လီမိသားစု မျိုးပြုန်းခြင်း၊ ဓားစိတ်ဆန္ဒကို နားလည်ခြင်း

ဘာ…

ထိုစကားကို ကြားရသော် လီမိသားစုဝင်များသည် ဆွံ့အသွားကြသည်။

ဆိုရိုးစကား တစ်ခုရှိသည်… "တစ်နပ်စားဖူး သူ့ကျေးဇူး" ဟူ၍။

သို့သော် သူတို့ရှေ့မှ လျှို့ဝှက်ဆန်းကြယ်သော ပုဂ္ဂိုလ်သည် ဤမျှအထိ ကျေးဇူးကန်းလိမ့်မည်ဟု သူတို့ လုံးဝ ထင်မှတ်မထားခဲ့ကြပေ။

ကျေးဇူးမဆပ်နိုင်မှာ ကြောက်လို့ လီမိသားစု တစ်ခုလုံးကို သတ်ပစ်ဖို့ ဆုံးဖြတ်လိုက်တယ်တဲ့လား။

ဒါက နတ်ဆိုးလမ်းစဉ်ကို လျှောက်လှမ်းနေသူ တစ်ဦးရဲ့ စရိုက်ပဲ။ စစ်မှန်တဲ့ နတ်ဆိုးတစ်ကောင်ပဲ။

သူ ကျေးဇူးဆပ်တဲ့ နည်းလမ်းက မိသားစုတစ်ခုလုံးကို သတ်ပစ်လိုက်တာလား။

တစ်ယောက်ချင်းစီတိုင်းသည် ခိုက်ခိုက်တုန်အောင် ကျောချမ်းသွားကြသည်။ ဒီကောင်က တကယ့် အရူးပဲ။

သူနဲ့ ကျိုးကြောင်းဆီလျော်အောင် ပြောဆိုလို့ ရနိုင်မှာ မဟုတ်ဘူး။

လီမိသားစုက တကယ်ကြီး ကျိန်စာသင့်နေလို့သာ ဒီလိုလူမျိုးနဲ့ လာတိုးတာ ဖြစ်မယ်။

အတိတ်က လီမိသားစု ကျူးလွန်ခဲ့တဲ့ မကောင်းမှုတွေအတွက် အခုမှ ပြန်ပေးဆပ်နေရတာများလား။

"ပြေးကြ"

လီဟောက်ရန်မှာ ကြောက်လန့်တကြား ဖြစ်နေသော်လည်း သူတို့အုပ်စု ပေါင်းလိုက်လျှင်ပင် ဤနတ်ဆိုးကို ယှဉ်နိုင်မည် မဟုတ်ကြောင်း ကောင်းစွာ သိရှိထားသည်။

ပြိုင်ဘက်သည် သိုင်းပညာ အရှင်သခင် တစ်ယောက် ဖြစ်နေရုံသာမက…

အလင်းတန်း ဓားသိုင်းကို တတ်မြောက်ထားပြီး နတ်ဘုရားဓားတစ်လက်ကိုလည်း ပိုင်ဆိုင်ထားသည်။

ထိုကဲ့သို့သော စွမ်းအားဖြင့်ဆိုလျှင် အရှင်သခင် အချင်းချင်းကြားမှာပင် သူသည် အကြွင်းမဲ့ သခင်တစ်ပါး ဖြစ်နေပြီ ဖြစ်သည်။

ထို့ကြောင့် သူတို့ကို သတ်ဖြတ်ဖို့ဆိုသည်မှာ ကြက်ကလေး၊ ငှက်ကလေးတွေကို သတ်သလောက်ပင် လွယ်ကူနေမည်မှာ သေချာ၏။

ယခုအချိန်တွက် တစ်ခုတည်းသော နည်းလမ်းမှာ ပြေးဖို့ပင်... တတ်နိုင်သမျှ ဝေးဝေးကို ပြေးဖို့ပင်။

ဘယ်နှယောက် အသက်ရှင်ကျန်ရစ်မလဲ ဆိုသည်ကတော့ ကံတရားအတိုင်းပင်။

ဝှစ်…

ပြိုင်ဘက်ကင်း ခြေသိုင်း - အိမ်မြှောင် နံရံကပ်သိုင်း…

ချက်ချင်းပင် လီဟောက်ရန်၏ ပုံရိပ်သည် တဖျပ်ဖျပ် လှုပ်ရှားသွား၏။ သူသည် အလွန် လျင်မြန်သော အရှိန်ဖြင့် နံရံပေါ်သို့ တွယ်ကပ်တက်သွားကာ မြေမျက်နှာသွင်ပြင်ကို အခွင့်ကောင်းယူပြီး ဤနေရာမှ အမြန်ဆုံး ထွက်ခွာရန် ကြိုးစားလိုက်သည်။

