ဓမ္မနှင့် အဓမ္မတိုက်ပွဲတွင် အခြားအကြောင်းရင်းများ ရှိနေခြင်း

"အရောင်းအဝယ် တည့်ပြီ"

ဟယ်ဟွမ်းဂိုဏ်း မှ တပည့်များသည် ခရမ်းရောင်ကျောက်စိမ်းဆေးလုံးကို ကျန်းဟယ် ထံသို့ မချိမဆံ့ဈေးဖြင့် ရောင်းချလိုက်ကြသည်။

အရောင်းအဝယ်ပြီးနောက် နှစ်ဖက်လုံး လမ်းခွဲသွားကြပြီး ဟယ်ဟွမ်းဂိုဏ်းသားများမှာ လင်ချွမ် နှင့် လင်ယန်ရွှယ် တို့ ရှိရာ တည်းခိုခန်းသို့ ပြန်လာကြသည်။

"ဂိုဏ်းချုပ်၊ဒါက သခင်ကြီးကျန်းပေးတဲ့ ငွေလွှဲလက်မှတ်တွေပါ"

တပည့်ဖြစ်သူက ရိုသေစွာ ဆက်သလိုက်သည်။

လင်ယန်ရွှယ်က ငွေလွှဲလက်မှတ်ကို မောက်မာစွာ သိမ်းလိုက်သည်ကို ကြည့်ပြီး လင်ချွမ်မှာ မယုံနိုင်အောင် ဖြစ်နေရသည်။

"ဒီလောက် လွယ်လွယ်လေးလား"

ဟု သူက ရေရွတ်မိသည်။

ဆေးလုံးတစ်လုံးကို ရွှေတစ်သန်းဖြင့် ဝယ်သည့် ကျန်းဟယ်မှာ တကယ့်ကို ပျင်းနေ၍ ပိုက်ဆံဖြုန်းနေခြင်းလောဟု သူ တွေးနေမိ၏။

သူသည် လင်ယန်ရွှယ်ကို ရွှေငါးဆယ်ဖြင့်သာ ရောင်းခဲ့သဖြင့် သူမသည် အဆပေါင်း နှစ်သောင်းခန့် အမြတ်ထွက်သွားခြင်း ဖြစ်သည်။

"ငါတော့ အကြီးအကျယ် ရှုံးသွားတာပဲ"

ဟု လင်ချွမ်က ကိုယ့်ဘာသာ ရေရွတ်သော်လည်း သူသည် ငွေမက်သူမဟုတ်သဖြင့် သိပ်တော့ စိတ်ထဲမထားချေ။

ဟယ်ဟွမ်းဂိုဏ်းမှ အမျိုးသမီးတပည့်များကလည်း လင်ချွမ်ကို "သမက်တော်" ဟု ခေါ်ကာ စနောက်နေကြသဖြင့် လင်ယန်ရွှယ်မှာ မျက်နှာနီမြန်းနေရပြီး လင်ချွမ်မှာမူ ထိုဆူညံလှသော မိန်းမများကို အဖက်မလုပ်လိုတော့ဘဲ မျက်လုံးလှန်ကြည့်နေမိတော့၏။

တစ်ဖက်တွင်လည်း ကျန်းဟယ်သည် ဆေးလုံးကို ရရှိသဖြင့် အလွန်ဝမ်းသာနေပြီး ဧကရာဇ်မင်းထံ ဆက်သရန် မြင်းစီး၍ အမြန်ထွက်ခွာသွားသည်။

ကျဲ့ခုန်း ကမူ ရှေးဟောင်းရတနာကိစ္စ ပြီးဆုံးသွားပြီဖြစ်၍ အကျဉ်းသားဖြစ်သူ ယဲ့ဝူရှဲ့ ကို ဆက်လက် အသက်ရှင်ခွင့် မပေးနိုင်တော့ကြောင်း ဆုံးဖြတ်ကာ ရှောင်လင်သို့ ပြန်ရန် ပြင်ဆင်တော့၏။

...

