အခန်း (၁၅၉)

မျက်ရည်စက်လက်နှင့် လင်းယောင်အာမှာ လုံးဝကို မှင်တက်သွားရသည်။

ငါ နားကြားမှားတာလား။ နတ်ဆေးဆရာမလေး ယွင်ရှန်းက စီအန်းဆေးတိုက်ရဲ့ ဆိုင်းဘုတ်ကို ခဏလောက် ငှားသုံးချင်တယ်လို့ ပြောလိုက်တာလား။

ဒါက ဘာကို ဆိုလိုတာလဲ။

စီအန်းဆေးတိုက်၏ ရွှေရောင်စာလုံးများဖြင့် ဆိုင်းဘုတ်မှာ တန်ဖိုးကင်းမဲ့သွားခဲ့သည်မှာ ကြာမြင့်ပြီ ဖြစ်သည်။ လွန်ခဲ့သော ၁၀ နှစ်ခန့် သူမ၏ ဖခင် ကျန်းမာရေး ကောင်းမွန်စဉ်ကမူ စီအန်းဆေးတိုက်သည် တောက်ယဲ့တောင်၏ ထိပ်တန်းဆေးခန်းတစ်ခု ဖြစ်ခဲ့ဖူးသည်။

ဆရာဝန်လင်းသည် အရိုးဆက်ခြင်း၊ ပြတ်ရှဒဏ်ရာများနှင့် မိစ္ဆာသားရဲ အဆိပ်သင့်ခြင်းများကို ကုသရာတွင် အထူးကျွမ်းကျင်သူ ဖြစ်သည်။ ထို့ကြောင့် မုဆိုးများ အထူးသဖြင့် သိုင်းပညာရှင်များအကြားတွင် သူ၏ နာမည်ဂုဏ်သတင်းမှာ အတော်လေး ကောင်းမွန်ခဲ့သည်။ သို့ရာတွင် ဆေးဘုရင်နန်းဆောင်ရောက်ရှိလာပြီးနောက်ပိုင်း သူမဖခင်၏ နာတာရှည်ဖျားနာမှုများကြောင့် အရာအားလုံး ပြောင်းလဲသွားခဲ့ရခြင်းပင်။

ယခုအခါ သူမဖခင်၏ အသက်ကို ဆရာဝန်ယွင်က ကယ်တင်ပေးနိုင်ခဲ့ပြီ ဖြစ်သော်လည်း သူ့မှာ ဆေးကုသမှု မပြုလုပ်ခဲ့ရသည်မှာ နှစ်ပေါင်းများစွာ ကြာမြင့်နေပြီ ဖြစ်သကဲ့သို့ ခန္ဓာကိုယ်မှာလည်း ယခုမှ ပြန်လည်နာလန်ထူစ ဖြစ်သဖြင့် ပုံမှန်အခြေအနေသို့ ပြန်လည်ရောက်ရှိရန် အချိန်ယူရဦးမည်ပင်။

"သမီး ပွင့်ပွင့်လင်းလင်းပဲ ပြောမယ်။ သမီးက စီအန်းဆေးတိုက်ရဲ့ နာမည်ကို သုံးပြီး တောက်ယဲ့တောင်မှာ အသင့်ဖော်စပ်ပြီးသားဆေး သီးသန့်မှာယူမှုလုပ်ငန်းကို စတင်ချင်တာပါ"

ယွင်ရှန်းက အစီအစဉ်ရှိရှိဖြင့် လာခဲ့ခြင်းဖြစ်သည်။ စီအန်းဆေးတိုက်သည် နစ်မြုပ်လုနီးပါး သင်္ဘောတစ်စင်း ဖြစ်နေသော်လည်း ၎င်း၏ အခြေခံအဆောက်အအုံများက အသုံးဝင်နေဆဲပင်။ ဤနေရာတွင် ဆေးဖက်ဝင်အပင်များ အထူးသဖြင့် ရှေးဟောင်းဆေးမြစ်အချို့ကို သေချာစွာ ပြင်ဆင်ထားသလို ဆေးဖော်စပ်တဲ့ ပစ္စည်းကိရိယာတွေဟာလည်း ယွင်ရှန်းမြင်ဖူးသမျှထဲမှာ ဆေးဘုရင်နန်းဆောင်ပြီးရင် အကောင်းဆုံးတွေ ဖြစ်နေပါတယ်။

ဒါ့အပြင် လုပ်ငန်းစီမံခန့်ခွဲမှုနဲ့ လူမှုဆက်ဆံရေးမှာ တော်တဲ့ လင်းယောင်အာကလည်း ရှိနေသေးတယ် မဟုတ်ပါလား။

"သီးသန့်မှာယူမှု ဟုတ်လား..."

