အင်မော်တယ်တာအိုရှေးဦးဖရိုဖရဲကျင့်စဉ်

"ဘယ်သူမှ မလျှောက်လှမ်းခဲ့တာ နှစ်ပေါင်းမရေမတွက်နိုင်အောင် ကြာခဲ့ပြီဖြစ်တဲ့ လမ်းမကြီးလား ကြည့်ရတာ ဒီအင်မော်တယ်လမ်းစဉ်က တော်တော်ကြီးစိုးပုံရပြီး အန္တရာယ်လည်း တော်တော်များပုံရတယ်။သတိမထားရင်တော့ အောက်ခြေမမြင်ရတဲ့ ချောက်နက်ထဲကို ကျသွားနိုင်တယ်"

ရှန်းချန်ကောသည် သတိထားသော အကြည့်ဖြင့် တိုးတိုးလေး ရေရွတ်လိုက်သည်။ ဝတ်စုံဖြူကို ဆင်မြန်းထားသော သူ၏ပုံစံသည် သာမန်လူတစ်ယောက်နှင့်မတူဘဲ ကောင်းကင်ဘုံမှ လူ့ပြည်သို့ သက်ဆင်းလာသော အင်မော်တယ်တစ်ပါးကဲ့သို့ ခမ်းနားထည်ဝါနေသည်။

"ငါ့အလှည့်ရောက်ပြီ။"

သူသည် စမ်းသပ်ကြည့်ချင်စိတ် ပြင်းပြနေပြီး မျက်လုံးများထဲတွင် မျှော်လင့်ချက်များ ပြည့်နှက်နေသည်။

ရှန်းချန်ကောသည် ချက်ချင်းပင် အသက်ပြင်းပြင်း တစ်ချက်ရှူလိုက်ပြီး နှစ်ပေါင်းမရေမတွက်နိုင်အောင် မည်သူမျှ ခြေမချခဲ့ဖူးသော အင်မော်တယ်လမ်းစဉ်ထဲသို့ တည်ငြိမ်သော မျက်နှာထားဖြင့် ဝင်ရောက်လိုက်သည်။

ရှန်းချန်ကော ရှေ့သို့ တစ်လှမ်းတိုးလိုက်သည်။

အင်မော်တယ်လမ်းစဉ်သည် ရှန်းချန်ကောကို စမ်းသပ်နေသကဲ့သို့ ကြီးမားသော ဖိအားများကို ပေးစွမ်းနေသည်။

သို့သော် ထိုအချိန်တွင် ရှန်းချန်ကောသည် အေးစက်စွာ နှာခေါင်းရှုံ့လိုက်ပြီး ယုံကြည်မှုရှိ၍ ဂရုမစိုက်ဟန် ရှိသော သူမျက်ခုံးနှစ်ခုကြားတွင် ပြင်းထန်သော အရိပ်အယောင် အနည်းငယ် ပေါ်လာသည်။

ဘုန်း

အထွတ်အထိပ် အင်မော်တယ်ကျင့်စဉ်၏တောက်ပသော အလင်းရောင်များ ပေါက်ကွဲထွက်လာသည်။

သူ၏တစ်ကိုယ်လုံးသည် ကောင်းကင်ဘုံကို တုန်လှုပ်သွားစေသော နတ်ဘုရားဓားတစ်စင်းကဲ့သို့ပင်။

သူသည် လေထုကို ဖောက်ထွက်သွားသည်။

"သူ့ရဲ့ ဓားသိုင်းပညာက... ဘာလို့ ဒီလောက်တောင် လွှမ်းမိုးနိုင်စွမ်း ရှိနေရတာလဲ အင်မော်တယ်လမ်းစဉ်နဲ့ ဆင်တူတဲ့ အရှိန်အဝါမျိုးတောင် ရှိနေပါလား။ သူက အင်မော်တယ်နည်းစနစ် တစ်ခုခုကို ကျွမ်းကျင်ထားတာများလား။ အင်မော်တယ်လမ်းစဉ်နဲ့ ဆက်နွယ်နေတဲ့သူတွေက အင်မော်တယ်လမ်းမကြီးကို တိုက်ရိုက် ပေါ်လာအောင် လုပ်နိုင်တာ မဆန်းပါဘူး"

