အခန်း (၁၅၄)

ရှန်းယွီသည် သူ၏ ဝိညာဉ်ပင်လယ်အတွင်း၌ မျက်လုံးများကို ဖြည်းဖြည်းချင်း ဖွင့်လိုက်သည်။ ပုံရိပ်ယောင်တိုက်ပွဲပေါင်း များစွာကို ဆက်တိုက်ဆင်နွှဲခဲ့ရသဖြင့် သူ၏မျက်နှာမှာ တည်ကြည်လေးနက်နေသည်။ တိုက်ပွဲအရေအတွက်မှာ အကြိမ် ၁၀၀ ကျော်သွားပြီးနောက်တွင်မူ သူကိုယ်တိုင်ပင် ရေတွက်ခြင်းမပြုတော့ပေ။ ဤမျှကြာမြင့်သော အချိန်ကို ပုံရိပ်ယောင်တိုက်ပွဲများ၌ ကုန်ဆုံးစေခြင်းက သူ၏စိတ်ဓာတ်ခံနိုင်ရည်ကို အစွန်းကုန် တွန်းပို့နေသကဲ့သို့ ဖြစ်သော်လည်း ကံကောင်းထောက်မစွာဖြင့် သူ၏ မြင့်မားလှသော စိတ်ဓာတ်အဆင့်ကြောင့် ပြိုလဲမသွားဘဲ ခံနိုင်ရည်ရှိနေခြင်းဖြစ်သည်။

ကျေနပ်အားရသော အပြုံးတစ်ခု သူ၏မျက်နှာတွင် ပေါ်လာသည်။ အကြိမ်ကြိမ်အခါခါ လေ့ကျင့်ပြီးနောက် နောက်ဆုံးတွင်မူ သူသည် အူတိုင်ဖွဲ့စည်းခြင်းအဆင့် အထွက်အထိပ်သို့ ရောက်နေသော မိန်လင်းကို ကောင်းကောင်း ခုခံနိုင်သည့် အဆင့်သို့ ရောက်ရှိလာပြီဖြစ်သည်။ အနိုင်မရသေးသော်လည်း ၎င်းမှာ သူ၏ အစွမ်းအစ အားနည်းခြင်းကြောင့် မဟုတ်ဘဲ နည်းစနစ်ပိုင်းဆိုင်ရာ ကျွမ်းကျင်မှု လိုအပ်နေသေးခြင်းကြောင့်သာ ဖြစ်သည်။ သူ၏ နည်းစနစ်တစ်ခုခုကိုသာ ကြီးမားသော ပြည့်စုံမှုအဆင့်သို့ ရောက်အောင် လုပ်နိုင်ပါက အဆင့်ကွာဟချက်မှာ သိသိသာသာ ကျဉ်းမြောင်းသွားမည်ဖြစ်သည်။

ရှန်းယွီသည် သက်ပြင်းတစ်ချက်ချကာ သူ၏ ရုပ်ပိုင်းဆိုင်ရာ ခန္ဓာကိုယ်ထဲသို့ ပြန်ရန် ဆုံးဖြတ်လိုက်သည်။ သူ၏ ဦးခေါင်းထိပ်တွင်ရှိသော ဝိညာဉ်သန္ဓေသားလေးမှာမူ ကျင့်ကြံခြင်းလုပ်ငန်းစဉ်၌ အာရုံနစ်ဝင်နေဆဲပင်။ သူသည် ထိုသန္ဓေသားလေးကို ညင်သာစွာ ချီမလိုက်ပြီး တောက်ပနေသော ဝိညာဉ်ပင်လယ် မျက်နှာပြင်ပေါ်တွင် ချထားပေးလိုက်သည်။ သန္ဓေသားလေးမှာ သူ၏ တရားထိုင်နေသော ပုံစံမှ ပျက်မသွားဘဲ အပြည့်အဝ အာရုံစိုက်နေဆဲ ဖြစ်သည်။ ကလေးငယ်၏ အခြေအနေ တည်ငြိမ်ကြောင်း အတည်ပြုပြီးနောက် ရှန်းယွီသည် သူ၏ အသိစိတ်ကို ပြန်လည်ရုပ်သိမ်းလိုက်သည်။

