အထူးဆု

နောက်ဆုံးဗိုလ်လုပွဲ ဖျော်ဖြေမှုအားလုံး ပြီးဆုံးသွားသောအခါ ဒိုင်လူကြီးများသည် ငါးမိနစ်ခန့် ဆွေးနွေးကြပြီး ထိပ်သီးဆုရှင် သုံးဦးကို ဆုံးဖြတ်လိုက်ကြသည်။

တန်ယန်သည် သူမ၏ဖျော်ဖြေမှု အပြီးတွင် ပရိသတ်များကြားတွင် ဝင်ထိုင်လိုက်သည်။ သူမ၏ ဘယ်ဘက်တွင် ယွီချန်းနျန် ထိုင်နေပြီး ညာဘက်တွင်မူ ချင်းယွီရုံ ထိုင်နေသည်။ တိုက်ရိုက် ထုတ်လွှင့်မှုအတွင်း ကင်မရာသည် သူမရှိရာသို့ ခဏခဏ ဖြတ်ကူးပြသနေပြီး သူမ၏အလှမှာ အမှန်တကယ်ပင် ရင်သပ်ရှုမောဖွယ် ထင်ရှားလွန်းလှသည်။ နိုင်ငံခြားသား အများစုမှာ တရုတ်လူမျိုး အချင်းချင်း ခွဲခြားရန် ခက်ခဲနေတတ်သည့် ခေတ်ကာလတွင်ပင် သူမ၏အလှမှာ မေ့မရနိုင်လောက်အောင် စွဲမက်ဖွယ် ကောင်းနေတော့သည်။

မကြာမီတွင် အခမ်းအနားမှူးသည် စင်ပေါ်သို့ တက်လာကာ စကားအနည်းငယ် ပြောကြားပြီးနောက် ဂုဏ်ထူးဆောင် ဆရာကြီးဘီလ်ကို စင်ပေါ်သို့တက်၍ မိန့်ခွန်းပြောကြားရန်နှင့် ပြိုင်ပွဲရလဒ်များကို ကြေညာပေးရန် ဖိတ်ကြားလိုက်သည်။

ဆုများကို အနိမ့်ဆုံးအဆင့်မှ အမြင့်ဆုံးအဆင့်သို့ အစဉ်လိုက် ပေးအပ်ခဲ့သည်။ ကြေးတံဆိပ်ဆုကို D နိုင်ငံမှ လီယွန်က ရရှိသွားပြီး ငွေတံဆိပ်ဆုကိုမူ E နိုင်ငံမှ ဆံပင်ရွှေရောင်၊ မျက်လုံးပြာနှင့် ချောမောသော လူငယ်လေး ဒန်နီရယ်က ရရှိသွားပါသည်။

【နောက်တစ်ခုကတော့ ရွှေတံဆိပ်ပဲ၊ သမိုင်းဝင် အခိုက်အတန့်ကို သက်သေထူရတော့မယ့် အချိန်ရောက်ပြီ】

【မမယန်ကတော့ အလန်းဆုံးပဲ】

【ငါပဲ အတွေးလွန်နေတာလား၊ တကယ်လို့ သူဆုမရခဲ့ရင် ဘယ်လိုလုပ်မလဲ】

【အပေါ်ကလူ... ဒီလောက်အထိ ရိုးအေးနေတာက ကိုယ့်ကိုယ်ကိုယ် ယုံကြည်မှုမရှိတဲ့ လက္ခဏာပဲ။ မမယန်ရဲ့ ပါရမီမျိုးနဲ့ ဆုမရဘူးဆိုတာ ဖြစ်နိုင်တယ်လို့ မင်းထင်လို့လား】

【တော်ကြတော့၊ ဆရာကြီးဘီလ်က အဖြေကို ကြေညာတော့မယ်】

"ရွှေတံဆိပ်ရှင်က ဘယ်သူဖြစ်မလဲဆိုတာကို လူတိုင်းသိချင်နေကြပြီ မဟုတ်လား"

