အခန်း (၁၆၃)

ဟေးတာ၏ ပထမဆုံး တုံ့ပြန်မှုမှာ တစ်စုံတစ်ယောက်က သာမန်လက်နက်ပုန်းဖြင့် ပစ်ခတ်လိုက်ခြင်းဖြစ်မည်ဟု ထင်မှတ်လိုက်ခြင်းပင်။

သို့သော် သူ၏ နဖူးကို စမ်းကြည့်လိုက်သောအခါ စေးကပ်ကပ်နှင့် အဝါရောင် အရည်များ၊ အကြည်ရောင် အချွဲများကို တွေ့လိုက်ရပြီး အနံ့ခံကြည့်ရာတွင်မူ ပုပ်စော်နံလှသော ဥပုပ်အနံ့ကို ရရှိလိုက်တော့သည်။

"ဘယ်ကောင်က ငါ့ကို ဥပုပ်နဲ့ ပစ်ရဲတာလဲ"

ဟေးတာက အော်ဟစ်ကြိမ်းမောင်းလိုက်သည်။

ဟေးဟုအဖွဲ့နှင့် ဟွမ်ထိန်အဖွဲ့တို့၏ ပွဲစဉ်မှာ မူလကပင် လူစိတ်ဝင်စားမှု မြင့်မားနေပြီးဖြစ်ရာ အစီအစဉ်ဆွဲတတ်သော လော်လီမလေးတစ်ဦး၏ တမင်တကာ ဝါဒဖြန့်မှုကြောင့် ကြည့်ရှုသူဦးရေမှာ စံချိန်တင်အောင် များပြားလာခဲ့သည်။ မဟာကျိုးနိုင်ငံတော်အတွင်းရှိ A အဆင့် မုဆိုးအဖွဲ့ကြီးအချို့မှလွဲ၍ ကျန်ရှိသော မုဆိုးအားလုံးနီးပါးသည် ဤနေရာသို့ စုပြုံရောက်ရှိလာကြခြင်း ဖြစ်သည်။

လက်ဝှေ့ကွင်းအတွင်း၌ ကြည့်ရှုခွင့်ရသူဦးရေမှာ ကန့်သတ်ချက်ရှိသဖြင့် လက်မှတ်မရသူများမှာ ကွင်းပြင်ပတွင် အုံခဲစောင့်ဆိုင်းနေကြရသည်။ ကွင်းပြင်ပတွင် လူပင်လယ်ကြီးသဖွယ် ဖြစ်နေသဖြင့် မည်သူက မိမိ၏နဖူးကို ဥပုပ်ဖြင့် ပစ်ပေါက်လိုက်သည်ကို ဟေးတာအနေဖြင့် လုံးဝ ခန့်မှန်း၍ မရနိုင်ပေ။

"တောက်... ဘယ်သူပစ်တာလဲဆိုတာ သိတာနဲ့ အသေပဲမှတ်"

ဟေးတာက ဒေါသတကြီး အော်ဟစ်နေသော်လည်း သူ၏ ညီအစ်ကို သုံးဦးက ဝိုင်းဝန်းချော့မြှော့မှသာ အနည်းငယ် ပြန်လည်တည်ငြိမ်သွားတော့သည်။

ထို့နောက် ဟေးတာသည် လူအုပ်ကြီးကို တစ်ချက်ဝေ့ကြည့်ကာ ကျိန်ဆဲပြီးနောက် ဒေါသတကြီးဖြင့် ကွင်းအတွင်းသို့ လှမ်းဝင်သွားလေသည်။

ထိုစဉ်မှာပင် ကလေးငယ်အချို့နှင့်အတူ ချစ်စဖွယ်ကောင်းသော မိန်းကလေးငယ်တစ်ဦးသည် လူအုပ်ကြားထဲသို့ တိုးဝင်လာပြီး ပရိသတ်များကို ဤသို့ လှည့်ပတ်မေးမြန်းနေတော့သည်။