သူ မျက်လုံးဖွင့်လိုက်ချိန်တွင် ရင်းနှီးပြီးသားဖြစ်သော ဝိညာဉ်သွေးကြော ပတ်ဝန်းကျင်ကို မြင်လိုက်ရသည်။ စိုက်ပျိုးရေးနှင့် ဆေးဝါးကျွမ်းကျင်မှု အသစ်များကို ရရှိထားသဖြင့် ဤအချိန်ကို ထိုအရည်အချင်းများ ဖွံ့ဖြိုးလာစေရန် အသုံးချရန် ဆုံးဖြတ်လိုက်ပြီး သူ၏ စိုက်ခင်းလေးဆီသို့ လျှောက်သွားလိုက်သည်။

အပင်များကို အထူးတလည် ပြုပြင်ထိန်းသိမ်းရန် မလိုသော်လည်း သူသည် စိုက်ခင်းဧရိယာကို သိသိသာသာ ချဲ့ထွင်လိုက်ပြီး ပျိုးပင်အသစ်များကို အစီအရီ စိုက်ပျိုးကာ ရေလောင်းပေးလိုက်သည်။ ထို့နောက် မြေဆီလွှာထဲသို့ ဝိညာဉ်စွမ်းအင်များ ထည့်သွင်းပေးကာ မြေဆီလွှာ၏ အာဟာရဓာတ်များကို မြှင့်တင်ပေးလိုက်သည်။ မြေပြင်မှာ ဝိညာဉ်စွမ်းအင် သိပ်သည်းဆ လုံလောက်နေပြီဖြစ်သဖြင့် သူသည် စွမ်းအင်ကို အနည်းငယ်မျှသာ ထည့်သွင်းပေးခဲ့ခြင်းဖြစ်သည်။

စိုက်ခင်းကို အချိန်အတန်ကြာ ပြုစုပျိုးထောင်ပြီးနောက် ရှန်းယွီ၏ အတွေးများမှာ ဆေးဝါးပညာဘက်သို့ ရောက်ရှိသွားသည်။ သူ၏စိတ်ထဲတွင် စိတ်ကူးအသစ်များစွာ ရှိနေသော်လည်း ရှေ့ဆက်မလုပ်ဆောင်မီ အဒေါ်ဆရာမနှင့် အရင်တိုင်ပင်ရန် လိုအပ်သည်။ လောလောဆယ်တွင်မူ သူသည် အခြားသော စီမံကိန်းတစ်ခုကိုသာ အာရုံစိုက်ရန် ဆုံးဖြတ်လိုက်တော့သည်။

ဝိညာဉ်သွေးကြောတည်ရှိရာမှ ထွက်ခွာလာပြီးနောက် ရှန်းယွီသည် သူတဖြည်းဖြည်း စုဆောင်းထားသော သတ္တဝါများရှိရာ တိရစ္ဆာန်ခြံဆီသို့ ဦးတည်လိုက်သည်။ အချိန်ကြာလာသည်နှင့်အမျှ သူ၏ တိရစ္ဆာန်စုဆောင်းမှုတွင် တောဝက်အကောင် ၂၀ ခန့်အပြင် အခြားမျိုးစိတ်အချို့ပါ တိုးပွားလာခဲ့သည်။ သူသည် ထိုသတ္တဝါအားလုံးကို ဝိညာဉ်သွေးကြောရှိရာသို့ ပြောင်းရွှေ့လိုက်ပြီး မျိုးစိတ်တစ်ခုချင်းစီအတွက် သီးခြားခြံဝင်းများ ဆောက်လုပ်ပေးလိုက်သည်။ ဤသို့ စနစ်တကျ ခွဲခြားထားခြင်းဖြင့် မလိုလားအပ်သော ထိတွေ့မှုများကို တားဆီးနိုင်ပြီး မျိုးစိတ်တစ်ခုချင်းစီကိုလည်း စိတ်ကြိုက် စောင့်ကြည့်နိုင်မည်ဖြစ်သည်။