လင်းယောင်အာက နားမလည်နိုင်စွာဖြင့် ပြန်မေးလိုက်မိသည်။

လင်းယောင်အာမှာ လုံးဝကို ဝေခွဲမရဖြစ်နေရှာသည်။ စောစောက နတ်ဆေးဆရာမလေးယွင် ပြောပြသော အဆစ်အမြစ်ကိုက်ခဲခြင်းဆိုသည်ကိုလည်း သူမ နားမလည်ခဲ့သလို ယခု "အသင့်ဖော်စပ်ပြီးသားဆေး သီးသန့်မှာယူမှု" ဆိုသည်မှာလည်း သူမအတွက် အသစ်အဆန်းကြီး ဖြစ်နေသည်။

သို့သော်လည်း ယွင်ရှန်း၏ သဲကုထုံး၏ အံ့ဖွယ်စွမ်းပကားကို ကိုယ်တိုင်မြင်တွေ့ခဲ့ရပြီးနောက် ပါးနပ်လှသော လင်းယောင်အာသည် ထပ်မံ၍ မေးခွန်းများ မမေးတော့ပေ။

ယနေ့ ယွင်ရှန်းသည် ဆေးဘုရင်နန်းဆောင်သို့ အစီအစဉ်ရှိရှိဖြင့် သွားရောက်ခဲ့ခြင်းဖြစ်သည်။ သူမ ငွေရှာလိုလျှင် ဆေးဖော်စပ်ရမည်ဖြစ်ပြီး ထိုဆေးများကို ပြန်လည်ရောင်းချနိုင်ရန်အတွက် ဆေးဘုရင်နန်းဆောင်နှင့် မလွဲမသွေ ယှဉ်ပြိုင်ရမည်ဖြစ်သည်။

ဆေးဘုရင်နန်းဆောင်၏ နှစ်ရှည်လများ တည်ဆောက်ထားသော နာမည်ဂုဏ်သတင်းနှင့် လူထု၏ ယုံကြည်မှုကြောင့် ယွင်ရှန်းအနေဖြင့် အကောင်းဆုံးဆေးများကို ဖော်စပ်နိုင်လျှင်ပင် တောက်ယဲ့တောင်ရှိ မုဆိုးများ၏ လက်ခံမှုကို ရရှိရန် ခက်ခဲပေလိမ့်မည်။ သို့သော် ဆေးဘုရင်နန်းဆောင်သည်လည်း အားနည်းချက်မရှိသည်တော့ မဟုတ်ပေ။

ထိုနေရာတွင် လှည့်ပတ်ကြည့်ရှုပြီးနောက် ယွင်ရှန်း ပြဿနာတစ်ခုကို ရှာဖွေတွေ့ရှိခဲ့သည်။ ဆေးဘုရင်နန်းဆောင်သည် တိုက်ကြီးပေါ်တွင် အကောင်းဆုံး ဆေးတိုက်ဟု အမည်ကျော်ပြီး ထိပ်တန်းဆရာဝန်များနှင့် ဆေးပညာရှင်များ ရှိသော်လည်း သူတို့သည် လူသုံးအများဆုံး သာမန်ဆေးဝါးများကိုသာ အဓိကထား ရောင်းချကြသည်။ တစ်ဦးတစ်ယောက်ချင်းစီအတွက် လိုအပ်သော အထူးဆေးဝါးများကိုမူ ဆေးဘုရင်နန်းဆောင်က ဖြည့်ဆည်းမပေးနိုင်ပေ။

