ယောင်ချန်နှင့် ရှောင်ယန်တို့၏ လေ့လာမှုနှင့် သင်ယူမှု

ကျားမာနိုင်ငံတော်။

တိမ်တိုက်ဂိုဏ်း။

တိမ်တိုက်ဂိုဏ်း၏ ဝါရင့်အကြီးအကဲဖြစ်သူ ယွင်လင်းသည် သူ့ရှေ့တွင် ရှိနေသော တပည့်အား ကြည့်ကာ "ဒါဆို ဒီသတင်းက အမှန်ပဲပေါ့" ဟု မေးလိုက်သည်။

သိုင်းလေ့ကျင့်သူအဆင့်ရှိသော ထိုတပည့်က ရိုသေစွာဖြင့် "ဟုတ်ပါတယ် ဝါရင့်အကြီးအကဲ၊ ရှောင်မိသားစုက ရှောင်ယန်ဟာ တကယ်ပဲ သိုင်းလေ့ကျင့်သူအဆင့်ကို ရောက်ရှိနေပါပြီ။ သူရဲ့ ကျင့်ကြံခြင်းက အလွန်ပဲ မြန်ဆန်လှပါတယ်။ ကျွန်တော်တို့ ခဏလောက်ပဲ လေ့လာနိုင်ခဲ့ပြီး အမြန်ပြန်လာခဲ့ရတာပါ" ဟု ပြန်လည်ဖြေကြားခဲ့သည်။

ဤသတင်းကို ကြားသိရသောအခါ ဝါရင့်အကြီးအကဲ ယွင်လင်း၏ မျက်နှာအမူအရာသည် ရုတ်တရက် ပြောင်းလဲသွားသည်။ "ဒီလောက်အထိ ထူးချွန်တဲ့ ကျင့်ကြံခြင်းပါရမီမျိုးဟာ ရန်ယန်တုန်းကတောင် မရှိခဲ့ဖူးဘူး။ ကြည့်ရတာ ငါတို့ဘက်ကလည်း ပြင်းထန်လှတဲ့ လေ့ကျင့်မှုတွေကို အကောင်အထည်ဖော်ရတော့မယ် ထင်တယ်" ဟု ရေရွတ်လိုက်သည်။

ယွင်ဖူနှင့် ယွင်ရွှီတို့သည် တစ်ဦးကိုတစ်ဦး ကြည့်လိုက်ကြပြီး သူတို့၏ မျက်နှာများမှာ ညှိုးငယ်သွားကြသည်။ "ဝါရင့်အကြီးအကဲ၊ အခြေအနေက ဒီအတိုင်းဆိုရင် ဒီကောင်က နောက်ထပ် နှစ်နှစ်အတွင်းမှာ လူငယ်ဂိုဏ်းခေါင်းဆောင်ကို ကျော်တက်သွားမှာ အသေအချာပါပဲ။ သူ့ကို သွားသတ်လိုက်ရင် မကောင်းဘူးလား" ဟု ယွင်ဖူက အကြံပြုသည်။

သို့သော် ယွင်လင်းသည် စဉ်းစားဆင်ခြင်နိုင်စွမ်းရှိနေဆဲဖြစ်သည်။ အကယ်၍သာ သူတို့သည် ယခုအချိန်တွင် ရှောင်ယန်ကို သတ်လိုက်ပါလျှင် တိမ်တိုက်ဂိုဏ်း၏ ဂုဏ်သိက္ခာကို များစွာ ထိခိုက်စေမည်ဖြစ်သည်။ ထိုသို့ဆိုလျှင် မည်သူက တိမ်တိုက်ဂိုဏ်းသို့ ဝင်ရောက်လိုတော့မည်နည်း။

ထို့အပြင် ဂိုဏ်းချုပ်မှာလည်း ခရီးထွက်သွားသည်မှာ ရက်ပေါင်းများစွာ ကြာမြင့်နေပြီဖြစ်ပြီး သူမ၏ သတင်းအစအနကို ယခုတိုင် မသိရသေးပေ။ အကယ်၍ သူမသာ သိသွားပါလျှင် သူတို့အား အပြစ်ပေးမည်မှာ အသေအချာပင်ဖြစ်သည်။