တိရစ္ဆာန်များ နေရာတကျဖြစ်သွားပြီးနောက် ရှန်းယွီသည် သူစီစဉ်ထားသော စမ်းသပ်မှုကို စတင်လိုက်သည်။ မိန်လင်းပေးခဲ့သော တန်ဖိုးရှိသော ကုန်ကြမ်းများထဲတွင် အလင်းတွင်းပန်းအချို့ ပါဝင်သည်။ သူသည် ထိုပန်းများကို အဆင့် ၇ ကုသရေးဆေးလုံးများအဖြစ် အရင်ဆုံး သန့်စင်ဖော်စပ်လိုက်သည်။

ထို့နောက် ပိုမိုခက်ခဲသော အပိုင်းဖြစ်သည့် အလင်းတွင်းပန်းအချို့ကို သန်းခေါင်ယံပန်းအဖြစ် ပြောင်းလဲရန် ပြင်ဆင်လိုက်သည်။ ဤသည်မှာ ချီစုပ်ယူမှုဆေးလုံးများ ဖော်စပ်ရန်အတွက် လိုအပ်သော အဆင့်ဖြစ်သည်။ သူသည် သူ၏ နတ်ဘုရားစွမ်းရည်ကို အသုံးပြု၍ ပန်းပွင့်တစ်ပွင့်ချင်းစီကို အပင်ပန်းခံကာ စတင်ပြောင်းလဲလိုက်သည်။ ဤလုပ်ငန်းစဉ်က သူ၏ စွမ်းအင်များကို သိသိသာသာ ကုန်ခမ်းစေသော်လည်း ကံကောင်းထောက်မစွာဖြင့် သူ၏ ဝိညာဉ်သန္ဓေသားလေးက ဝိညာဉ်ပင်လယ်ထဲတွင် အပတ်တကုတ် ကျင့်ကြံနေမှုကြောင့် သူ၏ စွမ်းအင်ပြန်လည်ပြည့်ဝမှုမှာ ပိုမိုမြန်ဆန်နေခဲ့သည်။ သူသည် အားပြန်ပြည့်လာတိုင်း ဆေးတစ်လုံးဖော်စပ်လိုက်၊ နောက်ထပ် ပန်းတစ်ပွင့်ကို ပြောင်းလဲလိုက်နှင့် နောက်ဆုံးတွင် ချီစုပ်ယူမှုဆေးလုံး ၁၅ လုံးကို အောင်မြင်စွာ ထုတ်လုပ်နိုင်ခဲ့သည်။

သူသည် ဆေးလုံး ၅ လုံးကို ရှို့ယင်းအတွက် သီးသန့်ဖယ်ထားလိုက်သည်။ နောင်တွင် ဝိညာဉ်သန္ဓေသားလေးက စွမ်းအင်ပြန်မဖြည့်ပေးနိုင်သည့် အခြေအနေမျိုး၌ ဤဆေးလုံးများ ဖော်စပ်ရမည့် စိတ်ဖိစီးမှုကို သူ မခံချင်သောကြောင့် ဖြစ်သည်။ ကျန်ရှိသော ဆေးလုံးများကိုမူ သူ၏ ဝိညာဉ်သားရဲ ဖန်တီးခြင်းစီမံကိန်းအတွက် အသုံးပြုရန် ဆုံးဖြတ်လိုက်သည်။

