အခန်း (၁၆၄)

အဆင့် B မုဆိုးအဖွဲ့ အရည်အချင်းစစ်ပြိုင်ပွဲ စတင်လေပြီ။

ဟွမ်ထိန်အဖွဲ့မှ မူနန်ယန့်၏ မှော်လှံတံက စတင်လင်းလက်လာသည်။ မူနန်ယန့်သည် မြေဓာတ်မှော်ပညာတွင် ကျွမ်းကျင်သူဖြစ်ပြီး သူမ၏ လှံတံတွင် သက်တမ်း ၁၀ နှစ်၊ ၅၀ နှစ်နှင့် ၁၀၀ နှစ်ရှိသော မြေဓာတ်ဝိညာဉ်ကျောက်သုံးလုံးကို စီခြယ်ထားသည်။ ဤကဲ့သို့ စီစဉ်ထားခြင်းမှာ သူမ၏ တည်ငြိမ်အေးဆေးသော စရိုက်ကို ဖော်ပြနေခြင်းပင်။ မြေဓာတ်မှော်ပညာသည် မောက်မာခြင်းမရှိဘဲ ခိုင်မာမှုကို အခြေခံ၍ တိုးတက်မှုကို ရှာဖွေသည်။

မြေဝါရောင် အလင်းတန်းတစ်ခုသည် အဖွဲ့သားလေးဦးလုံးကို လွှမ်းခြုံသွားသည်။ ၎င်းမှာ အလတ်စား မြေဓာတ်မှော်ပညာဖြစ်သော ကမ္ဘာမြေအကာအကွယ်ပင်။ ဤမှော်ပညာ၏ အကျိုးသက်ရောက်မှုကြောင့် အဖွဲ့သားသုံးဦး၏ ခုခံနိုင်စွမ်းမှာ ၃၀ ရာခိုင်နှုန်း တိုးတက်သွားပြီး မူနန်ယန့်ကိုယ်တိုင်မှာမူ ၂၀ ရာခိုင်နှုန်း တိုးတက်သွားသည်။ ယွင်ရှန်းသည် သူမ၏ ခန္ဓာကိုယ်အတွင်းသို့ အင်အားအသစ်များ စီးဝင်လာသကဲ့သို့ ခံစားလိုက်ရပြီး ခြေလက်များမှာလည်း သိသိသာသာ သန်မာလာခဲ့သည်။

ဟေးဟုအဖွဲ့မှ မှော်ဆရာ ဟေးဆန်းကလည်း အရှုံးမပေးပေ။ သူသည် မှော်လှံတံကို မြှောက်ကာ ဂါထာမန္တန်များ ရွတ်ဖတ်လိုက်ရာ စိမ်းဖန့်ဖန့် လေဓာတ်အလင်းတန်းများမှာ ဟေးညီအစ်ကို လေးဦးအပေါ်သို့ ကျရောက်သွားသည်။ ဟေးဆန်းမှာ လေဓာတ်မှော်ဆရာဖြစ်ပြီး သူက တစ်ဖွဲ့လုံး၏ လျင်မြန်ဖြတ်လတ်မှုကို ၃၀ ရာခိုင်နှုန်း တိုးမြှင့်ပေးရန် ရွေးချယ်လိုက်ခြင်း ဖြစ်သည်။

ဤသည်မှာ ယွင်ရှန်းအတွက် ပထမဆုံးအကြိမ် အဖွဲ့လိုက်တိုက်ပွဲတွင် ပါဝင်ခြင်းဖြစ်သည်။ ခေါင်းဆောင်ဖန်းကု၏ မူလစီမံကိန်းအရ တိုက်ခိုက်ရေးသမားများဖြစ်ကြသော သူနှင့် ဝမ်ရန်ရွှီတို့သည် အဓိကအဖွဲ့မှ ခွဲထွက်သွားခြင်းမရှိဘဲ ယွင်ရှန်းနှင့် မူနန်ယန့်တို့ကို အစွမ်းကုန် ကာကွယ်ပေးရမည် ဖြစ်သည်။

"သတ်ကြစမ်း"