ဟု ဆရာကြီးဘီလ်က ပြုံးလျက် မေးလိုက်သည်။ စင်အောက်ရှိ ပရိသတ်များထံမှလည်း ရယ်မောသံများ ထွက်ပေါ်လာသည်။

"ကဲ... အခု ဆက်လက်ပြီး ဒီနှစ်ရဲ့ ရှိုပန်ပီယာနိုပြိုင်ပွဲ ရွှေတံဆိပ်ဆုကို ပေးအပ်သွားပါတော့မယ်။ ဆုရရှိသူကတော့ C နိုင်ငံက တန်ယန်ပဲ ဖြစ်ပါတယ်။ သူမကို ဂုဏ်ပြုပေးကြပါဦး"

ဆရာကြီးဘီလ် ပြောကြားပြီးနောက် တန်ယန်သည် မတ်တတ်ရပ်ကာ စင်ပေါ်သို့ လျှောက်လှမ်းသွားခဲ့သည်။ သူမသည် လုပ်ထုံးလုပ်နည်းအတိုင်း ဆုဖလားကို လက်ခံရယူပြီး ကျေးဇူးတင်စကား ပြောကြားခဲ့သည်။

သူမကတော့ ဤမျှနှင့် ပြီးဆုံးပြီဟု ထင်မှတ်ထားသော်လည်း သူမအတွက် အခြားသော အံ့သြစရာတစ်ခုက စောင့်ကြိုနေသည်ကို မသိရှိခဲ့ပေ။

ဆရာကြီးဘီလ်သည် မိုက်ကရိုဖုန်းကို တစ်ဖန် ပြန်ကိုင်လိုက်ပြီး

"ဒီနေ့ဟာ သမိုင်းဝင် အခိုက်အတန့် တစ်ခုပါပဲ။ 'အထူးဆု'ကို နောက်ဆုံး ပေးအပ်ခဲ့တာ လွန်ခဲ့တဲ့ အနှစ် ၄၀ ကပါ။ ပွင့်ပွင့်လင်းလင်း ပြောရရင် ဒီဆုရှိသေးတာတောင် ကျွန်တော် မေ့လုနီးပါး ဖြစ်နေပါပြီ။"

ဟု ဆရာကြီးက နောက်ပြောင်ပြောဆိုရင်း ဆက်လက်၍

"အခုဆက်လက်ပြီး ဒီနှစ် ရှိုပန်ပီယာနိုပြိုင်ပွဲရဲ့ အထူးဆုကို တန်ယန်အား ပေးအပ် ချီးမြှင့်ရတဲ့အတွက် ကျွန်တော် ဂုဏ်ယူမိပါတယ်။ Cနိုင်ငံတော်က ဒီမိန်းကလေးကို မှတ်ထားပေးကြပါ၊ သူမဟာ ကျွန်တော် မြင်ဖူးသမျှထဲမှာ ပါရမီအရှိဆုံး ပီယာနိုပညာရှင်ပါပဲ"

ဝိုး၊ ပွဲကြည့်စင်ပေါ်က ပရိသတ်တွေရော တိုက်ရိုက်ထုတ်လွှင့်မှုကို ကြည့်နေကြသည့် သူတွေပါ အားလုံး မှင်တက်သွားကြပါသည်။ ဒါဟာ အထူးဆုဖြစ်ပြီး ဆရာကြီးဘီလ်ဆီကတောင် ဒီလောက်အထိ ချီးမွမ်းခန်း ဖွင့်သည်ကို ခံလိုက်ရခြင်း ဖြစ်ပါသည်။

ရှိုပန်ပီယာနိုပြိုင်ပွဲကို ရှစ်ကြိမ်တိုင်တိုင် ကျင်းပခဲ့သည့် ပြီးခဲ့သော နှစ်ပေါင်း ၄၀ နီးပါး ကာလအတွင်းမှာ ဒီဆုကို တစ်ခါမှ ပေးအပ်ခဲ့ခြင်း မရှိချေ။ ပြိုင်ပွဲသမိုင်း တစ်လျှောက်မှာလည်း ဒီဆုကိုရရှိခဲ့သူ ၁၀ ဦးတောင် မပြည့်ခဲ့သလို၊ ဆုရရှိသူ အားလုံးဟာ အနောက်အာရှက လူတွေချည်းသာ ဖြစ်ခဲ့ပါသည်။ သို့သော်လည်း ဒီနေ့မှာတော့ Cနိုင်ငံတော်က အသက် ၁၇ နှစ်အရွယ် မိန်းကလေး တစ်ယောက်က ဤကဲ့သို့ ဂုဏ်ထူးဆောင် ဆုမျိုးကို ရရှိသွားခဲ့ပါသည်။ ဤသည်မှာ အံ့ဩစရာ ကိစ္စရပ်ဖြစ်သည်။