ထိုသို့ တွေးတောရင်း ယွင်လင်းသည် ဆယ်စုနှစ်ပေါင်းများစွာ အိုမင်းသွားသကဲ့သို့ ခံစားလိုက်ရကာ သူ၏ ထိုင်ခုံပေါ်သို့ လေးလံစွာ မှီချလိုက်သည်။ ရန်ယန်၏ စွမ်းရည်မှာ အံ့ဩစရာကောင်းသော်လည်း ရှောင်မိသားစုမှ ပါရမီရှင် ရှောင်ယန် ထုတ်ပြနေသော စွမ်းရည်များမှာလည်း ထူးခြားလွန်းလှသည်။

ယခုအခါ သုံးနှစ်သ‌ဘောတူညီချက်ကတိသည် ကိုင်တွယ်ဖြေရှင်းရန် ခက်ခဲသော ကိစ္စရပ်တစ်ခု ဖြစ်လာခဲ့ပြီဖြစ်သည်။

ယွင်ဖူသည် တစ်စုံတစ်ခုကို စဉ်းစားမိဟန်ဖြင့် သူ၏ နှုတ်ခမ်းကို သပ်လိုက်ပြီး ရှေ့သို့ တိုးကာ လက်အုပ်ချီလျက် "ဝါရင့်အကြီးအကဲ၊ ရှောင်ယန်ကို ကူညီပေးနေတာက ကွန်ဖြူးရှပ်ပညာရှိလို့ ခေါ်တဲ့သူ ဖြစ်နိုင်မလား" ဟု မေးမြန်းလိုက်သည်။

"မင်းပြောတာ သခင်လေး ကျန်းချန်လား"

ယွင်လင်းသည် သူ၏ မုတ်ဆိတ်လေးကို ပွတ်သပ်ရင်း တည်ငြိမ်လေးနက်သော အသံဖြင့် "ခိုင်လုံတဲ့ အထောက်အထားမရှိဘဲ ဒါကို ထပ်မပြောပါနဲ့" ဟု ဆိုလိုက်သည်။

သူသည် ရှောင်ယန်ကို မနှစ်သက်သော်လည်း တိမ်တိုက်ဂိုဏ်း၏ ဂုဏ်သိက္ခာနှင့် အဆင့်အတန်းကိုမူ အလေးထားသည်။ ကျားမာနိုင်ငံတော်၏ အစောင့်အရှောက် ကျရှင်းထျန်းပင်လျှင် ထိုသူကို အလွန်အမင်း လေးစားသည်ဖြစ်ရာ ထိုသူ၏ အစွမ်းအစမှာ အထင်သေး၍ မရနိုင်ပေ။

ထို့အပြင် ဂိုဏ်းချုပ်သည်လည်း ထိုသူနှင့်အတူ ကျင့်ကြံဖူးသူဖြစ်သဖြင့် သူမအနေဖြင့် အချိန်တိုအတွင်း ကြယ်ခြောက်ပွင့် သိုင်းဧကရာဇ်အဆင့်သို့ ရောက်ရှိသွားခြင်းမှာလည်း သခင်လေး ကျန်းချန်နှင့် မကင်းနိုင်ပေ။

ထို့ကြောင့် လုံးဝမဖြစ်မနေ အခြေအနေမှလွဲ၍ တိမ်တိုက်ဂိုဏ်းအနေဖြင့် သခင်လေကွန်ဖြူးရှပ်ပညာရှိနှင့် အဆက်အသွယ် မဖြတ်သင့်ပေ။

ယွင်လင်းသည် တစ်ခါတစ်ရံတွင် တဇွတ်ထိုးလုပ်တတ်သော်လည်း သူသည် လူမိုက်တစ်ယောက် မဟုတ်ပေ။ အချိန်ကြာမြင့်စွာ တာဝန်ယူခဲ့ရသူပီပီ အရေးကြီးသောအရာနှင့် မရေးကြီးသောအရာကို သူ ကောင်းစွာ ခွဲခြားသိမြင်နိုင်သည်။