နှစ်ဖက်စလုံးမှာ တိုက်ခိုက်လိုစိတ်များ ပြင်းထန်နေကြပြီး ပြိုင်ပွဲစတင်ချိန်က ဒိုင်လူကြီး လန်

လန် ပေးခဲ့သော အသက်အန္တရာယ်မစိုးရိမ်ရစေရန် ထိန်းသိမ်းတိုက်ခိုက်ရန် ဟူသော သတိပေးချက်ကို အစောကြီးကတည်းက မေ့လျော့နေကြပြီဖြစ်သည်။

ဟေးတာက အရင်ဆုံး စတင်တိုက်ခိုက်လိုက်သည်။ သူ၏ လက်သီးများမှ ပြင်းထန်သော တိုက်ပွဲစွမ်းအင်များ ပေါက်ကွဲထွက်လာပြီး လေထဲသို့ လက်သီးချက်ပေါင်းများစွာ ထိုးနှက်လိုက်ရာ ထူးဆန်းစွာပင် နောက်ကွယ်မှ အရိပ်ယောင်များပါ လိုက်ပါလာသည်။ ထိုအရိပ်များမှာ အမြင်အာရုံကို လှည့်စားခြင်းသာ ဖြစ်သော်လည်း လက်သီးချက်တိုင်းတွင် ဟွမ်ထိန်အဖွဲ့ကို ဦးတည်ထားသော သေစေနိုင်သည့် ရည်ရွယ်ချက်များ အပြည့်ပါဝင်နေသည်။

ပွဲစသည်နှင့် တစ်ပြိုင်နက် ဟေးတာသည် သူ၏ အထူးတိုက်ကွက်ဖြစ်သော ကောင်းကင်လွှမ်း လက်သီးမိုးကို ထုတ်သုံးလိုက်သည်။

ဟေးတာသည် ကြည့်ရသည်မှာ စိတ်မြန်လက်မြန် ရှိပုံရသော်လည်း လက်တွေ့တွင်မူ အလွန်စေ့စပ်သူဖြစ်သည်။ သူသည် ဟေးဟုအဖွဲ့၏ ခေါင်းဆောင်တစ်ဦးအနေဖြင့် မိမိနှင့် အစွမ်းချင်း မတိမ်းမယိမ်းရှိသော ဟွမ်ထိန်အဖွဲ့ကို ရင်ဆိုင်ရာတွင် ဦးအောင်တိုက်ခိုက်ရန်လိုအပ်ကြောင်း ကောင်းစွာနားလည်ထားသည်။

သူ ပစ်လွှတ်လိုက်သော အရိပ်လက်သီးချက်များသည် လမ်းကြောင်းမရှိသယောင် ထင်ရသော်လည်း အမှန်စင်စစ်တွင်မူ မူနန်ယန့် နှင့် ယွင်ရှန်း တို့ကို ပစ်မှတ်ထားခြင်းဖြစ်သည်။ အဖွဲ့သားလေးဦးအနက် မှော်ဆရာနှင့် ဆင့်ခေါ်သူဖြစ်ကြသော ထိုနှစ်ဦးမှာ ခုခံမှုအနည်းဆုံး ဖြစ်ရမည်ဟု သူတွေးထင်ထားခဲ့သည်။

သို့သော် သူသည် မူနန်ယန့်နှင့် ယွင်ရှန်းတို့၏ အရည်အချင်းကို အထင်သေးမိသွားသည်။

မူနန်ယန့်သည် ခုခံမှုမြှင့်တင်ပေးသည့် မှော်ပညာကို အသုံးပြုထားရုံတင်မကဘဲ သူမ၏အောက်ခြေတွင် မြေကမ္ဘာရွှံ့နွံမှော်ပညာကိုပါ လျင်မြန်စွာ ခင်းကျင်းလိုက်သည်။ ဟေးတာ၏ ခြေထောက်များသည် ရုတ်တရက် နစ်ဝင်သွားပြီး ရွှံ့နွံများကြားတွင် ပိတ်မိသွားတော့သည်။