လင်းယောင်အာသည် စောစောက ချီစန်းအား ဆေးဖော်ပေးရန် အသည်းအသန် တောင်းပန်ခဲ့သော်လည်း ချီစန်းက ပြတ်ပြတ်သားသား ငြင်းဆိုခဲ့သည်။ အကြောင်းမှာ ဆေးဘုရင်နန်းဆောင်သည် အလွန်ကြီးမားသော လုပ်ငန်းစုကြီးဖြစ်သဖြင့် အရောင်းရဆုံးဆေးများကိုသာ အစုလိုက်အပြုံလိုက် ထုတ်လုပ်ရန် ဦးတည်ထားပြီး လူနည်းစုအတွက် သီးသန့်မှာယူသည့် ဈေးကွက်ကို လျစ်လျူရှုထားသောကြောင့်ဖြစ်သည်။

ခေတ်သစ်ကမ္ဘာမှ လာသူဖြစ်သော ယွင်ရှန်းသည် သီးသန့်မှာယူမှုဈေးကွက်မှာ မည်မျှအထိ ရေပန်းစားကြောင်း ကောင်းစွာ သိရှိထားသည်။ ဆေးဘုရင်နန်းဆောင်ကို တိုက်ရိုက်မယှဉ်နိုင်သဖြင့် ယွင်ရှန်းသည် ဤသီးသန့်ဆေးဖော်စပ်ခြင်းလမ်းစဉ်ကို ရွေးချယ်ရန် ဆုံးဖြတ်လိုက်ခြင်းပင်။

ယွင်ရှန်းက သူမ၏ အတွေးအမြင်များကို ပြောပြလိုက်သောအခါ ဆရာဝန်သမီးဖြစ်သူ ပါးနပ်လှသော လင်းယောင်အာ၏ မျက်ဝန်းများမှာ ချက်ချင်းပင် တောက်ပလာတော့သည်။ သူမ၏ ထက်မြက်သော အသိဉာဏ်ဖြင့် ဤလုပ်ငန်းသည် မည်မျှအထိ အောင်မြင်နိုင်ကြောင်း စီးပွားရေးအခွင့်အလမ်းကို ချက်ချင်းပင် ရိပ်မိလိုက်လေသည်။

"မမ လုပ်ရမှာက စီအန်းဆေးတိုက်ရဲ့ အမည်ကို သုံးပြီးတော့ ကျွန်မတို့ဆီမှာ ဆေးဖော်စပ်ဖို့ လက်ခံနေပြီဆိုတာကို ကြေညာပေးဖို့ပဲ။ ဆေးဖက်ဝင်အပင်တွေကို ကျွန်မတို့ဘက်က စီစဉ်ပေးလို့ရသလို ဆေးညွှန်းနဲ့ တန်ဖိုးကြီးတဲ့ ရှားပါးကုန်ကြမ်းတွေကိုတော့ အပ်နှံသူဘက်က ယူလာပေးရမယ်။ ကျွန်မတို့က အကောင်းဆုံး ဖော်စပ်ပေးဖို့ပဲ တာဝန်ယူမှာပါ။ ဆေးအမျိုးအစားရဲ့ အဆင့်အတန်းအလိုက် ဖော်စပ်ခကို သတ်မှတ်မယ်။ ရလာတဲ့ အမြတ်ငွေထဲက ဆေးပင်ဖိုးတွေကို ဖယ်ပြီးရင် မမကို ၂၀ ရာခိုင်နှုန်း ထပ်ပေးမယ်"

ယွင်ရှန်းက လုပ်ငန်းစဉ်တစ်ခုလုံးကို လင်းယောင်အာအား အသေးစိတ် ရှင်းပြလိုက်သည်။

လင်းယောင်အာ နားထောင်နေရင်း အနည်းငယ်တော့ တွန့်ဆုတ်နေမိသေးသည်။ ယွင်ရှန်းက သူမအဖေကို ကုသပေးနိုင်သည့် ကုထုံးပိုင်းဆိုင်ရာ ပါရမီကို ပြသခဲ့သော်လည်း ဆေးဖော်စပ်

ခြင်းပိုင်းတွင် မည်မျှအထိ ကျွမ်းကျင်သည်ကို မသိရသေးပေ။

ဆေးကုသခြင်းနှင့် ဆေးဖော်စပ်ခြင်း နှစ်ခုလုံးမှာ ကျွမ်းကျင်ရန် အလွန်ခက်ခဲလှပြီး အချို့သော ဝါရင့်ဆရာဝန်ကြီးများပင် တစ်ခုကိုသာ ပိုင်ပိုင်နိုင်နိုင် တတ်မြောက်ကြသည်။ ယွင်ရှန်းသည် ထူးခြားသော ဆရာတစ်ဦး၏ တပည့်ဖြစ်နိုင်သည်မှာ မှန်သော်လည်း သူမ၏ အသက်အရွယ်မှာ ငယ်လွန်းနေသေးသည် မဟုတ်ပါလား။