ကျန်ရှိသော ဆေးလုံး ၁၀ လုံးထဲမှ တစ်လုံးကို တောဝက်မတစ်ကောင်အား ဂရုတစိုက် တိုက်ကျွေးလိုက်သည်။ သာမန်တောဝက်မတစ်ကောင်မှ မွေးဖွားလာသော သားသမီးများသည် ဝိညာဉ်သားရဲ၏ လက္ခဏာများကို အမွေဆက်ခံနိုင်မလားဆိုသည်မှာ သူ မသေချာသဖြင့် စမ်းသပ်ကြည့်ရင်း အချိန်ဖြုန်းနေမည့်အစား ဆေးတိုက်ကျွေးရန်သာ သူ ရွေးချယ်ခဲ့ခြင်းဖြစ်သည်။ နောက်ထပ် ဆေးနှစ်လုံးကိုမူ ဗစ်ကူးညာ အဖိုတစ်ကောင်နှင့် အမတစ်ကောင်အား တိုက်ကျွေးလိုက်သည်။

(T/N vicuñas ကိုတောင်အမေရိကဘက်မှာတော့ အသေးစားကုလားအုတ်လို့ခေါ်ကြတယ်တဲ့လိုက်ရှာကြည့်တာတော့။ မြန်မာမှာဆိုရင်သူ့အသံထွက်တိုင်းဗစ်ကူးညာပဲခေါ်ကြတယ်။ အသံထွက်တိုင်းပဲရေးလိုက်မယ်ဗျ)

နောက်ဆုံးကျန်သော ဆေး ၇ လုံးကိုမူ သူဖမ်းဆီးလာသော တောကြက်များအတွက် သိမ်းထားလိုက်သည်။ သူ၏ အကြောင်းပြချက်မှာ လက်တွေ့ကျလှသည်။ ဤငှက်များသည် ကြီးမားသော နို့တိုက်သတ္တဝါများထက် ပိုမိုမြန်ဆန်စွာ မျိုးပွားနိုင်သောကြောင့် ဖြစ်သည်။ ၎င်းတို့ ဥဥသည်နှင့်တစ်ပြိုင်နက် သူ၏ စိုက်ပျိုးရေးပညာရပ်မှ အထူးနည်းစနစ်များကို အသုံးပြုကာ ဥဖောက်ခြင်းကို အရှိန်မြှင့်နိုင်မည်ဖြစ်ပြီး ရက်အနည်းငယ်အတွင်းမှာပင် အကောင်ပေါက်နိုင်မည်ဖြစ်သည်။ ထို့ပြင် ဤငှက်ငယ်လေးများသည် ကြီးမားသော တိရစ္ဆာန်များထက် ပိုမိုမြန်ဆန်စွာ အရွယ်ရောက်နိုင်သဖြင့် အချိန်တိုအတွင်း သူ၏ဂိုဏ်းအတွက် ရေရှည်တည်တံ့သော ဝိညာဉ်သားရဲ အရင်းအမြစ်တစ်ခုကို ရရှိလာနိုင်မည်ဖြစ်သည်။

ရှန်းယွီသည် တိရစ္ဆာန်များအပေါ် သက်ရောက်မှုများကို အာရုံစိုက်စောင့်ကြည့်ရင်း မျက်မှောင်ကြုတ်ကာ အစွမ်းကုန် အာရုံစိုက်ထားသည်။ အချိန်ကိုက်မှုက အလွန်အရေးကြီးသည်။ ဆေးလုံးတစ်လုံးစီသည် ချီစွမ်းအင်များကို အတိုင်းအတာတစ်ခုအထိ စုပ်ယူပြီးသွားသော်လည်း အပြည့်အဝ ဝါးမြိုခြင်းမရှိသေးသည့် အချိန်ကို သူ စောင့်ရမည်ဖြစ်သည်။ ပတ်ဝန်းကျင်မှ ဝိညာဉ်စွမ်းအင်များ တိရစ္ဆာန်များ၏ ခန္ဓာကိုယ်ထဲသို့ တက်ကြွစွာ စီးဝင်နေသည့် ထိုတိကျသောအခိုက်အတန့်တွင် သူသည် ကုသရေးဆေးလုံးများကို တိုက်ကျွေးလိုက်တော့သည်။