ကျန်ရှိနေသော လီမိသားစုဝင်များ၏ သေရေးရှင်ရေးကို သူ ဂရုမစိုက်နိုင်တော့ပေ။

သူသည် ငယ်ရွယ်သေးပြီး အနာဂတ်တွင်လည်း မျှော်လင့်ချက်များ အများကြီး ရှိနေသေးသည်မို့ ဤနေရာမှာ လုံးဝ အသေခံ၍ မဖြစ်ပါ။

အနာဂတ်တွင် သူ အစွမ်းထက်လာသည့်အခါ သေချာပေါက် လက်စားချေဖို့ ပြန်လာဦးမည်။

"နှေးလွန်းတယ်"

ကျန်းဖန်သည် လီဟောက်ရန်၏ လှုပ်ရှားမှုများကို တည်ငြိမ်စွာ ကြည့်နေလိုက်သည်။ သူ့မျက်လုံးထဲတွင် ပြိုင်ဘက်၏ အမြန်နှုန်းသည် ခရုတစ်ကောင်ကဲ့သို့ နှေးကွေးနေ၏။ လှုပ်ရှားမှုတိုင်းကို ကြိုတင်ခန့်မှန်းနိုင်နေရာ သူ့လက်ထဲမှ လွတ်မြောက်ရန်မှာ မဖြစ်နိုင်ပေ။

ဝှစ်…

သူ၏ ပုံရိပ်သည် တဖျပ်ဖျပ် လက်သွားပြီး လေစီးကြောင်းများ ဝန်းရံထားသကဲ့သို့ တိမ်များကို စီးနင်းလိုက်ပါသွား၏။ ပျံသန်းနေသော ငှက်တစ်ကောင်၏ အမြန်နှုန်းသည်ပင် သူ့ကို ယှဉ်နိုင်ခြင်း မရှိပေ။

ထို့နောက် သူသည် ဓားရှည်ကို ကျစ်ကျစ်ပါအောင် ဆုပ်ကိုင်လိုက်ပြီး ဖွဖွလေး ခုတ်ပိုင်းလိုက်လေသည်။

ကြောက်မက်ဖွယ်ကောင်းသော ဓားချီစွမ်းအားသည် တားဆီး၍မရနိုင်သော အရှိန်အဟုန်ဖြင့် ဝင်ရောက်လာလေသည်။

"သွားပြီ"

လီဟောက်ရန်၏ မျက်ဝန်းအိမ်များ ကျဉ်းမြောင်းသွားပြီး သေစေနိုင်သော အန္တရာယ်ကို ခံစားလိုက်ရသည်။ သူသည် ဤသေစေနိုင်သော တိုက်ခိုက်မှုကို ရှောင်တိမ်းရန် ကြိုးစားလိုက်သည်။

သို့သော် သံသယဖြစ်ဖွယ် မရှိသည်မှာ သူနှင့် ကျန်းဖန်ကြားရှိ စွမ်းအားကွာဟချက်သည် ကြီးမားလွန်းလှသည်။

တိုက်ခိုက်မှု ရောက်ရှိလာသည်ကို အာရုံခံစားမိသော်လည်း သူ၏ ခန္ဓာကိုယ်က လုံးဝ တုံ့ပြန်နိုင်စွမ်း မရှိတော့ချေ။

ဘုန်း…

ထိုအခိုက်အတန့်တွင် ဓားချက် ကျရောက်လာပြီး သူ၏ ခန္ဓာကိုယ် တစ်ခုလုံးကို နှစ်ပိုင်း ပိုင်းပစ်လိုက်သည်။

ဘေးနားရှိ နံရံသည်ပင် ဓားအလင်းရောင်၏ ထက်မြက်မှုကို မခံနိုင်ဘဲ ချက်ချင်း နှစ်ပိုင်းကွဲပြီး ကြေမွသွားခဲ့ရသည်။

"ဘယ်လိုလုပ် ဖြစ်နိုင်မှာလဲ"