"ဘာလဲ... သမီးက စကားတွေ လျှောက်ပြောပြီး စီအန်းဆေးတိုက်ရဲ့ နောက်ဆုံးကျန်နေတဲ့ နာမည်ကောင်းကိုပါ ဖျက်ဆီးပစ်မှာ ကြောက်နေတာလား"

ယွင်ရှန်းက လင်းယောင်အာ ဘာကိုစိုးရိမ်နေသည်ကို ကောင်းစွာသိသည်။ အစောပိုင်းက သူမအဖေ အသည်းအသန်ဖြစ်နေချိန်တွင် လင်းယောင်အာမှာ ဘာကိုမှ ဂရုမစိုက်နိုင်ခဲ့သော်လည်း ယခု သူမအဖေ ကျန်းမာရေးပြန်ကောင်းလာပြီဖြစ်ရာ စီအန်းဆေးတိုက် ပြန်လည်ဦးမော့လာရေးအတွက် သူမ ထည့်သွင်းစဉ်းစားနေရပြီဖြစ်သည်။

လင်းယောင်အာမှာ စိတ်ထဲမှ အားနာသွားမိသည်။

"ဒါက သမီးဖော်စပ်ထားတဲ့ ဆေးရည်တစ်မျိုးပဲ"

ယွင်ရှန်းက တရားထိုင်ဆေးရည်တစ်ပုလင်းကို ထုတ်ပြလိုက်သည်။ ထိပ်တန်း လနတ်ဘုရားဆေးရည်ကို အောင်မြင်စွာ ဖော်စပ်နိုင်ခဲ့ပြီးနောက် ယွင်ရှန်းသည် ဆေးဖော်စပ်ခြင်းပညာရပ်တွင် ပိုမိုနက်ရှိုင်းသော အမြင်များကို ရရှိထားပြီးဖြစ်သည်။

လင်းယောင်အာသည် ဆေးဖော်စပ်ခြင်းကို အသေးစိတ် မသိသော်လည်း စီအန်းဆေးတိုက်တွင် ကြီးပြင်းလာသူဖြစ်ရာ သူမတွင် အကဲခတ်နိုင်သော မျက်စိရှိသည်။ ဤဆေးရည်၏ အရောင်နှင့် ရနံ့မှာ အဆင့်မြင့်ဆေးရည်တစ်မျိုး ဖြစ်ရမည်မှာ သေချာလှသည်။

အဆင့်မြင့် အသင့်ဖော်စပ်ပြီးသား ဆေးရည်တစ်ပုလင်းကို ပေါ့ပေါ့ပါးပါး ထုတ်ပြနိုင်ခြင်းက ယွင်ရှန်းအပေါ်ထားသည့် လင်းယောင်အာ၏ သံသယအားလုံးကို ချက်ချင်းပင် ပျောက်ကွယ်သွားစေတော့သည်။

နောက်တစ်နေ့ နံနက်အစောပိုင်းတွင် စီအန်းဆေးတိုက်၏ အဝင်ဝ၌ ကြေညာချက်အကြီးကြီးတစ်ခုကို ချိတ်ဆွဲလိုက်သည်။

"ယနေ့မှစ၍ စီအန်းဆေးတိုက်တွင် သီးသန့်ဆေးဖော်စပ်ခြင်း အမှာစာများကို လက်ခံနေပြီဖြစ်သည်။ အသေးစိတ်ကို ဆေးတိုက်အတွင်း၌ စုံစမ်းနိုင်သည်။ မှတ်ချက်- အလတ်စားနှင့် အထက် အဆင့်ရှိသော ဆေးဖော်စပ်မှုများကိုသာ လက်ခံပါမည်"