တန်ယန်၏ အေးဆေး တည်ငြိမ်နေသော မျက်နှာအမူအရာလေးဟာ အနည်းငယ် ပျက်ယွင်းသွားခဲ့ပါသည်။ သူမရဲ့အရည်အချင်းဟာ အထူးဆုရဖို့ ထိုက်တန်သည်ဆိုတာ သူမကိုယ်တိုင် သိထားပေမဲ့ တကယ်လက်တွေ့ ရရှိလာလိမ့်မည်ဟု တစ်ခါမှ မတွေးခဲ့မိပေ။

အဘယ်ကြောင့်ဆိုသော် ဒီဆုကိုရရှိဖို့အတွက် သတ်မှတ်ထားသောစံနှုန်းတွေက ဘယ်လောက်အထိ မြင့်မားသည်ကို သူမသိနေခြင်းကြောင့် ဖြစ်သည်။ ယခင်က C နိုင်ငံတော်မှဖြစ်ဖြစ်၊ အရှေ့အာရှမှဖြစ်ဖြစ် မည်သူမှ ဒီဆုကို မရရှိခဲ့ဖူးပါ။ အခု ပွဲစီစဉ်သူတွေက သူမကို ဒီဆု ချီးမြှင့်လိုက်သည်မှာ တကယ်ကို မထင်မှတ်ထားသည့် အံ့သြစရာဖြစ်သလို ဝမ်းသာစရာလည်း ကောင်းလှပါသည်။

ဒါပေမဲ့ သူမမှာ ဒီဆုကို လက်ခံရယူနိုင်သော အရည်အချင်း အပြည့်အဝ ရှိနေတာတော့ အမှန်ပင်ဖြစ်သည်။ ဒိုင်လူကြီးတွေ ဘာပဲတွေးတွေး၊ အကျိုးခံစားခွင့် ရရှိသူက သူမသာဖြစ်သည် မဟုတ်ပါလော။

ရင်ခုန်သံတွေကို ပြန်လည် ထိန်းချုပ်ပြီးနောက် တန်ယန်ဟာ မတ်တတ်ရပ်ကာ စင်ပေါ်သို့ လျှောက်လှမ်းသွားပြီး ဆရာကြီးဘီလ်ဆီမှ အထူးဆုဖလားကို လက်ခံရယူလိုက်ပါသည်။ ထိုအချိန်မှာပဲ စင်မြင့်ထက်မှာ မီးရှူးမီးပန်းတွေ ဝေဝေဆာဆာ ကျလာသည်ကသူမကို ဝိုင်းဝန်း ဂုဏ်ပြုပေးနေသလိုပင် ဖြစ်နေပါတော့သည်။

တန်ယန်သည် ရွှေရောင်ဆုဖလားကြီးကို ကိုင်ဆောင်ပြီး ဆရာကြီးဘီလ်ရဲ့ဘေးမှာ ချိုချိုသာသာ ပြုံးပြလျက် ရပ်နေပါသည်။ မီဒီယာပေါင်းစုံကလည်း ဒီထူးခြားတဲ့ အခိုက်အတန့်ကို မှတ်တမ်းတင်ဖို့ ကင်မရာတွေကို အဆက်မပြတ် နှိပ်နေကြပါသည်။