မသေဆုံးမီ လီဟောက်ရန်၏ မျက်လုံးများထဲတွင် အဆုံးအစမဲ့ ကြောက်ရွံ့မှုနှင့် နောင်တများ ပေါ်လွင်နေ၏။ လျှို့ဝှက်ဆန်းကြယ်သော သိုင်းပညာ အရှင်သခင် တစ်ယောက်၏ လက်ချက်ဖြင့် သေဆုံးသွားရသည်ကို မယုံကြည်နိုင် ဖြစ်နေရှာသည်။

မူလက သူ့တွင် ကောင်းမွန်သော အလားအလာများ ရှိခဲ့သည်။ ထူးချွန်သော သိုင်းပညာ ပါရမီ ရှိပြီး အရှင်သခင် ဖြစ်လာရန် မျှော်လင့်ချက်လည်း ရှိခဲ့သည်။ သိုင်းပညာမှတစ်ဆင့် စစ်မှန်သော ကျင့်ကြံသူ ဖြစ်လာရန်ပင် ကြိုးပမ်းနိုင်ခဲ့သည်။

သို့သော် ယခုအခါ သူ၏ ရည်မှန်းချက်များ မအောင်မြင်သေးမီမှာပင် လျှို့ဝှက်ဆန်းကြယ်သော အရှင်သခင် တစ်ယောက်၏ လက်ချက်ဖြင့် သေဆုံးသွားခဲ့ရချေပြီ။

သူ၏ ရည်မှန်းချက် အားလုံးသည် ဤအခိုက်အတန့်တွင် လေထဲသို့ ပျောက်ကွယ်သွားခဲ့ပြီ ဖြစ်သည်။

ကျယ်လောင်သော အသံနှင့်အတူ သူ၏ ခန္ဓာကိုယ်သည် မြေပြင်ပေါ်သို့ ပြုတ်ကျသွားပြီး နှစ်ပိုင်းပြတ်ကာ သွေးများ ဒလဟော စီးကျနေလေသည်။

လီမိသားစု၏ ခေါင်းဆောင်သစ် လီဟောက်ရန်သည် ကျန်းဖန်၏ ဓားချက်တစ်ချက်တည်းဖြင့် ဤကဲ့သို့ သေဆုံးသွားခဲ့ရသည်။

"ခေါင်းဆောင်"

ဤမြင်ကွင်းကို မြင်လိုက်ရသော် ကျန်ရစ်ခဲ့သော လီမိသားစု အကြီးအကဲများသည် ဒေါသကြောင့် မျက်လုံးများ ပြူးကျယ်သွားကြသည်။ လီမိသားစု၏ မျှော်လင့်ချက်သည် ဤနေရာတွင် ဆိုးဆိုးရွားရွား ပျက်စီးသွားခဲ့ရသည်။ မိသားစု၏ အနာဂတ် အလားအလာများကို တစ်ချက်တည်းနှင့် ရိုက်ချိုးလိုက်သကဲ့သို့ပင်။

တစ်ယောက်ချင်းစီတိုင်းသည် ကျန်းဖန်ကို အလွန်အမင်း မုန်းတီးရွံရှာသော မျက်လုံးများဖြင့် ကြည့်လိုက်ကြပြီး သူနှင့်အတူ သေပွဲဝင်ချင်နေကြသည်။

"ခင်ဗျားတို့ အားလုံး သေရမယ်"

ကျန်းဖန် အေးစက်စွာ နှာခေါင်းရှုံ့လိုက်သည်။ ဝမ်းနည်းခြင်း၊ ဝမ်းသာခြင်း အလျဉ်းမရှိပေ။

ဤလီမိသားစု ကပ်ပါးကောင်များ တံငါသည်များကို သတ်ဖြတ်စဉ်က သူတို့ အလွန် မောက်မာဝင့်ကြွားခဲ့ကြသည်။

သာမန်လူများကို ပုရွက်ဆိတ်များကဲ့သို့ ဆက်ဆံခဲ့ကြသည်။

သူတို့၏ ကိုယ်ပိုင် ပျော်ရွှင်မှုအတွက် မရေမတွက်နိုင်သော တံငါသည် မိသားစုများကို ဘဝပျက်စေခဲ့သည်။

မရေမတွက်နိုင်သော တံငါသည်များ၏ ငိုကြွေးသံများနှင့် ညည်းတွားသံများကို သူတို့ လျစ်လျူရှုခဲ့ကြသည်။

အခု သူတို့အလှည့် ရောက်လာတော့မှ ဒီလို မျက်နှာထားမျိုး ပြနေတာ... နာကျင်မှုဆိုတာ ဘယ်လိုမျိုးလဲ ဆိုတာကို နောက်ဆုံးတော့ နားလည်သွားကြပြီလား။

