အင်္ဂါရပ်အသစ်များ ထည့်သွင်းခြင်း

ဤအခြေအနေမှာ လင်းရန်ယန် ကိုပင် အံ့အားသင့်သွားစေတော့သည်။ အရှိန်မှာ အများဆုံး ဆယ်ဆခန့်သာ တိုးလာမည်ဟု သူ ထင်မှတ်ထားခဲ့ခြင်း ဖြစ်၏။

အဆပေါင်း ၁၀၀ တိုးတက်သွားခြင်းမှာ လင်းရန်ယန်၏ စွမ်းအားသည် ‘ကောင်းကင်အရှင်သခင်’ အဆင့်သို့ ရောက်ရှိသွားလျှင်ပင် ၊ ဝိညာဉ်စွမ်းအား ကုန်ခမ်းသွားမည်ကို စိုးရိမ်ရန် မလိုတော့ဟု အဓိပ္ပာယ်ရသည်။ ငွေဒင်္ဂါးရရှိမှုမှာ ဆယ်ဆသာ တိုးတက်ခဲ့သော်လည်း ၊ တစ်ရက်လျှင် ငွေဒင်္ဂါး တစ်သန်းဆိုသည်မှာ လင်းရန်ယန်အား အချိန်တိုအတွင်း တိုင်းပြည်တစ်ခုစာ ကြွယ်ဝသူဖြစ်လာစေရန် လုံလောက်လှ၏။

အမှန်စင်စစ် လက်ရှိတွင် တစ်နိုင်ငံလုံး၏ တစ်နှစ်စာ ထုတ်ကုန်တန်ဖိုး မှာ ငွေဒင်္ဂါး သန်းအနည်းငယ်သာ ရှိနေချိန်၌ ၊ လင်းရန်ယန်မှာ တစ်နှစ်လျှင် ငွေဒင်္ဂါး သန်း ၃၀၀ တိတိကို အသားတင် ရရှိနိုင်မည် ဖြစ်သည်။ ဤသည်မှာ တိုင်းပြည်တစ်ခုစာ ကြွယ်ဝခြင်း မဟုတ်ပါက အဘယ်အရာ ဖြစ်ပါမည်နည်း။

အကယ်၍ ဝယ်ယူမည်ဆိုပါကလည်း ငွေဒင်္ဂါး တစ်သန်းမှာ ဝိညာဉ်ကျောက်တုံး အမြောက်အမြားကို ဝယ်ယူနိုင်ရန် လုံလောက်လှသည်။

[ဒင်... ဂုဏ်ယူပါသည် အရှင် ၊ သင်၏ အလိုအလျောက် ကျင့်ကြံရေး - အလိုအလျောက် ကိုယ်ခံပညာလေ့ကျင့်ခြင်း သည် အဆင့် ၅ (၁၆/၃၂) သို့ မြင့်တက်သွားပါပြီ။ ယခုအခါ တစ်ရက်လျှင် နှစ်ပေါင်း ၁၀,၀၀၀ စာ ကိုယ်ခံပညာ အတွေ့အကြုံများကို ရရှိပါမည်။]

ချက်ချင်းဆိုသလိုပင် လင်းရန်ယန်၏ ကိုယ်ခံပညာ တိုးတက်မှုအရှိန်မှာ ဆယ်ဆ မြန်ဆန်သွားပြီး ၊ သူ ယခုလေးတင် ရရှိထားသော မြေကမ္ဘာတိုက်ပွဲကျင့်စဉ်နှင့် ဓာတ်ငါးပါးဝိညာဉ်ပေါင်းစပ်ခြင်းအခန်းတို့၏ ကျင့်ကြံမှုအရှိန်မှာလည်း ဆယ်ဆအထိ တဟုန်ထိုး မြင့်တက်သွားတော့သည်။

[ဒင်... ဂုဏ်ယူပါသည် အရှင် ၊ သင်၏ အလိုအလျောက် ကျင့်ကြံရေး - အသက်မွေးဝမ်းကျောင်းကျွမ်းကျင်သူ သည်အဆင့် ၅ (၁၂/၃၂) သို့ မြင့်တက်သွားပါပြီ။ ယခုအခါ တစ်ရက်လျှင် အသက်မွေးဝမ်းကျောင်းဆိုင်ရာ ကျင့်ကြံမှု အတွေ့အကြုံ နှစ်ပေါင်း ၁၀,၀၀၀ စာကို ရရှိပါမည်။]