"ဟိုမှာတွေ့လား... အဲဒါ ဟေးဟုအဖွဲ့ပဲ။ သတင်းတွေထဲကအတိုင်း တကယ်ကို ကြောက်စရာကောင်းပြီး ယုတ်မာမယ့်ပုံပဲနော်။ သူတို့က ဟောက်ချင်နိုင်ငံက မုဆိုးတွေဖြစ်နေပြီးတော့ ငါတို့ မဟာကျိုးနိုင်ငံ မြေပေါ်မှာ ဒီလောက်တောင် ရဲတင်းနေကြတာလား။ ကျွန်မသာဆိုရင်တော့ သူတို့ကို ဥပုပ်တွေ၊ ခရမ်းချဉ်သီးတွေ၊ ကျောက်ခဲတွေနဲ့ သေအောင် ပစ်ပေါက်လိုက်မိမှာပဲ"

ဤစကားကို ကြားလိုက်ရချိန်တွင် စောစောက ဟေးတာ၏ အရှက်ရဖွယ် အခြေအနေကို မြင်တွေ့ခဲ့ရသော မုဆိုးများမှာ ရုတ်တရက် စိတ်ထဲ၌ ကျေနပ်သွားကြသည်။

ထိုစဉ် နတ်သမီးလေးတစ်မျှ လှပသော မိန်းကလေးတစ်ဦးက ရုတ်တရက် အော်ပြောလိုက်

သည်။

"ဟေး... နင်တို့မှာ ပစ်စရာ ပစ္စည်းတွေ ရှိသေးလား။ ငါ့ကို ပေးစမ်းပါ၊ ကြက်ဥတွေ၊ ခရမ်းချဉ်သီးပုပ်တွေ... ဟုတ်ပြီ ကျောက်ခဲတွေပါ ရှိတာလား။ အဲဒီတောင်းတွေကို ငါ့ဆီ ယူလာခဲ့စမ်း"

ဤသည်ကို မြင်လိုက်ရသောအခါ ဘေးပတ်ဝန်းကျင်ရှိ မုဆိုးများ၏ မျက်ဝန်းများမှာ ချက်ချင်းပင် တောက်ပလာပြီး အားလုံးမှာ တစ်ခဲနက် တက်ကြွသွားကြပါတော့သည်။

လက်ဝှေ့ကွင်းထဲ ရောက်တာနဲ့ ဟေးဟုအဖွဲ့က လူယုတ်မာလေးယောက်ကို သင်ခန်းစာ ကောင်းကောင်း ပေးရမည်။

ထို့ကြောင့်ပင် လှပလွန်းသော ထိုမုဆိုးမလေး၏ ဦးဆောင်မှုဖြင့် လူအုပ်ကြီးသည် နှောင့်ယှက်ရေးပစ္စည်းများကို ဝယ်ယူရန် စုပြုံတိုးဝှေ့လာကြတော့သည်။ အတော်အသင့် ချမ်းသာသော မုဆိုးများမှာ သိုလှောင်မှော်ပစ္စည်းများအတွင်းသို့လည်းကောင်း၊ အခြေအနေမပေးသူများမှာ သိုလှောင်အိတ်များအတွင်းသို့လည်းကောင်း ထိုထူးဆန်းသော ပစ္စည်းများကို အပြည့်အနှက် ထည့်သွင်းကာ ကွင်းအတွင်းသို့ ဝင်ရောက်သွားကြသည်။

မုဆိုးအားလုံး ကွင်းထဲဝင်သွားပြီးနောက်တွင်မူ လင်းယောင်အာသည် ကလေးငယ်တစ်အုပ်နှင့်အတူ ဟင်းသီးဟင်းရွက်နှင့် ကျောက်ခဲများ ထည့်ခဲ့သော ဗလာတောင်း ဒါဇင်ပေါင်းများစွာကို ကိုင်ဆောင်လျက် ပရိယာယ်ကြွယ်ဝစွာ ပြုံးလိုက်မိသည်။ ပုံမှန်အားဖြင့် ရွှေဒင်္ဂါးအနည်းငယ်သာ တန်ဖိုးရှိသော ဟင်းသီးဟင်းရွက်များမှာ ယနေ့တွင်မူ ဆယ်ဆမက ဈေးနှုန်းမြင့်တက်သွားခဲ့သည်။