ဂိုဏ်းချုပ် ပြန်လာသည်အထိ စောင့်ဆိုင်းပြီးမှ အစီအစဉ်များ ချမှတ်ခြင်းက ပို၍ ကောင်းမွန်ပေလိမ့်မည်။ ဝေဟင်ထက်တွင် လဝက်ကြာ ပျံသန်းပြီးနောက် ကျန်းချန်နှင့် မရမ်းစေ့ရောင်အတောင်ပံ ခြင်္သေ့မင်းတို့သည် ကျားမာနိုင်ငံတော်၏ အရှေ့ဘက် တောင်တန်းဒေသသို့ အောင်မြင်စွာ ပြန်လည်ရောက်ရှိလာခဲ့ကြသည်။

မရည်ရွယ်ဘဲနှင့် ကျန်းချန်တို့ ဤနေရာမှ ထွက်ခွာသွားသည်မှာ လပေါင်းများစွာ ကြာမြင့်ခဲ့ပြီဖြစ်သည်။ အချိန်မှာ တကယ့်ကို လျင်မြန်စွာ ကုန်ဆုံးသွားခဲ့လေပြီ။

"သခင်၊ ကျွန်တော်တို့ ရောက်ပါပြီ"

မရမ်းစေ့ရောင်အတောင်ပံ ခြင်္သေ့မင်း၏ သတိပေးမှုကို ကြားသောအခါ ကျန်းချန်သည် သူ၏ မျက်လုံးများကို ဖြည်းညှင်းစွာ ဖွင့်လိုက်ပြီး သူ၏ ရှေ့မှ စိမ်းလန်းစိုပြည်သော တောင်တန်းများနှင့် သစ်တောများကို ကြည့်လိုက်သည်။ သူ၏ မျက်နှာပေါ်တွင် လွမ်းဆွတ်ဖွယ်ရာ အပြုံးတစ်ခု ပေါ်ပေါက်လာသည်။

မိမိအိမ်သည် အမှန်တကယ်ပင် ကောင်းမွန်လှသည်။ လတ်ဆတ်သန့်ရှင်းပြီး အေးချမ်းကာ လွတ်လပ်မှုအပြည့် ရှိနေသည်။

ကျန်းချန်သည် ဟွိုင်မြစ်ဝါးတောအတွင်းသို့ ခုန်ဆင်းလိုက်သော်လည်း မီဒူဆာနှင့် ယွင်ယွင်တို့ကို မတွေ့ရပေ။

"အားလုံး ဘယ်ကို ရောက်ကုန်ကြတာလဲ"

ကျန်းချန်သည် တိုးတိုးလေး ရေရွတ်လိုက်ပြီးနောက် သူ၏ လက်ချောင်းကို အနည်းငယ် လှုပ်ရှားလိုက်ရာ အတွင်းရှိ ဒိုချီစွမ်းအင်များသည် လှိုင်းထန်သော မြစ်တစ်စင်းကဲ့သို့ ပျံ့နှံ့သွားသည်။ သို့သော် ဆယ်မိုင်ပတ်လည်အတွင်း ရှာဖွေကြည့်သော်လည်း သူတို့၏ အရိပ်အယောင်ကို မတွေ့ရပေ။ 'သူတို့ အပြင်သို့ ထွက်ကစားနေကြခြင်းများ ဖြစ်ပေမလား'

မရမ်းစေ့ရောင် အတောင်ပံ ခြင်္သေ့ပေါက်လေးပင် ပျောက်ကွယ်နေသည်မှာ အလွန် ထူးဆန်းလှသည်။

"သခင်၊ ကျွန်တော့်သားလေး ပျောက်နေတယ်"

မီးတောက်က အံ့အားသင့်စွာ ပြောလိုက်သည်။

"သူ အပြင်ကို ထွက်ကစားနေတာ ဖြစ်မှာပါ။ မီးတောက်လေး၊ မင်းလည်း ခရီးပန်းလာတာဆိုတော့ သွားနားလိုက်ဦး။ ငါ သူတို့အတွက် လိုအပ်တဲ့ မှော်ဆေးလုံးတွေကို ဖော်စပ်လိုက်ဦးမယ်"