ကျားယွီကွမ်း မြို့ပြင် လမ်းဆုံတစ်ခုတွင် လင်ချွမ်းနှင့် လင်ယန်ရွှယ်တို့သည် မြောက်ဘက်သို့ ဦးတည်နေကြသည်။

"ငါ့မှာ လမ်းကြောင်းပြ အာရုံမရှိဘူးလို့ နင် တကယ်ပဲ ထင်နေတာလား"

ဟု လင်ချွမ်က မကျေမနပ် မေးလိုက်သည်။

လင်ယန်ရွှယ်၏ အကြံကို သူ ရိပ်မိသွားခြင်းဖြစ်သည်။

"ကျွန်မ ရှင့်ကို အကူအညီတစ်ခု တောင်းချင်လို့ပါ"

ဟု လင်ယန်ရွှယ်က ကလေးမလေးတစ်ယောက်လို နှုတ်ခမ်းဆူကာ ပြောသည်။

"ငါတို့သွားနေတဲ့ လမ်းက ရှောက်ရှီးတောင်ဘက်ကိုပဲ"

"နင်က ယဲ့ဝူရှဲ့ကို ကယ်ချင်တာ မဟုတ်လား"

ဟု လင်ချွမ်က ခပ်အေးအေးပင် ဆိုလိုက်သည်။

သူသည် အခြေအနေကို ကောင်းစွာ သုံးသပ်မိထား၏။

ရတနာသိုက်ကိစ္စ ပြီးသွားပြီဖြစ်၍ အသုံးမဝင်တော့သော ယဲ့ဝူရှဲ့ကို သူတော်စင်ဂိုဏ်းများနှင့် နန်းတွင်းက သတ်ပစ်တော့မည်ကို သူ သိနေခြင်းပင်။

"ရှင်က သူတော်စင်ဂိုဏ်းက တပည့်ပဲ"

"နတ်ဆိုးဂိုဏ်းချုပ်ကို ကယ်ဖို့ ကျွန်မကို ကူညီပါ့မလား"

ဟု လင်ယန်ရွှယ်က လင်ချွမ်၏ လက်ကို ဆွဲကိုင်ကာ အသနားခံလိုက်သည်။

လင်ချွမ်က သူမ၏လက်ကို ဖြုတ်ချကာ ခပ်အေးအေးပင် တားမြစ်လိုက်သော်လည်း သူသည် ယခင်က သိထားသော ဓမ္မနှင့် အဓမ္မတိုက်ပွဲ သမိုင်းကြောင်းမှာ တစ်ဖက်သတ် ဖြစ်နေနိုင်သည်ကို စတင် သံသယဝင်လာသည်။

"နင် ပြောတဲ့ ဓမ္မနဲ့ အဓမ္မတိုက်ပွဲ အကြောင်းက ငါသိထားတာနဲ့ ကွဲပြားနေပုံရတယ်"

"ငါက နတ်ဆိုးဂိုဏ်းဘက်ကို ဘက်လိုက်ပြီးကယ်မယ်လို့ ကတိမပေးဘူး"

"နှစ်ဖက်စလုံးရဲ့ စကားကို နားထောင်ပြီးမှ ငါကိုယ်တိုင် ဆုံးဖြတ်မယ်"

ဟု လင်ချွမ်က လေးနက်စွာ သတိပေးလိုက်သည်။

လင်ယန်ရွှယ်မှာ ဝမ်းသာသွား၏။

လင်ချွမ်သာ ကူညီမည်ဆိုလျှင် ယဲ့ဝူရှဲ့ကို ကယ်တင်ရန် အခွင့်အရေး အလွန်များသွားပြီပင်

"သွားရင်းလာရင်းနဲ့ နတ်ဆိုးဂိုဏ်းဘက်က သိထားတဲ့ တိုက်ပွဲအကြောင်းတွေ ရှင့်ကို ပြောပြမယ်"

"တချို့ အသေးစိတ်တွေကိုတော့ ယဲ့ဝူရှဲ့ ကိုယ်တိုင်ပဲ သိတာ"

"အဲဒီတိုက်ပွဲက သူနဲ့ ပတ်သက်ပြီး စခဲ့တာကိုး"