လွန်ခဲ့သော ရက်အနည်းငယ်က နတ်ဆေးဆရာမလေး ယွင်ရှန်း အဘယ်ကြောင့် ဤပစ္စည်းများကို ကြိုတင်ပြင်ဆင်ခိုင်းသည်ကို ယနေ့မှပင် လင်းယောင်အာ သဘောပေါက်သွားတော့သည်။ ယွင်ရှန်းသည် ဟွမ်ထိန်အဖွဲ့နှင့် တစ်နည်းနည်းဖြင့် ပတ်သက်နေရမည်ဖြစ်ပြီး သူမ ငှားရမ်းထားသော ပုံပြောသူများနှင့် စာရေးဆရာများ ဖန်တီးလိုက်သော လူထုဝါဒဖြန့်မှုမှာ နှစ်ရက်အတွင်းမှာပင် ဟေးဟုအဖွဲ့အား လူတိုင်း၏ ပစ်မှတ်ဖြစ်သွားအောင် လုပ်ဆောင်နိုင်ခဲ့သည်။

"အနီးကပ်သူ၏ အရောင်ကူးစက်တတ်သည်" ဟူသော စကားပုံအတိုင်း ယွင်ရှန်းနှင့် ရက်အနည်းငယ်သာ နေလိုက်ရသော်လည်း လင်းယောင်အာမှာလည်း အတော်လေး ပါးနပ်တတ်ကျက်လာခဲ့ပြီ ဖြစ်သည်။

လက်ဝှေ့ကွင်းအတွင်း၌မူ အကဲဖြတ်ဒိုင်အဖြစ် ရင်းနှီးပြီးသားဖြစ်သော လန်လန်က တာဝန်ယူထားသည်။

"ဆက်လက်ပြီး ဟွမ်ထိန် မုဆိုးအဖွဲ့ဝင်များကို ကွင်းအတွင်းသို့ ဖိတ်ခေါ်ပါတယ်"

လန်လန်၏ ကြေညာချက်အဆုံးတွင် လက်ဝှေ့ကွင်းတစ်ခုလုံးမှာ "ဟွမ်ထိန် အောင်ရမည် ဟွမ်ထိန် အောင်ရမည်" ဟူသော အားပေးသံများဖြင့် တုန်ဟီးသွားတော့သည်။ ဖန်းကုသည် ခေါင်းကိုမော့ကာ ဝင့်ကြွားစွာ လမ်းလျှောက်ဝင်လာပြီး ယွင်ရှန်းကမူ ဖန်းကု၏ ပုခုံးပေါ်တွင် ထိုင်နေဆဲဖြစ်ကာ ဝမ်ရန်ရွှီနှင့် မူနန်ယန့်တို့က ဘေးတစ်ဖက်တစ်ချက်မှ လိုက်ပါလာကြသည်။

"နောက်တစ်ခုအနေနဲ့ ဟေးဟု မုဆိုးအဖွဲ့ကို ကြိုဆိုပါတယ်"

လန်လန် စကားပင်မဆုံးသေးမီ ဟေးဟုအဖွဲ့ဝင် လေးဦးမှာ ယုံကြည်မှုအပြည့်ဖြင့် ကွင်းထဲသို့ လှမ်းဝင်လာကြသည်။ သို့သော် သူတို့မျက်နှာပြလိုက်သည်နှင့် တစ်ပြိုင်နက် အရပ်မျက်နှာအနှံ့မှ လှောင်ပြောင်သံများနှင့်အတူ ဂေါ်ဖီရွက်များ၊ ကြက်ဥများနှင့် ခရမ်းချဉ်သီးများ မိုးရွာသကဲ့သို့ ကျရောက်လာတော့သည်။