ရှန်းချန်ကော၏အနောက်ဘက် အဝေးတစ်နေရာတွင် ရှိနေကြသော မဟာပျက်စီးခြင်းနယ်မြေ သို့ ဝင်ရောက်ချင်နေကြသည့် လူအုပ်ကြီးမှာ ရှန်းချန်ကော လမ်းတစ်လျှောက် ချန်ထားခဲ့သော ဓားချီစွမ်းအင်များကြောင့် တုန်လှုပ်သွားကြသည်။

အထွတ်အထိပ် အင်မော်တယ်ကျင့်စဉ်မှ ပေါက်ကွဲထွက်လာသော အလင်းရောင်ကြောင့် သူတို့၏ နှလုံးသားများ တုန်ခါသွားပြီး စကားမပြောနိုင်လောက်အောင် အံ့သြသွားကြသည်။

သူတို့သည် ဓားအလင်းတန်း၏အဆုံးတွင် ရှိနေသော ရှန်းချန်ကော၏ကြောက်မက်ဖွယ် ပုံရိပ်ကို မြင်တွေ့လိုက်ရသည်။

"သူ့ရဲ့ ဓားသိုင်းပညာက... ဘာလို့ ဒီလောက်တောင် လွှမ်းမိုးနိုင်စွမ်း ရှိနေရတာလဲ၊ အင်မော်တယ်လမ်းစဉ်နဲ့ ဆင်တူတဲ့ အရှိန်အဝါမျိုးတောင် ရှိနေပါလား။ သူက အင်မော်တယ်နည်းစနစ် တစ်ခုခုကို ကျွမ်းကျင်ထားတာများလား၊ အင်မော်တယ်လမ်းစဉ်နဲ့ ဆက်နွယ်နေတဲ့သူတွေက အင်မော်တယ်လမ်းမကြီးကို တိုက်ရိုက် ပေါ်လာအောင် လုပ်နိုင်တာ မဆန်းပါဘူး" မရေမတွက်နိုင်သော လူများက အံ့အားသင့်စွာ အာမေဋိတ် ပြုလိုက်ကြသည်။

ရှန်းချန်ကော၏ခန္ဓာကိုယ်မှ ထွက်ပေါ်လာသော ကြောက်မက်ဖွယ် အရှိန်အဝါကို ခံစားလိုက်ရပြီးနောက် သူတို့အားလုံး အလွန်အမင်း တုန်လှုပ်သွားကြသည်။

အခြားတစ်ယောက်ကလည်း ကြောက်ရွံ့စိုးရိမ်စွာဖြင့် ပြောလိုက်သည်... "ဗုဒ္ဓေါ ဒီကောင်က တကယ်ပဲ အသက်ရှင်ရတာ ပျင်းနေပြီလား၊နှစ်ပေါင်းမရေမတွက်နိုင်အောင် ကြာခဲ့ပြီဖြစ်တဲ့ ဒီအချိန်အတောအတွင်းမှာ အင်မော်တယ် ကျင့်ကြံခြင်းလမ်းစဉ် ဆိုတာ ဒဏ္ဍာရီတွေထဲမှာပဲ ရှိခဲ့တာလေ။ ဒီနေ့ သူက အင်မော်တယ်လမ်းစဉ်ထဲကို ဝင်ရောက်ဖို့ပြင်နေတယ်။ အင်မော်တယ်လမ်းစဉ်က အရမ်းအန္တရာယ်များတယ်ဆိုတာကို ထားလိုက်ဦး၊ အကယ်၍ သူသာ နောင်တစ်ချိန်မှာ အင်မော်တယ်လမ်းစဉ်ကနေ ပြန်ထွက်လာနိုင်ခဲ့ရင်တောင် အကြီးအကျယ် ရုတ်ရုတ်သဲသဲ ဖြစ်သွားမှာ စိုးရိမ်ရတယ်။ သာမန်လူတစ်ယောက် ကျောက်စိမ်းရတနာကို ပိုင်ဆိုင်ထားတာက သူ့အတွက် အပြစ်ပဲဖြစ်တယ် ဆိုတဲ့ စကားလိုပဲ... အဲဒီအချိန်ကျရင် သူ သေချာပေါက် အသက်ရှင်နိုင်မှာ မဟုတ်တော့ဘူး ဘာပဲဖြစ်ဖြစ် သူက အခုမှ ပုံရိပ်ဖြစ်ပေါ်ခြင်းအဆင့် ကို ရောက်ကာစတစ်ယောက်ပဲ ရှိသေးတာ။ သူ ဘာပဲရခဲ့ရခဲ့ လူတိုင်းရဲ့ လိုက်လံသတ်ဖြတ်တာကို ခံရမှာပဲ"