၎င်းအပြင် လင်းယောင်အာသည် ဆေးတိုက်ရှိ ဆေးကြိတ်ကလေးများအား တောက်ယဲ့တောင်ပေါ်ရှိ အရက်ဆိုင်များနှင့် လက်ဖက်ရည်ဆိုင်များတွင် ကြေညာချက်များ လိုက်လံကပ်ရန်လည်း ညွှန်ကြားခဲ့သည်။

မကြာမီမှာပင် ဆေးဘုရင်နန်းဆောင်မှ ချီစန်းနှင့် အခြားသူများထံသို့ ဤသတင်း ရောက်ရှိသွားပါတော့သည်။

သတင်းကို ကြားသိရသည့်အခါ ချီစန်းသည် ဒေါသထွက်မည့်အစား ကျေနပ်အားရစွာဖြင့် လှောင်ပြောင်ရယ်မောလိုက်ပါသေးသည်။

"အဲဒီကောင်မလေး လင်းယောင်အာတော့ တကယ်ကို သေတွင်းတူးနေတာပဲ။ ဒီလောက်ကြီးမားတဲ့ သီးသန့်ဆေးဖော်စပ်တဲ့လုပ်ငန်းကို လက်ခံရဲတယ်ပေါ့လေ"

ဘေးရှိ ဆေးကြိတ်ကလေးက နားမလည်နိုင်စွာဖြင့် မေးမြန်းလိုက်သည်။

"ဆရာချီ... ကျွန်တော်တို့ စီအန်းဆေးတိုက်ရဲ့ လုပ်ဆောင်ချက်တွေကို တားဆီးဖို့ လူမလွှတ်

သင့်ဘူးလားခင်ဗျာ"

"တားရမယ် ဟွန့် မတားရုံတင်မကဘူး သူတို့ကို ဆေးဖော်ဖို့ ကုန်ကြမ်းတွေပါ ကူညီပေးရဦးမယ်။ စဉ်းစားကြည့်စမ်း... တကယ်လို့ ဆေးညွှန်းတစ်ခုတည်း ပျက်စီးသွားတာနဲ့တင် စီအန်းဆေးတိုက်ဟာ နာမည်ပျက်ပြီး ပြိုလဲသွားမှာပဲ။ အဲဒီအခါကျရင် လင်းမိသားစု သားအဖနှစ်ယောက် ငါ့ဆီ ဒူးထောက်တောင်းပန်ဖို့ ရောက်လာကြမှာပေါ့။ ဟိုတစ်နေ့က မြို့ထဲက သူဌေးကြီး ကျားပိုင်ဝမ် သူ့မယားငယ်အတွက် လာမှာထားတဲ့ ဆေးညွှန်းကို သွားယူခဲ့ ပြီးရင် စီအန်းဆေးတိုက်ကို ပို့လိုက်။ သူတို့ ဘယ်လိုဖော်စပ်မလဲဆိုတာ ငါ တကယ်ကို ကြည့်ချင်သေးတယ်"

နှစ်ရက်ခန့် ကြာမြင့်သွားသော်လည်း စီအန်းဆေးတိုက်ထံမှ မည်သည့်သတင်းမျှ ထွက်ပေါ်မလာသေးပေ။

ယွင်ရှန်းကမူ စိတ်ပူပန်ခြင်း မရှိပေ။ အဘယ်ကြောင့်ဆိုသော် သီးသန့်ဆေးဖော်စပ်ခြင်း လုပ်ငန်းမှာ ဝူကျီတိုက်ကြီးပေါ်တွင် အသားမကျသေးသည့် လုပ်ငန်းသစ်တစ်ခု ဖြစ်သဖြင့် အချိန်

အတိုင်းအတာတစ်ခု ပေးရဦးမည် ဖြစ်သောကြောင့်ပင်။

လက်ဝှေ့ကွင်းအတွင်း၌မူ ဟွမ်ထိန်အဖွဲ့သည် ဒုတိယနှင့် တတိယအဆင့် အကဲဖြတ်ပွဲများကို အဆင်ပြေချောမွေ့စွာ ကျော်ဖြတ်နိုင်ခဲ့သည်။ ယွင်ရှန်းမှာမူ သူမ၏ မှော်လှံတံကိုပင် ထုတ်ယူသုံးစွဲရန် မလိုအပ်ခဲ့ပေ။

