ရွေးချယ် ခြင်း
Vol. 11 Ch. 123
ထန်ထျန်း၏ စောင့်ကြည့်မှုအောက်တွင် ကုရှောင်းရွှယ်၏ ကျောပြင်မှာ ခရမ်းရောင်ဝါးတောအပြင်ဘက်သို့ ပျောက်ကွယ်သွားခဲ့သည်။
နောက်ဆုံးတွင် သူမသည် အရင်ကကဲ့သို့ တက်ကြွလန်းဆန်းသော ပုံစံသို့ ပြန်လည်ရောက်ရှိသွားပုံရသော်လည်း သူမအတွင်းစိတ်ထဲတွင် တစ်ခုခု ပြောင်းလဲသွားခဲ့ပြီဖြစ်ကြောင်း ထန်ထျန်း ခံစားမိသည်။
ဆွေမျိုးသားချင်းများ၏ သစ္စာဖောက်မှုကို အလွယ်တကူနှင့် မေ့ပစ်ရန်မှာ မဖြစ်နိုင်ပေ။
နောက်ပြီး အကြီးအကဲ ဟန်ဟိုင်...
ထန်ထျန်း ခေါင်းခါလိုက်မိသည်။
ထားလိုက်ပါတော့လေ၊ လူတိုင်းမှာ ကလေးဘဝမှ လူကြီးဘဝသို့ ကူးပြောင်းရမည့် ဖြစ်ရပ်တစ်ခုရှိပြီး ၎င်းကို မည်သူမျှ ရှောင်လွှဲ၍မရပေ။
အသက် ၁၆ နှစ်အရွယ်ဆိုသည်မှာလည်း ဤလောကကြီး၏ အမှန်တရားကို မြင်အောင်ကြည့်ရန် သင့်တော်သော အချိန်ပင်ဖြစ်သည်။
လက်တွေ့ဘဝကို စောစောစီးစီး မြင်တွေ့လိုက်ရခြင်းမှာလည်း ဆိုးလှသည်မဟုတ်ပေ။
တစ်နည်းအားဖြင့် ပြောရလျှင် ကုရှောင်းရွှယ်က သူ့ကို ဆုံတွေ့ခဲ့သဖြင့် အမှန်တကယ်ပင် ကံကောင်းလှသည်ဟု ဆိုရမည်။
သူက မိန်းမကိစ္စထက် သူ၏ ခွန်အားတိုးတက်ရေးကိုသာ ပို၍ အာရုံစိုက်သူဖြစ်ပြီး ၁၅၊ ၁၆ နှစ်အရွယ် မိန်းကလေးတစ်ယောက်အပေါ်တွင်လည်း သူ မရက်စက်နိုင်ပေ။
အကယ်၍သာ သူမက ရှန့်တုဖုန်းကဲ့သို့သော ကောင်မျိုးနှင့် ဆုံခဲ့လျှင်မူ သူမဘဝမှာ လုံးဝ ပျက်စီးသွားပေလိမ့်မည်။
ထန်ထျန်း သက်ပြင်းတစ်ချက်ထပ်ချကာ အစီအရင်များကို ပိတ်လိုက်ပြီး ကျင့်ကြံခန်းသို့ ပြန်လာခဲ့သည်။
သူမကို စိတ်အေးအေးထားပြီး အရာရာကို ပြန်လည်သုံးသပ်ရန် အချိန်ပေးလိုက်ခြင်းက ပိုကောင်းပါလိမ့်မည်။
မည်သို့ပင်ဆိုစေ သူ၏ ယခုအဆင့်အတန်းနှင့် အာဏာအရ စကားတစ်ခွန်း ပြောလိုက်ရုံဖြင့် ကုရှောင်းရွှယ်ကို ဝူဒင်နန်းတော်သို့ ပို့ပေးရန်မှာ မျက်စိမှိတ်လုပ်လျှင်ပင် အောင်မြင်နိုင်သော ကိစ္စဖြစ်သည်။
ကုရှောင်းရွှယ်အပါအဝင် လေးဦးလုံးကို သူ၏ ရင်းနှီးသော နောက်လိုက်များအဖြစ် သူက ပျိုးထောင်နေခြင်းသာ ဖြစ်သည်။
