မူလအဆင့်သို့ တက်လှမ်းခြင်း၊ ဝိညာဉ်အမြစ်ကို ပျိုးထောင်ခြင်း

ဒေါင်…

ဤသည်ကို တွေးတောရင်း ကျန်းဖန်သည် စိတ်လှုပ်ရှားစွာဖြင့် အခွင့်အရေး အလင်းစက်လေးပေါ်သို့ အသာအယာ နှိပ်လိုက်သည်။

ထို့နောက် သတင်းအချက်အလက် စီးကြောင်းတစ်ခုမှာ ဒီရေလှိုင်းများသဖွယ် သူ၏ စိတ်အာရုံပင်လယ် နက်ရှိုင်းသော နေရာသို့ တိုးဝင်လာခဲ့၏။

"ခုနစ်ရက် ကြာပြီးနောက်၊ ယွင်မုန်ရေကန်၏ အနက်ရှိုင်းဆုံး နေရာသို့ သွားပါ၊ လက်မှတိကို ကိုင်ဆောင်ကာ သင်၏ ဇနီး စုဝေဝေနှင့်အတူ မသေမျိုး ဂူနန်းတော် အတွင်းသို့ ဝင်ရောက်ပြီး ပဉ္စမအဆင့် အခွင့်အရေးကို ရယူပါ"

ဘာ...

ဤသတင်းကို ကြားလိုက်ရသည်နှင့် ကျန်းဖန်၏ မျက်ဝန်းများတွင် အလင်းရောင်တစ်ချက် ဝင်းလက်သွားသည်။

ဤပဉ္စမအဆင့် အခွင့်အရေးက မည်သည့်နေရာမှ လာမည်နည်းဟု သူ တွေးတောနေခဲ့သည်။ ယခုမူ ၎င်းမှာ မသေမျိုး ဂူနန်းတော်မှ အမှန်တကယ် မြစ်ဖျားခံလာခြင်း ဖြစ်ကြောင်း သိလိုက်ရပြီ ဖြစ်သည်။

မည်သို့ပင်ဆိုစေ ယွင်မုန်ရေကန်၏ အလျှို့ဝှက်ဆုံးသော နေရာမှာ ဤမသေမျိုး ဂူနန်းတော်ပင် မဟုတ်ပါလော။

ယွင်ဇီမြို့၏ မျိုးရိုးကြီး မိသားစု သုံးခုမှာ ဤဂူနန်းတော်ကြောင့်ပင် နှစ်ပေါင်း ရာချီ၍ တည်တံ့နေခဲ့ကြခြင်း ဖြစ်သည်။

ထို့ပြင် သူတို့သည် မသေမျိုး ဂူနန်းတော်အတွင်းသို့ ဝင်ရောက်ခဲ့ပြီးနောက် စမ်းသပ်မှုများကို ရှုံးနိမ့်ခဲ့ကြသူများ ဖြစ်သည်။

ထိုသို့ ရှုံးနိမ့်ခဲ့ပြီးနောက် ရရှိခဲ့သော ဆုလာဘ်များကပင် သူတို့အတွက် များစွာ အကျိုးရှိခဲ့လေသည်။

အကယ်၍ စမ်းသပ်မှုများကိုသာ အောင်မြင်ခဲ့မည်ဆိုပါက ရရှိမည့် အကျိုးကျေးဇူးမှာ မတွေးရဲစရာပင်။

"စုဝေဝေနဲ့အတူ မသေမျိုး ဂူနန်းတော်ထဲကို တကယ်ပဲ ဝင်ရမှာလား"

"ဒါက ဝေဝေလည်း ဂူနန်းတော်ထဲဝင်ရင် အကျိုးကျေးဇူးတွေ ရနိုင်တယ်ဆိုတဲ့ အဓိပ္ပာယ်ပဲ"

"ဟုတ်သားပဲ... ဝေဝေရဲ့ ခန္ဓာကိုယ် ဖွဲ့စည်းပုံကမွေးရာပါ ထူးခြားတယ်လေ၊ ဖြစ်နိုင်တာက သူမမှာ ဝိညာဉ်အမြစ် စွမ်းရည် ရှိနေတာမျိုး ဖြစ်နိုင်တယ်"

"ဒါကြောင့် မသေမျိုး ဂူနန်းတော်ထဲမှာ အကျိုးကျေးဇူးတွေ ရရှိနိုင်တယ် ဆိုတာက သဘာဝကျပါတယ်"