ပြိုင်ပွဲပြီးဆုံးပြီးနောက် ဖန်းကုက ဝမ်းသာအားရဖြင့် ပြောဆိုလာသည်။

"အခုဆို ငါတို့ သုံးပွဲဆက်တိုက် နိုင်သွားပြီဆိုတော့ နောက်တစ်ဆင့်ကို တိုက်ရိုက်တက်သွားပြီ။ အဆင့် B မုဆိုးအဖွဲ့တစ်ဖွဲ့ကို စိန်ခေါ်လို့ နိုင်ရုံနဲ့ ငါတို့ အဆင့်တက်ပြီပဲ"

သူ စကားပြောဆိုနေစဉ်မှာပင် အခြားကွင်းတစ်ခုမှ ညည်းတွားသံများနှင့်အတူ ဒဏ်ရာရရှိထားသော မုဆိုးအချို့ကို ထမ်းစင်ဖြင့် သယ်ဆောင်ထုတ်လာသည်ကို မြင်တွေ့လိုက်ရသည်။

အဆိုပါ မုဆိုးများကို မြင်တွေ့လိုက်ရသည့်အခါ ဖန်းကုသည် ဝမ်းသာနေသည့် မျက်နှာအမူအရာ ချက်ချင်းပြောင်းလဲသွားပြီး သူတို့ထံသို့ အမြန်ပြေးသွားတော့သည်။

"အဲဒါ အဆင့် B မုဆိုးဟောင်းအဖွဲ့ဖြစ်တဲ့ တောကျားအဖွဲ့ ခေါင်းဆောင်ပဲ။ သူတို့ခေါင်းဆောင်နဲ့ ခေါင်းဆောင်ဖန်းက သူငယ်ချင်းတွေလေ သူတို့က မနှစ်ကမှ အဆင့် B အကဲဖြတ်ပွဲကို အောင်မြင်ထားတာ"

မူနန်ယန့်နှင့် ဝမ်ရန်ရွှီတို့က မျက်မှောင်ကြုတ်ရင်း ရှင်းပြကြသည်။

အဆိုပါ မုဆိုးများ၏ ခန္ဓာကိုယ်တွင် ပြင်းထန်လွန်းသော ဒဏ်ရာများ ရရှိထားကြခြင်း ဖြစ်သည်။ ယွင်ရှန်း ကြည့်ရှုလိုက်ရုံဖြင့်ပင် အသေအချာ ကုသပေးလျှင်ပင် သူတို့မှာ နောင်တစ်ချိန်တွင် မုဆိုးအလုပ်ကို ပြန်လည်လုပ်ကိုင်နိုင်ရန် မလွယ်ကူတော့ကြောင်း သိရှိလိုက်သည်။

စုံစမ်းကြည့်လိုက်သည့်အခါ သူတို့၏ ပြိုင်ဘက်မှာ ဟေးဟုအဖွဲ့ ဖြစ်နေသည်။ သူတို့သည် အဆင့် C အကဲဖြတ်ပွဲ သုံးပွဲစလုံးကို အလျင်မြန်ဆုံး အောင်မြင်ပြီး အဆင့် B အဖွဲ့ကို စိန်ခေါ်သည့် နောက်ဆုံးအဆင့်သို့ ရောက်ရှိနေပြီ ဖြစ်သည်။

ဤမျှ ရက်စက်လှသော နည်းလမ်းများအား လက်ဝှေ့ကွင်းဘက်မှ ကြိုတင်ကာကွယ်မှုများ များစွာ ပြုလုပ်ထားသော်လည်း ဟေးဟုအဖွဲ့မှာမူ မည်သည့်အရာကိုမျှ ဂရုမစိုက်ဘဲ ပြိုင်ဘက်များကို ညှာတာမှုကင်းမဲ့စွာ ချေမှုန်းနေဆဲပင်။

"အဟွတ်... အဟွတ်..."

ထမ်းစင်ပေါ်တွင် လဲလျောင်းနေသည့် အဖွဲ့ခေါင်းဆောင်သည် ဖန်းကုကို မြင်တွေ့သောအခါ အားယူ၍ ထိုင်လိုက်ရင်း သတိပေးရှာသည်။

"သတိထားနော်... ဟေးဟုအဖွဲ့က အခုပဲ အဆင့် B မုဆိုးအဖွဲ့အဖြစ် တရားဝင် အောင်မြင်သွားပြီ"