သူမ၏ စိတ်ဓာတ်ခိုင်မာနေသရွေ့ ကျန်သည့်အရာများမှာ အရေးမကြီးပေ။
ထန်ထျန်း သူ၏ ကျင့်ကြံခြင်းကို ဆက်လုပ်နေခဲ့သည်။
သို့သော် သူ မထင်မှတ်ထားသည်မှာ နောက်တစ်နေ့ နံနက်မှာတင် ကုရှောင်းရွှယ် ပြန်ရောက်လာခြင်းပင်။
သို့သော် သူမ တစ်ယောက်တည်း ပြန်လာခြင်းမဟုတ်ဘဲ အကြီးအကဲ ဟန်ဟိုင်ကပါ သူမနောက်မှ လိုက်ပါလာခဲ့ခြင်း ဖြစ်သည်။
"ကြွပါ။"
ထန်ထျန်း အနည်းငယ် အံ့သြသွားသော်လည်း ဟန်ဟိုင်ကို ခြံဝင်းထဲသို့ ဖိတ်ခေါ်လိုက်သည်။
မန်ကျည်းပင်အို ကြီးအောက်တွင် ထန်ထျန်း၊ ဟန်ဟိုင်နှင့် ရှောင်းရွှယ်တို့ အတူထိုင်လိုက်ကြသည်။
"အကြီးအကဲ ဒီနေ့ လာတာ တစ်ခုခုရှိလို့လား"
ထန်ထျန်းက တိုက်ရိုက်ပင် မေးလိုက်သည်။
ပြီးခဲ့သည့်အကြိမ်က ၎င်းတို့နှစ်ဦး စကားပြောရာတွင် အဆင်မပြေခဲ့သဖြင့် ယခုလည်း ဟန်ဆောင်ပန်ဆောင် စကားများ ပြောမနေချင်တော့ပေ။
ဟန်ဟိုင်က သူ၏ မုတ်ဆိတ်ဖြူကို ပွတ်သပ်ရင်း ရယ်မောကာ "ဒီနေ့ ငါလာတာက မင်းကို ကျေးဇူးလာတင်တာပါ။
ရှောင်းရွှယ်ကို ဒီလောက်အထိ ထူးချွန်အောင် မင်း ပျိုးထောင်ပေးနိုင်လိမ့်မယ်လို့ ငါ မထင်ထားခဲ့ဘူး။
ငါတောင် အရမ်း အံ့သြသွားရတယ်။"
ထန်ထျန်း ချက်ချင်း မျက်မှောင်ကြုတ်သွားသည်။
ဒါက ဘာသဘောလဲ
အရင်က ရှောင်းရွှယ် သူ့ဆီမှာ သက်တော် စောင့်အဖြစ် လာနေတုန်းက စကားတစ်ခွန်းတောင် မမေးခဲ့ဘဲ အခု သူမရဲ့ ခွန်အားတွေကို မြင်တော့မှ ကျေးဇူးလာတင်တယ်ပေါ့။
ဘာရည်ရွယ်ချက်လဲ
ထန်ထျန်းက စဉ်းစားပြီးနောက် "အကြီးအကဲ ကျေးဇူးတင်စရာ မလိုပါဘူး။
ကျွန်တော် ရှောင်းရွှယ်ကို ပျိုးထောင်ပေးတာက ကျွန်တော့်ရဲ့ ကိုယ်ပိုင်ရည်ရွယ်ချက်ကြောင့်ပါ၊ အဲဒါကို ခင်ဗျားလည်း သိမှာပါ။"
ဟန်ဟိုင်က ပြုံး၍ "ဒါပေမဲ့လည်း ရှောင်းရွှယ်ကို ချင်းယွဲ့ဂိုဏ်းထဲ ခေါ်လာတာ ငါပဲလေ။
အခု သူမကို ငါ့ရဲ့ တိုက်ရိုက် တပည့်အဖြစ် သတ်မှတ်လို့မရတော့ဘူး ဆိုပေမဲ့ သူမကို ငါပဲ ပြုစုပျိုးထောင်ပြီး ကြီးပြင်းစေခဲ့တာပါ။
ဒါကို ဘယ်သူမှ ငြင်းလို့မရဘူး မဟုတ်လား။"
ထန်ထျန်း မျက်လုံးများ မှေးသွားသည်။