ပရိသတ်များ၏ ဟိန်းထွက်နေသော အားပေးသံတွေကြားမှာ တန်ယန်ဟာ စင်အောက်မှာရှိနေသည့် ယွီချန်းနျန်ဆီကို လှမ်းကြည့်လိုက်ပါသည်။ သူကတော့ ကျေနပ်အားရစွာနှင့် ပြုံးနေပေမဲ့ သူ့မျက်ဝန်းထဲတွင် စို့နေသော မျက်ရည်တွေကတော့ သူ့ရဲ့ရင်ထဲက စိတ်လှုပ်ရှားမှုကို သက်သေပြနေပါသည်။

【ငါ့မှာ ပညာနဲ့ ယဉ်ကျေးမှု ဗဟုသုတ နည်းပါးတာကို ခွင့်လွှတ်ပါ၊ ဒီအချိန်မှာတော့ ငါ့ရဲ့ စိတ်လှုပ်ရှားမှုကို "တကယ့်ကို အမိုက်စားပဲ" ဆိုတဲ့ စကားတစ်ခွန်းတည်းနဲ့ပဲ ဖော်ပြနိုင်တော့တယ်】

【C နိုင်ငံတော်ကတော့ ထိပ်ဆုံးကို ရောက်သွားပြီ၊ ရှိုပန်အထူးဆုကို ရရှိတဲ့ သမိုင်းတစ်လျှောက် ပထမဆုံးလူသားပဲ၊ တကယ်ဂုဏ်ယူတယ်】

【အစကတော့ သူ့ရုပ်လေးကိုကြည့်ပြီး အားပေးခဲ့တာ၊ အခုတော့ တကယ်ကို စိတ်လှုပ်ရှားလွန်းလို့ ငိုတောင်ငိုမိတယ်】

【+၁ ပါ၊ ဒါက တကယ်ကို စိတ်လှုပ်ရှားဖို့ကောင်းလို့ ငါအကြာကြီး ငိုခဲ့ရတယ်။ မေမေကမြင်တော့ ဘာလို့ငိုတာလဲဆိုပြီး လာမေးတယ်၊ အဲ့ဒါနဲ့ ပြိုင်ပွဲရလဒ်တွေနဲ့ အထူးဆုအကြောင်း ရှင်းပြလိုက်တော့ မေမေလည်း ငါ့ကိုဖက်ပြီး လိုက်ငိုနေတယ်လေ】

【ဒီလို ပါရမီရှင်မျိုးကို ကျေးဇူးပြုပြီး ကာကွယ်ပေးကြပါ၊ ထွက်သွားခွင့် မပြုပါနဲ့နော်။ နောင်တစ်ချိန်မှာ တန်ယန်က နိုင်ငံခြားသား ဖြစ်သွားပြီဆိုတဲ့ သတင်းမျိုးကိုတော့ ငါတကယ် မကြားချင်ဘူး】

【အပေါ်ကလူက ဘယ်လိုစိတ်ရောဂါတွေ ခံစားနေရတာလဲ၊ ဘယ်သူက နိုင်ငံသားပြောင်းမယ်လို့ ပြောလို့လဲ၊ နိုင်ငံတကာဆုကြီး ရလာတာနဲ့တင် ချက်ချင်းထွက်ပြီး ဝေဖန်ဖို့ ပြင်နေကြတာလား၊ အဲ့ဒါ ဘယ်လိုစိတ်ဓာတ်မျိုးလဲ】

【ဟေး အောင်ပွဲခံကြစို့၊ တန်ယန်ကတော့ တကယ့်ကို ထူးချွန်လွန်းတယ်】

【အား...ကျောင်းသားဟောင်း တစ်ယောက်အနေနဲ့ ရင်ထဲမှာ အရမ်းကို စိတ်လှုပ်ရှားနေလို့ စိတ်ကိုဖြေဖျောက်ဖို့ အောက်ထပ်ဆင်းပြီး မီတာ ၈၀၀ လောက် ပြေးပစ်ချင်စိတ်တောင် ပေါက်နေပြီ】

【ငါ့အတန်းဖော် တန်ယန်က တကယ့်ကို ထူးထူးခြားခြား ထူးချွန်သူပါ။ နိုင်ငံတော်ရဲ့ ဂုဏ်ဆောင်တဲ့ ဒီလိုအတန်းဖော်မျိုး ရှိတာကို ငါတကယ် ဂုဏ်ယူတယ်】