ဖန်းကုသည် သူ၏သန်မာလှသော ခြေထောက်များကို ဘေးတိုက်လှည့်ယမ်းကာ လေတိုးသံများနှင့်အတူ အရိပ်လက်သီးချက်များကို ပိတ်ဆို့လိုက်သည်။ ထို့နောက် လက်နှစ်ဖက်ဖြင့် ယွင်ရှန်းကို သူ၏ပုခုံးပေါ်သို့ အမြန်မတင်ပေးလိုက်သည်။

ဖန်းကု၏ ပျာပျာသလဲ ကာကွယ်ပေးမှုကို မြင်သောအခါ ဟေးတာက မထီမဲ့မြင် ပြုံးလိုက်

သည်။ သူသည် ဟိန်းဟောက်လိုက်ကာ အားယူလှမ်းလိုက်ရာ ရွှံ့နွံထဲမှ ပြန်လည်

လွတ်မြောက်လာခဲ့သည်။ တစ်ဆက်တည်းမှာပင် ဟေးဆန်းက သူ၏မှော်လှံတံမှ လေဓားစက်အတန်းလိုက်ကို ပစ်ခတ်၍ အားဖြည့်ကူညီလိုက်သည်။

ဟေးဟုအဖွဲ့သည် ဟွမ်ထိန်အဖွဲ့၏ တိုက်ခိုက်ပုံကို အသေအချာ လေ့လာထားပြီးဖြစ်သည်။ အစောပိုင်းပွဲများတွင် ယွင်ရှန်းက တစ်ချက်မျှ မလှုပ်ရှားခဲ့သဖြင့် ဟွမ်ထိန်အဖွဲ့၏ ဆင့်ခေါ်သူသည် အကြီးမားဆုံးသော အားနည်းချက်ဖြစ်သည်ဟု သူတို့ တွက်ဆထားကြသည်။

"ခေါင်းဆောင်... သတိထား"

ဝမ်ရန်ရွှီက ကျယ်လောင်စွာ အော်ဟစ်လိုက်ရင်း သူ၏ခါးဆီသို့ လက်လှမ်းလိုက်သည်။

ထိုစဉ်မှာပင် ယွင်ရှန်းသည် ဝမ်ရန်ရွှီ၏ ခါးတွင်ချိတ်ထားသော ဓားကို သတိပြုမိလိုက်သည်။ ဝမ်ရန်ရွှီသည် ဓားကို ဆွဲထုတ်လိုက်ကာ တိုးဝင်လာသော ဟေးအာကို တားဆီးရန် ဓားကွက်များ ဖော်ထုတ်လိုက်တော့သည်။

ဟေးတာနှင့် ဟေးဆန်းတို့ နှစ်ဦးလုံးသည် ဖန်းကုကို ဝိုင်းဝန်းတိုက်ခိုက်နေကြသည်။ ဖန်းကုသည် ယွင်ရှန်းကို ပုခုံးပေါ်တင်၍ ကာကွယ်ပေးနေရသဖြင့် ဟေးတာ၏ ပြင်းထန်သော ထိုးနှက်ချက်များကို ပြန်လည်ခုခံရန် အတော်လေး ရုန်းကန်နေရတော့သည်။

ပထမပွဲစဉ် သုံးပွဲတွင် ဖန်းကုသည် ယွင်ရှန်းကို ဘေးကင်းအောင် ကာကွယ်နိုင်ခဲ့သော်လည်း ယခုအခါ မိမိနှင့် အစွမ်းချင်း တူညီလုနီးပါးရှိသော ဟေးတာနှင့် ဟေးဆန်း၏ ထူးဆန်းသော လေဓားစက်များကြားတွင် ဖန်းကုမှာ သိသိသာသာ အားအင်ကုန်ခမ်းလာခဲ့သည်။