ဒီလူ ပြောနေတာတွေက လူလုချင်နေတဲ့ ပုံစံမျိုးပဲ။
အရင်တုန်းကတော့ ပစ်ထားပြီးတော့ အခုမှ လာပြီး... တကယ်ကို လက်တွေ့ဆန်လွန်းတဲ့ လူကြီးပဲ။
"တကယ်တော့ ငါ အရမ်း သိချင်နေတာ။"
ဟန်ဟိုင်က ဆက်ပြောသည်။ "ရှောင်းရွှယ်ရဲ့ ပါရမီကို ငါ ကောင်းကောင်းသိပါတယ်။
သူမက မွေးရာပါ ပါရမီရှင် ဖြစ်လို့ တခြားသူတွေထက် ထူးချွန်ပေမဲ့ ကျင့်ကြံခြင်းလောကထဲကို နောက်ကျမှ ဝင်လာခဲ့တာဆိုတော့ အကောင်းဆုံးအချိန်တွေကို လွဲချော်ခဲ့ရတယ်။
ဒါကြောင့် သူမရဲ့ စွမ်းရည် က ပါရမီစက်ဝန်း ၉ လွှာရှိတဲ့ တပည့်တွေနဲ့ သိပ်မကွာလှဘူး။
မင်း ဘယ်လို နည်းလမ်းတွေ သုံးလိုက်လို့ သူမက ဒီလောက် တိုတောင်းတဲ့ အချိန်အတွင်းမှာ ဒီလိုမျိုး အသွင်ကူးပြောင်းသွားရတာလဲ ဆိုတာ ငါ အရမ်း သိချင်မိတယ်။"
ထန်ထျန်းက ဖြည်းဖြည်းချင်း ခေါင်းခါပြသည်။ "ရှောင်းရွှယ် တိုးတက်လာတာက သူမရဲ့ ကြိုးစားမှုကြောင့်ပါ၊ ကျွန်တော်ကတော့ အရင်းအမြစ် တချို့ပဲ ထောက်ပံ့ပေးခဲ့တာပါ။
အကြီးအကဲ ဟန်ဟိုင်... ဒီကိစ္စတွေကို ထားလိုက်ပါတော့။
ဒီနေ့ ခင်ဗျား လာရတဲ့ တကယ့် ရည်ရွယ်ချက်က ဘာလဲ"
သူက ဟန်ဟိုင်နှင့် ဟန်ဆောင်ပန်ဆောင် ဆက်မပြောလိုတော့ပေ။
ဟန်ဟိုင်က သူ၏ မုတ်ဆိတ်ရှည်ကြီးကို ပွတ်သပ်ရင်း ဘေးရှိ ကုရှောင်းရွှယ်ကို တစ်ချက်ကြည့်ကာ ပြောလိုက်သည်။ "ဒါဆိုရင်လည်း ငါ ပွင့်ပွင့်လင်းလင်းပဲ ပြောတော့မယ်။
ရှောင်းရွှယ်ကို ခရမ်းရောင်ဝါးခြံဝင်းကနေ ထွက်ခွာပြီး ငါ့ဆီကို ပြန်လာစေချင်တယ်။"
ထန်ထျန်း မျက်မှောင်ကြုတ်သွားသည်။ စိတ်ထဲ ထင်ထားသည့်အတိုင်းပင်။
ဟန်ဟိုင်က ရှောင်းရွှယ်၏ လက်ရှိ တိုးတက်မှုကို မြင်သောအခါ လောဘတက်လာပြီး သူမကို ပြန်ယူချင်နေခြင်း ဖြစ်သည်။
သို့သော် ထန်ထျန်းက အလွယ်တကူ သဘောတူမည်လား
သို့သော် ထန်ထျန်း ဘာမှ မပြောရသေးခင်မှာပင် ဘေးမှ ရှောင်းရွှယ်က အံ့သြစွာ မေးလိုက်သည်။ "အကြီးအကဲ ... ဒီနေ့ ထန်ထျန်းကို ကျေးဇူးလာတင်တာ မဟုတ်ဘူးလား
ဒီကိစ္စကို ကျွန်မကို ဘာမှ မပြောခဲ့ဘူးလေ"