【အပေါ်က လူကိုတော့ ဒီလိုအရင်းအမြစ်ကောင်း ရှိတဲ့အတွက် မနာလိုဖြစ်မိတယ်။ တန်ယန့်ရဲ့ ပုံလေးတွေကို ထပ်တင်ပေးပါဦးလား】

【အပေါ်ကလူ... ကျေးဇူးပြုပြီး တော်ပါတော့။ သူက ကျောင်းသူပဲ ရှိသေးတာမို့ သူ့ရဲ့ ကိုယ်ရေးကိုယ်တာ ဘဝကို မနှောင့်ယှက်ကြပါနဲ့ဦး】

【အပေါ်ကကွန်မန့်ကို ထောက်ခံတယ်။ နောင်မှာ တန်ယန်ရဲ့ ဖျော်ဖြေပွဲတွေကို ပိုပြီးမြင်တွေ့ရဖို့ မျှော်လင့်ပါတယ်။ သူ ဖျော်ဖြေပွဲလုပ်ရင်တော့ ငါသေချာပေါက် လက်မှတ်ဝယ်ပြီး အားပေးမှာပါ】

Weibo ပေါ်တွင်လည်း ယွမ်ရှီးက တန်ယန်ဆုရရှိသည့် သတင်းကို လိုက်ခ်ပေးကာ ပြန်လည်မျှဝေခဲ့သည်။

ယွမ်ရှီး v: သမိုင်းဝင် အခိုက်အတန့်ကို သက်သေထူခွင့်ရပြီ၊ ဂုဏ်ယူပါတယ် တန်ယန်၊ မင်းက အတော်ဆုံးပဲ၊ ငါတို့နိုင်ငံရဲ့ဂုဏ်ကို အမှန်တကယ် ဆောင်နိုင်ခဲ့ပြီ။【မျှဝေထားသည့် လင့်ခ်】

【အား... ရှီးကျဲလေးရေ၊ မေမေက သားကိုအရမ်းချစ်တယ်၊ "သူ" ဆိုတဲ့ သီချင်းလေးက C နိုင်ငံတော်ရဲ့ အငယ်ဆုံး အမျိုးသမီး ပီယာနိုပညာရှင်၊ အသစ်စက်စက် ရှိုပန်အထူးဆုရှင် တန်ယန် (@တန်ယန်) နဲ့ ယွမ်ရှီး (@ယွမ်ရှီး) တို့ရဲ့ ပူးပေါင်းဖန်တီးမှု ဖြစ်ပါတယ်။ နားထောင်လိုက်တာနဲ့ နားထဲမှာ စွဲငြိသွားစေမယ့် အရမ်းသာယာတဲ့ တေးဂီတလေးမို့ သွားနားထောင်ကြပါဦး】

【ဂုဏ်ယူပါတယ် @တန်ယန်၊ ရှီးကျဲလေးကိုလည်း ဝန်းရံပေးကြပါဦး】

【တန်ယန်ကတော့ အလန်းကြီးပဲဟေး】

【ငါတို့ရဲ့ ရှူးဂါးမမကို ဝန်းရံပေးတဲ့အတွက် ယွမ်ရှီးကို ကျေးဇူးတင်ပါတယ်】

【တစ်ခုလောက် သိချင်လို့ပါ၊ ရှိုပန်အထူးဆုဆိုတာ ဘာလဲဟင်၊ တကယ်ပဲ အဲ့ဒီလောက်ကြီး ဂုဏ်ရှိတာလား (သံသယဖြစ်နေတဲ့ ကြောင်ရုပ်လေး) 】

【အပေါ်ကလူကို ပြန်ဖြေရရင်... ဒီမှာ ဗဟုသုတအဖြစ် ရှင်းပြထားတဲ့ ဆောင်းပါးလင့်ခ် ရှိပါတယ်】

......