ထိုစဉ် လှည့်ဖြားတိုက်ခိုက်လိုက်သော လေဓားစက်တစ်ခုသည် ဖန်းကု၏ ပုခုံးဆီသို့ ဦးတည်ဝင်ရောက်လာသည်။ ဖန်းကုအနေဖြင့် ရှောင်တိမ်းနိုင်သော်လည်း သူရှောင်လိုက်ပါက သူ၏ပုခုံးပေါ်ရှိ ယွင်ရှန်းမှာ သေချာပေါက် အန္တရာယ်ကြုံရပေတော့မည်။ ဖန်းကုသည် မျက်မှောင်ကြုတ်လိုက်သော်လည်း နောက်သို့မဆုတ်ရဲပေ။ သူ နောက်မဆုတ်ပါက ထိုတိုက်ခိုက်မှုကို မိမိ၏ သွေးသားခန္ဓာကိုယ်ဖြင့်သာ တိုက်ရိုက်ခုခံရပေတော့မည်။

သူ့ပုခုံးပေါ်ရှိ ယွင်ရှန်းသည် ဖန်းကုမှာ မိမိအတွက် အနစ်နာခံကာ ကာကွယ်ပေးနေခြင်းဖြစ်ကြောင်း သိမြင်ကာ စိတ်လှုပ်ရှားသွားရသည်။ ယွင်ရှန်းသည် သူမ၏ မှော်လှံတံအမြီးပိုင်းဖြင့် ဖန်းကု၏ ပုခုံးပေါ်ရှိ ချီအပ်စိုက်မှတ်ကို သာသာလေး လှမ်းထိုးလိုက်သည်။

ယွင်ရှန်း၏ ရုတ်တရက် လှုပ်ရှားမှုကြောင့် ဖန်းကုမှာ အံ့အားသင့်သွားပြီး ပုခုံးပေါ်တွင် ပုရွက်ဆိတ်ကိုက်သကဲ့သို့ စူးခနဲ နာကျင်သွားကာ မတတ်သာဘဲ ကိုယ်ကို အောက်သို့ အနည်းငယ် ငုံ့ချလိုက်ရသည်။ ထိုအချိန်တွင်ပင် ယွင်ရှန်းသည် ပျံလွှားငှက်တစ်ကောင်ကဲ့သို့ ကျော့ရှင်းစွာ ခုန်ဆင်းလိုက်ပြီး အရှိန်ဖြင့် ဝင်လာသော လေဓားစက်ကို ကျွမ်းကျင်စွာ ရှောင်တိမ်းလိုက်လေသည်။

သို့သော်လည်း ယွင်ရှန်းသည် တစ်စုံတစ်ခု လွဲမှားနေကြောင်း ချက်ချင်း သိလိုက်ရသည်။ ဟေးဆန်း၏ လေဓားစက်မှာ ပစ်မှတ်လွဲသွားပြီးနောက် လေထဲတွင် ပျောက်ကွယ်သွားခြင်းမရှိဘဲ ခဏတာ ရပ်တန့်သွားကာ နောက်သို့ပြန်လှည့်လာပြီး ဖန်းကု၏ ပုခုံးကို ထိမှန်သွားခဲ့သည်။ ဖန်းကု၏ ပုခုံးမှ သွေးများ ပန်းထွက်လာတော့သည်။

ဟေးဆန်းမှာ အလွန်ပင် ပရိယာယ်ကြွယ်ဝလှသည်။ သူအသုံးပြုလိုက်သည်မှာ အခြေခံလေဓားစက် မဟုတ်ဘဲ အခြေခံမှော်ပညာအဖြစ် ရုပ်ဖျက်ထားသော အလတ်စားအဆင့် လေခြိမ်းတံစဉ်ဖြစ်နေသည်။ ဤတံစဉ်သည် လေဓားစက်နှင့် ပုံစံတူသော်လည်း လေထဲမှ ပြန်လှည့်လာကာ ပိုမိုပြင်းထန်သော အားဖြင့် တိုက်ခိုက်နိုင်စွမ်းရှိသည်။

စောစောက ယွင်ရှန်းသာ အချိန်မီ ခုန်မဆင်းနိုင်ခဲ့ပါက သူမသည် ခန္ဓာကိုယ် နှစ်ပိုင်းပြတ်သွားနိုင်ပေသည်။ ပုခုံးတွင် ဒဏ်ရာရသွားသဖြင့် ဖန်းကု၏ ချီစွမ်းအင်များ အားနည်းသွားကာ သူ၏ တုံ့ပြန်တိုက်စစ်မှာလည်း သိသိသာသာ နှေးကွေးသွားခဲ့သည်။