သူမ၏ မျက်နှာတွင် အံ့သြတုန်လှုပ်မှုများဖြင့် ပြည့်နှက်နေသည်။
သို့သော် ဟန်ဟိုင်က လက်ဝှေ့ယမ်းကာ "ဒီမှာ မင်း စကားပြောစရာ မလိုဘူး။"
ထို့နောက် သူက ထန်ထျန်းကို ကြည့်ကာ "ဒါက ဒီနေ့ ငါလာရတဲ့ ရည်ရွယ်ချက်ပဲ။"
ထန်ထျန်းက ရှုပ်ထွေးနေသော ကုရှောင်းရွှယ်ကို တစ်ချက်ကြည့်ကာ ဟန်ဟိုင်ကို လေးနက်စွာ ပြောလိုက်သည်။ "ဂိုဏ်းထဲမှာ ဒီလို စည်းကမ်းမျိုး မရှိပါဘူး။
ကျွန်တော်နဲ့ ရှောင်းရွှယ်ကြားက သဘောတူညီချက်က ၁၀ နှစ်တိတိ လက်မှတ်ထိုးထားတာပါ။"
ဟန်ဟိုင်က အထင်သေးစွာ ပြုံးလိုက်ရင်း "သဘောတူညီချက် ကိစ္စကိုတော့ ငါကိုယ်တိုင် ဂုဏ်ထူးဆောင်ခန်းမ ကနေ ဖျက်ခိုင်းလိုက်မယ်။
မင်း ရှောင်းရွှယ်အပေါ်မှာ သုံးစွဲခဲ့တဲ့ ကုန်ကျစရိတ်တွေ အတွက်ကတော့..."
ပြောရင်းနှင့် သူ၏ သိုလှောင် လက်စွပ်ထဲမှ လှပလှသော ရှန့်ထန်းတာအိုကျောက်စိမ်း ၁၀ တုံးကို ထန်ထျန်းရှေ့သို့ ထုတ်ချလိုက်သည်။
"ငါ စုံစမ်းပြီးပြီ၊ ရှောင်းရွှယ် မင်းဆီမှာ သက်တော် စောင့်လုပ်ကတည်းက မင်း သူမအပေါ် ရင်းနှီးမြှုပ်နှံခဲ့တဲ့ အရင်းအမြစ် အားလုံးပေါင်းမှ ဒီလိုကျောက်စိမ်းမျိုး ၅ တုံးတောင် မပြည့်ပါဘူး။
အခု ငါ မင်းကို နှစ်ဆ ပြန်ပေးမယ် ဘယ်လိုလဲ"
ဟန်ဟိုင်၏ လေသံမှာ အလွန်ပင် မာနကြီးလှသည်။
ထန်ထျန်း၏ မျက်နှာမှာ လုံးဝ အေးစက်သွားသည်။ "ခင်ဗျား လွန်သွားပြီ ဟန်ဟိုင်။
ဒီလို အမှိုက်တွေနဲ့ ငါ့ကို လာစော်ကားဖို့ မကြိုးစားနဲ့၊ ငါက ဘယ်လိုလူလဲဆိုတာ ခင်ဗျား မသိသေးဘူးထင်တယ်။
ဂုဏ်ထူးဆောင်ခန်းမက သဘောတူညီချက်ကို ခင်ဗျား ဖျက်ကြည့်လိုက်လေ၊ အဲဒီကိစ္စကို အကြောင်းပြပြီး ခင်ဗျားကို ရာထူးကနေ ဆွဲချနိုင်သလား၊ မချနိုင်ဘူးလားဆိုတာ ကြည့်ရသေးတာပေါ့။"
ထန်ထျန်းက အာဏာလုပွဲများတွင် မပါဝင်ခြင်းမှာ သူ၌ အာဏာမရှိ၍ မဟုတ်ပေ။
ယခုအခါ ဆဌမတောင်ထိပ်နှင့် တောင် တောင်ထိပ်တို့မှာ သူ၏ လက်ထဲတွင် ရှိနေသလို ချီယွမ်နှင့် သူကိုယ်တိုင် ဂိုဏ်းအတွင်း တည်ဆောက်ထားသော အခြေခံအရ ချင်းယွဲ့ဂိုဏ်း တစ်ခုလုံးတွင် သူ့ကို ဗြောင်ကျကျ ရင်ဆိုင်ရဲသူ မရှိသလောက်ပင်။