မရမ်းစေ့ရောင်အတောင်ပံ ခြင်္သေ့မင်းက ပြုံးလျက် "စိတ်မပူပါနဲ့ သခင်၊ ကျွန်တော့်ရဲ့ ခန္ဓာကိုယ်အခြေအနေအရ နောက်ထပ် ခရီးတစ်ခုလောက် သွားရင်တောင် ပြဿနာမရှိပါဘူး" ဟု ဆိုသည်။

"ဒါဆို နောက်တစ်ခေါက် ထပ်သွားမလား"

ကျန်းချန်က နောက်လိုက်သည်။

"အာ.... " မရမ်းစေ့ရောင်အတောင်ပံ ခြင်္သေ့မင်းက တုန်တုန်ရီရီဖြင့် "အဲဒီမှာ ဘာမှ ကောင်းတာမရှိဘူး။ ကျွန်တော့်ရဲ့ မှော်သားရဲတောင်တန်းလောက် မကောင်းပါဘူး ဟဲ ဟဲ" ဟု အလျင်အမြန် ပြောလိုက်သည်။

"ကောင်းပါပြီ၊ စကားများမနေနဲ့တော့။ ငါ မှော်ဆေးဖော်စပ်တော့မယ်။ ဒီအတောအတွင်း မင်းရဲ့ မှော်သားရဲတွေကို ငါ့ရဲ့ပေတစ်ရာပတ်လည်အတွင်းကို မလာစေနဲ့။ မှော်ဆေးလုံးက ထွက်ပေါ်လာမဲ့ စွမ်းအင်တွေကြောင့် သူတို့ သေသွားနိုင်တယ်"

အဆင့်ခုနစ်ဆေးလုံးတစ်လုံး ဖြစ်ပေါ်လာပြီးသည့်နောက် ကောင်းကင်နှင့်မြေကြီးတွင် ထူးခြားသော ဖြစ်စဉ်များ ဖြစ်ပေါ်တတ်ရာ မှော်သားရဲအများစုမှာ စပ်စုရန် ရောက်ရှိလာတတ်ကြသည်။ အကယ်၍ ဆေးဖော်စပ်သည့်နေရာနှင့် နီးကပ်နေပါလျှင် ထိုဖြစ်စဉ်များကြောင့် အသက်သေဆုံးနိုင်ချေ ရှိသည်။

မရမ်းစေ့ရောင်အတောင်ပံ ခြင်္သေ့မင်းသည် ခေါင်းညိတ်ပြလိုက်ပြီးနောက် ဟိန်းသံ တစ်ချက် ပေးလိုက်ရာ မှော်သားရဲတောင်တန်းအတွင်းရှိ မှော်သားရဲ အမြောက်အမြားမှာ ကြောက်လန့်တကြား ထွက်ပြေးသွားကြသည်။ အဆင့်လေးအထက်ရှိသော မှော်သားရဲများသာလျှင် သခင်လေး၏ ဆေးဖော်စပ်မှုကို မည်သူမျှ မနှောင့်ယှက်နိုင်စေရန် ပတ်ဝန်းကျင်အား စောင့်ကြည့်ရန် ရွေးချယ်ခဲ့သည်။

ကျန်းချန်သည် မှော်သားရဲတောင်တန်းအတွင်းရှိ ဆိတ်ငြိမ်သော နေရာတစ်ခုကို ရွေးချယ်ကာ ချုံးရှန်းပေါ်၌ တင်ပျဉ်ခွေထိုင်လိုက်သည်။ ရွှေနဂါးဖီးနစ် အိုး ကို ထုတ်ယူပြီးနောက် သူ၏ မှော်ဆေးဖော်စပ်ခြင်းကို စတင်လိုက်လေသည်။

မှော်သားရဲတောင်တန်းအတွင်း။

အနက်ရောင်ဝတ်ရုံကို ဝတ်ဆင်ထားသော လူငယ်တစ်ဦးသည် သူ၏ ရှေ့မှ မှော်သားရဲကို လက်ဝါးတစ်ချက်ဖြင့် သတ်ပစ်လိုက်သည်။ ထိုအချိန်တွင် သူသည် မလှမ်းမကမ်း၌ စုဝေးနေသော လျှပ်စီးဆေးလုံးများကို အာရုံခံမိပြီးနောက် အံ့အားသင့်သော မျက်နှာဖြင့် လှည့်ကြည့်လိုက်သည်။