【အား... ဗဟုသုတ ဆောင်းပါးကိုဖတ်ပြီး ပြန်လာပါပြီ။ အခုခံစားချက်ကို ဖော်ပြဖို့ စကားလုံးတစ်လုံးပဲ ရှိပါတော့တယ်၊ အဲ့ဒါကတော့ ‘အံ့မခန်းပဲ’ ဆိုတာပါပဲ။ စိတ်လှုပ်ရှားလွန်းလို့ စကားတောင် မပြောနိုင်တော့ဘူး၊ (ငိုနေတဲ့အီမိုဂျီ)】

【+၁ ပါ၊ အဓိကက သူက ၁၇ နှစ်ပဲ ရှိသေးတာလေ၊ တခြားသူတွေလည်း ၁၇ နှစ်၊ ငါလည်း ၁၇ နှစ်... ဒါပေမဲ့ ကွာလိုက်တာ...】

【S မြို့တော် စမ်းသပ်အထက်တန်းကျောင်းက ကျောင်းသားတစ်ယောက် သတင်းပို့ပါတယ်၊ ငါတို့ရဲ့တန်ယန်က အနုပညာမှာတင် ထူးချွန်တာ မဟုတ်ပါဘူး။ အထက်တန်း ပထမနှစ်ကတည်းက စာမေးပွဲတိုင်းမှာ အမှတ်ပြည့်နီးပါးနဲ့ အမြဲတမ်း ပထမရခဲ့တာပါ (ပြုံးနေတဲ့ အီမိုဂျီ) 】

【ညလုံးပေါက် မအိပ်တဲ့ ကျောင်းသားတစ်ယောက်ကို မိသွားပြီ၊ သွားအိပ်တော့၊ အချိန်ပိုဆင်းနေရတဲ့ သူတွေအတွက်တော့ ဒီသတင်းကောင်းကို မြင်လိုက်ရတာဟာ ကော်ဖီခါးခါးတစ်ခွက် သောက်လိုက်ရသလိုပဲ စိတ်တွေ နိုးကြားသွားစေတယ်။ ငါ့ကိုမတားနဲ့၊ နောက်ထပ် ရှစ်နာရီလောက် ဆက်ပြီးတော့ အလုပ်လုပ်နိုင်သေးတယ်】

【အပေါ်ကလူကို သနားလည်း သနားတယ်၊ ဒါပေမဲ့ ရယ်လည်းရယ်ချင်မိတယ်၊ ဘာလို့ပါလိမ့်】

【သွားကြည့်ကြဦး၊ တန်ယန် Weibo မှာ ပို့စ်တင်လိုက်ပြီ】

တန်ယန်သည် အီတန်ဟိုတယ်၏ ခြံဝင်းအတွင်းသို့ ပြန်လည် ရောက်ရှိလာခဲ့သော်လည်း ခေတ္တမျှပင် အနားမယူရသေးမီမှာပင် သူမအား လာရောက် တွေ့ဆုံသူများမှာ တသီတတန်းကြီး ဖြစ်နေတော့သည်။ နောက်ဆုံးတွင်မူ ချင်းယွီရုံက တန်ယန်သည် အနားယူရန် လိုအပ်နေသဖြင့် မည်သည့် ဧည့်သည်ကိုမျှ လက်ခံတွေ့ဆုံတော့မည် မဟုတ်ကြောင်း ဟိုတယ်သို့ အကြောင်းကြားလိုက်မှသာ လူစုကွဲသွားတော့သည်။

ယွီချန်းနျန်သည် တန်ယန်၏ဆုဖလားကို ကိုင်မြှောက်လျက် ဘယ်ပြန်ညာပြန် ကြည့်နေမိပြီး အားရကျေနပ်နိုင်ခြင်း မရှိသေးပေ။

"ဆရာကြီး... ဆရာ ဒီလောက်တောင် သဘောကျနေရင် ဒီဆုဖလားကို ဆရာပဲ သိမ်းထားလိုက်ပါလား"