အသက်မွေးဝမ်းကျောင်းဆိုင်ရာ ကျင့်ကြံမှုများမှာလည်း ထို့အတူပင် ဖြစ်၏။ ယခင်က ‘အထက်တန်းစား’ အဆင့်သို့ ရောက်ရန် အနည်းငယ်သာ လိုတော့သည့် လင်းရန်ယန်မှာ ၊ တစ်ခဏချင်းအတွင်းမှာပင် အသက်မွေးဝမ်းကျောင်း အားလုံး၌ ‘ကောင်းကင်အဆင့် အထွတ်အထိပ် အထက်တန်းစား’ အဆင့်သို့ ရောက်ရှိသွားတော့သည်။ နောက်ပိုင်းမှ သူ သင်ယူခဲ့သော ‘ကောင်းကင်ကံကြမ္မာဆရာ’ အတတ်ပညာပင်လျှင် ‘ကောင်းကင်အဆင့် အထွတ်အထိပ် အထူး’ အဆင့်သို့ ရောက်ရှိသွား၏။ အမှန်စင်စစ် နောက်ပိုင်းအဆင့်များတွင် အဆင့်တက်ရန် အရှိန်မှာ သဘာဝအလျောက်ပင် အနည်းငယ် နှေးကွေးသွားတတ်သည်။

[ဒင်... ဂုဏ်ယူပါသည် အရှင် ၊ သင်၏ အလိုအလျောက် ကျင့်ကြံရေး - ခန္ဓာကိုယ်ကြံ့ခိုင်မှု သည် အဆင့် ၅ (၂/၃၂) သို့ မြင့်တက်သွားပါပြီ။ သင်၏ ခန္ဓာကိုယ် ကြံ့ခိုင်မှုမှာ ၃၂ ဆအထိ တိုးတက်သွားပါပြီ။]

ဤအခိုက်အတန့်၌ လင်းရန်ယန်၏ ခန္ဓာကိုယ် ကြံ့ခိုင်မှုမှာ သိသိသာသာ ပြောင်းလဲသွားတော့သည်။ မိုးကြိုးဝိညာဉ်ခန္ဓာ၏ ထောက်ပံ့မှုနှင့် ပေါင်းစပ်လိုက်ပါက ၊ လင်းရန်ယန်အနေဖြင့် တောင်တစ်လုံးကို လက်သီးတစ်ချက်တည်းနှင့် ချေမွပစ်နိုင်မည်ဟု ယုံကြည်ချက် အပြည့်ရှိနေသည်။

[ဒင်... ဂုဏ်ယူပါသည် အရှင် ၊ သင်၏ အလိုအလျောက် ကျင့်ကြံရေး - လေဝိညာဉ်ခန္ဓာ သည် အဆင့် ၄(၅/၁၆) သို့ မြင့်တက်သွားပါပြီ။ လေဓာတ်စွမ်းအား တိုးမြှင့်မှုမှာ ၁၆၀၀ ရာခိုင်နှုန်း ဖြစ်ပါပြီ။]

[ဒင်... ဂုဏ်ယူပါသည် အရှင် ၊ သင်၏ အလိုအလျောက် ကျင့်ကြံရေး - ကုသိုလ်တော်ရွှေအလင်းတန်း သည် အဆင့် ၅ (၂/၃၂) သို့ မြင့်တက်သွားပါပြီ။ သင်၏ ကုသိုလ်ကံ မှာ အဆပေါင်း ၁၀၀,၀၀၀ အထိ တိုးတက်သွားပါမည်။]

ကုသိုလ်တော်ရွှေအလင်းတန်းမှာ အဆင့်နှစ်ဆင့် မြင့်တက်သွားသည်နှင့်အမျှ ၊ လင်းရန်ယန်၏ စုစုပေါင်း ကုသိုလ်ကံ ပမာဏမှာလည်း တိုက်ရိုက်ပင် အဆပေါင်း တစ်ရာ တိုးတက်သွားတော့သည်။ သူ၏ အသိစိတ်ပင်လယ်အတွင်းရှိ ‘ကံကြမ္မာအလင်းလုံး’ ကြီးမှာလည်း တစ်ခဏချင်းအတွင်း သိသိသာသာ ကြီးမားသွား၏။