ကျန်းဖန်သည် သူ၏ လက်သီးကို တင်းတင်းဆုပ်ထားလိုက်မိသည်။

ယခင်က စုဝေဝေသည် 'စိမ်းလန်းသော သစ်သားကျင့်စဉ်' ကို လေ့ကျင့်နေခဲ့၏။ သို့သော်လည်း၊ လူ့လောက၏ ညံ့ဖျင်းလှသော ကျင့်ကြံခြင်း ပတ်ဝန်းကျင်ကြောင့် သူမသည် အခြေခံ အဆင့်သို့ပင် မရောက်သေးသလို၊ မည်သည့် မန္တန်ကိုမျှလည်း မတတ်မြောက်သေးချေ။

အကယ်၍ သူမသာ မသေမျိုး ဂူနန်းတော် အတွင်းသို့ ဝင်ရောက်နိုင်ပါက ဤပြဿနာမှာ ပြေလည်သွားနိုင်ပေလိမ့်မည်။

"ဒါပေမဲ့ ခုနစ်ရက်တော့ စောင့်ရဦးမယ်၊ အခုချက်ချင်း သွားလို့မရသေးဘူး"

"ဖြစ်နိုင်တာက ဒီအတောအတွင်း ငါက အရှင်သခင် အထွတ်အထိပ်ကို ကျော်ဖြတ်ပြီး မူလအဆင့်သိုင်းပညာရှင် တစ်ယောက် ဖြစ်လာနိုင်တာမျိုးပေါ့"

ကျန်းဖန်သည် သူ ရရှိထားသော ကံကောင်းခြင်းအမှတ် ၁၀၀၀ ကို သတိရလိုက်သည်။

မူလက သူ၏ လက်ဝယ်တွင် ကံကောင်းခြင်းအမှတ် ၁၅၆၀ ရှိ၏။ ယခုရရှိသည်တို့ကို ပေါင်းလိုက်ပါက ယခုအခါ သူသည် စုစုပေါင်း ကံကောင်းခြင်းအမှတ် ၂၅၆၀ ကို ပိုင်ဆိုင်ထားပြီ ဖြစ်၏။

မူလအဆင့်သိုင်းပညာရှင် တစ်ယောက်အဖြစ် တက်လှမ်းရန်အတွက်မူ ကံကောင်းခြင်းအမှတ် ၂၀၀၀ သာ လိုအပ်သည်။ ထို့ကြောင့် သူ ပိုင်ဆိုင်ထားသော ကံကောင်းခြင်း အမှတ်မှာ လုံးဝကို လုံလောက်လှပေသည်။

ခုနစ်ရက် စောင့်ရမည်ဟူသော အချက်မှာ ဤအတောအတွင်း မူလအဆင့် သိုင်းပညာရှင် တစ်ဦးအဖြစ် အမြန် တက်လှမ်းကာ ဝိညာဉ်အမြစ်ကို ပျိုးထောင်ထားရန် အတွက် အခွင့်အရေးက ပေးလိုက်သော သတိပေးချက် ဖြစ်နိုင်သည်ဟု သူ ခံစားလိုက်ရသည်။

ဝိညာဉ်အမြစ် စွမ်းရည်ရှိမှသာ မသေမျိုး ဂူနန်းတော်၏ စမ်းသပ်မှုများကို အောင်မြင်ရန် ဖြစ်နိုင်ခြေ ရှိပေလိမ့်မည်။

"စကြစို့"

မည်သည့် တုံ့ဆိုင်းမှုမျှ မရှိဘဲ ကျန်းဖန်သည် အနီးရှိ အခန်းတစ်ခုသို့ သွားကာ သူ၏ ကံကောင်းခြင်း အမှတ်များကို စတင် အသုံးပြုလိုက်တော့သည်။

ဝုန်း…

ရုတ်တရက် ကံကောင်းခြင်းအမှတ် ၁၈၀၀ မှာ ချက်ချင်း ကုန်ဆုံးသွားခဲ့ပြီး၊ ဆန်းကြယ်သော စွမ်းအင်တစ်ခုအဖြစ် ပြောင်းလဲသွားကာ သူ၏ စိတ်အာရုံ ပင်လယ် နက်ရှိုင်းသော နေရာသို့ နစ်မြုပ်သွား၏။ ထို့နောက် သူ၏ ခန္ဓာကိုယ် အနှံ့အပြားသို့ စီးဝင်သွားလေသည်။

ထိုအခိုက်အတန့်တွင် သူ၏ တန်းထျန်နှင့် ချီပင်လယ်အတွင်းရှိ ချီစွမ်းအားများမှာ မျက်စိဖြင့် မြင်နိုင်သော အရှိန်အဟုန်ဖြင့် တိုးပွားလာသည်ကို သူ အာရုံခံလိုက်ရသည်။

မူလက တန်းထျန်အတွင်းရှိ ချီစွမ်းအားများကို အပြည့်အဝ ဖြည့်တင်းရန် အတွက် အနည်းဆုံး နှစ်ပေါင်းများစွာ ကြာမြင့်ပေလိမ့်မည်။