"ခေါင်းဆောင်... ကျွန်တော့်ကို လွှတ်ထားလိုက်ပါ"

ဝမ်ရန်ရွှီသည် သူ၏ တိုက်ခိုက်လိုစိတ်ကို ဓားအတွင်းသို့ စုစည်းလိုက်ရာ ဓားသွားမှာ လက်မအနည်းငယ် ပိုမိုရှည်ထွက်လာပြီး ရေတွက်မရနိုင်သော ဓားအလင်းတန်းများအဖြစ် ပြောင်းလဲသွားသည်။ ထိုဓားအလင်းတန်းများသည် ဟေးအာကို ဝန်းရံသွားပြီး အချက်အချာကျသော အင်္ဂါရပ်များကို ပစ်မှတ်ထားသဖြင့် ဟေးအာမှာ နောက်သို့ ခြေလှမ်းအတော်များများ ဆုတ်ခွာသွားရလေတော့သည်။

မူနန်ယန့်သည်လည်း မြေကမ္ဘာဆူးချွန်မှော်ဂါထာကို စတင်ရွတ်ဖတ်လိုက်ရာ မြေပြင်မှ မြေဆူးများစွာ ရုတ်တရက် ထိုးထွက်လာပြီး ရန်သူ၏ ခြေလှမ်းများကို နှောင့်ယှက်လိုက်သည်။

ဖန်းကုသည် သူ၏ တိုက်ပွဲစွမ်းအင်များကို စုစည်းကာ အရေးကြီးသော သွေးကြောမှတ်များကို ကာကွယ်ရင်း တိုက်ပွဲအခြေအနေကို အကဲခတ်နေသည်။ ထိုစဉ် သူ တစ်စုံတစ်ခု လွဲမှားနေကြောင်း ရိပ်မိလိုက်သည်။ ပြိုင်ပွဲစတင်ကတည်းက ဟေးဟုအဖွဲ့မှ တစ်ဦးမှာ လုံးဝ လှုပ်ရှားခြင်း မရှိသေးပေ။

ထိုသူမှာ ဆင့်ခေါ်သူပင်။ သူသည် အခုထက်ထိ ဘာကိုမှ ဆင့်ခေါ်ခြင်း မပြုသေးပေ။

ယွင်ရှန်းသည် ပွဲစကတည်းက မဲမဲလေးကို သူမ၏ ဆင့်ခေါ်သားရဲအဖြစ် ထုတ်ပြထားသော်လည်း ဟေးစီ၏ ဆင့်ခေါ်သားရဲမှာမူ တောကျားအဖွဲ့နှင့် ယှဉ်ပြိုင်စဉ်ကပင် ယခုအထိ ပုံရိပ်အစစ်အမှန်ကို ထုတ်မပြသေးပေ။ ဖန်းကု၏ စိတ်ထဲတွင် မကောင်းသော အတိတ်နိမိတ်တစ်ခု စတင်ခံစားလာရသည်။

"ဝုန်း"

ပြင်းထန်သော ပေါက်ကွဲသံတစ်ခုနှင့်အတူ မူနန်ယန့်ရှိရာ အရပ်မှ အော်ဟစ်သံတစ်ခု ထွက်ပေါ်လာသည်။ သူမ၏ ခုခံမှုမှော်ပညာမှာ ရိုက်ခတ်မှုဒဏ်ကြောင့် တစ်စက္ကန့်အတွင်း ပျက်စီးသွားခဲ့ရသည်။

ချပ်ဝတ်ခွဲ သားရဲတစ်ကောင်သည် မြေပြင်အောက်မှ ရုတ်တရက် ထိုးထွက်လာပြီး မူနန်ယန့်၏ ခုခံမှုကို ဖျက်ဆီးပစ်လိုက်ခြင်းပင်။ ၎င်းမှာ အဆင့် ၄ ရှိသော သားရဲဖြစ်ပြီး သက်တမ်းမှာ ၇၀ မှ ၈၀ အတွင်း ရှိပုံရသည်။ ခန္ဓာကိုယ်မှာ သန်မာထွားကျိုင်းကာ ပေါင် ၁၀၀ ကျော် အလေးချိန်ရှိသည်။ ပုံစံမှာ သင်းခွေချပ်နှင့် ဆင်တူပြီး တစ်ကိုယ်လုံးတွင် ထူထဲသော ချပ်ဝတ်ပြားများ ဖုံးလွှမ်းထားကာ ထက်မြက်သော လက်သည်းများနှင့် သွားများမှာ မူနန်ယန့်၏ လည်ပင်းဆီသို့ ဖိကပ်ထားလေပြီ။