သေချာသည်။ ဤလီမိသားစုဝင် တစ်ယောက်မျှ အပြစ်ကင်းခြင်း မရှိကြချေ။

တစ်ယောက်စီတိုင်းသည် နဂါးဘုရင်ဂိုဏ်းနှင့် လီမိသားစုမှ ရရှိသော စည်းစိမ်ဥစ္စာများကို ခံစားခဲ့ကြသည်။

ထို့ကြောင့် သူတို့ ကျိန်းသေ ပေးဆပ်ရမည် ဖြစ်သည်။

သူတို့ကို သနားညှာတာခြင်းသည် သေဆုံးသွားသော တံငါသည်များကို မလေးစားရာ ရောက်ပေလိမ့်မည်။

ဘုန်း... ဘုန်း... ဘုန်း…

တစ်ခဏချင်းမှာပင် ခန်းမဆောင် အတွင်း၌ ဓားချီစွမ်းအားများ ရှုပ်ထွေးယှက်နွယ်သွားလေသည်။

အသက်တစ်ရှူစာ အချိန်အတွင်း ခန်းမဆောင်ထဲရှိ လီမိသားစုဝင် တစ်ယောက်မကျန် ချက်ချင်း အသတ်ခံလိုက်ရပြီး ခန္ဓာကိုယ်များ နှစ်ပိုင်းပြတ်သွားကြသည်။

ခန်းမဆောင် နေရာအနှံ့တွင် သွေးများဖြင့် ဖုံးလွှမ်းနေသော ခြေလက်အင်္ဂါ အပိုင်းအစများ ပြန့်ကျဲနေလေသည်။

မည်သူမျှ အသက်ရှင် မလွတ်မြောက်နိုင်ခဲ့ကြပေ။

လီမိသားစုဝင် တိုင်းသည် မျက်လုံးများ ပြူးကျယ်လျက် နောင်တများဖြင့် သေဆုံးသွားကြကြောင်း ထင်ရှားနေသည်။

နှစ်ပေါင်းများစွာ စည်းစိမ်ချမ်းသာကို ခံစားခဲ့ရပြီးနောက် အမည်မသိ လူတစ်ယောက်၏ လက်ချက်ဖြင့် သေဆုံးရလိမ့်မည်ဟု သူတို့ လုံးဝ ထင်မှတ်မထားခဲ့ကြပေ။

"နောက်ဆုံးတော့ လက်စားချေနိုင်ခဲ့ပြီ"

ကျန်းဖန် အသက်ပြင်းပြင်း ရှူသွင်းလိုက်၏။ ထို့နောက် သူ့ခြေရင်းတွင် လဲလျောင်းနေသော ရန်သူ အမြောက်အမြားကို ကြည့်ရင်း သူ့ရင်ထဲတွင် မျိုသိပ်ထားရသော ခံစားချက်များ နောက်ဆုံးတွင် ပျောက်ကွယ်သွားပြီး စိတ်ကြည်လင်သွားသည်ဟု ခံစားလိုက်ရသည်။

သော်ကရွာတွင် နေထိုင်စဉ်က နဂါးဘုရင်ဂိုဏ်းသားများ၏ ဖိနှိပ်မှုကို သူ ခံခဲ့ရသည်။

အနည်းငယ် အမှားလုပ်မိသည်နှင့် ကပ်ဘေးဆိုက်ရောက်နိုင်သည်။

အသက်ရှင်ရပ်တည်ရန် အတွက် သူ သည်းခံခဲ့ရပြီး သော်ကရွာမှ ရွာသားများ၏ မိသားစု ဘဝလေးများ ပျက်စီးသွားသည်ကို သူ ဒီတိုင်းကြည့်နေခဲ့ရသည်။

ထိုစဉ်က အင်အားမရှိသဖြင့် သည်းခံရုံသာ တတ်နိုင်ခဲ့သည်။

ယခုမူ လက်စားချေနိုင်သော စွမ်းအားကို ပိုင်ဆိုင်ထားပြီဖြစ်သည့် အတွက် လီမိသားစု သိုင်းပညာရှင် အားလုံးကို သတ်ဖြတ်ပစ်လိုက်ခြင်း ဖြစ်သည်။

သေဆုံးသွားသော ရွာသားများက ပြန်လည် အသက်မရှင်နိုင်တော့သော်လည်း အနည်းဆုံးတော့ သူတို့၏ ဝိညာဉ်များ ငြိမ်းချမ်းသွားနိုင်ပေလိမ့်မည်။