အကယ်၍ ဟန်ဟိုင်သာ သူ၏ အာဏာကို သုံးပြီး သဘောတူညီချက်ကို ဖျက်ဆီးမည်ဆိုလျှင် ထန်ထျန်းကလည်း ထိုအကြောင်းပြချက်ဖြင့် ဟန်ဟိုင်၏ အကြီးအကဲ ရာထူးကို တိုက်ခိုက်ပေလိမ့်မည်။
ဟန်ဟိုင်ကလည်း ဤအချက်ကို နားလည်သွားပုံရသဖြင့် ထန်ထျန်းကို အေးစက်စွာ စိုက်ကြည့်နေသည်။
ထန်ထျန်းကလည်း မကြောက်မရွံ့ ပြန်လည် စိုက်ကြည့်နေရာ ၎င်းတို့နှစ်ဦးမှာ လုံးဝ မျက်နှာပျက်သွားကြပြီ ဖြစ်သည်။
ခဏမျှ တင်းမာနေပြီးနောက် ဟန်ဟိုင်က ရုတ်တရက် ရယ်မောလိုက်ကာ "ဒါဆိုရင် ဒီလို လုပ်ကြတာပေါ့။
ငါတို့ နှစ်ယောက် သဘောတူညီမှု မရနိုင်ဘူးဆိုရင် ရွေးချယ်ခွင့်ကို ရှောင်းရွှယ်လက်ထဲပဲ ထည့်ပေးလိုက်ရအောင်။
ဒါက သူမရဲ့ အနာဂတ်နဲ့ ဆိုင်တဲ့ ကိစ္စပဲ မဟုတ်လား"
ထန်ထျန်း ချက်ချင်း မျက်မှောင်ကြုတ်သွားသည်။ ဒီလူအိုကြီးက ဒီနေ့ ရှောင်းရွှယ်နဲ့ အတူလာကတည်းက ဒီလို အကွက်ဆင်ထားတာ ဖြစ်ရမည်။
သူမကိုပါ ဒီအရှုပ်ထဲ ဆွဲသွင်းချင်နေတာလား
၎င်းတို့နှစ်ဦး၏ တင်းမာမှုကြောင့် ကုရှောင်းရွှယ်မှာ ကြားထဲတွင် ဗျာများနေရသည်။
တစ်ဖက်မှာ သူမကို ဂိုဏ်းထဲ ခေါ်လာပြီး ကျွေးမွေးပြုစုခဲ့သည့် အကြီးအကဲ၊
နောက်တစ်ဖက်မှာ သူမကို အန္တရာယ်မှ ကယ်တင်ပေးပြီး အဆင့်မြှင့်တင်ပေးခဲ့သည့် ကျေးဇူးရှင်။
ဤကဲ့သို့သော အခြေအနေမျိုးတွင် သူမကို ရွေးချယ်ခိုင်းခြင်းမှာ ရက်စက်လွန်းလှသည်။
ခင်ဗျား တကယ်ပဲ ရက်ရက်စက်စက် လုပ်ရက်တယ်လား
သို့သော် ဟန်ဟိုင်ကမူ ထိုသို့ မခံစားရပေ။
ထန်ထျန်း စကားမပြောသည်ကို မြင်သောအခါ သူက ကုရှောင်းရွှယ်ဘက်သို့ တိုက်ရိုက် လှည့်လိုက်သည်။
"ရွေးလိုက်တော့ ရှောင်းရွှယ်။
မင်း ငါ့နောက် လိုက်မလား၊ ဒါမှမဟုတ် သူ့နောက်မှာပဲ နေမလား။"
အေးဆေးသော စကားလုံးများ ဖြစ်သော်လည်း ကုရှောင်းရွှယ် တစ်ကိုယ်လုံး တုန်ရင်သွားရသည်။
သူမက ဟန်ဟိုင်ကို တစ်လှည့်၊ ထန်ထျန်းကို တစ်လှည့် ကြည့်နေရင်း သူမ၏ မျက်လုံးများထဲတွင် ဝေခွဲမရမှုနှင့် လမ်းပျောက်မှုများဖြင့် ပြည့်နှက်နေသည်။
သူမ တကယ်ပဲ ဘာလုပ်ရမည်ကို မသိတော့ပေ။