

နန်းတွင်းက ပါဝင်ပတ်သက်နေသည်ကို နတ်ဆိုးဂိုဏ်းများ သိသွားမှသာ သူတော်စင်ဂိုဏ်းများနှင့် နတ်ဆိုးဂိုဏ်းများကြား ပိုမိုတင်းမာလာပြီး နန်းတွင်းအနေဖြင့် အကျိုးအမြတ် ထုတ်နိုင်မည် မဟုတ်ပါလား။

ဤသည်မှာ ကျန်းဟယ်၏ နက်နဲသော နည်းဗျူဟာပင်။

"သွားကြစို့"

"ရတနာမြှုပ်ထားတဲ့ နေရာနဲ့ ပတ်သက်တဲ့ သတင်းအချို့ ကျွန်တော် သိထားတယ်"

"အဆင်ပြေရင် အဲဒီရတနာကို တကယ် ရှာတွေ့နိုင်လိမ့်မယ်"

ဟု ကျန်းဟယ်က ယပ်တောင်ကို ပိတ်ကာ မျှော်လင့်ချက်အပြည့်ဖြင့် ပြောလိုက်လေတော့သည်။