"သူ ဘာမှမရခဲ့ရင်တောင် သူပြန်ပြောပြရင် ဘယ်သူမှ ယုံမှာမဟုတ်ဘူး။"

ရုတ်ခြည်းပင် မရေမတွက်နိုင်သော လူများမှာ တုန်လှုပ်သွားကြသည်။

သူတို့ လျှာဖျားလေးများဖြင့် တောက်ခေါက်လိုက်မိကြသည်။

ဝတ်စုံဖြူနှင့် လူငယ်သည် အမှန်တကယ်ပင် အတင်းဝင်ရောက်နိုင်စွမ်း ရှိသော်လည်း သူဖြစ်ပေါ်စေမည့် အကျိုးဆက်များမှာ ပုံရိပ်ဖြစ်ပေါ်ခြင်းအဆင့် ကျင့်ကြံသူတစ်ဦးအနေဖြင့် တောင့်ခံနိုင်မည့်အရာမျိုး လုံးဝ မဟုတ်ပေ။

ခေတ္တမျှ တုန်လှုပ်သွားပြီးနောက် အဘိုးအိုတစ်ဦးသည် ရုတ်တရက် ရေရွတ်လိုက်သည်။

သူသည် အင်မော်တယ်လမ်းစဉ်သို့ မရောက်ရှိနိုင်မှန်း သိထား၍ ဖြစ်တန်ရာသည်၊ သူ၏မျက်နှာပေါ်တွင် လောဘရိပ်များ မတွေ့ရပေ။

သို့သော် ယခုအချိန်တွင် သူသည်လည်း ပွဲကြည့်ပရိသတ်တစ်ဦးကဲ့သို့ မှတ်ချက်ပေးလာသည်။

"ဝတ်စုံဖြူလူငယ်က ဘယ်လောက်ပဲ ပါရမီကောင်းပါစေ၊ သူက အခုမှ နတ်ဘုရားတစ်ပိုင်းအဆင့် ပဲ ရှိသေးတာ။ ရိုးရိုးသားသား ပြောရရင် သူ့ရဲ့ အားကောင်းတဲ့ ကျင့်ကြံခြင်းနည်းစနစ်ကြောင့်သာ ဒဏ္ဍာရီလာ အင်မော်တယ်လမ်းစဉ်ကို အသက်သွင်းနိုင်ခဲ့တာ၊သူ့ရဲ့ ကျင့်ကြံခြင်းနည်းစနစ်က အရမ်းအားကောင်းပြီး အင်မော်တယ်တစ်ပါးရဲ့ စိတ်နေသဘောထားကို ဖော်ပြနေတယ်၊ ဒါကြောင့်လည်း အင်မော်တယ်လမ်းစဉ်ကို ပေါ်လာအောင် လုပ်နိုင်ခဲ့တာ။ ဒါပေမဲ့ အင်မော်တယ်လမ်းစဉ်က လျှို့ဝှက်ဆန်းကြယ်ပြီး ထူးခြားတယ်။ သူ ဝင်သွားတဲ့အခါ... ပြန်ထွက်လာနိုင်မလား၊ မထွက်လာနိုင်ဘူးလား ဆိုတာက နောက်တစ်ဆင့်ပေါ့..."

အခြားသူများ ဤစကားကို ကြားသောအခါ သက်ပြင်းမချဘဲ မနေနိုင်ကြတော့ပေ။

'အင်မော်တယ်'...