ဟု တန်ယန်က နောက်ပြောင်လိုက်သည်။

ထိုစကားကို ကြားသောအခါ ယွီချန်းနျန်က သူမကို မော့ကြည့်ရင်း

"ဒါက တကယ်ကို မထင်မှတ်ထားတဲ့ အရာပဲ။ မင်းရဲ့ ပထမဆုံးအကြိမ် ကြိုးစားမှုမှာတင် ဒီလောက်ကြီးမားတဲ့ အောင်မြင်မှုမျိုး ရလိမ့်မယ်လို့ ငါမထင်ထားခဲ့ဘူး။ ရွှေတံဆိပ်တင်မကဘူး အထူးဆုကိုပါ ရခဲ့တာဆိုတော့ ဂီတအသင်းက အဘိုးကြီးတွေလည်း တော်တော်လေး စိတ်လှုပ်ရှားနေကြမှာ သေချာတယ်"

ဟု ပြောလိုက်သည်။

"ဆရာကြီး... C နိုင်ငံတော်ရဲ့ ဂီတလောကက တစ်နေ့ထက်တစ်နေ့ ပိုကောင်းလာမှာပါ။ တရုတ်လူမျိုးတွေရဲ့ အနုပညာအပေါ် မြတ်နိုးမှုက ပိုမြင့်မားလာတာနဲ့အမျှ ဒီလုပ်ငန်း ကဏ္ဍကလည်း နောက်ဆုံးမှာ စည်ပင်ထွန်းကားတဲ့ မြင်ကွင်းတစ်ခုကို ပြသနိုင်မှာပါ"

ယွီချန်းနျန်၏ မျက်ဝန်းများထဲတွင် မျှော်လင့်ချက်များ ပြည့်နှက်နေသည်။ တန်ယန်ကဲ့သို့သော လူငယ်ပီယာနိုပညာရှင် ရှိနေသရွေ့ အခြေအနေများမှာ ပို၍သာ တိုးတက်လာလိမ့်မည်ဟု သူယုံကြည်သည်။ တန်ယန်ကဲ့သို့သော တပည့်မျိုးကို ရရှိခဲ့သည်မှာ သူ၏ကံကောင်းမှု တစ်ခုဖြစ်ပြီး သူမအနေဖြင့် သူမ၏ မူလရည်မှန်းချက်များကို အမြဲတစေ ဆုပ်ကိုင်ထားကာ ဂန္ထဝင်ဂီတကို ရှေ့သို့ဆက်လက် သယ်ဆောင်သွားနိုင်ရန်လည်း သူမျှော်လင့်နေမိသည်။

တန်ယန်သည် သူမ၏ Weibo အကောင့်ထဲသို့ ဝင်ကြည့်လိုက်ရာ ယခုအခါ သူမသည် VIP အဖွဲ့ဝင်တစ်ဦး ဖြစ်နေပြီကို တွေ့လိုက်ရသည်။ ထို့နောက် သူမနှင့် ယွီချန်းနျန်တို့ နှစ်ဦးသား တောက်ပစွာ ပြုံးနေကြပြီး ရှေ့တွင် ဆုဖလားနှစ်လုံး ချထားသည့် ဓာတ်ပုံတစ်ပုံကို ရိုက်ကူးလိုက်လေသည်။

တန်ယန်: "ဒီလို ပျော်ရွှင်စရာကောင်းတဲ့ အခိုက်အတန့်ကို ကျွန်မရဲ့ ဆရာကြီးနဲ့အတူ မျှဝေခံစားခွင့် ရတဲ့အတွက် တကယ်ကို ဝမ်းသာဂုဏ်ယူမိသလို ကံလည်းကောင်းလှပါတယ်" 【ဓာတ်ပုံ】၉ ပုံ

ယနေ့ရရှိခဲ့သော ဆုဖလား ဓာတ်ပုံများအပြင် ပြိုင်ပွဲမတိုင်မီက Mမြို့တော်၏ လမ်းမများပေါ်တွင် လည်းကောင်း၊ ထင်ရှားသော လည်ပတ်စရာ နေရာများတွင် လည်းကောင်း ရိုက်ကူးထားသည့် ဆရာနှင့် တပည့်နှစ်ဦး၏ အမှတ်တရ ပုံရိပ်များကိုပါ ပူးတွဲ ဖော်ပြထားပါသည်။