ပရိသတ် ရာပေါင်းများစွာ ပစ်ပေါက်လိုက်သော ထိုပုပ်စော်နံသည့် လက်နက်များဒဏ်ကို ဟေးဟုညီအစ်ကိုများမှာ ဘယ်လိုမျှ မကာကွယ်နိုင်ကြတော့ဘဲ တစ်ကိုယ်လုံး အဝါရောင်၊ အနီရောင် အရည်များဖြင့် ပေကျံကာ ရယ်စရာကောင်းလောက်အောင် အရှက်ရဖွယ် ဖြစ်သွားကြသည်။ ဘေးမှ ဒိုင်လူကြီး လန်လန်ပင်လျှင် ထိတ်လန့်သွားကာ ထိုလေးယောက်ကို ပစ်ထားခဲ့ပြီး လူထုဒေါသဘေးမှ လွတ်ကင်းရာ ဘေးကင်းသော ထောင့်တစ်နေရာသို့ အမြန်ပြေးလွှား ပုန်းရှောင်လိုက်ရတော့သည်။

ဤလူများမှာ အမှန်တကယ်ပင် ရက်စက်လွန်းလှသည်။ သူတို့သည် ပစ္စည်းများကို ဒီအတိုင်း ပစ်ပေါက်နေကြခြင်း မဟုတ်ဘဲ ဂေါ်ဖီရွက်များ၊ ကြက်ဥများနှင့် ခရမ်းချဉ်သီးများကို မှော်ပညာများ၊ တိုက်ခိုက်ရေးစွမ်းရည်များဖြင့် ပေါင်းစပ်ကာ အရှိန်အဟုန်ပြင်းစွာ ပစ်ခတ်နေကြခြင်း ဖြစ်သည်။

"ဘယ်သူလဲဟေ့"

ခေါင်းပေါ်တွင် ဂေါ်ဖီရွက်တစ်ရွက် တင်နေသော ဟေးတာသည် ပရိသတ်များကို လှည့်၍ ဟိန်းဟောက်လိုက်သော်လည်း၊ သူ့ကို ပြန်လည်စိုက်ကြည့်နေသော ဒေါသတကြီး မျက်လုံးပေါင်း ရာချီကို မြင်လိုက်ရသောအခါ တစ်ကိုယ်လုံး တုန်ရင်သွားရတော့သည်။

ကျန်ရှိသော ညီအစ်ကိုများမှာလည်း အခြေအနေမကောင်းလှပေ။ တစ်ကိုယ်လုံး သစ်ရွက်များနှင့် ဥခွံများ ပေကျံနေရုံတင်မကဘဲ မှော်ဆရာနှင့် ဆင့်ခေါ်သူဖြစ်ကြသော ဟေးဆန်းနှင့် ဟေးစီတို့မှာ ပို၍ ကံဆိုးလှသည်။ သူတို့သည် တစ်စုံတစ်ဦး ပစ်လိုက်သော ကျောက်ခဲများနှင့် တိုက်ရိုက်ထိမှန်ကာ သွေးချင်းချင်းနီသွားသဖြင့် ရှေးဦးသူနာပြုစုနည်းဖြင့် ဒဏ်ရာကို အသည်းအသန် ပတ်တီးစီးနေရသည်။

"အားလုံးပဲ စိတ်အေးအေးထားကြပါ။ ဒါဟာ တောက်ယဲ့တောင် လက်ဝှေ့ကွင်းဖြစ်လို့ ဘာပစ္စည်းမှ ပစ်ပေါက်ခွင့် မရှိပါဘူး။ နောက်ထပ် ပစ္စည်းတွေ ထပ်ပစ်မယ်ဆိုရင်တော့ ကွင်းထဲကနေ ချက်ချင်း ထွက်ခွာခိုင်းမှာဖြစ်သလို နောင်လာမယ့် ပွဲစဉ်တွေကိုလည်း ကြည့်ရှုခွင့် ပိတ်

ပင်မှာဖြစ်ပါတယ်"

လန်လန်က မတတ်သာသည့်အဆုံး ပြောကြားလိုက်သည်။ ထို့နောက် သနားစဖွယ် အခြေအနေဖြစ်နေသော ဟေးဟုညီအစ်ကိုများကို စာရွက်တစ်ရွက် ကမ်းပေးလိုက်သည်။