ယခုအခါ လင်းရန်ယန်၏ ကံကြမ္မာအကျိုးပေး ပမာဏမှာ သန်းပေါင်း ၁,၀၀၀ အထိ ရှိနေပြီ ဖြစ်ရာ ၊ ၎င်းမှာ ‘ပင်ကိုယ်ပါရမီ ကုသိုလ်’ မဟုတ်လျှင်ပင် ၊ လင်းရန်ယန်အနေဖြင့် မရဏကမ္ဘာ၏ ‘ယင်စစ်သူကြီး’ တစ်ဦး ဖြစ်လာရန် လုံလောက်လှသည်။

[ဒင်... ဂုဏ်ယူပါသည် အရှင် ၊ သင်၏ အလိုအလျောက် ကျင့်ကြံရေး - အလိုအလျောက်ကျင့်ကြံခြင်း သည် အဆင့် ၅(၆/၃၂) သို့ မြင့်တက်သွားပါပြီ။ ယခုအခါ တစ်ရက်လျှင် ရက်ပေါင်း ၁၀၀,၀၀၀ စာ ကျင့်ကြံမှုပမာဏကို အလိုအလျောက် ရရှိပါမည်။]

အရေးကြီးဆုံးအချက်မှာ လင်းရန်ယန်၏ အလိုအလျောက် ကျင့်ကြံခြင်းပင် ဖြစ်သည်။

“ဝုန်း”

အလိုအလျောက် ကျင့်ကြံခြင်း အဆင့်မြှင့်တင်လိုက်သည်နှင့်အတူ ၊ လင်းရန်ယန်၏ ခန္ဓာကိုယ်တစ်ခုလုံးရှိ ဝိညာဉ်စွမ်းအားများမှာ ရုတ်တရက် ရူးသွပ်ဖွယ်ရာ ပေါက်ကွဲလာ၏။ တစ်ခဏချင်းအတွင်းမှာပင် သူ၏ မူလ ‘မြေကမ္ဘာအရှင်သခင် နဝမအဆင့်’ မှာ ဒသမအဆင့်သို့ တိုက်ရိုက် ရောက်ရှိသွားတော့သည်။

ပုံမှန်ဆိုပါက နောက်ထပ် တစ်ရက်ခန့် ကြာမြင့်ရမည် ဖြစ်သော်လည်း ၊ ကျင့်ကြံမှုအရှိန် ဆယ်ဆ မြန်လာခြင်းမှာ ရိုက်ခတ်မှုစွမ်းအား ဆယ်ဆ တိုးလာခြင်းနှင့် ညီမျှလှ၏။ ထို့ကြောင့် အဆင့်အတားအဆီးကို တစ်ခဏချင်းအတွင်း ကျော်ဖြတ်နိုင်ခြင်းမှာ ပုံမှန်သာ ဖြစ်သည်။

ခန္ဓာကိုယ်အတွင်းမှ ကြီးမားလှသော စွမ်းအားများကို ခံစားရင်း လင်းရန်ယန်မှာ သက်ပြင်းတစ်ချက်ကို ခပ်ပြင်းပြင်း ချလိုက်တော့သည်။

“အခုရှိနေတဲ့ အရှိန်နဲ့ဆိုရင် မနက်ဖြန်လောက်ဆို ငါ ကောင်းကင်အရှင်သခင် အဆင့်ကို ရောက်နိုင်မယ် ထင်တယ် ”

ဤသို့ တွေးမိသည်နှင့် လင်းရန်ယန်မှာ အသာအယာ ပြုံးလိုက်မိ၏။

ကောင်းကင်အရှင်သခင် အဆင့်ဆိုသည်မှာ ပထမအဆင့်မျှသာ ရှိဦးမည် ဖြစ်သော်လည်း ၊ ၎င်း၏ စွမ်းအားမှာ သာမန် မြေကမ္ဘာအရှင်သခင် ဒသမအဆင့်ထက် အဆပေါင်းများစွာ သာလွန်လှသည်။ ထိုအချိန်ရောက်လျှင် သူ၏ တိုက်ပွဲစွမ်းရည်မှာ ပထမတန်းစား ဂိုဏ်းကြီးများမှ ထိပ်သီးပညာရှင်များ၏ အဆင့်ဖြစ်သော ‘ကောင်းကင်အထက်တန်းစားအရှင်သခင် နဝမအဆင့်’ သို့ ရောက်ရှိသွားမည်။