သို့သော် ကံကောင်းခြင်း အမှတ်များ၏ အကူအညီဖြင့် တန်းထျန်နှင့် ချီပင်လယ်အတွင်းရှိ ချီစွမ်းအားများမှာ မျက်တောင်တစ်ခတ်အတွင်း ပြည့်လျှံသွားခဲ့လေသည်။

မရေမတွက်နိုင်သော ချီစွမ်းအားများ စုစည်းလာသည်မှာ တိမ်တိုက်များနှင့် မြူခိုးများ ဖြစ်ပေါ်လာသကဲ့သို့ပင်။

မြူခိုးများ၏ နက်ရှိုင်းသော နေရာတွင် မြွေပျံတစ်ကောင် ပေါ်ထွက်လာပြီး၊ ကောင်းကင်ယံသို့ ပျံတက်ကာ တိမ်တိုက်များကို စီးနင်းနေသည့်နှယ်၊ ဤနယ်ပယ်အတွင်းရှိ နတ်ဘုရားတစ်ပါးကဲ့သို့ မြင့်မြတ်သော အရှိန်အဝါများကို ထုတ်လွှတ်နေတော့သည်။

"မူလအဆင့် သိုင်းပညာရှင် တစ်ယောက်အဖြစ် တက်လှမ်းချင်တယ်ဆိုရင်..."

"ခန္ဓာကိုယ်အတွင်းရှိ ချီစွမ်းအားနဲ့ သိုင်းပညာဆန္ဒတို့ကို ပေါင်းစပ်ဖို့ လိုအပ်တယ်၊ ပြီးတော့မှ 'ရွှံ့နွံ နန်းတော်' ကို တိုက်ခိုက်ရမှာ"

"ရွှံ့နွံနန်းတော်ကို ဖွင့်နိုင်ပြီဆိုတာနဲ့၊ ဒီသွေးကြောအမှတ်ဟာ ကောင်းကင်နဲ့ မြေကြီးတို့နဲ့အတူ ပဲ့တင်ထပ်နိုင်ပြီး၊ ကောင်းကင်နဲ့ လူသားတို့အကြား ဆက်သွယ်မှုကို ရရှိမှာ ဖြစ်သလို၊ 'နောက်ပေါက် ဝိညာဉ်အမြစ်' ကိုလည်း ဖြစ်ပေါ်စေလိမ့်မယ်။ အဲ့ဒီကနေတစ်ဆင့် ဝိညာဉ်အမြစ် ပျိုးထောင်တဲ့ အဆင့်ကို ရောက်ရှိသွားပြီး၊ ကောင်းကင်နဲ့ မြေကြီးအကြားက ဝိညာဉ်ချီတွေကို အာရုံခံနိုင်လာလိမ့်မယ်"

"တစ်နည်းအားဖြင့် ပြောရရင် ဒါက မူလအခြေအနေကို ပြန်လည် ရောက်ရှိသွားတာပါပဲ"

"ဒီနည်းနဲ့မှသာ ကျင့်ကြံခြင်း လမ်းစဉ်ပေါ်ကို စစ်မှန်စွာ ခြေချနိုင်မှာ"

ကျန်းဖန်သည် ယခင်က သူ ရရှိခဲ့သော သိုင်းပညာဆိုင်ရာ အချက်အလက်များကို ပြန်လည် သတိရလိုက်သည်။

သူ၏ လမ်းစဉ်ကို သူ ရှင်းလင်းစွာ နားလည်ထား၏။ မိမိဘာသာ ကြိုးစား ကျင့်ကြံမည်ဆိုပါက မူလအဆင့် သိုင်းပညာရှင် အဆင့်သို့ စစ်မှန်စွာ ရောက်ရှိရန် မည်မျှကြာဦးမည်ကို သူ မသိချေ။

သို့သော် ကံကောင်းခြင်း အမှတ်များ၏ အကူအညီဖြင့် သူသည် နှစ်ပေါင်းများစွာ ကြိုးစားရမည့် အချိန်နှင့် အားထုတ်မှုများကို သက်သာစေခဲ့သည်။

သူသည် မျက်တောင်တစ်ခတ်အတွင်း အရှင်သခင် အထွတ်အထိပ် အဆင့်သို့ ရောက်ရှိသွားခဲ့ပြီး၊ မူလအဆင့်သို့ တက်လှမ်းရန် အခွင့်အရေးကို ရရှိသွားခဲ့ပြီ ဖြစ်သည်။