ကုသရေးစွမ်းအင်မှာ သူတွေးဆထားသည့်အတိုင်းပင် အတိအကျ အလုပ်လုပ်သည်။ တိရစ္ဆာန်များ၏ ခန္ဓာကိုယ်တွင်းစနစ်များကို ယခုမှ ခေတ္တဖြစ်ပေါ်လာသော စွမ်းအင်လမ်းကြောင်းများအပေါ် အခြေခံ၍ ပြန်လည်ဖွဲ့စည်းပေးလိုက်ခြင်းပင်။ ဆေးစွမ်းများ ခန္ဓာကိုယ်အနှံ့ ပျံ့နှံ့သွားသည်နှင့်အမျှ ထိုလမ်းကြောင်းများသည် ခိုင်မာသော ဝိညာဉ်သွေးကြောများအဖြစ် ပြောင်းလဲသွားပြီး သာမန်သတ္တဝါလေးများကို စစ်မှန်သော ဝိညာဉ်သားရဲများအဖြစ် အသွင်ပြောင်းလဲပေးလိုက်သည်။ တစ်ကောင်ပြီးတစ်ကောင် သူတို့၏ အရှိန်အဝါများမှာ သိသိသာသာ ပြောင်းလဲသွားပြီး မျက်လုံးများတွင်လည်း သာမန်တိရစ္ဆာန်များနှင့် မတူဘဲ ဝိညာဉ်ရေးရာအရ တောက်ပမှုများ ပေါ်ထွက်လာတော့သည်။

စမ်းသပ်ခံ သတ္တဝါတိုင်း အောင်မြင်စွာ အသွင်ပြောင်းသွားသည်ကို မြင်လိုက်ရသဖြင့် ရှန်းယွီသည် ကျေနပ်စွာ သက်ပြင်းချလိုက်သည်။ ယခုအခါ မေးခွန်းတစ်ခုသာ ကျန်တော့သည်။ ဤအသစ်စက်စက် ဝိညာဉ်သားရဲများသည် ဝိညာဉ်သားရဲ မျိုးဆက်သစ်များကို ဆက်လက်မွေးဖွားပေးနိုင်မည်လား သို့မဟုတ် သူတို့၏ သားသမီးများမှာ သာမန်တိရစ္ဆာန်များအဖြစ် ပြန်လည်ရောက်ရှိသွားမည်လား။ ဤအချက်သည် သူ၏ စီမံကိန်းတစ်ခုလုံး ရေရှည်တည်တံ့နိုင်မည့် အဓိကသော့ချက်ပင်။

တောကြက်များသည် လက်တွေ့အကျဆုံး စမ်းသပ်ချက်တစ်ခု ဖြစ်လာလိမ့်မည်။ တောဝက်များကဲ့သို့ ကိုယ်ဝန်ဆောင်ချိန် လေးလကြာမြင့်ခြင်းမရှိဘဲ ရက်သတ္တပတ် အနည်းငယ်သာ ကြာမြင့်သောကြောင့် ဖြစ်သည်။

"အဲဒီလောက်အကြာကြီး စောင့်နေရင် ငါတော့ ကျောက်ဖြစ်ရုပ်ကြွင်းတောင် ဖြစ်သွားလောက်ပြီ"