လင်းရန်ယန်၏ လက်ရှိ ပါရမီ ၊ ကျင့်ကြံမှုအဆင့်နှင့် အစွမ်းထက်လှသော အလိုအလျောက် ကျင့်ကြံရေး စွမ်းရည်များဖြင့်ဆိုပါက ၊ ကောင်းကင်အရှင်သခင် ပထမအဆင့်မှ ကောင်းကင်အထက်တန်းစားအရှင်သခင် နဝမအဆင့်အကြား ရှိနေသော ၂၅၆ ဆသော စွမ်းအားကွာဟချက်ကို ချေဖျက်ရန် လုံလောက်လှသည်။

အမှန်စင်စစ် ၊ အကယ်၍သာ သူသည် အစွမ်းကုန် တိုက်ခိုက်မည်ဆိုပါက ၊ တစ်လောကလုံးရှိ ကျင့်ကြံသူများအကြား လင်းရန်ယန်ကို ယှဉ်နိုင်မည့်သူ ရှိတော့မည် မဟုတ်ချေ။ အဘယ်ကြောင့်ဆိုသော် ကျင့်ကြံသူများ၏ နောက်ဆုံးလက်နက်မှာ မိမိ၏ အသက်ကို ရင်း၍ ‘နတ်ဘုရားပင့်ဖိတ်ခြင်း’ ဖြစ်သော်လည်း ၊ ပြိုင်ဘက်က မရဏကမ္ဘာမှ မည်သည့် ပုဂ္ဂိုလ်ကိုပင် ပင့်ဖိတ်စေကာမူ ၊ လင်းရန်ယန်က အကြည့်တစ်ချက်ဖြင့်ပင် သူတို့ကို ခြောက်လှန့် မောင်းထုတ်နိုင်သောကြောင့် ဖြစ်သည်။

“ဒါနဲ့... ဒီတစ်ခါ ပစ္စည်းဆုလာဘ်တွေလည်း ပါသေးတာပဲ ၊ အဲဒါတွေက ဘာတွေများလဲ ”

လင်းရန်ယန်မှာ ထိုအချက်ကို ရုတ်တရက် သတိရသွားတော့သည်။ ကျင့်စဉ်ဆုလာဘ်များကို ရရှိခဲ့ပြီး ဖြစ်သော်လည်း ၊ ပစ္စည်းဆုလာဘ်များမှာ ကျန်ရှိနေသေးသည်။

[ဒင်... ဂုဏ်ယူပါသည် အရှင်။ သင်သည် တာအိုအတတ်ပညာ - ‘နှင်းခဲဖြင့်ဖုံးလွှမ်းထားသော မြေကမ္ဘာ နှင့် ကောင်းကင်’ (ဝိညာဉ် အထက်တန်းအဆင့်) ကို ရရှိပါသည်။]

[နှင်းခဲဖြင့်ဖုံးလွှမ်းထားသော မြေကမ္ဘာ နှင့် ကောင်းကင် - ၎င်းမှာ ဝိညာဉ် အထက်တန်းအဆင့်ရှိသော တာအိုအတတ်ပညာ ဖြစ်သည်။ ကျင့်ကြံသူ၏ စွမ်းအားမှာ သတ်မှတ်ထားသော အဆင့်သို့ ရောက်ရှိပါက ၊ တစ်ကမ္ဘာလုံးကို နှင်းခဲများဖြင့် ပိတ်ဆို့ထားနိုင်သည်။ နှင်းခဲဝိညာဉ်ခန္ဓာ၏ အဆင့် မြင့်မားလေလေ ၊ ၎င်း၏ စွမ်းအားမှာ ပိုမိုကြီးမားလေလေ ဖြစ်မည်။]

[ဒင်... ဂုဏ်ယူပါသည် အရှင် ၊ သင်သည် ပစ္စည်းဆုလာဘ်များအဖြစ် - လူသားအဆင့် ကုန်ကြမ်း ၂၀၀၀ ၊ မြေကမ္ဘာအဆင့် ကုန်ကြမ်း ၂၀၀ ၊ ကောင်းကင်အဆင့် ကုန်ကြမ်း ၂၀ နှင့် ဝိညာဉ်အဆင့် ကုန်ကြမ်း ၂ ခု တို့ကို ရရှိပါသည်။]

မကြာမီမှာပင် စနစ်၏ အသိပေးသံ ထွက်ပေါ်လာတော့သည်။ ကုန်ကြမ်းများနှင့် ကျင့်စဉ်များအပြင် ၊ ယခုတစ်ကြိမ်၌ တာအိုအတတ်ပညာ တစ်ခုပါ ပါဝင်လာမည်ဟု သူ မထင်မှတ်ထားခဲ့ပေ။