ဝုန်း…

ရုတ်တရက် ကျန်းဖန်သည် သူ၏ ဝိညာဉ်စွမ်းအားမှာ ယခင်ကထက် ပိုမို အားကောင်းလာပြီး၊ 'ကောင်းကင်နှင့် လူသား တစ်သားတည်းကျခြင်း' အဆင့်သို့ ရောက်ရှိသွားကာ မိမိကိုယ်ကိုယ် ပြန်လည် ဆန်းစစ်နိုင်သည့် အခြေအနေသို့ ရောက်ရှိသွားသည်ကို ခံစားလိုက်ရသည်။

ထိုအခိုက်အတန့်တွင် သိုင်းပညာဆန္ဒကို နားလည်သဘောပေါက်သော အရှင်သခင်များသာ အဘယ့်ကြောင့် မူလအဆင့်သို့ တက်လှမ်းနိုင်သလဲ ဆိုသည်ကို သူ နားလည်သွားခဲ့သည်။

အဘယ်ကြောင့်ဆိုသော် သိုင်းပညာဆန္ဒကို နားလည်သော အရှင်သခင်များ၏ ဝိညာဉ်သည်သာ အသွင်ပြောင်းလဲမှု ဖြစ်ပေါ်နိုင်ပြီး၊ ခန္ဓာကိုယ် နက်ရှိုင်းသော နေရာရှိ ရွံ့နွံနန်းတော်ကို အာရုံခံနိုင်စေသောကြောင့် ဖြစ်သည်။

အကယ်၍ ၎င်းကို အာရုံမခံနိုင်ပါက မူလအဆင့်သို့ တက်လှမ်းရန်မှာ ပြောနေစရာပင် မလိုတော့ပေ။

ဒေါင်…

ကျန်းဖန်သည် သူ၏ ဝိညာဉ်စွမ်းအား အလွန်တရာ အားကောင်းနေသည်ကိုလည်း တွေ့ရှိလိုက်ရသည်။ သာမန် အရှင်သခင်များထက် အနည်းဆုံး အဆပေါင်းများစွာ ပို၍ အားကောင်းနေ၏။

ဖြစ်နိုင်သည်မှာ သူသည် ကမ္ဘာကူးပြောင်းလာသူ တစ်ဦး ဖြစ်သောကြောင့် သူ၏ ဝိညာဉ်စွမ်းအားမှာ အလွန်ပင် ပြင်းထန်နေခြင်း ဖြစ်ပေလိမ့်မည်။

သူသည် သူ၏ ရွှံ့နွံနန်းတော်ကို အလွယ်တကူပင် ရှာတွေ့လိုက်သည်။ ၎င်းမှာ ဦးနှောက်အတွင်း တည်ရှိသော ထူးခြားသည့် သွေးကြောအမှတ် တစ်ခုပင် ဖြစ်သည်။

ချက်ချင်းပင် ကျန်းဖန်သည် မြွေပျံအသက်ရှူခြင်း ကျင့်စဉ်ကို လည်ပတ်စေလိုက်ပြီး၊ တန်းထျန်နှင့် ချီပင်လယ် နက်ရှိုင်းသော နေရာရှိ မြွေပျံချီစွမ်းအားများကို လှုပ်ရှားစေကာ ဝိညာဉ်စွမ်းအားနှင့် ပေါင်းစပ်လိုက်သည်။

ထို့နောက် မြွေပျံ လေစီးကြောင်းများအဖြစ် ပြောင်းလဲလိုက်ပြီး ရွှံ့နွံနန်းတော်ကို တိုက်ခိုက်ရန် ဦးတည်လိုက်တော့သည်။

ဝုန်း…

ချက်ချင်းပင် မြွေပျံတစ်ကောင်သည် ကြောက်မက်ဖွယ်ကောင်းသော အင်အားဖြင့် တိမ်တိုက်များကို စီးနင်းကာ ရွံ့နွံနန်းတော်ကို ပြင်းထန်စွာ ရိုက်ခတ်လိုက်လေသည်။

မူလက ခိုင်မာလှသော အတားအဆီးမှာ တစ်ကြိမ်တည်းနှင့်တင် အစိတ်စိတ်အမြွှာမြွှာ ကြေမွသွားခဲ့လေသည်။

အမှန်အတိုင်း ပြောရလျှင် သာမန် အရှင်သခင် တစ်ယောက်သာဆိုပါက ရွှံ့နွံနန်းတော်၏ အဆီးအတားကို တိုက်ခိုက်ရန်အတွက် အကြိမ်ပေါင်း ဆယ်ဂဏန်း သို့မဟုတ် ရာဂဏန်းခန့် ကြိုးစားလျှင်ပင် ထိုအတားအဆီးမှာ အနည်းငယ် အက်ကွဲသွားရုံသာ ရှိမည် ဖြစ်သည်။

…