ဤစကားလုံးတစ်လုံးတည်းက လူပေါင်းများစွာကို ခေါင်းငုံ့ခါးကိုင်းသွားစေခဲ့သည်။ အချို့သော ကျွမ်းကျင်သူများသည် စိတ်ဓာတ်ကျပြီး သေဆုံးသွားခဲ့ကြသည်။

သူတို့၏တစ်သက်တာတွင် ဖန်တီးခြင်းနယ်ပယ် သို့သာ ရောက်ရှိခဲ့ကြသည်။ မဟာပျက်စီးခြင်းနယ်မြေကို ခေတ်ကာလတစ်ခုအထိ လွှမ်းမိုးထားနိုင်ခဲ့သော်လည်း ဖန်တီးခြင်းနယ်ပယ်ပင်လျှင် ပျက်စီးသွားရသည့် အချိန်များ ရှိနေသည်။

"အားလုံးက ကောင်းကင်ဘုံနယ်ပယ် ထဲကို ဝင်ရောက်ပြီး စစ်မှန်တဲ့ အထွတ်အထိပ် စွမ်းအားကို ရှာဖွေချင်ကြပေမဲ့ ကံမကောင်းစွာနဲ့ပဲ... တစ်သက်တာလုံးမှာ ဘယ်သူမှဘယ်တော့မှ အောင်မြင်နိုင်မှာ မဟုတ်ဘူး"

အင်မော်တယ်လမ်းစဉ်ထဲတွင် ရှန်းချန်ကောသည် နတ်ဘုရားဓားတစ်စင်းအသွင် ပြောင်းလဲကာ ကျယ်လောင်သော အသံနှင့်အတူ ရှေ့သို့ တိုးသွားသည်။

ဘေးပတ်ဝန်းကျင်မှ ဖိအားများသည် လွှမ်းမိုးချုပ်ကိုင်ထားသော်လည်း သူသည် အထွတ်အထိပ် အင်မော်တယ်နည်းစနစ်ကို အသုံးပြုကာ တားဆီး၍မရနိုင်သော အရှိန်အဟုန်ဖြင့် ချီတက်နေသည်။

မကြာမီမှာပင် သူသည် အင်မော်တယ်လမ်းစဉ်၏ ဝင်ပေါက်သို့ ရောက်ရှိသွားသည်။ သူသည် စစ်မှန်သော အင်မော်တယ်လမ်းစဉ်နှင့် ခြေတစ်လှမ်းသာ လိုတော့သည်။

အင်မော်တယ်လမ်းမပေါ်တွင် ကောင်းကင်ယံသည် ကြယ်တာရာဖြင့်တောက်ပနေသည်။ ခမ်းနားထည်ဝါသော ကောင်းကင်နှင့် မြေကြီးကြားရှိ အရှိန်အဝါများသည် လှိုင်းထနေပြီး တုန်လှုပ်ဖွယ်ရာ အငွေ့အသက်များ ပြည့်နှက်နေသည်။

တိမ်တိုက်များနှင့် မီးခိုးငွေ့များကဲ့သို့ ဝေဝါးနေပြီး အလွန်ထူးဆန်းလှသည်။ ကွေ့ကောက်နေသော ရှေးဟောင်းလမ်းမကြီးသည် ဟင်းလင်းပြင်ကို အကြိမ်ကြိမ် လိမ်ချိုးထားသကဲ့သို့ ဖြစ်နေသည်။

သူ ရှေ့သို့ ခြေတစ်လှမ်း တိုးလိုက်သည်နှင့် အရပ်မျက်နှာ အသီးသီးမှ ကြီးမားသော ဖိအားတစ်ခု သူ့အပေါ်သို့ ဖိကျလာသည်ကို ချက်ချင်း ခံစားလိုက်ရသည်။

ကောင်းကင်တစ်ခုလုံး ရုတ်တရက် ပြိုကျလာသကဲ့သို့ပင်။ ကောင်းကင်ဘုံနန်းတော်ကြီးတစ်ခု ပြုတ်ကျလာပြီး သူ့ပခုံးပေါ်သို့ ဖိကျလာသကဲ့သို့ ဖြစ်သွားသဖြင့် သူ၏မျက်နှာ ဖြူလျော့သွားသည်။

ရှန်းချန်ကော၏နှလုံးသား တုန်ခါသွား၏။

'အင်မော်တယ်လမ်းစဉ်က တကယ်ကို အလွန်အန္တရာယ်များတာပဲ။ဖိအားကလည်း ကြောက်စရာ ကောင်းလိုက်တာ'

ရှန်းချန်ကော အင်မော်တယ်လမ်းမပေါ် ရောက်နေသည်ကို မြင်လိုက်ရသောအခါ လူအများအပြား အံ့သြသွားကြသည်။