"ဆရာ... အဲဒီ အစွမ်းထက်တဲ့ ပုဂ္ဂိုလ်ကြီးက မှော်ဆေးလုံးတွေကို ထပ်ပြီး ဖော်စပ်နေပြန်ပြီလား"

"သွားကြည့်ကြရအောင်" ယောင်ချန်သည် ထိုလူငယ်၏ ပုခုံးကို ဆွဲကိုင်ကာ လျှပ်စီးဆေးလုံးများ ရှိရာဘက်သို့ အရှိန်အဟုန်ဖြင့် ပျံသန်းသွားသည်။ ဆေးဝိဇ္ဇာတစ်ဦးအနေဖြင့် တစ်ဖက်လူမှာ အဆင့်ခုနစ်ဆေးလုံးကို ဖော်စပ်နေခြင်းဖြစ်ကြောင်း သူ အလိုလို သိလိုက်သည်။ သို့မဟုတ်ပါက ကောင်းကင်နှင့်မြေကြီး၏ ထူးခြားသောဖြစ်စဉ်မျိုး ပေါ်လာမည် မဟုတ်ပေ။

အဆင့်မြင့်မှော်ဆေးဆရာတစ်ဦး၏ ဆေးဖော်စပ်မှုကို လေ့လာခွင့်ရခြင်းမှာ အမှန်တကယ်ပင် အကျိုးရှိလှသည်။ သူ၏ ကိုယ်ပိုင်အရင်းအမြစ်မှာ ကန့်သတ်ချက်ရှိနေပြီး သူ၏ ဝိညာဉ်အခြေအနေမှာလည်း အဆင့်ခုနစ်ဆေးလုံးကို ဖော်စပ်ရန် မစွမ်းဆောင်နိုင်သေးပေ။ ထို့ကြောင့် သူ၏ တပည့်က အခြားသူ၏‌ ဆေးဖော်စပ်မှုကို လေ့လာစေခြင်းက ပိုကောင်းပေသည်။

၎င်းသည် အားစိုက်ထုတ်မှု ထက်ဝက်ဖြင့် ရလဒ် နှစ်ဆကို ရရှိစေနိုင်မည် ဖြစ်သည်။

သူတို့နှစ်ဦးသည် ချုံးရှန်းသို့ ရောက်ရှိလာသောအခါ ပတ်ဝန်းကျင်တစ်ခုလုံးတွင် ဒိုချီစွမ်းအင်များ လွှမ်းမိုးနေသည်ကို ခံစားလိုက်ရသည်။

မိုးကြိုးပစ်သံကဲ့သို့သော ဟိန်းသံများက သူ၏ နားထဲတွင် ပဲ့တင်ထပ်နေသည်။ ရှောင်ယန်သည် တံတွေးကို မျိုချလိုက်သည်။ 'ဤအရာမှာ အဆင့်ခုနစ်ဆေးလုံးမှ ထွက်ပေါ်လာသော လျှပ်စီးဆေးလုံးများလော' ၎င်းမှာ အလွန် ထိတ်လန့်ဖွယ်ရာ ကောင်းလှသည်။

သိုင်းဧကရာဇ်တစ်ဦးပင်လျှင် ယင်းကို တိုက်ရိုက် ရင်ဆိုင်ဝံ့မည်မဟုတ်ပေ။

ယောင်ချန်သည် သူ၏ မုတ်ဆိတ်လေးကို ပွတ်သပ်ကာ ဝဲပျံနေသော လျှပ်စီးဆေးလုံးများကို မော့ကြည့်ရင်း "ရှောင်ယန်၊ သေချာ ဂရုစိုက်ပြီး ကြည့်ထား။ အဆင့်ခုနစ်ဆေးလုံး ဖော်စပ်တဲ့ဖြစ်စဉ်မှာ နည်းပညာတွေ အများကြီး ပါဝင်တယ်။ မင်းအတွက်တော့ ဒါဟာ ဝိညာဉ်ဆေးလုံး ဒါမှမဟုတ် အံ့ဖွယ်ဆေးတွေထက်မဆို ပိုပြီး တန်ဖိုးရှိတယ်" ဟု သတိပေးလိုက်သည်။