"ရှင်တို့ လုပ်ခဲ့သမျှတွေက တောက်ယဲ့တောင် တစ်ခုလုံးမှာ လူသိရှင်ကြား ဖြစ်သွားပြီ။ ဒီနေ့ ကွင်းထဲမှာ ရှိနေသရွေ့တော့ ကျွန်မရဲ့ တာဝန်အရ လူထုရဲ့ အန္တရာယ်ကနေ ကာကွယ်ပေးထားမယ်။ ဒါပေမဲ့ ကွင်းထဲက ထွက်သွားပြီးရင်တော့ ရှင်တို့ အသက်ရှင်မရှင်ဆိုတာ ကျွန်မနဲ့ မဆိုင်တော့ဘူး"

လန်လန်က ဟေးဟုညီအစ်ကိုများကို စက်ဆုပ်ရွံရှာသော မျက်လုံးများဖြင့် အေးစက်စွာ ပြောလိုက်သည်။

မဟာကျိုးနိုင်ငံတော်၏ အဓိကမုဆိုးအင်အားစုကို သတ်ဖြတ်ရန်နှင့် မုဆိုးမြို့တော်၏ အခြေခံအုတ်မြစ်ကို ဖြိုခွဲရန် ကြိုးပမ်းသူများဖြစ်ရာ ဤလေးယောက်မှာ ကွင်းထဲမှ ထွက်သွားလျှင်ပင် မုဆိုးအဖွဲ့အသီးသီး၏ ဒေါသတကြီး တိုက်ခိုက်မှုကို ချက်ချင်း ရင်ဆိုင်ရတော့မည် ဖြစ်သည်။

"ဒါတွေက လုပ်ကြံစွပ်စွဲချက်တွေပဲ။ သေချာတယ်... ဒါ ဟွမ်ထိန်အဖွဲ့က ငါတို့ကို နာမည်ဖျက်ဖို့ ယုတ်မာတာပဲ ဖြစ်ရမယ်"

စာရွက်ပေါ်တွင် ရေးထားသော သူတို့၏ ယုတ်မာမှုများနှင့် အထူးသဖြင့် သူတို့သည် ဟောက်ချင်နိုင်ငံမှ လာသော လူသတ်သမားများဖြစ်သည်ဟူသော ကောလာဟလကို မြင်လိုက်ရသောအခါ ဟေးမိသားစု ညီအစ်ကိုများမှာ မျက်နှာတစ်ခုလုံး ပြာနှမ်းသွားကြတော့သည်။

ဒါက ဘယ်လိုဖြစ်နိုင်မှာလဲ။ သူတို့ရဲ့ တကယ့်အထောက်အထားကို ဘယ်သူက ဖော်ထုတ်လိုက်တာလဲ။

ဟေးမိသားစု ညီအစ်ကိုများသည် ယခုတစ်ကြိမ်တွင် တကယ့်ဒုက္ခနှင့် တွေ့နေပြီဖြစ်ကြောင်း ကောင်းစွာသိလိုက်သည်။ ပြိုင်ပွဲတွင် အနိုင်ရလျှင်ပင် သူတို့၏ အဖွဲ့အစည်းထံမှ အပြင်းအထန် အပြစ်ပေးမှုကို ခံရပေတော့မည်။

"ဖြူစင်တဲ့သူကတော့ သူ့အလိုလို သန့်ရှင်းနေမှာပဲ။ ငါတို့ ဟွမ်ထိန်အဖွဲ့ကတော့ တရားမျှတတဲ့ နည်းလမ်းနဲ့ပဲ အနိုင်ယူမှာပါ"