"သူက သွေးမြူတိမ်တိုက်အဖြစ် ပေါက်ကွဲမသွားပေမဲ့ အင်မော်တယ်လမ်းစဉ်ထဲ ဝင်ဖို့ဆိုတာ လွယ်တဲ့ကိစ္စတော့ မဟုတ်ဘူး..." အချို့လူများက လှောင်ပြောင်လိုကြသော်လည်း စကားအဆုံးတွင် ကြက်မွေးတစ်ခု လည်ချောင်းထဲ စိုက်ဝင်နေသကဲ့သို့ ဆွံ့အသွားကြသည်။

အဘယ်ကြောင့်ဆိုသော် သူတို့ မြင်လိုက်ရသည်မှာ...

ရှန်းချန်ကော ခေတ္တမျှရပ်တန့်သွားသည်။

ထို့နောက် သူ ခြေတစ်လှမ်းလှမ်းလိုက်ပြီး အင်မော်တယ်လမ်းစဉ်ထဲသို့ ဝင်ရောက်သွားခဲ့လေ၏။

လူတိုင်း ကြောင်အသွားကြသည်။

ထိုပုံရိပ်သည် အလွန်လျင်မြန်စွာ လျှောက်လှမ်းသွားပြီး အင်မော်တယ်လမ်းစဉ်ပေါ်တွင် ပျောက်ကွယ်သွားတော့သည်။

ရှန်းချန်ကောသည် အဆုံးအစမဲ့ ကျယ်ပြောလှသော အင်မော်တယ်လမ်းစဉ်ထဲသို့ လျှောက်လှမ်းသွားစဉ် ဘေးပတ်ဝန်းကျင်သည် တွန့်လိမ်ရှုပ်ထွေးနေပြီး ကြယ်တာရာကောင်းကင်ယံပေါ်မှ အလင်းပြန်နေသည်။

ကြယ်များသည် အချိန်မြစ်ထဲတွင် စီးဆင်းနေသကဲ့သို့ သူ့ပတ်လည်တွင် ဝဲပျံနေကြသည်။

ထူးဆန်းပြီး အံ့သြဖွယ်ကောင်းလှသည်။ မည်သို့ပင်ဖြစ်စေ ဤအရာက အနက်ရောင်မြူခိုးကမ္ဘာ ကဲ့သို့ဖြစ်နေလေရာ ဤကဲ့သို့သော မြင်ကွင်းမျိုးကို မြင်ရခြင်းမှာ အလွန်ထူးဆန်းလှပေသည်။

ထိုအချိန်တွင်...

ကောင်းကင်ယံသည် မြူခိုးများဖြင့် ဝေဝါးနေသည်။

ဤလမ်းမကြီးသည် ထူထဲသော အလင်းရောင်များဖြင့် ပြည့်နှက်နေသည်။

ရှန်းချန်ကော အသက်ပြင်းပြင်း ရှူလိုက်သည်။

"စစ်ဆေးမယ်"

"စစ်ဆေးခြင်း အောင်မြင်ပါသည်။ သင်သည် အင်မော်တယ်တာအိုရှေးဦးဖရိုဖရဲကျင့်စဉ် ကို ရရှိပါသည်။"

အင်မော်တယ်တာအိုရှေးဦးဖရိုဖရဲကျင့်စဉ်

ဒါ ဘယ်လို ကျင့်ကြံခြင်းနည်းစနစ်မျိုးလဲ။

ရှန်းချန်ကော ခဏတာ ကြောင်အသွားသည်။

ရုတ်တရက် သူ၏စိတ်ထဲတွင် အလွန်ထူးဆန်းသော အရှိန်အဝါတစ်ခု လှုပ်ခတ်လာသည်ကို ခံစားလိုက်ရသည်။ ၎င်းသည် လှိမ့်ဝင်လာသော ဖရိုဖရဲချီစွမ်းအင် များ ဝန်းရံထားသည့် ကြီးမားသော မီးပြင်းဖိုကြီးတစ်ခုအသွင် ပြောင်းလဲသွားသကဲ့သို့ပင်။

ခမ်းနားထည်ဝါသော မီးပြင်းဖိုကြီးသည် ဝိညာဉ်ချီစွမ်းအင်များဖြင့် ပြည့်နှက်နေပြီး ကမ္ဘာလောကကြီးတစ်ခုလုံးကို ဝါးမြိုပစ်နိုင်တော့မည့်အလား ဖြစ်နေသည်။