“ဒီတာအိုအတတ်ပညာက တော်တော်ကောင်းတာပ‌ေ ၊ ငါ့ရဲ့ အဆင့် ၄ နှင်းခဲဝိညာဉ်ခန္ဓာနဲ့သာ ပေါင်းစပ်လိုက်မယ်ဆိုရင် ၊ ဒါရဲ့ အဆင့်က အနည်းဆုံး ‘တာအိုအဆင့်’ လောက် ဖြစ်သွားမှာပဲ ”

လင်းရန်ယန်မှာ တုံ့ဆိုင်းမနေဘဲ ၎င်းကို တိုက်ရိုက် သင်ယူလိုက်၏။ သတ်မှတ်ထားသော အဆင့်ဆိုသည်မှာ ဝိညာဉ်အဆင့် သတ္တမ သို့မဟုတ် အဋ္ဌမအဆင့်ခန့်သို့ ရောက်ရှိသော တိုက်ပွဲစွမ်းရည်မျိုး ဖြစ်၏။ အဘယ်ကြောင့်ဆိုသော် ထိုတိုက်ပွဲစွမ်းရည်မှာ ဝိညာဉ်အဆင့် အထက်တန်းစား စွမ်းအားနှင့် ညီမျှသောကြောင့် ဖြစ်သည်။

ယခုရှိနေသော စွမ်းအားတိုးမြှင့်မှုများအရ ၊ သူ၏ အဆင့်မှာ ကောင်းကင်အရှင်သခင် အဋ္ဌမ သို့မဟုတ် နဝမအဆင့်သို့ ရောက်ရှိသည်နှင့် ၊ သူသည် တစ်ကမ္ဘာလုံးကို ခဲသွားအောင် လုပ်နိုင်သည့် စွမ်းအားကို ပိုင်ဆိုင်လာမည် ဖြစ်သည်။ စဉ်းစားကြည့်ရုံနှင့်ပင် တကယ့်ကို ထိတ်လန့်စရာကောင်းလှသည်။

လင်းရန်ယန်သည် တုံ့ဆိုင်းမနေဘဲ ၎င်းကို သင်ယူရန် ရွေးချယ်လိုက်တော့၏။ အဆင့် ၅ ရှိသော အလိုအလျောက် ကိုယ်ခံပညာလေ့ကျင့်ခြင်း၏ အကူအညီဖြင့်ဆိုပါက ၊ ဝိညာဉ်အဆင့် အထက်တန်းစား ကျင့်စဉ်တစ်ခုကိုပင် အများဆုံး တစ်ရက် သို့မဟုတ် နှစ်ရက်အတွင်း ၁၀၀ ရာခိုင်နှုန်း ပြည့်အောင် သင်ယူနိုင်မည်ဟု သူ ယုံကြည်နေသည်။

လင်းရန်ယန်၏ အခြားသော ကျင့်စဉ်များမှာ အဆင့်မြင့်နေသော်လည်း ၊ အမှန်စင်စစ်မှာ လင်းရန်ယန်၏ ဝိညာဉ်ခန္ဓာအဆင့် မြင့်မားနေသဖြင့် မြင့်တက်နေခြင်းသာ ဖြစ်သည်။ တကယ်တမ်းတွင် လင်းရန်ယန်၏ ပထမဦးဆုံးသော ဝိညာဉ်အဆင့် တာအိုအတတ်ပညာမှာ ဤ ‘နှင်းခဲဖြင့်ဖုံးလွှမ်းထားသော မြေကမ္ဘာ နှင့် ကောင်းကင်’ ပင် ဖြစ်၏။

“ဒါနဲ့... အခုဆိုရင် လက်နက်ကောင်းကောင်း တစ်ခုကို သန့်စင်ဖို့ အချိန်တန်ပြီ ”

လင်းရန်ယန်က မျက်ခုံးတစ်ချက် ပင့်လိုက်သည်။ သူ၏ ‘ဓာတ်ငါးပါး ကောင်းကင်လျှို့ဝှက်ဓား’ ၏ စွမ်းအားမှာ အစွမ်းထက်နေသေးသော်လည်း ၊ ‘အထွတ်အထိပ် အနိမ့်စား’ အဆင့်သို့ ရောက်နေသော လင်းရန်ယန်၏ အစွမ်းကုန် တိုက်ခိုက်မှုကိုမူ တောင့်ခံနိုင်စွမ်း မရှိတော့ချေ။