ဖန်းကုက တည်ငြိမ်အေးစက်သော မျက်နှာထားဖြင့် ပြောလိုက်သည်။ ဖန်းကု၏ ပုံစံကို ကြည့်ရုံဖြင့် ဤယုတ်မာသော အစီအစဉ်မှာ သူ၏လက်ချက်မဟုတ်ကြောင်း ဟေးတာ သိလိုက်သည်။ သို့ဆိုလျှင် ဟေးဟုအဖွဲ့အပေါ် ဤကဲ့သို့ နိမ့်ကျသော နည်းလမ်းကို သုံးခဲ့သူမှာ ဘယ်သူလဲ။

ဘေးတစ်ဖက်တွင်မူ ယွင်ရှန်းမှာ ဤမြင်ကွင်းကို ကြည့်ကာ အလွန်ပင် ကျေနပ်နေတော့သည်။ ဤအရာအားလုံး၏ နောက်ကွယ်မှ ကြိုးကိုင်သူမှာ သူမဖြစ်ကြောင်း မည်သူမျှ ရိပ်မိမည်မဟုတ်ပေ။ ၎င်းတင်မကသေးဘဲ ဟေးမိသားစု ညီအစ်ကိုများအတွက် ပို၍ ရင်ခုန်စိတ်လှုပ်ရှားဖွယ်ရာ အကြောင်းအရာများက စောင့်ကြိုနေသေးသည်။ ယွင်ရှန်းသည် လက်ထဲမှ မှော်

လှံတံကို တင်းကျပ်စွာ ဆုပ်ကိုင်ထားရာ သူမ၏ မှောင်မိုက်မှော်ဝိညာဉ်မှ ထူးဆန်းသော အနက်ရောင် အလင်းတန်းများ ထွက်ပေါ်နေသည်။

တစ်ဖက်တွင်လည်း ပွဲကြည့်စင်၏ မထင်မရှား ထောင့်တစ်နေရာ၌ ဗိုလ်ချုပ်ဘာတူမှာ သွေးအန်မတတ် ဖြစ်နေရရှာသည်။

"အရှင်... အရှင် ဘယ်လိုလုပ် ဒီလိုတွေ လုပ်နိုင်ရတာလဲ။ ဒါဟာ အရှင်နဲ့ ရှင်ကျူတော်ဝင်မိသားစုရဲ့ ဂုဏ်သိက္ခာကို ထိခိုက်စေပါတယ်"

စောစောက ပရိသတ်များ ပစ္စည်းများဖြင့် ပစ်ပေါက်နေစဉ်အတွင်း သူတို့၏ လေးစားအပ်ပါသော တိဖုန်းမင်းသားကြီးသည် သူ၏ သိုလှောင်လက်စွပ်အတွင်းမှ ကျောက်ခဲအပြည့်ပါသော တောင်းတစ်တောင်းကို ထုတ်ကာ အားရပါးရ ဝိုင်းဝန်းပစ်ပေါက်ခဲ့ခြင်း ဖြစ်သည်။ ၎င်းတင်မကဘဲ ကျောက်ခဲများကို ပိုမိုပြင်းထန်စေရန် လေဓာတ်မှော်ပညာကိုပါ ထည့်သွင်း အသုံးပြုခဲ့သေးသည်။

"စကားများမနေနဲ့တော့။ ပြိုင်ပွဲ စတော့မယ်"

တိဖုန်းက စိတ်မရှည်စွာ ပြောကာ သူပစ်ဖို့ အချိန်မရလိုက်သော ခရမ်းချဉ်သီးတစ်လုံးကို ဗိုလ်ချုပ်ဘာတူ၏ ပါးစပ်ထဲသို့ ထိုးထည့်လိုက်ပြီး ပြိုင်ပွဲကို စိတ်ဝင်တစား စောင့်ကြည့်နေတော့သည်။ လူတိုင်း ပစ္စည်းများဖြင့် ဝိုင်းပစ်နေစဉ် ထိုမိန်းကလေးငယ်၏ မျက်နှာပေါ်မှ နတ်ဆိုးလေးတစ်ဦးကဲ့သို့ အပြုံးကို သူ သတိပြုမိလိုက်သည်။

ထိုမိန်းကလေးမှာ တကယ်ကို သူ့နှလုံးသားကို ဖမ်းစားနိုင်လွန်းလှသည်။