မူနန်ယန့်မှာ သူမ၏ မှော်လှံတံကို အသုံးပြု၍ အသည်းအသန် ခုခံနေရရှာသည်။ မူနန်ယန့် အန္တရာယ်ကြုံနေသည်ကို မြင်သောအခါ ဝမ်ရန်ရွှီ၏ မျက်နှာမှာ ပျာယာခတ်သွားပြီး သူ၏ ဓားကွက်များမှာလည်း စည်းချက်ပျက်ကုန်တော့သည်။

"နန်ယန့်ကို သွားကယ်လိုက်"

ဖန်းကုသည် အသက်ကို လုရှူရင်း သွေးချင်းချင်းနီနေသော ပုခုံးဒဏ်ရာကို ဂရုမစိုက်ဘဲ မှော်လှံတံကို မြှောက်ကာ ဂါထာစတင်ရွတ်ဖတ်တော့သည်။ '

မှော်နှင့် တိုက်ခိုက်ရေး ပူးတွဲကျင့်ကြံသူဖြစ်သည့်အတိုင်း ဖန်းကုသည် အင်အားကြီးသော ရန်သူနှင့် ဒဏ်ရာရထားသော ခန္ဓာကိုယ်ရှိသော်လည်း တည်ငြိမ်စွာဖြင့် မှော်ပညာကို ထုတ်ဖော်နေဆဲပင်။

"ငတုံးတွေ... ဟေးစီ အဲဒီကောင်မလေးကို အရင်သတ်ပစ်စမ်း"

ဟေးတာက ရက်စက်စွာ လှောင်ပြောင်လိုက်ပြီး ဟေးဆန်းနှင့်အတူ ဖန်းကုနှင့် ဝမ်ရန်ရွှီတို့ကို မလှုပ်နိုင်အောင် ဝိုင်းဝန်းတိုက်ခိုက်လိုက်ကြသည်။

ယွင်ရှန်းကိုမူ မည်သူကမျှ အာရုံမစိုက်မိကြပေ။

"ငါ့အချစ်လေး... သူတို့ကို သွေးအရသာ မြည်းခိုင်းလိုက်စမ်း။ အဲဒီ မှော်ဆရာမကို အရင်

သတ်ပစ်"

ဟေးစီသည် အသည်းအသန် ခုခံနေသော မူနန်ယန့်ကို ကြည့်ကာ အေးစက်စွာ အမိန့်ပေးလိုက်သည်။

"ရှင် တစ်ဖက်လူကို မသတ်ခင်မှာ... ကိုယ့်အသက်ကိုယ် အရင် စိတ်ချရမရ သေချာအောင် လုပ်သင့်တယ် မဟုတ်ဘူးလား"

ဟေးစီသည် ကျောရိုးထဲအထိ စိမ့်သွားသော အအေးဓာတ်ကို ခံစားလိုက်ရပြီး လှည့်ကြည့်

လိုက်ရာ ဟွမ်ထိန်အဖွဲ့၏ ဆင့်ခေါ်သူမလေးမှာ သူ၏ ဘေးနားတွင် တစ္ဆေတစ်ကောင်ကဲ့သို့ ဘယ်လိုရောက်လာသည်မသိ ရောက်ရှိနေသည်ကို တွေ့လိုက်ရသည်။

နက်မှောင်သော ဆံပင်နှင့် မျက်ဝန်းအစုံရှိသည့် ထိုမိန်းကလေးငယ်၏ နှုတ်ခမ်းထောင့်တွင် ချိုသာသော အပြုံးတစ်ခု ရှိနေလေသည်။