ဤသို့ တွေးမိသည်နှင့် လင်းရန်ယန်သည် သူ၏ မှတ်ဉာဏ်များအတွင်း၌ ရှာဖွေလိုက်တော့သည်။

“ဓာတ်ငါးပါး ကောင်းကင်လျှို့ဝှက်ဓားကို ကောင်းကင်အဆင့် အထွတ်အထိပ်အဖြစ် သန့်စင်ဖို့က တော်တော်လေး လွယ်ကူပါတယ် ၊ ဒါပေမဲ့ အဲဒီဓားက အစွမ်းထက်ပေမဲ့ ဓာတ်ငါးပါး စွမ်းအားတွေကိုပဲ မြှင့်တင်ပေးနိုင်တာလေ ၊ နောက်ပိုင်းမှာ ငါ့ရဲ့ စွမ်းအားတွေ တိုးလာတာနဲ့အမျှ ၊ ဝိညာဉ်ခန္ဓာတွေလည်း ပိုပြီး များလာဦးမှာ ”

လင်းရန်ယန်မှာ စဉ်းစားခန်း ဝင်သွားရတော့သည်။ ဝိညာဉ်ခန္ဓာများ ပိုမိုများပြားလာခြင်းကြောင့် ၊ လင်းရန်ယန်အနေဖြင့် ဝိညာဉ်စွမ်းအား အမျိုးအစားအားလုံးကို လက်ခံနိုင်မည့် လက်နက်တစ်ခုကို ဖန်တီးရန် လိုအပ်၏။ ထိုသို့ပြုလုပ်နိုင်မှသာ သူ၏ စွမ်းအားများကို အပြည့်အဝ အသုံးချနိုင်မည် ဖြစ်သည်။

“ပြောရရင်..... ဒီလို လက်နက်မျိုး တကယ် ရှိတာပဲ ”

မကြာမီမှာပင် လင်းရန်ယန်သည် သူ အလိုရှိသော လက်နက်သန့်စင်နည်းကို သူ၏ မှတ်ဉာဏ်များအတွင်းမှ ရှာဖွေတွေ့ရှိသွားတော့သည်။

* ဝိညာဉ်လက်နက် - အနန္တပြောင်းလဲခြင်းဓား

* အဆင့် - ကောင်းကင်အဆင့် အထွတ်အထိပ်

* အရည်အသွေး - ပြီးပြည့်စုံသော

* လက်နက်မိတ်ဆက် - ၎င်းကို အင်္ဂါရပ် အမျိုးမျိုးရှိသော ကုန်ကြမ်းများကို ပေါင်းစပ်၍ သန့်စင်နိုင်သည်။ သန့်စင်ပြီးနောက်တွင်လည်း အင်္ဂါရပ်အသစ်များကို ထပ်မံ ထည့်သွင်းနိုင်သေးသည်။

ဤလက်နက်မှာ ရှေးဟောင်း နတ်ဘုရားခေတ်က ‘ဝမ်ရန်ဧကရာဇ်’ နှင့် ဧကရာဇ်အဆင့်ရှိ လက်နက်သန့်စင်ပညာရှင် ဒါဇင်ပေါင်းများစွာတို့ ပူးပေါင်း၍ သန့်စင်ခဲ့သော အစွမ်းထက် ဝိညာဉ်လက်နက်တစ်ခု ဖြစ်၏။ ဤလက်နက်မှာ ကောင်းကင်ဘုံကို ဆန့်ကျင်နိုင်လောက်အောင် အစွမ်းထက်လွန်းပြီး ၊ ပျက်စီးမသွားစေရန်အတွက် ‘ပြီးပြည့်စုံသော အရည်အသွေး’ ရှိရန် လိုအပ်သောကြောင့် ၊ အကြိမ်ပေါင်းများစွာ ကြိုးစားခဲ့ပြီးမှသာ အနည်းငယ်မျှသာ အောင်မြင်ခဲ့ခြင်း ဖြစ်သည်။ ထိုအောင်မြင်ခဲ့သော လက်နက်များအနက် အမြင့်ဆုံးအဆင့်မှာ ‘ကောင်းကင်အဆင့် အထွတ်အထိပ် အနန္တပြောင်းလဲခြင်းဓား’ ပင် ဖြစ်သည်။