"စိတ်ဝင်စားစရာပဲ။ ဖရိုရဲမီးပြင်းဖိုက ရတနာမှန်သမျှကို ဝါးမြိုနိုင်ပြီး ငါ့ခန္ဓာကိုယ်ထဲကို စီးဝင်စေမယ့် သန့်စင်တဲ့ စွမ်းအင်အဖြစ် ပြောင်းလဲပေးနိုင်တာပဲ"

ရှန်းချန်ကောသည် နားလည်သဘောပေါက်သွားသည့် အကြည့်ဖြင့် ကြည့်လိုက်သည်။

"ဒီအင်မော်တယ်လမ်းစဉ်က ဒီလောက် ရိုးရှင်းမှာတော့ မဟုတ်ပါဘူးနော်"

"နှစ်ပေါင်းများစွာ ချီးကျူးပြောဆိုခံခဲ့ရတဲ့ ရှေးဟောင်းလမ်းမကြီး..." ရှန်းချန်ကော အနည်းငယ် ထူးဆန်းသလို ခံစားလိုက်ရသည်။

ကြည့်ရသည်မှာ သူ အင်မော်တယ်လမ်းစဉ်ထဲ ဝင်လာပြီးနောက်ပိုင်း ရှေ့သို့ ဆက်လျှောက်နေရုံသာ ရှိသေးသည်။

သူ ဘာမှ ထွေထွေထူးထူး မခံစားရသေးပေ။

ထူးဆန်းတာ ဘာမှ ပေါ်မလာသေးပေ။

သို့သော် ထိုခဏ၌...

ရှေ့တည့်တည့်တွင်...

ကြီးမားသော အလင်းလုံးကြီးတစ်ခု ရုတ်တရက် ပေါ်လာခဲ့သည်။

"အင်မော်တယ်လမ်းစဉ် ပြတ်တောက်နေပြီ..."

"ဒီကမ္ဘာကြီးကို သယ်ဆောင်ထားဖို့အတွက် အမိန့်တော်စဉ်းမျည်းတွေကို ချိတ်ဆက်ပြီး ဖြတ်တောက်ပေးနိုင်မယ့် အစစ်အမှန်အင်မော်တယ် တစ်ပါး လိုအပ်နေတယ်။ ဒါက ပြိုလဲပျက်စီးနေတဲ့ ကမ္ဘာတစ်ခု၊ ကျိုးပဲ့နေတဲ့ အပျက်အစီးတစ်ခု၊ စစ်ပွဲရဲ့ စွန့်ပစ်ခံမြေတစ်ခု..."

ကျယ်ပြန့်ပြီး ရှေးဆန်သော အသံကြီးတစ်ခု ဟိန်းထွက်လာသည်။

ရှန်းချန်ကော၏ဝိညာဉ် တုန်ခါသွားသည်။

သူသည် ကြီးမားကျယ်ပြန့်မှုကို ခံစားလိုက်ရသည်။

အင်မော်တယ်

ဒီနေရာက အစစ်အမှန် အင်မော်တယ်တစ်ပါး လိုအပ်နေတာလား။

ဘာတွေ ဖြစ်နေတာလဲ။

ရှန်းချန်ကော၏နှလုံးသား အနည်းငယ် တုန်လှုပ်သွားသည်။

ပြိုလဲပျက်စီးနေသော ကမ္ဘာ ဆိုသည်မှာ မဟာပျက်စီးခြင်းနယ်မြေ ကို ရည်ညွှန်းခြင်း ဖြစ်နိုင်၏။

မဟာပျက်စီးခြင်းနယ်မြေနှင့် စွန့်ပစ်နယ်မြေများသည် စစ်ပွဲတစ်ခုပြီးနောက် ကျန်ရစ်ခဲ့သော စွန့်ပစ်ခံအပျက်အစီးများ ဖြစ်ကောင်းဖြစ်နိုင်သည်။

ဒါဆို စစ်မှန်တဲ့ကမ္ဘာကြီးကရော...အင်မော်တယ်တွေ ရှိတဲ့ ကမ္ဘာတစ်ခု ဖြစ်ရမှာပေါ့။