ဖျော့တော့သော ရွှေရောင်မီးတောက်များသည် မှော်သားရဲတောင်တန်း တစ်ခုလုံးကို တဖြည်းဖြည်း ဖုံးလွှမ်းသွားသည်။ ယောင်ချန်သည် ဤပုဂ္ဂိုလ်၏ မှော်ဆေးဖော်စပ်မှု အဆင့်အတန်းမှာ အလွန်ပင် ကျွမ်းကျင်နေပေရာ သူ၏ ယခင်အချိန်နှင့် ယှဉ်လျှင်ပင် မနိမ့်ကျဘဲ သာလွန်နေနိုင်ကြောင်း တွေးတောကာ သက်ပြင်းချလိုက်မိသည်။

အဆင့်မြင့်မှော်ဆေးဆရာများသည် တစ်လောကလုံးတွင် ဖီးနစ်ငှက်၏ အမွေးအတောင်နှင့် ကျွိလင်သားရဲ၏ ဦးချိုကဲ့သို့ပင် အလွန်တရာ ရှားပါးလှသည်။ ယောင်ချန်သည် အဆင့်ရှစ်မှော်ဆေးဆရာ အားလုံးနီးပါးနှင့် တွေ့ဆုံဖူးသော်လည်း ကျန်းချန်ကိုမူ တစ်ခါမျှ မတွေ့ဖူးခဲ့ပေ။

'ဤသူသည် မည်သည့် မျိုးနွယ်စု၏ မျိုးဆက် ဖြစ်နိုင်ပါလိမ့်'

ရှောင်ယန်သည် ဆိတ်ဆိတ်နေပြီး မလှမ်းမကမ်းတွင် ရှိနေသော၊ သာမန်အချိန်များတွင် မြင်တွေ့ရန် ခက်ခဲလှသည့် အဆင့်မြင့် မှော်ဆေးဖော်စပ်နည်းစနစ်ကို မော့ကြည့်နေမိသည်။

ထိုစဉ် ကျန်းချန်၏ နှုတ်ခမ်းမှာ ကွေးလိုက်ပြီး ဘေးသို့ လှည့်ကြည့်ကာ "မင်းတို့နှစ်ယောက် ကြည့်ချင်တယ်ဆိုရင် အနားကို လာကြည့်လို့ရပါတယ်။ အချိန်တိုင်း ငါနဲ့ ဒီလောက်အထိ ဝေးဝေးမှာ နေစရာမလိုပါဘူး" ဟု ပြောလိုက်သည်။

ရှောင်ယန်၏ မျက်လုံးများမှာ ကျုံ့သွားကာ "ဆရာ၊ ကျွန်တော်တို့ရှိနေတာကို သူ သိသွားတာလား" ဟု မေးလိုက်သည်။

ယောင်ချန်က တည်ငြိမ်သော မျက်နှာထားဖြင့် "အဆင့်ရှစ်မှော်ဆေးဆရာတစ်ယောက်အနေနဲ့ သူရဲ့ ဝိညာဉ်စွမ်းအားဟာ အံ့ဩစရာကောင်းတဲ့ ဝိညာဉ်လောကအဆင့်ကို ရောက်ရှိနေပြီ။ ငါတို့ရှိနေတာကို သူအလိုလို ရှာတွေ့နိုင်တယ်" ဟု ဆိုသည်။

"ဒါပေမဲ့ ဒီလူရဲ့ ရည်ရွယ်ချက်က မသဲကွဲသေးဘူး။ ဒါကြောင့် မလိုအပ်တဲ့ ပြဿနာတွေ မဖြစ်အောင် ဂရုတစိုက်နဲ့ ရှေ့ဆက်ကြတာပေါ့"

"ဟုတ်ကဲ့ပါ" ရှောင်ယန်ကလည်း ခေါင်းညိတ်လိုက်သည်။ သူ၏ ဆရာသည် အမှန်တကယ်ပင် အမြော်အမြင်ကြီးလှသည်။ 'အကယ်၍ သူတို့ မနိုင် နိုင်လျှင်တောင် အနည်းဆုံးတော့ ထွက်ပြေးရန် အခွင့်အရေး ရှိနေသေးသည် မဟုတ်ပါလား'