သူက တွေးလိုက်မိသည်။

သူ၏ စိုက်ပျိုးရေးပညာရပ်မှတစ်ဆင့် အဖိုက အမများကို မျိုးအောင်စေရန် ကူညီပေးနိုင်သော နည်းလမ်းများ ရှိသော်လည်း ရှန်းယွီတွင် ပိုကောင်းသော စိတ်ကူးတစ်ခု ရှိသည်။ သူ အသွင်ပြောင်းထားသော ငှက် ၇ ကောင်ထဲတွင် ၆ ကောင်မှာ အမများဖြစ်ပြီး အဖိုမှာ တစ်ကောင်တည်းသာ ဖြစ်သည်။ ဤအချိုးအစားမှာ တစ်ကောင်တည်းသော အဖိုက အမအားလုံးကို အဖော်ပြုနိုင်မည်ဆိုပါက မျိုးဆက်ပွားနှုန်းကို အမြင့်ဆုံး ဖြစ်စေလိမ့်မည်။

ရှန်းယွီသည် သူ၏ လက်အင်္ကျီထဲမှ ထူးခြားသော ဆေးလုံးတစ်လုံးကို ထုတ်လိုက်ရင်း မျက်နှာတွင် ကောက်ကျစ်သော အပြုံးတစ်ခု ပေါ်လာသည်။ သူ၏ အထူးဆေးလုံး အများစုကို ဆရာဖြစ်သူအား ပေးခဲ့သော်လည်း ဤကဲ့သို့သော အခြေအနေမျိုးအတွက် တစ်လုံးကို သူ ချန်ထားခဲ့ခြင်းဖြစ်သည်။ ဤအားဖြည့်ဆေးက အဖိုငှက်ကို ၎င်း၏ မျိုးပွားခြင်းတာဝန်များကို အံ့မခန်း တက်ကြွစွာ ဆောင်ရွက်နိုင်ရန် အာမခံချက် ပေးလိမ့်မည်။

"ဒီဆေးတိုက်ပြီးတာတောင်မှ ဒီအဖိုက အမအားလုံးကို မျိုးမအောင်ပေးနိုင်ဘူးဆိုရင်တော့ ဒါဟာ လုံးဝ မဖြစ်နိုင်တဲ့ကိစ္စပဲ"

သူက ယုံကြည်မှုအပြည့်ဖြင့် တွေးကာ ဘာမှမသိရှာသော ငှက်ကလေးအား ဆေးတိုက်ကျွေးလိုက်သည်။

ရှန်းယွီ ခြံဝင်းထဲမှ ထွက်ခွာလာချိန်တွင် အတွင်းပိုင်းမှ အလွန်တက်ကြွလှုပ်ရှားနေသော အသံများ ထွက်ပေါ်လာနေပြီဖြစ်သည်။ အသွင်မပြောင်းထားသော သာမန်တောကြက်မများပင်လျှင် ထိုလှုပ်ခတ်မှုကြောင့် လိုက်လံအော်ဟစ်နေကြသဖြင့် ဆူညံသံများမှာ ပိုမိုဆိုးရွားလာသည်။ အားဖြည့်ဆေးတိုက်ကျွေးခံထားရသော အဖိုငှက်မှာမူ ၎င်း၏တာဝန်ကို အလွန်အမင်း စိတ်အားထက်သန်စွာ စတင်ထမ်းဆောင်နေပြီဖြစ်သည်။

"ကဲ... အခုတော့ ငါ့လက်ထဲမှာ ဘာမှမကျန်တော့ဘူး"

ရှန်းယွီ တွေးလိုက်သည်။ ယခုအခါ ဝိညာဉ်သားရဲများသည် သာမန်တိရစ္ဆာန်များနှင့် မိတ်လိုက်နိုင်မလား မိတ်လိုက်လျှင်လည်း နောက်မျိုးဆက်တွင် သူတို့၏ ဝိညာဉ်ရေးရာ လက္ခဏာများ ဆက်လက်ပါဝင်လာမလား ဆိုသည်ကိုပါ တစ်ပြိုင်တည်း စမ်းသပ်ရန် အခွင့်အရေး ရသွားပြီဖြစ်သည်။